BLUEMING 🦋 CHAPTER-3 BY UNKNOWN BELLE

BLUEMING 🦋

BY UNKNOWN BELLE

CHAPTER - 3

Kan haw kawngtluan chuan a ţawng melh melh reng a,kallam aia kan boruak dang ta deuh chu kan hre ve ve. 

Ngaihzawng hi pahnih ka nei ve tawh. Midang vanga buai tih vel kha ka peih ve lo. Keimah lamah hi chuan ka fair ţhin viau a, chutiang tur chuan ka beisei let ţhin bawk. Midang an inrawlh tawh chuan ka dawhtheihna hi a pan viau a niang chu, buaina ngaia buai reng ka peih ţhin loh avangin ngawi rengin ka en liam a, ka dawhtheih chin a pelhah erawh thu tawp ka siam tawp mai ţhin. 

Hmeichhia vanga nat ngawih ngawih emaw rilru leh taksa natpui khawp a inngaihzawnna lak thutak hi ţul ka ti lo. Ka hmeichhe lo kawp tawh pakhatin 'i induh tawk mah mah' min tih kha a dik viau pawh a ni mahna le. 

Zanriah ei laiin ka nu'n Zawhte hming tur bawk chu a rawn sawi chhuak leh a, an ngainat viau chuan kawl mai ka pawi tih loh avangin a hming phuah chu ka rem ti ve ta mai.

"Nangmah ni'n phuah rawh u." Ka ti a.

"Keiman ka lo phuah ang." Bektei'n a tih laiin ka pa'n,"A neituten an lo hmu ang a an la leh daih si ang e." a lo ti ve a.

Ka nu ve thung chuan,"Pawnah kan awm tir lo mai dawn a lawm." a ti a, kan nui ta vek. Nu berin a kawl duh miau chuan tuman kan dang lo.

Inrinni zan a ni bawk a kan chhungin kan inkhawm a, kan unauah chuan keimah ber hian inkhawm han skip mai te hi ka hrat a. Kan kum ngaihtuahin innawr sek sek kha a ţul ber a an hriat loh vang nge min nawr lui ngai lo. Mahse chaw ei laiin ka pa hian min zilh ţhin thung. Ţawngkam pangngai takin a sawi mai zel a, ka ngaithla reng a, ka awmdan a danglam phah ngai lem lo. 

Peih loh chang te pawh a awm ve a lawm ti rilru nauh nauhin ka ţhulh ve leh tawp zel mai a. Ka pa chuan ,"Inkhawm te hi lehkha zir ang deuh hi a ni a, inkhawm zat zat ţhin te hi chu lehkha zir peih tak ang mai hian ngaiah an han nei mai a, lehkha zir pawh han inthlahdah deuh chuan Inkhawm inthlahdah ang mai hian han namnul mai hreh lohna hi a awm ţhin." a ti ţhin a.

A sawi dik ka ti viau a, Keimahah erawh danglamna a thlen viau pawhin ka hre lo.

Zan dang ang bawkin Zuata nen kan ni a, midang hi chu kei ai pawha inkhawm taima lem lo an ni. Kan ţhian Hmeichhe lam pawh hi eng vak an ni chuang lo, zanin phei chu hmeichhe lam hmel hmuh tur an awm lo hrim hrim. Zuata erawh a inkhawm taima viau, kan tluk lohna lam tak a ni.

Inkhawm banah chuan haw tlang mai loin BiakIn compound piah deuha waiting shed ah meizial kan zu kawi a, tlangval dang pawh an awm ve nual.

"Inveng lamah ka lo peng dawn." a ti a, tih tur a neih leh neih loh ka zawh chuan,"Nu Mapuii rawn tlawh ka tum......nang pawh ila kal miah lo a ni maw."a ti zui a. In ţhenawm hnai viau e ti lo hian an chanchin ka hre ngai lo, ka nu ten an sawi loh danah na viau chu a nih loh ka'n ring ringawt a.

"A dam lo em ni?" 

"Dam lo han tihah khan na em em sawi tur a nei chuang lo a tia Zuitei ka biak kha chuan. Mahse a chau thei lutuk e a tia, damdawiin pan ţul a ti rih lo e a tia." 

"A zia ve leh mai lo maw." Ngaihsam deuha ka tih chuan, "Zia ve leh mai thei, mahse va tlawh ve hrim hrim kha a ţha ka tia." a ti leh a. 

A hma pawhin hetiang hian a awm ţhin a, a hnuah a dam ve leh mai a, ka ngai serious viau lem lo.

"Min lo zui ve dawn nia." 

