EIGHTEEN 🎐
Changtunu POV:
He school a ka luh aţangin chawlhkar hnih a liam leh tawh, kan school hostel a ka awm avangin ţhian pawh ka nei har lo, kan class boruak pawh a zia viau chuan ka hria.
Hmelhriat sa tumah ka nei lo...oh! Pakhat chu ka nei leh si, mahse ani chuan min hre ve tawh lo nge hmelhriat en pawhin min en ve lo, min hriat tawh loh hmel em avangin ka be hmasa duh bik lo bawk.
Ka roommate hi Naomi a ni a, an unauah a upa ber a nih vang nge a puitling ka ti thei em em a, engkimah a che fel thlap zel ti ila ka sawi sual lovang.
Unau pianpui dang ka neih loh avangin khawsa thei tak ni lo mah ila an phak tawkah min duat ve hle a, mahse chu mi a nih avang chuan ka chhungte bulah ka inla naute ngai chuang lo. Keimah ber ka awm loh avang erawh chuan in chhung chu a reh ve ruih ang chu! Ka nu leh pa te leh Patea bak awm an awm dawn si lova.
"Fel, hawisawn chuang lo la, len piah bera kan zawn hma chiaha ţhupa sawn a melh char char che a nia." Class a kan ţhut lai chuan Naomi chuan a rawn ti sa sa a, kei hi Lalnunfeli ka ni a, mi harhvang ve tak ka niin ka hria....
Hawi sawn suh min tih avang chuan ka awm ngai rengin ka awm a, mahse hawi lo pawh ni ila tu nge a nih ka hria, amah chauh saw hriat sa ka nei miau a lawm....
Lalrinzuala a ni! Kan khuaah class 9 kan nih kumin a rawn lut a, thingtlang khua kan ni bawk a mikhual chu ngaihven lo viau pawh ni ila hriat an harsa lo ve hrim hrim.
Kum tawp exam zawh ni kha ka hmuh hnuhnun ber a ni. A kum lehah a rawn kal leh tawh bawk si lova, kan inkawm ngai chuang lo na chungin a hmingin hmelhriat te kan ni ve a, min hmelhriat loh en hmak erawh a ruk tak chuan ka ngei ru viau.
Chhun chawlh a huna, canteen lamah Naomi nen kan inzui a, kan in roommate bawk nen midang ţhian siam belh chu kan tum rih lo.
Bell rik a hun dawnah chuan ka zun chhuak avangin Naomi pawh nghak lovin hmeichhe toilet lam ka pan dawr dawr a, zun chhuak hi ka ip rei thei lo.
A kawngkhar pui berah chhunglam aţangin an lock daih! Eng nge an tih hre lo mah ila ka zun chhuah tawh em avangin ka beng dat dat a, minute chanve vel ka nghah hnuah pawha an la rawn hawn loh avangin tih ngaihna hre lovin building hnunglamah ka tlan chhuak ringawt! A tam zawk classroom-ah an awm tawh avangin ka thaw ru huai bawk.
Hawi kual zak zakin mi min hmuh lohna tur berah chuan ka zung hmiah! Ka kal lai min hmu a nih loh chuan ka zunglai min hmu kher lo ang tih tur vel a ni, a hmun a biru ţha reuh lutuk.
Thawveng huaiin ka let leh a, student dang hmuh tur pawh an awm tawh lo.
"Ka rin ai i rei?" Naomi'n a tih chuan building hnunga ka kal thu ka hrilh a, bathroom an kalh vel ka sawi chuan senior hmeichhe intithu deuh hoin chutiang a tih an chin thu a sawi ve zat bawk. Eng tak tih nan hmang ang maw.
Class lak chhung zawngin uluk takin ka ngaithla a, engah mah hian a langsar pawl hi ka ni ngai lo. A laihawlah ka inbat tang ve thei zel chu a nia, mahse ngaiah ka nei a, a ber nih tumna leh nih chakna ka nei ngai lo, ka dinhmunah ka lungawi mai zel tihna a nih chu. Ka lungawina a hniam pawh inti mai thei, mahse kan lungawi thiamna kha kan nun awhawmna a ni ve thung a, chu mi anih avang chuan ka theih tawka ka beiha ka nihna chu ka lungawipui em em tawh mai ţhin.
Haw kawnga kan titi malh malh lai chuan kawngsira kan school uniform ha mipa pali lo awmkhawm chuan min ko ding a, min melh no lo hlawm em em khawp a!
"Bro henu hi a lawm, amah chiah hi kal ka hmu." Min melh kur chungin a cher ber chuan a rawn ti a, a ngaihna hre lo zetin Naomi nen kan in en ringawt.
"Lo kal hnai teh u." Intithu hmel berin a tih chuan tihsual kan nei chuang hleinem tiin tim hauh lovin ka kal hnai ve mai a.
"Kan zial stock zawng zawng i zun huh vek tih i hria em?"
Zah lam pawh a lang lo,Mak ka tihna leh ka nuihzatna a inzat reng! Khatiang pilril deuhah khan thil dahţhat a awm ang tih rin ngaihna ka neih loh bakah chutiang ngaihtuah thleng hman ka ni lo ve hrim hrim.
"I nui ngam elaw!?" Intithu deuh pa khan a rawn ti leh kha kha a, ka inthiam lo ve tho. Kan school-ah hian in check thut thut an uar hle a, englai pawh a inrin reng a ngai tih theih tur a ni. Chu mi lai kara zial rawlhruk pawh a risky tehreng nen ka lo zun huh sak vek chu a ni sia!
"Ka tihpalh lutuk! A awm tih ka hre lo." Ka ti ve nghal vat.
"Pawisa in kan chawi tir mai dawn nge?" Pakhatin a rawn ti ve leh.
"Ken luh harsat zia i hria a lawm!" Intithua bawk chuan a ti leh nghut. Ka lo thawveng ve hman a sin le.
