BLUEMING 🦋 CHAPTER-10 BY UNKNOWN BELLE

BLUEMING 🦋

BY UNKNOWN BELLE

CHAPTER 10

Malsawmpari POV:

Ka inkhawm bang chu mahni chauha kal e ti lo chuan ka nui vur vur reng a, min lo chik deuh awm se chu mawl hmel min ti ngawt ang.

In ka thlen ve leh a ka nui lut vur vur chu Zuitei 'n a lo hmu rang leh nasa. Nu in min hriat hlau deuh chuan pangngai taka awmin room ka pan a, a nihna takah chuan ka kawchhung hi an za mam mam hian ka hria, au vak mai te chu ka duh.

Ka room a ka lut chu rin ang ngeiin Zuitei a rawn lut ve nghal.

"Eng nge sawi rawh? Thil ţha chu a ni phawt ang a." ti sawk sawkin khumah chuan phur zetin a lawnkai a. Ka cousin mah ni se ka pianpui unau nen danglamna an awm lo, ka unaute mipa an ni bawk nen Zuitei hi ka laizawn ang tak takin ka en a, ani pawhin chutiang bawkin.

"Ih maw....." Ka ti fan duai a, ka khi vur reng mai. Ka hlim em a lawm.

"Sawi vat vat..." tiin a kiua inbeng kangin a lu a dawm a, a ke a ti che zeuh zeuh bawk.

"A inkhawm ve a." Ka ti puat a, ani lah chuan, "Chu ringawt chu maw? A va ho si ve." A lo ti zung zung. Vawiin lama kan inbiak dan ka la hrilh ve lo tak.

"Inkhawm satliah a ni hleinem." Ka ti phawt a, ani pawh hi inkhawm a taima lem lo bawk a a ţhianpa inkhawm khat zia a hre bik lo a nih dawn hi. Vawiin kan haw kawnga thil thleng ho chu ka hrilh zar zar a, ka sawi zawng te chuan ka la zak. A hunlai khan thinrim tho mah ila ka huaisenna ka sawm khawm nasa viau, a bulah khan ka zam thei lutuk tih a hriat ka duh lo hrim hrim.

Ka sawi zawh chuan, "VanLalfakzuala tak hi chu aw.... " a ti vawng vawng, eng ber nge a sawi tum pawh ka hrethiam chuang lo.

"Ti nge?" Inthlak pah chuan ka ti mai a, "A phu hlawl lo che." leh tawp ţhin a, ka nui hak. Chutiang te han sawi.

"Ni chiah." Ka ti fiamthu ve a. 

"Nang pawh hi i mak ngawt mai." A ti leh rih. Ka lo nuih ringawt. 

Ka inthlak zawh chuan khumah ka lawn kai ve a.

"I duh tih a hriat tawh i ring em? Zuata'n a hrilh ka ring deuh, a awmdan vel hi. I duh tih a hria ang a,chhaih buai che a duh vang a niang." A ti a, ka hnual rawih rawih thei. 

"Zuata chuan ka hrilh lo a ti i tih kha." Ka ti hap .

"Mahse dawt min hrilh ve thei tho a, Lalfakzuala hi ka ringhlel riau. Ama tawkah hian a hmu zo ang reng a, hmeichhe han buaipui hmasak tawp hi a la neih ngai ka ring lo reng reng." A ti zui barh barh. Sawi ve tur pawh ka hre lo.

"Vawiin te kha! Zuata khan min lo ţawng khalh lo se chu ka hau ve duh ngei ngei ang. Khatiang khan a thinchhe ngai der si lo." a ti leh a, kei pawhin khatiang kha ka beisei miah lo. Min haw viau tak takah ka ngai bawk. 

Be chak ve ţhin viau mah ila ka bul hnaia awm a duh loh ka rin avangin ka en liam fo a. Zuitei hnen aţangin a mize tam tak ka hre bawk. A mitmeng leh cheziaah min ngaina fahran lo tih chu ka hrethiam ve. Amah ka duhna avang hian midang aia min ngaihsak viau turin ka phut kher lo, ka duhna hi a hriat ka hlau hle bawk, mahse midang ang tala min en ve tur chuan ka beisei. Ka lo beisei sang deuh pawh a ni mai thei.

"A mizia hi ngeiawm viau ang hian hre mah ila a rilru a chhe chuang lo a nia. Tunah chuan ngaihzawng a nei lo tih kan hre tawh bawka ngaihngam deuh khan han awm teh." tiin Zuitei chuan min chhuahsan a. Nuin min koh avangin kei pawh ka chhuak zui nghal.

"Hei vawiin ah secondhand puanthan ka en a, Zuitei nen kan lo thlang tawh, i ţhui tur a ni tho a i duh ber kha i ta turin thlang ve rawh. I thlan loh ho dah let leh thuai a ngai dawn sia." a lo ti a. Nu hi ka nu chhang chiah a ni a, Zuitei hian unau dang a nei bik lo bawka a fanu ang chiahin min cheibawl a tih theih ang. 