"Nia." ka ti ve mai a, kan tet deuh lai kha chuan Zuitei te inah hian kan kal nasa ţhin. Kan ţhian ho kan tlangnelna in ber a ni a tih theih ang. Mahni chauhin ka kal ngai lo thung.

"Sawmpari kha ka zui haw ang ka ti kha a nia, i rawn lang hlauh a."

"Khawiah nge i hmuh?" 

"Biakin ah mawle..... Khawiah nge ni vak se i tih ni." tiin min nuih a, mak ka ti ve deuh tih ka hmelah a lo hriat deuh nge ni,"Sawmpari te chu a inkhawm zat zat ţhin a lawm, i inkhawm khat em a i hre lo mai mai a nih kha." A ti zui a.

Mak ka tih loh phah chuang lo, zan reia a chhuak lai ka hmuh ţhin avang khan ngaihdan dang daih ka lo nei laklawh tawh a, a inkhawm taimak avang chuan ka ngaihdan ka thlak nghal phah chuang lo.

"A va inhmeh lo ve." ka tih san a, midang an haw hlawm takah chuan muangchangin kan inzui chhuak ve a. Kan awmna a hla lo bawk a kan hmanhmawh lo khawp mai.

Malsawmpari bawk chu a rawn sawi zawm leh a, "Sawmpari chu a fel reuh a sin, helamah a awm thei hmel bawk a, kohhran tan hi chuan Inkhawm taima te hi kan thlahlel chu an ni deuh ber mai a, min teh tute hi chu an awm reng dawn nain,inkhawm fo si an nun a hmuh tur awm si lo tih te hi chu a tehtu te hian an nun hi dik viau a an ngaihna tlang aţangin nge an fel bik lohna an pawm lutuk vang zawka teh mai ţhin an nih hriat a chakawm ţhin." a ti a.

Ani hi chu heti lamah a tui ţhin bawk a, ngawi rengin a thusawi chu ka lo ngaithla leh a, rawn sawi zawm lehin, "Sawmpari aţangin ka peng duah a nih chu, ani pawh inkhawm a taima em mai, an khuaah pawh nula fel tak a nih ka ring." a ti leh a. Ka rilru te te chuan hrechiang lo hi ka lo ti khawp a.

"A tir lama a rawn lan khan a peih rei vak kha ka ring lo a, i hre tho ang a Zuitei te ho nen an ni ţhin tih chu. Mahse hei midang tello pawhin amahin a rawn tel ve zak zak zel mai a, hruaitute ho pawhin fel an ti ve viau a sin. Helamah a awm tawh rih dawn kha a tia, dawr ah a thawk dawn a ti em maw ni ka la zawt chiang leh lo."a ti a, ka hawi chhuak lo viau nge mawni zanin inkhawmah ka hmuh pawh ka hre lo. 

Kan inah pawh peng lovin Zuitei te in ah kan tlang a. In chhung kan luh chuan an lo reh ţhiap mai, thawm han nei tham vak kha an awm lo ve hrim hrim.

"In awm lo em ni." Zuata'n a tih chuan room pakhat chu rawn inhawngin Malsawmpari a rawn chhuak a, he ta a awm aţangin ka la kal leh lo.

Midang an awm lo bawk a Nu Mapuii room ah min luh pui a, Zuitei pawh lo awmin anu lu a lo hmeh sak a, keini ţhian dun min hmuh chuan Nu Mapuii pawh a hlim ve hmel khawp mai.

Zuata leh Nu Mapuii inbiak lai chuan Zuitei'n,"Inkhawm ve leh zuk a." a lo ti a, min nuihzat niin ka hria. Inkhawm loh kan sam tlang bawk a min nuih pawh chu a áwm viau.

"Thil dil duh ka nei te pawh a ni thei a." ka tih chuan a nuih a ti za viau a ni mahna a nu lu a hmeh sak theihnghilh ţhakin a lawm le a nuih le.

"I va han inhmeh lo tak!" la nui reng chung chuan a rawn ti leh a, fiamthu ka thawh hi a hrekhat ve viau ang, a nuih a za viau pawh a awm lo hran lo e.

"Sawmte i thingpui sial kha han lum ta che, an fel dun em mai." Nu Mapuii'n a tih chuan Malsawmpari a la awm ve reng tih ka lo theihnghilh hman.

Nu Mapuii'n a tirh chuan a tho tharh a, Zuitei'n a duh ve tih a sawi hnu lawkah a chhuak zui a. Thingpui a lum thiam viau a niang chu Nu Mapuii pawhin a chhuah hnu chuan a tui kan tih ve a rin thu a la sawi.

An pathum a an inbiakna karah chuan ka lo ţhu ve reng a, Zuata hi a rintlak bawk a, min awl hneh zar zar ţhin khawp mai.

