BLUEMING 🦋 CHAPTER-1 BY UNKNOWN BELLE

BLUEMING 🦋

BY UNKNOWN BELLE

CHAPTER 1

(Changtupa POV)

"Tah der kual vel kha a ngai lo." 

Ka ţawngkam chu a nelawm loh viau, pawi ka tih loh zawng tak. He nu lakah hian ka fel viau nachhan tur ka hre lo e a.

"I sual hle mai." La insut hlat hlat chung chuan a rawn ti a.

"Sual e." Ka fel miau lova sual nih ka inhmeh zawk reng a ni, ani lakah ngat phei chuan fel ka tum reng reng lo.

"I sual khawp mai." A ti leh a.

"Sual khawp e." Ka lo ti hmuk. 

A ţhutna ngaiah chuan a ţhu ngawi ta reng a, thosi a tam si engtin nge che lova a awm reng theih zawk ni.

"Ka haw dawn." tih leh din ka rual a, a rawn tho ve leh vat lawi a.

Ngawi rengin ka kal a, min lo zui ve nghal mai bawk.

Thui fe ngawi renga kan inzui hnu chuan ,"Ka tui a hal e..." A rawn ti tham chhel a, a tap nasa bawk a a aw in a tuar phah mai a lawm. Ngawi rengin a tah laiin a bulah ka awm ve tawp kha a nia, a tawng no theih theih nen a tah meuh chuan aw chu nei ring ţha tak a ni ringawt,a ţap rei ropui si.

"Kha!" Ka rucksack a mi bottle phawrhin ka pe a, a lo tam vak tawh lo.

"In zo rawh." Ka ti hluk a, a tlem tham si khatiang midang inkhawp pawh ni tawh lo.

"Nakinah i in ve duh ang." A tih dam thluam chuan ka lo ngaithei tawh lo lehpek. Ka thinchhe viauin ka hre si lo.

Ngawi reng chuan bottle pawh lak sak lovin ka kal nghal nul nul a, min lo zui ve zel bawk. Hmeichhia a ni bik tih lam ka ngaihsak peih lo ka pen ngai ngai chuan ka pen mawp mawp a, ani erawh a rawn tlan ti tih a ni ber.

Ka bul a rawn tlan thlen ruala a thu rawn sawi avang chuan ka ding chut a, chiang em em hian min lo melh chho ve kar.

"Min hua tiraw?" A rawn ti nawn leh a.

"I ngaihtuahna sual a nih chu!" Ti hmakin ka kal lehnghal daih. 

Zep loh chuan ka hmeichhe ngainat chi a ni bau lo a lawm. Hmeichhe ti dîn dèn,zawiawi hmel tak leh pawi sawi lo hmel zet a a lanna phenah hian zan rei tawhah mipa ten an phur chhuak ţhin tih a hriat miah loh. Ka mit ngeiin vawihnih ka hmu tawh bawk. 

Ka nau chu ni se ka zilh nek tawh ang chu! 

"In va rei bik ve." Kan ţhianten min hmuh takah chuan an rawn ţawng lawng lawng a, an bul kan thleng dawn tho tho a ka chhang peih rih lo.

"Malsawm i ţap em ni? I hmel a va dik lo ve, Lalfakte i hau a ni maw?." Kan zinga hmeichhe upa ber U Dongi chuan a rawn ti zui a, midang ho chuan min en ţhap, Malsawmpari ka en chuan a hmelah a tap nasa tih a lang reng mai.

Ka mizia an hria a, min ringhlel pawh chu a awm lo hran lo.

"A dawih vang a nih kha." Ka ti ringawt a, a dik reng bawk a,khati takin pangang a hlau tih hre hek lo i, a kekawrah a bet tih ka hrilh pah khan ka kal nal nal a, ani lo hlau lutuk che ngam loin a hmuh rualin a tap ta vak mai a. Ka lakthlak a ka tih hlum hnuah pawh rei fe....a ţap a nih kha.

"Ka kekawrah pangang a lo bet a." Malsawmpari chuan a lo ti ve thuai a, midang ho pawh an thaw huai mai. 

Kan ţhian ho hi kan rual ang reng a, tette aţanga inkawm tawh kan ni hlawm. Mahse zirna avangin hmun hranah an awm te a ţul ţhin a, tunah hian exam chawlh lai a ni bawk a tiin Ţana te leiletah kan kal a, Malsawmpari hian thlamah a phone a theihnghilh avangin ka let pui kha a nia, a ţah avangin kan thangrei zek lehnghal.

Malsawmpari hi chawlh hmangin kan khuaah a rawn zin a, a thlenin te hi kan ţhian zinga mi Zuitei a nih avangin kan zingah a tel ve zel mai a, hmelchhia hi paruk an awm a, an inkawm thei hlawm viau. Mipa hi panga kan ni thung a, Hminga leh AZela te hi phir an ni tih ka sawi tel hram teh ang. Inkawm nikhua pawhin thawm kan nei lian thei hle, thawm nei ring zingah tel lem lo mah ila an zinga awm ve zel hi nuam ka ti em em tho.