"Hei hi ka duh." tiin paunthan hring dal raih chu ka thlang a, "I thlan ka ring reng a ni." a tih chuan ka nui ve tawp. Ka kawr ho reng reng hi rawng dal lam hlir hi an ni hlawm a, ka inhmeh leh hmeh loh lam aimah hian ka mit an lak ve hrim hrim avang hian ka lei leh nge nge ţhin

Puanthan ho a thleh fel lai chuan,"Sa kha i siamah ka dah tawp aw. A dang chu ka siam lawk tawh a. I duh leh zingah pawh i siam hman tho ang." a ti zui bawrh bawrh a, zana ka siam lawk tur sawiin room ah ka lut zui a, ka puanthan dah ţhain ka phone ka la nghal bawk.

Zanin a ka siam lawk chuan zingah ka mu rei thei deuh ang a, a nuam zawk ang. 

Ka eisiam hi tui an ti ve ţhin viau a, kei tak phei hi chuan ka ei chak lo ţhin lutuk. Ka siamna lama a rim ka hriat nasat ţhin vang te pawh a ni mai thei, ei hunah hian ka ei ţha peih tawh ngai lo.

Choka lama ka chet mawlh mawlh laiin Nuin a thawmhnaw a lo ţhiat mawlh mawlh a, amah vang hian puanthui ka zir ti ila a sual lovang. Ti hian amah hian a inkhawih hnawk ve a, a thiam loh chinah ka khawih sak leh ang lawp lawp a. Lehkha zir zel ka peih loh avangin hetia puanthui ka zir daih te hi ka tih tur dik tak a niin ka hria. Zuitei lah chuan keima puala dawr hawng ve turin min duhsak em em a, a theih ngawt bik ţhin si lo.

Ka chawhmeh siam vil pah chuan ka zai âl âl a, zai hi nuam ka ti, ka thiam zawng tak thil phei chu a ni lo. In a ka awm tawh hi chuan ka zai deuh reng mai ţhin. 

Ka siam zawh chuan bawlhlawh ho pawnah ka dah chhuak a. Mu tur chuan room ah ka lut zui nghal.

Zan dang ang bawkin mut hmunah phone ka khawih leh tê tê. Pa a boral hnuah Nu leh Zuitei'n room an intawm a, ti hian Zuitei room ni ţhin ah ka awm ta chawt.

Ka college kal ve lai khan hostel ah ka awm ţhin a, Zuitei te inah hian ka riak zauh zauh, puanthui ka zir ve lai pawhin PG hostelah tho ka awm. Nu hian an hnena awm ve turin min duh viau mah se ka thil zir ka zir zawh phawt hunah ka tih ve tlat avangin min nawr lui ngai lo. Pa a boral takah chuan an pahnih chauha awm chu a khawhar thlak an tih avangin ka awmpui ta a. A tirah kha chuan chawlh hmang ang chauh khan ka awm a, rei tak awmpui tumna ka nei lo. Mahse hnathawh tur ka hmu zui mai bawk nen ka awm ta reng. Kan khaw lamah pawh ka haw khat ta khawp mai.

VanLalfakzuala hi ka hriatna a rei tawh a tih theih ang. Zuitei te ina ka riah tumin a thlalak ka hmu a, kha ta ţang khan ka theihnghilh leh ta miah lo. College ka kal tan tirh ve lai vel kha a ni nghe nghe. An ţhian ho thlalak zingah khan ka mit a la em em a ni tawp.

Zuitei hnenah a chanchin ka zawt zui ta reng a, ani lah chuan ,"Duh suh." a ti ringawt a, min duh pui loh thu hi a sawi ve ziah. Mahse tun hnuah erawh ka tih mai mai loh zia a hre tawh bawk a, min sawi pui pawh a peih ta viau.

A tir lamah kha chuan ka ralkhat duh ve mai kha a ni a, a chanchin ka ngaihven tulh tulh a, ka hriat loh hlanin ka lo duh hle tawh. Ka duhna tihlan emaw a mit lak ka tum ngai lo, amah hnaiha ka awm thei hi ka lawm tawk ve em em mai ţhin.

Zuitei'n Zuata a hrilh tih ka hriata ka hlauhthawn zia kha pui tak a ni. Zuatan a lo hriat ve ngawr ngawr na aiin Fakpuia a hrilh ang tih mawlh kha ka hlau. Midang aia an inhnaih zia ka hre ve vek bawk si nen thlamuang lo reng reng khan ka awm a, a hrilh bik lo tih ka hriat takah chuan ka thaw huai thei.

Hmeichhe laka a tlak nat ve zia ka hria, ka hmu bawk. Tih theih nei si lovin ka thik ve em em zel a, Zuitei lah hian midang duh turin min tih phah fo bawk. Ngaihzawng chung changah hian mahni tawkah ka fimkhur em avangin ka bialpa ti a sawi theih ka la nei ngai lo. Ka hlauthawng ţhin a, ka inveng zo lo ang tih te ka hlau a, na takin min siam ang tih te ka hlau bawk. Ka dawihzep vang pawh a ni mai thei, mahse ka duh ve vang pawh ni lova ngaihzawng neih ve hrim hrim duhna avanga min sawmna lo pawm ve mai zel kha ka duh ngai lo. 

Ţhian ho group a Hminga'n thlalak a rawn dah tuar chu ka en diat diat a, Fakpuia nen a ka phone kan inchuh lai ka hmuh chuan lai zetin ka nui sak. Ka phone a en hman lo ka lawm zia kha pui tak a ni ringawt! 