Malsawmpari chu tray a no pali chawiin a rawn lut a, a sam pawh a lo tawn leh tawh. A sam a ngil chi a nih loh vang nge ka hmu hnawk riau ţhin.

Kan han in chu an sawi ang takin a tui ka ti ve khawp mai. Thingpui hi ka ngaina vak lo kha a nia, hei ber kher chu a tui tak zet.

Zuata chuan a fak luam a, Malsawmpari lah chuan,"Magic a tel ţhin a lawm." a lo ti then. Zuitei'n,"A siam lai ka hmuh reng pawhin ka siam hian a tluk thei lo reng reng." A lo ti ve a.

"Sawmtei te chuan a pu a chhun a nih hi, ka pa khan ei in siam a thiam ţhin viau a, ka nu siam ai khan kan ei chak ţhin teh a sin." Nu Mapuii'n a lo ti ve bawk a.

Engmah ka sawi zui lo nain ka in zawh vat danah tui ka ti tih a hrethiam ve tho ang.

Zuata'n,"Scooty chu engtin nge ni ta?" a tih chuan ka tum lawk ni hauh loin Malsawmpari ka va melh a, min lo en ve chiah. Rang zetin a hawisawna, a chhungte hi dawt a hrilh a nih ka ring hmiah.

"A la khalh theih dawn tho a, mahse a upa ve tawh sia Bike ka duh." Zuitei'n a ti thuai a, Nu Mapuii erawhin hmeichhe tan bike khalh a ţul a tih loh thu a sawi zui ve bawk a. Hmeichhe bike khalh chung chang an sawi chuan Malsawmpari nen ngawi rengin kan lo ţhu ve a, ka ţawng chhuah a hlau nge ni min melh leh zawk ţhin tih ka hre thei. Inthup tum viau mah se eng emaw ber ah dawt a sawi a nih chu ka ring.

Rin ai takin Nu Mapuii chu a ţha phian a, ani pawh naktuk lam pawh a inkhawm peih tawh a rin thu a sawi ve bawk. Rei leng loin kan haw ta thuai a, Zuitei'n an kawt thleng min rawn thlah a, Zuata erawh kan in lama rawn len a la tum thung.

Kan in kan luh chuan ka pi a lo mu tawh a, ka pa'n TV lo enin a bulah ka nu'n lehkhabu a lo chhiar a, Bektei erawh lehkha a zir leh daih tawh.

Room lama kan inzui chuan ka nu'n, " Mîlo hi hruai lut nghal daih rawh u." a tih chuan ka hrethiam lo hman a, mahse Zawhte a sawina tih ka hre ta thuai.

"Ehe Zawhte thar innei elaw?" Zuata'n ti hluaiin ka nu bula awm chu a va pawm a.

"I ţhianpa in a rawn ru haw ve ringawt a nih kha." Ka pa'n ti fiamthu a, Zuata chuan a tak tak a ni emaw a ti a niang chu min nuihzat hmel khawp mai.

Ka nu'n,"I room lama luh kha a chak a niang, khalamah khan a tawlh hrut hrut reng a." a ti a, chutia a tih takah chuan a awmna bawm tura a siam chu ka room ah ka la lut ve mai a, diaper a la hreng bawk a a zun leh ek vanga ka buai loh beisei phawt ang.

"A mu tawh em ni le...." Room kan luh hnua a tih chuan a sawi tum chu hrethiam in, "Va ko la." ka ti a, a nui suk ringawt.

"Kha ti ringawt te chuan hma i sawm mawh awm em mai." 

"Ka nghak thei a lawm." A ti mai a, a nghak mek chu a nih ber hi maw.

"Nang pawh bung thar i la kai bik lo a ni maw." 

"Kai tawh ang chu....." Ka tih chuan,"Elii maw?" a lo ti thuai, a nih thu ka sawi chuan ,"I nih pui tak tak pawh ka lo ring lo a." a ti a, a sawi zui lem hlei lo a.

Zawhte a bawm a ka dah fel hnu chuan ka inthlak a, kan pahnih a kan inkawm changa a sawi ţhin ngaiah bawk kan lut leh, Bektei chung chang bawk a ni a sawi leh. Ka nau a nih vang nge sawi pui chiam dan ka hre lo, hmeichhe dang pawh ni se ka sawipui vak chuang lo ang. 

Ti hian a insawi thawl ve a ni mai. 

A hnu deuhah hna chung chang sawiin kan titi luam a, "Hruaii khan i chanchin min zawt a." a ti a, Hruaii a hriat leh ka hriat a inan leh an loh kan sawi dun chuan kan hriat a lo inang ngei. 

Khawvel hi a zim teh e.

