BLUEMING 🦋
BY UNKNOWN BELLE
CHAPTER - 2
"A thi a mi?"
A Zawhte ken chu a zawi hniang a, dim takin a chul hliau hliau bawk.
"Thi lo, ih....amah vang hi a nia, ka su hman lo emaw ka tia, mahse....hei a ke hi a na a tia." a ti sap sap a, a sawi pah chuan zawhte ngawt chu a en a, ka hmuh danah chuan a thi a ang ka ti tho.
"Chuan....."
"I hria em chu ka hre lo a, Nu hi Zawhte a ngaina lo lutuk a, ka khawngaih ve tho bawk sia, bakah hei a la nung hlauh a,a ke a na bawk si." a ti duah a, Nu a tih hi Zuitei nu a ni ngei ang a,an nu te unau an ni takin ka hria, ran a ngaina lo tih chu ka hre ve, allergy a nei ni khan ka hria ka hriat sual loh chuan.
"Chuan....."
"Min lo kawl sak mai teh a, please in, nang pawn i khawngaih ve lo em ni?"
"Nangma sut a lawm."
"Ka tih luih a ni lo.... Khawngaihin zanin chu min lo kawl sak hram la, aw! Ka lo la leh vat ang." a ti a, ka inngaihtuah rauh rauh. Ran ngaina lo chu ka ni lo, mahse ngaihven hluak ţhin ka ni lo bawk. Ui chu pakhat kan vulh ve reng ţhin,mahse a thih hnu khan ka nuin an awm lohin a khawhar thlak ţhin em mai a tih avang khan kan vulh leh tawh lo.
A ngen ngawl em avang chuan "Khawi." tih pahin ka ban vut a, dim turin min lo hrilh zat. Inbiak zui reng kha hun khawhralna mai a ni. Haw vat ila ka duh tawh zawk. Hnatlang kan banna a rei tawh ang reng si.
A lawm thu min hrilhna pawh ngaithla lo chuan ka kal nghal daih, amah saw buaina hian a duh bik riau a ni mahna, a awmna apiangah buaina nei ziah ţhin a nih chu ka ringhlel tawh lo chiang. Chutiang a nih avang te chuan ka ngai thei lo, ka hnaivai a hmeichhia ho hi che fel tharh leh mahni inveng zo tak vek an ni a, amah ang hi ka la tawn ngai loh vang te hian ka hnaih chak lo ve bawk.
In chhung a ka luh chuan ka pa'n min lo la nghak a lo ni a, ka nu pawh an room aţangin a lo chhuak ve chiah bawk. Ka Zawhte ken an hmuh chuan ka ru haw emaw tiin min zawt chiang ta ngei a, chhan mai dan tur ka hre hauh lo.
Hmanlai chuan hmeichhia leh Zawhte chu ruk thiang an ti ţhin a, tun thleng pawhin a la ni tho. Mahse mi an changkang chho tawh a,zawhte pawh duat tak tak an tam tawh. Hei pawh hian neitu a nei ve ngei awm sia, ka chhungte ngaihah chuan khawlai zawhte hawn ve ringawt chan ka chang der mai.
"Kha a kê a nâ a nih kha." Ka nu'n a rawn ti thuai a, a lam a lek hnaih pah chuan ,"A hliam hi lo enkawl lawk teh a." Ka ti ve tawp a, ka nu hi a nulat lai chuan nurse a ni ţhin tih ka sawi tel hram teh ang. Tun thlengin kan chhungkaw nurse a la ni reng tho.
"Khawi lo la teh, i ken dan te kha i ti khawngaihthlak mang e aw...." Ka nu'n a tih lai chuan ka pa'n ka chhar dan min lo zawt ve leh a, ka ţhianten an su hliam palh a ka hawn thu ka sawi ve mai a, anni pawh chuan a neituten an lo ui viau theih thu an sawi chuan ka bu nghut ringawt.
Ka room lamah inbual turin ka lut zui a, phone ka ban leh rih. UDongi message a lo tam ngang mai. Ti hian ka thawn har hi chuan min hau ziah, mahse ka phone kher hman a duh ve leh ziah tho.
Thlalak ho chu a hlawmin ka thawn pawp pawp a, thildang en loin ka in bual zui ta nghal a. Vawiin lamah ni sa hnuaiah ka awm nasa bawk a mit a kham ve rûm thei mai.
Ka in bual zawh chuan mut tumin khum ka pan nghal a, phone ka en chuan Elii message lo awm chu ka en leh hmasa ber. A tira ka tui lem loh ang aiin kan inbe thei phian a, a chhan pawh amah zawk hian chhang lo thei lo a min biak a thiam riau, nula zei ve tawk tak chu a niin ka hria.
Zan tira min lo biakna chu ka chhang tawh lo law law, phone ka khawih ve hman chiah thu ka sawi tel ve hram a, ka hman har chhan min zawh chuan thil dang ka sawi daih a. Sawi dawn chuan zawhna a ngah chho mai mai sawi loh mai kha a ţha zawkin ka hria.
