HELEN 💫By Unknown Belle

HELEN 💫

Changtupa pov:

An in aţanga a lo chhuak chu ka lo thlira, a hmel ţha tak chu hmuh a nuam leh pek. Min hmuh rual chuan nui var varin min rawn pana, a inthuam dan pawh ka duh tawk chiah, ni lo se chu ka thlak tir leh ngei dawn tlat......

Kan college kal ţanni tur a ni, ţhian ang chauhin ka en lo tih hi high school kan kal aţang khan ka hre tawh, mahse ka zep, a chhan pawh ka laka a rilru put hmang ka hre chiang em a, ţhian ang chauhin min en tih ka hria, mahse a pawi ka ti lo, mipa dang a hnimhnai lo tih ka hrechiang a, engkimah min ring ţhin bawk nen tuna kan awm dan pawh hi thil hrehawm a ni hran lo.

"Mak ţhin vung vung e....." Ka helmet chhana ka lu a ben zauh paha a tih chuan thildang ka lo ngaihtuah tui lutukin ka bul a lo thlen lai ka lo hre miah lo.

"Hmeichhe insiam chen zet a lawm i insiam le." Ka tih zauh chuan lei min chhuah khum vak a, ka lo nuih huk a, ka tlan chhuah nghal avangin min chhan letna chu ka hre pha mang lo.

Hei hi kan ni tin hun hman chhoh leh dan tur chu a ni, middle school kan kal ţan tirhin an ţhenawmah hian kan insawna, a ţhiannu in an khaw lama a awm san kum chiah a lo ni ve bawk a, inţhenawm leh school luhna inang ta chu kan inkawm ngeih har lo, kan pahniha kan inzui chawt avangin ţhian dang kan kawm ngai lem lo, keimah zawk hian ţhian ti a sawi tur chu ka nei ve nual, mahsa mipa vek an ni thunga, Helen-i anga kawmngeih ka nei chuang lo, ka ţhiante leh midang hnen aţang pawhin kan inngaizawng em tih zawhna kan dawng zing, Heleni chuan pha ve ţhin mah se mipa ţhenkhat lak aţanga a inthiar fihlim theih nan a ţangkai hle tih a hriat hnu chuan a lo hnial tawh ngai lo. Kan inngaizawng tihna a ni lo, a en liam thei tawh khawp mai, kei erawh a rukin ka hlim thei hle thung, chu erawh a hre lo. Mipa dang laka a inven nan keimah min hmang turin ka ti a, a pawm ve mai, a chhan pawh ngaihzawng neih tumna a nei ngai tlat lova, a lerh lo hle a, chu pawh a hrechiang tute zinga mi ka ni.

College kan thlen chuan bike aţanga chhukin ka bulah a rawn dinga, "vawiin chu i mood a fu vak na nge?" Min thlek ha chunga a tih chuan a ngaihţhat nan ka nuih suk a.

"Ka ţawng char char a, hre awm pawhin i awm lo reng reng." A ti leh bai baia, "Ka hre vek a lawm, ka chhan che chuan 'maw?, Maw?' i ti leh char char dawn sia ka chhang lo mai mai che a lawm." Ka ti ve thung, ner nang mah se ka sawi dik tih chu a hre ve tho, helmet ka khum miau avangin ka ţawng a hre ţha thei lo hian maw? Hi a ti deuh sek zela, ka chhan lohin ka hre lo emaw tiin min be ngat ngat zel bawk si, mahse a bula awm hi nuam ka ti a, thil ho te te sawia a nui hak hak ţhin te hi ngaihthlak nuam ka ti, a hmel hmu lovin nikhat lek pawh rei ka ti a, ka rilru hi a hrethiam em ka hre lo, mahse a chezia ah ngaihbel tur engmah ka hmu ngai lo, a ţhian ka nih angin min hmangaih hle a, midang tana inpe zo tak leh thil phal tak a ni, hmeichhia a ka duh ang zawng zawng hi a nei vek emaw tih mai tur a ni.

Vawiin pawh a scooty ken ka rem ti lo a, a nei thar ve a, kan inzirtir nasa bawka a thiam tawh hle, mahse college a keng nghal tur em chuan ka la ring zo lo, a nu leh pa te ngaihdan pawh a nih ve chiah avangin min hnial lo bawk.

Ka duh ni a ka hriat tirh khan ka pawm duh lo luia, mahse a zun chuan min zem nghet deuh deuh mai bawk si, keiman ka hlat luih deuh lahin ani'n min hnaih a tum ve sauh zela, ţhian a ngaina a, a ţhiannu nen pawh tun thlengin an la inbe nasa, a thlalak chu ka hmu ve ţhin, mahse ka ţhiana siam ve kher tumna ka nei lo, ka be ve ngai hek lo.

Kan classmate hlui te lo awm khawm laihna ah chuan kan inzui ve a, auditorium lama kal khawm tur a nih avangin kan inzui dam dama, Helen-i chuan ka bag hruiah vuanin min zui dat dat bawka, ngaiah kan nei tawha, khawi lo kalna ah kan inzui nasa bawk nen ka ţhiante phei chuan ka mei tiin an fiam ţhin, a haw lem lo, a rilru a tluangin a thianghlim hle a, keiin ngaihzawng lo nei dawn ta ang ila hmeichhe dangin amah an thik ang em tih lam pawh a ngaihtuah ngai lo, an khawsak a harsa lo bawka kan in ah a lo leng a nih loh chuan a room ah a awm chawta, lehkhabu a ngaina hle bawk.

"Ah..... Àmpuii ang deuh ka hmu!" Ti a a din chawt chuan ka rucksack a vawn miau avangin ka ding ve a, a hawina lamah chuan a hmu leh tawh lo nge ni a hawi kual ruaia, a takah la hmu lo mah ila a thlalak min hmuh fo tawh avangin hmu ve pawh ni ila ka hriat chat ka ring.

"I hmu sual a ni lo maw...." Hawi ve paha ka tih rual chuan a hnunglam aţanga rawn kuah thaktu an rawn awma, Àmpuii ngei chu a lo ni. Helen-i pawh chuan a hmu thut chu a ţhawng hle tih a hriat, an inkuah chung chung lai chuan an bulah ka lo ding ve renga, ka awm ve tih an hre chang lo reng reng.

An intia hle a, Àmpuii chu a cher deuh zawk a a hmaifang pawh a sawl deuh zawk bawk, Helen-i ang lo takin a sam chu a dar chinah a tan hmarha, a kir deuh bawk, Helen-i angin a vun no vur lo mah se hang chhe tak a ni bik lo, a lan danah chuan he ta lut ve tur a nih hmel.

"Ui ha! Hei in inhmu ve ta a lawm, Àmpui hei hi ka ţhianpa ve em em mai Kevin a nia, i duh leh Lalpekhlu pawh i ti lawl lawl thei ang, nang chuan i hre zing tawh tho sawi ve lo mai ang." Nui var var chung chuan Helen-i chuan a ti zat zata, Àmpuii kut rawn phar chhuah chu lo vuan vatin kan inchibaia, kan ţhiani lah chu a lo hlim vur vur khawp mai.

" Eng nga ti nge min hrilh lawk loha?" Heleni'n a tih chuan Àmpuii chuan a nuih tlawn var vara, "Ka hrilh lawk che chuan surprise a ni nang." A lo ti then, Helen-i chu lungawi lo der ve mah se rei a ni leh dawn chuang lo tih Àmpuii pawh hian a hrechiang viau ang.

A tam zawk an luh tawh avangin nakina sawi zawm leh tura intiamin kan lut ve a, inkai rialin an kala, Helen-i chuan ka rucksack hruiah ala vuan hram! An inbiak sep sep lai chuan ka awm nawm nan ka lam a rawn hawi leh zauh ţhin a, midang chu ni se ka lawm hran lovang, mahse a ţhiannu a ngaih em em a ni tlata, lo lungawi loh ngawt chu thil tih chi pawh a ni chiah lo.

Program a rei loh avangin canteen lamah kan inzuia, he ta kan awm khan Àmpuii nu hian thingtlangah pasal a neia, Àmpuii hian zui ve in A pa hrawn fa te nen an cheng za a, tunah chuan a nu leh pa te an inţhen leh tawh avangin hetah an rawn insawn leh a lo ni. 

