BLUEMING 🦋 CHAPTER-6 BY UNKNOWN BELLE

BLUEMING 🦋

BY UNKNOWN BELLE

CHAPTER - 6 

A thisen pe zo lo chhuak chu ka pa'n a lo be thuai a, a laka ka lawmna hi lan chhuah tir dan ka thiam lo hial zawk.

"Bawiha rual hian haw la, in enkawl ţha rawh aw." Ka pa'n a ti dam thluam a, ka pi chu keiman ka awmpui turah ka lo ngai a sin.

"Pa va haw zawk rawh ka lo awmpui mai ang." Ka ti a, mahse ka pa chuan,"Doctor sawi dan kha chuan damdawiin lama awm rih tur khan min duh a, a lu a lo ti hliam bawk nen. Zanin chu i nu nen kan han awmpui ang e. I nu pawh ka hrilh tawh kha. Pahnihin a awmpui theih tho bawk a, buai thut te awm palh thei a ni si a,an damdawi pekin a hneh deuh avangin zan rei lamah chauh a rawn harh hmel a, hei Sawmpari thlah pah hian va haw zawk mai rawh." a ti a, kan inbiak lai chuan Malsawmpari chu kan bulah a ding ve reng a, amahah harsatna a nei lo hlauh te chu a lawmawm tak tak a ni.

"Chuan car hi khalh haw rawh. I nu rawn hruai pah khan ken ngai a awm dawn a, ilo let leh hunah bike chu i hawn zawk mai dawn nia." tiin car chabi chu min pe a, riah pui chu duh viau mah ila kei ai an ţangkai rih zawk dawn si a, haw tur chuan kan kalsan ta zawk a.

"I lu a hai em?" ka ti a, Car khalh pah chuan ka en zawk bawk. Ka rin ai a pangngai daih.

"Hai lo e, nurse khan a accident tih vel kha an sawiin ka hria?" tiin min zawt a, ka pi tawh sual tawh dan chu ka hriat ve chin ang ang chu ka hrilh ve zawr zawr a, ani paw'n pawi a tih ve hmel khawp mai.

Dawr pakhat kawtah chuan car ka tiding a,min nghak lawk tura tiin Dawrah ka luh san a, thisen pe te tana eitur an tih ţhin ho ka lam khawm sak zung zung a, ka nu lam leh la ngai a nih avangin ka che hmanhmawh viau bawk.

Car a ka luh leh chuan ka thil lei ho chu a malchungah ka dah a, hrethiam lo hmel zetin min en reng a, "Hei hi tinge?" a tih lai chuan ka lawmthu sawina a nih thu ka hrilh ve mai a, ţawngka in sawi duah thiam lo mah ila alaka ka lawmna chu a hrethiam thoin ka ring.

"A ngai kher lo a sin, Pathian zarah ka hrisel ve a, thisen ka pe ve nual tawh. Thla hmasa kha ka pek leh hun tura ka tih kha a nia, mahse ka mu ţha lo ţhin nen ka tling lo zel a. Vawiin a mi a tan hian a lo ţangkai dawn vang a niang." a ti a, a pumrua ngaihtuah chuan thisen pe nual thei hmuhin ka hmu lo, amah en lahin han ngaihbel tur a awm bawk si lo, a taksa chu a fit reuh ka ti khawp a.

"Nih te pawh a ni mahna." Ka ti ve mai a, ka rilruah erawh ka pi a awm reng thung. A taksa chak lo chung chunga mahnia lo thawh chhuah a tum te chu ka thin a tirim tûn a, thil thleng tur ang chu thleng vek tawh mah se a thlen aia thlen lohna chance a san zawk miau avangin dem theih apiang chu ka rilru hian a dap kual a ni ber.

"Eng nge damdawiin ah khan i tih ve zawk a?" 

"Ka ţhiante chhung dam lo ka kan a, a mak e tiraw..." a ti hliai a, a mak a tih ber chu ka hriat loh avang chuan , "Eng chu?" ka lo ti nghut, ka ţawng chu a nelawm loh viau a, a hma ang bawkin, mahse ani pawh hian ngaiah a nei ve deuh tawh niin ka hria.

"Niminah khan kal ka tum a, mahse ka hman meuh chuan a tlai tawh sia, vawiin ah chiah ka chhuak hman a." a ti a, sawi zawm lehin, "Chunglam hian a lo rel fel diam zel mai a nih hi."a ti leh a, ka sawi zui chak loh lam tak a ni thung.