Chu tia thildang ka sawi daih chu a lungawi chiah lo niin ka hria,mahse a lungawi lohna chu a tilang nasa lem lo. A chhan pawh min tih tauh khum bar bar ngam turin a bialpa ka ni tlat lo. Ka bialnu a ni hek lo, he mi inkar hi sawifel vat tawh ila a ţha ang. Phone kaltlang ni lo a hmaichhana biak ka duh zawk avangin chutiang lam thuah chuan ka luh pui duh lo. Ani chhanna ka hre sa a, keimah ber hi ka inhrechiang lo niin ka hria, chu ti ni lo se heti chen inhel a ngai hauh lo ang.
Ka room kawngka lo kik an awm avangin ka tho leh a, ka hawn chuan ka nu chu zawhte pawm chungin a rawn lut nghal. Ka lo theihnghilh hman daih a lawm le!
"I Zawhte rawn hawn hi i ngaihsak lo em mai." tiin ka khumah chuan muangchangin a nghat a. Damdawi a a jection thu leh a hliam avanga a chauh thu a sawi a, naktuk lama vety doctor hnena kalpui turin min chah a, ka lo aw liam vel mai mai a ni. Naktukah chuan ka kawl tawh dawn chuang lova ngaihven viau pawh ka tum hran lo.
Kawngka ka kalh hnu chuan ka khuma zawhte chu ka en vung vung a, ka delh hlum daih te pawh a hlauhawm, chuvangin dawhkanah chuan ka dah sawn a. A hliam neih vang a ni mahna a che chang peih vak lo niin ka hria. A cher reuh em em mai lehnghal a.
Mutthilh tum chuan ka chhing vang vang a, ka mit men a nuam zan lo bawk a ka muhil ve mai niin ka hria. Mahse rei pawh ka muhil hmanin ka hre lo, Zawhte thawm chuan min ti harh a, a awmna lam ka en chuan a khur beuh beuh niin ka hria.
Chutia awm tir tawp mai chu ka khawngaih lo thei bik si lo, ani hi awm lo se chu tui takin ka muhil ngei awm sia, a bul pawh Malsawmpari vang vek a ni!
Va tho lehin light ka on a. Engtin nge ka tih ang tih ngaihtuahin ka en vung vung ringawt. Bektei'n tih dan a hriat deuh zawk takin a bula va dah mai te chu ka rilruk hman. Mahse tun ang zan rei tawh a va tih harh chu a ţha berin ka hre si lo.
A vawt a ti a nih ringin ka thawmhnaw lum dahna a mi ka kawrlum la la chhuak a, a hliam ka tih nat sak ka hlau ve tho bawk nen ka khawih thiam lo ang reng. Rem leh rem loin kawrlum chhungah chuan ka dah tawp a, khuma ka lukham pakhat chu lasawnin Zawhte zawk chu ka dah a, a hma ai chuan nuam a ti zawk dawn hrim hrim a ka hriat avangin ka mu ţha ve leh. Ka mut a chhuak bawk a niang rei loah ka muhil lehnghal mai a, Zawhte chuan thawm a neih leh neih loh pawh ka hre tawh lo.
Zing ka harh chuan ka hmai zawn maiah a lo awm avangin ka phu chhuak teuh ngei mai! Ka awm chu ka dawm vang vang ringawt.
A muhil nia ka hriat avangin ka thawm te chu ka dim ve a, bathroom aţanga ka lut chhuak vel ka thawm dim ve em em te chu lehlam zawng takin a nuihzatthlak ang reng.
Room atanga chhuak pheiin dawhkana chanchinbu chu ka ban a, tuilum in tur lain pawna ka pi hmun phiat bulah chuan ka va ţhu ve a.
Ti hian tuktin hnahthel a phiat fai a, a bulah chanchinbu chhiarin ngawi rengin ka va ţhu ve ţhin. Ka ngaithla lo chung pawh hian a ţawng melh melh reng zel tho.
Chaw kan ei laiin ka nu chuan Zawhte chungchang chu min zawt leh a, mahse ka ţhianten an kawl dawn tiin ka chhang ringawt. Malsawmpari lo lak hun chu ka nghak ve hmiah. Ka mawhphurhna a ni tlat lo.
Bektei'n bawnghnute a pe a, ka rin ai a lawm phian bawk. Mahse midang Zawhte anga sawiin ka pek vat tur thu tho ka hrilh.
Hna kal tura ka insiam laiin ka nu a rawn lut leh a, Zawhte chu a hliam vel a en sak leh a, a ke hnunglam chu a tuam sak ve ve avangin engtin chiah nge a hliam awmdan pawh ka hre lo, ka la zawt lo hrim hrim bawk.