Ka awm ve chu pawisa lem lovin an titi barh barh a, kei ni nuamsa taka kan khawsak laia Àmpuii dinhmun lo khawngaihthlak bik zia ka ngaihtuah a, a kum ang rualah chuan a lainatawm tak zet, Helen-i chuan a ţhiannu chu khawngaih tih hriat takin a melh leh vung vung ţhina, rilru no tak mai a ni bawk nen Àmpuii'n pangngai taka a sawi theih lai chuan amah zawk chuan hrehawm a lo tih hmel em em a, eng thu mah chhakchhuak lo mah se a ţhiannu chu a lainat hle tih a mitmeng aţangin a hriat theih.

Àmpuii te awmna chu kan college hnaih takah a nih avangin thingpui kan in kawia, an nu fa chauha khawsa an ni bawk nen a lian hran lo, hmeichhe awmna tih hriat takin a fai hnúm hlarha, a nu a awm loh avangin mitmei ven tur a awm lo bawk.

An rawn awmna a rei ve leh deuh tawh tih a sawi chuan Helen-i chu a melh ram rama, Àmpuii chuan a nuih tlawn var var reng mai.

Helen-i ang lo takin a ţawng duh hle a, Helen-i pawh a ţawng duh tho, mahse midang bulah ka bula a ţawng duh angin a ţawng duh lem lo, Àmpuii erawh rei tak lo inhre tawh ang maiin min be nghal bawrh bawrh theia, a awmna hmun apianga tlangnel zung zung thei mizia a nei niin ka hria.

***

Zanah chuan a ngai te bawkin Helen-i te in lamah ka leng a, kan upa te nupa hi an hna avangin an chhungkuain khawdangah an awm a, ka nu leh pa te leh ka u leh nau te nen kan khawsa a, ka u chiah pawh hi mipa tho, high school ah zirtirtu a ni a, ti chuan kan naupang ber hi hmeichhia niin high school a rap ve ţan chiah a ni.

A room ah chuan awmin movie a en a, keiin games ka khel thung, Àmpuii chanchin a khattawkin a leh zauh ţhina, han sawipui vak dan ka hriat loh avangin ka lo um e liam mai maia, a ruk tak chuan Àmpuii a awm tawh si a, kei min kawm ţha hman tawh lovang tih ka hlau ve deuh.

"Kha! Games ringawt ngaihtuah suh, ka lak kep che a lawm hle rawh." ti hlakin ka sira dawhkàn te ah chuan a rawn daha, "Ka lawm hle tih hi i hre lovang tih ka hlau." Mit siai zeuhin ka ti ve zaiha, min ei lo hmel zeta a hmui a ti pawrh tarh chuan a lawmawm zia hi a inhre awm der si lova.

"In mai mai teh!" Min chhan dan dang a hriat loha a tih takah chuan ka nuih huka, a huat tawk a lo tling leh em em mai bawk a!

A malchunga laptop dah a thlir dauh dauh lai chuan ka kiu a innem khalhin ka en pui ve a, a thei tui rawn chawi luh chuan ka dawt leh khalh ţhin a, a movie en aiin amah hi hmuhnawm ka ti daih zawk. A laka ka rilru put hmang hi ka thup hlen theih ka ring lova, amah lam ka ngaichang chho a nih loh chuan mipa dang lakah ka chan ang tih ka hlau ve tho.

"Nichin khan a pi a nuam lo deuha ka nu leh pa te an kala, i awm tho bawka in lo nghak turin min tia, min men pui thei tihna a nih chu." Ka lam rawn hawi paha a tih chuan ka lo en sa reng bawk nen kan inmelh chiang khawp mai.

"Mak vung vung ţhin teh e, mi chuan hmu che se i à emaw an ti hrim hrim ang." Nui hak hak chunga a tih chuan ka nui ve suka, kan rilru hi a inang lo ţhin teh e!

"Full moon pawhin thlirtu a ngah laia ka bul lawka i awm reng phei chu hnuhnawm tham i tling ve a lawm ." Nui duh miah lova ka tih chuan ka sam a rawn ţham leh vak tawh mai! A hmai bial kérh avang hian hetianga ka chhaih hi chuan a haw thei lutuk! Mahse hetia chhaih thinrim deuh hian a lawmawm ka ti thunga.

"I lo la leng zel duh a nih chuan ngawi hle hle khan awm rawh." 

"Yes Sir!" Min melh rum viau mah se a thin a rim tak tak lo, a bianga ka piai sak leh phei chuan a ţeu hlar mai. A thinchhe lem lo,mahse a huat zawng hi chu ka hre hneh ve a, tih thinrim dan pawh ka hre lutuk tlat.

An fanu neih chhun a ni a, keh thei dawmin an dawm ti ila ka sawi sual lovang, ka bula a awm chuan a chhungte ngaih pawh a ţha a, min ring ve hle bawk.

A nu te rawn haw chuan kei pawh ka haw phei ve nghala, ani pawh hi kan in ah a rawn chuang kai tam ve tho, unau pianpui a neih loh avang hian a khua a har ţhin hle a, ka va lan loh hi chuan amah zawk hi a rawn kal leh nge nge zel.

Ni tin class kal turin min zuia, scooty ken pawh a tum tawh chuang lo, kan subject zawng zawng a inang bawk nen kan inthurual thei zela, mipa lakah ka veng ru ràn zel bawk.

Àmpuii te nen chuan kan inzui chawta, ani erawh kan subject a inan vek loh avangin kan inthurual vek thei lo thung. 

***

Zan khat assignment kan tih dun lai chuan Àmpuii'n mi duh deuh a neih thu chu a rawn sawi chhuak phawnga, ka tan a ţangkaina vak ka hre lo, ani pawh chuan a thusawi chu a la thutak lem lo tih hriat takin a thil ziah laiah rilru a pe pah reng bawk a.

"A neih thu min hrilha, tu nge a nih min hrilh duh leh der si lo, sual thiam lutuk mai." a ti leh a.

"A thuruk a hrilh che chuan keimah min hrilh leh tho a rin vangin a hrilh duh lo che a nih dawn chu." Sawi fuh inti zeta ka chhan chuan , "Ni ve tho mai." A ti leh maia, ka bulah thuruk a nei ngai lo tih chu Àmpuii pawh hian a hriatpui chiang khawp ang chu.

"E chuan naktuk chu i hman dawn ta em, hruai chu ka duh viau na in ka khalhah a chuang ngam awm der si lova." A ti leh a, ni dawn tak e! A lo sawi takah chuan ka hre chhuak leh chiah. Àmpuii pahrawn fate zinga mi khan chawhmeh a rawn thawn dawna, chu mi lampui tur chuan min sawm, a nihna takah chuan Helen-i a sawma, mahse a scooty khalha a chuan ngam loh a rin avangin keimah min bel ta kha a nia.

"Ka lo theihnghilh leh ţep a lawm, ka hman thei mai ang." 

"Mai ang chauh maw!?" Min melh kal chunga a tih takah chuan ka hman tur thu ka sawi leh ta nge nge a, hetiang thu reng rengah hian chhanna chiang tak a phut tlat zela, a zawhna chhanna hi chu 'ka hre lo le' emaw 'mai ang' tih emaw a chhan hi a duh ţhin lo , 'aw' a nih loh chuan 'aih' a ni tawp mai a ni.

***

Tukţhuan eikham ve leh chuan Àmpuii te in lam ka pana, an in ka thlen chuan a lo inpeih ap tawh. Helen-i nen an inan na deuh chu an hlim hmel hi an pu sàng thei zela, kawm pawh an nuam, a chang chuan an che naupang chhia thei hle a, mahse Àmpuii hi a la puitling zawk tho tho.

Sumo counter a chawhmeh kan lak lai chuan Àmpuii chu a hmelhriat mipa nen an inhmu a, an innel hmel hle a, chu pa chu a hma pawhin ka hmu tawh ţhin, mahse kan inbe ngai lem hlei lova, Àmpuii nen class khatah an ţhu tih chu ka hria.

An in kan thlen hnu chuan thingpui in turin min chelh leh tlata, vawiin chu chawhnu lama motor ho sil tih loh chu tih tur dang em em ka neih loh avangin ka hnial duh ta lo.