Zuitei hi hmeichhe zingah pawh a awm khauh ber kan tih ang kha a nia, Malsawmpari erawh engkim a hnudawl ngai ang a ni thung. A che buai pawlah a tang ve ziah a, midang hi chuan an dawm thiam viau a, ka ngaihven peih ve ngai lo thung. A lakah hian ka dawhtheihna a pan riau ţhin, chuvangin hnaih tam loh mai hi ţhain ka hria.

Nidanga min be ngai hlei lo khan a phone lakpuiah min sawm teh tlat a, midang ho lahin kan lo nghak ang che u an tih nghal hlawm avangin ka kalpui ve mai kha a nia, kan thang chhung zawng khan kan inbe mang lo ti ila ka sawi sual lo ang.

Kawngpui kan chhuah chhoh takah chuan mahni lirthei kenah theuh kan chuang a,kal lama inphur ngai te bawk an inphur leh a, nidang ang bawkin tumah ka phur lo. Indaih loh ni khua te chuan phurh nei ve ţhin mah ila awl kan awm hunah erawh a awl pawlah ka ţang ziah. 

Ka ţhiante hian min hrechiang bawk a, min nawr lui ngai lo bawk. Han infiam ve bawrh bawrh mah ila mahni chauh a awm duh hun lai te ka nei a, ka mizia ang ang a min dawm thiam hlawm em avang pawh hian ka ngaina a, anni ang ţhian ka nei hi ka vannei tak zet.

Vengkhat a awm vek kan ni bawk a zan lama KTP hnatlang a inhmu leh turin kan inthlah sang sang a, Zuitei te nen hian kan inhnaih ber a, an kawt a an pen dawn chuan ban vai zauhin ka tlang phei a, kan in leh an in inkarah hian in pakhat chiah a awm. 

Ka haw thawmah chuan ka nu a rawn chhuak a,haw har min tih thu a lo sawi luam a, in chhung a kan inzui luh chuan naupang an awm tih hriat takin a lo hnawk rum mai. Ka u ten chaw an lo ei dawn a ti tak e!

VanLalfakzuala ka ni a, ka pi hoin ka nu leh pate nen kan khawsa mek a. Kan unau hi pali niin u mipa leh hmeichhia ka nei a, ka u te hian nupui pasal nei ve ve tawhin kan upa ber URinpuia hi a hna thawhna lamah an chhungkuain an awm a, fa pathum an nei tawh a, an rawn haw chang chuan kan chhangchhe ţhin hle.

Min chhangtu ULyni ve thung hi chu kum hmasa lawkah pasal a nei a, veng ţhenawm chiah a mi a ni bawk a, rawn len an harsat lo. Tunah hian fapa chum zet thlariat mi an nei a, a pasal te lam aţanga tu hmuh hmasak ber a ni bawk a an duat rawn hliau hliau khawp mai. 

ULyni nen hian kan inkarah kum sarih a tla a, ka chhang chiah Bektei nen hian kum ngain kan inthlau bawk. Ka lan danah hi chuan nelawm vak lo mah ila ka chhungte hi ka ngai pawimawhin ka nau pawh ka theih tawkin ka duat ve chuan ka hria, mipa leh hmeichhia ni mah ila ka nau pawhin min ngai ve viau chuan ka hria a, ka pi hian kan unau rau rauah min duat bik riau bawk a, ani tan hi chuan a bawihpuia ka la ni ta reng a nih hi.

"Bawihpui i lo haw tawh maw,i chau em?" Ka pi'n min hmuh rual chuan a lo ti vat a. Pathian zarah kan vannei a ka pi hi a kum rual angah chuan a hriselin a mawng a la zang hle.

Ka chhan hma chuan ULyni pasal UTea chuan "Pute Bawihpuia a lo thleng a nih chu....." ti hlutin an naute choka aţangin a rawn phei pui a, kan inhmuh khat nen naute chuan min lo nuih var var zui, a biang a puar ang reng si a a ha to tir lang vekin a ţhen bawk nen naute lem a ang reuh lutuk.

"A chauh thlak vak loh, ke a kalna tur a thui vak lo a." Ka pi min zawhna chhan pah chuan naute biang chu ka piai hram a, min lo ban nghal zui a! Mahse ka la inbual lo bawk nen ka la duh lo.

Ka chawhmeh hawn ve ho chu chaw ei dawhkanah ka dah a, tam chu a ni lo, mahse hetia chhungkaw ei tur hawn nachang ka hriat ve hnu hi chuan puitling riaua inngaihna hi ka nei ţhin a, a nuam ve riau. 

Ka nu'n ka inbual zawh a chaw a ei theih tur thu a sawi chuan ka room lamah ka lut zui ta nghal a. Rei ţhu loin ka inbual zui a, tui sa ver vawr a ka in leih chuan ka taksa in a mamawh bawk a niang chu ka dam huai huai hian ka hria.

Ka ţhiante ai hian ka pawl sang ţhin a, ka chhungte hian pawl min bawhkan tir vang a nih ber chu. MCA ka zir zo chauh a, thil dang ngaihven lovin ka cousin Joela computer zirna dawr hawn tharah instructor turin min sawm hlauh a, a remchang bawk a tiin hna dang ka ngaihven lem lo. Thla khat ka thawk tling ve der tawh.

