ONE AND ONLY 💘 by Unknown belle

ONE AND ONLY

"Tlaiah tuition i kal dawn em?" Tukţhuan ei laia ka nu'n a tih chuan ka bu nghat a, "Bazar a ngai a mi?" Ka tih chuan tuition ka kal dawn chuan amah a kal theih mai a rin thu a sawi a, tlawmngaia ka theih tur thu sawi pawh ka tum chuang lo, karkhatah nithum ka kala, ka subject duh kan zir ni turah ka kal mai zel a ni.

Bus stand ah chuan ka ţhiante ka nghak a, Remruathlui ka ni a, tunah hian pawl 11 ka zir mek a ni. Kan school ah hian high school a ţanga kal chho tawh kan nih avangin kan tlangnel hle a, kan class ah phei chuan lut thar chu 10 leh tlem chauh an ni ang, kan section kan ţhahnem ang reng a, fail ngai lo mah ila a langsar pawl ka ni ngai chuang lo.

Nidang zawng aia vawiin ka phur loh nachhan pawh kan sir in ţhutna min sawn daiha, kan ţhian ho pawh min ţhendarh hneh khawp mai, Eli nen mipa kan ţhutpui a, F-i leh Seni te chuan hmeichhia ve ve an ţhut pui. Ka vanduai leh na chu ka ţhutpui pa hi lut thar zing a mi a ni a, thlathum lai school kal ve tawh mah ila, ka ţhutpui pa ber kher hi chu vawikhatmah kan la inbe lo, ka ţhiante pawh hian an la be bik lovang, kan awmkhawm hi chuan midang hi kan ngai lo ve a.

An rawn thlen kim meuh chuan darkar chanve dawn ka lo nghak leh tawh, lalseni hi a muang thei em bawk a ni.

Classroom kan luh chuan kan ţhutna lam ţheuh kan pan a, ka ţhutna hi a hnun deuh avangin kan ţhian ho chu class lak lai pawhin kan in signal pha lo.

Ka ţhutna lam ka pan chuan ka ţhutpui pa pawh a lo ţhu rún tawh mai, a hmel pek dan aţang hian mi fel tak chu a ni lo tawp ang. Ka ţhiante'n min peih loh pui em avang hian ka huphurh zual, nimin lamah te kha chuan school a kal lo tal a, kal lo char char mah se pawi pawh ka ti lo, a thin tih rim a hlauhawm dawn em mai, bakah midang sawi hmangah zirlai naupang awm ţha duh lo an ti a, a school luhna aţanga rawn lut ve te'n an sawi dan chuan suspend te pawh a lo tawk zauh zauh tawh an ti, mi sawi anih avangin a awihawm loh chuang lo, a hmel hian a zir em mai.

A kil lama aţhut avangin ngawi rengin ka ţhu thla a, tlar hma lamah ni nak nak hlawm mah se ka ţhutpui pa vang hian ka zawi ve hnawlh ringawt.

Min biak a tum lova, biak pawh ka tum bik lo, Vanlalhmangaiha a ni a, section B lamah chuan a hming an lam ngun hle a ni awm e, a sual hmel teh reng nen hian!!

Miss a rawn luh chuan morning wish neiin kan ding suau a, Vanlalhmangaiha chu a awm ngai rengin a awm, dawhkan a bawh a, a mit a chhing daih bawk, surprise checking an neih dawn avangin min ţhut tir mai lovin zirtirtu eng emaw zah an rawn lut a, a ke ah chuan ka va tlawh zauh a, zim te a rawn mengin peih lo hmel deuh chuan min rawn melh chho a, ka kutin ding turin ka signal vat bawk, zawi zet chuan a rawn ding ve mai a, a rawn din meuh chuan ka te suai suai ni mai hian ka hria.

Class pangngai kan lak chhung zawng chuan zirlai a ngaihsak awmin a awm duh lo reng reng, a pen a tih vir loh leh note ah thil a thai neuh neuh a, miss in copy tur a ziah lai pawhin a ziak ve lo reng reng, a awm vel mai mai a ni, amah ka hriat dan a lo dik lo sa nen a awmdan avang chuan ka ei lo ve em em ringawt.

Short break kan neih dawn avangin ka inkhung fel sawk sawk a, "I note ka lo copy." Tih pah chuan ka note book dawhkan hnuaia ka dah chu a rawn ban nghal a, ka note a nia, ka phal lo pawh a ni lo, mi te pawh dil der ve eih awm, tharumah hneh dawn lo mah ila ka ngaihdan a ni lo ve khawp mai, ka ţhian pawh a ni tawp si lo.

"I phal vak na nge?" Nui lui tih hriat deuha a rawn tih chuan ka ngei zual sawt! Ka hmelah ka lo tilang viau em maw ni le....

"Class lak lai te khan copy ve mai ta che engmah i ti chuang si lo." Pangngai thei ang ber chuan ka ti a, a thin ka tih rim chuan ka ngam dawn lo nasa si! Ka ning! Mipa ni ve ila chu "ka phal lo!!" Tih pahin ka chhuhsam daih tawh ang,.

"Kha! I phal loh chuan ka copy peih hleinem." Tih pahin dawhkanah chuan a rawn thehthla leh a, eng nge a hriat a hepa hi!! Thinrim chak si thinrimna tur hre lo a ang ber. Tukverh ngheng chuan min melh ngar a, ka ngei reuh em avang chuan chhan pawh ka chhang peih lo, tum bur chung chuan dawhkan hnuaiah ka note chu ka dah lut leh a, min en reng tih ka hria, ka hre lo awm vel hmiah hmiah, a theih pa tawpa ngeng a khawsak a tum ni hmiang!

F-i tlar hma lama a ţhut avangin a ţhutna bulah an lo awmkhawm ţhap tawh a, ka hnungah chuan Vanlalhmangaiha'n min rawn zui ve tih ka hre thei.

Ka ţhiante bula ka din chuan min kal pelin kawngka ah a chhuak a, Eli lah chuan ka haw dawn tih hre sa rengin,"In inhmeh reuh e." A rawn tih chuan a hma a ka lo lungawi lo sa tawh bawk nen a hnungah chuan ka chum awk a, ka duh ai ka chum na!

Bell a rika kan luh leh chuan Vanlalhmangaiha chu hmuh tur a awm leh tawh lo, a rucksack pawh a awm lo. Pawi chei hleinem, a nuam ting a ni mai, nitin bunk ziah se a tan ţha lo mah se nuam ka ti hlei hlei ang chu aw......

Test kan neih deuh reng ţhin avang hian ka theih ang tawkin ka zir ve nasa ţhin hle a, Vanlalhmangaiha pawh a ngawih reng chuan a fel chu a ni mai. 

Test tur zirin ka meng rei ţhin bawk nen ka chalah arngeng tur a rawn inţham a, a langsar bawk nen ka ţhiante chuan min chhaih min chhaih a, zan ka men rim deuh te hian khawi lai lai a maw ah hian a rawn inţham ve ziah.

Test kan neih lai chuan ka ke ah min rawn chhir zauh a, a bawp a sei bawka, a ke lam a che tih pawh a hriat loh. A enga mah hma chuan ka rilru concentrate lai min rawn tihbuai avangin ka'n meng rum nghal ringawt a!

"Ka en ve duh." A rawn tih chuan min hmu tu an awm em tiin ka hawi kual phawt, a aw a thum bul bawk si, kan bul vel ami te hi chuan an hre vekin ka ring!

"Ţawng zawi ve ta che!" Zawi deuh taka ka tih hlak chuan a hawi kual ve thuak a, "Khawi.." tih pahin ka chhan tawh sa ka dah zinga mi chu a rawn ban hmiah! Zirtirtu ten min hmuh ka hlauh avang chuan ka ziah lai ka ziah zawm mawlh mawlh a.

Paper ka submit dawn chuan hnuailam aţangin ka pawnfen a pawt bet ta tlat mai! "Eng nge!!" Ning deuh taka ka ti hap chuan , "Ka la pass pha lo." A rawn ti nia! 

Vei khawr a nih avangin veilamin pen a hum a, dinglamin ka pawnfen chu a pawt tlat bawk, thawh luih ka tum pawhin a vuan nghet lutuk a ka tho thei si lo!