"Ti nge school compound-ah kher inzûk a? Pawnlamah a free tehreng nen." An inla ngeng ve hlawm viauna in hlauh chhan tur ka nei lo. Bakah ka dawih vak lo ve hrim hrim.
"Kan thu thu!" A la ţawng ve lo pa chuan a lo ti hluk! Thinchhia ka lo ti rilru rauh rauh.
"Nangman min ken luh sak a ngai dawn tihna a ni mai." Intithua'n a tih chuan ka meng phawk nghal hra mai! Ka duh teuh loh mai a! Min lo man ta se..... Ui ka zak dawn lutuk!
"Ka ngam reng reng lo!" Midangin an chhan a hma chuan ka lo tih khalh, hetiang a ka mark tihniam thei zawnga khawsak ka duh ikhaw lo mai.
"I zun huh sa pho ro a zu leh turin min beisei deuh em ni?" Min lo hmu tupa'n a tih chuan ka thin a rim ru ang reng.
Naomi lah chu tih theih nei si lovin ka bulah a ding ngawi kar ringawt.
"Ka tih luih pawh a nih loh kha."
"Tih palh pawh nise a hing vek tho." Intithua'n a tih hmuk chuan Naomi a lo nui thut a, kan en nghal ţhap avang chuan a kun daih. Kei pawh hian ka hmelhriat sa te chu nise ka nuih nghek ang! Che chhe ve chiang em a ni.
"Duh thlan tur pahnih kan pe ang che, pakhatnaah chuan Thlakhat chhung ni tin kan zial zuk tur school compound a min ken luh sak, pahnihna chu a pakhatna zawm." Intithua'n a tih chuan min lo hmu tupa chuan chawh min ti hmel zetin min nuih a. Ka hmeichhiatpui chu nise engtin emaw tak ka tilet ang, mahse anni chu thaah ka hneh dawn lo lulai em mai, ât chhuah chi a ni lo.
Mi intihthiam loh pui emaw mi pawi sawi ka neih ngai awm ka la hre lo, insual ngai ta se eng pawh huamin ka hmachhawn mai theih ka ring. Ka va ngaihtuah thui hman tak em!
"A tawk e! Duhthlan tur i nei lo, naktuk atan chuan pack hnih rawn pai ang che." tiin la ţawng ve lo pa chu a mitmei zauh a, chupa chuan a duhzawng a rawn sawi nghal zat bawk. Hetiang vela buai hi ka peih lo a sin le.....
Ngaihdan dang ka neih thlawt loh avang chuan an meizial ka zun khum aiah chuan ka rulhna a ni mai tiin ka bu nghat a, kan kal sawn tawh chu min au ding leh.
"I hming?" Intithua bawk.
"Feli."
"Hmingpum." Ka ngei ber pa bawk kha.
"Lalnunfeli." Thinrim rilru deuh chuan ka chhang a, hepa hi min bawl a tum ve deuh ni tein ka hria a! Mai mai chuan!
"In kal thei." A tih leh phei chuan lung chhar a vawm zawt mai ka nâp!
Ka rilru a sawisa mawlh mawlhin ka kal hmawk hmawk a, Naomi lah chuan an zial dahţhat ho ka lo zun khum chu a nuih a za em em mai bawk si! A hma kha chuan ka nuih a za a, mahse tunah a za tawh lo, za tawh lo tak ka ni!
An zial zuk tur chu ken sak lo ta ila engtin nge min tih ang? An hlauhawm viau ang em? Nge ka rin ai an lo fel phian zawk ang? A....an fel chu ka ring chiah si lo! Ken sak ta ila keimah aţangin zirtirtuten man ta si se engtin nge ka insawi fihlim tak ang? A der pawhin ka la zu ngai lo! A rim chhe thei si!
*****
Zingah chuan hma takah ka kal a, ka zial lei ho chu an dahţhatna niawm a ka hriatah ka thukru nghal vek! A ruka ka tih vang nge mawni min hmutu an awm ang mai hian ka hlauthawng a!
Classroom a ka awm hnu ah midang an rawn kal ţan a, ka thaw a veng ru huai tawh.
Class ţan hma chuan kan class-ah an rawn lut ta ngei, class kan inkal pawh ngai loh avangin an lo en duh hlawm hle bawk.
Intithua chu ka bulah rawn ţhuin midang pahnih chu kan hnung leh hma dawhkanah an ţhu a, an inti lal ve hmel khawp mai. Ka ngei ber pa erawh a lo kal ve lo.
"Khaw'nge i dah?" Kan inţhut hnaih ang reng a, kei ai a len zawk zia ka hre chiang zual.
"Indahna ah."
"A awm lo!" A tih chuan ka phu zawkin ka hria!
"A awm lo maw!? An man a mi!? Min lo hmu an awm a niang!?" midangin an hriat hlau bawk si chuan ka hlauthawng lutuk chu ka lungphu a rang nghal zaih zaih.
Midang pahnih chuan an hmelhriat te biain thawmdang an lo siam hlauh a, Naomi pawhin kan thusawi a lo ngaithla ve kar bawk.
"Fela a kal a, a hmu lo." A ti leh a, ka ngei deuh pa kha a nih ka ring, Fela te a lo ni ve khanglang a! Huh! Kan hming lo inan vang lek a nih chu ka hmingpum te min zawh.
"An man a niang." Ka ti sap ringawt, ka hnual rawih rawih mai! Ka hmabak chu zahna bak a ni lo.
"OP! come!!" Kawngka bul aţanga Fela'n a rawn tih chuan a ţhianten an signal zauh a, khi vur vurin a bu nghat. An ţhian zinga an chhehchhawl ve ber a nih ka'n ring ringawt a!
"A hmu leh si a nih chu!" tiin OP a tih pa chu a ding nulh a, an chhuah fel hnu chuan ka thaw huai mai! Khapa vanga ka hlauhthawn hman zia kha! Ka va ngei ber mai tak!