"Counter a kan hmuh pa kha Zosanga a nia, amah kha a lawm nizana Helen-i be tu chu, a duh ve reuh sia ka bulah hian a sawi ve ziaha, nizan khan ka sawipui ve ngei a, Helen-i lah chu a zei lo ve nasa mai bawk sia." Nui chunga a sawi lai chuan kei erawh ka nghing lawihin ka hria! A chhan pawh Heleni'n chutiang lam engmah min hrilh loh vangin. Àmpuii hi chuan ka hriat leh vek tawh a ring tih ka hrethiam mai.

"Zosanga kha chuan beidawn a tum loh thu min rawn hrilha, inngaizawng ta se an inhmeh ngawt ang." Min vengthawng hauh lo chuan a ti leha, a awm ve tho, min venthawn chhan tur a awm tlat lova, ţhian chauh kan ni tih chu Àmpuii hi a hrechiang tute zinga mi a ni tlat.

" A hrilh lo che em ni?" A hmela hlauhthawnna ni awm tak lang avang chuan a ngaih ţhat nan ka nuih suka, "A pawimawh ber hleinem, thingpui ka in zo chiah na in ka haw tawh mai teh ang." Tih leh din ka ruala, a hmelah chuan nuam lo a ti hmel hle a, ka lungawi lohna ka lo tilang viau em maw ni!?

"Helen-i hnenah ka hrilh che tih sawi lo hram rawh, aw! A hrilh vek che ka rin vang a nia, please in lo hre lo der hram rawh aw." A ti mawlh mawlh a, "A duh duhin a awm thei a lawm, a nunah ka thu ber si lo a." Za lo fe a nui luiin ka ti a, a nunah ka thu ber lo tlat a tin ni.

"Ka awm i ti nuam lo zo vek! Ka kà hi a ţawngduh lutuk a..... buaithlak thei e..... a lakah i lungawi loh phah loh hram ka beisei." 

"A ho lutuk, ngaih ţha deuh khan awm rawh." Tiin ka chhuah san a.

In ka thlenin ka room lamah ka phone ka en nghala, Helen-i hnen aţangin chutiang awm ang thu engmah dawn ka nei lo, ka laka a zep chu ka hrethiam lo lek lek dawna; mahse, a nun a nia, a thil tih engkim min hrilh turin alakah chuan ţhian nihna bak ka nei lo. A hma ang bawka kan pahniha kan sawi dun ang hun kha chu kan nei tawh ngai dawn lo niin ka hria.

Ka chan mai ang tih erawh ka hlau! Nge ka lo chan reng tawh zawk ni ang?

Motor ka sil lai chuan a rawn lang tehhlawla, a hmelah chuan thil danglam thleng hriatna tur a awm lo, ka lakah a zep tlat ni a ka hriatna chuan ka lung a ti awi zàn lo khawp mai.

"I lo let leh na a rei tawh em?" Ka bula rawn ding ve in a ti a, ani chu pangngai takin a awm thei maia, kei chuan harsa ka ti ru hle thung.

"Rei ve leh tawh e, ka awm rei lova." Amah pawh en lem lo chuan ka chhang liam puata.

"Ka scooty saw ka rawn khalh phei anga min lo sil sak ve?" Phur zeta a tih chuan ka en ta nge nge a, min lo nuih tlawn var var mai.

"I duh leh hetah rawn sil ve mai rawh, sil tur ka la ngah hi." 

"Aw pawi lo ka rawn sil ve ang." Hmanhmawh taka an in lam pana a tlan lai chu ka thlir a, ka inrin hma in min ruk bo sak daih mai dawn ni a hriatna ka neia, a laka ka rilru put hmang hi tun hunah hian hrilh ta ang ila a lo pawm duh kher lo mai thei, bakah a ţhawng viau mai thei bawk.

Kan kawtah chuan a rawn inhung ve a, a phur sàrh sàrh khawp mai, a kekawr hak chu a khupah a thlep chho a, ka hmanraw hman loh a piang chu a lo hmang ve zela, a uluk bawka a scooty a sil chhungin ka bike leh ka u motor ka sil zo hman!

Kan in ah chuan a awm nileng deuh thaw a, a phone a rawn keng lo bawk. Nidangah pawha thil thleng fo a nih avangin danglam vak a awm lo, mahse keimah hi ka danglam tlat. A duh thu renga min hrilh a nih loh chuan zawh pawh ka tum chuang lo, Àmpuii'n min ngenna vang a ni chiah pawhin ka hre lo, ka lungawi loh vang hrim hrimah ka puh ringawt.  

"I nuam sam lo em ni i va cool ve vawiin hi?" Kan pahnih chauhin sitting room ah kan awm a, sofa pakhatah a mu a, kei a awm lohna lamah ka ţhu thluang duai thung. Ţhutthlengah hian ţha te te hian a ţhu thei thlawt lo, 'mut theihna renga ţhut te chu a taihmak thlak em mai' a ti hlauh zel.

"Nuam sam e....." Ka ti ringawt a, a ai thui sawi tur ka hre lo ve teh tlat, ka hmel a hmuh loh nan phone ka bih san daiha, tv a en reng emaw ka tih laiin min lo chik ru ve tho a nih dawn hi.

"Leng rei tawh min ti chiang!" Fiamthu a a tih chuan ka rilru thup nan ka nuih pui hawk hawka, "Chaw i ei ve leh ringawt dawn a mi?" Ka tih chuan , "Min huphurh thei si ka ei peih tawh lo." A lo ti ve hmak.

Ka pa te rawn haw hnu lawkah a haw a, ka bulah hi chuan titi na tur hi a hre thei hle a, kan pahnih chauha kan awm pawh hian ama ţawng ka ngaithla char char hi ni ringawt.

Zan lamah chuan an in ah pawh leng lovin ka room ah ka inkhunga, phone ah a khattawka kan inbiak reng avangin rilru lak pen nan ka zai mai maia, Helen-i hian ka zai hi ngaihthlak nuam a ti thei hle a, min fak der nge chu ka hre lova, mahse ani hnen aţanga fakna thu ka dawn hi chuan ka zaithiam hle tura ngaihna ka neih phah ţhina, mahni inrintawkna min neih tir bawk.

Ka len dawn leh dawn loh min zawha ka chhan khan amah a rawn kal mai ka ringa, mahse zanin chu thawm a rawn nei lo viau. A message hnuhnung berah chuan 'Kei pawh ka rawn rim lo mai ang che zanin chu." A ti a, ka nu leh pate bulah hian keimah min rim angin a insawi ziah ţhin reng a ni.

A last seen a hlat leh deuh avang chuan ka chhang duh ta lo.

Ka room kawngka rawn kikin ka nau chu a rawn daka, dawra kalpuiah min rawn sawm duh a lo ni. Kalpuia min sawm a nih chuan dawr hnaiah kan kal dawn lo tihna a ni phawt.

Inthlak pawh inthlak lovin ka chhuak nghala, ani pawh a inpeih har lo. Kan naupang ber a nih vang leh hmeichhe awm chhun a nih avang hian kan duat tlang hle a, amah pawh hian kan duat tih hriain a pangchang thiam thei hle bawk.

Dawra a luh chhung chuan dawrkawtah ka nghaka, rin ai a rei phian lehnghal!

Kan awmna dawr ep chiaha mite chuan ka mit an la zar! Kha pa, Àmpuii ţhianpa a hming pawh ka hre leh tawh lo, Helen-i nen hlim zeta an inbe lai a ni ka va hmuh! Ka dinna ngaiah chuan ding chutin ka thlir renga, ka chhungrilah hian thikna na men lo in a inţham ut ut a, ka va kal ve mai loh nan ka insum nasa viau bawk!!

Ka en reng lai chuan Àmpuii pawh a rawn lang ve a, dawrchhungah an la awm avangin leh darthlalang vek a nih avangin ka va hmu chiang thei hle a,min rawn hmu ve lo thung. 

Keimaha mal riaua inhriatna lo awm chu ka duh lo kher mai!! Mahse eng nge tih theih ka neih chuan! Tunah tak hi chuan sawpa saw dawr aţanga hnuhchhuaha hnek hrep mai chu ka chak! An hlim hmel viau lehnghal a! Helen-i, ni lo, Rosangzuali pawh saw ka haw tel hlur tawh mai!

Ka nau a rawn chhuah takah chuan an lak aţangin mit ka la sawn ve hrama, kan tlan chhuah hma a ka va hawi leh chuan Helen-i a rawn hawi ve chiah! Min hmu chiang em ka hre chiah lo, mahse a hmelah khan keimah ka ni tih a hria in ka hria, hawisawn leh vutin ka tlanchhuak nghal a, min rawn thlir zui ni a hriatna ka nei, ka hriat dik pawh ka ring.