"Zir ve mai ta che!" Ka tih chuan, "Vatin!" A rawn ti leh a, a va han zak thei lo mai mai tak! Pawi lo mai, ka en tir anga, a laka ka thu ve deuh theih nan.

"Kha!" Tih pahin mark pu tam deuh ho chu a lamah ka hnawl phei a, zirtirtu ten min hmuh ka hlauh avangin ka ans paper check angin ka melh ngur ringawt.

"Kha ti vat tur kha a lawm." Tih paha min thlahin a copy nghal a, min hmu lo mah se ka melh rum hrep ringawt!

"Pass i duh te chuan zir ve mai ta che." Midang thawm avang chuan remchan lai chuhin ka hau ve ngei a, "Hei ka pass dawn a lawm." A ti awlsam et mai.

"Midang kuhmum a par i tum a nih kha." Ka tih chuan. ," Note min hawh tir duh lo a nih kha." Thum dut chuan A rawn ti ta daih. Thawm a reh leh tak diak avang chuan ka chhang ta lem lova, ka rilru te te chuan 'a hawh tum ni pawh khan ka phalloh thu ka sawi tawp si lo' ka ti nuah nuah.

A zawh veleh chuan paper chu lak sakin ka submit nghala, ka ţhiante chuan pawnah min lo nghak ţhap tawh, hun a la zawh loh avang chuan ground lam hawi thla chung chuan kan titi hlawm malh malh a.

"A luh theih." Tih paha ka dara min rawn mana classroom lam a min nawr kal nghal dawt dawt avang chuan ka tal vak ringawt! Vanlalhmangaiha lek! A va zak lo tak, test na a ka hrilh avang khan min ngam hawr hawr turin ka duh lo reng reng. Ka ţhiante lam ka va en chuan mak ti zet chuan min lo melh hra hlawm mai, kei pawhin mak ka ti ve tho.

"I zak lo em mai, ka ţhiante nen kan inkawm kha i hmu lo a mi!" Ka tih hlak chuan a ner sak ringawt, min ngainep hmel thei lutuk te hi ka hua, ka rilru chuan a hmaiah hian ka beng ţhuai!

"Hmu e." A ti liam puat a, min nawr kal lehnghal dat dat bawk, min vuan nghet bawk nen ka tal sawn thei bawk si lo chu beidawng zetin ka kal hnak hnak ringawt, classroom ah lah chuan mak min tih hmel hlawm em em mai lehnghal, ka tum bur tawh mai.

Ka ţhutna a ka ţhut thlak rual chuan ka hnunglam aţanga a killama lutin a ţhu ve nghal a, ka box aţanga marker la in dawhkan leh ţhutthleng lai tak chu ka rin zawm ve ve a, ka chetzia chu dawhkana khabe dawm meuhin min lo en reng ringawt.

Ka marker ka khung fel hnu chuan a lam hawiin , "Tun a ţang chuan helai chin hi i chan a nia, helam hi keimah, i lo pel a nih vaih chuan...." Tiin ka sawi zawm duh lo ngei a, a hmelah chuan min nuihzat tih ka hria, ka nuih pawh a za ve lo, ka ţhiante zinga ţanga min pawh pen vang chauh pawh ni lo in, min tham lo hmel thei lutuk te hi ka haw em em a ni.

"Chuan eng nge." A khabe dawm reng chunga mit ko san chunga a tih liam puat chuan , "Ţhutna sawn ka dil ang." Ka ti ram hmarh a, engah mah a ngaih loh hmel em em mai lehnghal, ka rilru tak takin ka sawi bawk, he ti zozai zingah hian ka bula ţhu duh an awm ve chiang em, ka rucksack a ma tih tlak ngei ngei pawh zu han chhar duh ţhak lova!! Kei ai a len urh a vang hian ka thinrim ka ti lang ve ngai lo mai mai a, tun a ţang chuan ka hlau tawh bik lovang, zirtirtu ten ţhutna sawn ka dil a nih pawhin min hrethiam em em ang.

Engtin maha min chhang lo chuan min melh vung vung ringawt a, ţhiante pawh a nei ve lo nge maw ni, ka hmuh chinah amah hian a awm rek rek zel a, a awmdan aţang hi chuan ţhian thar mamawh hmel hi a pu hlawl lo, amah ang maia class a awm ţha duh lo hi awm ve nuk mah se tu a mah hi a kawm chuang bawk si lo, amah hian a sual thiam ve em em ringawt mai hian ka hria, nel theih hian a awm lo a ni ber, a chang leh ka awm ve lo ang mai hian ngawi rengin a awm a, kan inbiak ve chhun lah hian a ngeiawm thei si.

Note ka copy ţhat lai chuan ka chal arngeng chu a rawn nem a nih chu!! Ţe ţhatin ka hup nghala, a na lutuk chu ka mittui a tling ţeuh thei! Mittui tling pam chuan ka melh khai a,"I mawl a mi! Arngeng i hmu ngai lo a mi!!" Vin ka tum ang pawhin ka vin thei lo, a nat dan chu ka chal pumpui hi unconscious ang mai hian a awm, a ţham lian bawk nen ben let hrep mai chu ka duh.

"Sorry.." a ti sup ringawt a, a hmelah chuan a inthiam lo ve deuh tih ka hmu thei, mahse a na a reh phah chuang lo. Chhang tawh lo chuan k mittui hru hul thuakin note ka copy zawm a, ka chal na vawt vawt lutuk chu khawsik tur ang mai te hian ka awm.

"Nachhawkna ei la." a tih chuan lu ka thing ringawt, arngeng hi ka nei zing ve tawh, nachhawkna ka ei awm pawh ka la hre lo.

Class lak lai te chuan min melh zuk zuk reng a, a rawn nem ruala ka beng hrep lo kha a vannei tak zet a ni.

School banah chuan ka ţhiante chuan kan chanchin min zawt chik khawp mai, han sawi vak tur hi a awm der mai si lo, ka huat ţhin zia ka sawina pawh hi anmahni bawk ni si hian mim hmehbel phet hi an tum a.

Zanah chuan F-i chuan min rawn zawt nawn leh ngata, a chhan pawh section B lamin vawiin khan min lo hmu nual a ni awm a, Vanlalhmangaiha hian ţhian a kawm ngai loh bakah hmeichhe lam phei chu a ngaihsak loh hmel ngawih ngawih, chuvangin an ngaihbel hma a ni ngei ang, an hmuh leh hriat chin hi a tlem si, ngaihdan an siam zung zung zel mai bawk si hi an hahthlak tlang teh e.

Zingah chuan ka nau form mawza ka zawn pui rei em avangin ka tlai hle a, ka ţhiante pawh min kalsan mai turin ka hrilh ta tawp kha a nia, Angeli nen hian kan kum a inthlau ang reng a, class 4 zirlai a ni a, ka nu hian puan ţhui dawr a nei ve a, ka pa chuan taxi a khalh ţhin thung, tukin chu ka nu a nuamsam lo nen ka nau ka buaipui a, a khattawk hian a mawza a zawn loh leh a necktie hi zawn ngai hian a awm zut reng mai a ni. Ka nu'n a dah fel sak vek pawh hi a inkhualtelem hian a lo khawih darh leh ţhin a, school kal loh chhuanlam a hman hi a tum ve ziah lehnghal.

School ka thlen chuan Bell a ri chiah chiah a, hmanhmawh takin kan classroom lam ka pan nghal bawk.

Ka ţhut fel rual chuan ka hah avanga ka thawk a la pangngai theih loh avang chuan muang changin thawk ka la a, ka thaw chhuak leh suai suai a, ka zia deuh huaiin ka hria, ka ţhutpui pa lah chuan min lo la melh kur zui! Ka hre lo awm ve hmiah hmiah ringawt.

Second period kan lak dawn chuan ka lehkhabu chu a rawn pawt hret hret a, ka lo man bet vat, "Ninhlei suh!" Ka'n ti nghal thawr a, a hma ai chuan ka ngam ve deuh tawh bawk a, palzam mai mai chu ka tum tawh lo.