"An inlak ngen ve ang aiin an fel hmel hlawm ka ti." Naomi'n a tih chuan ka ner khum vak ringawt.
"Anmahni chauh lo pawh kha thukru an awm ang, i zun fuh chat chat bawk sia." A nuih a la za thei reng.
Zirtirtute thawm avanga ka ţhut rem pah chuan Lalrinzuala nen kan mit a intawng chat! Hepa hi min hre tawh lo tak tak a nih ka ring e a! Ka hmel a mak vak na pawh ka hre si lo, saw ti ang a min lo en lai ka man fuh leh hun hunah ka zawt pawp tawh ang.
Naomi nen bawk chuan kan haw leh a, hosteller dang ho nen innel ve tawh tho mah ila kawm bik dang kan nei lo. Boys hostelller nen pawh study period ah bak kan inhmu ngai lo.
***
Nimin ang bawkin ka kal hma leh a, ka dahna ngaiah bawk dah lehin classroom lam ka pan leh vat. Rukru ang maia ka khawsa chu ka ning nghal hluah hluah! Vawiin ah chuan min check tawh ngei ang a, anih loh zawngin naktukah tal chuan gate bulah an duty ka ring! Kan school compound hi a zau em a, strict viau mah se ven sen loh chin an nei ve reng tih lah a chiang.
An hmu nghal a ni ang chu kan class-ah an hmel hmuh tur an awm lo, mahse naktuk tal chu awl dil a ngai a ni.
Short break-ah chuan corridor reh laiah kalin Naomi'n canteen ah min lo nghah avangin ka kal hlawk hlawk a, canteen ah inline a ngaih ţhin avangin bathroom ka lut pawh min nghak ta lo kha a nia,zingah chaw a ei tlem ka ti reng a ni.
"Lalnunfel!" a aw aţangin Lalnunfela a ni tih ka hriat avangin ka hawi peih lo!
"I induh ve khanglang a ni maw!?" ka hnungah a rawn kal a, ka chhang peih chuang lo. Hepa hi chu hmun hla deuha paih daih ka chak! Min hnehsawh thei si!
"Ana!!" Ka khup ka sawh rik dawt avang chuan ka rak ţhat a, Lalnunfela'n hnunglam aţangin ka ke a lo pet a nih chu! Ka khup leh kiu na aiin ka thinrimin min tuam hneh zawk!
"Induh ve khanglang a!" a la nui sawng zui! Ka thimrim luatah ka khur hial! Ka bula lung, ni lo, brick them a ni zawk mah, chhar lawkin ka vawm pawp a! Ani pawh a ţe ţhawt! Tunah tak hi chuan eng pawh ka huam!
"Hmeli leh!!" A kut a thisen kai chu a en a, a chalah tak ka vawm fuh. Ka lawm zia chu!
"Mipa i nih avang khan ka hlauh che ring suh!" Ka duh ang pawhin ka ţawng ţha thei lo!! A hmel zawng zawng nen khian ka haw fai vek!Min lo hmu thawt thawt lo se pangngai deuhin ka awm ve ni mai tur! Tho lawk lovin Leiah ka la ţhu nuai. Mi pangngai rilru a pha zan lo niin ka hre hial! Cho taka ka beih let chuan a hma angin min zuam ka ring tawh hauh lo, a ţhiante vanga pawr ngam ve chauh a nih duh hmel ta riau.
Midang an rawn lan avangin a inthiarfihlim thuai a, kei pawh ka tho ve vat, min kalpel mai mah se mak chu an tiru ve tho ang.
Ka khup chu ka en leh te te a, a lo duk kulh mai! A pilh niai bawk.A pahnihin a ni bawk nen kal a sak ţalh! Ka thinrim a ziaawm theih nan thaw ka la ham ham phawt a, muangchangin kan cass lamah ka let ta zawk a.
Ka kal muang bawk nen ka tawh a piang te chuan min en hrek hrekin ka hria! Classroom ka thlen hma chuan Lalrinzuala leh a ţhianpa ka tawk a, ka hmelhriat te a nih ve avang chuan ka melh ve siah, a hma ang bawkin min melh leh rûn tawh mai.
Kan in tawk dawn tihah chuan ka ding a, min lo la en reng avang chuan , "Eng nge!?" Ka ti hluai ringawt. A nuam vak lo ve bawk a ni.
"Engmah." Tih chauhin min la chhang zui!
"Kha ti angin mi an en kur kur ngai lo." Zak duh bik lo chuan ka ti let ve zaih.
"I ke i ti na em ni?" A ţhianpa chuan a rawn ti hlauh a, ka tluk thu ka hrilh ve tawp. A hmingin class khata ţhu te kan ni ve a,inhre lo tawp pawh kan ni hleinem, a hming ka hre chuang lo.
Midang rawn kalin an rawn fin takah chuan ka kal pel ve vat a, Noami chu rei min lo ti ngawt ang.
Bell a rik rual chuan a lo lut ve nghal a, min lo nghah reng thu a rawn sawi nghal, ka insawi fiah ve vat a. Lalnunfela chu min huat pui ve em em bawk, chu chuan min hnem ve em em mai a ni.
Lunch break ah chuan an thil dahţhatna lamah chuan ka kal a, school naupang dang an awm nual, ka kal chhan tak te erawh ka hmu lo. Midang ho chu inkawm ho leh tiffin ei te an ni nuk. Ka thil dahţhatna lamah erawh tumah an awm lo hlauh, awm pawh nise an hmu kher lovang.
Classroom lamah an let sap sap a, ka sana bun dar zat ka en chuan bell rik a hun leh ţep tawh.
An rawn lang ve hram e! Lalnunfela pawh a chalah bandaid a bel vâ mai! Niminah khan kan senior te an ni tih ka hre ve chiah! Kan classmate section dang a mi ni turah ka lo ngai ve ngawt kha a nia.
