BLUEMING 🦋 CHAPTER-4 BY UNKNOWN BELLE

BLUEMING 🦋

BY UNKNOWN BELLE

CHAPTER - 4 

Inleng dang kan dîp deuh avangin mipa ho zawng ka room lamah kan lut a, hmeichhe ho erawh thingpui lumna lamah an kal thung.

Ka room a Mîlo lo awm an hmuh chuan mak an ti leh pek, Ţana chuan,"Eng a tan nge i tih?" a ti khauh a, ani hi chu ran ngaina lo tak a ni, a bikin ui phei hi chu a hlau thei hle.

"Vulh ah." tih zawngin ka chhang a, ka chhanna avang chuan midang an lo nui huk. 

"I room ah kher inla dah zui a, tlangval ber si hi." a ti hluk a, "Min ngai ber sia." Ka lo tih chuan a awih loh hmel ngang mai. 

Hminga'n thingpui in a duh thu sawiin Buangi a bia a, room lama rawn dah ve tur a a hrilh lai chuan a lo hnial leh a ni ngei ang, a beng bula phone dah reng chungin a phun der vak vak ringawt.

Ka room ah hian ţhutna a tam lo bawk a Zuata chu khumah a mu duai a, a bulah ka ţhu thung. An felin nachang an hria hi ka ti hlawm khawp a, a hranin ka pi chanchin hi ka la hrilh hlawm lo hrim hrim. A dam ve leh mai beisei rukna ka neih avang khan ka ngai serious vak duh lo kha a nia. 

Ţhenawm khawveng te an fel hlawm bawk a, vengkhat a kum upa lam kawl zinga mi na na na chu tlawh tu pawh a ngahin a ei sen loh ei tur an rawn ken liam liam zel a, ka pi pawhin dam leh thuai thuai a lawmthu sawi mawlh mawlh a chak tawh viauin ka ring. Mi ngainat a hlawh bawk a, a dam loh pawhin lainattu a ngah khawp mai.

Kawngka inhawngah chuan Malsawmpari a rawn lut a, thingpui a lo chawi lut a. Ama siam a nih chuan ka inchak ve reng mai.

Zuata'n a thingpui lum tui zia a hre ve tawh bawk a, "Nangma lum a nih chuan no hnih ka duh a sin." tiin a lo fiam hlut a, "A la tam mai puar awk a in tham a awm a lawm." a lo ti ve bawk.

Keia pawh chu eng ka hria ni maw, a hmel awmdan ka hmuh chak ve hrim hrim avangin thingpui a sem zo chiah tihah chuan ,"Hei Zawhte thar kan nei a, Mîlo a nih hi." Ka ti zauh a, a rawn hawi rang ngang mai.

AZela engmah hre ve lo ta chuan, "Zawhte ke na ber kher han vulh." a lo ti a,a hma zawngin kan vulh ngai tlat lova, anni chuan kan lei a nih an ring sa bawk nen an tan chuan a mak viau ta ve ang. A nat chhan hrechiang bertu lah chuan min melh hrek hrekin Mîlo a bawma awm chu a ban a, a ke kha dam deuh tawh mah se a duh thal a a la hman theih loh avangin ka nu'n a la tuam sak reng.

"A va cute em em." te chu a ti khawmawi ve a,a hmel chu ka lo chik em em mai khawp a, "A ke a dam hunah ka lo len pui ang." Ka tih chuan, "Nia.... Lo len pui rawh." tiin za lo fe hian a nui a, Hminga'n,"I duh viau te chuan ka thuin kawl rawh." a ti a, hman aţanga inkawm tawh kan ni bawk a, Zawhte ka duat tak thut nachhan tur an hre lo ve bawk a ni.

"Zawhte te chu ka duh lutuk a...." a tih lai chuan lo pawt chatin, "Mîlo a nih kha." ka ti hmuk a, ka ţawngkam hi a nelawm loh ve ţhin bawk a ka ţhiante pawhin engah mah an ngai lo.

"Hming a va nei nalh ve.... Nu hian allergy a nei a, ka vulh ngam lo a, kan khuaah te chuan uite hmelţha deuh Ninia ka nei reng, ka duat thei lutuk." a ti a. "Ka va chhuak phei tawh ang e." tia a ţhutna atanga a thawh chhuaha a inher pah chuan a tray kenin dawhkana ka thingpui tur a dah chu a vai thla palh a, no a keh nghal ţhuai bawk. Amah leh Mîlo chu an ţe ţhawt.