En ngat se chu a thla ka lak sak ho kha a hmu vekin ka ring, ka zak viau bawk ang. Min hmuh laia ka lo nui vur vur pawh kha a thla ka lak ruk sak ve a ka hmanhmawh luata phe ta vek kha a ni a. Vanneih thlak lutukin ka lak sak thei hlauh a nih kha. Ka khup a tuam lai te chu mitthlain ka nui vur vur reng a, a bandana pawh ka su fai thlap tawh. Pek leh a ngaih dawn avangin inhmuhna hun kan nei leh dawn tihna!

Keimah hrim hrim hi che chhe chi, che fel lo chi ka nih tawh nak a laiin a hmuh lai hian ka zam luatah ka chet sual phah ziah lehnghal! Atam zawk hi chu amah vang tih a hriat loh vangin min la ngei hmel thei em em zui a!

Hman aţang tawhin engkimah hnu dawl ngai ka nih ziah avangin ka chhungte pawhin min ngaihtuah ţhin reng a ni. Naupang rual infiam rau rau zingah te khan ka inti pem zing thei lutuk ringawt.

Kan khuaah phei chuan ţhiante lui kal ka zui ve dawn pawhin ka chhungten an phal mai ngai lo, ka chetsual zin theih bik zia an hria a, ka intihnat palh an hlau ţhin. Ka ţhianten min dil sak bik a ngai ziah bawk. Min dil sak vek hi chuan an phal leh mai zel a, che phawr phawr chi ni bik lo mah ila ka chetsualna tawk ang hi chu ka tawng leh nge nge zel, vanduaina ka keng tel ni hial tein ka inhre ţhin.

Thlalak ka en kual lai chuan ka phone a rawn ri a, tudang ni lovin Ruatsanga a ni. Ani kan khawlam mi a ni a, ka ţhian ţha tak te zing a mi a ni bawk.

Phone ka lak a ka chhan hma chuan ,"I mu tawh em?" a rawn ti nghal a, ka mut deuh chiah thu leh ka la mutthilh loh thu chuan ka chhang thuai.

"Naktuk tlai i hman ang em? Ka nu hian i hming a lam reng mai a." a ti sup, hetia min sawm hi a inthlahrung ţhin tih ka hria, chuvangin lo hnial ka duh ngai lo.

Naktuk tlai chu Sunday tlai a ni dawn bawk a tiin a sawmna ka pawm ve mai a. "Biakfela awm ve se i pawi ti em?" a tih chuan, "I thu thu a ni mai lawm." ti a ka chhan chuan min lo hruai tur thu sawiin kan inbiakna chu kan titawp zui a. 

Ruatsanga hi a nu nen chauha khawsa an ni a, kan khua aţanga pem an ni nghe nghe. Kan ţhian hoah rau rau pawh kan inkawm nasa zual a, mahse tunah chuan an hnathawhna leh kan awmna in a zir lo bawk nen kan inhmu khât thin viau.

Department pakhat hnuaiah driver in a awm ve a, ama tawkah a taima ve bawk nen a nu nen chauh chuan an inchawm hneh ve khawp mai. Mahse kumin chho hi a nu a hrisel lo em em a,anu hian a ţhiante zingah pawh min ngaiin min thlahlel ve ţhin bawk nen leng turin min sawm fo.

Hun ka nei lo ve ţhin bawk si a, Ruatsanga pawh chutiang bawkin. Anu a nawm loh deuh zanah min rawn hruai zauh zauh. Ani a hnathawhna lamah an haw tlai ţhin si, a inpeih meuh hi chu zan a rei hman tawh ţhin. Mahse ka kal zen zen bik lo bawk a min sawmna ka hnar ngai lo. Anu a dam ţhat hi chuan chawhmeh te a zuar ve ţhin a, Ruatsanga hian awm mai mai turin duh viau mah se a duh bik ţhin si lo, chutiang lama thlem ve tur te chuan min duh ţhin.Damdawiin pan a hreh tung zel bawk si, Ka thusawi hi chu a awih ve mai ţhin bawk a, mahse dam deuha a inhriat hi chuan a lo thawk chhuak leh nge nge ţhin.

Zanlama ka chhuak tur hi Nu hian a rem ti lo ţhin viau a, mahse Ruatsanga'n an harsatna te ţha taka a hrilh chuan rem a ti ve ta chauh. Nula tan chuan zan reia chhuah hi thil mawi a ni chiah lo ve bawk em a, a rem ti mai lo pawh chu a awm lo hran lo.

Mîlo ka sut zan pawh kha an in a kal tum ka ni. Anmahni avangin hnatlanna aţangin ka haw nghe nghe a nih kha. Anu khawsik a san avangin an in a kal tur khan min lo bia a, anu chhuahsan a hreh bawk nen keimaha ka kal mai tur thu ka hrilh kha a nia, zan lam a ni bawk a lirthei vei vak a tam lo bawk nen Nu hnena ka kalna tur ka hrilh chuan a a phal ve mai a. Mahse Mîlo kha ka su palh ta hlauh a, ka tha a khur zui bawk nen ka inkhalh lui ngam ta ngang lo kha ka innawr haw leh ringawt. Bakah scooty kha ka tinung thei tawh lo ve hrim hrim bawk.

