BLUEMING 🦋 CHAPTER-20 BY UNKNOWN BELLE

BLUEMING 🦋

BY UNKNOWN BELLE

LAST CHAPTER 

(epilogue)

Ka zing tho pawna ka ding lai chu Sawmin in chhung lama min auh chul avangin ka lut zui thuai a.

"Hmanhmawh rawh." nui var var chunga tiin kan mut pindan lamah chuan a lut zui nghal.

Ka va luh ve rual chuan, "Lo en rawh." tiin kan fanu thla sarihna hmang ve mek chu pawh thawh a tum a, ani la tho hreh lutuk chu a lo er nasa khawp mai. Zingkar karah kan nuihpui hawk hawk.

"La mut tir rih mai rawh." Ka tih chuan a rawn thawh san a, a muhil tawh chuang si lo chuan nuih a ti za zual.

"Lo ngaihven mai rawh. Ka bai chhuan kha a lo liam hman ang." tiin rang zetin a chhuak zui a.

Khumah chuan lawn lehin ka fanu Zodinsangi bulah chuan ka mu thla leh. Zawi zeta a mu chu pawm kang nawlhin ka awmah ka bawh tir a, ka tih ang ang chuan a awm hle hle. A biang buar zet chu ka chul hauh hauh bawk.

Thla sarih chauh a la ni chung pawhin kan chhungkua min tihlim in kan duat rawn em em mai a. A pa Zuata phei chuan,"Ani tan te chuan Khawvel a nuam dawn em mai." Tiin a sawi fiam fo.

A hnungah chuan na lo te tein ka beng det det a, a mit a la chhing ve reng tho,a chang leh phak deuhin a rawn meng a, anu mitmeng chiah chiah a ni ringawt. 

Rei pawh kan inawm hmain Ani a rawn lut leh tawh. Bektei hian a duat em em khawp a, ni nih a tlin pap pap khawp mai. A muthilh tawh loh avangin a pawm lawk a, a chhuahpui leh ta daih. A thawh ve leh a han nawrh te hi a nei ngai lem lo, a mu tho pawh hi ngawi reng hian a lo awm ve mual mual thei zel a, a pa ka nih vang nge ni a fel hi ka ti khawp a, miin an han fak te hian ka chhungril takah hi chuan ka inchhuang ru ve riau ţhin.

Kan mutna te siam felin ka chhuak zui ve a, Duati chu pawn lamah apu leh ani te nen an awm leh daih tawh. Kan inawl hneh ţhin khawp mai.

Sawmi leh ka nu'n ei rawng an bawl a, kawt lamah ka chhuak phei zui nghal.

Kan inneih hnu lawkah a ruak lo nghal a, ţhenkhat min ringhlel tawk an awm tih kan hria, mahse ka nupui berin, "Chunglam kan tih lawm tho te chuan miin min sel mah se awmzia a nei thui chuang hleinem." a ti mai a, kei pawhin chu chu a dik viauin ka hria.

Ţhiante lahin min fiam nan tak an hmang a, Sawmi awm lai phei chuan min fiam lo mah se pawi ka ti lo, a zak ţhin lutuk a a khawngaihthlak zawk. 

Bektei a chawlh dawn avangin kan chaw ei chhungin Duati a lo awmpui a, couching kal pahin private school ah a thawk ve rih a, zirna lamah hi chuan a ngaihtuah awm loh ve khawpin ka hria.

Sawmi chawhmeh siam ka paten an fak sak chuan a rukin ka malah a rawn sik zauh a, ka nuih a za ţhin viau nain ka nui chhuak duh lo. A sim hlei thei meuh lo.

Ka nu leh pate pawhin an duat ve viau chuan ka hria, naute ah an awl hneh bawk a inchhung chetah a buai phah ngai lo.

Ka insiam tur chu min rawn zui lut a, ka inbual hlanin ka hak tur a lo dah chhuak leh thlap tawh.

Naute thil khal hnawk ho a lo dah fel mawlh mawlh. Darthlalang hmaa ka inen lai chuan ka bulah a rawn kal a, ka lo kuah zui vat.

A hnunglam aţangin ka kuah hlu hlu a, ani pawhin ka kut lo chelh min ngheng ve sauh, darthlalang aţanga min rawn enin, "I khabe hmul hi ziah fai ţhen a ngai a ni." A ti sap a, ani berin a sawi te chuan kan ziat ţhen anga ni mai lawm.

"Nula ho mit ila lutuk palh ang." A tih chuan ka nui che dat, ani pawh chu a nui ve tho. Hetiang zawnga min fiam hi a hrat ve reuh a, a pasal ka ni tih hi min hriat nawn tir fo tihnaah ka ngaih sak thung.

"Patling te chu tuman min melh ţha peih hleinem." A biangah chuk zeuha ka tih chuan a chek hlak a.