"A chhiat loh viau kha." A tih chuan, "Nia." tih zawngin ka chhang, a chhelo reng bawk a.

"School kan kal laiin kan senior a ni ţhin a lawm." a ti a, sawi zui ve tur ka hre lo.

"Vengkhat kan ni tih a hre bawk a hmanni dawra a rawn lut chu a sawi nasa che a lawm." a ti leh a, ka lo nui mai. A sawi zawm leh a, "A sawi danah in inhre ţha hmel si a, i hriat chian ve viau ka ring mai a."

"Chiang vak chuang nang, kan thawhpui pakhat nen an inhria a."

"A ngaihzawn hmel khawp che kha." Nui chunga a tih chuan, "A zei hmel khawp mai." Ka lo ti ve a. 

"Tak takin fimkhur viau rawh, amah chauh lo pawh ngaizawng tu i nei tho ang,mahse ani chu ka hriat chian ve a nia, rel lam thu ni lo se a boruak hip a sang ve a." 

"Chu min duhpui vak na nge." Ka ti fiamthu a,"Duh pui a pui loh pawh awm hran lo, a bula i awmin i fimkhur dawn nia." a ti leh mai a, ka sawi zui ta lo.

A haw meuh chuan ka chhungte an lo mu vek tawh, ti hian a lo kal chhan ber Bektei pawh be loin a haw leh mai a,a lehkha zir ka ti buai palh ang tiin hmu miah loa haw chang a ngah, a thei ţhin hi ka lo ti khawp mai.

Ka mut hmain Elii ka be leh a, inkhawm banah dam lo kan tlawh dawn tih ka hrilh bak kha ka la be leh lo. A message ka reply hnu lawkah a rawn online a, lehkha zir a a la men dawn avangin rei kan inbe lo.

Zawhte lah chu a bawm atangin a lo tawlh chhuak a, a ke hnunglam hmang ţha thei lo mahse a tawlh chak tawh viau. Ka khuma rawn lawn tum ni awm takin khum bul atang chuan a rawn dak chho reng a. Awmna tur a neih tawh avangin ka bula mut tir chu ka tum tawh bik lo.

Light off tura thawh pahin ka dah let leh a, ka mut fel hnu lawkah thosilen a rawn hai chet a ka en chuan a ngai ang bawkin khum bulah a lo phei leh tawh.

Min dip lem lo bawk a tiin a hma ka mut tir tawh ţhinnaah chuan ka dah a, a bawk ta hle hle.

*******

Chawhma inkhawm banah chuan ţhiante fellowship a awm turin an awm tlang dial a, tih tur dang ka lo neih tawh avangin ka tel ve ta lo.

Inkhawm banah Elii te in a kal tur chuan Bike ka la a, an in ka thlen chuan a ţhiante pahnih an lo awm ve bawk. Kan pahnih chauha awm dun ka thlakhlelh vang lam ni loin a ţhiante chu awm lo se hei ai ka awm hahdam deuh chu ka ring.

A chhungte awm ve bawk mah se keini ho chu min rawn be buai lo, an in a zau bawk a midang inleng nei ve bawk mah se kan inti buai pha lo thung. A ţhiante pawh hi kan veng a mi tho hi ni mah se ka hre lutuk lo, anni pawhin an ai u daih ka nih vang nge min nel vak loin ka hria.

"Test kan ţan tawh dawn sia, chawhnu leh zan lam pawh ka inkhawm tawh lo law law mai ang." a ti a, kan pahnihin kan ţhu dun a, a ţhianten eitur an siam thung.

"A ţha a lawm." Ka ti mai a, inkhawm lamah hi chuan eng vak ka nih bik loh avangin han fuih viau thei dinhmunah ka ding lo.

"Test kan neih zawhah chuan lo leng rawh aw." a ti leh a, Bektei nen ka khaikhin lo thei lo, ani chuan tunthlengin inleng neih a la ngam lo, mipa an lo len tawh chuan a ngawi kar reng zel mai a, han fiam zui pawh inthlahrunawm khawpin amah zawk hi a zak thin. Kum zat inang rau rau pawh an inang lo ve chiang khawp mai. Mahse ani hi ka nau angin zakzum se zawng ka bialnu a ni kher ang em a hriat miah lo, a ţha vek zel mai e.

Chawhnu inkhawm pawh ka ţhulh leh ta nge nge, amaherawh chu Elii te in aţang chuan ka haw har chuang lo. A zirlai ka ngaih pawimawh sak ve a, ani pawh a lawm ve viauin ka hria.