Thingpui sâ a ni bawk nen a intih nat leh nat loh chu an zawt vat a, tu a mah pawh chhang lo chuan a dim zum reng ringawt.

No keh vel midangin an then chhungin bathroom a mi chhuat hrukna tur ka la a, a inthlahrun vanga a ngawi reng chu an hnem ve tliar tliar bawk. A chet buai theih zia an hre hlawm bawk a, an phul hlut phah lo.

Chhuat hruk ka tum chu min lo dangin, "Keiman ka lo hru ang." a ti sap a, mahse hruk tir ka tum lo.

Ka hruk lai chuan midangin titi dang vawrhin an chet chhiatna te an sawi a, Malsawmpari rilru a la peng zo meuh lo a niang chu, a dinna ngai ah ngawi rengin a ding.

"Tawlh sawn rawh." Ka tih chuan rang fe hian a kal sawn a, pawnfen fual feng mah se a ke lam thingpui sa in a per ho chu ka hmu thei a, a kâng niin ka hria.

Ka hruk zawh hnua ka indah fel hnuah pawh a la chhuak lo, a lo la ding ve reng. Kâng dawmdawi dang nei hek lo le,Bathroom aţangin toothpaste ka la chhuak a, "I keah khan hnawih rawh." ka tih chuan a la lawk lo, eng nge maw a hriat pek ni!

"A na lo." a ti deuh tlat a, midangin hnawih tura an lo nawr ve takah chuan khumah ţhuin a hnawih ve ta hram. Kâng a haw viau a ni mahna, a perna chin chu a hriat khawp mai. Nâ a tih hmel vak loh thung.

Zuata chuan dam dap mai hian,"Fakpuia ta tur pakhat lo lak tir leh la, no te chu an ngah em mai hrehawm tih phah reng reng suh. Hei ti hian a fai leh vek a ni mai lawm." a ti a, a sawi zawh hnuah ngawi rengin a chhuak a, a chhuah lai chuan kan lo ngawi ţhap.

A chhuak fel ta maw tihah Hminga chuan, "A ke te kha a durh lo maw le, a sa ang reng si." a ti nuah nuah a, durh êm chu ka hmu loin ka hria.

"Kan inah a la ti keh ve lo hlauh." tiin Ţana chu a lo uang a, an inah kan la leng khawm ngai tlat lo. Kan inkawm khawm tawhnaah chuan thil a tih chhiat loh leh a inti palh thûl. Henu hi chu a mak ve ngawt mai.

"Nuam lo a tih ve em kha, mihring hi che chhe chi hi an awm ve hrim hrim a, hetah a la tlangnel ve bawk si lo, kan dawm thiam viau a ngai a nia." Zuata'n a ti a, an pawm tlang a niang chu an sawi zui lo.

"Nang pawh nelawm tak khan awm rawh, kan ţhian zingah a rawn tel ve tawh a, nangmah vangin inthlahrung deuhin a awm thei a nia." tiin ka dar a beng thuk thuk a. A sawi chhan ka hrethiam, zanina a chetsual khan inneitu ber ka ni chungin eng thu mah amah hnem nan a chhah chhuah ka nei lo, a ngai ka ti lem lo bawk.

Kawngka bawk rawn inhawng lehin Kimtei a ni thung.

"Sawmpari a zak lutuk a, a ke lam a lo kâng deuh bawk nen Zuitei nen an haw ta mai. No a tikeh tih a sawi laia a zah zia chu a khawngaihthlak zawk. I nu a lo awm ve bawk si." a rawn ti lut bawrh bawrh a, a thingpui min pek ka lak hnuah khumah a ţhu ve a, ani ri phawng phawng chi a ni bawk a, "I pi chu tlawh tu ka rin ai a ngah daih, na em em a ni khan ka hre si lo." a ti zui a, a awm ve tho. A chanchin kimchangin ka hrilh ngai hlawm si lova, nidang anga ka chhungte dam lo rawn tlawh ve leh mai turah a inngai deuh a ni mahna.

Zuata chuan,"Mak ţhin phawng phawng sia aw, an kum a tam tawh a tlawhtu pawh a ngah ve ang chu. Bakah biopsy an la tih te kha i hre ve na nge." A ti a, Kimtei lah chuan,"Kha kha Fakpuia pi insawina a ni tih ka hre reng reng hleinem." a lo ti then. 