"Tunlai hmeichhia ho hi i hre lo a nih kha!" A ti hliai a, "Ti nge?" ka lo ti vat.

"An zak lo..... an mipa duhzawngah chuan kawppui nei an nih leh nih loh an pawisa ngai si lo." a ti siam siam a, a ţawng pah chuan kan insawi delh delh a, ka thlakhlelh ang bawk hian min thlahlel ve tih ka hria a, nun a hahdam viau bawk.

"A dik a lawm." Ka ti sup. Kan hnathawhna avangin zirlaite nen WhatsApp neih a ţul ţhin a, chu mi kaltlanga min biak tum an awm ve nuk ţhin. Ka nupui hian ka phone a check ngai lo mai pawh a, min rin ngam ang chiah hian a hriat lohah pawh a rinna tih chhiat ka duh chuang lo. 

"E! Vawiin tlai kha i theihnghilh hlauh ang e!" 

"I sawi a ka hre leh chiah." Ka tih chuan thaw hapin, "Pa nih tak avanga hriatna tih ţhat loh kher!" a ti hlak a, a nghawngah chuan ka hmui nawrin ka chelh nghet vak a, a zâ tih chu nui hak hakin a lo tal nasa mai.

"Ti khan ti ve ziah suh!" Ka thlah rual chuan a lo ti nghal, "I nghal man a nih kha." Ka tih chuan a ner nawk a.

"Tlaiah chuan i lo haw har a nih chuan kan lo va kal hmasa dawn a nia." a ti a, ka bu nghut.

Zuitei te inah chaw kan ei dawn a, Nu Mapuii hi chu rawn lang fo mah se Zuitei tak hi chu a rawn lang zen zen lo. Duati an hmuh duh vang a ni pakhat bawk. Inthenawm hnai viau e ti lo chuan Sawmi pawh a va lang zen zen lo, a tlangpuiin ka kalpui deuh ziah.

Ka hnathawhna ka thlen chuan UJoela chauh a lo la awm. Vtea chu anu dam loh avangin a rawn kal thei dawn lo tih min hrilh nghal a, Nunkima erawh zan lam chauh a thawk a nih avangin ka haw dawn hnaihah a rawn thleng ve chauh ţhin. Ani a awm bawka kei zan ka awl theih phah thung a,a tihzia khawp mai.

Hun awl karlakah phone ka en deuh chhen ţhin a, Duati thlalak a lo thawn ho chu ka nuih pui leh suk ţhin. A ha a to tan ve tawh si a,a nuih chang hian a lawmawm hi ka ti ţhin khawp a. Ka nu leh pa te hian kan duat bawk a a dam loh hlek chuan keini nupa ai pawhin an buai zawk.

"Khatia nui vur vur reng lo khan rawn ei ve thuai rawh." UJoela'n a tih hluk chuan ka ţhutna aţangin ka tho ve vut.

Duati thlalak ka hmuh chuan, "A tleirawl chhuah hunah lerh deuhah ka chhuah ang." a tih fiam chuan ka rum nghut.

Min tihhlim ang hian an rilruah a thawk pha ve kherin ka ring lo, min ti fakim hluah hluah ni mai hian ka hria. 

Tlailamah Nunkima lo thlen ve leh ka haw zui a, ani pawh hi a rawn thawhna a rei ve leh tawh. Vtea nen an inrual a, tlangval fel tak a ni chuan ka hria. Tihian chhun lamah a inhlawh pah bawk a, a naute lehkha zir a chawm thu kha a sawi tawh a, a thawkrim bawk a a nau te chuan an ngaihhlut thiam sak ngei ka beisei.

In ka thlen chuan rin ang ngeiin min lo kalsan hlawm tawh. An awm loh chuan in chu a reh ruih mai bawk. Ka pa pawhin, "Rawn haw phei har lo ula." A lo ti ve bawk. An tunu hi an hmuh loha a awm rei an phal meuh lo.

Inbual leh thuakin ka inthlak sawk sawk a, an pheina a la rei lo tih ka nu'n min hrilh bawk. A la rei lo tak a niang a message lo thawn kha Bike ka khalh lai a nih hmel, in ka thlen hnuah ka hmu chauh.

Ka phone chu charge in ka chhuahsan a, ka nu pawhin haw har lo turin min chah ve nghal.

Zuitei te in ka luh chuan Duati chhuata ţhu chu an lo kil laih a, Chda Zuitei bialpa chu a awm ve bawk. Anni pawh hi an innei har tawhin ka ring lo, Nu Mapuii kutah an innghat tawp a ni ve ber.

Duatin min hmuh chuan a hahmai to tir lang seuin min lo nuih a, ama tawkah a tlei ve bawk a ka chhawnchhaih duh rih lo.