Ruatsanga hi mi inthlahrung ve tak mai a ni a, midang tihbuai hreh tak a ni. Chuvangin a ngamtlak ber kei min beisei ve ţawk ţawk ţhin a ni bawk. Anu hian min lo ngai ve bawk nen kei pawhin ka duhsak a, ka theih ang ang a puih ve ka duh ţhin bawk. 

Chu tih rualin a ţhianpa Biakfela erawh ka la nel lutuk lo. Ruatsanga hian helama a ţhian tia a sawi ve chhun a nih avangin ka be chhe chuang lo. 

Phone ka dah hma chuan ka tih fo ţhin angin Fakpuia WhatsApp dp ka en leh a, a thlak khat hmel khawp mai. A Bike a a chuang lai, hla ve deuh hlek aţanga lakna hi a hmang reng ţhin a, kar hmasa aţang khan Mîlo thlalak a rawn dah daih. Social media lam hi a khawih vak lo a nih ka ring, Zuitei'n a account min hmuh ve ah pawh engmah post a awm ngai lo.

Mîlo thlalak chu enin ka nui leh sak ţhin, kha mi zana thil thleng kha chu Mîlo tan vanduaina ni mah se theihnghilh phal chi pawh a ni lo. 

Mîlo kha a la duh lo ang tih ka hlauh zia kha! Nu hian allergy a nei a, chuvangin a ruk pawhin ka kawl ngam lo. Zuitei hnenah tak ngial pawh ka zep. Ka accident dan pawh dawt tlem ka phuah ringawt. Aman a sawi chhuah loh chuan midangin an hriat ka ring lo, ka sawi chhuak ngam dawn der si lo. 

Ka rin ai a duat daih lehnghal a, chu mi ringawt te chuan min ti lawm ve em em mai a ni.

Zanin a inkhawm chung chang kha ngawih liam tawp atan chuan a uiawm ka tih em avangin zak ru deuhin message ka va thawn hram.

"Ngaihdam i duh lo emaw ka tia." tih hi ka thawn a, a online loh avangin min rawn chhan pawh ka ring lo kha a nia. Mahse message a in deliever ve leh a rawn online nghal, chu mi ringawt te chu ka hlim pui ve em em a. Kan khuaa ka ţhian ten an star te chung chang an sawi a ka lo ngai ho thei ţhin lutuk te kha ka inthiam lo leh hnuhnawh. Tuna ka awmdan tak phei hi chu ka za cheng ti ila a dik ber ang.

Kan pahnih chatah chuan ka awm reng a, message a en hun ka chang a ni ber. Rei loah ka message a chhiar tih ka hmu ta, rang zet a phone hmet thimin rizai hmangin ka inluhkhuh leh rih! Ka kut te hi a vawt vek. Ka hmai a sa vek bawk si! Ka kut vawt chu ka hmaiah ka dep leh vang vang phawt a. 

Ka awmdan chu mi duh deuh, ni lo, duh deuh ringawt ni lo, duh lutuk lo nei ve tawh te chuan min hriatthiam vekin ka ring.

"Duh lo e." a rawn tih chuan ka ner nawk. Ngeiawm thiam lutuk mai a! Hetiang hian sawi mah se sawm lo ila a inkhawm ka ring lo hrim hrim 

"Ka awih i ring em? Ring suh." Ka va ti leh hram, chhan tawh loh ka tum nen, ka insum thei thlawt lo, hetiang a kan inbiak ve vawikhatna a ni si a, ka ngaihlu tlat.

"Mu rawh." Tih zawng hi a lo thawn leh a, awm hmunah chuan ka ner nawk. Ka chhang duh ta lo, ka duh tih avanga over taka chet chu a ţul ka ti lo.

Phone ka dah hnu pawh chuan ka khi vur vur reng mai, vawiin a min hauh hrep lai kha chuan vawikhatmah ka duh tawh lo ang ti khan rilru ka siam fel vek, khati vaka min thinrim khum kha ka la na ve em em bawk.

Mahse Pathian hian kawng min sial sak ve zel ni hian ka hria. Chuvangin amahah rinna ka nghat tawp a, engtin pawn lo awm ila, lawm taka pawm theih vek ka duh.

*

*

Zingah chuan chhung inkhawm kan nei a, kan pathum chauha awm kan ni bawk a, hun kan inhman chhawk zak zak. Mahni hun a chhuak zing duh khawp a, Zuitei lah chuan pakhatin a zawnin hun nei zel ila chawlh chhung a rei lo em mai te a ti vel mai mai a, kan nuih liam mai a, a duh dan ang chuan kan ti ngai lem hlei lova.

Inkhawm tura kan kal chuan an inkawt zawnah chuan ka hawi phei leh zeuh a, nidang ang bawkin an lo inkalh leh ţhap. An hma thei hi ka ti khawp mai.

Zuitei chuan Nu hriat loh tura min rawn hnaih hrut hrutin,"An mo i nih chuan tun angah chuan BiakIn i thleng ve zak zak tawh ang chu." a rawn ti su su a, ka nghawk zauh.