Ka inthlak fel hnua room ka chhuahsan dawn chuan ka phone lo ri chu ka ban nghal a, Elii hming ka hmuh chuan ka chhang zui vat. Zanin hnatlang a ka kal dawn leh dawn loh min lo zawt duh a lo ni. Ka hrilh ţha leh ang che ka tih kha ka be leh ta miah lo tih ka hre chiah.

Ka kal dawn thu ka sawi chuan phur zetin a hmuna inhmu turin kan inbiakna a ti tawp a. Ani hi kan veng tleirawlah chuan hmelţha ka tih pawl tak a ni. Min ngaizawng tih a cheziaah a thup ngai lo, mahse midang awm laiin mit ti kham zawngin a khawsa ngai lo thung. Ka ţhiante phei chuan kan inkawp turah an ngai hmiah. 

Ngaihzawng chung changah hian ka fimkhur ang reng a, a rem a piang bawhzui mi ka ni lo. Bialnu pawh pahnih ka nei ve tawh, inti pa chi ka ni bawk a hmeichhia avanga rilru tih nat ka tum ngai lo. Ka bialnu ka ţhen tak teah pawh khan ka duh ve viau a ka hriat pawhin kan inthenna khan keimahah danglamna a thlen loh zia tihlan duh tlat ţhin ka ni. Ka ţhiante phei chuan luhlul min ti ţhin hle, a chhan pawh ka rilru anga ka awm chhuah ve mai ţhin lo ang a min ngaih avangin. 

Elii pawh hi ka biak hmasak a ni lo, aman min rawn bia a, mahse ngaihzawng chung chang min sawi pui ngai lo, a awmdanah ka man thiam thung. Bul ka ţan hun a nghak te pawh a ni mahna. Mipa lerh ti a sawi tur chu ka ni lo chuan ka hria, tunlaiah chuan hmeichhia zawk hian bul ţan hmasa tu nih an hreh tawh lova, ka tawng ve nual tawh bawk. Elii hi chu'ng zinga mi chu a ni nghe nghe. Amah hrim hrim hi ka hriat sa a nih avang khan ka be zui ve mai kha a ni a. Tunah college a kal ve mek a, mipa lamah pawh a tlak nat ka ring, ka biak ve chhun ni mah se message han type neuh neuh te hi ka peih vak loh avangin ka online khat phah ang reng. 

Chaw kan ei laia ka pa'n committee pawimawh a chhuah a ngaih thu a sawi chuan kei pawh Branch hnatlang a ka chhuah tur thu ka lo sawi ve vat a. Ka piin kan thawh tur min zawt chik leh hle, a mizia ve hrim hrim a ni a, ka unau te chuan an ning ţhin. Ţha taka ka dawnsawn ţhin vang te pawh hian min ngaina bik ve bawk a, ka unau ten min thik ngai lo bawk.

"Kan lo len hman ve leh chhuah in lo ngai ve ziah." ULyni'n a tih chuan ka nu'n, "An chhuah daih chuan a khawhar thlak ţhin a, in awm ţhin hlauh a ipi nen kan lawm thei teh a nia." A lo ti ve a.

Naute an neih hnu hian tum thum vel chaw an rawn ei tawh. Ka pa hi chhuah a ngai ziah tak tak. Kohhran upa a ni bawk a inkhawm a awm loh zanah pawh committee a nih loh leh dam lo tlawh hian chhuah a ngai zing ţhin khawp a, ka pi leh ka nu te hian in chhung an uap hneh hlauh zawk a. A hna aţangin a pension dawn tawh a, chhun lamah pawh in lamah a awm ve thei tawh a a zia tak tak a ni. 

"In lo len leh hunah chuan ka free tawh chiang ngawt ang." Ka pa pawh chuan a lo ti ve bawk a, a intham lo ve deuh tawh pawh a ni mi mai thei.

Kan chaw eikham chu Bektei'n naute pawm chungin roomah min zui lut a, a sawi tur ka hre sa in ka hria.

"Elii nen khan inni tak tak a mi?" 

Ka ring dik chiah. Elii te nen school khatah an kal tlâng ţhin tih a sawi tawh bawk a, a hrechiang vein ka ring, mahse ka sawipui ngai chuang lo.

"Tu nge ti?"

Hnatlang tura ka insiam pah avangin naute pawh ka ngaihven vak lo. Khumah a awm pui a, a tlei ve viau.

"An sawi a lawm, amah pawhin i chanchin te min zawt leh a. A hmelţha chu ka tia, mahse......" A ti a, a sawi zawm loh avang chuan a lam hawiin ka mitko ka san zauh. 

"A.....a sual chuang lo nain, inngaizawng lo ula ka duh tho. Ka ţhiannu phei chuan a ngei thei lutuk." A tih chuan ka nui ringawt a, a hmeichhe thu em mai a.

"Ngei neih loh tur." Ka ti ringawt a, a lo ner nasa mai.

"Keiman ka ngei chuang hleinem, bakah nupui nei rual i ni tawh a." A rawn tih chuan ka nui huk a, ka pi pawh tih tawh nak a laiin, ka pi hian hmeichhe lam min sawipui ve a piangin nupui chungchang a sawi ziah.