Sawmi chuan Duati a hrai phawt a, chu mi hnuah Zuitei nen chaw ei an siam zui nghal. Chda nen pawh chuan kan inkawm thei viau zel a, Zuitei vangin kan veng lamah a rawn lang tam ve bawk nen ka nu te nen pawh an inhre ţha tawh viau bawk.

Midang chaw ei hlana Sawmin Duati awmpui a tum chu NuMapuiin a lo chuh ve leh tlat a, Sawmi pawhin a hnial lui duh bik lo. 

Keini pali chuan dawhkan kan kil a, ţhutkhawmna lama Duati nui ri avang chuan ka lo nui ve leh suk suk ţhin.

"Lalfakte inti patling viau suh!" Zuitei'n a rawn tih hlak chuan, "Eng nge?" Ti hlukin ka hawi chhuak a, Sawmi nen chuan nuihza insum zet hian min lo en. Chaw ei mawlh mawlh paha ka nui kha an lo hmu a ni mahna.

An lo nuih vur hlawm avang chuan, "Inhrethiam pha ve lovang tiraw Sawmi?" Ka tih chuan za zetin a lo nui a, Chda pawh a nui liam maia, Zuitei thung chuan, "Ka puarak rah." a lo ti hmak. 

Ka thleng ka chawi hmasa ber a, Sawmi ei hmanhmawh lo tura hrilhin Duati ka va awm pui thuai. Nu Mapuii chuan ka puar loh a lo hlau khawp a, ka nupui ang lo takin chaw ei lam hi chu ka awlsam khawp a, Sawmi erawh chu a hrawk chak loh avangin a ei zung zung thei ţhin lo, mi zinga chaw ei pawh a hreh phah ţhin.

Duati chhuata a ţhu nuai chu ka pawm nawlh a, thlanglam bathlarah chhuanpuiin pawn boruak chu kan dawng heuh heuh. 

"I ti hritlang ang rawn luh pui tawh rawh." Sawmin a tih chuan ka luh pui ve leh mai a, kan len chhuah pui zen zen lo bawka pawn boruak hrim hrim hi chu nuam a ti ţhin khawp mai.

Ka nu ten kan len rei an hlau bawk a dar 7 a rik dawn chuan kan haw phei thei hram. Chda a awm bawk a a inthlahrunawm loh deuh.

Duati ka pawm a, a nu chu a puakpuan leh a thil khal ho te, a chaw eina te nen a lo inkeng bawr ve hle.

Duati chu ka be pah reng a, anu chuan inbual a chak tawh leh boruak uap churh chu a nin thu a lo sawi mawlh mawlh.

Khawvel mai pawh ni lo kan ram zimte ah pawh nupa a insiam tumna kawnga kawng bum boh tak tak zawh an awm laia kei ni nupa erawhin kan kawng hahdam taka kan zawh thei bik hi ka ngaihluin Pathian hnenah pawh lawmthu ka sawi fo. 

Ka fel loh na te leh ka ţhat loh na te min hrechiang em em tu a ni chunga a malsawmna a min la vur reng avang te pawh hian lawmthu sawi mai tur ka nih zia ka inhre chiang a. Ka nupui hian min kaihruai zawk mah hian a hriat ţhin. 

Ka pi thlan kan tlawh dun ţum khan,"Khawvelah hian engmah kumhlun pui tur nei lo mah ila amah hretu te ramah kan piang ve ringawt te pawh hi lawmna tham a tling, eng ang pawhin khawvel thilah rilru hahin buai mah ila, kan duh ang chhanna min pe kher lo pawh ni se, amah aţanga chhuak thlamuanna khawvel thilin min pek theih miah loh hmangin min chenchilh theih a, chu chu sum tam tak ai pawha hlu zawk a ni." tiin min hnem a, vawiin ni thleng pawh hian ka theihnghilh thei lo.

*

Pathianni zanah chuan ka pa thusawi tawiawmin kan chhungin kan inkhawm a, Duati kan inkhawm pui theih hnua a hun chhuah vawikhatna a ni nghe nghe.

Ţhalai len hnunglamah Sawmi nen duati kan ţhutpui a. Anu malchunga inhmatawna a ţhu chu kan inkar aţangin hnunglam a thlek a thlek mai a, a mitmeng a fiah kak bawk nen a hmelhriat vak loh te hi chu a hmu duh ve ţhin hrim hrim.

Chutia a thlek vung vung mai chu anu chuan a bengah pawtin muangchang hian a kuai chho a, a pawh chhoh hnu lawkah a ngai te bawkin a thlek leh ţhin a, kan hnunga mi te nui thawm pawh chu kan hre thei.

Zaia kan din chhung pawh a a hawi rengah chuan ka lehhawi ve zawk a, kan hnunga ţhu chuan tarmit a lo vuah vang a nih dawn chiah hi. Tarmit a lawm em em mai a, a pi leh puten lehkha an chhiar tawh chuan tarmit an vuah ţhin avangin a theih ang ang hian a bawh buai ve ziah.