"Kha eng nge i lo tih leh tak?" Opa'n a tih chuan ka ţhutna aţangin ka tho tharh a, ka khup na zawk avang chuan ka âng zawk!
"I ke i tina elaw?" Henrya'n a lo ti ve, an hming ka hre vek tawh. Kan bul hnaia ţhute ho khan an lo hre vek a, an chung chang pawh ka zawt ţeuh. A pawimawh ber Lalnunfela hi chu huihphai ve lam a nih thu ka hria, ka hmusit tihna ni lovin amah hmachhawn dan tawk tur ka hriatthiam phah.
"Lalnunfela khan min chhir tlu a lawm." Ka ti ve nghat. A ţhiante awm ve vang nge ni a hmui a lo ti sawi zauh ringawt.
"A chal i vawm sak a in inrul tawk chiah a nih chu." Opa chuan a lo ti thung a.
Ka awm ve chu pawisa lo zetin an zial an ţan a, an rim thup nan eng eng emaw an lo keng bawk. Kan awmna bul building hi a thlang bera awm a ni a, englai pawha vengtu an awm reng a nih loh chuan thil tih ruk nan chuan a rem khawp mai. Kan school compound-ah hian thingkung a tam em em bawk.
"Vawiinah ka dah tam tho a naktuk chu ka awl ang a." Ka'n ti ve thawr a, hlau hmel leh zam hmel ka hmuh duh bik lo, min zuam phah ve thei. Chu ai chuan pangngai taka biak theih kha ka tan a ţha.
"I ken tlem em hi ...." Tiin ka ken ho zawng zawng chu an insem vek! Sual ka tih em avang chuan ka ngawi hmak a! Naktuk a ken chu ka tum lo zual sauh.
"Lo zung thawt thawt lo la chu i buai lo ni mai tur." Lawmkima'n a lo ti ve bawk. Midang an lo nui huk a, chhan let hrep duh si sawi tur hre si lo in ka awm.
"Let tawh rawh Bell a ri dawn, naktukah chuan i dah tho chu a ngaih hmel." Opa ve thung.
"La zo rih lo ve mai ula...." Ka ti hluai a, ka lungawi loh avang chuan ka awki a sang deuh bawk.
"Kal mai mai teh! Kawlh ropui si!" Lalnunfela'n a tih chuan, "I boss te kan inbiak laiin lo inrawlh suh." Ka tih khum hmak a, a ţhiante awm lai hi chuan min tih thinrim belh lo hram teh se.
Ka thusawi avang chuan Henry chu a lo ţhen ţhaw a, midang pawh an nuih a za ve tho. Lalnunfela erawh a tum hmuk a, min melh no lo khawp mai.
"Naktukah i lo dah loh chuan i bag ah kan dah ang." Sawi fuh inti zetin min melh a.
"Naktukah chuan gate ah min check tawh ngei ngei ang." Midang en kualin ka hmin ngei theih nan ka inti khawngaihthlak der a.
"Kan inremnaah ni tin kan tih kha." Opa'n a tih chuan, "Ka duh dan a tel ve loh kha." Ka lo ti vat.
"A dik, duh dan sawi thei dinhmunah i ding hleinem."
"Tikhan in zial zuk ka report mai ang che u!"
"Tikhan kan zingah i tel ve tih a hriat tho." Thla min lo lak sak ni ngei tur a ni Lalnunfela chuan, a phone a hmet nghal nuap nuap. Midang te nen kan din tlan reng lai chuan a lam kan hawi ţhap a.
"I phone kha an man nghal daih ang a ti nia Thluakthawl." A ţangkai lo si a lo inrawlh ve sek avang chuan ţawngkam ka duh tui hman lo.
Midang pathum lah chu an nui huk a, an ţhianpa chu a mawl an ti ve te pawh a niang.
"I thla ka la tho." A lo la ti ve ţalh, telh tulh hian!
"I mawl tho." Tlawm duh bik lo chuan ka la ti ţalh.
"A ţawngthei em mai naktukah bonus pe ang u." A ţhiante chhan phut zetin a ti leh a, midang pawh en lo chuan amah chu ka melh kur a.
"I ţawngtheih ve tho kan inrul tawk chiah."
"I tet tet nen tlan chho nal nal rawh!"
"I ţhiante ai i te ve tho ka tlan kher lo ang!"
"Ka naute ho ka sawisak tir palh hlauh che ang e, ka insum lai hian chho vat mai teh." Nuam ka ti vak tawh lo, mipa a ni bik bawk si, mahse a ţhiante an inrawlh loh vang hrim hrim pawh chuan chhan leh hram ka tum.
"Naute i la nei ve leh chhawng elaw...... An ngaihtuahawm âwm mang e!" A hma angin ka ţawng ring vak tawh lo.
Min chhan dan tur a hre lo nge ni, "Engtin emaw tak ti ang u!?" A ţhiante melh kualin a ti leh a, ama thu chuan a ţhiante awm laiin min khawih ngam ka ring lo reng a ni.
A ţhiante an ngawih vek avang chuan ka en ve a, nuih insum zetin min lo melh ţhap!
"Bell a ri tawh chho rawh, naktuk chu i awl thei ang." La nui reng chungin Lawmkima'n a tih chuan ka lo thaw huai......
"I la hre viau ang!" Ka kal tawh chu Lalnunfela'n a lo tih leh ţalh avang chuan ka hawi let leh a, min lo en ţhap hlawm mai.
"Ka tlawm ni rawh se, ka tlawm zia hi lo en rawh ka'n kal nal nal ang e! Mahse ka ke i tih nat avangin ka kal chak thei lo aw! Tlan phei chu ka thei lo lehzual!" Thinrim tawh chuang lo chuan ka chhang let a, naktuk ka awl dawn avang chuan ka rilru a hlim tawh em a ni.