"Nang chu ni ila ka bem pawp tawh ang." a tih loh leh, "An monu tur hi ka hrilh lawk tawp mai dawn." a ti thul, a hahthlak ţhin. Ka dawih a tih em avang hian min sawi ţhaih a hrat a, a chang leh a nuih ka ti za leh em em a.

Ani hi chu mahni lu zo veh vawh hi a nia, khawi hmunah pawh awm se a ngaihtuah awm loh. Mi duh a neih chuan a hrilh tawp zel a, an duh let ve chuan a nih pui mai a, an duh ve loh a leh a ţhian kawm leh hmiah hmiah zel mai bawk a. A nun hi hahdam takin a hmang thuam riau ţhin.

Inkhawmna ah pawh hawi vak vak chi ni hek lo, ka mitin zawng ru viau mah se ka hmu leh chuang lo. Chawhma leh chawhnu inkar hi ţhalai ţawngtai inkhawm a awm ţhin avangin Biakin lamah kan awm tlang mai ţhin a, Fakpuia chu a tel ve leh dawn lo bawk nen ka hmu khât leh vek dawn a nih hi.

Rin lawk ang ngeiin a hmel hmuh tur a awm lo. Zuata'n min hmuh chuan ,"Nizan kha engtin nge i tih a?" a ti teh tawp a, ka hrethiam lo hle.

"Eng chu maw?" Ka ti a, Zuitei chu chawhnu inkhawm a tum loh avangin a haw leh ta hram. Ani pawh hi a tih luih hleih theih loh, ţawngtai inkhawmah pawh ka chelh thei ţawk a ni.

"Engtin nge i inkhawm tir theih? Ama duhthu a inkhawm a ni lo tih chu ka hre ve a nia." a ti a, ka lo ner nawng ringawt. Zuata hian Fakpuia ka duh ru hle tih a hre tawh tho nain min la sawipui ngai miah lo, ka zak ru viau bawk.

"Ka ţawngtaina Pathianin a chhang a niang." Ka ti mai a, sawi pui vak chu ka hreh tlat. Bakah ka zak, ka zak ngawih ngawih a ni mai.

A nui suk a, "Lo ţawngtai zel rawh, rilru a pe ve takin ka hria." a ti a, a kal sawn zui nghal daih. Kei erawh a thusawi tlem tê avang chuan ka lungphu a danglam nghal vek.

Eng nga ti nge ka zam theih bik em em le! Ka inthunun thei der ţhin si lo. Zuata thu sawi avang chuan ka beiseina tih san vak ka duh lo bawk, beisei ang a thlen lohin keimah bakin ka tuar dawn lo. Chuvangin beiseina ti sang lo ila, beisei ai a ţhat leh a lawmawm a, a ţhat loh leh ngaiawh a ni leh mai.

Chawhnu inkhawm ban veleh chuan in ah ka haw tlang a, Nu leh Zuitei ka kalna tur ka hrilh chuan haw har lo turin min chah zui luam.

Ka inthlak zawh hnuah Ruatsanga ka call a, a rawn kal mek thu sawiin rei kan inbe lo. 

Kan inphur chhuah hnu rei pawh kan la tlan lo tihah Fakpuia kan ep zawnga rawn tlan nen kan intawk a. Ka lo en kar, ani chuan min en zawk ringawt a, Bike khalh lai a ni a eng vak nge maw ka lo beisei ni. Khalh lo pawh ni se min hmelhriat loh en leh tho ang.

Hmanni a Biakfela ka bazar pui pawh khan dawrah kan inhmu hlawl a nih kha. A nelawm loh sa nen biak ngam pawh a ni ber bur lo.

Ruatsanga te in kan thlen chuan Biakfela leh anu an lo awm a, midang vak an awm kha ka ring lo hrim hrim. An in luah hi chhawnghnih a ni a, a chung zawkah a neitute an awm bawk. A neitute hi in an awm zen zen ngai lo tih Ruatsanga'n min hrilh tawh. Khawdanga hna nei an nih avangin helamah an awm tlem zawk a ni awm e.

Nu Zobiaki chuan min hmuh chuan a lo phul hlut a, ka kal khat avang chuan a lo vui der ve nasa mai. A hriselna chung chang te zawtin kan titi reng a, hmanni deuh khan zanthum chu damdawiin ah an riak ve bawk. Kha mi ka tlawh kha Fakpuia pi damdawiin a a luh ni kha a ni ve chiah bawk a, kha mi ni kha chu ka tum loh lutuk a hmu ka ni bawk nen mak ka ti ve thlawt.

Thingpui ka lum a, ka lum kher hi nu Zobiaki hian a in duh ţhin a, an in a ka len chuan keiman ka lum ve ziah. 

"Sawmte i ţhianpa hian bialnu a nei em?" a rawn ti su su a, an ţhian dun a pawna zial an zuk avangin kan ţawng an hriat phak ka ring lo.

"Ka hre lo reng reng, hetiang lam hi ka sawi pui ngai lova." Ka ti ve mai a. Ruatsanga nen hian inkawm ve ţhin e ti lo chuan ngaihzawng chung chang kan sawi dun ngai miah lo. Kan khuaa kan awm ho lai aţang tawha inkawm tawh kan ni a, ka ţhiante dang pawh a tu a mah hi ngaihzawng chung chang ka sawi pui ngai lo.