Sawmi ka hrilh sup a, a nuih a za ve viau nain a hawi ve duh lo thung. Kan ţhut leh hnu chuan a lehkhabu tê kan ken sak chu a khal ta mual mual a, lehkhabu pawh hi a lawm phian a, a pi phei chuan, "Lehkha chhiar a ngaina ve dawn a niang." A ti leh hlut zel.

Inkhawm chhung zawng chuan a tlei ve mual mual khawp hnute a ngen deuh chuan anu hi a puan kenin a inkhuh ţha sauh sauh zel a, ka nuih a za ţhin viau.

Inkhawm ban veleh ka nu'n a rawn lak takah chuan an len kawi pui lawk tur thu an sawi a, Bektei pawh a ţhiante birthday lawmna lamah rei lo te a kal ve lawk tur thu a sawi tawh avangin kan nupa chauh chuan in kan lo nghak a.

Kan inthlak zawh hnu chuan thingpui rawn chawiin ka bulah a rawn ţhu ve a, ka lo kuah zui vat. Midang an awm lo bawk a min ngheng ţha ve sauh sauh.

"Christmas chu ka nu te khuaah hmang tak tak ang aw." A thingpui chu a dawt zui khalh, amah ka kuahna kut chuan a biang ka chul hliau hliau bawk.

"Ka pa ka sawi pui tawh a, an rem ti ve mai. Rokhawlhna dang a awm loh chuan kan hmang dawn chiang." A biangah ka piai zauh a, a lo ner nang mai.

"Duati piancham hetah kan lawm hman dawn tho bawk a, a inthlahrung loh deuh ang chu." A ti ve a, helamin an ngai hle dawn tih a hre ve a, a ngaihtuah chu ka hriatthiam pui viau mai.

"Ruatsanga chu i be leh tawh em?" Ka tih chuan mak ti hmel deuh hian min en ha a, "Be leh lo e." A ti sep.

Ka thik zia a hria a, ka lung tih awi loh ai chuan a hlat ve mai a. Mipa ka nih angin a hnaih taka mipa dang an awm hi ka ngaithei ţhin tlat lo, mahse chu chu ka insiam ţhat deuh chu a ngai. Ka nupuiin rilru nuam lo taka a ţhiante a thlauhthla tawp tur chu ka duh bik lo.

Hmanni deuh lawk khan Ruatsanga nu a boral a, kan va lang ve nghe nghe. Ka kalpui bak kha chu ani pawh a kal leh ta bik lo. A ţhianpa chu a mal ve zia pawh ka hriat pui. Mahse keimah min venthawn avangin a sawi lang duh lo niin ka hria, ka inthiam lo viau bawk.

"Chaw eiah la sawm la a ţha ang." Ka tih chuan a bu ve nghat a, min enin a rawn nui seih a.

"Kha kha engtihna nge?" Mithmul kân ûk a ka zawh chuan rawn nui hakin, "Ka pasal fel zia....hi! Tihna a nih kha." A tih chuan ka nui hawk,amah chu kuah khawmin nghet zetin ka chelh a, ani pawh a lo te ve chul mai.

"I â thei lutuk! Min hmer hlum ang a sin!" Ka thlah thawl rual chuan a ti hlak a, ka kutah a beng ri thlep bawk. A hmuia lo fawp zauhin, "Ka phal teuh loh." Ka lo ti ve hluk.

"Zuitei khan karleh lamah palai an rawn kal dawn a tia." a tih takah chuan an chung chang chu ka sawi pui a. Zuitei'n pasal a neih dawn chuan Sawmi nau Sawmzoa'n Nu Mapuii a awmpui ve thung dawn a, Chda fapa neih chhun a lo ni ve bawk nen ani tan chuan Sawmzoa lo awm chu a lawmawm ngawt ta ve ang.

Ka nu te chu rei loah an rawn haw ta thuai a, Duati pawh a mut a chhuah tawh hmel khawp mai. Hnute hne kher a a mutthilh ţhin avang hian midang hian kan paw mu ve thei meuh lo.

Rei loah Bektei pawh rawn hawin a room lamah lehkha zirin a inkhung zui a, keini pawh Duati ber a mutthilh takah chuan khum lamah kan insawn phei a. UJoela'n hnathawh tur tlem a rawn thawn leh avangin ka mu ve nghal lawk. 

Sawmi chuan min lo nghak ve leh reng a, eng eng emaw siam neuh neuh a peih bawk a chart paper hmangin pangpar a lo siam leh melh melh.