"Ka keng hleinem." tih pah chuan kan inkar ah tak chuan a pawt phei a, a ken loh miau chuan entir ve chu ka tih tur anih avangin ka sawisel ta lo.

Ka lehkhabu pena a tin chuan a kut chu ka lo man bet vat, lehkhabu hi ka uluk ţhin a, thai ran ka phal teuh loh mai! 

"A hnawk dawn lo!" tiin ka vawnna chu a tal pit a, rang takin ka vuan leh vat, "Ka phal chuang lo!" Ka ti ţalh a, ka lehkhabu a nia, ka thu zawk hrim hrim.

Thai luih a tum chuan a hma zawn chu ka kutin ka khup thuk a, ka thawm ka lo dim lo bawk nen an rawn hawi ţhup mai!

"Vanlalhmangaiha leh Remruathlui te, last warning aw!" Sir in fiah fek fawka a rawn tih chuan a kutah ka sik vak ringawt, na ti awm pawhin a awm lo, ama thiam loh liau liau a ni.

Sir in min warning tawh avang chuan che mang lo chuan ka ţhu khawng at reng a, chu chu remchangah la in ka lehkhabu ah chuan a thai melh melh a, sir in min thli thlai reng tawha ka hriat avangin eng nge a ziah pawh ka en ngam lo, ka lehkhabu a nia, ka phallo chung a ziah luih avang chuan ka haw zual sawt! Pencil pawh ni lo pen a hmang lehnghal!

Nileng chuan ka lung a awi thei lova, eng nge a ziah pawh ka en chuang lo, ka khup tawpa, ka rucksack ah ka khung hmiah.

"Hey! I thinrim a ni maw." A bana nghawk zeuha a tih chuan hawi pawh ka hawi peih lo, ka awmdan ah hian min zawh kher a ţul pawh ka ti lo.

"Kha ramri i pel" a tih leh chuan dawhkan ka en vata, engmah a pel lo, ţhutthleng ka en leh a, ka rucksack pawh ka pawm daiha, ka pel lo nasa. Tum bar chung chuan hmalam ka melh ngar a, ngam ngat ila chu ka beng sawk tawh ang.

"Ramri ka pelh chuan dan i siam a, i pelh ve avangin keiman ka siam ve thung thei." a tih pawh chuan hre lo ang hmakin ka la awm ngar a, min biak phet a tum pawh hi ka ning riau, ti hian Seni te thlarah khuan ka tlan thla daih mai dawn em ni le....

"Engtin nge ka siam ve ang aw....." Dawhkan bawha min en reng paha a tih chuan, "Ka pel bawk lo!" Ka ti hmak a, ka be chak rih hlawl lo a ni. Ka chhan dan a vang chuan a nui duh lek chauh lehnghal, a sam buk laiah hian ka kek vak mai dawn nge maw ni, ka huat zawnga awm dan hi a va han thiam em em ve le!!

"I form pawnfen khan a pel reng, dah sawn pawh ni la i pelh tho a vangin ka kut i malis thei." A tih chuan ka pawnfen ka en vat a, hm! A pelh dan a ho lutuk! 

"Hetiang pel pawh a nih loh hi." Ka ti ve nghat a, "I pel tho a lawm, kha ka kut i malis thei." Tiin a kut chu a ma lama line bulah chuan a daha, dawhkanah a la bawk rún bawk nen a lian ther thur ngawt mai.

A hma lamin keiman dan ka siam thawt thawt avang chuan han pumpelh bik chu nuam ka ti chiah bik lo, ka siam aţang khan a pel lo ve ngat ngat bawk si a, a duhdan ka zah sak ve chu ka tih tur niin ka hria.

Thawk la hapin a kut chu ka hmeh sak a, min en reng mah se tum bur chungin ka hre lo der hmak, ka lungawi thei hlawl lo hi hria se ka duh, ka tette aţang tawhin ka lehkhabu ho hi ka uluk thei em em a, ka ţhiante lehkhabu thleng hian ka uluk pui ti ila a sual lovang, lehkhabu ziah ran hi ka ngai thei bau lo bawk, Vanlalhmangaiha hi ngam bawrh bawrh chu ni ila ka hau nasa thei viau a, nitin hian a lehkhabu te hi a thai neuh neuh reng zel.

A kut phah chu a lian em em lehnghal, hmeh pawh ka hmet na zo dawn em maw ni le....

"Uluk ve la." Mit chhing chunga a tih chuan lei ka chhuah khum vak ringawt, min hmu chuang lo.

Class lak a hun leh daih tawh sia, nga ti nge teacher an rawn luh miah loh le. A kut ka malis lah chu duh tawk turin min tih a tum der si lo.

"Ka ban a kham, ka peih tawh lo." Tih paha ka thlah tur chu ka kut veilam chu a kut chuan a rawn hum bet chat a, inlen hleih ţeng ţeng....kut sin chi ka lo ni bawk nen nuih te lam a za e a.

Ka kut hum chunga rawn tho chhuakin kan kut chu a en a, a kut lehlama ka banrek vuanin lehlam chuan a rawn teh a, a la nui ang suk suk zui.

"I ninawm!" Ti hlakin ka kut chu ka pawt a, a thlah duh mai lo lehnghal, "I va nei te ve." Nuihza insum zeta a tih chuan "A ho!" Ka lo ti ve hlar a, "ka tha chanve pawh i hneh dawn lo a nih hi...." Kan kut thlek vut vut chuan a ti leh a, ka pawh vak takah chuan a thlah ve mai bawk.

Nileng chuan min tihbuai phet chu a tum a, eng tak chu hria ni maw, ka be chak lo laklawh a, ka form a pawt sek leh min tlawh zauh zauh reng te chu engah mah ngai lo ang mai chuan ka awm a, haw tura ka chhuak tur chu paper te chu ka rucksack side pocket a rawn dah pahin ,"I mamawh takin."tia min siai zeuhin min kal pel a, ka melhrum ve vak ringawt.

A kal hlat hnu chuan a thil dahna chu ka zen rak rak a, ka en chuan phone number a lo ni, eng atan nge maw ka tih a rin reng reng ni.

*

*

Vawiin a kan zir thar naktuk a kan test nghal dawn avangin zanriah eikham a thleng ka sil zawh hnu chuan pindan lamah ka in khung nghal a, test kan neih dawn avangin tlai lamah home work ka ti hmasa a, zan lama test tur zir ka duh avangin, mahse ka zir tur note ber chu ka hmu ta tlat lo! Ka lehkhabu dahna zawng zawng haiin ka rucksack ka bun chhuah vek pawhin ka hmu zo lo, darkar khat dawn ka zawn hnu chuan Vanlalhmangaiha'n phone number min pek kha ka ngaihtuah chhuak thut, hmela mai mai chu! Ama thuhruk a ni chiang lutuk! Ni lo se a phone number ka mamawh nachhan tur ka hre lo!

Thinrim ţun chung chuan a paper min pek ka dah khawr vek tawh chu ka pharh ţha leh a, thinrim thaw ri sak sakin phone ring chu ka ngaithla a, a la thei lo zui!!

Beidawng lovin ka tinawn tluk tluk a, a vawinga na ah chuan an rawn chhang ve hram, "Hmela! Ka notebook i thukru a ni maw!!" Ka ti nghal hmiah, ni lo se ka hawn dawn tih ka chiang, intheihnghilh pheng phung ching ka ni ve lo.

"Tu nge aw....?" A rawn tih chuan au khum vak mai chu ka duh! Min hre lo der chiang lutuk!

"I hmelchhe lutuk!!" Ka ti ţhat ringawt, ţawngkam ka uluk zozai hman lo, min tih thinrim dan a va han hre em em, ani angin rilru chak ni ila hetiang hian ka rilru a hah tawp nang!!

"Rawn lam la." A tih chuan thinrim ţunin ka hangup hmak a, ka va han lam chatuan awm lo tak em.

A rawn call back nghal zat avang chuan chhang vatin ,"I duh leh nei rawh." Ka ti nghal pang pang a, "Thinchhe ve sia!" phun hluk a a rawn ti ngam te chu a zak lo hi ka ti ngawih ngawih,"Ka duh leh ka thinchhia ang." Ka ti let zat, a ho em mai, phone kal tlang te chuan ka hlau lo nasa.....!!