Chawlhkar thar kan chuangkai a, a ngai te in hnaah kan buai chho leh viau. Damin chhungkaw hlim takin kan awm emaw tih laiin ka pi a insawisel chho ta zeuh zeuh a. Insawiselna nei ngai mang lo a ni bawka a tir lamah chuan amah pawhin a la lâp viau a. Mahse a taksa a chak lo tulh tulh mai chuan kan ngaih a ti ţha lo.

Kum upa lam a lo ni tawh bawk nen ka pa te chuan an buaipui viau bawk a, ka ngaihven ve reng tih tihlan thiam vak lo mah ila rilruin a hre ve reng a, thaw a veng thei tak tak lo.

Chhun a nih chuan rilru a kalding deuh nge ni engmah han ei chak pawh ka neih loh avangin chawlh hun pangngaiah ka chawl peih lova. U Joela pawhin kan chhungkaw chanchin a hre ve bawk a, zanin phei chu rawn riah a tum thu a sawi nghe nghe.

Hna thilah kan buai tlang tawh si a, a rawn lang khat hrim hrim bawk. Ka pi erawh a châu ţhin viau a, damdawiin lama awm a hreh em em mai bawk si a, chuvangin theih ang angin in lamah kan in enkawl ve a ni ber. Doctor kan be ve reng a, ti hian ka nu'n a enkawl chawt a ni ber. Amah a hrisel chi a lo ni ve bawk nen hetia a'n dam loh meuh chuan chhungkua kan nguai vek ni maiin ka hria.

"Fakpui hei thingpui hi lo in rawh, engmah ei loh chu a ţha lo." U Joela'n a tih tlat avangin ka ţhutna aţangin ka tho ve ta nge nge a, ka chhuk thlak chuan Hruaii a rawn lang ve leh chiah. U tia koh chu a duh vak lo a ni ngei ang ,"Min u suh, min ti senior." a ti deuh tlat a, chu ti na na na chu tiin ka U duh tak bik lo, amah hi ka ko khat ve hrim hrim bawk. Tunlai phei chu ka hel ngar ngar ti ila a sual lo ang. Ka tunlai mood nen ani hi chu ka hmachhawn thiam vak lo a ni ber.

"I cool thei e." a rawn ti ringawt a. Ka bulah ţhut hmun a rem sauh sauh mai. A chho ve mai dawn emaw tih lai a.

Ka hmelah ka lo tilang nasa deuh chu zia lo ka ti viau. Ka rilru put hmang hi ka tilang ngai mang lova, ţul ka ti ţhin lo bawk. Ka pi chanchin ah erawh ka inthup seng bik lo a ni ber e.

"I chho dawn lo em ni." 

"I chhoh hunah a ni mai." a ti a, chho vat se pawi ka ti lo viau. Ka ţawngkam a nelawm loh a ti ţhin bawk a, tunah ngat phei chuan ka nelawm loh viauin ka ring.

Ka nu leh pa, Bektei thleng pawhin dam sam loh chang te chu an nei ţhin, mahse tun ang hian ka la awm ngai lo, ka nu'n a serious viau lo ang ti mah se ka hahdam phah der lo.

"I pi chu a ţha lo viau em ni?" Hruaii'n a rawn ti a, U Joela hnen aţangin a lo hria nge maw ni.

"Ţha chu ni mai e." ka ti a, ţha lo viau a sawi tur a ni chiah lo, a kum lo tam ve tawh hian a tichau zual a nih ka ring.

"Rilru a hah duh ngawt ang." a ti leh a, ka chhang zui lo.

"Niminah Zuata dawrah ka kal a, i pi chanchin min lo hrilh a. Rawn kan ve ka duh a mahse in in awmna ka hre lo a." 

"I ti lawmawm a nih chu." ka ti mai a, lo kal a duh ve ringawt chu a tawk ka ti viau a ni.

"Ei duh zawng te a nei em? Nakinah lo kal theih hun te a awm takin." a ti leh a, min tih hlim a tum vanga min bia a nih chuan a thawk vak lo a ni, ka ning dawn tlat.

"Ti buai duh suh,ei theih vak a nei lo." Ka ti a, min chhan hma chuan,"Zial ka va lei lawk, nang pawh han chho tawh rawh i tlai ang." ka ti zui a, amah pawh ngaihven tawh lovin ka chhuak zui ta daih.

Pawna motor insulpel thuak thuak hmuh chuan min ti pik sawt zawkin ka hria! Zial zuk tur ka lei hnu chuan lut ta mai loin building chung lamah ka chho a, thildang ngaihtuahnaah a leng lo a ni ber. Intih thawven tumin thildang han ngaihtuah lui ve bawk mah ila awmzia a nei thui lo ţhin viau bawk.

Bang killam ni hlim chinah ka ţhu a, ni a sa ţha kher mai.