"Vety ah chuan kal pui rawh aw." A tih lai chuan, "Nangman kalpui mai la." ka ti a, a inngaihtuah lai chu remchangah lain, "An rawn la ţep tawh tho a vawiin chauh chu lo buaipui mai la." Ka ti leh a.
A lainat viau a niang chu aw min pawh ve mai a, keimah tak hi chuan kalpui ka tum lo hrim hrim. Ka chhuah pui a nih chuan Malsawmpari hnenah ka va dah ang ka ti rilru kha a nia, ka nu'n a buaipui peih chuan a ţha lamah ngai phawt mai teh ang.
Ka hnathawhna hmun ka thlen chuan min lo thlen khalh ve ve tawh a lo ni. Traffic jam ah ka inhnawh rei deuh bawk a ni. Hnathawk hi pathum kan awm a, computer zirna a nih bakah computer leh part hrang hrang zawrhna a ni nghal a, a dawr hrim hrim hi a hawnna a rei ve tawh a, mahse computer zirna bik hi chu a hawnna a la rei lo thung.
Chhun lamah hi chuan mahni hna leh zirna avangin kan lun lutuk lo, chawhnu dar 2 hnulam aţang hian kan lûn zawk mah a. Chhun lamah chuan ka awl ang reng zawk mah. Mahse pathum chauh thawk kan awm a, a zirtir hrim hrim hi ka kutah a awm vek avangin zan lamah hian ka buai ve viau zel. Mahse ka hna thawh ber hi ka nuam tih zawng a nih avangin ninawmah ka ngai ngai lo thung.
Nimin kha sawrkar chawlh a nih avangin keini pawh kan chawl ve mai a, a bakah chuan Thawhtan aţanga Zirtawp thleng kan inhawng ţhin. Kartluana han buai ve hi chuan kartawp chawlh nawm ve zia hi a chiang bikin ka hria.
Zanlama awm tlang a ngaih ţhin avang hian tlailamah hian chhungte rualin chaw ka ei hman loh bakah zanlam inkhawm ka hman ngai meuh loh avang hian ka pa hian thawh reng kha a rem ti vak lo kha a ni a, mahse thildang buaipui ka neih loh avang leh ka tui ve miau avang khan min khap duh ta lo a.
Tlai lamah hian U Joela hian chaw pangngai kher a duh avang hian an in a mi a va la ţhin a, Vtea nen tullo kan ti viau nain amah berin a inhuam miau a, an in a hla lutuk lo bawk nen kan pathum ei tur a va la ziah a, kan hun siam remin kan in ei chhawk mai ţhin bawk.
Tlai lamah chuan kan lun chho leh ta viau reng a. Nidang ang bawkin ka kal kual zak zak a, ka ţhut leh ve leh ka movie en lai bawk ka en leh a, ka nu thuawih a ka tih ziah angin computer ka en hi chuan tarmit ka vuah ngei ngei a, ka mit a hahdam phah sawt em phei chu ka hre lo.
Ka zirlai zinga pakhat tih dan tur ka hrilh mawlh mawlh lai chuan ka phone dawhkan a mi chu a rawn ri a, ka silent theihnghilh tih ka hre chiah! Ka khawih lo nileng ve bawk a, a ri mang lo bawk nen hetiang a silent theihnghilh zauh ni hi chu ka nei ţhin.
Ka dawhkan lamah phei vutin min lo call tu ka en a, number hlang a nih avangin ka chhang lo. Pawimawh a nih a min lo call leh na ka hmu a nih chuan ka calll back leh mai ang tiin ka silent a, min kohna lamah bawk chuan ka let leh a, ka phone chu ka ngaihven zui tawh lo.
U Joela chaw ei tur la a rawn thlen hnu chuan min rawn ko a, mahse ka laklawh avangin ei hmasa turin ka ti ta mai. A neitu mah ni se amaha han ei hmasak bik kha a hreh ţhin a, Vtea nen an ei dun tlangpui.
An ei zawh a ka awmna lama a rawn chhoh chuan ka phone la in ka chhuk ve thung a. Vtea'n toilet a hman avangin a ţhutna ţhin piahah chuan ka ţhu a. Phone ka en chuan number ngai aţang khan missed call vawihnih lai a lo awm.
Ka call back a, mahse a ring ral ţhak. Vtea a lo thlen takah chuan chaw ka ei ve leh nghal a.
Chaw eikhamah rei vak lo meizial zuin pawnah ka chhuak a, phone bawk a rawn rik chuan number ngai bawk a nih avangin ka chhang ta vat. Number tawpin lang mah se a thu rawn sawi avang chuan tu nge a nih ka hai lo.
Engmah ka sawi hma chuan, "Keimah ka nia, ka la rawn buaipui hman lo a a pawi e...." a rawn tih chuan a la la lo tih ka hre mai. Ka lungawi vak lo bawl chu ka rum nghat a, ka chhang lo.