Kimtei'n a chhuah dawn chuan thingpui kan inzawh hunah chhuak phei ve tawh turin min chah a, inleng ho pawh an haw rêm deuh tawh a nih hmel.

Ka va chhuah ve chuan ka pa'n naktuk lama URinpuia te an rawn haw tur thu a sawi a, ka pi he ti hi a ni si a, ka pa'n a chah a nih zawk mah ka ring. Christmas leh kum thar hmang turin an rawn haw hman ţawk ţhin a ni si a, an chhungin an ni dawn bawk nen rei an cham theih a beisei awm chuang lo. ULyni te erawh naute a dam loh avangin an la rawn lang leh ta miah lo. Ka pi dam loh tirh khan ka awm loh hlanin an lo leng tawh a ni awm a, mahse chaw an lo ei law law a nih loh chuan an leng rei hman meuh lo.

Inlêng an ţin vek hnuah ka pi room-ah mu turin ka lut ve a, ani chu a lo mutui tawh khawp mai. A dam loha a ka riah pui aţanga ka tih ziah danin a khum bulah kalin a kut ka vuan a, ka ţawngtai leh.

Han chham duah tur pawh ka hre lo, a damna ka dil tawp a. Ka ţawngtaina chu ka ring tawk bawk a a dam vat pawh ka beisei tlat. A dam thuai ka ring a ni.

Ka mut hmunah chuan phone khawih ka la meng reng a, Elii nen kan inbe bawk. Dar 12 a pel tawh a, zaninah a ţhiannu birthday party ah chuan an kal a, a tir atang tawhin kalpui tura min sawm lawk tawh a ni,mahse ka pi avangin chhuak thei ka ni si lova, a ţhiante nen an kal ta kha a nia. Phone Khawihna hun a la awm leh lo bawk nen chin kan la inhrilh leh lo hrim hrim.

'I pi chu kan lo ţawngtaipui ve reng a nia.' a ti a, a damna min dil pui an tam bawk a, kohhran pawhin min ţawngtaipui, a mimal tak pawhin ka rinna a ka chian avangin a dam thuai turah ka ngai hmiah bawk.

'Zanin chu a nuam bawk em' ka ti a, text message hian thui tak takin kan inbe khat. Phone call hi kan hmang tam zawk. Mahse tun ang zan reiah chuan kan la inbe ngai lo a, ka pi room ah ka awm bawk nen a message tur ka typr ve mual mual reng a. Ka mitin a zo lo mai dawnin ka hria. Ka mit zawn kual vel a na nghal ûrh thei mai.

"Nuam ve tho, kan ţhahnem lutuk lo a, mahse nangmah chu awm ve la ka ti tho.' a rawn ti a, sticker inti cute deuh deuh a lo thawn tel chuan min ti ve suk suk mai.

A message tur ka type laiin number save loh aţangin message ka dawng a, mahse ka type laklawh avangin ka en lawk lo.

'Ka ai awhtu an awm lo beisei ang.' Ka va ti a, ka sawi chhan hrethiam zetin emoji lei chhuah vak lem a rawn thawn ţeuh a.

'Nakinah ka rawn chhui leh vek dawn a nia.' Ka ti fiamthu a, ani pawh a nuih a za viau a niang chu voice message kherin a nui ri chu a rawn thawn a. A thawm midangin an hriat hlau hmel zeta a rawn nui chuan ka nuih a ti za letling.

Voice message bawk chuan,'Scan chhuah vek pawh ka ngam.' a rawn ti a, a nui zui kar kar baam. Zan a rei deuh tawh a naktuk class kal a ngaih dawn avangin sawi zui thui lovin kan inbiakna kan duh tawk a. 

Kan inkawpna la rei lo mah se a rintlak viau dawnin ka hria, keimah lam hi chu ka inveng thei viau zel. Ka awm anga awm ve tura ka phût avangin ka thik thu ka tilang ngai lem lo. Ven ngai a ni lo a ka hriat avanga ka bialnu ni tura sawm pawh ka ni reng a. 

Phone ka dah hma chuan number save loh aţanga message lo thleng chu en a, Malsawmpari niin a inthiam loh thu chu sei deuhin a rawn thawn a, chhiar pawh ka chhiar kim lo.

'A pawi lo.' tih zawng ka thawn a, ka message chu a en nghal tih hriat takin a inthawn chhuah rualin a in blue tick nghal.