Rel fel diam hi ka ti thei thlawt lo, hetiang dinhmun a ka pi a dah hi ka lungawi lo hlawm tawp a tih theih ang. A tir lamah kha chuan a damna beiseiin dil nasa viau mah ila ka chhungte min hriat pui si loh hian a natna kan hriat chian hnuah hi chuan ka ţawngtai khat ta khawp mai. Lawmna aiin lawm lohna lam hlirin ka khat a ni ber.

Hu

An kawt aţanga in chhung a pan lai chu ka lo en uluk ngang mai, ţha deuh anga lang si hian luhaiin a lo tlu tawp mai ang tih a hlauhawm. Chutiang chu thisen pekna lamah ka hmu fo tawh. In chhung a luh takah chuan ka lo thaw deuh huai thei.

In ka thlen chuan ka nu a lo inpeih diam tawh chu ka thlah leh a. Chaw ei phawt turin min ti mah se ka thlah hmasa lui ta tho. Chaw ei pawh ka chak lo.

Ka nu ka thlah hnua ka let leh chuan ka pi chanchin ngaihven a lo leng an lo awm a, inleng lo chhawn chu phur viau lo mah ila ka ko ah a innghat bawk si. Ka nu tal kha in ah awm leh mai se ka ti rum rum. Hetiang a in nghaka min dah hian min ringtawk tih chu hre tho mah ila, ka titi thiam loh a leiah inleng kan hnawt tiau zo ang tih a hlauhawm.

In leng an luh chhuah zut avangin engmah la ei lo chuan ka awm ta reng a, ka ril a tam lo bawk nen Bektei chuan ei turin min nawr lui viau mah se ka chak hlawl lo.

Dar 10 vel ah chuan ka pi te ber damdawiin lamah an awm si avangin in leng ho an ţin ta diak a, Zuata erawh a la awm thung. Rawn riah a tum thu kha a sawi zuk a, a sawi zui leh lem hlei lova.

Ka pa nen kan in biak chuan ka pi pawh a harh tawh thu a rawn sawi a, ka lo thaw ru huai. Mahse ka pi chuan in a haw a duh thu ringawt a sawi a tih chuan ka lo lainat khawp a. Ka thu chu ni ss a duh ang ang awm tir chu ka duh a, mahse a hriselna in a tawrh theih ve tho si avangin kan ngaichang lo thei si lo.

Zuata leh kan unau te chauha in a han awm chu a khawhar thlak duh ang reng. Engmah ka la ei lo bawk nen zan reiah chuan ei tur an siam a, an siam hlanin ka inbual thung.

Ka inbual zawh hnuah pawh chhuak lawk lovin phone ka en leh rih a, Elii message pawh a lo awm leh vâng tawh. A last seen a hlat deuh tawh avangin a muhil tawh a nih ka ring a, zing lama a hmuh atan ka reply ta tho. Ka buai ve ţhin zia a hria a, ka biak hman loh chang hi chuan a hrethiam ve viau zelin ka hria.

Hruaii thil rawn thawn ka en chuan thlalak pakhat hi a ni a, a hnuaiah chuan,'an hlim khawp mai' ti zawng hi a lo sawi a,min rawn thawnna a rei ve leh deuh tawh bawk.

Thlalak ah chuan Elii leh mipa pakhat ding dun lai hi a ni a, Elii chu mipa dang bula a awm vang nge a thawmhnaw hak chu ka lo ngai mawh viau bawk. Zanin a mi a nih leh nih loh ka hrethiam lo. Elii chuan engmah a rawn sawi lo phawt chu a nia.

Chu pa chuan a kawngah a chelh sak a, Elii pawh a hlim hmel viau bawk. A kawr awm zau lam lek lek hak mawlh chu ka lo ngaimawh. An thlalak chu ka en vung vung a, ka bialnu a ni miau a,mipa dang nen a an thlalak hmuh chu ka thik lo thei lo, amaherawh chu Elii laka lungawi loh ngawt chu ka tum hran lo. Tunah pawh zan a rei tawh avangin zinga sawiah tiin ka sawilang duh rih lo, Hruaii pawh chu ka chhanglet chuang lo bawk.

Kan in ei puar hnu chuan a tlai deuh tawh bakah zing thawh tlai a rem dawn loh avangin kan mu ta thuai a, Zuata pawh mikhual room ah a riak ve mai bawk. Ani nge nge hi chu ţhian nih a tlin ţhin teh e. 

****

Zingah chuan Bektei'n min kai tho a, a la hma viau emaw ka tih laiin dar 7 a lo pel daih tawh. Zuata pawh a haw tawh zawk a lo ni a, zing lamah inleng an awm ve neuh neuh ţhin bawk nen ka duh ai ka tho har chu a zia lo ang reng.