"In in awmna lo sawi la ka rawn dah ang." A tih chuan a ruk chuan ka thaw huai mai, "Ngai lo mai, ka ţhiante ka dil mai ang." Ka ti nghat a, a ruk tak chuan kan address hrilh nghal chu ka duh, a chhan pawh ka kutziak lo chu ka thiam thei lo ka ti mai, ka ţhiante note ka dil chuan ka copy leh vek a ngai anga, hun ka ui ru viau.

"I ti tak tak maw...?" A tih chuan a aw ah a nuih a za tih ka hre thei , "Dar 7:30 rik hma in rawn dah ang che, a nih loh chuan ka report che a ni mai!" Tiin kan address sawi zung zungin a sawi ve tur pawh nghak lovin ka dah hmak, min chhaih buai phet a tum palh ang biak rei chi pawh a ni lo.

A lo thlen hma chuan ka theih ang angin textbook chu ka chhiar ve a, a rawn thleng har ka ti khawp mai, khawi aţangin nge a rawn kal dawn pawh ka hre lo, an veng awmna engtianga hla nge a nih pawh ka hre lo.

Ka phone a dar zat ka en chuan 7:30 chiah chiah a ni, a rawn ri ve nghal zat bawk,"I sawina lai ka thleng tawh." Ka lak rual chuan a rawn ti thum dut a, kan in pan dawn hian step thui vak lo kal a ngaih avangin step bul thleng chu a rawn thleng tawh a ni chek ang chu.

"Rawn chhuk thla rawh step ah khan." Ka tih chuan a chhuk mek thu a sawi a, phone hmang chung chuan pawnah ka chhuak a, ka chhuah dawn chuan sitting room a ka nu leh Angeli lehkha lo zir dun bulah chuan ka note min rawn pe tur an awm tiin ka chhuak zui nghal a, ka pa chu a inkhalh chhuak leh daih tawh.

A rawn kal pah chuan kan inbe reng a, a kal na tur ka hrilh zel bawk.

"Ka hmu che." A tih chuan a rawn kalna lam tur chu ka hawi a, ka notebook a kenna lam chu a rawn vai zauh zauh mai, phone chu dah mai lo chuan ka beng bulah ka dah renga, kan inkawt a rawn thlen chuan ka dah thla ve chiah.

"Khawi!" tiin notebook chu ka ban nghal a, ka ban phak loh turin a keng sang daih! "Vanlal vawithum ka chhiar a min pek loh chuan..!!" Dawhthei lo hmel zet chuan ka ti khar khar a, a hmui ti sawi zauhin a mit ko a san ak a, "Lut turin min sawm dawn lo em ni?" A tih chuan ka lu ka thing nasa khawp mai, vawikhatmah kan inchhungah hian mipa ka la hruai lut ngai lo, ţhian mipa ka nei ngai lo bawk.

"A chi loh, khawi min pe vat la ka zir duh a nia." Ka tih pawh chuan min pek a la tum hmel lo khawp mai , "Eng nga ti nge min tih thinrim i chak em em a....!! Zir vat ka duh a nia!" Ka chhungten ka ţawng an hriat hlau deuh chuan ka ti vin hlak a, a jumper dum hak lukhum a khum run a, a lian zuar bawk si a hmel zawng zawng nen hian a sual hmel ngawih ngawih.

"Kha! Naktukah min hrilh ve loh chuan i chak lo ang!" A kut phah ka luchunga nghah paha a tih chuan ka ner nung mai, kei ai a thiam daih zawk sia.

Notebook ka lak hnu chuan ka lu a la dawm bet reng a, ngawi reng chuan min en reng a, hrawk thian kharh kharhin ka melh ve reng ringawt.

A kut lehlam a kekawr ipte a ţanga lachhuakin a kut khinghnihin ka hmai chu a rawn khuap a, ka tal sawn dawna a vuan nghet tulh tulh mai, ka hmai chu a hup bo vek thei ang chu mawle...!!

Rawn kun hniamin hnai takah min melh a, ka thin phu rang ta zaih zaih chuan ka taksa a ti lum pup pup mai. "Ka lut duh a nia...." Ka kut pahnih a a taksa nem chung chuan ka ti a,ţawng pawh ka ţawng ring ngam lo ve ringawt, ka mitah tak min melh ngur bawk nen nidang ang lo taka a hmel dam dap mai avang chuan ka thinphu a rang sauhin ka hria!!

"Naktukah kan inhmu dawn nia." tiin ka hmui chu a chung leh hnuai hmer kawpin a hmet vak a, a kal sawn takah chuan boruak kham lo ni awm takin thawk ka la kawk kawk a, mi vei vak hmuh tur an awm lo hlauh chu a tihzia teh e!! 

A kal liam hnu pawh chuan ka thinphu la pangngai lo tak chu ka dawm vang vang a, a chetdan khan min ţhawng ém a tin ni.

Inchhung ka luh chuan tui vawt ka in khawlh khawlh a, hnai taka a hmel awmdan mawlh mai kha ka ngaihtuah chhuah zel avang chuan ka lu ka thing leh vak ringawt! Nidangah pawh a hmel te chu ka hmu fo sia, zanin a taka ka ngaihtuah reng chu le!!

Notebook chu ka kutah awm tawh mah se ka lehkha chhiar chu ka rilru ah a lut thei tlat lo, Vanlalhmangaiha vang vek! Ka ngaihtuah chhuah a piangin ka lungphu rang phat ţhin pawh ka hrechiang khawp mai! Eng vanga khatiang a rawn che ringawt nge maw a nih le! 

Engmah thiam belh lo chuan zan rei tak thleng ka meng a, zingah pawh thawh ka hai phah!

___

___

Mit bui lak chung chuan phur lo zet in school kal tur chuan ka chhuak a, Vanlalhmangaiha hmel ka hmu hreh tak zet a ni. A chhan pawh ka hre chuang lo, mahse ka hmu hreh hle a ni tawp. A lakah hian rilru dang ka pu te hi a ni lo maw...? A...a awihawm loh em mai, kei chuan ka en dan a ngai reng a lawm, rilru kàwm mawlh mawlh chung chuan ka lu ka thing leh nawk ţhin. 

Ka ţhiante pawh chuan nidang aia ka zezawi deuh chu zan lama ka inzir nasat vangah an ngai mai a, dik tak chuan zir ka tum nasat vang zawk tih chu ka sawi chuang lo. 

Classroom kan luha ka ţhutna lam muangchang a ka pan lai chuan Vanlala chu a lo thleng tawh a, khabe dawm meuhin min lo en reng bawk, nidanga engah mah ngai ngai lo kha ka lai ta tlat, ka rilru hi a lerh viau em maw ni dawn le...., zahzelah hmundang ka melh kual ruai ringawt a.

"Hlute, hei hi Hmangaihna lo pe leh rawh an ti a nih chu." Ka beng bula remtei'n a rawn tih pah chuan ka kutah eng emaw hi a rawn hmeh bel zeuh a, nidangah pawh min pek tir zauh a ching, Remtei chauh lo pawh,midang hnen aţang pawhin, chocolate a dawn chang phei chuan ka rucksack ah ngawi rengin a dah lut daih zela, min pe ah ngaiin lawm takin ka hawn daih zel, thil thlum lam ngaina vak lo mah ila Angeli hian a lawm thei em a, ka pawisa a lei ngai lovin ka hawn keuh zel.

"Kha i ta tur." Dawhkana ka thil ken dah pahin ka ţhu ve nghal a, min lo la en kur avang chuan tih tur ka zawng sek a, ka lehkhabu te chu ka rem ţha thul, mahse eng vangin nge hetiang a ka awm ve rikngawt le, ama bul ţan a nia, amah zawk hi a lawm zak zawk tur! Ka ngaihtuahna a vang chuan mahni inti huai luiin pangngai thei ang ber chuan ka awm a, Hmangaiha erawh ka thil pek pawh la lo chuan dawhkan bawhin ka lam a la rawn hawi reng bawk. 

"La ta che.." dawhkana ma thil dah en chung chuan ka ti a, "Nei rawh." A tih chuan ka ner nang ringawt.