"Zanin chiah lo kawl leh lawk mai la, please in. Vawiin ah scooty kha workshop ah kan luh pui a, Zuitei a khua a sik bawk sia, ka pi a nuam sam lo ve bawk nen ka buai ve rih lutuk a." tiin a rawn insawi fiah nghal vek a. Zuitei hi a nu nen chauh an khawsa a, nikum lawkah apa hi a boral a ni.
"Hello! I ngaithla em?" ka chhan lawk loh avanga a rawn tih chuan ka thaw hawk a, buaina ralliani hi a ni ringawt.
"I hman ve leh i sutnaah dah let leh ang che." tiin kan inbiakna chu ka titawp ta daih. Ti khan kan sawi fel chu a ni mai.
Zawhte dam lo kawl chu a phurawm viau loh bawk.
Kan haw dawn meuh chuan dar 9 a lo ri leh dawn tawh. Dar 8 thleng kan hawng a, hnathawk pakhat lak belh se chu dar 9 thleng hawn a tum thu a sawi a, mahse lak belh mai chu a la tum lo niin ka hria.
Khawiah mah peng kawi tawh lovin in lam ka pan nghal a. Zanlam boruak nen kawng a free tawh bawk a, chak lutuk lo chuan ka tlan a. Hetiang hi nuam ka tih ţhin avangin a chang chuan veng ţhenkhat lan chiannaah te ka ding leh vung vung ţhin a. In a haw ka chak lo pawh a ni hran lo, mahni a boruak nuam tak han chen veng veng hi a nuam dangdai riau.
In ka thlen chuan an zavaiin an lo la meng a, ka room lam pan a ka kal chu ka nu'n min rawn zui lut ve a. Ka khumah bawk chuan Zawhte chu a lo awm leh hle hle tawh.
"A ke hnunglam pakhat hi a ruh a ulh a, doctor in a la hmang thei har deuh ang a tia, a hliam vela hnawih tur damdawi chu i dawhkanah hian ka dah." a ti zung zung a, ka Zawhte bik ang maia a cheibawl chu ka awm thiam lo dawn dawn mai.
"I mut hmain i pi káwm la aw." tiin a chhuak zui a, ka nu hian a sawi fo ţhin reng a, ka pi nen hian an inkawm ngeih hle nain keimah kher hi a hranpa a a bula awm tam turin min hrilh ţhin. Min duat bik avang hian min ngaina ve a, chubakah tar an ni ve tawh a, khawhar taka hun a hman loh nan kawm tam turin min chah fo. In hi ka awm tam hman lo em mai a, ka awm chhunah erawh room lama inkhung bo daih aiin ka pi bula hun ka hman ve hi a tam zawkin ka hria.
Tunlai khua a lum ţhin bawk nen inbual fai vekin chhuak ţhin mah ila ka haw meuh hi chuan zan lam pawh ni mah se a lum lo chuang lo, ka inbual leh nge nge zel.
Ka inthlak zawha ka chhuak tur chu Zawhte chu ka en ve leh phawt a, a muhil niin ka hria.
Ka pi room a ka luh chuan Bible a lo chhiar a, min hmuh takah chuan Vawiin lam hun hman dan te inzawtin a khumah chuan ka mu duai a, ka nu leh pate aiin ka pi bulah hian ka riak hnem zawk a, tun thleng hian a bula ka riah ţhin laia ka awm dan a la sawi ţhin.
A Bible chhiar lai chuan ka phone ka khawih mai mai a, Elii min lo biakna chu ka reply leh hmasa ber. A dp a thlak tih ka hmu, mahse en chian ka tum chuang lo.
A online lo bawk a, lehkha a zir a nih loh chuan a la mut chu ka ring lo, zantin mut hmain kan in muttui ve ngei ngei tlat a, chuvangin a la mutthilh chu ka ring lo.
Status ka en chuan Elii status bawk chuan ka mit a la, mipa nen a an thlalak a ni a, kan inbiak aţanga mipa nen a an thlalak a status vawikhatna a nih avangin rilruah eng emaw a awm lo thei lo. Ka thik lo ka tih chuan mahni ka inbum mai a ni ang, mahse ka rilru puthmang erawh tih lan a ţulna ka hre lo thung.
An thlalak chu ka en vung vung a, an college a mi ni ngei tur a ni, library a an ţhut dunna a ni. Ka thik na rilru chu namnul luiin midang status ka en kual a, mahse anmahni bawk khan ka rilru an luah tlat.
Ka bialnu a ni lo a, lo lungawi loh pui turin dikna ka nei lo.
Ka online lai chuan a message a rawn thleng leh a, en pawh ka phur tehchiam lo. Mahse ka awmdan danglam hi a hriat ka duh loh miau avangin pangngai taka awm ka tum.
An test hun a hnaih leh tawh avanga zan men rei a duh thu a rawn sawi a, chhungrilah thil dang inmûng tlat awm mah se tha takin, pangngai takin ka chhang ve zel. A status a mi chu tu nge a nih zawh pawh ka tum chuang lo.