Ka pa te nen kan inbiak chuan zan lama an men rei avangin ka pi pawh a la mu tih a sawi a, in lama haw chu a lo ngen reng a nih hmel.

"Haw pui mai ila, khata rilru hahdam lo deuha awmpui ai chuan." ka ti ta nge nge a, ka lainat reuh em a tin ni.

"I rilru tur chu ka hrethiam a lawm, mahse in lama let pui tur chuan doctor in zan hnih vel tal la riak leh turin min duh a, nizan lamah pawh a khuh leh lu na avangin a mu hlei thei lova." a rawn ti a, rilru a buai duh kher mai.

"Zanin lam chu riah pui turin lo inruahman mai ta che, i hming a lam deuh reng mai si a." a tih chuan ka lo pawm thuai a. Ka pi hi ka unau dang te ai pawhin ka ngai ţhin zawk reng a, ka tih sak theih chhun a tlem tham si a,rilru hlim taka awm tir ka duh.

****

Chawhnu lam a nih chuan ka seat ah bawk ka ţhu leh reng tawh a, zan lama damdawiin a ka riaj dawn avangin U Joela hnenah pawh haw hma ka ngaih thu ka hrilh lawk diam tawh a, tukin lama ka tlawh kawi lahin a lo mu leh bawk si, kan la inhmu lo tluang zel chu a nia.

Hruaii rawn lut ka hmuh chuan ka ngaihven vak lova, zirlai dang an awm ve bawk nen Elii chung chang a rawn sawi leh mai ang tih chu ka hlau ang reng. Tunlai chu Elii nen kan inkawp tih a hriat aţang te pawh a ni ang chu, a zia a dang deuhin ka hria. Ti ila, a dang han tihah, Elii chung chang a ţha lo lam zawnga sawi mai a hreh lo, amah hian min ngaizawng tih ka hriat ve tho avangin a thusawi ka bengkhawn duh ngai lo thung.

Hruaii'n min koh avangin a bul hnaiah ka va kal a, zawhna min lo zawtin a tih dan chu ka hrilh mawlh mawlh, chutia ka hrilh lai chuan zawi tê mai hian, "I bialnu hi ka rin ai i dah zalen daih." a rawn ti a, chhan tinah pawh ka tin lo.

"A lo thlawk chhuak zeuh zeuh thei reng a nia." a ti leh a. Tukin lamah nizana a thlalak min thawn chung chang pawh Elii nen kan sawi fel vek tawh avangin a thusawi chu ka bengkhawn duh lo.

A mipa din pui kha a ţhianpa a nih thu min hrilh a, hmeichhia chauh ţhian a neih bik dawn loh avangin rilru tih tet loh hram hram a ngai bawk. Kei pawhin ţhian hmeichhia ka nei ve tho bawk nen lo lungawi loh pui viau bik kha dik theiin ka hre lo. Kan inbiak tawp lamah pawh ţha takin kan inthlah leh mai a, rinhlelh tur ka dap hman lo pakhat bawk.

"Nangmah anga fair ve vek tur hian ngai suh." a tih leh chuan ka thil tih sak pawh chhunzawm lovin ka kalsan ta daih. A thusawi ngaihthlak reng khan sawtna pakhat mah a awm lo.

****

Zaninah ka pi ka riah pui dawn avangin ka hnathawhna lamah pawh rei ka awm lova. In lamah let lehin ka inbual leh te te phawt. Zan lam an mut ţhat vak ţhin loh avangin ka nu leh pate pawh an chau viauin ka ring.

Mamawh tur ka nu sawi ho kengin in aţangin ka chhuak a,ka chhuah dawnah pawh in ka kalh leh vek. Englai deuh thawin ka nu leh ka pi in a an awm ţhin avangin in kalh ngai khawp hian kan awm khat khawp a, kan inkhawm te a nih loh hi chuan in nghak an awm deuh ziah. Bektei lah a la haw hman si lo nen kawngkapui ka kalh meuh chuan a khawhar thlak ruihin ka hria.

Damdawiin ka thlen hnu lawkah ka pa ten min haw san a, ka pi erawh a damdawi eiin a hneh deuh avangin a lo muhil thung.

Ka pi khum bulah chuan ka ţhu thla a, a taksa chak tawk loh sa nen alu an tuam bar mai chu ka lainat reuh khawp mai. Hun danga ka tih ang bawkin a hnar bulah ka kut ka dah a, a thaw tih ka hriat chuan ka veng huai mai.