Darkar khat dawn ka buaipui hnuah zo felin kan mu ve ta hram, Duati chu a laiah a mut avangin ka pawt sawn hret a, anu zawk alaiah ka mut tir chuan thawm siam hlau siin min melh ram ram ringawt a, ka thu zawkna lam a ni ve chiang em mai a.

Amah kuah hluna ka mu thla chu, "Mu hle hle ang che, bawihtei i tih harh chuan i pua ang." A lo ti nghal a, ka nuih a za viau mai.

"A nau tur hi siam leh vat a ngai a ni." Ka tih uan chuan a kiuin min nghawk dawt a, ka nui che dat.

"Christmas ah kan hmang sawn thei lo palh ang." A rawn tih chuan a nui tih ka hriat chuan a kawrchhungah ka zen lut a, muangchangin a rawn inher nghal. Ka kut chu ka la chhuak duh chuang lo.

Ka khabe hmul chu rawn khawih neuh neuhin, "Ruatsanga chu ka be thei dawn tak tak em?"a rawn ti a, a hmuiah ka lo fawp zauh.

"Yeap. A bialnu tur zawn nghal ang che." Ka tih chuan ka tih chuan ka beng a sik hlak a, a awmbawr ka ţham thut chuan ka banbulah a rawn beng leh dat.

"Duati hian a chhun dawn chein ka hria." A tih chuan mi zawng zawng deuh thawin a hmela anu a an thu an sawi ţhin avangin ka awih vak lo. A hnarngulah hian keimahni lam a kal ve deuh a, a hmaifang leh a dang zawngah hi chuan anu hlir a ni mai.

"An sawi ţhin a lawm. Fanu upa ber hi chuan engkimah pa te an chhun duh an ti. A ni vek kher lo a nih pawhin a tam zawkah chuan a nih ka ring, Duati hian a la chhun chho viau ang che ka ring tlat." A tih chuan ka nui suk a, "A nau chuan a chhun ve thung che ang a." Ka lo tih chuan a nui ve hak.

Hetiang hian kan duhthusam leh suangtuahna kan sawi duh fo ţhin. A ţul viau a nih loh chuan phone kan ban tawh ngai lo, hei hian kan nupa inkarah inthianthatna a tuh tel a tih loh theih loh.

*

Tlai khat chu Bektei scooty in a accident hlauh mai a, Ruatsanga chaw rawn ei ni tur a ni nghe nghe.

Hmeichhe pakhat scooty Khalh ve tho nen an insu a lo ni, Bektei thiam loh ni loin pakhat zawk thiam loh chu a ni nghe nghe a ni awm e.

Kan hriat ve meuh chuan Ruatsanga'n damdawiin ah a lo hruai tawh a, a khup ruh chu a sawh nat deuh avangin scooty a khalh thei rih dawn lo bawk. Ruatsanga hi kan in a lo kal tum tho a ni bawk a Bektei nen chuan inthurual vang pawh ni lem lovin an intawng fuh a ni ber.

Bektei pawh a khup leh a ban pilh tih loh chu na dang a nei lo hlauh a, Ruatsanga'n a rawn haw pui nghal bawk.

Bektei chu a room lamah ka nu'n a buaipui a, Sawmin eirawnh bawlin Duati pawmin Ruatsanga nen kawtah kan ţhu a. Ruatsanga chuan Duati chu a lawm phian a, Duati lah chuan a hmuh ngai loh mi mah se a ngaina tih a awmdanah a hriat reng mai bawk. "A lawm tur engmah ka lo keng lova." A tih sup chuan a ngaih kher loh thu chuan ka chhang thuai.

Zanriah pawh chu Bektei pawh chuan a rawn kil ve leh mai a, mahse a khuate a tih sik deuh avangin kan zingah rei awm lovin a room lamah a kal ta thuai.

Chaw eikhamah chuan ka pa leh Ruatsanga te nen ţhutkhawmna pindan lamah kan awm a, Sawmin Duati pawmin ka nu luhna Bektei room lamah an lut zui ve bawk. Anni an awm bawk a ka pa nen chuan kan va buaipui chuk duh lem lo, Ruatsanga a awm bawk nen an inbuaipui thei tho ang.

Ka pa chuan Ruatsanga chu anu boralna a tawrhpui thu te leh kan inah chuan tlangnel taka khawsa ve tur te chuan a hrilh luam a, a lo kal hmain a chanchin Sawmin a hrilh vek tawh avangin an lainat ve hle.

Chutia an inbiak lai chuan kawngka kan khar loh aţang chuan nula la upa lo tih hriat tak hi a rawn lut hlawl a. Min rawn hmuh chuan kan awmna lam a rawn pan vat, Ruatsanga leh ka pa te chu a rawn hmu nghal thei kher lo ang.

"Ka pu, in nula su tu kha ka nia." Ka bul a rawn thlen rual a a tih chuan Ruatsanga chu a hmu thut nge ni a ţawng tawp chut.