'Zir leh tawh rawh,ka tibuai rei lutuk ang che.' tih ka thawn hnu chuan ka pi pawh ka mangtha a, phone lamin ka rilru a la peng nasa deuh a a thusawi ho pawh ka ngaithla mang lo.
Ka mut dawn chuan Bektei chuan lehkha a la chhiar melh melh a, ani hi chu lehkha zir peih ngang a ni a, a tuichilh a nih ber chu. Thil dang hian a tibuai pha vak lo.
Khuma Zawhte lo tawlh hret hret ka hmuh chuan ka lainat ang reng. A sutunu lahin a rawn ngaihven lo ropui mai si a, ka nu'n diaper a hren tir a, naktukah aman en leh mai rawh se.
A mutna tur bik aţanga a tawlh sawn deuh avangin ka dah lêt leh a, dawhkana a ei tur chu pack khat khehin ka pe a, ka kut a mi a ei zawh a piangin a dang a beisei tih hriat zetin min rawn en leh ţhin a. Bawm khat chu a ei zo ta ţhak.
Nizan lama a mutnaah bawk a mu leh a, a ke a hmang thei rih lo bawk a ka lukham bulah chuan a bawk ve hle hle.
Kan ţhian ho group ah chuan Zuitei dam lo kan chungchang an lo rel a, Zuitei chuan kan ngai khawp a nih loh thu a lo sawi ve bawk. Hmeichhe ho zingah pawh a pachang ber a ni bawk a, dam loh avanga inkan chu a duh loh hmel khawp mai.
A hnu deuhah chuan anu pawh a dam loh thu a sawi tel a, naktuk lam a leng tur chuan min sawm leh hlawm ang lawi a, mahse a kal thei chu a tlem zawk anni dawn tih a hre sa tho.
'I scooty chu eng nge a an?' Ka va tih chuan midang hoin engtin nge a awm an rawn ti sap sap a, kar thar lamah chauh a lak theih dawn tih a sawi lai chuan midangin a thar lei tawh mai turin an lo ti ve bawk.
Bike lei a duh thu leh a scooty chu a tih ral phal rih loh thu a sawi chuan aw an lo pawh ve tliar tliar. Apa in a leisak ve a ni si a, a roh viau pawh chu a demawm lem loh.
********
Nidang aiin chhunah chuan ka chawl har a, ka ril a tam loh vang a ni ber ang chu. Chawhnu her tawhah Chhun thil ka ei ve chauh a, ka chawlh lai chuan U Hruaii kan tih mai, nuthlawi hmelţha ving veng mai hi a rawn lut a. Vtea nen hian an inhmelhriat avangin a tlangnel ve em em a. Chawhnu lama rawn zir ve ţhin zing a mi a ni nghe nghe.
A ţawngkam leh a cheziaah min haw lo tih chu ka hre thiam ve tho. Keimah chauh ni loin ka ţhiante pahnih pawh hian an hrethiam ve tho tih a lo thlen a piang a min koh kher ţhin danah ka hrethiam ve mai.
A seat lama lut chho ta mai lo chuan U Joela nen a kan ţhutna lamah chuan a rawn ţhu ve a, Vtea erawh ka chawlh avangin ka seat ah a han ţhu thung a. A rawn dah chhuah vat loh danah a buai deuh pawh a ni mai thei.
U Joela chuan nimin lama a lo kal loh chhan a zawh chuan thui fe hian a chhang a, a ţawng duh ve hrim hrim bawk a, khawi hmunah pawh a tlangnel thei zelin a nia ka rin ni. U Joela nen hian an inrual ni khan ka hria. Kei ai kum ngain a upa zawk tihna a nih chu. Fanu kum li mi a nei tawh a, a pasal nen inthenin tunah hian apa ai school pakhatah a thawk mek tih ka hre bawk. Chu'ng zawng zawng chu mit leh beng ka neih ve miau avangin ka zawh ni miah loin ka hre ve vek.
Ka thil eina ka dah fel laiin Vtea pawh a rawn chhuk ve a, khilam leh helam daidanna hi darthlalang mah ni se helam atangin a chhung a hmuh ve theih loh a, khilam atang erawh helam a rawn hmuh theih vek thung.
"Han chho ve thung rawh u,helamah chuan inbengchheng rei ţhin si." Vtea'n a rawn tih chuan U Hruaii chu a nui har har a, a hnu lawkah chuan a ding ta tharh a. Thau ni si loin a khal em em mai a, mipa mit la tur chi tak pian a nei ti ila a dik ang. Inchei a thiamin a hmel hmuh a nuam thei hle bawk, mahse ka ngaizawng ta tihna a ni lo thung.
"Fakpui chho ang hmiang.....i puar tawh chuan ka hria." a tih pah chuan a nui var var a, meizial la zuk leh duh viau mah ila Vtea ber a rawn chhuk tawh bawk si.