"A thi emaw i ti elaw?" rawn titu lam ka hawi chuan nui var var hian nurse pakhat a rawn lut a, min lo hmu hman a ni ngei ang.

"Ti lo e." Ka ti ve mai a, mahse khatianga a thawk lak leh lak loh ka en khan ka thaw a tiveng huai ţhin thung.

"Kei pawh nau ka neih tirh khan a thawk leh thawk loh ka en ziah zel. Thaw hi a veng huai duh a nia." a ti a, "Nia." Ka ti khawmawi ve a. U Lyni ai a upat chuan a upat na a tam lovang tih tur vel a niin ka hria. Ka pi chu a rawn check zung zung a,a dinhmun te chu sawiin damdawiin a awm reng theih chuan a tan a ţhat zawk tur thu a sawi luam bawk. Mahse ka pi ber hian haw ringawt a ngaihtuah mai si a, ka pa pawhin a khawngaih ve deuh a ni mahna, zanhnih chauh kan riak anga kan haw dawn nia ti khan a hnem ta ngawt kha a nia.

Dar 6 velah ka pi chu a rawn harh a, ka rin ai a mu rei bawk nen ka ngaih ţha loin nurse ka ko ngawt a, ani lah chuan ngaihsam fe hian , "a muhil a nih hi, zan lamah a mu tlem sia, ngaihtha deuh khan awm rawh." min ti mai a. 

Ka piin min hmu chu a lawm ve hmel khawp a, a bulah ţhuin a ril tam leh tam loh te ka zawt a. Thil a ei theih vak loh avangin a taksa pawh a cher sawt hle bawk.

Ţawng vak chi a nih loh avangin ka be vak lo bawk,ka biak chuan min chhang zel emaa kha a ni leh awm si a. A khuh nasa phei chuan thisen a khuh chhuak ţhin bawk nen chutiang a hrehawm a tuar lai chu hmuh ka chak lo a ni.

"Nupui nei tawh mai teh." a rawn ti a, ka lo nuih liam mai ringawt. Ka mutna kha ka siam rem sak a, tunah chuan a ţhu mu tawh a, ei tur tlem a ei tawh bawk. Amah hian a ei lui ve hram hram ţhin zawk a, hmân aţanga min zirtir dan a ni, taksa a nawm loh pawhin eng emaw tal thil ei ngei ngei thin tur a ti ţhin. Kan dam loh pawhin chaw ei kan ţhulh ngai mang lo bawk.

"I fate ka awm ve hman lo mai dawn a sin." a ti a, a thutak viau bawk. A cancer thu ka pa 'n a hrilh khan a dawngsawng thiam viau a ti kha a nia, dam leh beiseina nei miah lo anga a awm chu ka lungawi lo lek lek.

"I dam anga hne hluiin ila awm dawn a lawm." Ka ti ve a, a natna chungchangah hian han hnem turin sawi tur ka hre hlawllo. 

"Ka dam ţhat leh theih pawh ka ring tawh hleinem." a ti a, a hmelah lungngaihna ka hmu lo a, a natna chuan amahah danglamna a thlen pha lo nge a tilang duh lo zawk ni.

"Kan ţawngtai a,Doctor te thiamna hmangin i dam leh em em ang, i tello chuan in a nuam lo." Ka ti nghut a, ka kum lo tam zel mah se ka pi laka ka rilru pangchan ve na te hi chu a kiam thei ngai dawn lo a nih hi.

"Mai mai a, bialnu i nei a, ka awm leh awm loh i hre ngai tawp lovang." tiin min fiam a, min nuih var var bawk. A rilru lam dam viau angin lang mah se a taksa natna te hian ei chhiat chin a nei ngei awm si a, a natna hai der a hlim hmel a pu lui tlat thei te hi ka lainat zawk daih.

"Ka fa te ho pawh an hming i sa ve leh ang a, nalh lo deuh i tih loh hram ka beisei." ka tih chuan a nui hek hek a a hnu lawkah a khuh zui bawrh bawrh a, a khuh zawnga a taksa che awk awk mai te chu ka lainat lutuk ringawt, a tawrh hi chhawk sak theih ka chak tak zet.

Dar 8 a rikin nurse te'n damdawi an rawn pe a, tihhah leh ka hlauh avangin ka be duh tawh lo, hmuh hrehawm em mai. Lehkhabu ka chhiar sak ta zawk a.

Damdawiin a chhawk chinah chuan a muhil ta hle hle, kei pawh ka lo thaw huai bawk.

Ka pa te nen inbia in chanchin kan inhrilh a, dam chuan naktuk zan nen ka riah pui ang a, a tuklehah a haw chu kan tum dan a ni.