Ka room ka thlen chuan khumah ka let thawka, ka ngaihtuahna a tawi tuk mai. Ka phone nghawr dar dar reng chu ka bana, Helen-i a nih avangin chhang lawk lovin ka en rún phawta, a ri a tawp rual chuan a rawn ri nawn leha, ka la ta nge nge.

"Eng nge i tih?" A rawn ti nghal tawng mai.

"Ka mu tawh." Ka ţawng rik danah chuan ka lungawi zan lo tih a hriat loh hram ka beisei.

"Nichin a mi kha i ni tiraw?" 

Teh tawp a! Dawrah Khan kal lo ila chu ka bo viau ang.

"Engtia nichin maw?" Ka hre lo der ve tlata.

"I nih reng kha aw ka rawn hmu che! Eng nge in tih a?" A tih leh chuan Boihtei dawra ka kalpui thu ka hrilh ve ta nge nge a, keimah ka nih leh nih loh min zawt fiah tura rawn phone a nih thu sawiin kan inbiakna kan titawpa, ka ngaihbel nge maw ni kan inkar chu a hla ta dàwrh a ka hriat! Dawra ka kal chhan min zawta, kei erawh chuan ka zawt ngam ngang lo! A chhan pawh khapa nena an chanchin min hrilh ka hlauh vangin.

Class kalna ah pawh ani chu a pangngai vek, keimah hi ka rilru a dang tlata, ka rin hi a dik ang tih ka hlauh luatah ka awmdan phung pangngai ka hloh mai dawnin ka hria! Vawihnih lai ka dam ţha em tih min zawh phah tawh lehnghal!! 

Last period ah Àmpuii te nen kan awm ho avangin class a zawh chuan ka chhuak thla rual a, Bike ka lakchhuah chhungin an ţhiandunin nidanga min lo nghahna ah chuan min lo nghak leha, mahse vawiin chu pakhatin kan tam tlat! Saw pa teh hrep pawh chu ka va hmu hne deuh tawh ve mawle!

"Kevin hei Zosanga kha ila hria em? Inveng lamah a kal dawna Heleni hi a hruai haw hman hmel tho sia bazarah min thlah lawk la i peih em?" Àmpuii chuan min hmuh rual chuan a ti zat zata, min zawt ni lovin min hrilh ni berin ka hria.

"A pawi hleinem." Phur fahran lova ka tih chuan Helen-i ka melh pah zauha, ani leh ni lo angin nuam lo a ti hmel viau, mahse engmah a sawi ve lo.

"Chu ti chu Helen min lo nghak lawk aw." Zosanga chuan tiin a bike a va la chhuak ve a, ka melh ngai melhin bike ah ka ţhu runa, ka lungphu rang zet chu tih reh tumin bike chu ka hmer ngawt ngawt a! Ka hmel landan pawh a nelawm fahran dawn lo tih ka chiang! Helen-i chuan engmah sawi lovin a la ding renga, Àmpuii erawh bazar a a tih tur a sawi zat zata, tun dinhmunah hi chuan ka thlah chak fahran lo khawp mai.

Zosanga lo thlen rual chuan Àmpuii a rawn chuang ve nghala , engmah sawi zui lovin ka tlan chhuak nghal bawk, Khapa'n Helen-i duh hmel taka a melh kha ka hmu peih lo!

Àmpuii chu thlahlet leh a ngaih takin tiin ka letsan nghal bik lova, a inthlahrung viau na in ka tan thlah leh a harsat loh avangin ka hnial ve tlat thung. A tih tur a tih fel hnu chuan an in lamah ka thlah leha, in a haw pawh chu ka phur lo tak zet! Chuvangin in lamah tih tur ka nei lo bawka tiin khawpui chhungah chuan ka tlankual vel mai maia, Helen-i nen kan inbe leh a nih chuan khapa chung chang kha kan sawi tawh ngei dawn tih ka hria, a la sawi duh lo fo a nih chuan ka zawt tawh mai thei, ka en liam tawp thei tawhin ka ring lo.

Ka haw hnu ah chuan room lamah ka inkhung hmaka, phone ka en a a message engmah hmuh tur a awm lo, zanah pawh a hmel hmuh tur a awm lo, mahse keia pawh hian ka pan bik chuang lo, ruak hiaua inhriatna ka neih erawh tih reh theih ka chak tak zet!

Zingah pawh a scooty a a kal ka ring kha a nia, mahse min rawn sawm ve leh teh tlat. Ka lungawi lo tih a hre tawh bawka inthup pawh ka tum tawh lo! Amah lah chu a inthlahrung hmel em em lehnghal a, ţi dàk hian min melh kiaua, lo inhauin intithiam lo fo tawh ţhin mah ila tun anga min kam tu hi a la awmin ka hre lo! A hma a kan intihthiam lohna te chu zan a mi a nih chuan zingah chuan kan sawi zui peih tawh ngai lo, mahse tun ţum chu a dàn a dang tlat.

Min biak duh si min be ngam si lo a ang ber! Ka lo rum leh lutuk em maw ni dawn le aw....ka ti dawna, mahse college thlen ruala kha pa bawk ka hmuh leh takah chuan ka awmdan chu ka inchhir leh lo.

Bike ka hun fel chhung chuan an pathumin an lo ding leh ţhapa, an zingah chuan pangngai ang takin lang mah se kan inkar ber a fel tlat loh avangin a mawlh ru ve tho ang.

Zosanga pawh chuan min be ve a, ka chhang ve tak nangin ka tui teh chiam lo, Àmpuii lah chu a ţawngduh zual em em maia, a ţhiannu rilru hi a hriatpui miah lo tih ka hre mai. 

Vawiin class Àmpuii nen a inang vek avangin a tihzia phiana, Helen-i nen chuan kan inbe deuh renga, kei min be ve a nih loh chuan ka ngawi ngara, Helen-i pawhin min be chuang lo, biak chakna pawh ka nei rih lo, khapa hmel kha hmu lo ila chu ka pangngai tawhin ka ring a ni.

Tlai banah chuan Zosanga chuan a lo nghak leh ngeia, mahse ka rin loh deuhin Helen-i chuan a hnial ve tlat! Tih tur kan neih ka hriat miah loh kha pawimawh hmel taka sawiin ka hnungah a rawn ţhu kai thaka, Àmpuii chuan haw dun tir tum viau mah se Helen-i berin a duh loh miau chuan lawm takin ka phur mai a niang chu.

Kan tlan chhuah hma chuan Zosanga hmel chu ka en leh hrama, hepa hian Helen-i laka ka rilru put hmang hi a hria tih ka hria, mipa ve tho a ni a, kan hmeichhe duh te kan en dan hi chu a dang daih reng a ni, a hria pawh chu pawi ka ti teh hrep lo e! Ka lawm zawk ngawt ang chu! Hmeichhe pahnih te erawh min ngaihven lo tih hriat takin an lo inbe ve mawlh mawlh thung.Hnehtu inti zeta melhin ka tlan chhuak zui nghala, kan tlan chhung zawng chuan kan inbe leh lem hlei lova.

Kalna tur dang kan neih loh avangin kan in kawtah chuan ka dinga, a chhuk rual chuan an in lam pan mai lovin ka bulah chuan a tawi hrata.

"I la thinrim em ni?" Tim deuh taka a tih chuan ka inthiam lo ve deuh.

"Rim chhan tur a awm em ni?"

"Dawt sawi suh, a rim reng kha! Khatianga i awm chuan nuam pawh ka ti lo." A ti leha, a hmelah chuan nuam lo a ti hmel tak tak reng a!

"Va haw tawh rawh ka thin a rim hleinem." Ka ti ve tak na in ka lung a la awi famkim lo, ka rilru a hriat hma chu rilru nuamin ka awm theih ka ring lo, mahse chu chuan hun a duh rei tawh kher lovang, khapa nen khan engtiangin nge an awm ka pawisa lova, tunah hi chuan eng pawh huama ka duh zia hrilh mai ka duh, mahse rei lo te tak tak ka nghak leh ang, khapa nena an inkar chanchin ka hriat belh leh mai thei a sin!