A number hnuaia typing tih ka hmuh chuan WhatsApp aţangin ka out ta daih, ka mit a kham deuh tawh bawk a ni.

"I pi chu ka lo ţawngtaipui ve dawn nia." tih hi notification aţangin ka hmu a, ahnen aţanga ka thu dawn beisei loh deuh a nih vang pawh a ni mai thei chhang ta mai lo chuan ka en vung vung a, min ţawngtaipui duh a nih chuan lawmawm lamah ngai leh phawt ang.

Ka message chu ka hawn sak a, kutzungpui ka thawn zawhah phone chu off nghal ka mu ţha a. Ka lu chu a nuam tawh lo tak zet. 

Ka lu na mi tur ut ut avangin ka muhil lawk thei lo. A khattawkin ka pi chu ka va check leh ţhin a, a hnar zawnah a thawk leh thawk loh ka en ziah ti ila a sual lo ang.

Zanlam ka mu tlem bawk a zingah pawh mit men a nuam viau lo. Tha tho vak lo chuan hna thawhna lama kal turin ka insiama, U Joela chuan chawlh ka duh chuan chawl mai turin min ti mah se vawiin lamah U Rinpuia te an awm tawh dawn tho a, ka chawl duh ta lo.

Nidang ang bawkin ka seat ah chuan ka ţhu leh veng veng a, zirlai ţhenkhat inbe su su reng thawm chuan ka mut a ti chhuak viau bawk. Ka tarmit chu vuahin ka chhing reng a, mutthilh hman erawh a ni lo thung. A khattawkin min ko leh ţhin a, mut chhuakin mi zem chiai chiai reng bawk nen ka ţawng chu a nelawm loh viau bawkin ka ring.

Chhun chawlh hun a nih ve leh ka chhuak thla a, zirlai pawh pakhat chauh a awm tho bawk a U Joela hnenah pawnlamah ka chhuah lawk tur thu hrilhin dawr kawtah chuan ka ding ren rawn a. Tih tur ka hria pawh a ni hran lo, awmna ngaia awm reng kha ka ning ve rih bawk a ni.

Ka hawi kualna lamah Malsawmpari bawk ka han hmu leh, a thawhna dawr ni a a sawi kawtah chuan mipa pakhat nen dingin an inbe mawlh mawlh a. Kei lah eng ka hria ni maw ka han en ve reng ringawt. 

Kawng ân mai ni ve tho mah se inhnai vai lutuk a ni chuang lo, kawng dung chinah kan inhmu phak a nih ber zawk chu.

Chutia ka en reng lai chuan ka dara min khawih tu an awm avangin ka hawisawn ve chauh a, Hruaii chu ka bulah a lo ding fel at. Tun angah a lo kal ngai si lova eng ti tura rawn kal nge maw a nih reng reng ni.

Ka phone a rawn rik ve nghal avangin be ta lo chuan ka nu phone call lo kal chu ka chhang a, URinpuia te an lo thleng chiah a ni awm e. Ka pi pawh a drip khai a zo deuh chiaha a mutthilh thu a sawi a, rei inbe loin kan duhtawk thuai.

"I va hma ve." Ka tih chuan vawiin school an chawlh avanga rawn kal hma a nih thu a sawi a,a peih ţhin hi ka lo ti khawp mai.

"Va lut rawh ka la lut dawn lo." Ka ti a, ani lah chuan eng nge ka tih dawn tih min zawt leh ta hram.

"Thil ka ei dawn, U Joela a awm kha va lut chho nghal rawh."

"Kei pawh engmah ka la ei lo ka lo kal ve." Teh tlat ţhin hian a! Lo kal ve suh intih ngawt chi lah ni lo chuan.

Nidang a kan ei ţhinna a mi ho ka hne deuh tawh avangin dawr dangah ka kal a, a hla chuang lo bawk a kein muangchangin ka pan a, Hruaii chuan ngawi rengin min zui ve zel bawk.

Dawr kan luh hnuah ei tur kan chah zui a, "I mu ţha vak lo a ni maw...." a ti a, ka tarmit la thlain ka mit ka nuai nawk nawk chu min lo en reng.

"Ţha a ni mai ang chu." Ka ti a,min en reng mai bawk si a a va zia lo ţhin tak!

"Ka va hmuhnawm awm ve." Nui deuh chunga ka tih chuan, eng danga min chhang ta lo chuan,"I chauh hmel lutuk." a lo ti daih a. 