Zan reiah a khuh vang bawkin kan harh leh a, kei tak chu ka muhil lo hrim hrim. A khuh hian a na ţhin si a, a taksa sawp chau rawp khawpin a khuh ţhin bawk si. Thisen a chhak chhuak deuh reng mai bawk a, rilruin ka ţawngtai ru mawlh mawlh reng mai.

Zingkarah ka pa'n min rawn thlak a, ka kal tur chu ka pi chuan min ngai ve nge ni zan lama riahpui leh ngei turin min chah a, ka kal leh ngei tur thu tiamin in lamah ka haw ve ta chauh.

Zan lamah ka mu lo bawk a ka room ah in khungin ka mu veng veng. Ka hnathawhna lamah pawh U Joela'n min hrethiam khawp a, mihrang a ni lo bawka kei pawhin inrhlahrun viau ka tum hran lo.

Nileng deuh thaw chuan ka mu a tih theih ang, chawhnu lama ka harh meuh chuan ka zang hawk thei. 

Zana ka riahpui chuan a zan hmasa lam aiin kan mu thei ta deuh a, a khum bulah ţhuin ka veng tlaivar zak a ni ber. Zingkarah ka pate an rawn kal a, kan inhruai chhuak ta a. Ka pi a hlim chuan kan hlim a ni mai, chuvangin in lamah pawh a enkawl theih reng tho a, rilru hlim taka awm turin kan duh ber bawk.

In lama kan in enkawl takah chuan a enkawltu te tan pawh a hahdam thlak deuh a, keimah bawkin ka riah pui ţhin bawk. Ka pi a mut theih viau pawhin ka veng tlaivar deuh zak mai ţhin a, ka hnathawhna lamah pawh ka chawl zauh zauh bawk. 

Midang ka rin zawh loh vang lam ni lovin keimah ngeiin a awmpui ka duh avang leh midang ka chhawk ve theihna a nih avangin ka riahpui chawt a. A bakah kei aia an buaipui thiam zawk vek avangin ka awl ţhin thung.

In lama kan inenkawl aţangin chawlhkar thum a liam dawn tawh a, taksa a rimin a chauh thlak ve ţhin viau bawk. Ka pi erawh a taksa a chau tial tial a, chau leh chak lo chung chunga a'n khuh bawrh bawrh ţhin phei hi chu ka mangang ve lek lek ţhin.  

Ka hnathawhna lama Nihnih ka chawlh hnuah ka kal leh a, chawl turin phalna nei zau viau mah se an ţawngkam ţha um a han chawlh chawt zel kha dikin ka hre si lova, hnathawk dang a la mai remchang rih lo bawk nen lo chawlh san reng mai kha a inthlahrunawm ve bawk.

Hruaii a rawn luh chuan en zui lovin ka thil khawih lai ka khawih zawm mawlh mawlh a,ani hi eng nge maw a hriat ni, Elii chung chang ngawt mai hi a rawn sawi ţhin a, ka lo la thu tak ngai hlem hlei lova. A khawttawk hian thlalak min thawn deuh reng mai a, ka ngai thu tak ngai lo thung.

Ka pi dam lohna avangin Elii nen pawh kan inhmu khât, hnathawk tura ka chhuak tih loh chu inah ka awm chawt a ni ber. Ka inkhawm ngai lova, damdawi leh eng ilo lei tura min tirhin ka chhuak zawk tih loh chu inah ka awm chawt mai ţhin. 

Elii nen erawh kan inkar a ţha viau a, thikthu chhe lutuk anga awm ka duh loh avangin Hruaii thlalak min thawn pawh ka ngawih bo pui mai ţhin. A kal velna report min pe ve thlap zel a, mipa an awm loh thu a sawi ngai lo, an tel ve zel tih ka hrethiam bawk. Mahse chu mi avang chuan amah ka rinna tih chhiat ka tum phah lo a, hetia ka dah zelenna hian amah ka rin zia a hriatthiam ka ring bawk.

Anu leh pa ten an thlah zalen ţhin viau a, chuvangin a khawsa ziaah hriatthiamna ka nei sang viau bawk, mahse chu mi a nih avang chuan zalen lutuk a awm tir ve chu ka tum a ni lo. Hmeichhia a nih avangin kan inzilh ve mawlh mawlh ţhin a, a pawm thiam viau zel mai bawk a.

Hruaii chuan ţhutna siam remin ka lam a rawn hawi tih ka hmu thei a,"Enteh, in inthen tawh em ni?" a rawn ti hluai a, a ţawng zawi vak si lo midang an awm ang tih a hlauhawm ţhin khawp mai.