Ka pa chuan hawihawm takin a lo chhawn thuai a, ţhu tura a tih chuan ţhu ta lo chuan Ruatsanga en reng chuan a ding reng a.

"Hetah lo ţhu rawh." Ti a ka ţhutna bul ka ben thuk chuan bet lo hmel zetin a rawn ţhu ta hram.

Nula lian lem lo tak a ni, a hmaifang erawh a fiah felfai khawp mai. A sam a tawi mat a, a ngo reuh phian mai bawk. A malchungah chuan polythene hian thil a fun a, a pawm bet tai bawk.

T shirt var lian lam leh paijama thawl hnek hnawk tak a ha a, a mitmengah chuan a tlangnel lo tih a hriat nghal vek. A awm ve tho mai, kei ni mipa ho karah a rawn ţhu ve tawp mai a nia, ngampa taka ţawng zuah zuah chu a har ve ang.

Ka pa chuan a intih nat ve leh ve loh a zawh chuan a kiu rawn tilangin, "Hei chiah hi a na hlauh a." A ti sap a, Ruatsanga a melh zauh zauh chu ka hmu ru reng, Ruatsanga thung chuan ngaihven lem lo takin a phone a lo en daih thung.

"Pawisa engzat nge ka chawi ngai ang?" A rawn ti fiah leh fak a, a awl a tliang ral a, a rin chuan a bengchheng duh viau mai thei a ni.

Ka pa chuan kan ngaihdam thu leh tihpalh thilah chuan tumah a indem luih theih loh thu te, Bektei pawh a nat vak loh thute chuan a lo hnem a, a thaw huai tih a hmel aţang ringawt pawhin a hriat theih. 

Zanriah ei lai khan Bektei khan a sawi tawh a, an inpel tur kha side dik lo lamah a lo tlan a ni awm e. Bektei chuan ngaihdam mai a duh thu a sawi nghal a, keini pawhin kan lo pawm ve mai.

"UBektei chu a van fel em em ka lo tia, a chhungte pawh in lo fel em a nih hi." tiin a nui heu a, a nuih phei chuan hmeichhe naupang a ang hle, a pianphungah erawh naupang tak a ni bik lo tih chu a hriat. A rawn luh tirha Ruatsanga a en dan vang kha a ni mahna amah chu ka lo chik ve em em ringawt a.

A ţawngkam naupang chhia zet avang chuan ka pa nen kan nui huk a, Ruatsanga thung chu engmah hre lo ang maiin a awm.

A hming chu Bibii a nih thu te, a awmna veng te, scooty a nei thar ve lawm lutukin a chhungte hriat loha a inkhalh chhuah thu te chu a sawi ta vek a, a ţawngduh reuh bawk nen a lawmawm phianin ka hria.

A ţawng zat zat mipa pathumin kan ngaihthlak lai chuan Sawmi chu Duati pawmin a rawn chhuak a, Bibii a hmuh chuan mit a kân ak a, Bibii lah chu a tlangnel deuh tawh nge ni, "UBektei su palh tu kha ka nia, e! Chuan hei!" ti hluaiin a ding a, a polythene ken chu ka pe hnena pe in, "Thasuih a nih kha, apiin a ţha a tia, tlai a ka haw veleh khan kan huanah a awm a tih ka hria a ka zawng nghal char char a. Chhum ula a tui kha UBektei in tir rawh u, kei chuan ka la mamawh lo a ka la in lo, Api chuan a in tawh a a ţha lutuk a ti, a ţhen chuan a tak kha ruh na laiah te an tuam hnan bawk. Pu, nang pawh thana te i neih chuan in ve rawh, a ţha lutuk! an ti." a ţawng chhung zawng chuan kan lo en tawp.

"E khai aw a va lawmawm ve, i fel hle mai, kan dampui hrim hrim ang. Ka lo in ve dawn nia." Ka pa 'n a ti ve hluai a, Bibii chu hlim zet hian Sawmi lam a en leh, Duati a hmuh rual chuan, "I fanu chuan a va chhun che ve, a la rawn hmelţha ang chu aw....." a ti zui a, ka lo nui ve suk.

"Duati a nih hi, a hriat ngai loh hi chu a en duh thei lutuk a." Duatin a en reng chu a lo sawifiah sak vat.

"A hmelţha tawp, in chhungkua hi inhmeltha hrim hrim ka ti." A ti leh phawng a, ka pa chu a nui a nui tawh mai. Kei erawh ka la insum hram hram. Ruatsanga chu awm ve lo ang maiin a lo ngawi reng thung.

Bektei chanchin te a zawh chuan a khawsik avanga a muthilh thu Sawmin a hrilh thuai a, a inthiam lo leh hle tih a hmelah chuan a hriat vek.