"Chho la." Ka ti a, a chho zui ve mai a. Ka zui ve nghal chu ka ţhiante pahnih chuan nghal fe hian,"Hip bet nalh thei bik ve." an lo ti zauh a, ka nui ve suk ringawt. Mipa na na na chu hmeichhe dang ka neih leh neih loh lam a lang lo, a nalh nalh kan in hmehbel sak tawp tawp zel mai chu a nia.
Nidang ang bawkin ka dawhkan hnaih berah chuan a ţhu leh chat a. Vtea'n,"Certificate a duh vang bakin a rawn in admit hleinem, awm lo la chu a rawn kal ngai lo ang." A tih kha a tirah awih chiah lo mah ila ka hrechiang chho tulh tulh mai chu a nih hi.
A chhan pawh thiam loh tak tak a nei ngai lo, min zawh ve ho lah hi awl te te a ni ţhin si a. Midang mitmei veng lo phei se chu ka bulah hian a lo ţhut duh mai a nia ka rin ni. Mahni lu zo vehvawh a ni bawk a a duhnaah chuan a huaisen khawp ang chu.
A hun a zawh hnuah ka ţhutna bulah lo kalin midang hriat tham si lohin min bia a, min hnaih ang reng bawk nen a rimtui hman rim chu ka hre rang ngang mai.
"I induh riau a ka hriat?" a rawn ti thawr mai a, nidang a ka awmdan nen danglam vaka ka hriat loh avangin,"I hresual a nih chu." Ka ti ve hmiah.
"He mi movie hi ka en tawh, action tel naah chuan hmuhnawm ka tih pawl tak a ni." tiin ka movie en lai chu a rawn sawi zui nual a, ka dar a rawn vuan kher chu tul ka ti lo viau,mahse han dahthlak sak chu ka tum bik chuang lo.
"Naktuk chawlh a ni sia eng nge i tih dawn?"
"In ah ka awm ang." ka ti vat a, zirlai dang an awm ve bawk nen chhuak vat se ka ti rilru hle.
"Kan inah pawh ilo la leng lo." vui aw deuha a tih sap chuan,"Vtea te inah pawh ka la kal chuang hleinem." ka ti liam mai a. Ka dar a hmer salh danah ka chhanna chuan a ti lungawi chiah lo tih ka hre mai. Tih lungawi erawh ka hna a ni chuang lo.
Midangin min auh takah chuan ka tho vut a, U Hruaii pawh chu a chhuak thla ve ta nge nge a, school a thawk a ni ve bawk si a, heta a rawn kal tawh chuan a awm rei ţhin ang reng si , a zirlai te a ngai pawimawh vak lo zawk nge ni.
Phone ah hian min rawn biak zauh chang a nei a, mahse bia tihah khan report a rawn pe a ni ber. A lo kal dawn loh thu leh a chhan a rawn sawi a, biak zui vak ka peih loh avang hian ka aw e liam mai zel.
Zirtawp zan a ni bawk a ka haw kawngah chuan ţhalai leng chhuak ka tawk nual. Tlangval rual kara nula lo awm ve tawk pawh an awm nuk.
Mi hran hran ka tlan pelh zingah chuan Malsawmpari ang deuh ka hmu, mipa pahnih a lo dinpuiin ka hria,ka en zui lem lo. Amah lo ni tak tak pawh ni se thil mak vak a ni lo. Hetiang a a chhuak ţhin hi Zuitei chuan a hriatpui ngei ang a, anu hian a hre ve lo nge ni an dah zalen ka lo ti ang reng khawp mai.
Mu tur a ka in peih meuh chuan a lo tlai duai tawh. Zawhte lah chuan min hre ve ni awm takin khuma ka ţhut thlak rual chuan min lo hnaih a tum ve a,a diaper pawh a thar an lo hak tir ve leh diam tawh.
Amah hliam tu lah chu a leng chhuak mai mai a, a rawn ngaihven tak tak hauh lo. A khawsa zia chu ka tei theih loh zawng tak a ni. Ka kawl hreh viau vang lam pawh ni lovin heti takin a hliam naa, a rawn ngaihven lo lutuk chu a mi pangngai zia lo hi ka lo ti khawp mai.
Elii nen kan in biak laiin number ka save loh aţangin message a rawn thleng a, Zawhte chung chang a rawn sawi avangin Malsawmpari bawk kha a nih ka ring.
'Ka lo kallaiin i awm lova, i chhungte ka zawt ngam si lo a.' a rawn ti a, emoji lungngai hmel deuh a rawn thawn tel bawk.
Chhan ka tum lo, a rawn lak loh miau chuan Nu Mapuii allergy a nei tih hre reng a va dah luih kha ka duh dan a ni chuang lo.
'Naktukah chuan min kalpui tak tak rawh aw.' Hei chu Elii ve thung. A kawr lak puiah min sawm a, ka aw ve mai. Naktuk Saturday a ni bawk a zanlam men pawh rilru a thawl halh mai.