A zawhna pawh chhang ta lo chuan, "I fanu chu eng nge a an tak?" tiin ka zawt a, midang rawn lut thut thei reng a nih avangin mimal nun leh lutuk sawina hun a ni lo.

"A ţha tawh, ka zawhna ve thung kha?" a tih leh a, min ngaizawng tih chu ka hrethiam, mahse a boruak hip sang ţhin lutuk hi chu ka zo lo lek lek ţhin a ni, a zak thei lo ve thawkhat ti ila a dik ber ang.

"Ţhen lo." ka ti a, ka sawi zui chak vak lo tih chu hrethiam se ka ti hle.

"Mak ve." A ti ringawt a, chutah, "A zei viau a niang maw...." A ti leh hliai a, a ţawngkam hman duh dan chu ka helh zawng tak a ni. 

"A tawk,i ţawngkam hi fimkhur ve ţhin deuh teh." ka ti hmuk a, ka ţawng ring hran lo, mahse ka lung a tiawi teh chiam lo tih chu a hrethiam ang.

Ka thusawi chu engah mah a ngai lo tih hriat fe hian a nui hak a, "I fel lutuk bik vang a nih chu ka ring lo nain i â ve deuh zawk nge..... I hre lo der zawk le." a ti leh a, a la nui reng bawk. A thil sawi awmzia ka hriat loh avangin chhan tumna ka nei lo.

"A awm ve tho mai, ipi vangin i buai ve dawn bawk si." a ti leh a, a ţhut dan siam remin computer chu a khawih zawm leh a, midang an rawn lut zui ve leh bawk.

Dawr aţanga ka haw chuan a hma leh tawh lo hle a, ka awm ve chhunah hi chuan keiman hnu ka khar ziah ţhin bawk. 

In ka thlen chuan in leng tlem a zawng an lo awm a, Azela leh Hminga leh Ţana te an lo awm ve bawk a, an fel ţhin a nia.

Ka inthlak zawhin ka chhuak phei ve a, ka pi room lamah ka nu te an awm a, keini ţhut khawmna lamah kan ţhu thung.

"Hei thingpui." Zuitei'n a rawn tih chuan an awm ve tih ka hre chiah.

"Inva fel ţhin, midang an awm ve em?" Ka ti a, Azela chuan Zuata leh Malsawmpari pawh choka lama an awm thu a sawi a, Zuitei chuan, "I duh leh mu daih rawh, i chau tawh awm si." a ti a, midang pawh chuan an lo thlawp ve tliar tliar, mahse keiman riah pui tho ka duh avangin ka lo hnial thung.

"Ka riah pui dawn a, ti hian min men pui ve char char anga ni mai." ka ti fiamthu a, anni lah chu an lo inhuam mai mai khawp a, a ţul chuan tlaivar huama rawn kal an nih thu te an la sawi ta deuh deuh.

Ka pi hi riah pui ţhin mah ila kan inbe mang tawh lo a tih theih ang. Ti hian a mu tawp a, ţawng tir vak chi a nih loh avang hian keimahni hian a duh zawng kan zawt a, zaizir hian min chhang mai ţhin. A mutthilh theih mai loh changin lehkhabu ka chhiar sak a, a chang chuan amah pawh hi a tlaivar ţhin, a muhil mai thei ţhin bik si lova, chhun lamah a taksa chau hi a muhil thei ţhin hlauh zawk a.

Nithum liamta aţang khan oxygen kan hman tir a, a ning deuh hian a lo tuai thla leh mai ţhin bawk nen kan inhau leh zeuh zeuh ţhin bawk.

Zuitei choka lama a phei hnu chuan keini ho kan inkawm ve a, thingpui chu ka en hlek a, a siamtu ka hre thei nghalin ka hria, mak ve tak chu a ni, a tui ka ti ve miau mai si a.

Azela leh Hminga te hi phir an ni na hian an tuina zawng hi a inang lo ve khawp a, pakhat mechanic lamah a tui em em a, pakhat lehkha zir lamah. Ţana leh Hminga te hian lehkha an la zir a, an zirna leh eizawnna chung chang sawiin kan inkawm rei ta phian.

Dar 11 pelhah an haw a, an haw tur chu kawt thleng ka va thlah a, midang an kal vek tawh tihah Zuata chu a la inkhalh chhuak mai lo ,"Elii nen in la tha em?" a ti a. Kan ţhat thu chuan ka chhang ve mai a, ka ţhiante hian ka ngaihzawng chung chang min sawi pui khât khawp a, anni pawh ka sawipui ngai lo tluk a ni. An titi na karah ka lo hre ve zel zawk a.