"Ka chau hleinem."ka ti a, a awih loh hmel ngang mai,"I hmelah a hriat vek a lawm,thil i ei ţha lo hmel bawk si."a ti leh a, ka chhang zui tawh lo.

Kan thil ei chhung zawng chuan a ţawng ka ngaithla a ni ber e. A chung chang chu ka zawh ngai hauh loin a sawi deuh vek ti ila a sual tam lovang.

Ani pawh a fanu chu a hrisel lo hle a ni awm a,mahni chauh a fa enkawl hahthlak zia leh a rilru a hah ve ţhin zia te chu min hrilh ta ţeuh. Lo hnem dan ka hre lova, hnem ka tum lem lo bawk.

Zuata hnen aţangin a fanu chu a pi te kutah a dah chawt ţhin tih ka lo hre tawh. A khawi zawk nge dik a dik lo pawh hriatthiam a har mai dawn a lawm le.

Kan let leh chuan zirlai pawh an lo thlen belh nual tawh. U Joela thlakin ka seat ah ka ţhu leh ren rawn a, vawiin zet chu ka lu lam nawm loh vang nge ni nî a rei duh ngat ngat khawp mai.

Zanriah pawh ei loh ai tak meuh ka ei. Eng anga hrisel tan pawh mut hmuh ţhat loh hi chuan taksain a haw khawp mai.

In ka thlen chuan inleng an lo la awm ve laih laih a, zanin chu ka inkhalh haw thei ţawk a ni. Ka hmanhmawh loh law law avangin zan dang ai ka thleng tlai bawk. Naupang ho pawh an lo muhil hlawm tawh, an motor chuanna lamah an chau ve deuh pawh a ni mai thei.

Ka lu a nawm loh em avangin ka pi room ah rei lo te kan ţhu tih loh chu ka u te pawh ka be peih meuh lo. Ka nu'n luna damdawi min pek ka ei zawh hnu chuan ka mu ta daih reng a, ka muhil leh lawk thei lo zui, mahse mit chhinga ka mut luih reng takah chuan ka taksain a mamawh ve tawh ngang a niang chu ka muhil zui mai a, harh leh pawh nei miah lovin zing ka thawh meuh chuan ka zâng huai thei.

Tuk dang ang bawkin room aţanga ka chhuah hmain phone ka ban a, Elii message ka en leh hmasa ber. Nizan lam leh Tukin lam a lo reh hmak reuh a, buaina a tawk em maw ni aw ka ti rilru hman.

Ka thawh hma vak loh avangin WhatsApp ah message hnutchhiahin ka phone ka chhuahsan zui a. Midang ho chu an lo tho vek tawh.

"Rawn kaihthawh che ka tum lai tak, chaw ei kan peih tawh a." Ka nu'n min hmuh rualin a lo ti nghal a, midang ko khawm turin choka aţangin a chhuak zui nghal bawk.

UNgaihi, U Rinpuia nupui chuan min hmuh ve leh chuan, "I va thawk nasa ţhin awm ve, hriselna hi ngaih pawimawh hmasak ber tur a sin." a lo ti var a. Tunah chuan ka dam vek tawh thuin ka chhang mai a, ka hriselna ngai pawimawh turin min chah leh mawlh mawlh reng tho.

Ka pi'n a chaw ei tur bika siam a ei zo tawh bawk a, midang zawng choka lamah awmin tukthuan kan kil a, naupang ho an biak tlak tawh hlawm bawk a ka pi dam lo karah kan hlim dar dar viau.

Ka chaw eikham kut ka sil lai chuan ka nuin,"Nimin tlaiah khan Mapuii vahnu kha a rawn kal a, a inthiam loh thu a rawn sawi ţeuh mai a." a lo ti a, midang a chhan hre ve lo ho chuan an lo zawt thuai a, kan no a thlauh keh tih a hrilh hlawm a, an thusawi zui erawh bengkhawn lovin ka pi room lam ka pan ta daih.

Min hmuh chuan min lo nuih var a, a mitmengah erawh a chau deuh tih a hriat viau thung.

"Nizan lam i mu thei em?" Ka ti a, zan lamah hi chuan a mu thei viauin ka hria. Tlaivar thawthang khan ka veng ţhin a ni a, a taksa nâ a chhuah hi ka awm loh lai a ni deuh vek mai a, ka awm laiin a tilang duh lo tih dawnin ila thil ni thei niin ka hre si lo. Mahse ka riahpui erawh chuan ka veng hneh viau chuan ka hria.