"Nangma ta tur a nia, ka lo lak daih kha a dik lo a lawm." Nidanga ti ngai hlei lo kha ka va han polite ta em em!

"Nidangah pawh ka pe ţhin tho che a lawm." A tih leh chuan ka lu thingin, "Ka mit a uihlit palh ang." tiin chhuanlam fahrah te te chu ka siama, eng nga ti nge pangngai taka ka awm theih miah loh chu le! Nidang chu ni se ka la daih tawh awm sia aw...

Ka lama a hnawl phei chu ka hnawl let ve zel avang chuan la bawk reng chungin a kut dinglam chuan ka mal a rawn ţhàm a nih chu!! Ka phu nasa lutuk chu hahdam hmel zetin min nuih suk a, kei erawh ţang ţungin a kut chu ka kut pahnihin lak kian ka tum a, ka ţhu ngil auh bawk! Hetiang hi ka la tawng ngai lo, ka sawi awmzia chu ngialngan lutuk a taksa insik ang te hi, ka ţhiante ka kuah ringawt pawhin ka mur chuai zel! Chuvangin hetiang lam hi ka ngaina hlawl lo a ni mai, chutiang a nih karah Vanlalhmangaiha'n ka mala a kut a dah phei chuan a vun te hi an mur ar ar ni mai hian ka hria, a kut chu tiche lem lo mah se a za ka ti tlat!

"I à a mi!? La sawn rawh!?" Kan bul hnaiha awm te chuan min hmuh ka hlauh avangin zawi te chuan ka ti a, nem sawn ka tum a piangin a tha pek a na ve zel bawk si, a za ka ti tulh tulh!

"Hei hi la phawt rawh." Ti a dawhkana ka thil dah a melh zeuh chuan la rang tawh tak ka ni, a thlah dawn chuan a hmer nghet zauh a, ka phu nasa lutuk chu ka nghing lawih thei nia!! Ani lah chuan min la nuih vel mai mai zui!

Ka insum hman lo chuan a dar a ben rik thlawrh pahin , "I à mi!!" Ka ti ţhat a, kan bul hnaiha awm te chu an rawn hawi ţhup na in zirtirtu a rawn luh nghal avangin hmalam min hawi san leh vat hlawm a, tihzia lutuk!!

Vanlalhmangaiha erawh a dar ka benna chu na ti ni awm hrimin a chul a chul a, a thip ve sek chuan ka ring.

Test kan neih lai chuan a ziak ve mawlh mawlh a, nidangah chuan a pass na khawp a ziah tlin loh chuan ka paper en min dil mai zel a, tunţum erawh a thiam ve a nih hmel, min dil har em mai.

Ka kiu a rawn nghawk zeuh avang chuan midang min hmuh hlau deuh chuan ka hawi phei a, ka chhan zawh ţep tawh avang chuan ka lawm lo ru khawp mai.

Paper te hi ka lamah a rawn hnawl phei a, a thil ziah lai en chuan a kun leh daih, a ruk thei ang ber a paper ka en chuan , "Ka bialnu i ni tih ka rawn hrilh che." tih te mai hi a lo ziak a, a va han hun lo ber mai tak! Bakah hetiangin an tih ngai pawh ka hre lo, a fiamthu bak va ni suh! in ngaizawng tur te chuan induh tawnna te a awm a ngaia, kei hian ka duh lo tihhi ka chiang em ka hre hauh lo.

Test lai a nih bawk si avang chuan paper ah chuan , "Mawla." Tih ziakin ka dah phei a, a thil rawn ziah kha hre lo ang hmakin ka chhan chhunzawm a, min ti theihnghilh zo vek!

Ka paper ho chu rem fel sawk sawkin ka submit nghal daiha, ka ţhiante an la zawh ve loh avangin ground lamah chuan ka chhuk thla a, school naupang insul pel thuak thuak karah chuan hmun reh lai zawngin school building hnunglam chu ka pan a, midang awm awm ve tho mah se a piah deuha thingkung bulah chuan pheiin a zungah chuan ka ţhu a, Vanlalhmangaiha chu khatiang a min fiam leh a nih ngat chuan a chak lo tawh ngawt ang!! Ka awih theih thlawt loh avangin a fiamthu a nih ka ring hmiah! Mahse ka zàm ve em em ringawt mai te chu zak thei lo ka in ti ngawt mai!

Rilru ti thawveng tura kal si kha Vanlalhmangaiha ringawt chu ka ngaihtuah a, hmel leh pian hmangah chuan hmeichhia te'n pa kan tih tur chi hi chu a ni, a mizia ka huat theih em avang khan hetiang lam zawng hian ka lo ngaihtuah ngai lo reng reng, bakah kan school hmeichhe zingah pawha fel leh hmelţha ka tih deuh deuh te pawhin an hel reng a, chu'ng ho nen chuan khaikhin chi pawh ka ni nang! A ti tak tak awm lo em mai!

Bell a rik chuan ka ţhiante pawh an chhuah ve tawh ka rin avangin kan classroom lam ka pan chho leh a, step-a an rawn chhuk nen kan intawk hlawl mai.

"Ka rin ai i zo hma daih."tiin Seni chuan ka banah min rawn kai a, a tawp lam ka chhan mang loh thu ka hrilh chuan min ui pui ve khawp mai.

Break chhung zawng chu ka ţhiante bulah awmin eng eng emaw sawiin kan nui ho leh dar dar ţhin a, ka ţhiante pawh hi mipa ngaihsak lo ve tak tak an ni, ngaihzawng neih hi kan tum ngai lo a ni ber, mipa chanchin kan sawi ve pawhin nakin hun a mi tur hisap zelin a ni kan sawi ve ţhin. Chuvangin Vanlalhmangaiha chungchang chu ka sawi lang duh lo law law.

Bell a rik chuan ka ţhutna lam pan chu ka hreh ngang mai! Muangchang a ka pan lai chuan tukverh ngheng chungin min lo la melh ngur zui, midang an bengchhen teh reng nen ka thinphu ri a vang chuan an thawm a zawi vekin ka hria, khanglang chuan aw!!

"I tlanchhiat rei kha ka ring lo reng a."dawhkana kiu nghatin a biang a dawma, min en reng chung chuan a la nui ang suk suk a.

"Engvangin nge ka tlanchhiat ngawt anga?" Tiin zahzelah ka lehkhabu chu ka zawng dera, ka rucksack chu ka hai vel mai mai a ni.

"Lai deuha i awm khan i biang a tai tek mai." Ka biang rawn khawih zeuha a tih chuan a rum thei ang ber chuan ka melh a, min fiam a nih pawhin hetiang zawnga infiam chu ka duh lo bur!

"Khatiang kha fiamthu nan paw'n hmang tawh suh! I ti leh a nih vaih chuan ka be tawh lovang che!" Ka ti hmak a, a hmui a ti sawi zauh ringawt, aw! Hetiang hi a lawm a maha ka huat em em ţhin chu!

"Ka fiamthu reng reng hleinem." Dam dupa a a tih chuan ka melh phawk hraw tawh mai, kan sir leh hmalam ka melh kual zak zak phawt a, "Ka awih lo!" Ka ti hlak ringawt, ka chhan dan avang chuan a nui suk a, eng nga ti nge vawiin hi ka hmuh ţhat em em le! Ka ning ngawt mai! Ka lo lerh hle a nih dawn hi a! Mahse midang pawh ni se an ni ve thovang a! Ka indem ngawt thei bik lovang.

"Ka bialnu i ni tih an hre vat thovang." A tih chuan a ţawng zawi lem lo bawk a, kan hma a ţhu te chu an rawn hawi rang teh e! "A fiamthu a nih kha." Za lo deuha nui hak chuan ka ti a, "Kei chu ka thup peih tawh lo, ka bialnu a ni tih in lo hre ve mai mai dawn nia." Kan hma a mi te melh paha a tih chuan ka hlauh ang ngeiin an hma leh ami te chu an hrilh chhawng a, high school aţanga ka classmate chho te an ni bawk a, min chhaih nghal sup sup chu awm ngaihna pawh ka hre lo! 