'Min kalpui chuan ei tur tui deuh kaa treat ang che.' a rawn ti leh a, emoji nui vak a rawn dah danah a thusawi ka pawm dawn lo tih a hre lawk tih a hriat.
Elii nen chuan kan chhuah hun darzat tur inhrilhin kan in mangtha a, mutthilh tuma phone ka dah dawn tihah message a rawn thleng leh, Malsawmpari leh bawk.
'A ke kha eng nge a an?' tih hi a lo thawn a, 'A dam tawh.' tih zawng sawiin ka dah ta daih.
Zawhte lam hawia ka inher chuan ka lukham si châtin a lo awm tawh a, a lu ka khawih sak chuan nuam ti hmel takin a rawn nawr let ve a, a rawng hi a nalh reuh phian bawk nen a neitu chuan a ui ve ngawtin ka ring.
Zingah pawh chuan ka tho hma lo khawp mai, Zawhte pawhin a ke na lam a hnuk ngam deuh tawh bawk a a tawlh sawn ve hrut hrut tawh. Ka thawh hnuah chuan ka nu'n a rawn ngaihven ve leh a, ei tur te a pe a, a duat phian.
"A hming phuah la, ti hian nei daih mai ila ni mai lawm." A ti a, neih daih lam ka ngaihtuah lo bawk a a hming phuah phei chu tumna ka lo nei lo hrim hrim.
Ka kawl reng dawn a ka hriat loh avang chuan, "Ka hre lo e." ti chauhin ka chhang.
"I ţhiante pawh pek kher an ngai tawh hleinem, ti hian kan enkawl a, kan nei daih anga, a hming tur pawh i phuah vat loh chuan ka phuah khalh ang che." a ti fiamthu a.
"Nakinah kan la sawi ţha dawn nia." Ka ti ta ringawt.
Chawhma chhung chu in kawtah ka pi pangpar khawina tur ka siam sak a, ka nu'n Zawhte room a awm tir reng chu a khawngaihthlak a tih avangin ka bulah a rawn dah a, ka pi lah chuan ka ruk haw ah ngaiin min chhaih nan tak a hmang zui a, ka hawn ve ngawt dan erawh ka hrilh ve ta chuang lo.
Khua a lum bawk nen kan siam zawh meuh chuan thlan a tla nasa hman ngei mai. Chhun thil ei hmain ka inbual leh phawt a, ka Zawhte lah chu ka pawm kual ve zel a ngai a, min ti chhangchhe ang reng.
Chawhnu lama chhuahna tur ka nei tih ka sawi chuan ka nu'n a chawhmeh lei hmaih te min thawn nghal hram a. A ti kher kher ve a, kan vengah hian bazar awm ve tho mah se thil ţhenkhat hi chu a duhna bik te a mi a lei ngat ngat mai ţhin.
Ka chhuah hma chuan Elii ka be hmasa leh a, ani pawh a lo inpeih tawh. Ka buai ve ţhin tih a hria a, ka hunawl a ka chhuahpui theih hi chuan a lawm ve ţhin hle a, kan la chhuak dun tam hran lo bawk a, ka chhungte pawhin an hre lo.
Bike ti nung a ka tlan chhuak tur chiah chu Malsawmpari a rawn lang hlawl, a rawn tlan a ni zawk mah!
Appron a ha a, a sam a tawn vah bawk. Min hmuh rual chuan min pan vat a. Chawhma chhung zawng pawh hun awm laia ka chhuah dawn ve leh a a lo lang chu ka lawm vak lo.
"I chhuak dawn elaw?"
"Aw."
"Lo en ka tum a." A tih chuan ka rum nghut. Lak chu sawi loh en a tum chauh mai chu a ni sia!
"Insuk tur ka ngah sia ka lo phei hma hman lo a." a ti leh a, ni a sa bawk a a ner nang mai bawk.
"Lo ngaihven duh tawh suh." ka tih chuan a meng zau awk chu ka hmu hman.
"Ti nge? A thi ta em ni?" a ti hliai a, intham lo hmel a pu bawk.
"Thi lo, kan nei dawn." Ti ve hmiahin ka tlan chhuak zui ta daih. Side glass aţangin ka tlanna lam chu a rawn en reng tih ka hmu thei. A fimkhur loh vang chu ti dawt ngam lo mah ila a chet phung ngaihtuahin a awm lo chuang lo, amah avangin na tuar an awm a, ran mah ni se na hre thei tho an ni. A ngai pawimawh lo riaua ka hriat avang chuan ka haw riau mai bawk.
Elii te in kawtah dingin ka call a, rei loah a rawn chhuak nghal. A chhelo leh pek.
A dawr sawinaa kan luh chuan a kal ţhanna tih a hriat kher mai. A tlangnel hle a, ka hming a sawi laiin hnathawk zinga pakhat chuan min hriat thu a lo sawi teh nawlh a, customer an neih loh lai a niang a awm chhun hmeichhe pali te hi a thawk lai vek an niin ka hria.