"Ti nge min zawh a?" Ka tih chuan, "A....eng dang vang chu a ni lo, a hna leh keimahah hian a buai ve em em a, a khua a har hmel ţhin riau hian ka hria a. In pahnih hi chuan rinhlelh ngaiin inkhawsa bawk si lo, ngaihzawng neiin a nun hi zalen deuh hlekin hmang ve se ka duh mawle....." A ti a, a sawi dik ve reng. 

Ruatsanga hi mi ţawngtam a ni lova, kan ţhian ho ah pawh a inthlahrung pawlah a ţang ziah. A nu nen chauha an khawsak avangin khawsak nuam zawk beiseia khawpui lama inbengbel pawh an ni reng a, ngaihzawng a neih ka hre ngai lo, kan khuaah pawh khan. Lehkha a zir loh hnu phei chuan a hnaah rinawm takin a thawk a, anu tan a hun a pe leh tawp a. Tunah phei chuan Biakfela a nei tawh zawk a, a zia tak la awm. Inkawmngeih viau mah ila hmeichhia ka nihnaah min hrilh hreh chin a nei dawn hrim a, Biakfela a nei tawh bawk a tlem chuan a hun hman dan pawh a zia ve deuh ka ring.

"Nakinah ka lo la sawi pui ve ang." ti a ka chhan chuan, "Lo sawi pui tak teh, nangmah ang hi ka duh a nia." a'n ti zui ngei a, a nui kar kar bawk. Ka lo nui ve tawp. Kei chuan ka ţhian ka tih tawh te chu ţhian bak ka pelh pui ngai lo.

Pawnah va chhuakin an ţhian dun a lo titi ve mawlh mawlh chu thingpui a in theih thu ka hrilh a, an rawn lut zui ve mai.

"Sawmpari thingpui sial chu a tui hle mai." Biakfela'n a tih chuan Nu Zobiaki'n, "Ka zirtir uluk a lawm." tiin min lo chhan khalh a, kan nui dar dar.

"Sawmtei a hman dawn si lova Biakfel nang tal chu chaw rawn ei rawh aw." a ti leh zat. Biakfela chuan lo pha ve vatin, "Nidangah kan ti zawk mak dawn em ni ang, zanriah ei pui tur mikhual kan nei a, ei chhuah daih a mawi si lo." tiin mawi hnai takin a hnar a. Biakfela hi keini ai chuan a kum a tam deuh ka ring, a ţawngkam a felfaiin a puitling khup bik zel.

Hun a kal zung zung mai bawk nen haw ka rawt ta a, Ruatsanga'n min thlah a tum chu Biakfela'n min thlah kawi theih tho tur thu a lo sawi ve a. Mahse keimah avanga kan veng daiha a rawn kal tur chu duh lovin Ruatsanga'n min hruai haw mai rawh se ka ti ve tlat a, min hnial lui ta bik lo.

Ruatsanga hi chu ka duh duha ka tih buai ve ngam khawp a ka nel a nia, Biakfela thung chu kan inhriatna a la rei lo ang reng si, a lakah inthlahrunna ang kha a la lian viau.

Hmanni a u tlereuh lei pui tura min sawm pawh ka hnial hreh avangin dawr aţangin ka chhuah phah ringawt kha a nia, kan dawr neitunu te nen an lo inhre bawk nen ka chhuah chu a lo phal ang reng bawk si, phur fahran lo khan ka zui ta kha a nia.

VanLalfakzuala te ka la hmu zui ta nghal a! A ţhutpui nu kha a bialnu hlui Elii a ni miah lo lehnghal, hepa hi chu a luck na te hi ka ngei tel vekin ka hria! Tumah hian lo duh ve miah lo mah se pawi ka ti lo ang.

"Biakfela rual khan i haw mai lo a." Ruatsanga'n a tih chuan ka ner nawk. A Bike ah chuan ka chuang zui bawk. An kawngka bul aţanga Nu Zobiaki'n ban min vai lauh lauh chu ka chhawn thuai bawk.

"Min phur peih vak lo a ni maw." Ka ti ve nghat.

"Chutiang lam pawh a ni lo, a hruai haw ve hrim hrim duh che a nih kha." tiin a tlan chhuak zui a, ka ner nawng ringawt. Ka chhang zui duh lo, ka ţawng leh chuan a mi chhanna ka hre ţha leh thei dawn chuang lo.

Haw kawngah pawh kan thang rei, a chhan pawh chak deuh hleka khalh hi ka thisen hian a hlau ka ti dawn nge, ka awmdan a dik thei ţhin lo. Chak deuha khalhah ka chuang ngam lo tih a hre bawk a kawng laka kan thang chhung tur nen chhutin ka len rei loh phah vek bawk.

Kan lên ve niah lah khan VanLalfakzuala khan ka hlauhna kha engah mah a ngai lo lehnghal, ka huat ruk zia kha pui tak a ni! Midang inphurh tir leh ringawt kha ka duh bik bawk si lo, bakah aman min phurh theih nan Zuitei'n ruahmanna te a siam ve a ni si a. Haw lam phei kha chu huphurh tawh tak kha ka ni ringawt. Mahse khatiang thil kha a thleng ta hlauh a, a hnulamah kha chuan a tlan muang ve ta deuh kha a nia. 