"Nui ringawt suh." A tih chuan, "Ka la tlangval dawn chauh a lawm." Ka lo ti ve vat.

"Tleirawl ringawt ni lo nupui tlak zawng rual i ni tawh ka tihna a nih chu." 

"Nang pawh pasal tlak i hual sa vang mai a." Ka tih chuan a run ngang mai. Bialpa a nei miah lo, mahse kan ţhianpa Zuata hian a helna a rei tawh, ka naui hian a duh lo ve tlat a. Kan ţhian rual zingah Zuata hi a upa ber a ni thung a, college a kallaiin a lehkha zir a tui hlawllo ti khan lumehna dawr a hawng a, sumah an buai lo bawk a, tunah chuan a hnuaia thawk an awm fur tawh. Art lamah a tui bawk a, a lehkha zir a chawlh san daih chu a inchhir lo ve chiang khawp mai.

Ti hian eizawnna nghet a nei chu a ni mai a, hei vang hi a nia Bektei pawh chhaih nan ka hman ţhin ni. Mahse sum vang ringawtin mipa a ngaihven phah kher lo tih ka hriat chian phah a a tihzia phian mai. Hmeichhe ţhenkhat chu ni se a sum vang chauha ngaizawng duh an tam ang.

"I ninawm sawi ve ziah suh, kei aiin i upa fe zawk a, i nei hmasa dawn tho tho." A tih pang pang chuan ka lo nui ringawt. A duh loh hi a pe na ţhin ang reng si, kei lahin chhaih a nuam ka tih phah thung a.

"Chuvangin Elii hi chu kan mo turin ka duh vak lo." A rawn ti leh a, a sawi kual vak a, a sawi tum tak a sawi chiah tih ka hre mai.

"Mo fel deuh i duh chuan Lo ţawngtai char char rawh, ka kal dawn." naute chu chuk zauhin ka chhuak zui nghal a, ka pi'n min hmuh chuan fimkhur turin min lo chah leh hram.

Kohhran hall sak mek ceiling siamna vel seng fel a ngai tawh a, kohhran hnatlang koh nan chuan a hna a hautak lutuk lo bawk nen zan lamah branch hnatlang an ko ta kha a nia, thawk kan ţhahnem leh fu mai thei a ni.

Kan in aţangin Biakin hi a hla lo a, chuvangin ke in ka kal mai ţhin. A hmunah kan inhmu khawm dawn tho tiin tumah ka sawm lova, thil dang reng rengah pawh a tlai pawlah ka ţang ngai lo bawk a zanin pawh a thleng hma pawlah bawk ka ţang. 

A thleng hmasa a piangin kan tih theih ang tawk kan ti nghal sap sap a, ceiling an dawm kanna thing ho lak sawn a ngaih avangin kan in nghak khawm leh rih a, ka ţhiante hmel ka hmuh takah chuan an awmna lam ka pan vat a, vawiin lama kan kalna vel sawiin an lo nui dar dar. Ka va pawh chuan kan hmuipuipu ber Ţana chuan titi a lo vawrh leh zat zat tawh. An bul ka thlen chuan an hmel ka hmuh ve loh ho chu vawiin lama an chauh deuh avanga an kal loh thu min lo hrilh luam a.

Hmeichhe lamah pawh Kimtei leh Buangi chauh an rawn tel thei a, ram lama kal ngai lo tan chuan a chauh thlak ve tho mai thei. Mipa tan erawh chauh pui tham a ni chiah lo thung.

Ţhian ho inti hlim tura kal kha kan ni a, Ţana pâ khan kut ruaka kan haw a lo phal hauh lo mai a. Kan hnar lui ve viau nain chhungkaw vawikhat eikhawp theuh anhnah leh thlai min hawn tir kha a nia,a inthlahrunawm letling zawk. 

An leilet chhak lamah dragon fruit hmun zim lutuk lo an nei bawk a, an eizawnna ber a nih loh avangin an sem chhuak nasa a, keini ho pawhin kan ei ţeuh mai. Thei tui tak ka tih chi a ni lo, mahse tui lo ka tih viau pawh ka hre chuang lo, ka nauin a ngaina em a ka hawn ve leh tho.

Chutia kan lo ţhut khawm lai chuan Malsawmpari a rawn lang ve leh hlawl a, midang ho chuan Zuitei chanchin an lo zawt thuai, a sil ve deuh avangin a chhuak lui peih lo a ti a,"Ti khan i kep thei a ni mai lawm." Zuata'n a tih chuan a lo nuih var var a. Vawiin lamah ni sa an do nasa deuh bawk a an meng sem deuh rum hlawm hian ka hria.

"Eh~ saw mi ka hmu." Ţana'n a rawn tih chuan a hawina lam kan hawi ţhap a. Elii te ţhian dun an lo ni, min rawn hmu ve loin an ţhian dun chuan an ţawng melh melh a. Va pan ka tum chuang lem lo.

Hruaituten kan thawh dan tur rel felin kan kal darh sang sang a, kan rual ang reng a hah taka thawh tham a awm lo.

Kan thil tih lai kan zawh chuan Zuata'n chokaa kalpuiah min sawm a, ka zui ve mai bawk.