Ka kal lehnghal avang chuan an hmel ka hmu thei lo, mahse an nui leh tih ka hria! Tih thinrim ai chuan ka mark a la ţha hrim hrim.
Ka rin ang ngeiin vawiin chu gate bulah an duty a, school naupang man tawk an lo awm ve bawk. Min check zawh hnuah classroom lam panin kan kal nal nal.
"Vannei chiah chiah ve....."
"Min man te se ka ţap a ni mai."
"Hmabak i la ngah zia hi, zung fu lo ber!!" tiin a nui leh vak a, tunah chuan ka nuih pui ve thei tawh. A Zahthlak ang chiahin a nuihzatthlak tel bawk si.
Class test kan nei zeuh zeuh a, kan zir thar apiang thiam nghal zel tur tihna a ni ber. Naomi a ti ţha thei hle, ani ai ka ti chhe ziah, mahse ani ai ka hlim ziah thung.
Canteen-ah ţhutna kan chang hlauh a, order nghah pahin lo lut thar apiang chu melhin kan sawi zui ve sep sep a. Kan rel pawh a ni hran lo, Naomi hian mi hriat a ngah avangin a hriat ang ang min hrilh ve zel a ni ber.
"Kan lo ţhu ve." Tih pahin min nêk dâwrh a, kan ţhutna ber kher chu a te bawk nen ka thin a rim nghal but mai!
"Single chair a nih hi!" Ka thinrim tih lan loh hram tum chuan ka ti a, Naomi bulah pawh Henry -a a ţhu ve tho, ka bulah Lalawmpuia a ţhu.
"Vawiin kan awl tir man che a ni mai." Opa'n a tih chuan ka thaw hak a, vawiin a an hmel hmuh ka inbeisei lo a sin le..... Bakah hnaih tam vak loh a fuh.
Naomi nen chuan kan ngawi kar. Senior zawk tih takah hmelhriat an nei zul bawk nen an inbe bawrh bawrh hlawm a. Kan order kan lam hnu chuan ţhutnaah pawh let lovin classroom kan pan nal nal.
"Intithu lutuk mai kan ţhu hmasa reng sia!"
"Ni chiah, kan senior dangte an fel tehreng nen."
Naomi nen chuan classroom thleng kan phun char char, kan inti thinrim dun a ni ber. Kan inthurual thei bawk si.
A tukah chuan a ngaite bawkin ka dah ţha leh a, mahse vawiin chu min en reng tu awm tlata hriatna ka nei! Nidangah pawh hre ţhin tho mah ila vawiin chu a dân a dang tlat.
Classroom ka pan thleng pawh chuan engmah tawk lovin ka awm a, ka thawven huai rualin min hmutu awm tak tak se tiin ka rilru kilkhatah erawh ka ngaihtuah ngut ngut.
Naomi rawn thlen hnu chuan ka zia ve deuh.
Chawhnu a nih thleng pawha an hmel ka hmuh tak lohah chuan ka thaw huai thei! Miin min lo hmuin an lo la daih lo tih ka hre ta phawt.
Classroom-ah hi chuan min check zing ang reng a, gate bulah erawh karkhatah vawikhat ngei ngei.
****
Buaina engmah tawk lovin ka dah ve thei zel a, gate a an duty niah erawh ka hre lawk lo a nih pawhin ka bihthla hmasa mai zel a, duty ka hmuh chuan mi dawrah ka thukru ve tawp zel. Ka ken loh ni chuan eng eng emaw chhuanlam tur ka nei ve zel a, ka ken loh ni ah chuan eng pawh huamin an dahna ah ka lo nghak tawp zel! Lalnunfela lo tel ve erawh ka hmang ţangkai ziah a ni ber! Thu lak pen nan ţangkai tak a ni! A awm lo ang tih ka hlau leh hnuhnawh!
Tunkar atana a tawpna ber tawh tur a ni bawk a thawveng ang reng tak chuan ka kal a, thilsual ti ţhang confi tawh ang maiah ka inchan. Karleh a tluan chuan a lehpek Monday leh Tuesday ah bak a ngai tawh lo.
Min en rengtu ni a ka hriat ţhin te chu ka thil tih ruk avanga ka hlauhthawn vang mai mai an nih ka ring.
Lunch break-ah chuan Opa a rawn lut leh ta tlat! Ka hlauthawng nghal ringawt a nih chu!
A rawn luh tirh aţang chuan ka lo en char char a, Naomi pawhin engmah sawi lovin a en ve char char. Kan tlar a rawn thlen hma chuan mi a be kawi leh te te a, a rawn luh tirh a kan lam a rawn hawi bak chu a rawn hawi lo.
A hmaah chuan hnunglam hawia rawn ţhuin kan dawhkan a rawn bawh a, ka hnunglam dawhkan ka ngheng vat.
"Eng nge!?" Ka'n ti ringawt a, kan senior a nih vanga a rawn lut ringawt pawh an en hrek hrek laia hnai fahran a a rawn ţhut avang chuan an rawn hawi ţhup ni ber hian ka hria.
"A awm lo." Ka mitah chiang zetin min melh kur reng mai, ka hlau chu ka ti ngam chiah lo, mahse a nuam lo.
"Ka dah reng kha." Midangin an hriat loh nan ka ţawng zawi hle.
"Nia a dah a lawm a kal hma lutuk." Naomi chuan a lo ti ve vat.
"A awm si lo a lawm." Dar kân ûkin Naomi a en zawk a, min lo en leh rual chuan, "Dawt i sawi lo maw?" Ka ti hram, an hmuh hmaih chu ka ring si lo, dawt sawi hmel a pu bawk si lo.