Ka phone phawrhin ka nu ka bia a, ani hi chuan chanchin lawmawm loh min hrilh ngai lo. Mahse ka pi awmdan ka hmuh ve vek tho avangin ka ngaih a ţhat phah chuang lo thung.

"Test chu innei dawn ta em?" Phone a lak rual chuan ka ti nghal tawl. Nizan lamah khan biopsy lak kha an sawi a,ka pi kha motor chuan a zuam lo hmel riau a kal leh rih loh mai pawh an pawi ti lo kha a nia.

"Aw....hei chawhnu lam kan tinzawn kha a nia, a harh ţhat lai chuhin kal kan tum a, kan insiam mek." a rawn ti a. "Rawn ngaihtuah duh suh. Hei ipa nen kan kalpui dawn a, amah pawh a ţawng peih a a harh ve viau a nia." a ti duah a. 

"Chanchin min lo hrilh ve leh ula." Ka ti a, kan inbiakna chu ka ti tawp zui a, chaw a ei mumal lohna a rei tawh bawk si a chu chuan ka ngaih a ti ţha lo lehzual.

Ka awmna ngaiah pawh rei awm lovin ka chhuk leh a, kan dawr kawtah chuan Malsawmpari lo ding reng chu ka zu hmu. Min hmu ve lo thung.

Tha tho vak lo chuan ka chhukthla beuh beuh a, nizan lamah ka pi ngaihvenin ka mengrei bawk nen mit a kham duh ang reng.

Dawrah ka lut ţep tihah chuan ,"He mi hi em ni inthawhna?" a rawn ti a, kawngka bula ding ka ni tawh bawk a ani kawngpui lama awm chu a rawn hawi chho vah mai. 

"Aw." Ka tih chuan, "Khilaiah khian ka thawk ve dawn a sin." tih pahin kan dawr len opposite a VENUS tih intar kuau lam a kawk a, puanthuina dawr a ni tih chu ka hre ve. Ka la lut ngai lo thung.

"Um."tih pahin ka bu nghut a, ka hmel aţangin ka rilru a hrethei zawk nge ni, "Lut tawh rawh kei pawh ka kal dawn." a ti a a sawi lai chuan mipa pakhat hian a rawn bia a, ngaihven zui lovin ka luh san ta daih. Ka seat ka pan chuan U Joela pawh a lo tho ve vat, Hruaii pawh a lo la ţhu lut ve tawh.

Hruaii chuan vanneihthlak ka ti dawn nge, nidang angin min au buai lo hlau. 

Kan bân hnu chuan U Joela'n min zui haw ta ngei a, ka nu'n min lo biak khan karleh lama biopsy result lam a ngaih tur thu chauh kha a sawi hman a, a bak kan sawi zui lo kha a nia. Zanlam an boruak ka la hre leh lo.

Inleng an awm ve neuh neuh a, ka pi chu a room lamah an awmpui a, ka nu leh a ţhiante pathum vel an awm ve bawk. Vawiin lam an chhuahna in a tichau deuh nge ni a meng ţha peih meuh lo a, muhil erawh a ni lo thung. Dar zat enin a hma vak tawh loh nen inleng kan la ngah phian, a lawmawm lamah ka ngai.

Inleng dang te chu ka pa'n a ţhutpui a, choka lamah Bektei thingpui lum kan awm pui ve a,kan ţangkai lutuk lem lo.

Bektei ţhiante pahnih an awm ve tho a, U Joela nen chuan kan ţangkai loh em avangin in chung lamah zial zu turin kan chho ta daih.

"Naktuk lam chu kan chawl mai dawn em ni?" Ka ti fiamthu a, kan boruak tur a hriat loh a, nizan lam ka mu tlem bawk nen mut thuai chu ka chak rilru hle.

"Chawlh lam sawi kha chu a hmanhmawh thlak loh, a ţul taka leh kan sawi chawp leh mai dawn nia." a ti mai a.

Zan rei lam a ni tawh bawk a boruak a nuam tawh viau, Hna chungchang sawia kan titi mai mai lai chuan Bike ti nung thawm chuan ka beng a verh ve leh tlat a, ka ţhutna aţanga tho chhuaka ţhenawmte kawt lam ka va hawi chuan ka rin lawk nge rin loh lutuk zawk pawh ka hrethiam lo, Malsawmpari chu bike hnunga a lawn tur chu ka zuk hmu a. Nu Mapuii te hian an hriat pui nge mawni ka ti rilru neuh neuh.

An tlan chhuah a an liam thleng chuan ka thlir reng ringawt. Eng tak chu ti ţhin ang maw,ka vawikhat hmuhna a ni lo lehnghal.