"Hmanzan inkhawmnaah ka nu'n a tarmit a theihnghilh a, a lam theihnghilh ta reng a. Pu Bawla khan chokaah ka dah i va hmu mai ang a tia." a ti a, Pu Bawla hi kan kohhran chawkidar a ni nghe nghe.

"In aţanga han lak em chu ka peih bawk si lova hnatlan paha lakah ka rial ta reng a. Hriat chhuah laia lak vat loh chuan."A ti zui a. Biakin choka hi building hnuailama awm a ni a, mahni hma zawn theuh a an buai lai a ni bawk a choka lam chu a lo reh viau.

A chhung kan luh chuan Malsawmpari leh UDongi an lo awm a, an lo fatu a nih hmel.

"Hetah in lo biru a ni maw?" Zuata'n a tih chuan UDongi'n,"In ei tui loh hlaua kan buai khawp hi maw." A ti hlak a, a ţawngkam hi a bak ve hrim hrim a, amah hre ngai lo tan chuan a nelawm loh viau ta ve ang.

Zuata bawk chuan,"Thenfai nghauh nghauh a ngaih loh beisei ang." tiin a fiam leh hram,, a fiam nuam tih ber a ni bawk a, an inhau fawk fawk reng mai zel. UDongi hi khawdangah a pa hna ai kalin a awm deuh reng ţhin a, tunah chawlh hmangin a rawn haw ve lawk a,a awm loh hi chuan a khawhar thlak ve ţhin viau a ni.

"Ui Vanlalzuat ngawi mai mai teh, a tui ti ti ah i ţang leh dawn sia e...i dawh nawn leh nawn loh ka vil vek dawn a nia."a ti hluai a, a rawl hi a ring ţha ţhin teh e.

"Nang pawh Lalfakte, thlalak min thawn har ropui si, zanin a status a upload ka duh nen." a ti zui hmarh hmarh a, phone ka ken chhuah loh thu la sawi chuan, "Ka ring reng a!" a lo ti hlak, ka chhang zui duh lo, englai pawhin sawi tur chu a hre reng.

Zuata'n tarmit a hmuh takah chuan bathroom a hman lawk tur thu sawiin a kal sawn a, UDongi kha khawnge a kal hman pawh ka hre lo. Malsawmpari nen chauh kan awm a, a thil tih lao ngawi rengin a tih zawm mawlh mawlh.

A thil tih lai thu chunga ka en reng lai chuan a chi pack ken lai chu a rawn baw ta zul zul mai. "Uiha!" Tiin a pawp laiah a dawm a, min rawn en zawk. Ka lo melh ve ngar bawk a.

A tet lai chu dawm reng chungin bur chhungah chuan a bang zawng chu a dah lut a, a kawr a kai ho pawh thinhthla zung zungin a phiat a, leia baw ho zawng chu bawlhlawh bawmna a paih vek. Dawhkan a awm ho pawh a chunglang a la hram a, a bak pawh a paih vek. A che chu ka lo en reng a, a che rang ka lo ti khawp mai.

"Tumah hrilh suh aw." min en pah chuan a ti sap a, hawi kual te tein dâr ka chhîn zeuh ringawt. A zahve dawn a ti bua a nia, a che fello lutuk chu tih vak ngaihna awm bik hek lo le, ka hre lo der ve ta tawp.

"Ka tilui pawh a ni lo, ka hawng uluk ve hle sia, a baw tho." a ti leh a.

"Nia a bua chu a nih kha." Ka tih chuan ngeiawm min ti deuh nge ni a ner sak.

"Ho em mai ka tilui chuang lo." tiin amah leh amah a inthiam chawp a, ka sawi zui pui peih lo.

Zuata bathroom aţanga a rawn chhuah hnu chuan choka kan chhuahsan a, UDongi lo chhuk mek nen kan intawk bawk. Hnatlang a thawk zat a lo chhiar a nih hmel.

Midang hnathawhna lamah kalin kan pui ve nghal a, tha a rual bawk a kan thawk kaa duak duak mai.

Thingpui in a kan chawlh lai chuan Elii'n min rawn pan vat a, kan ţhian mipa ho kan awmkhawmnaah a ni nghe nghe. Hmeichhe lam erawh thingpui buaipuiin choka lamah an awm niin ka hria.

"In va fel ve a inrawn hnatlang hman a." Azela'n a tih chuan a nui sak a, a biangsum lang kek a a nuih hi chuan a hmelţha ve bawk a ni.

Ka bula rawn ţhut ve pah chuan, "Hman ve laia tel loh chu a inthlahrunawm a lawm." a ti a, a dik viau bawk. Zirna avangin tu a mah hi innawr luih ngawt theih a ni si lova, hman remchan laia kan han tel ve thei mai zel te hi hruaitute tan chuan a lawmawm duh ngawt ang.

"I phone i keng lo em ni?" A rawn tih chuan ka ţhiante chuan kan inbiak fal theih nan thildang an sawi vat a, an inti zei ţhin hlawm ang reng si. Elii nen phei hi chuan min fiam zuk zuk an hrat hle bawk.