Elii'n min inhmelhriat tir chuan an pali chuan a thawk te vek an lo ni tak tak a, a neitu ber a awm rih lo thung.
Elii trial room a a luh hlanin in tur te min lo pe a, Elii kawplai ka niah ngaiin Elii hriat phak si chuan an rel chiam chiam a, an fiamthu ah chuan kei pawh ka nui ka nui ve mai. An ţawngduh tlang bawka an khua a har vakin ka ring lo.
An zinga pakhat min lo hre tu khan, "Ka ţhiante i thawhna ah khan computer an rawn zir ve a lawm, an sawi nasa thei lutuk che." a rawn ti a, zirlai kan ngah ve viau a, a tu a mah a mimal a lo hriat chian ka nei mang lo, ka hriat te erawh kuttang thliah tham lek an ni.
"A nih chu mawle." Ka ti ve mai a, sawi zui tur a vang ve bawk a ni.
"Elii chuan a ven hneh hle che a ngai ang." a tih leh chuan an nui dar dar a, pakhatin,"Elii pawh ven ve tho a ngai ang." A lo ti ve leh a, chutiang thu ringawt chu an sawi zuia an nui leh vak vak bawk a, nileng a an bula awm chu ka zo kherin ka ring lo.
Elii a rawn chhuah takah chuan kan lo en ţhap a, min en lai chuan lâi zetin a nui heu mai, chu chu midangin fiam nan an lo hmang leh thung a, thawm an nei ring ţha kher a sin!
A kawr chu a sen duk, simple deuh mai a ni, mahse a mal a kak chho thui viau thung. Sawisel sak erawh ka tum lo, a duh ang taka a tih tir a ni a, inhmeh pawh a inhmeh khawp mai. A ţhiannu birthday party a hak tur a nih thu a sawi a, siamthat a duh lai te chu an khawih sak leh zung zung a, rin ai kan awm rei phian.
Dawr aţanga kan chhuah meuh chuan darkar khat a liam der tawh. Ril tam vak lo mah ila hun kan ngah bawk a thil ei turin dawrah ka luh pui ta tho.
Kan luh hnu lawkah a hmelhriat te bawk an lo lang leh a, mipa pathum an ni. Kan piahah an ţhu ve a, pakhat saw a status a mi kha a ni nghe nghe a ka hriat.
An in biak lai chuan lo ngaihven anga awm ka tum lo. Ka zawh ngai lovin an class a mi te an nih thu a sawi a, ka lo bu nghut ringawt. Lo hlim viau nachhan tur ka nei lo ve bawk.
Dawr aţanga kan chhuah dawnah an inbe leh a, ka mit an ti kham viau bawk. An innel hle tih lah an ţawngkam hmanah a hriat reng mai.
"In va inkawmngeih hmel ve." Ka ti hram a, "Kan inkawm vak ngai lo, class a inang sia, inhmelhriat ve hrim hrim ang kha kan ni mai." A ti zung zung a, ka sawi zui duh ta lo.
Ka nu thil min chah kan lei hnuah kan venglam kan pan a, mahse sawi fel ngai kan neih avangin kan veng thlen hmain hmun dangah ka peng leh rih.
Zawhna min zawt lo chuan ka din rualin a chhuk ve mai a. He lai hmunah hian ka kal fo ţhin, ka ţhiante nen pawh kan ni ţhin tho. Mahni a kal chang ka ngah zawk mah. A hmun a veng nuamin ni tla tur a lang chiang em em a, ţhutna ţha deuh mai a awm bawk.
Mau hmanga siam ţhutnaah chuan ka ţhut pui a, a hruaitu zawk ka ni bawk a ţawng hmasa nih a tum bik lo.
"Kan inkar hi hetia awm reng hi i dum em?"
ti a ka zawh chuan rang zetin "Aih" a lo ti thuai a, min chhang rang lutuk chu ka nuih a ti za ang reng khawp a.
"Kan inkawp dawn a nih chuan midang an awm a rem lo a nia, ka buai peih lo bawk." Ka ti tlang hmiah a, a rilru hre sa ka nih avanga pehhel kual lo pawh chu ka ni. Pehhel taka sawi pawh ka thiam chuang lo ang.
"Tumah an awm lo." A lo ti thuai a, a mah ka en chuan,"Nangmah chauh." a ti leh sap a. Dawt a sawi ka ring lo, ka ring phallo zawk pawh a ni mai thei, a thusawi chu ka ring hmiah bawk.
"A nih chuan ka fawp thei tawh che tihna." Ka tih chuan nui var varin a bu nghat a.
A hmuiah chuan ka fawp ta ngei, a zei phian bawk. Ka rin sa ni tho mah se a taka han tawn meuh chuan a boruak a dang zar mai.
End of chapter 2
😁
Comments
Post a Comment