"Mu thei e." a ti a, a aw pawh a chau ruih mai. Mahse U Rinpuia te an lo haw bawk a, chhungkua kan kim deuh ţhuau bawk nen a rilru a hlim tih chu a hriat.

"Vawiin chu ka awm nileng ang che." Ka ti a, a natna inhneh tir a tum lo bawk a. Rin ai takin a hmel hi chu hmuh a nuam ţhin.

"Nia....nang tlangval chak ber i awm bawk a, vawiin chu pawn lama awm ka chak viau mai." A ti a, "I taksa in a zawh leh zawh loh ngaichang phawt ila tiraw?" Ka ti a, ka pa te thu a nih loh chuan hetia awm chawt chu khawngaih viau mah ila ka chhuah tir ngawt duh lo.

Naupang ho chaw eikham an rawn lut ve a, Binbina chu khumah a lawn ve zat a, Benjamina a ni a, a u Hlutei hian Binbina ti a a koh ţhin avangin kan ko hlen ve ta vek. An upa ber Sawma hi chu kum 9 hmel a hmu ve tawh dawn a a inti tlangval tawh viau.

Ka pi chu ţawng hah vak chi a nih loh avangin Binbina thusawi chu kan ngaithla reng a, an awmna khaw chanchin a sawi chuan a sawi dik loh lai a u ten an lo sawi ţhat sak ve zel bawk. Kum li a ni ve tawh a, a ha vang nge ni a ţawng a la fiah lo hle a, ţhenkhat phei chu uluk deuha ngaihthlak loh chuan a hriat mai theih loh ţhin.

U Ngaihi naupang ho damdawi pe tura a rawn luh takah chuan ka chhuahsan a, ka chhuan dawn chuan Bimbina'n, "Apate hna i thawk dawn lo a mi?" a rawn ti a, inrinniah chuan kan chawl ţhin tih ka sawi chuan ,"Games kan lo khel!" a lo ti var a, anu'n a lo khap vat bawk.

"Thu inawih phawt chuan." Ka ti a, an lo 'yes' rang ngei mai.

Ka pa hnenah ka pi pawn lama awm tir ka sawi chuan a lo pawm ve mai a. Ka pi kan hruai chhuah hmain naupang ho ka room ah ka luh pui a, computer hmaah chuan an ţhu ţhap. Annu in an khawih chin tur darkar a hrilh thlap a, an bu ve tliar tliar chu a nia.

Ka phone ka en leh chuan Elii message ka ngaichang a, mahse engmah a lo hnut chhiah lo. Ka biakna pawh a la en lo hrim hrim zawk. 

Ka room bathlar zau vak loah chuan ka chhuak a, Elii chu ka call a, mahse a ring ral ţhak. Eng emaw dik lo a awm a nih rinna ka nei a, buaina a tawk a nih ka ring ber tawh.

U Rinpuia nen ka pi chu kan zawn chhuak a, a awmna ţhutthleng chawpin a ni bawk a kan dim viau bawk. A ţhutthleng chu mut deuh theihna a ni bawk a a lian viau a, ani pawh a awm hahdam viau chuan ka hria.

Ni lumah chuan U Ngaihi'n a sam te a zial ţhat sak a, a pangpar ho te a hmu leh thei chu a hlim sawt sawtin ka hria.

Ka pi ber pawnah a awm bawk a naupang ho ngaihven a URinpuia a lut tih loh chu pawnah kan awm vek. Mahse ka rilruah erawh thildang daih a awm.

Pawna kan awm reng lai chuan ULyni te chhung an rawn lang ve a, anni pawh lut ta lo chuan an rawn ţhu ve leh. Naupang ho ko chhuakin thla te chu kan han la leh lawp lawp a. Dam lohna vang ni mah se chhungkua inhmuh khawm a khat bawk a kan hlim tlang viau.

Ka pi chu pawna awm pui reng chi a nih loh avangin kan zawn lut leh a. Midang awm remchan lai chuhin Elii te ina kal chu ka rilruk a.

Mahse ka chhuah hmaa a message ka dawn avang chuan ka en leh phawt. Message pawh a ni lo, thlalak zawk.