"Um.... vawiin lamah ka hmang nasa deuh a." Ka ti ve mai a. Hmeichhe hoin thlalak nan an hmang nasa reng lah tak a, camera pangngai an keng chung pawhin UDongi ber khan ka phone a chang chawt a ni ber. Tlai deuh tawh ah a rawn kal a,nichina kan inhmuh pawhin thlalak ka thawn har a ti lutuk a min lo zilh leh nek tawh. A duh duh a a hauh leh tirh ngam kan ni bawk a, a rilru a awm ang ang hi a rik pui phawng phawng zel bawk a, midangin thinrim phah nan kan hmang ngai lem hlei lo a.

"U Kimtei status ah khan ka lo hmu a, a van nawm hmel em em, ka kal ve chak tawp. Apa te hian lui lama kal an phal ve ngai lova." A ti siam siam a. 

"Chhungte berin an phal loh chuan kal chak duh tawh suh." Ka ti ve mai a, ţawngkam hi ka thiam vak lo, an huat leh huat loh chu dawngsawngtu a zir a ni thung.

"Nia..... Mahse hman aţangin ka la kal chak char char tho, inkal leh hunah min sawm ve la." A tih chuan min en kar a, kei pawhin a hmel ka hmuh chian theih nan a lam hawiin ka insiam rem a, "I chhungten an phal ngai lo i ti zo chauh bawk sia." Ka tih chuan ner nangin a hawi sawn a, a lai zawk nge maw ni.

Chutah nui sukin,"Kan la ngaihtuah ţha dawn nia." ka tih rual chuan a hmelah a phur hle tih a hriat theih. Mahse a chhungte rem ti lo chung chu hruai luih tumna ka nei lo thung.

"Nangman min dilpui chuan an phal hrim hrim." Nui var varin a ti a, dilpui tumna ka neih pawh ka hre lo. Hunin a la hril turah ngai ang.

Hmeichhe lam hna a tam zawk a nih tawh avangin kan ţhian ho chuan kan la ţhu khawm a, phiah fai tur a tam phian mai thei a ni. Elii kal sawn hnuah ka ţhianten min sawi pui an tum nasa, mahse ka chhang mumal ngai lo.

Anni chuan inhawng takin an sawi ve mai zel a, kei chu ka he ti tlat ţhin. Han phur hluaina tur ka hre lova, chuvangin sawi chhuah kher a ţulin ka hre ţhin lo, chu bakah ka sawi chak lo ve bawk ţhin, titi thui tak han chham hi ka tih ngai a ni lova, ka ţhiante zawhna pawh a chhanna chiah chiah zelin ka chhang ţhin, ka sawi zui thui ngai lo. Hetiangah te hian min nawr lui ngai lo a, hahdam takin ka awm theih phah ţhin ti ila ka sawi sual lo ang.

Hnatlang kan ban chuan a la tlai lutuk lo bawk a Elii te ţhian dun nen kan inzui a. Ka ţhiante pawh be zui tawh lovin an in awmna lam kan pan a, a ţhiannu chuan chance min pe ve ngeiin midang a zui ta daih a, a pawi ka ti lem lo. Elii nen kan inkarah inngaihzawnna lam thu sawi lo mah ila kan awmdanah kan inhaw lo tih chu a hriat viauin ka hria, mahse bul han ţan pui tak tak tur hian ka duh chiah em ka hre lo. Tleirawl hmelţha leh chhelo tak a ni a, mipa dang pawhin an hnar mai bikin ka ring lo.

An in awmna hi kan in nen chuan a inhlat khawp mai, kal kawngah chuan a zirlai leh a hun hman dan te sawiin a ti ti siam siam a, zawhna ka zawt ve zauh zauh bawk. Phur takin min chhang ve zel a, a hmel hi chu a ţha ve thlawt.

"A nih leh maw.....thil dang daih, bialnu engzat nge i neih tawh?" Tlema a aw ki tidang deuhin min zawt a, pahnih ka neih tawh thu ka lo sawi ve mai. Ka zawh ngai hauh lovin ani chuan pakhat chiah a la neih thu a sawi a, sawi zui vak dan tur pawh ka hre lo. Kan ngawi leh ren rawn a, muangchangin kan kal a,kawngpui a reh deuh tawh bawk a boruak a nuam khawp mai.

"Kan thleng har tawh i ti awm...."

A tih pah chuan a nui sak a, "Ti lem love, i chhungten haw har an lo ti tawh zawk ang che."tia ka chhan chuan a nui var var a, hmuh hrehawm a ni lo ve chiang.

An in kan hmu pha tawh tihah chuan a ţhiannu khan midang bike a chuang chungin ban a rawn vai lauh lauh a, ani pawh a haw dawn chauh bawk a a chhungte chuan an ngaihtuah bik viau lo turah ngai ang. Sawi tawh angin ka nau rualpui a ni bawk nen ka nau ang thoin a chhungte ka ngaih pawimawh sak viau.

"U Fakpui, ih....ti hian kan inngaizawng tihna tho a ni em?" Hawi pawh rawn hawi chhuak mang lova a tih chuan ka nuih a za tep. A zawhna chu ama lam aţang chuan a awm ang viau tho mai.

"Midang buaipui ka nei hleinem." Ka ti ve mai a, ka bialnu ni tura han sawm kha ka tîm tlat a nih chu! Sawi felna chance kan neih ţhat nen! Ka puitling lo ka inti hle.