Dawhkan bawhin hnuailamah a malah ka va sik vak ringawt! Ka kut chu lo man betin ka beng bulah a rawn kun hniam a, "Line i rawn pelh manah tihian ka vuan thei." A rawn tih sup chuan ka beng bawr chu a mur chuai chuai mai.

Sir a rawn luh takah chuan loh theih lohin ka hawi chhuak a, midang chuan min ngaihven tawh lem lo mah se ka hmai hi a sen nasa dawn lutuk tih a sat ham ham danah hian ka hre vek!

Ka kut chu lak let ka tum pawhin a thlah duh ta tlat lova, a mal chunga dahin a kut lehlam chuan ka kut chu a chul ang hliau hliau a, hmalam melh ngur in a ţhu a, a lam ka hawi apiangin ka kut a hmer salh zel a, tunah chuan a nichin ai khan ka lungphu a pangngai deuh ta bawk a, ka hmai pawh a dai ta deuh.

Vei khawr a nih avangin a veilam chuan pen la in a lehkhabu ah chuan ,"Ka bialnu hmelţha." Tih ziakin a rawn hnawl phei a, sir awmna lam chu hawi zawkin pencil chu ka ban ve a, "Aih." tih zawng ka ziak.

Ka dinhmun chu a lai ţut mai hian ka hria, a bialnu anga min chhuah avangin a bialnu ka ni tihna ah ka ngai thei tlat lo, ka lo rin ve ţhin dan a ni lo lutuk chuan ka rilru a ti khingbai tlat, min duh thu a sawi lova, kei pawhin ka sawi bik lo, tunah hian min zawt ta se chhan dan tur pawh ka hriat ka ring lo e a.

"I in ngaihtuah nasa lutuk a nih kha."Sir chhuah hnu chuan Ka biang rawn piaiin min nuihsukin a rawn ti a, "Ka duh leh ka in ngaihtuah ang." Ka kut pawh sawk pah chuan ka ti a, a vawn ngheh loh lai a lo ni hlauha ka kut chu ka kuangkuah ta ringawt.

"Eng nga ti nge i lawmawm em em a." Midang hriat phak loh tur chuan a ti sup a, a hmelah hian min nuihzat reng mai te hian ka hria.

"I ngaihdan a nih chu." 

"Nia, ka ngaihdan, midangin lo ngai ve lo se ka duh bawk." Thutak ang reng tak chuan a rawn ti a.

"I bialnu ka nih duh leh duh loh pawh i hre ngawt a mi." Midangin ka thusawi an hriat ka hlauh em a vang chuan a lamah ka va kun hnai zauh a, kan hma a mi te mitmei ka ven avang chuan hmalam ka melh zui reng a, ka kun zuk chhung chuan ka biangah a rawn chuk zauh a nih chu! Ka ţhu ngil rang teh e! Engtin nge a zahtheihloh em em theih zawk a!!

Phawk hra a a lam ka hawi chuan engmah thleng lo ang maiin a kiu dawhkana nghatin a hmui chu a khawih nauh nauh a, hmalam a melh daih bawk. A hriat loh der tlat avang chuan a malah ka va chum chawrh a, a na ve ang chu kha chu!! A mal tuai vut vut chuan ner nung chuan min rawn en a, ţhu ţha in ka lama rawn awn deuh chuan , "Khatiang a i sawi leh chuan kha ai hnuai a mi ah khan ka sawn tawh ang." A tih chuan ka hmui chu a melh zeuh a, ka thinphu rang zaih zaih chu a hriat loh hram ka beisei .

Zirtirtu a rawn luh avang chuan a ţhu ţha a, engmah thleng lo ang mai chuan lehkhabu chu a melh nghal daih a, class lak chhung zawng chuan notebook ah chuan a thai leh neuh neuh a, ka thlek dek dek chuan a rawn hawi thut avangin hmalam ka hawi vata, a notebook chu rawn dah hnaiin a thai leh melh melh a, ka en chian nak chuan nichina dawhkan ka bawh lai ni awm tak kha a lo ziak a, a ziak awm em em mai lehnghal! A lemziah ka hmuh chhun ho chu cartoon te tak te te a a ziah ho bak hi a ni ngai si lova, a hma a ka lehkhabu a a ziah pawh kha ka lungawi vak loh avang khan ka sawi lo mai mai a, mahse hmeichhe naupang lem cute zet mai a ziak a, lem ziah thiam tak chu a nih hi.

Last period kan lak lai pawh chuan a la ziak reng a, a khat tawkin ka en leh zauh ţhin bawk, nichin ai khan a awm daih tawh zawk, ti hi chuan ka lem a ni tih pawh a hriat tawh khawp mai, ka kut a khuavang pawh a ziak lang kalh mai.

Bell a rik chuan kan inkhung sap sap a, kal sawn vat ka duh avang chuan ka rucksack pawh zip lovin inkhung sawk sawkin ka pawm a, ka tho tur chu ka pawnfen rawn pawtin ka ţhut hla leh chawrh mai.

"Ka hmanhmawh a nia...!" Ning hmel deuha ka tih hap chuan , "Ka hman ţep." Ti nghutin min la pawt bet reng a, a kut khingkhat chuan a rucksack zip in a tho nalha , a ruala kal ka duh loh avangin ka la ţhu, a chhan pawh ka ţhiante beng a thleng leh vek tawh dawn tih ka hria a, chuvangin hepa hnaiha ka awm lai hi hmu lo hram se ka duh avangin.

A chhuahna tur ka kenah chuan rawn chhuakin ka bulah a ding a, ka rucksack chu rawn la in dawhkanah a dah a, a zip phui hnu chuan min kaih thawh a rawn tum a, ka lo tawlhsawn vat.

"Lo va kal rawh." Ka tih chuan a ngaihdan a nih loh hmel khawp mai, tihian classroom ah ţhu dun ve ziah mah ila, hepa chanchin hi hriat ka nei mang lo reng reng, khawivengah nge a awm tih pawh ka hre lo.

Ngawi reng chuan min pawt tho lawp a, a tam zawk an chhuah tawh avangin ka ţhiante chuan kawngka bulah min lo nghak reng tawh tih ka hmu thei.

Ka rucksack chu min ah tir a, han tal kual leh na hun a awm tawh loh avangin ka dara min nem kal dat dat pawh chu a tih ang angin ka awm tawp, vawiin tlai kan tuition kal hun a nih avangin kan hmanhmawh ve ni a ni ţhin hrim hrim bawk a.

Ka ţhiante bul kan thlen hma chuan ka lu bulah rawn kun hniam in, "Zanah inhmu ang aw." A ti supa, midang chuan a thusawi an hre pha lovang, ka ţhiante zawnah chuan min din puiin a chhuak hmasa ta daiha, ka ţhiante mak ti hmel taka min lo en reng te bulah chuan sawi hmasak ber tur hre lovin ngawi rengin ka ding ve ringawt a, Eli chuan upa ber tih takah, "Chhuak phawt ila, kan sawi ho dawn u nia." A tih chuan bu nghat nghatin kan chhuaka, gate kan pelh thleng chuan ngawi rengin kan kal ho a, kan pel ta maw tihah F-i chuan , "An fiamthu ah ka lo ngai a sin Lalhlu." A rawn ti hluai a, ka nui tawi tak ringawt. 

"Sawi vat vat teh." Seni chuan a lo ti ve bawk, eng ber kha nge sawi tur pawh ka hre lo.

"Benjamin-a pawhin midang bulah min star thu a lo sawi a niang, ka bulah chuan a mize pangngaiin reng pu mah se ka ten tlat." Eli chuan a rawn ti ve a, Benjamin-a hi a ţhutpuipa a ni.

"Hmangaiha nen khan zep loh chuan in inhmeh ka ti e...., a duh che kha ka ring reng a!" F-i ve thung a ni, a rinna hi a chak ţhin a nia.

"Chutiang a inngaizawng pawh kan ni lo hrim hrim, midang bulah a bialnu ka nih thu a hrilh ve ringawt a lawm." Ka lo ti ve pang pang a, a bialnu ni tur pawhin min sawm reng reng hleinem.