Zanah chuan an in ah ka lenga, ka hmel chik fahrana a en hnu chuan ka rilru pawh a dam leh deuh tawh tih a hria a ni chek ang chu hahdam huai hmel a pu reuha, mahse a room a rei pawh kan inkawm hmain a ţhianpa a rawn kal thu sawiin an rawn au a, a rawn let leh mai dawn emaw ka tih laia a rawn let leh tak mai lo ah chuan ka chhuak ve ta nge nge a, mahse ka lo chhuak ta kher kher chu ka inchhir nghal!

Zosanga chu tlangnel fahrana lo ţhu in a pa ho in Tv an lo en ho chu niin! Ka hmel a hmu dan chu a ring lawk bik lo nge ni a meng phawk deuh chu ka hmu hman.

Helen-i pa chuan sitting room lama inkawm mai tura min hrilhin Zosanga chu a biak zawm zata, Helen-i ka en chuan min lo en ve chiah. Ka thinrim tih hre lo lekin min lo la nuih ang vur vur a! A awm ve tho, nichin lawkah kha chuan kan boruak a pangngai leh tawh em bawk lah tak a!

An zinga ţhut chu ka chak hlawl loh avangin ka haw nghal mai tur thu ka sawia, ka haw dawn takah chuan rawn tho chhuakin kawngka thleng chu min thlaha, ngaihţhat lohna pawh a nei lo tih hriat takin pangngai takin min thlaha, kha pa nen bawk khan an inkawm leh dawn tih ka hriat chuan an bula ţhut ve tlat chu ka duh leh hnuhnawh kher mai! Mahse ka chhuak fel vek tawh bawk si! Ngaihtuah chiang hmasa lova ka lo haw thawt thawt chu tih ngaihna hre lo zetin ka tukhum ka hiat ka hiat ta ringawt!!

*I inleng pa chu a va tlangnel tawh awm ve?* Ka va ti hram, min rawn chhang mai lo, a awm ve tho, a phone te chu a room ah a dah daiha, khapa kha a la haw awm der si lo.

A mi chhanna pawh nghak tawh lovin Àmpuii min lo biakna chu ka chhan san ta zawka, a nawmsam loh thu a rawn sawia, mahse phone pawh a la khawih peih a nih chuan a na vak lo ni turah ka ngai ve ngawt a! Àmpuii pawh hian Zosanga a ţan leh lutuk avangin ka haw lek lek! Ani pawh hian min be awl lova, mahse Helen-i angin ka dah pawimawh lutuk lo zawk, a chang chuan ka chhang duh lo lui ţhin, Helen-i a nih loh vang a ni mahna ninawm lamah a kal tlat zel.

Ka mut dawna phone ka en leh chuan min chhanletna chu ka en vata, * A vawi khat lo lenna a nih kha.* Tih te mai hi a rawn thawn a, mahse kha pa awm dan aţang kha chuan a tlangnel hmel viau lawi si.

Helen-i ka nghah lai chuan rei pawh ka nghah hma in a rawn pheia, kal mai thei tura bike a ka lawn chuan a hrawk a thian kharh kharh a.

"Ih..... vawiin chu min lo kalsan mai rawh, saw Zosanga a lo kal sia." Nuam lo ti hmel zeta a tih chuan sawi zawi hle mah se ka lo hrechiang hle a, ka rilru thup tumin ka inhum ruh nghek ringawt!!!

"A ţha a lawm." amah pawh en lova chhangin ka tlan chhuak zui nghal daiha, min thlir zui reng tih side glass aţangin ka hmu thei, ka mitmeng aţang pawhin a hrethiam ngei ang,mahse ka pawisak loh zawng tak a ni!

Nidang ang lo takin Àmpuii chu ka ngaihsaka, a hmelah chuan a nuamsam lo hmel tak tak bawk. Helen-i erawh ka pehhel ţang ţanga, chawhnu lamah phei chuan min be tawh lo reng reng. Ngawi rengin a awma, Àmpuii lah chuan ka ngaihven deuh chu lawm tih hriat takin a damsam lo chung chungin a nui lui hram hram a.

Kan haw dawn meuh chuan Zosanga pawh a rawn lang leh nalh tawh mai, engtin nge kan ban huh te a hriat chat chat theih zawk ni! Ni dawn tak e! Phone an anin be thei reng a lawm le!!! Hepa hi ka hmu zing tawlh tawlh a, ka haw tulh tulh bawk! 

An pathuma an lo dinna lamah chuan ka tlan pheia, Helen-i pawh a la chuang kai lo, an inthlah leh tho ka ring avangin an bul ka thlen rual chuan "ka lova tlan hmasa ange" tiin ka tlan zui nghal daiha, Àmpuii rawn ţawng leh pawh chu ka hre chiang hman lo.

Zanah chuan in a ka awm peih loh avangin ka ţhiante in ah ka leng chhuak ta daiha, Helen-i ka hmuh chak loh vang a ni ber, a rawn kal pawh ka ring chuang lo, in leng a neih leh ngei pawh ka ring. A lan dan chuan khapa lakah khan ka chan tawh niin ka hria, mahse Helen-i hnen a ţang ngeia ka hriat loh chuan ka thinlung hian a pawm phal tak tak dawn chuang lo, mahse chu thil hre tura zawt tur pawhin huaisenna ka nei rih lo, hun ka la mamawh rih tlat.

Dinpuia te in ah ka luta, anni ho lo hi chu ţhian ti a sawi tur ka nei teh chiam chuang lo, ka kal tur ka hrilh lawk loh avangin mak min lo ti hmel viau bawk.

"Fela te nen len ho kan tuma rawn kal ve nghal mai rawh." A ti a, ka hreh chuang lo, ka kawm ţhin te tho an ni a, Helen-i vang hian ka kawm tam lo mai pawh a.

"Zanin chu lenna tur i neih loh vang a ni maw i rawn lan." Nui hui chunga a tih chuan ka nuih ringawt, ka chhang peih lo.

"Kevin-a chu kan va inhmu khat ve, i induh thei bik e....." Dinpuia u chuan a lo ti ve bawka, Faktei a ni, min beisei theih em avanga leng ţha peih lo ka ni pakhat bawk. Dinpuia nen hian kum khat chhuak kan ni a, Dinpuia leh Faktei hi kum zawna piang an ni a, Dinpuia pawh hian a U ngai lem lo, chuvangin a ţhiante pawh hian Faktei tiin kan ko ve vek.

"Ani te chu beisei buai chi pawh a ni hleinem." Dinpuia chuan min lo chhan khalha, Helen-i a sawi chhan tih chuan Faktei pawh hian a hria ang, Helen-i nen kan inkawm nasa tih hre tho mah se a khawsa zia ah min haw lo tih tihlan a hreh lo, ka tan chuan englai pawhin a inhawng tih ka hria, ka mitmei vawikhat pawh hmu se chu i he lovin min bawh huam duh ang chu.....! Mahse Helen-i a ni miau lova, chuvangin ka en dan a dang thei tlat lo.

Zan rei tak thleng chu Fela bialnu rim na ah kan zuia, Zawma pawh a rawn tel ve, Dinpuia leh Zawma hi chuan a nghet an neia, zantin rim lo mah se an ngaih a ţha tawh hle a niang chu ka ti mai a! Fela erawh tuna kan lenna nen hian an inbe ţan ve chauh a ni awm a, kan haw lama kan thil tih kawi nen phei chuan kan tlai viau, dar 12 a ri dawn hnai tawh.

Ka thil in in min hneh deuh bawka in ka thlen chuan ka chatthla chu a ni zui mai.

Ka dang ro lutuk vanga ka harh chuan khua a lo eng ut tawh, phone ban vatin dar zat ka en a, dar 8 a lo ri va tawh mai.Nizan khan phone ka khawih leh ta miah lova, Helen-i missed call pawh a lo awm va mai, whatsapp ah lutin message ka check a, e hiau! Vawiin ka piancham lo ni rengin!! 

A dan pangngaiin Helen-i chuan min wish hmasa leh ber;mahse, kim lo a awm, tukin zingah a lo la kal miah lo. 

Kum dangah chuan ka piancham min lawmpui turin a rawn lang hma thei hle si a, phone a min wish na ka chhan let na pawh chu a deliver lo, phone a la khawih hman lo pawh a ni mai thei, mahse a lo kal tur a ni a sin le.....

Nizan lama min call na ho pawh nizan thil a nih tawh avangin ka call let duh ta chuang lo. Phur lo zet chuan inhnuai lamah ka chhukthla hnak hnaka, ka chhungte ho lah chuan an lo reh diak mai bawk.