Min ngaihsak ve deuh ni a ka ngaihtuah ringawt pawh khan ka lo hlim ru ve em em, ka ngaihtuahna mai mai ni lo se tih pawh ka duhthusam a ni.

Kan kawt kan thlen chuan ka chhuk tharh , khua pawh a la eng viau. Ka kal mai tur chu min ko ding leh rih, "Eng nge ni? Hmanhmawh suh." Ka'n ti nghal ringawt a, ani pawh a nui ve tawp.

Ţawng par par chi hi a ni lo ve a, a thil tih tawh chin hi chu a uluk a, ţawngkam pawh a chhep sual lo ţhin viau bawk.

"Biakfela khan ngaihzawng i neih leh neih loh min zawt a." a ti a, amah chu ka en reng ringawt.

"Ka hre lo ka ti." a tih chuan thaw huaiin ka kutzungpui ka hmuh vat. He thil hi tih ţhanah ka nei laklawh a, ka lo tipir leh thawt thawt ţhin.

A nui leh mai a, chutah, "Nang eng nge i hmuh ve dan?" a ti a, mit ko a san zeuh bawk. Hetiang lam hi kan la sawi dun ngai lo bawk nen nuam ka ti lo viau mai.

"I ţhianpa angin." Ka ti tawp a, "Lo bem ta che se." a tih chuan ka dar ka chhin âk ringawt.

"I lo pawm ang nge hnawl ang." a ti leh a, ka chhan hma chuan, "Ila hrechiang lova, i hriatchian chuan i duh viau thei bawk." a tih zawm a. Kan ţawng ring hran lo, kawngpui a lo kal te pawhin an hriat phak ka ring lo.

"Midang zawn sak daih rawh.". ka ti fiamthu a, a ruk tak chuan a rilru thunun sak thei ila chu ka tih tir duh tak tak ang.

"A duh ve viau che a sin." 

"Kei chu min ngaihtuah suh, nangmah zawk kha ngaihtuah i ngai." Ka tih chuan a nui suk, ka sawi awmzia a hre ve chiang em mai. Chubakah midang duh ka neih vel chu sawi kher a ţul ka ti lo.

"Va lut phawt mai teh." hahthlak min tih hmel zeta a tih chuan ka nuih var var, hmeichhe lamah hi chuan hma a la chak lo ve hle dawn tih ka hre mai.

Tunlaiah chuan hmeichhia zawkin bul ţantu nih kan hreh tawh lova, ani pawh hian betu chu a neih ka ring tlat.

Lut hmasa duh lovin a tlan liam thleng chu ka thlir a, thaw huaiin in lam ka pan zui a. 

Mahse ka hawi kual paha ka thil hmuh avang chuan ka ding chut!

Lalfakzuala chuan an in chung aţangin min lo en reng a nih chu! Ka lungphu chu a sa dawt theiin ka hria! Ka hmuh ve leh chuan a lut zui daih lehnghal. Khatiang vel kha a nia buaithlak ka tih ţhin chu.

Midang te chu ni se ban a vai loh emaw a nuih ve suk chu ka ring, keimah ka nih chuan hmelhriat loh en leh hmiah. Alakah hian ka beiseina ka lo tisang leh vak ţhin. Bialnu nei tawh lo se tiin ka ţawngtai leh tawp mai zel.

A mizia, a sual hmel ka tih ang ang te leh min ngainat loh hmel ang ang hian ka la duh reng tho, ka át vang pawh a ni mahna, ka rilru puthmang ka thunun thei miau lo.

An in leh kan in inkar a mi te hian kawt zawl an nei zau a, an in hi a lianin thlanglam kawngpui pawhin an sa bawk. Kei ni erawh thlanglamah in hmun awl zau deuh a la awm thung.

An in chung aţang chuan kan kawt chu a lang chiang viau a, Ruatsanga nen kan inbiak lai kha a hmuh ka ring. Engtin nge a ngaih ang le? A lo ngai dik lo ang tih te chu ka hlau. 

Ka ngaihtuahna avang chuan ka ding leh chut, ka va hawi phei leh rih, ani lah hmuh tur a awm tawh der si lo. Ani te chuan ka awmdan a ngai pawimawh tak tak chuang hleinem tia inhnemin ka ngaihtuahna avanga lu thing mat matin in ah ka lut zui a, Zuitei lo zai al alna lam chu ka pan ta thuai.

Chokaah an pahnihin an lo awm a, hmeichhe pathum chauh awm e ti lo hian Zuitei nen hian kan zai deuh reng mai ţhin a, thawm reh tlawk tlawk hun hi a awm vak chuang lo.

Ka kalna chung chang chu report ka pe zung zung a. Chhunginkhawm hmangin chaw kan ei zui nghal.

Zuitei pawh inkhawm turin ka tur chhuak thei leh hram, Nu hi chuan ka kutah a dah tawp tawh. Ani chuan a tir beidawng ve deuh tawh a ni mai thei. Nula a ni ve a, mahni duhthlanna engkim ti thei a ni tawh a ti ţhin.