"Kei pawh nangmah chauh." A lo ti thuai a.

"Mahse ih......" A tih lai chuan an in piah kawng kual atang chuan muang changin scooty an rawn nawr chhuak a, a thil sawi pawh a tawp hmak.

Street light eng hnuaia ka mi hmuh avang chuan Elii pawh ngaihven lovin ka en reng ringawt. Tun angah Malsawmpari he lai daih daih a ka hmu chu mak ka ti dawn viau a,mahse a hma pawhin an phur chhuak tur ka hmu tawh ţhin a mak ka ti leh vak lo. Chu ai chuan Zuitei scooty a rawn nawr chu mak ka ti zawk.

Ani pawh chuan keini lo ding reng chu min hmu thuai a, min hmuh chian hnuah phei chuan ding taka hmalam enin a nawr ngat ngat. A accident pui a nih ngei ka ring, scooty chu a hmalam a râng tih ka hmu thei.

Elii pawh chuan sawi zawm lehna chiah a ngai tawh lo nge ni phone a inbe leh turin min thlah ta thuai a, an in a luh thleng chuan an Kawtah ka ding a. A luh dawnah a ban rawn vai chu ka chhawn vat a, a luh fel ve leh phur lo zetin kan in lam ka pan ve chauh. Ka hma lamah chuan Malsawmpari pawh ka la hmu pha.

A accident pui a nih chu ka ring hmiah. Thil reng rengah hnudawl ngai a ni ka tih tawh kha. Kan inhriatna la rei lo mah se a rin hriat theih tlat a ni. Kan ţhian ho inkawm khawm nikhua pawhin eng eng emaw buaina a la nei ziah, a che pawlawh viau pawh a ni mahna, plate a thlauh loh leh no a thlauh thul. Vawiin lamah pawh kal lamah a tawlh thlu leh nual bawk a, engtin nge maw a khawsak bik ţhin ni.

A bul ka thlen dawn chuan ka thawm a hre lo ni ngei tur a ni, ding datin a thaw huai a. A rawn leh hawia min hmu thut chu a phu nasa ngang mai! Mahse Street light hnuaiah ka hmel a hmu chiang bawk a a ţe ring hman lo hlauh.

"Min ti phu nasa lutuk." A awm dawm vang vanga a tih chuan ka hmui ka ti che zauh ringawt. Tih hlauh kha ka tum a ni bik chuang lo bawk a, thiam lohna ka neih ka hre lo. Thla nei se chu a thlawk hla hman viauin a nia ka rin ni.

"Khawnge i kal a?" Ka tih chuan min chhan tumin a ang zuau a, mahse a ngawi leh daih. Rin dan ka nei ve mai bawk.

Scooty chu kal hnaihin a ka en chiang a, a hmalam a râng tih loh chu hmelhemna dang ka hmu lo. Scooty ka en zawh chuan amah chu ka en leh a, scooty ngawt chu ngui láp leh inthlahrung hmel deuhin a lo en reng ringawt.

"A tlai tawh sia haw vat ka duh a." ti a a steering vawn ţhat a tum chuan ,"I accident em ni?" Ka ti ta nge nge a, ka zawh loh chuan min hrilh awm si lo.

"Aw......" Zawitein a rawn ti a, a la rawn hawi chhuak lo hrim hrim, a thuruk ka man chhuak ang maiin a inthlahrung bawk. 

"Chabi." ka kut ka va dawh chuan rang deuhin min pe ve mai a. 

Zan lama hmeichhe chhuah hi ţul leh pawimawh bik a nih loh chuan mawi ka ti viau lo, kan chhungkuaah pawh a kan tih ngai a nih loh vang te pawh hian a ni Malsawmpari hi ka ngaihtheih loh tlat ni! Min ngaina lo tih ka hria a, kei pawhin ka ngaina bik lo, kan inkawm ngeih viau a ţulna lah ka hre lo bawk.

Scooty chu ka ti nung dawn ţhin a, a nung thei tlat lo. Zuitei scooty hi chu tlemin a hlui ve deuh tawh bawk a, workshop ah pawh a luh pui zauh zauh tawh. Chutia ka buaipui lai chuan ngawi rengin ka bulah a lo ding a, ka nun theih tak lohah chuan a rawn ţawng chhuak ve leh, "Haw pui phawt mai ang." a rawn ti a. 

"Kal rawh." 

"A hla tawh chuang lo ka lo nawr law law ang." a rawn ti nangin ngaihsak tawh loin ka nawr ta zawk a. Engtin nge a chet pui leh eng nge a tih ber tih chu zawh pawh ka tum chuang lo. 

Ka hnunglamah chuan a lo dawm ve tho a, inbe tawh lo chuan kan kal ve zel a. 

Ngawi renga kal chu nuam a ti chiah lo nge ni,"Vawiin kha i chau em?" a rawn ti a, hawi let lem lo chuan ka chauh loh thu ka sawi ve mai. A hnuah a ngawi leh vang vang phawt a.