"A that hlauh chu." A ti a, chutiang zawhna min zawt chu mak ka lo ti deuh. 

"Tunlai i buai thei sia ka tia ka zawt mai mai che." a ti a, naktuk Zirtawp ni a ni bawk a zan lamah riak tura a rawn kal tur thu sawiin kan in thlah a. A tlan liam thleng chuan ka thlir reng a. 

In chhung ka luh chuan an lo inkalh fel mek a, ka pa'n min hmuh chuan ,"Hei i ţhiante theihnghilh a niang." tiin phone min rawn pe a, tu ta ber nge ka hre lo. 

"Midang ta pawh a ni thei a sin." ka ti a, ka ţhiante phone ka hre vek miau lova, inleng dang kan nei ve tho bawk nen an ta a ni lo ve thei tho.

"Ka hre lo le, choka lam a mi a nia. I ţhiante ho kha an awm reng sia." A ti leh a. 

Bektei chuan,"I ţhiante ta a niang, kawl sak rawh." a lo ti ve bawk.

"Ti khan dahtha rawh, a neitu chuan a hawn lo tih a hre thuai mai ang." tiin a kal sawn a. Phone keng chung chuan ka pi room lamah ka lut ve a, ka nu pawh a lo la awm.

Ka pi chu a mutthilh loh avangin ka nu chhuah hnuah lehkhabu ka chhiar sak a, a thaw ri sak sak tih loh chu a reh ta viau mai.

Lehkhabu ka chhiar lai chuan phone chu a rawn ri ta ngei, a lo call tu ka en chuan 'Sawmtei' tih a ni a, ka chhang zui ve vut.

"Hello." Ka tih chuan Zuitei aw hian, "Ka phone kha ka theihnghilh daih." a rawn ti a, "Aw nia hei ka kawl." Ka lo ti thuai.

"Ka lo la dawn a nia." tiin a hmet tawp zui a, a phone a lock ve vek avangin tu ta ber nge a hriat theih loh hrim hrim kha a nia, an rawn lam vat kha ka ring hrim hrim.

Ka pi hnenah chuan ka chhuah lawk tur thu hrilhin ka chhuahsan a, pawnah ka va nghak ta reng. Rin ai a rawn kal har daih mai lehnghal.

Malsawmpari a rawn lang hlawl mai a, min hmuh rual chuan Zuitei'n a tirh thu chu a sawi zui nghal, a kal mai dawn emaw tih laiin,"I pi chu a muhil tawh em ni?" a ti a, a la men thu chuan ka chhang ve mai bawk.

"In enkawl ţha rawh u nangni pawh, dam lo enkawl tute pawh hi dam lo ve thei tho kan nia, kan hriselna hlamchhiah bik tur a ni miah lo." a ti dap dap a, ve reuh hian a.

"Nia." ka ti ringawt a, a kal ta mai lo chu ka luh san mai zawk dawn nge mawni ka ti rilru tawh, ka pi kha a lo buai ang tih a hlauhawm tlat.

"I hmelah khan i hrisel hmel vak bik lo a nia." tiin a ner nung a, a dik pawh a dik ve ang. 

"Ka kal dawn, muttui u. Kan ţawngtaipui ve reng che u a nia." ti zung zungin ka chhan letna pawh ngaihsak lo chuan a kal leh ta nul nul. 

In chhungah ka lut zui a, light off in ka pi room ah ka lut leh. Ka biak a a rawn men tak lohah chuan a muhil niin ka hria, a thawk lak leh lak loh ka check leh te te a, ka mutna tur lam ka pan ta chauh.

****

Chhun chawlh hun a nih dawn chuan ka phone a rawn ri a, Elii hnen aţangin a ni. Vawiin a piancham a ni tih ka hre tawh a, lawmpuina tur pawh ka la leisak lo.

Zan lamah hotel a lawm a tum a, kal ve turin min sawm ngawrh viau bawk. Mahse ka pi dinhmun he ti hi a ni si a, ka kal ve dawn leh dawn loh pawh kan la inhrilh chiang lo.

Midang awm an tlem bawka tiin ka chhang zui a, zan lama a mi tur atana a ţhiante nen an bazar mek thu min rawn hrilh thuai bawk. 

A lawmna huna ka kal theih dawn leh dawn loh ka chian theih loh avangin bazar puiah min sawm kha a nia, dar zat ka lo en lo nen ka lo theihnghilh hman chu niin.