"Ka dah ngei bawk sia..." Amah pawh be lem lo chuan ka ti a. "Im i dah ngei ang....." A tih chuan an hmu lo a tih chu a tider a nih ringin beisei nei zetin ka en let kar."Midangin an lo la tihna a ni mai." A tih takah chuan ka meng phawk min ti ngawt ang!
Hlauhthawnna hlirin ka khat! Ka dah lai hmutu an awm a niang tih ringawt ka rilru ah a awm!
"An lo check a niang." A tih pawh chuan min hmuh tho ka rin avangin rilru buai zetin ka lo ngawi kar.
"Banah min lo nghak ang che." Tiin a tho a a kal ta nghal a.
"Dawt a sawi i ring em?" Naomi pawh chuan mak a ti ve tho.
"Aih! Dawt a sawi lo ang! Ka dah lai hmu an awm a niang." Ka melh ngai melh vung vungin ka chhang a.
Min hnem tum ve mah se ka rilru hah a chhawk thei lo.....
Thil thleng thei zawng zawng chu ka rilru chuan a dap kual a, zak takin min siam ang em tihte thlengin!! Mi en bik nih hi ka duh ngai lo, a ţhalam emaw a chhelam pawh nise, mi ai chungnung a mi hriat nih ka duh ngai lo.
Chawhnu pum chuan eng emaw a thlen inring rânin ka awm a, ka hah rûn a ni ber e! Last period tawpna bell ri chuan engtiang chiahin nge min tih hahdam ka sawi thiam lo.
Rang zetin ka inpack sawk sawk a, Naomi pawh chuan min hrethiam takin min hmanhmawh pui.
Gate piah deuhah chuan kan ding a, ka rin ai a rei takah chuan Noami min lo haw san mai turin ka hrilh a. Kan School aţangin hostel hi 15minutes bawr vel kal a ngai, kawng phei vek a nih avangin a hahthlak hman lo.
Min awmpui duh viau mah se ka nawr luih tlat avang chuan min haw san a, ka tihsual a nih bik loh avangin hlauh chhan tur ka nei lo, mahni pawhin ka hmachhawn ngam.
School naupang tam zawk an chhuak tawh a, senior an nih avangin an la bang ve loah ka ngai ringawt. An rei ka ti tawh hle bawk.
Engtin nge a bo theih tih ngaihtuah chuan lei ka chhir neuh neuh a, vawiin atan chuan engmah a thleng lo chu a ni phawt a.
"Kal ang." tih ri-ah chuan ka hawi chhuak a, gate bulah a lo ding reng tawh. Phur lo zet chuan ka kal phei a.
"Khaw'nge i ţhiante?" Amah chauh kalpui chu ka peih lo a sin le....
"An haw tawh." Tih zawngin min chhang. Ngawi rengin kan kal dun a, nghak tura min tih chhan a sawi hun ka nghak tawp. Min tihder thu ka hre chak ber.
A thu rawn sawi teh daih avang chuan ka melh haw a, ka rin loh lutuk lam a nih avangin chhan pawh ka tum lo.
Ka lian lo tih chu ka hre tho na chungin kan inlen hleih bik lutuk hi chu a fair lo ve ngawt mai.
"I nei nge nei lo?" Ding meuhin min zawt a, chhan dan tur ka ngaihtuah rauh rauh. Hetiang zawhna min zawh ka beisei loh chu thuhran, a boruak hrim hrim hi ka duh lo! Ngaihzawng ka la nei ngai lova, neih tumna pawh ka la nei hek lo.
"Teh daih a che." Ka nui ringawt, awmdan ka thiam lo leh pek!
"Min chhan loh chuan i nei lo ah ka ngai ang."
"Ka nei a lawm." Ve ringawt a! Mahse beiseina awmze nei lo siam sak ai chuan dawt sawi ka thlang! Bakah, he ti ve mai hi ka ni sia ka ngaihzawng neih leh neih loh hriat a ţulna ka hre ve lo reng reng!
"Ka awih lo."
"I duh leh awih lo la, ka nei a lawm." Ka ti zawt zawt, ka dang a nal viau bawk. A awih lo ka hlau lutuk chu ka hmel zawng zawng nen ka ti tak tak tih a hriat theih nan theih tawp tak meuh meuh ka chhuah.
"Ka bialnu ni rawh." Ringawt a!
"Aih." Ka chhan dan vang chu nge a nui suk a, ka chhang rang viau bawk.
"I la ni tho ang." A kal lehnghal a, kan hostel lama a kal ve zel avang chuan ka zui ve leh nge nge a.
"Ka duh lo... Ka ti tak tak, ka uang lo, bakah ka sual lutuk, ka ţawngthei bawk sia.... Lalnunfela pawhin min huat em kha maw... Ka lan ang ngawt hi ka ni lo...." Ka sawi lai chuan a lo nui vel mai mai, kei erawh Min duh loh theih nan ka theih ang angin ka insawi chhe thung! Hetiang hian miin an ti ve ngai ang em ka hre lo, mahse min ngaizawng lo turin ka duh em a ni!
Midang kaltlang emaw lehkha thawn ang zawng te chuan mi ka lo hnar ve tawh, hmaichhanah hetiang ka la tawn ngai loh avangin ka buai nghal nuai mai!
Alak aţangin hetiang thu dawn ka beisei lo, a duh pawh ka duh lo reng reng. Ka ngaihzawng ni turin a der pawhin ka ngaihtuah duh lo! Hmeichhe tam tak duhzawng a ni ngei ang, a sual ka ti hran lo, a hmelchhia pawh ka ti chuang lo, a pian lah a tlawntlai ţha viau a, mahse ka duh chuang lo.
"I thusawi ho avang khan ka rilru ka thlak i ring em?" Hostel a lan theih tawh avang chuan a ding leh a, kekawr ipte zenin nuihza insum zetin min en a, min nawr lui ang tih hlau reng rengin ka awm thung.