"Tikhan in ngaizawng chu in ni mai a lawm." Seni chuan nui pawt pawt chuan a rawn ti a, a darah ka beng ri thlawp ringawt. 

Eli chuan ," Hmangaiha hi i duh ve leh ve loh pawh i la sawi miah lo, eng nge i hmuh dan ni reng reng." Thutak deuh zawka a tih chuan ka lo lai ve em em ringawt! Zahthlak hian!

"Ka hre lo e a." Ka ti liam puat ringawt, Lalseni lah chuan min chhaih min chhaih lehnghal.

Zanah chuan a thusawi ring deuh si ringhlel deuh siin ka awm reng a, ka lehkha zir pawh rilru ah a lut thei lo.

Dar 8 velah chuan ka phone chu a rawn ri a, Vanlala ti a ka save chu a rawn lang kuau mai, ka thinphu a rang nghal zak bawk.

Ka lak rual chuan engmah ka sawi hma in, "In kawtah ka awm, ka lo luh i duh em." A rawn ti nghal a, ka rilru a buai nghal map mai, "Eng nge i lo tih dawn?" Ka zah zela ka zawh vel mai mai a ni, ka paper lah chu ka thai hnawk vel mai mai lehnghal.

"Ka rawn rim dawn che." Nui hawka tiin phone chu a daha, a rawn lut tak tak dawn em ni le? Inleng ka la nei ngai lo hrim hrim avang chuan ka chhungte lakah pawh ka tím nghal chawih mai.

Rei lo ah Angeli chu pindanah a rawn lut a, ka ţhianpa a lo len thu sawiin a chhuak lehnghal a, ka chhuah hma chuan darthlalangah te chuan ka inthlek nawn leh thuak thuak a, ka sam sei ve tak chu ka chhipah hnawk deuha ka bawk tawp avangin ka intuai mam thuak a, ka inthuamna chu a zahpuiawm em tih te chu ka en a, taksa lang tam thuamhnaw hi ka ha khata, mutna ah te chuan kekawr bul ha ve bawk mah ila mi hmuhah chuan ka khup ai lang thui tur thuam ka inbel ngai lo.

Thawk la leh te te in pindan aţang chuan ka chhuaka, sitting room ah chuan ka nu te lehkha inzirtir na bulah a lo ţhu ve run mai, t-shirt sen duk a ha a, casual taka a inthuam hi vawihnih chiah ka la hmu, chu pawh hmanzan leh zanin hi a ni mai, school uniform ni lo a hak hi chuan a lang upa ve sawt mai, mahse eng zawk zawk pawh ha se a inhmeh tho chuan ka hria.

A ţhut lohna lamah chuan ka ţhu thla a, ka inthuam dan chu a melh kual dan dana, ka mitah tak a rawn en leh rual chuan mit ko a san àk ringawt, ka nu chuan kan zirlai chungchang te chu a zawt a, ka lo inrawlh ve zeuh tih loh chu ka lài huih avang chuan ka ţhu ngawi hle hle ringawt.

"Rara thingpui va lum la, kei pawh min lo thlit kep dawn nia." Ka nu'n a tih chuan inring sa reng ni awm tak chuan rang takin ka tho a, thingpui ka va pek chuan Angeli chuan ka nu phone kengin pindan lam a pana, ka nu ho chuan TV chu kan en ţhapa, ka nu titi kan ngaithla a ni ringawt.

A school luhna sawn a tum thu a sawi chuan ka ţhu ngil auh mai, a lam ka hawi chuan min lo melh ve chiahin a ţhen sak ringawr, ka zawh ngai lovin ka nu chuan a zawt ta hlauh a, a pa hnathawhna lam Delhi lamah a zawm tur thu a sawi chuan ka hnual nghal rawih rawih mai,vawiin lamah transfer certificate te pawh a lo la fel vek tawh zawk a lo ni, a chanchin engmah ka ngaihven ngai lova, chutiang a zir thei si te chu a ţan tirh aţang khan kal daih tawh awm, kan inhre lo ni mai tur.

Dar 9 a pelh chuan haw tum chuan a ding uai a, ka nu hi chu inleng kawm thiam tih takah atan a nuam lo turin engmah tih a nei lo bawk a, ka lo thaw huai mai.

A pen sawn dawn chuan min melh zauh a, chu mi rual chuan ka nu'n , "Rara va thlah ve ta che." A rawn tih takah chuan tho ve vatin a hnungah ka zui chhuak a, ka nu chu mangţha in kawngka a khar a, chu mi rual chuan ka kutah a kai vat bawk.

"Nang ai i nu chu a zei zawk a nih kha." A tih chuan ka lo zak ve leh em em ringawt, ka tih ngaihna hre lovin lei ka chhuah zauh a, a nuih a zat hmel khawp lehnghal.

Step lam pan lai chuan ka zawt leh ta nge nge a , "Ti nge a ţan tirh aţang khan i kal mai loh a?" Ka tih chuan , "Ka hre dawn lo che a sin." A ti phawt a, chutah ka kut hmer zauhin , "An phallo a, mahse ka zir ţhat duh loh avangin an phal ta a nih hi." Nui nghawr dat chuan a ti a, a thiam theih tehreng nen a zir peih lo kha mak ka lo ti ţhin reng a ni.

"Anih tunah pawh i la chak tho a mi?" tia ka zawh chuan a ngawi vang vang a, a awm loh chuan ka khua a har ve hle dawn tih ka chiang! 

"Nakin hun ka ngaihtuah chuan ka la chak a, mahse tun hun ka ngaihtuah chuan ka chak lo tak zet." Ka kut hmer salh chuan a ti a, "I kal chak na ah i kal thei dawn a, a nuam awm bik hle mai." Za lo deuha nui chung chuan ka ti a, a vannei ka ti tak tak, Mizoram chu sawi loh, Delhi ah pawh a luh chakna ah a lut thei dawn a nia.

"Mahse chutah chuan Rarai a awm ve dawn si lova." A tih chuan min vawn lohna lam chuan ka tin uai hman, nui hawk hawkin a lo indang ve a, ka hming hian min ko khat khawp a, min koh chhunah chuan ka hmingpum lawl lawlin a ni mai, Rara tih hi ka chhungte min kohna bik a ni a, midangin min la ko ngai lo hrim hrim, Hmangaiha'n min koh takah chuan a ţhing ka ti zo vek lehnghal! Ka chhungte lakah chuan ngaia ka neih tawh bik vang a niang.

Step bulah chuan min dinpuiin ka hma a ding tur chuan a rawn insiam rem a, "Inleng i la nei ngai lo em ni?" A tih chuan ka bu nghat ringawt, a awm zawn chu ka melh ngar bawk.

"A nih chuan i bialpa hmasa ber pawh ka nih ka ring, a dik em?" Tih paha ka khabe a rawn dawm chuan ka sa leh pup pup tawh, a hmel en turin ka khabe a dawm kang deuha, a hmelah chuan a hahdam hmel ngawih ngawih hian ka hria.

"Ka bialpa i ni ngawt thei hleinem." Zak deuh chung chuan ka ti sap a, a kut pahnih a ka biang a dawmin chiang takin ka mitah a en a , " Ka ni thei, ka duh che a , ka ta i ni tur a ni, nang pawhin min duh tih ka hria a lawm." A tawp lama nui suka a tih chuan chil ka lem khalh a.

" Awihawm loh." Tih pah chuan tal hran ka tum a, chumi rual chuan a kut lehlam a ka kawng rawn dawmin a hma ai hnaiah chuan kan in melh a, ka thinphu rang zaih zaih pawh chu a hre ve vek in ka ring.

"Ka bialnu i ni duh em?" A ti nawn leh ngata, ka inhnaih tawh bawk nen a hmui chu ka melh ngar a, a mitah pawh ka en ngam lo.

"Ka...ka hre lo." Ka ti bah bak a, engvanga ka dang te chu awk nge maw a nih le...hun lo lutuk! 

A mit a en tur chuan ka khabe chu a dawm kang leh deuha, ka chhanna avang khan a mitmengah a nuih a za tih ka hre thei!