A awmna ka zawt ta thuai a, min lo nghah tur thu a sawi chuan kan inbiakna titawpin ka chhuak zui vut.

U Joela ka hrilh lawk tawh avangin ka inkhalh chhuak zui a, a awmna ka va thlen chuan dawr pakhatah lo awmin a ţhiante a tih ho nen an lo awm laih. An incheina en reng reng pawhin an nei ve thawkhat tih a hriat hlawm viau, an nei ka tihah khan an chhungte zawk ka sawina, anni ho hi chuan thawhchhuah an neih pawhin tam tham la lut thei hmel an pu rih lo tlat.

A ţhiante chu min inhmelhriat tir zung zung a, hmeichhia panga leh mipa pathum an ni. An zinga mipa pakhat nen chuan kan inen uluk viau bawk. Hruaii hnen aţanga ka thlalak dawn ţhinah khan ka hmu zing tawh viau a ni.

An dawr awmna aţanga inzui chhuakin kalna tur a sawina lam lamah chuan kan kal a, a pianchamah pawha chawhnu lam chauh ka hman mai chu a zia lo tak tak. Ani lah chawhma lam a ţhianten an lo hauhsa bawk kha a ni si a, kan hman hun a rual lo lak lawh a ni ber.

Thil pek inpek hi ka tih ngai a ni vak lova, piancham lawmpuina leh ni bik thilah erawh chuan ka in ui lo ţhin viau thung. 

Dawrah luh puiin a thil duh zawng ka en kual pui a,anni ang tan mamawh tak tak awm hek lo le, mawi leh nalh, a chhuak thar ţha ţha a piang neih duhna bak nei lo ta chu a thil en ho pawh a tlawm lo ţhin viau. A pheikhawk lei pawh chu aman pek a tum ve tlat a, mahse ani pheikhawk pakhat man te zawng ka neih ve miau avangin a piancham lawmpuina turin tiin ka leisak a, a lungawi ve mai bawk.

Zanriah kan ei dun nghal a, atana hun awl ka nei ve thei chu a lawm thu a sawi deuh reng mai bawk. Zan lam programme neisa a nih avangin ka haw tlai pui lova, a piancham lawmna lamah chuan kal ve tura min nawrin a hmun te chu min hrilh a, "I lo tel ve hrim hrim khan a nuam ka ti dawn a lawm, i hman ngang loh chuan a pawi chuang lo, mahse ka lo kal theih chu tum ve tho la." tiin min thlah ta a.

Kan in ah chuan inleng lut chhuak kan awm deuh reng a, a thlamuan thlak ţhin khawp mai.

Zuata a rawn thlen chuan choka lamah kan awm renrawn a, sana ka bih deuh sek mai bawk. Han chhuah daih mai chu ka inthlahrung deuh a ni.

Bektei pawh no seng leh silin a buai deuh reng a, a ţhian kawm ve ber Chhani a rawn thlen chuan a rawn pui ve nghal a, keini kan lo awl ve thung.

Zuata chu ka kalna tur ka hrilh chuan min fiam zuk zuk reng a, mahse ka hre lo der ve tlat. Ka nu hnenah ka chhuah lawk tur thu sawiin Dar 8 pelhah ka chhuak a, ka present pek tur pawh ka ak ve ran. 

A sawina hmun ka thlen chuan muangchangin ka lut a, receptionists hnenah ka kal duhna ka sawi chuan a awmna min kawhhmuh thuai bawk. A sawina lamah chuan kal zelin room pakhat zawnah chuan ka ding ta a, kawngka an khar phui lo bawk an thawm chu pawn aţangin a hriat theih.

Ka kal tur thu ka hrilh lawk lova min hmu thut tur chu engtin nge a lo awm ang ka hre chak viau bawk. 

Kawngka hawng zauva ka luh chuan thawm an lo nei laih laih bawk nen tu amah chuan min lo ngaihven lo. An hawi ţhap na lam ka en ve chuan ka pen lai chu ka ding chut. A birthday cake bula ding lai chu an kil laih a, a bulah a ţhiante ding vek mahse amah hnaih taka ding chu thlalak a mi bawk kha a ni. 

A piancham lawmpuina hla saa an zai lai chuan chupa chuan a kawnga kuahin a hmuiah chuan a fawh sak a, midang ho thawm pawh ring ţha viau. 

Chutia ka thlir reng lai chuan ka awm ve tih hre thei ang mai hian Elii chu a rawn hawi chhuak a, a nui hmel reh riai riai mai ka hmuh chuan ka kawchhung hi a so but ni mai hian ka hria.

End of chapter 6

💔