Kei pawhin chu chu ka ngaihdan a ni ve thova, a peih lo lutuk chung chu ka sawm lui ngai lo. Heng inkhawm zat zat ţhin te hi a inkhawm khat a te bawk hian sel kan hrat a. Ringtu kan nih a chhia leh ţha kan thliar thiam a nih chuan a ţha lam kawng zawh a inkhawm mai te hi kan tih tur niin ka hre ţhin. 

A zawng zawngah hi chuan hman vek a har ţhin a, amaherawh chu mahni tisa nawmna thlakhlelh avanga inkhawm loh fo mai te hi thil nih dan tur niin ka hre lo. Christian kan nihna te hi kan tana a ţangkai hunah chiah kan lan chhuah tir ni te hian ka hre ve ţhin, kan peih loh leh phur loh ber lai pawha kan lan chhuah tir hi a ţul zawkin ka hria a, chuvangin ka hman a nih phawt chuan Kohhran programme a tel ve zel ka tum ţhin.

Ţhalai tan phei chuan a pawimawh zual, kohhran in programme a ngah viau te hian kan tan a lo ţha zawk a. Beram ho kal darh tur Beram vengtuin a khalh khawm ţhin ang deuh hian, kohhran hian kan hriat loh hlan hian kawng tam taka kan rilru leh taksa penna tur lakah hian min veng ve a ni tih hi ka pawm dan a ni bawk.

Inkhawm kan ban chuan ka mit ka lên ru nasa viau a, mahse ka hmu lo. Ka hmuh ka ring lo ve hrim hrim.

"Hawi tawh lo mai teh i hmu chuang lo ang, a inkhawm dawn chuang lo." Zuitei'n a lo ti a, chang zui lo chuan ka haw pui ta daih.

 "Engtin nge hma ka han lak pui leh ang che aw...." a tih chuan ka nui hak, keiman ka khap miau avangin a insum tih ka hria. Ni lo se zawng tette aţanga a ţhian kawm ţhin a nia, min phawrh mualpho na a rei tawh ngawt ang.

"Ti khan a rukin lo hre ve la a tawk." Ka tih chuan ,"I zakzum bawk si,nangmah chuan i inhai kaw dawn lo phawt mai a, hmanzan a ka phone theihnghilh kha." tiin a nui zui kar kar a, kei pawh ka nui ve tawp.

Keiman ka va lam ngei theih nan a lo theihnghilh der ve ngei, ka nuih za bawk si, zak leh phur tho bawk si khan ka va lak sak ve ngei. A naupan chhiat thlak ţhin ngawt mai.

Ka thuamhnaw ka thlak lai chuan a bandana ka suk fai tawh chu ka hmu a, va pek leh vat vat chu ka chak. Midang hi an nih ve tho ka ring, ral khat aţang chauh pawh ni se hmuh hrim hrim hi ka chak ţhin.

Ka chhuah dawn chuan Nu ka hmuh mai loh avangin Zuitei ka kalna tur ka hrilh a, "Eh~~" tih paha min chhaih laih a tum chu a hlawhtling chiang lutuk, ka haw reuh tak tak.

Zam ru deuh chuan ka thaw dep dep a, ka kal pah chuan an in chung ka en hmasa a, a awm lo phawt.

An in kawt zawn ka thlen chuan an kawt pangpar khawina bula Mîlo nen an lo ţhu reng ka hmuh chuan ka ding chut! Ka inring hman lo bawk nen ka thinphu a rang nasa lutuk.

Ka awm dawmin thaw ka la te te a, muangchangin ka pan phei ta, ka thil sawi dan tur pawh ka ngaihtuah uluk viau bawk.

Ka thawmah chuan a rawn hawi chhuak a, min hmuh chu a ring bik lo tih a hmelah ka hre thei. A rawn ding chhuak thuai a, T shirt var banbul leh kekawr bul a ha a, bul lutuk a ni lo. A sam a lo met thar bawk nen ka hmu hmelţha lutuk.

"Eng nge?" a ti leh hmuk, a ţawngkam ve hrim hrim hi chu ngaiah ka nei ve tawh.

"Hei...." tih leh a bandana pek ka rual a, a lo ban ve mai bawk.

"Ka lawm e." tiin ka nui sak a, a buk tak nghutah chuan kal mai tumin ka inher a, mahse kal nghal mai chu ka ui rilru bawk si, a va hrehawm tak.

"Ka lawm tak tak a nia, muttui." Ka ti leh ringawt a, ka duh ruk viau rual hian a hriat hlauin ka inthup nasa viau lawi si.

Ka kal tawh tiha a thu rawn sawi avang chuan ka leh hawi rang lutuk.

"Maw?" Ka ti a, hre lo pawh ka ni lo, mak ka tih lutuk vang zawk.

"Vawiin tlai a mi kha? I bialpa a ni em?" fiah kelh kawlhin a rawn ti a.

Engvanga min zawt nge a nih le? Ani hian ka lakah rilru a pe ve tan tihna nge? A.....a ni leh lo ang, ka duh tih a hre tawh ang a min fiamkual chu a tum em maw ni le?

A zawhna pakhat vang ringawt pawhin ka rilru a va buai tak!!

End of chapter 10 

👀