"Ka ring chiah lo nain thlak la chu ka duh khawp mai." Thutak ang reng tak chuan ka ti a, a nui chhuak huk. A englai khan nge maw a nuih ti za ni, ka thutak tehlul nen.
"I lawmawm reuh mang e." A tih chuan a la nui reng, ka nuih a za ve lo.
"Lawmawm rual pawh ka ni tawh lo, ka upa tawh." Ka ti hmak.
"A nih chuan ka bialnu ni rawh." A thutak ve leh deuh tawh, thutak deuha a awm chuan nuam ka ti leh si lo.
"Ka duh lo ka tih kha!!"
"Tunah min chhan kher a ngai hleinem, min la duh ve dawn a lawm." A confi viau a, amah duh ka duh lo hrim hrim tih hi sawitlang pawp chi a ni ang em le....
"Ngaihzawng i nei tak tak lo tih ka hre phawt."
"Engtin....."
"I sawi kha...."
"Min chhimbu dawi i tum a nih kha! Min bum tum lo mai teh."
"Ka bialnu i nih duh loh chhan kha bialpa i neih vang pawh ni lovin i duh lo ve hrim hrim." A tih takah chuan ka pha buai ta lo mai.
"Tuna i zia angah khan ngaihzawng i neih ka rin tak tak i ring reng reng em maw ni." Min bia pawh ni lem lo chuan a phun sup a.
"A nih chuan min hrethiam tihna?"
"Nope!"
"Na....." Ka ti vak ringawt. Hepa hi ka be nel ve dawn chauh a hetiang rilru a put leh tak siah chuan hel hram hram ka ngai tawh tihna. Zep miah loh chuan hetiang rilru an put ţhin avang hian a lawm mipa ka kawm nel duh tawh loh. Ka insawi theihna lam ni lovin ka mipa kawm hnaih ve deuh te hian hetiang rilru hi ka laka an put ţhin avangin mipa ţhian neih ka duh tawh ngai lo.
Hmelah nise ţha tih em em tur ka ni lo, ka pian lah nise chhuan tur pakhatmah ka nei lo, hmelţha min titu pawh kum khatah vawihnih vel ka tawng ve ţawk tih vel chauh a ni. Ti chung chuan ka mipa kawm hnaih ve deuh ten a hetiang rilru an pu hi ka hrethiam ţhin lo.
"Mi duh lo chung an ngaizawng lui ngai lo!" Ka tih khum hmak a, a lo nuih avang chuan ka ţawng sual tih hriain ka sawi ţha leh vat.
"Ah! An inngaihzawn luih tir ngai lo." Ka ti ţha leh a, a ho zo vek! Hetiang boruak ka la tawng ngai lo ka tih tawh kha.
A la nuih char char avang chuan tum pakin ka melh kur a, lerh reuh lutuk mai!
"Haw tawh rawh." Tih pahin hostel lam panin ka kal hlawk hlawk.
"Ka bialnu tur i ni tho tho."
Min rawn umzui vat. Ka speed ngai rengin ka kal.
"Ka ni duh lo ka ti vek tawh."
"Engvangin?"
"I lerh a lawm."
"Eng nge ka lerh na?"
"Mi ngaihzawn i ching." Ka tih chuan a insum thei tawh lo nge ni ding meuhin a hmui hupin a nui leh char char! A awmdan avang chuan ka ding ve leh, ka thleng ţep tawh tho.
"I ti lui chu a ni si lo." A la nui reng.
"Eng chu....?"
"Ngaihzawng neih te chu a thiang a lawm.... Ka ngaihzawn che avang chuan ka lerh a maw?" A la khi ţhaw mai. Nichinah khan ngaihtuah chiang mang hlei lovin ka chhang ve zuah zuah a, a lo nuih chhan kha hei vang a lo nih chiah hi.
"Aw.... Kha kha chu...." Ka sawi tur ka ngaihtuah chawp leh phawt.
"Eng pawh nise ka ngaizawng char char tho ang che." Ka ţawng dan la zet chuan a rawn ti a.
"Ka duh lo ve char char mai ang che." Ka lo ti vat.
"Mipa dang hnaih lo la a ni mai. Ka kal phawt ang e." Tiin a let leh nal nal. Hahthlak ti zetin ka thlir reng ringawt.
Kan room ah zawi zetin ka lut a,Naomi chuan rei min tih avang chuan kan inbiakna ho min zawt a, ka hrilh vek. Ka chhan dan ka sawi chuan ani pawh a nuih a za, kei chu ka nuih a za ve lo. Min duh lo se ka duh a ni ve mai a.
"Hmeichhe dang nalh leh hmelţha tak tak an tam nen." Tiin inthlak pah chuan ka la phun hlak hlak.
"Kan senior te anni ve bawk sia, duh ve mai la."
"A Big fat NO." Ka lo ti hlak. Ani pawh hian bialpa a nei, mahse kan school ami a ni lo.
*********
Kha mi ni aţang khan kan classroom a rawn kal a ching a, mahse vanneihthlak deuhin a ţhiante a lo hruai hlauh zel. An zial bo kha a lo bo tak tak bawk, engmah a thlen zui tak loh avangin midangin lo hmu fuhin an la daih a nih kan ring, a chhan pawh nidang a ka dahin a bo leh chuang si lo.
Kan classroom a an lo kal ziah te pawh ka hau ngam tawh. Duh ve lo mah ila thinrim a inchhuah ka duh bik lo, ţha taka ka hmin theih ka ring tlat bawk.
An sual hran lova, mahse kan bulah kher an lo ţhu ţhin bawk nen midangin zawhna an ngah phah a, chu mi a nih avang chuan break a awm a piangin class pawnah kan chhuah phah ta ziah.