Choka ah chuan ka nu a lo awm ve hram.

"Hei i birthday present, Helen-i hnen aţangin a nih kha." Ka nu'n a tih chuan chaw ei dawhkana paper bag lo awm chu ka hmu ve chiah, phur lo hmel tak siin a ruka phur zetin ka bana, a lo hnutchhiah tal chu a lawmawm e! Ka hlimna hi chu ho te a ni reng a ni.

"Kawngka bulah khan a lo awm a." A ti leh a, a tho hma awm hle mai, thil pawimawh tih tur a nei em maw ni le....

A hming a lo ziah vang a nih chiah hi ka nu pawh khan a ma dah a ni tih a hriat theih ni.

A chhunga awm pawh en lovin ka room ah ka keng chho leha, Helen-i chu ka call a mahse a tlang thei lo.

An in ah chuan ka va kal ta nge nge a, a hmel hmuh tur a awm chuang lo.

"Zingkarah khan a chhuak daih tawh, in kal dun emaw tia...." Min hmuh rual chuan a pa chuan a lo ti nghal a, khawiah tak ngal ang maw!

"Ka thawhna pawh a la rei lo....."

"Ka ţhiante nen kan kal dawn a ti bawk sia?" A tih chuan a ngaih a ţha hmel vak lo, keimah ber heta ka awm miau chuan ngaih ţhat chi ni hek lo, an fanu hian ţhian dang hi a hruai lut khan ve em a sin.

"Àmpuii nen an kal pawh a ni mai thei, nizanah min lo biak a tumna tukinah ka hmu ve chiah a." Ka ti ta zawk a, a thil tih engmah hre lo mah ila a chhungte lo tih hlauhthawn kher chu a ţulna ka hre lo.

"E a nih dawn chu, i kal ve turah kan lo ngai mai a." A ti leh a, Àmpuii chu an in ah pawh a kal tawh avangin an ring ngam ve hle ni tur a ni.

Class kal ka ngaih thu chhuanlamin ka haw leh vata, eng tak chu ti ang maw, call lah a chhang thei si lo a awmna ah signal a nei lo nge ni.

College ah pawh chuan Àmpuii pawh ka hmu chuang lo, an pahnih a inthurual an nih ngei chu ka ring ta, mahse Àmpuii biak tumna ka nei chuang lo.

Nileng chuan mahniin ka awm ve rak rak a, ka haw dawna Zosanga ka hmuh chuan tlan pelh mai ka tum a, min biak duhna a neih thu a sawi chuan pangngai taka awm tumin ka zui ve mai a, ani nena inbiak hi ka phur teh chiam lo!

"Helen-i chung chang a nia...." A tih lai chuan , "Ka ring sa a lawm." Ka lo tih khalh vat a, kan inchen deuh reng, kan pian pawh a inlen hleih lem lo, kan inhlau lo tawn ve ve khawp mai.

"Ok! I hriat chuan a ţhat chu! A ţhian i nih angin a fala biak ve hrim hrim che hi ţha in ka hria a, kan inkar i lo pawmpui chu a tihzia khawp mai." A ti leh a, ka mitah min melh ngura, ka melh let ve ngat bawk. Ka hlau lo ve chiang em mai!!

"Ka pawmpui tih ka sawi awm ka va hre lo ve!" Za lo zeta nui luiin ka ti a, a hmelah danglam a awm lo.

"A bulah i sawi a ni lawm ni?" A ni leh khauh, Rosangzuali hian dawt a hrilh a nih ngawt loh chuan hepa hian dawt a sawi tihna! Mahse dawt a sawi leh sawi loh chu hriat a har fu mai.

A thil sawi ho chu chhan tinah pawh ka tib lo,"Hunin a la hril ang chu." Ti nghutin ka kalsan ta daih a,kha pa laka tlawm tak anga lan ka duh aw zawng lo mai!

Àmpuii te in awmna a hla lo bawka amah pawh be hmasa lovin ka lut kawi a, kawngka ka kik chu chhawntu ka nei lawk lo, mahse vawi li vawi nga ka kik hnu chuan an rawn hawng ve ta hram, Àmpuii chuan hmel pawr fap in a rawn hawnga, a hmelah chuan a dam lo tih a hriat ngawih ngawih.

"Nang elaw! I lo kal ka lo ring miah lova." Kawngka min ken paha tiin ka luh rual chuan a khar lehnghal a, a dam lo ni si anu pawhin awmpui ve awm, amah chauhin a awm a, ţhutthlengsei pakhat chu a mutna tih hriat takin blanket leh lukham a lo awm bawk.

"Helen-i a lo kal lo em ni?" 

"Nizanah a rawn riak a." A tih chuan dawt a sawi leh sawi loh hriat tumin chiang zetin ka melh a, dawt a sawi lo chuan ka hria, a mutna ngaihah bawk chuan a mu leh a, tunah chuan a ţhu mu deuh.

"Ka lo hre miah lova, ka be tlang thei bawk si lo." Ka ti ve a, zawi zetin a nui hak a, chutah , "I lo kal ka ring miah lo tak tak, i piancham ka Lawmpui che." A ti sap a, a dam lo tih a hriat reng bawk nen han awm dan tur mai pawh ka hre lo.

"I ti lawmawm e, damdawi te i ei em? Damdawiin ah i la kal lo em ni?" 

"Zanin kan ngaichang leh ang a, ka la zia thei lo a nih chuan kan kal tawh ang." A ti a , a ţawng rik dan pawhin nidang a pha lo hle a, ţhiante hetianga dam lo pawh ka hre mai lo chu ka inthiam lo ang reng.

"Ei chak zawng te i nei em?" 

"Nei lo, ka dam hunah min zawt zawk rawh." A tih chuan Helen-i ka hrechhuak zawk, ani pawh khan hetianga min chhan a ching ţhin khawp mai.

Rei pawh awm lovin a mut hahdam duh ringin ka chhuahsan ta zawk a, awmpui rih chu duh viau mah ila Helen-i leh kha pa chung chang sawi lan phet a tum tih ka hrethiam a, chuvangin ka awm rei chak ta lo. Khapa nen a an sawi hmang kha a inang deuh chiah lehnghal.

An sawi danah chuan nizan lamah khan Àmpuii te in ah an inhmu a nih hmel! Tenawm hian!! Eng nge an tih lam ka ngaihtuah lo, phatsan ni ang mai a ka inngaihna chuan min vilh tlat! Kha pa chauh khan sawi se chu ka awih duh tawp lovang, mahse Àmpuii leh zelin a sawi bawk si! Chubakah nizanah Rosangzuali'n eng nge a tih ka hriatpui lo hrim hrim!

An pahnih a ka huatna chuba so bulh bulh ni mai hian ka hria! Vawiin lamah eng nge a tih ang tih pawh ka ngaihtuah buai duh ta lo! Min hrilh duh lo ni ah ka ngai hmiah, Àmpuii pawh kha ka zawt chuang lo, ani chuan Helen-i nen kan inbiak a ring sa pawh a ni mai thei.

Zanah chuan Dinpuia te zui turin ka inbual zawh veleh ka insiam a, ka insiam lai chuan ka room kawngka an rawn kik a, ka kekawr ka hak zawhin lut turin ka hrilh a, tu nge lo lut pawh en lovin ka kawr hak tur ka en san nghal daih, a hrawk a rawn then kharh takah chuan tu nge a nih ka hria! Mahse ka en duh chuang lo, a lakah hian ka thinrim na hi engtianga tihlan tur nge pawh ka hre lo! Thinrim ngam tur ka ni em pawh ka hre chuang lo!!

"Vawiin chu signal ka nei lo char char a." A ti phawt a, ka en duh chuang lo, a thusawwi ngai pawimawh lo zetin ka thil tih lai ka tih zawm mawlh mawlh a.

"Khaw'nge i kal dawn a?" A tih chuan chhan ka tum lo zet a, mahse amah ang mai ka nih loh nan ka chhang leh ta zawk! A chhan pawh a bul ţanna hi amah a ni tih hi hria se ka duh.

"Dinpuia te in ah." 

"Mahse...." a ti a, sawi zawm lo mah se a sawi tum ka hria, Dinpuia te ka zui chuan ka rui ngei ngei, chubakah ka piancham a lo ni kher bawk nen ka len chhuah a ring lo bawk ang.