A haw tur chu Ruatsanga ruala haw turin ka lo ti zauh a, Ruatsanga chuan min melh run tih ka hria,ka hre lo der ve tlat. An pahnih inkarah hian boruak dik lo deuh a awm tih ka hrethiam ve.

Bibii chuan, "Keimahin ka haw thei a lawm. Ka hman ve leh UBektei hmu turin ka lo kal leh ang. Infel hlawm si, Mangtha muttui zingthawh nuam u." ti zung zungin pawn lam a pan zui nghal a, Sawmin a zui tho avangin ka tho chhuak duh ta lo.

Mut hmunah chuan Sawmin Bektei thusawi chu min hrilh ta a, Bibii kha Ruatsanga khan a lo hau hrep a ni awm a, a thiam lo zawk a nih zia mit ngeia hmutu a nih vang a ni pakhat. Chu'ng vang a nih chiah chu Bibii khan a hmuh rual a a hmel lo danglam vek ni.

Sawmi chuan Ruatsanga chu a thinchhe lem lo viaua a hriat avangin midang a hau tur vak mai chu mak a tih thu a sawi sep sep. Ruatsanga mizia kei aia a hriat chian zawk miau avangin sawi pui vak dan pawh ka hre lo.

*

Bibii lo len leh ni chu hnathawk a ka chhuah hlan a ni a, zanriah ei laia ka pa thusawi danah chuan a mizia chu an hlimpui viau a nih hmel.

Ruatsanga kha kan chhungkaw zinga mi a ni ve emaw a tih thu te, a hlauh bik zia te a lo sawi phawng phawng a ni awm a, Sawmi pawh chuan mut hmunah Bibii hming chu a sawi ri ta zeuh zeuh.

*

Duati piancham lawm ni chuan URinpuia te chhungkua leh ULyni te chhungkuain min rawn tel pui thei a, ka ţhiante ah Zuata leh Hminga'n min rawn tel pui bawk. Zuitei pawh Chda a rawn hruai ve a, kum a thar hunah meuh chuan anni pawh an inkutsuih ve tawh ang.

Naupang nen kan ni bawk nen kan ri ve laih laih reng a, Duati lah chuan nuam a ti em em mai khawp a, a nui duh bawk nen lawm a hlawh zual hle bawk.

Sawmin min hui zauh avang chuan kan mut pindan lamah ka zui lut a, a lo nui kar kar ka hmuh chuan a chhan ka zawt vat. Bibii kha kan sawm ve tho a, mahse kan kawta Ruatsanga meizial zu a hmuh avangin a lo lut ngam lo a lo ni. Ka hriat ve takah chuan kei pawh ka nui hawk.

Bibii chuan Sawmi a lo bia a ni awm a, amah hruai turin Sawmi a chhuak zui nghal bawk.

Bektei leh Zuata pawh an inzui ve tak zet tawh a, Zuata hian a nghak thei bawk a inneih lam chu a la sawi hmuh maiin ka ring lo deuh.

Rei loah Sawmi leh Bibii chu an rawn inzui lut a, Duati present tur pawh a lo keng ve thlap. College kal lai niin college a kal ţhat peih loh avangin kan inah a lo leng fo tih Sawmin a sawi ţhin. An mimal nun a zawt thuk vak duh loh avangin a lo nawr vak ngai bik lo.

Ka pa sawi dan takah Bektei a lo su palh te kha Pathian remruat vek niin Bibii pawh kan inah tlangnel takin a awm theih phah a, a ţawngkam avangin a tihlim ţhin bawk nen ka nu nen hian leng turin an sawm fo bawk.

Bibii chu Ruatsanga awm lohna lam zelah a awm a, midang chuan an hrethiam ve kher lo mai thei. Keini nupa erawh chuan Ruatsanga kan lo chik ţhin bawk a anni pahnih chu kan thli thlai dun kar reng a ni ber.

Naupang ho pawh an mut a chhuah meuh chuan dar 10 a lo ri hnai tawh, Duati ber pawh apuin a paw daih tawh a, a u te nen an Infiam chau ve bawk nen a muhil sûk sûk tawh.

Kan inleng te ho an ţin deuh vek tawh tihah Bibii pawh haw a tum ve chauh a, Ruatsanga haw hun a chang a ang ber, a haw tak mai loah chuan amah zawk chu haw hmasak a tum niin ka hria.

Haw a sawi ve leh chuan Ruatsanga chuan a haw ve tur thu sawiin a ruala haw turin a hrilh sup. Ka nu te engmah hre ve lo chuan a remchan thu sawiin a ruala haw tur chuan an lo hrilh ve nghal a. Bibii hmela huphurhna chu a hrethiam kan tam lo khawp ang.

An inphurh liam thleng chu kan thlir a, ULyni te chhung pawh an haw ve nghal a, URinpuia te nupa leh Sawmin hmun a tihfel hlan chuan ka inbual leh rih.