Keini ai an haw hmain min lo nghak a nih loh chuan kan inhmuh khât phah a a zia phian. Banah min lo nghak pawh nise Naomi a awm ve tal a, inngaihzawnna lam a sawi ngai loh phah bawk. Kan pahnih chauh a kan awm dun loh phawt chuan a ţha a ni mai. Kan awm ho vek lai pawh a ka ţawng ve hlekin min en uluk thei si, ngawi reng a inen reng te hi ka thil duh loh zawng tak a ni.
*********
Zirtawpni a ni a, vawiin ka dah leh chuan nihnih chiah dah a ngai tawh. Anmahni vangin ka chhungte hnenah ka budget sawi tam a ngaih phah lehnghal!
Ka dah fel zo a ka inher chiah chu ka mi hmuh avang chuan ka ţe ţhawt! Ka thlarau a thlawk chhuak lo chauh! Tun angah a hmel chu sawi loh midang hrim hrim pawh hmuh ka inbeisei lo! Ka kal hma ţhin ka tih kha.
"Eng nge i lo tih ve!" Ka ti nghal tawl! Nidanga kal hma ngai tawp si lo. Min lo zui ru khanglang mai!
"Ka en thla che."
"Eng a tan."
"School danin a phalloh anga i chet ţhin a vangin." Khanglang chuan! Min hmu ziah ang hrim a.
"Engmah ka keng lut lo." A mitah pawh en lem lo chuan ka ti pawr ve vak, rilru fim pawh ka pu hman hleinem le!
"Pha buai duh suh, nidangah pawh ka hmu tawh che."
"Min hai a niang." Ka la ti ve ţalh, "A hrim hrimah ka classmate hlui hriat chhun te i ni ve a, nidangah min be ngai tawp si lo." Rilru nei rânin kan thusawi pawhpen chu ka tum ve.
"Ka hai che a niang vawiin ah teacher te ka'n hrilh tawh ang e." tiin a let ta mai! A tih tak tak ka rin leh rin lohna a inzat! Min hmutu an awm ţhin khan ka hre reng a ni!
"Hey! Ka ta tur pawh a ni hleinem! Min report ringawt thei lo." A bula va kal ve pah chuan ka ti a, ka insawifiah chuan min hriatthiam ve mai ka ring.
"Eng vangin maw ka theih loh ang? Kan dawrah i lei ziah." A la ti zui! Keia pawh hi School uniform nen ka lei ziah sia, dawt hran hranah te lo lei kual ve awm.
"Kha kha indawr elaw? A van nawm hmel."
"A ho chutiang, i va heh reng reng ve." A tih takah chuan tlemin ka thawveng, achhan pawh ka titipui thei tal a.
"Ka ta tur a ni lo ka tih chu!"
"Ti nge i lei ziah si."
"A ngai a lawm."
"Engvang chuan....."
"Sawi chi loh!"
"I ta tur a nih ka la ring tho mai, hmeichhe tih atan chuan a mawi lo khawp mai."
"A ni lo ka tih chu!!" Ka duh ai ka ţawng pawr ţan, inbe reng chungin classroom lam kan pan a.
"Engtin nge ka rin theih ang che! Kan dawr nghaktuin kan zirtirtute a hrilh chuan an man chhuak rang khawp ang che."
"Engvangin?" Ka lo ti vat.
"I lei zing em a lawm." Tun thla a tan nihnih chiah a ngai tawh tho ka lo ti rilru.
"Ka ta tur pawh a ni chuang hleinem."
"School compound a keng luttu i ni tho a lawm." A tih pah chuan classroom a hawng a, ka luh theih nan min kian hmasa phawt a, nidang ang bawkin a lo la reh ţhiap.
"I thil hmuh te kha tumah hrilh reng reng suh." Engah mah ngai lo ang ber a awm tum chuan kan ţhutnaah ka bag ka dah a.
"Engvangin?"
"Ka sawi avangin?"
"OPa kha i ngaizawn vang a ni maw...." A rawn ti ta daih, hepa hi ka leisak a hre reng sia!
"I hre lo der khanglang a, kha i inpuang mai a lawm, min report ngam lo tih ka hre mai." Intithei ru zet chuan ka ti zat zat. Ka dah ţhin tih a hriat ve leh min report nghal lo tih lah hriat reng reng. Hepa hi chuan min report ka ring lo ve hrim hrim tawh.
"Ka report kher ngai lovin an man chhuak thei reng che tih i hria a lawm."
"Min man chhuak a nih vaih chuan nangmah bak i ni chuang lo ang."
"Anni ţhian ho kha i boss te anni tih an hrechhuak vat dawn a nih chu." Min tihel zeta a tih chuan ka ngei lutuk!
"Duh leh hrechhuak ang hmiang!" Ka ti hmiah! Tlawm zawkah ka ţang awm lo!
"An vai khan i kawp vek tihna zawk nge?" A tih leh phei chuan sa tawh tak ka ni! Mahse ka inthunun hram hram, hepa hian min chhaih thinrim a tum niin ka hria.
"Ni mai ang chu, tla na fal hi chu an awm lo thei lova, i hrethiam ve tho em?" Ka lerh hmel ta kher mai.
"Ka hriatthiam phak bak a ni tlat! Pakhat a lungawi zo lo te hi ka huat zawng tak." A ţawngdan chu a ngai reng, thinrim a ţawng a ni lo, mahse min en reng zel avang chuan a mitah pawh ka en ţha ve ngai lo. Saw ti teh fahrana inen te chu tuman nuam pawh an ti nang!
"A lo nih tak chu!" Ka la ti hram, ţawng thei chu min ti ve teh ang chu! Pawi ka ti lo em mai.
Midang an rawn luh avang chuan min chhang ta lo.
Ani pawhin Opa te nen min ringhlel a nih chuan midang pawhin kan inkawp an ring ve vek dawn a nih hi! Midang hrilhfiah seng lo mah ila zawhna ka dawn tawh loh nan eng emaw tak ka tih a ngai a ni.
*********End Of Part 1 *********
Comments
Post a Comment