"A nih chuan ti hian i hre thei mai ang." tiin ka hmuiah chuan a rawn fawp chat a, ka ding khawng at mai! Ka biang a dawmna chu ka tukhumah sawnin min la fawp renga, ka mitchhingin a ban tawn tawnah ka hmel vak ringawt! Ka lungphu rang lutuk chu a chhuak daih ang tih a hlauhawm zawk!

Tlema awm hrang hlekin ka hmai si deuh thaw chuan a thaw ham ham a, "I hre tawh em?" a tih chuan ka lungphu rang lutuk avang chuan thawk ka la te te a, "Im." tih pahin ka bu nghat a, ka hmuiah bawk chuan a rawn fawp leh a.

"Min ngai dawn em?" A inlak hran deuh rual chuan ti supin ka hmai chu a kut chuan a tuai hauh hauh a, ka chalah a chal rawn nghatin a rawn kun ngur bawk.

"Ngai ang." Ka tih sap chuan chil a lem khalh a, a hrawk bawk che ralh chu ka hmu chiang ngang mai.

"Min lo ngai reng ang che, mipa dang i melh a nih vaih chuan i chak lovang." Ti leh nghutin ka hmuiah chuan a fawp leh zauh a, tlemin a awm hla deuh bawk, ka kawngah a la kuah avangin kan la inhlat tak tak lo.

"Ka hawi vel paha mipa lo awm ka melh palh pawhin maw?" Ti a ka fiam chuan a phun hluk a, "Ka sawi i hrethiam tih ka hria." Ti nghutin min kuah a, a hnungah chuan ka beng thak thak bawk.

"Ka ngai dawn hle mai che." Ka nghawnga hmai phum chunga a tih chuan ,"Kan dam anga hun te chu a liam ve zung zung mai a lawm." Inti puitling fahran chuan ka ti a, a nuih rual chuan ka taksa pawh a che ve awk mai.

"I nu khan rei a lo ti tawh ang che, va lut tawh rawh, mahse i luh hma in," tiin a inla hrang hlek a, "Ka bialnu i ni tih hi theihnghilh ngai suh ang che, chutiang bawkin kei pawh, chuan biak theih lohin awm ngaih suh ang che, i rilru tina tu an awm a nih chuan min rawn hrilh vat la, hnek turin ka rawn haw vang vang a ni mai." A tawp lama a thusawi avang chuan ka nui hak a, "I nuih hian i hmelţha lutuk, mipa dang hma ah chuan nui ve suh." Ka biang khuap chunga a tih leh chuan ka nuih a za zual sauh.

"Dam lo suh aw." Ka tih sap chuan min en vang vang a, ka chalah fawpin min vawnna chu a thlah a , "Va lut rawh, ka lo thlir ang che." A tih chuan kal hmasa turin ka ti a, chet sawn a tum tlat loh avang chuan ka kal ta nge nge a, ka kal dawn chuan , "Mangţha le." Ka ti sap a, "Mangţha ka duh lo." A tih avang chuan , "A nih chuan mang le.." ka tih chuan a nui ve suk mai, "Tak takah, tluang takin i kal dawn nia, biak theih loha i awm chuan hnek tur che in ka rawn kal vang vang a ni mai." Ka kuttum hmuh paha ka tih ve chuan nghal min tih hmel zetin la nui reng chung chuan min en reng , "Ka hawn daih hma che hian kal tawh rawh." A tih takah chuan a lam hawi reng chuan a back zawngin ka kal a, ka ban vai zauhin ,"I mumangah min hmuh loh chuan i chak lovang." Nui hak haka ka tih chuan a nuih a za ve hle a nih hmel, ka luh dawn chuan ka ban vai zauhin ani pawh chuan a rawn vai ve a, inchhung ka luh chiah chuan ka ruak huaiin ka hria.

Ka nu chu sitting room ah ka pa nghakin a lo la ţhu a, inleng ka la neih ngai loh avangin ka nu lakah chuan ka inthlahrung zo vek.

Zanah chuan rei tak thleng kan inbia a, thil ho te te kan sawi a, a hma ka huat ţhin zia te chu ka sawi a, chutiang ka sawi chuan a nuih a za thei khawp mai, ka sawi uar hret zel vang te pawh a niang.

Tukţhuan ei lai chuan ka inleng neih chu ka nu chuan a sawi chhuak a, ka tím dui mai. Mahse ka pa chuan kan in a a lo leng chu a ţhat thu leh a ruka inhmuh te chu a duh zawng a nih loh thu te chu a sawi a, ngaihzawng nei rual ka nih tawh thu leh ka zir na tih bahlah phah nan a hmang lo tur te chuan min hrilh a, ka lu ka bu nghat nghat ringawt. 

School ka thlen chuan zawhna ka dawng nasa malh malh khawp mai, Hmangaiha insawn chung chang chu hria an lo tam khawp a, a ţhutpui ka nih angin ka hriat chian ringin min zawt an tam khawp mai.

Kan chanchin ka ţhiante ka hrilh chuan mak an tih loh thu an sawi sap sap a, ngaihzawng te laka awmdan tur te chu ngaihzawng la nei ngai lo ţhah chuan min han hrilh a, a chang leh kan nui leh vak zel bawk.

*

* 

Kan dam hi chuan hun hi a kal zung zung mai a, Hmangaiha nen pawh inhauh buai chang nei ţhin mah ila engmah zep awm lovin kan sawi tlang hmiah zela, ka rin ang tho hian ani pawhin min ring ve a, a thusawi tawh chu ka ringhlel ngai lo, chutiang bawkin ani pawhin.

Tunah chuan class 12 result kan nghak mek a, exam zawh veleh a rawn haw tura insawi siin exam zawh aţangin chawlhkar hnih a ral leh tawh a, lungawi lo viau mah ila a chhungte vang a ni a tih avangin lungawi loh khum reng chi pawh ni nghal lo chuan.

Zirtawp zan a nih chuan ka ţhian ten Sen-i te in a leng turin min rawn sawm a, min thlah leh thlap dawn avangin ka chhungte pawh chuan an phal ve hram bawk. 

Kan college kalna tur te chu sawiin kan titi malh malh a, Seni te in ah chuan lutin a room lamah chuan kan lut tlang nghal a, a khat tawkin ka phone chu ka melh leh zauh ţhin bawk, tlai dar 4 vela ka message chu a la seen lova, a la online leh miah lo bawk, a buai viau anih ringin ka call duh lova, a hman veleh min rawn biak ve vat ka ring a ni.

F-i nen chuan eitur lei tur chuan kan chhuak a, dawr inhawng awmna a hlat deuh avangin muangchang lo chuan kan kala, in awm lohna lai, kawng reh deuh lai kan thlen chuan F-i chuan a phone theihnghilh thu sawiin let leh a tum a, ka let ve dawn chuan nghak turin min ti teh tlata, kan la kal hla lo bawk a, kawngsirah chuan ka lo nghah tur thu sawiin a tlan letna lam chu ka thlir a, kawng sir deuhah chuan ka lo ţhu a,street light a awm avagin in awm lo mah se a eng ţha viau.

F-i rawn phei na lam turah chuan mipa pakhat hi a rawn phei thauh thauh a, F-i a lo la lan loh avang chuan ka phone chu phawrh in ka hmet kual vel mai mai a, mahse ka hma zawn taka ding an rawn awm avang chuan ka hawi chhuak a, ka mi hmuh avanga chuan sawi mai tur hre lovin ka melh reng ringawt.

Rawn ţhu hniam ve in ka biang chu a kut dinglam chuan a rawn nul thuak a, "I lo nula tawh hle mai." Nui suk chuan a ti a, a sawi zawh rual chuan ka ding hluai a, a rawn din ve rual chuan a kawngah chuan ka kuah thlawp a, min kuah let ve vatin ka hnungah chuan a beng thak thak a.

"Min surprise dawn te chuan min hrilh tur che a lawm!!" Inla hrang deuh chuan nui hak hak chung chuan ka ti a, ka hnar a rawn piai zauhin , "Duhawm nu!!" la nui reng chunga tiin min kuah leh a, kei pawhin nghet takin ka lo kuah ve vat bawk.

Ka hringnun hman chhoh leh zel turah pawh hian hepa nen a hman dun theih zel chu ka duhthusam a ni.

****A tawp tammm****