Mut hmunah chuan Sawmi chuan Ruatsanga te chanchin bawk chu a sawi leh a, Ruatsanga chuan a duh a nih a rin tawh thu te a sawi siam siam a, "Ruatsanga nu khan Ruatsanga tan hmeichhe ţha tak zawn sak turin thu min chah ţhin a. Bibii nen hian an inkawp rem thei hlauh a nih chuan ka thawveng huai thei ang." A ti sep sep a, Bibii pawhin a duh ve mai ka rin thu ka lo sawi ve bawk.

***

Christmas tukah chuan Inkhawm turin kan insiam sang sang a, Sawmi chuan Duati a siam lawk tawh avangin a piin a rawn la a, keini nupa pawh kan la insiam mawlh mawlh.

Kan tum lawk tawh ang ngeiin an khawlamah kan hmang a, an khuaah hian ka vawikhat kalna a ni bik lo bawka ka mikhual lutuk tawh lo.

Duati pawh a tlei tawh bawka inkhawm kal dawn pawhin USangmawii te nufa a zui daih. Usangm fanu upa ber hi Duati an tih ve tho avangin han koh mai chang hian an hawi buai leh nak thin.

Inkhawm lai chuan rin ang ngeiin Duati pawh a rawn kal leh, a rawn kal kan rin avang khan a sirlama ţhut duh pawh kan ni reng a. A sir zawka ţhu ka ni bawka kan lam pana a rawn phei terh terh ka hmu reng a, a kal hnaih deuhte en chianga a hawi chhuah a piangin a ha lang vekin a ţhen ta ţhin a, a thlen chin a piang te chuan an lo nuih leh hak ţhin. Kan bul a rawn thlen chuan intithei hmel deuh hian a hnar min tih kir khum vak a, kum khat leh thla thumna a hmang ve mek a, ama tawkah a nula it et ve viau zel.

Inkhawm banah chuan thla kan la ve a, Duati pawh lawm tu a ngah khawp mai. 

Thingpui ina kan ţhut lai chuan min kheuh zeuh a, min kawhhmuhna lam ka en chuan Tlangval nge pa ka hre lo, kan kum ang rual vel tur nula pahnih te nen a lo ding tlâng chu ka hmu a.

"UTluanga a nia, min ngaizawng thei lutuk." A tih sep chuan ka rum nghut a, "Kei pawhin chhelo ka ti ţhin." A tih chuan ka melh rûn a, a thil sawiah chuan nuih na tur awm hek lo.

"Mahse a chhelo ka ti ringawt a, ka duh ve chuang lo. Nangmah bawk hi i lo chhelo ber bawk sia." A tih chuan ka ner nawk a, a lo nui hak hak.

Duati kal kual vel tur chu ka kut lehlamin a banah ka chelh a, lehlamin thingpui no ka keng bawk. Ka kut awl chu awm se ka piai hlak duh ang.

Biakin aţanga haw kawngah chuan ka phone a rawn ri a, Duati ka pawm avangin a bag ah ka phone ka dah kha a ni a, a rawn phawrh thuai.

"Bibii a nih hi." ti a a chhan hnu lawk chuan, "Maw?" A ti vak a, a din chut avangin kei pawh ka ding ve nghal.

"Ti nge?" Ka ti thuai a, phone chu ngaithla lehin nuihza insum zet hian, "Kan lo hau dawn nia, rilru lo tihah duh suh, tunah chuan kan buai deuha, in thlen ve leh kan lo hau ang." A tih hnuah phone chu a dah a. Thil thleng chu ka zawt vat.

Bibii'n Ruatsanga chu a ngei thu leh a ngaihzawn tak tak pawh a rin loh thu te, hmeichhe dang a phur kual leh tho avanga a thin a tihrim thu rawn sawiin Ruatsanga chu UFakpuian lo hau rawh se a ti a ni awm a. Bibii rilru puthmang naupang chhia zet avang chuan kan nui duh hawk hawk.

Ruatsanga hmeichhe hnaih te kha a thik lutuk zawk tih pawh a inhrethiam lo chu a nia.

Kan nupa hian kan inrawlh leh ngei chu a ngaih hmel.

Duati biangah chuan ka fawp zauh a, min lo nuih leh ver ver tawh. Anu kaiin kan in lam kan pan a, Ruatsanga te chanchin bawk sawiin kan nui tam leh khawp mai.

Ka hringnun thawnthu ţhenkhat chu kha ti zawng kha a ni mai a, inhriat loh karah khan thil tam tak thleng tawh leh thleng thei a la awm bawk. Chuvangin tun huna i thil hriat hmang khan midang nun pumpui teh nan hmang duh suh. I hriat sak chin a tlem lulai lutuk.

THE END

💕