"Hei vawiin kan kalna ah strawberry an lo nei a ka lo hawn che a, a ţhen hi chh ka ak pherh deuh." Tih paha a kawr ipte aţanga a rawn phawrh chu ka mit sir zauh a, hmu chiang lo mah ila a thu thulhin ka hria.

"Min lo nghak reng tawh sia ka'n kal phawt ang e!" tiin thildang a sawi leh hmain amah pawh en lovin room aţang chuan ka chhuahsan ta daih, ka sual mah mah em aw!! Tlem chuan ka inthiam lo ve deuh.

Ka nu'n min hmuh chuan ka len tur thu a sawi a, Helen-i lo kal kha a hre ngei awm sia ka leng leh daih tur chu mak a ti hmel ve deuh.

Dinpuia te zinga ka awm lai pawh chuan ka rilru a nuam chuang lo, amah vanga ka rilru na hi tih reh ka duh, ka rilru tur hrethiam ve se ka duh avanga kha tianga awm kha ka ni pakhat, a chhan pawh Zosanga chanchin engmah min hrilh ngai lova, mahse an lo kal thui tawh hmel hle si!

A rilru tih nat sak ve ka chak ta deuh tlat a, khatiang a ka tih khan a rilru a na dawn tih ka hre chiang! Ngaih pawimawh loh nih hi hrehawm a tih ber te zing a mi a ni, a bik takin keima lakah phei chuan. Ka chhuahsan dawn a a hrilh hai hmel ka ngaihtuah let phei chuan a nuam ka ti bik hauh lo!

Ka ţhiante zingah awm mah ila engmah tih chak ka nei lo, ka piancham pualin keiman ka show vek a, engmah ka in ve lo thung, ka rilru nuam thei lo miau hek!

Tlai takah chuan ka haw ve tho a, ka room chhung thim mup chu ka ti eng a, kawngka bul a strawberry sawm vel lo awm ngàt chu ka en a, a zahve vel chu an pherh deuh púr hlawm a, a ahna lama a tihpherh a ni mai thei a ni.

Class kal tura ka chhuah chuan Helen-i te in lam ka hawi a, an reh ţhap mai, Kha pa nen a an kal dun leh a nih loh chuan ka rual chuan a kal duh lo tawp ang, chuvangin amah ngaichang tawh lo in college lam ka pan a, ka va han phur lo teh reng em!

Mahse nileng chuan a hmel hmuh tur a awm lo, han biak hmasak êm chu tlawmah ka la ve bawk si! 

Zosanga hmel pawh ka hmu lo, anni pahnih hi an lo bunk dun reng te hi a ni lo maw! 

Ka haw hma in Àmpuii te in ah ka lut kawi leh a, dam lo tan a ei tur te chu ka leisak ve a, mahse ka rin ai ka hmu zàngkhai viau, nimin nen chuan a inthlau tawh khawp mai.

Helen-i leh Zosanga chanchin a sawi miah lo, mahse dik lo a awm, a awmdanah hian ka hrethiamin ka hria, hmeichhe mitmei hrethiam turin ka upa ve tawh, mahse a va mak dawn ve!

A hma a Heleni'n Àmpuii'n mi duh deuh a nei a tih kha ka la theihnghilh reng reng lo, a chhan pawh Àmpuii hian min hmelhriat tir ve vat ka rin avangin, mahse a cheziaah min haw lo tih a hriat nasa mai si, a hma zawng kha chuan a pangngai fu in ka hre sia, a dam lohna hian a tibuai deuh zawk em maw ni! 

Rei pawh ţhu lovin ka haw ta daih, anu a awm ve bawk si, min ngaihzawng chei tlat! Ka duh lo hle bawk!!

In ka thlen chuan inbual faiin khumah chuan ka mu pharh duai a, Helen-i hian eng nge a tih ang tih ringawt ka thluak hian a ngaihtuah! Kha pa nen a awm dun tur chuan ka ngaingam thlawt lo a ni ber.

Zanriah eikham chuan ka nu chuan ka len phei dawn leh dawn loh min zawt a, 'ka hre lo' tih chauhin ka chhang, mahse chawhmeh suah ve tura min tih avangin a chanchin hriat theih mai theih a sin tiin ka kal ta nge nge a.

An nula chuan min lo chhawn a, nidangah chuan tun anh hunah a haw daih ţhin tawh avangin mak ka ti deuh, ka hmelah chuan a hrethiam a ni mahna a pi leh pu te chu Helen-i pi a zual deuh avangin an lo kal daih a lo ni. 

Helen-i awmna ka zawh chuan a room lama a awm thu min hrilh a, vawiin a engmah a la ei loh thu a sawi zauh bawk.

A room lam chu ka pan ta nge nge a, a lo inkalh lo hlauh e!

Muang changin a khum ka pan a, a lo insin hlun mai, a lu chauh langin a lo mu a, a awmdan chu a dam lo a ang.

A pang ka deh sak a, a lo sa vur mai! Amah ka khawih chuan a rawn meng siar siar a, min hmuh chian hnu chuan a inlukhuh ta daih! A awm ve tho mai, min haw viau ang chu ....

Mahse engah mah ngai lo luiin khumah ka lawn ve a, a blanket delh beh tlat chu ka phelh sak a, lo ţang ve viau mah se ani dam lo tha te mai mai ka hneh ve chiang êm!!

A bulah ka mut ve chiah chuan a khawsik nasat zia ka hre chiah! Tal ve bawk tak mah se a tlun deuh bawk nen min hneh lo achha chu a ni e. A hnu deuhah chuan ka kuahbeh ang ang chuan a awm tawp a, ka awm zawna a thaw sa ham ham pawh ka hre thei! 

"Damdawi i ei tawh em?" Ka tih chuan min chhang lo Chiang a sin!

"Ka tihpalh." 

"Aih i tihpalh lo." Hei chu min chhang rang viau lawi a!

"Min nuih hlek suh!" A khawsik tlun deuh bawk si chu a sehchilh nawk nawk mai. Engtin nge maw ka nui tih a lo hriat ni.

"Ngaihzawng i nei dek dek a min theihnghilh ve tho." Ka ti tak na in min theihnghilh tih chu a dik chiah lo mai thei, mahse a hma ang kan ni tawh lo tih erawh ka chiang!

"Awihawm loh loh! Nangmah a nih kha!" A rawn ti ve zat.

"Ngaihzawng nei chu nangmah zawk i nih kha! Kei te chu i mamawh changa i ţhian chauh a lawm ka nih tawh." Ka tih chuan a haw teh a sin! Fiamthuin ka sawi tak na in ka chhungrilah chuan na zawk chu a awm tho.

"Daw heh! Nangmah i nih kha! Àmpuii pawhin a sawi vek! Keimah vangin chunu chuan a be ngam lo mai mai che a ti, min hrilh duh lo mah la ka hre ve vek." Ka kuah bet tlat bawk nen a rawn hawi chho chu kan inhmu chiang hle a, a rum ţha viau bawk, a mitmeng chu dull deuh mah se a lungawi lo thawkhat tih chu ka hria.

"Ka hre ve lo ve chutiang chu....." ka ti a, a thinrim hian a lawmawm ţhin ka ti zawk hlauh lehnghal!!

"Min hrilh duh loh avangin ka hre lo der a, mahse min hnawh bo i duh avangin min be duh lo hmasa leh daih si, awmdan tur pawh ka thiam lo." A ţawng tirlam chu a fiah viau na in a tawplam erawh hnukulh chungin a sawi bawk nen a ri che che, inhnaih hle lo ila chu ka hre kher lovang.

Nizan a ka tihdan khan ka rin ang ngeia a rilru a tina hle tih ka hriat chuan ka inthiam lo ngawih ngawih.

"Hnawh bo che ka tum reng reng lo, ka lungawi lo ve tho a lawm." A hnung chul hliau hliau paha ka tih chuan a insut ri hraih a.

"Àmpuii'n a dam loh avangin riahpuiah min sawm a, min thlah turin ka rawn hrilh dawn che a i lo leng daih a, phone i chhang duh bawk si lo, zingkarah Àmpuii nu khaw pawna kalpui angaih avangin present pawh ka hnutchhiah ţawk ţawk che a, lawmthu pawh min hrilh lo." A sawi pah chuan a chil a lem leh khalh ţhin a, a sawi duh sawi zo phawt se ka zawh duh ka zawt ve ang, tun aia hun ţha hi ka nei tawh lo mai thei.