Ka ţhutna ngaia ka ţhut leh chuan nichin maia ka phone a rik thu min hrilh a, ka en chuan Elii a lo ni.

An test pawh an zo tawh, mahse ka la leng ta miah lo chu a nia. Ka pi chungchang a hre ve bawk a min hrethiam viau chuan ka hria.

Rei pawh a rial hmain a rawn chhang thuai a, U Joela chuan inti hrethiam fahranin nui ruh ruhin in hnuai lamah min chhukthlak san ta daih. Pawi ka ti viau lo bawk.

"I pi chu eng nge a an?" a ti var a, tun angah chuan a aw hriat a hahdam thlak khawp mai. Kan chanchin te chu ka hrilh ve zawr zawr a, text message in inbe reng ţhin mah ila phone call hian kan inbe khat, hun ka neih loh vang a ni ber ang chu.

"I châu tawh awm." a ti sap a, "Ti hian ka in recharge chiah." Ka tih chuan a nuih a lo za khawp mai a, inhmeh lo min tih thu a lo sawi zat bawk.

"Ka la rawn leng hman ta si lo a."ka tih lai chuan min lo pawt chatin, "A pawi lo, kan dam ang a hun a la tam a lawm." a lo ti a, ka thaw ru deuh huai mai. 

Ka lakah a beiseina neih dan hre lo mah ila ka ngaihven ve viau chuan ka hria. A pangchang thiamin thil nih dan tur a hrethiam viau bawk. Tunlai ţawng tak chuan a zei viau a ni.

Thu ho mai mai sawiin kan inbe ta reng a, vengkhat a awm e ti lo chuan kar tawp bak hi inhmuhna hun pangngai kan nei meuh lo. Han hmuh khât hi chuan a ngaihawm ve hman ţhin viau a ni.

Kan inbiakna kan tih tawp hnua ka chhuk chuan an lo reh deuh diak tawh a. Inleng ho pawh an lo ţin tawh. U Joela chuan,"Zanin chu ka awl ang che." a tih tlat chuan ka hnial duh ta lo.

Ka pi roomah hian riahpuina turin pakhat mut theihna kan siam a, keimah ka riak deuh ber. Mahse ka mu ţha mang ngai lo, ka zâm ka ti dawn nge palh thut a awm takah tiin thin thiin ka mu mang ngai lo.

Ka mut chhuak vanga ka lu a rit bur tehreng nen ka muhil thei lawk lo a, mut hmunah chuan thil hrang hrang ngaihtuahin ka harh ta reng.

A châng leh Mîlo chu ka chûl thûl. A awm tan tirha heta ka muttir vang nge ni a bawmah a mu duh der lo. Tunah phei chuan duhthusamin a ke hnunglam chu la hman theih loh mah se a harh ve tawh viau a. Ka nu duh dan takin pawm lamah a awm tam lo.

Dar zar ka en chuan dar 1 a lo pel tawh a,ka muhil thei chuang lo tiin ka pi room lam ka pan ta ngawt.

Ka thawm ka dim viau emaw tih laiin U Joela chu a rawn harh nghal a, a nghar mut ve reng pawh a ni mai thei.

"I muhil thei meuh na nge?" A ti a, ka bu nghut ringawt. Ka pi mutnaah chuan kal hnaiin a la thawk leh thawk loh chu ka'n en ringawt a, a muhil mai a ni tih ka chian takah chuan ka thaw ru huai mai. Ka awm dan chuan a nuih a ti za a ni mahna nuihza insum fe hian min lo en reng a.

"Ka room ah va mu daih la." Ka tih chuan,"I ho mai mai lutuk, nangmah zawk khan mut hahdam i mamawh a nih kha." a ti a, ka mamawh ang chuan ka awm thei chuang lova awmzia a awm chuang lo.

"Mu leh tawh rawh." tiin ka chhuahsan a, room kawngka bulah chuan Mîlo chu a lo awm reng, min zui tih ka hre miah lo.

Amah chu pawmin ka roomah ka lut a, ka zial zuk tur leh lighter nen in chunglamah bawk ka chhuak chho leh. 

Ka pi dam lo chuan min tichau tel ve khawp mai, tette aţanga ka nu leh pate ai pawha ka kawm tam ţhin a nih vang te pawh a ni mahna.

Chutia thil tam tak ngaihtuah a ka awm lai chuan bike ri bawk kha ka hre leh a. Zan rei ni mah se vei vak tawk chu an awm reng. Mahse ka beng verhtu erawh Zuitei te in kawt lam aţangin a ni thung.