"In ţhian ho hi infel ka ti e." a rawn tih chuan ka chhang lo, sawi belh chiam tur ka hre lo. Kei pawhin ka ţhiante hi an fel ka ti ve viau a, ani pawh hian a lo ti ve a ni mai a. Keimah ber hi min nel tehchiam lo a, keimah zawk hian ka zir lo pawh a ni mahna, ka hua ni turah a inngaih tak kha mawle.

"Zuitei thin a rim i ring em?" 

"Rim ang." Ka tih chuan a inngaihtuah ve a ni mahna, a ngawi leh rauh rauh. A thin a rim kher chu ka ring chuang lo, a scooty a hman tir danah a kalna tur a hriatpui chu a ni chêk ang a. Bakah a tih luih te a nih ngawt loh chuan thinrim chhan tur a awmin ka hre lo, accident a ni ve mai a, bakah scooty hi a lo upa ve deuh tawh bawk nen a hriatthiam ve mai chu ka ring.

"Nichin a mi kha i bialnu em ni?" 

"Ni lo e."

"In inhmeh tawp." A rawn ti leh zat. Kan ţhian ho ah min ngaina lo ber ang ka tih tawh kha. Nidanga min be ngai hlei lo min biak nel a tum nge ni a dang riau. 

Titi pui ka chak vak loh avang chuan ka sawi zui ve lo. Ani hi awm lo se chu in ka thleng tawh ang. 

Ngawi renga kan kal chuan an inkawt kan thleng ve mai a, kawng chho a ni lo hlauh zawk a a hahthlak loh deuh.

Engtik laiin nge maw a lo inkhalh chhuah hman reng reng ni, hnatlanna lamah a kal ve reng khan ka hre si a, nge a damlai thla te hi ka lo hmu zawk.

Scooty ka hun fel hnu a ka kal tur chu min ko ding leh a, haw vat ka duh tawh tih chu ka hmel atangin a hriatthiam ve mai ka ring. Thup ka tum lo ve hrim hrim bawk.

"Thil min lo tih sak leh lawk teh a." A ti sap a, a awka chhuak hi a ring lem lo bawk a a ţawng zawi ang reng si a ka hre thei ţawk a ni.

"A tlai tawh nidangah a ni mai." tiin ka kal san daih a. A hma tawh lo reng a, tun angah te chuan in a lut a va insawi fel tawh tur zawk a niin ka hria.

"Fakpui... please in tun chiah! Ka ti tak tak." Min rawn zui tih ka hre lo reng reng.

Kan in leh an in inkar ka thleng hman tawh. Ning ru fe chuan ka hawi let leh a, ka hnung maiah a lo ding.

"Eng nge ni?" Ka kekawr ipte zen meuhin ka melh rûn a, a sam chu a bengah a zep ţha leh tè tè a, a rei ka lo ti hman pek! A sam a kir deuh hrim hrim bawk nen a lang thur siau mai.

"Min lo zui leh lawk la, aw! Chuan nakinah ka la rul leh vek ang che, ka lawm ngawt ang." A ti nghal zung zung a. 

Eng nge ka puih a mamawhna chu hre lo mah ila engtin tak min rulh let tum ang maw ka ti rilru a. Aw ka pawh beiseiin kut hma suih apin ka awm zawn a melh ngar a. Nula lian tak tia sawi tur a ni lo, té chhe lutuk a ni lo bawk. A hmai a bial reuh tih ka hre ve chiah. A hmain ka hmu ngai lo pawh ni loin ka chîk ngai lo ve hrim hrim. Cher lam aiin thau lam a pawl deuh zawk, amah chîk lem lo pawhin vun no tak a nei tih a hriat theih thung a. Khawi khua nge a nih pawh ka hre leh tawh lo, a rawn awm tan tirh khan Zuitei'n report a pe kimchang viau a, ka lo ngaihven vak lo kha a nia, tunah pawh ka la ngaihven chuang lo.

"Rei lo te chauh ni rawh se." Ka tih chuan bu nghat nghatin a inher a, a hmel hahdam huai chu ka hmu hman. Hun danga min be hreh em em si tuna ka puihna mamawh viau si chu, a chhan hriat ve hrim hrim chu a chakawm a lawm.

Scooty lam bawk a pan lai chuan, "I hnatlang ve reng emaw tia." Ka ti satliah a, a kal lai chu ding chutin a rawn leh hawi a, "Thingpui in hma khan ka haw daih a lawm, sawhchiar kha a tui in ti em? Khatiang a tam kha ka la siam ngai miah lo, a tui loh ka hlau tawp. Mahse tih tur pawimawh ka nei hlauh a a tui an tih leh tih loh pawh ka ngai chang hman lo." a ti duah a, ka zawhna bak bakin min chhan danah ka puihna amamawh viau chu a ni phawt ang a, Bektei pawhin min tlawn nan hetiang hian a ti fo ţhin.

Kal leh ta mai lo chuan, "Ka accident ta sia ka rawn let leh daih a lawm." a ti leh a, a sawi pawimawh ve nen a let leh awlsam ang reng tho bawk sia.

Scooty bulah chuan a ding tharh a, a bul ka thlen ve leh chuan a jumper ipte aţangin chabi a rawn la chhuak a. A seat chu hawngin a thil rawn lak chhuah chu mak ti fê hian ka en reng ringawt! 

End of chapter 1

💕