"Ni sa hnuaiah kan awm a, an strawberry pawh a rukin ka lo hawn sak ve em em che a, en pawh i en duh lo, nuam lo chung chungin i piancham lawm turin ka lo kal ve a, biak pawh min be ţha peih lovin min chhuahsan leh daih bawk a, ka haw lutuk che." A ti tham chhel a, ka inchhir vawng vawng mai, tih ngaihna hre lo zetin a chhipah chuan ka fawp vang vang a, ka awmah chuan hmai a phum nghet tulh tulh bawk.

"Nizanah kha pa nen khan in inhmu a ni lawm ni?" 

"Tu kha pa maw?" 

"Zosanga kha mawle!!" A hming ka lam zawng chuan ka ner sawk mai.

"Sawi ţha ve mai ta che...."

"Chu i ţan zawk elaw!?"

"Eng ti zawngin maw?"

"Eng ti zawng pawhin i ţan vel vek tawh mai a ni maw?"

"Engvangin nge ka ţan ngawt ang?"

"I bialpa a nih avangin." 

Kan inchhang tawi thei hmek hmuk khawp mai.

"Ka bialpa a ni lo." A tih chuan ka awih lo hle.

"A ni lo tak tak." A rawn ti leh zat a.

"Ka awih i ring em?"

"I ţawng danah kha chuan i awih loh hmel."

"I ti dik a nih chu."

Ka tih chuan rawn hawi chhuak lehin chiang fahranin min melh a.

"Min ring lo a ni maw?" A ti leh khauh.

"Ka hre lo." Ka rilru dik takin ka chhang.

" A tawk a nih chu!" Tih pahin a inher ta hmak a, a ngaihzawng a nih loh thu a sawi khan ka thaw chu a veng ru huai, min hrilhfiah ang chu tih laiin lehlam a hawi tau leh daih ang lawi a.

"Tawk mai nang! Kan la sawi dawn chauh." Tiin ka kuah leh tho, a khawsik a la reh miau loh avangin a tal chhuak duh bik lo.

"Haw vang vang rawh." A tih chuan ka nui chhuak teuh hle, a ti tak tak lo tih erawh amah tlukin ka hrechiang.

"Àmpuii chuan ka hmeichhe duh chu engtiangin nge a sawi a?"

"Ka sawi peih lo!" Hmak mai a! A sawi peih lo a nih chuan a sawi peih lo a ni mai ni.

"Ok! Keiman kan sawi mai ang e." Ka tih hman chaun, "ka hre duh ka tia mi." A rawn ti leh zat, a ngeiiawm thiam ve thawkhat.

"Ka sawi duh miau sia lawm." 

"Hm!" A la rawn ri hram! A aiah nghet zetin ka kuah vak ringawt, a ninawm loh ve chiang e......

"Àmpuii sawi dan chu ka hre lo, a chhan pawh a bulah ka la sawi tlat lova, i bulah chiaha sawi chi a nia." Ka ti hmasa te te a, a ngawi kar tawh mai.

"High school kan kal lai khan hmeichhe pakhat duh em em mai ka nei a, ka duh tih ka inhriat chhuah chuan ka lo duh hle tawh, nikhat lek pawh a hmel hmu lova awm kha hrehawm ka ti ţhin a, mipa dang bula a nui ringawt te kha ka thik ţhin, a à ve sia, ngaihzawng neih nachang a hre bawk si lo, mipa ten an duh tih an lantir pawhin a hrethiam lo, mahse chung zawng zawng a mizia a tel te chu ka duh vek, a nihna leh a chhungkua lam ka ngaihtuah lo, amah tawp kha ka duh a, tunah phei chuan ka hmangaih tawh zawk hial a ni." Ka sawi chhung zawng khan a ţang ţung mai.

"Tunah pawh i la duh reng maw!?" Lehlam hawi reng chung chuan a ti a.

"Im....duh e, aman min duh ve leh ve loh pawh ka zawt ngam ve tawh bawk a kaa zep tawh kher lovang." Ka ti leh a, a ngawi vang vang a, "A nih chu mawle...." a rawn ti ve hram, inngaihbel nachang a hre leh tawp nang!!

"Bialpa a nei emaw ka tia, a lo neih leh tak si loh ah chuan ka bialnu ni turin ka sawm mai dawn?" Ka tih chuan a che lo reng reng, a hrethiam ţan tih ka hria, mahse a awmdan chuan ka nuih a ti za tlat.

"Maw...h!? Min chhang la?" Ka kuahna hmer ngheh salh pah chuan ka ti a.

"Chungte chu ka hre nang, nangma thu thu a lawm." A la pehhel ve ţang ţang mai.

"A nih chuan nang Helen Rosangzuali, hawrrawppuiin ka zawt a che , KEI I ŢHIANPA TLING LO TAK HI I BIALPA TURIN MIN DUH EM I INCHHIR LOVANG!"  

"A ho em mai!" A la ti hram.....a rawn hawi let ngam der lo lehnghal.

"Lo hawi teh!"

"Ti zahthlak e a!!" A tih chuan ka nui chhuak ţhelh a ni! Henu zet hi chu aw!!

Sirlam a hawi tlat chu a inrin hma in hmalam hawi turin ka kuai thawka, a chungah ka delh nghal zat bawk, a inring lawk bik lo hle ni ngei tur a ni a ţe ţhat a.

"Tikhan ho ila ti em?" A bek zawn ve ve a innem khalhin chiang fahranin ka en a, a khawsik dai ţan bawk nen a thlan hluam mai, a hmai a sen hlar bawk.

"Aih." A ti sap ringawt a, hmundang melh tur zawng ruai mah se ka awm hnaih em avangin a hawi sawn thei bik lo, a chalah chuan ka chal ka nghat a, min melh let ve ta kar a.

"Anih chuan ngun deuhin lo ngaihthla ang che, nang hi tun aţang chuan ka bialnu i ni! Mipa tumah i hnaih thiang tawh lo, a bik takin kha pa phei kha chu! Chuan kei lo chu tumah rin nei suh, keimah ang an ni vek lo a nia, a chiang em?" 

A mit khap fak fakin a bu ta nghat a, ka sawi awmzia a hre em ang chu maw, Àmpuii hi ring vak lo mah se pawi ka ti lo, kawm tawh lo se chu ka ti chuang lo.

"A nih nang pawhin hmeichhe dang i hnaih thei bik lovang." A ti ve ta nge nge a, ka hahdam huai mai. Min hnawl bik ka ring lo, mahse ka nervous viau thung si!

"A hma pawhin ka hnaih ngai reng reng hleinem, anmahni'n min lo hnaih zawk a lawm." Ka tih chuan a ner sak a, a hmui a hil bam mai bawk si nen a dam lo hmel chu ka lainat tlat.

"I ril a ţam em?"

"Ţam ve deuh."

"Zuk inhnawh puar phawt la i mu leh dawn nia, Taitei'n engmah i la ei lo a ti che a." ka tih chuan thuawih takin a bu ve mai a, Taitei hi an nula awmpui kha a ni, heta kan awm hma daih tawhin a awm tawh, nula senior a ni bawk.

A dam lo nihnih lai mai in a awm tir a, Àmpuii pawh a dam leh hman vek tawh. Amah vanga ngaiin a inthiam lo hle a, a vawikhat lo kalna ah chuan Zosanga pawh a rawn hruai nghe nghe.

Mahse an mitmei veng hauh lovin an awm chhung zawngin a kut ka chelh sak ngar a, a rukin min sik zauh zauh mah se he mi te pahnih hi chuan an mit ngeia an hmuh loh chuan eng thil nge an tih leh dawn pawh hriat loh, ka hmu kawi laklawh a, an hnaiha awm loh pawh pawi ka ti lo, mahse Àmpuii hi a ţhiannu ve ber a ni miau a, ka hmuhdan hrilh ve kher pawh ka tum chuang lo.

A dam ţhat leh hnu aţang chuan a hma ang chiahin kan inzui leh a, a hma a an lohna chu ŢHIAN nihna kha NGAIHZAWNG in a thlak tawh a, ka duhna ka tih lan Chuan kan inţhianţhatna a chhiat phah ka hlauh na te a reh a, tunah chuan kan inţhianna vawng nung zel turin eng lai pawhin kan inpui tawn reng tawh zawk a ni.

Tawp tuts 

*****🤍🐘*****