Hruaii nen a dawra kan ţhu dun lai thlalak kha a lo ni. Niminah khan dawrah rawn kal ve ni se chu ka hmu ngei awm si a, engtin nge maw a lo neih theih daih daih ni tih chu ka ngaihtuah rauh rauh.

Thlalak ka en lai chuan a message a lo thleng leh a,'In sawi fiah pawh i tum lo.' a rawn ti.

A enga mah hmaa inchhuahchhal nghal ngawt mai chu a zia lo ka ti viau. Nizan lama phone ka khawih theih loh chhan kha zingah ka sawi fel vek tawh si a, a rilru put hmang chu ka hrethiam lo viau bawk.

Message thawn let lo chuan ka call ta zawk a, vawikhatna chu a ring ral tir leh ţhak! Eng nge maw a hriat teh reng ni. Ka call nawn leh a, chu tah pawh a la lo.

Vawikhat bak ka call tawh lo ang ti rilru chunga ka call leh chuan a tawp dawnah a rawn la ve hram. A awmdan chu ka huat zawng tak a ni, amaherawh chu keima lam fel loh hmasak a nih avangin a dawh tu zawk ka nih a ţul thung.

"Vawiin tih tur i nei em?" Ka ti nghal tawng a, a chhan pawh hetiang lam hi chu hmaichhana sawi hian a fel awlsam ber a ka hriat vang a ni.

"Nei e." A ti teh hmuk a, "Ka lo leng ang." Ka ti lui ve tlat. Chu tah rawn thaw hawkin,"Eng nge i rawn tih dawn?" A ti leh nghat a, ngeiawm lam rawng a kai lek lek.

"Insawi fiah turin min duh a ni lawm ni?" Ka ti a.

"A ngai tawh lo." Lehlawi si a.

"A ngai chu a nih kha." Ka ti ve tlat, ţawngkam pawh ka uluk viau, a huat tur zawnga ţawng ka tum lo bawk. Kei ka lo lungawi loh ve zel chuan buaina a punlun mai mai.

"Ka rawn sawi hma khan i tum hleinem." a lo ti ve hmak. "Ka lo kal dawn, kan sawi ţha dawn nia. Ka pi ka'n hmu leh phawt ang a." tiin inbiakna ka ti tawp a. 

Sawi fiah vak tur ka neiin ka hre lo, mahse a lungawina a nih te chuan kan insawifiah mai a ni ang chu. Chu tih rualin biak theih loha a awm kual vel erawh tullo ka ti viau, a naupan chhiat thlak hi ka ti khawp mai.

Ka pi room a ka luh leh chuan a lo muhil tawh a, ka kalna tur ka nu hrilhin ka chhuak zui vut. Pawna UTea lo awm lah chuan min chhaih zuk zuk a, min ti nui ve suk thei mai.

 Vengkhat a awm ni mah ila kan inhnaih lem lo bawk nen Bike in ka kal a, an in kawtah hung ţha in an door bell ka hmet zui a, kawngka an rawn hawng har hrep lehnghal.

A hnu deuhah chuan Elii'n kawngka a rawn hawng a, a khawsa zia chu ka lo ngaithei lo khawp mai. 

"Khaw'nge midang?" Ka ti a, chhan pawh min chhang ta lo chuan a room lam a pan nghal daih. Ka dawhtheihna in a tlin lo lam lek lek a ni.

Bingo thlenga an thawm hriat tur a awm loh avangin amahin a awm a nih chu ka ring ve mai. A room lam a pan daih bawk nen ka zui ve a, vanneihthlak ka ti dawn nge a room a kalh lo hlauh. Min kalh khum ngat se zawng engmah sawi lovin ka let leh nghal duh hial ang.

Khum lulam ngheng chuan a ţhu a, a hlim lo tih lah a hmel zawng zawngah a hriat nghal theih. Keimah ka nih avangin a thup buai lo a ni mahna. Kekawr bul chhing tê mai a ha a, a ţhutna lamah a mal zawng zawng a lang deuh vek ti ila a dik ber ang. Kawr ban bul a ha bawk a, a kawr hak a len deuh avangin a din kha chuan a kekawr bul hak a hliah vek.

A bulah chuan a ţhut ang chuan ka ţhu thla ve a, ka awm ve tih hre lo ang hmakin a phone a khawih bawk. Heti taka a lungawi loh khum turin tih dik loh neiin inhre lo mah ila a lungawi loh chhan keimah ka ni ve miau bawk si.