Thawm ka hriat ve leh chuan ka en leh ta vat a, Malsawmpari in lam pana a kal chu ka hmu hman. Rawn thlahtu pawh chu a inkhalh chhuak ve leh nghal a, tun ang hunah an inhmu fo a nih chuan thil ţha tak an tih rin mai chu a har ve khawp mai.

..

Zanlam ka mu tlem bawka zing ka harh chuan dar 8 a ri der tawh. 

U Joela chuan dawr lamah chuan kallo mai turin min ti a, chutia han chawlh ringawt chu tul ka ti lo viau.

Mahse ka pa'n,"I taksa a hah tel bawk si a Vawiin chu chawl mah la a pawi lo, kan dam ang a naktuk lamah i chhunzawm leh thei tho a lawm." a tih takah chuan ka hnial duh ta lo.

Chhun lama han mut ngawt lah ka thei bik si lo a, car leh bike te chu ka sil a, inleng an lut chhuak ve reng bawk nen a khawhar thlak loh viau mai.

Chawhnu lamah erawh Elii a rawn lang a, chawhnu class a ţhulh chu tul ka ti vak lo nain ka sawi chuang lo. Chawlh ka nei zen zen si lova min thlehlel veah ka ngai mai.

Inleng te thingpui sem leh seng vel kan tih fel hnuah in chung lamah kan chho dun a, nula tih takah a ţangkai viau. Ka nu a chet pui zung zung a, kei ai chuan a awlsam daih zawk.

Kan pahnih chauh chuan kan ţhu dun a, ţawngka chauh ni loin kan chetzia in kan inthlakhlelhna kan tilang a, midang mitmei ven tur a awm lo bawk a ka fet ve viau bawk. 

Kan chhoh hnu rei loah Mîlo a rawn lang ve leh a, kei ai ka nu leh Bektei hian an ngaihsakin an duat nen, min hmuh tawh chuan min zui kawi reng mai a ni.

Mîlo a hmuh chuan pawmkangin a mal chungah a nghat a, ka nu'n kawr a hak tir chuan a tilang cute viau bawk.

"Khawi a mi nge inlei a? Ka van duh ve e." tiin a chul hliau hliau a, kan lei a nih loh avangin kan neihna han sawi mai tur ka hre lo.

"In leina chu?" a ti leh a," Ka nu te buaipui a nia ka hre ve lo." Ka ti ta ringawt. Ka hawn ve ngawt dan kha han sawi mai ka hreh tlat.

A hming te chu min zawt a, ka hrilh ve mai bawk.

"Zawhte chu ka duh tho a, mahse Bingo hian a thik dawn sia ka lei ngam lova." a ti a, Bingo a tih hi an ui vulh lai niin a fing hle bawk. 

Rei ţhu tawh lovin ka thlah haw a, an inah pawh rei ka ţhu lo. Khawiah mah rilru a beh tak tak loh avangin ka let leh thuai a, inleng an reh lai chuhin ka pi awmna lamah ka lut ve leh.

"I bialnu i rawn hruai a ni maw." Ka pi'n min hmuh ruala a tih chuan ka nui hawk a, ka nu'n a lo hrilh a nih ka ring. Elii kha room lama a luh awm ka hre lo.

"Hruai ve bawk ang chu." Ka ti a, chutia a harh ţha peih chu ka lawm viau bawk. Mahse a ţawng hnem deuhin a hah thuai zel a, keimah zawk ka ţawng tam ve ta thung.

"Ka fate hmel hmu chak hi ilo nâ a ni lo maw." Ka ti chuan a nuih a za hle, hetiang lam ka sawi hian a láwm thei êm a, min fiam nan a a hman zin ber a ni bawk.

"I fate hmel hmuh a chakawm tawh khawp mai. Binbina aia hmelţha nei ngei ngei rawh." a tih chuan ka nuih a za ang reng. U Rinpuia fa naupang ber Binbina kan tih mai hi an unauah rau rau pawh a hmel a dang ber a,ka pi hian duat ve viau mah se hetia fa chung chang a sawi hian sawi lan tel zeuh a hrat. Mahse kei chuan an unauah a fel ka tiin min ngaina ber thung.

Zanriah eikham hnu lawkah ka ţhiante an rawn kal a, engmah an sawi lawk lo bawk nen ka pi room lamah ka awm lai a ni nghe nghe.

Ţhutkhawmna lamah chuan kan ţhu khat deuh vek a, dam lohna avanga lo kal an ni bawk a thawm kan dim ve tlang viau.

A sir lama ngawi renga Malsawmpari lo ţhu ve ka hmuh chuan nizan lam min ti hrechhuak, min rawn melh ve zawk a, ka lo en sa vang nge ni za lo tih hriat fe hian a lo ţhen sak.

End of chapter 3 

👀