"Nimin kha chu ka thil ei tur min lo zui ve mai a nih kha, anni pawhin a la ei bik lova. Bakah ka zirlai a nia thildang kan inkarah a awm lo." Ka ti nghal a, ti khan ka sawi tur chin chu ka sawi zoin ka hria. Zan lama phone ka khawih loh chhan ka hrilh sa tawh bawk a, tikhan a buaina chu ka chingfelah ka ngai.

"Nuthlawi lehnghal." A ti sap a, a ţawngkamah chuan a ngai nep hmel viau bawk. A phone chu a la en reng, ig ah video a en kual vel mai mai niin ka hria.

"Nuthlawi pawh ni se a ril a tam ve thei tho a lawm." Ka ti a, Hruaii ka ţan lam ni loin a ţawngkamin a hnuai chhiah reuh em avanga chhang ve mai ka ni.

"I ţan a nih kha." Tih nghat pahin phone a off a, a kut a kuangkuah hmak bawk.

"Ka ţan lam a ni lo, kan pahnih inkar tibuai thei turin eng nihna mah a nei lo. Ka insawifiah ţha viauin ka hre tawh a, engin nge i lung ti awi lo?" Ka ti a, melh pawh min melh lo chuan a hmui a ti sawi zauh ringawt. Ka run tawk a tling viau bawk.

Boruak hipin ka thaw chhuak leh hawk a, "Ti teh...ka chau ve teh mai a nia, i lungawi lohna i sawi loh chuan engtin nge ka tih lungawi theih ang che." Ka ti leh a, min rawn en ve ta hram.

"Midang hruai ve tur an awm thlawt lo em ni?" A ti ve ta a, a sawi awmzia ka hriat takah chuan ka nuih a za ang reng, a lo thik viau a nih dawn hi.

"Amah pawh kha dawr kawta ka hmuh chawp a lawm." Ka ti dam dap a, a inthlahdul deuh tawh tih ka hriat takah chuan ka kuah a, ani pawh a awm hle hle.

"U Hruaii chu a zei bawk si, i duh daih emaw ka ti hman a." A tih tak sapah chuan ka lo thaw huai, "A zei leh zei loh ka hre lo, i zei ka la ti ber." Ka tih chuan ka nâkah min sik vak a, a kut chu ka man sak vat bawk.

"I inti zei e." tiin a nui ta var var a, chu chu remchangah lain ka fawp a, ani pawhin min lo hnial lo nasa. A zei ka tih kha dawt ka sawi lo, mipa zawk pawh min ti phur hat thei khawpin chet a la thiam tlat ţhin. Mahse sex hman pui ka tum ngai lo thung. 

A awmbawr ka tawh lai chuan ka kut a rawn vawn hnana min fawp uar viau bawk. Khuma la ţhu rengin ka mal chungah a ţhu tawh thung a, a kekawr hak a bul bawk a a mal chu ka chul hauh hauh. A vun a mamin deh a nuam viau bawk.

Nawr lui ngat ila chu min hnial bikin ka ring hauh lo, keimah avanga a taksa danglam lai remchang a lak a nuam lo chen pui kha ka tum ber a ni tlat lo. Mahse a chang chuan amah zawk hian chu thil chu a duh zawk emaw tih tur khawpin a duh thawh ve ţhin a, ţawngkain sawi lo mah se ka hrethiam ve thawkhat. Mipa zawk ka ni bawk a insum har tih lek lek chang pawh ka ngah. Ka nupui a nih miau loh avangin ka la insum thei ve zel chu a nia. Tisa chakna phuhruk chak vang chauh a ka nupui ni tura sawm ka tum hek lo. Hunin a la her chhuahpui ve mial mahna.

An inah chuan ka leng nileng deuh ţhak a, midang min chim buaitu an awm lo bawka a hahdam thlak viau bawk.

An in atanga ka chhuah dawn chuan thu ka chah leh thlap, "A hma pawhin ka sawi tawh a, ka sawi nawn leh ang. Nimin thil ang te kha thlen tir ka tum vang ni hauh lovin hun in a herchhuah pui ve leh thei, tun ang hi chuan awm tawh lo turin ka duh che. Tleirawl inngaizawng kan ni tawh lo a, intihtauh khum hmasak hi a ţul ber ţhin lo. Tun ţumah kha chuan ka thiam ka inti lo, ka pawm. Phone call lak duh loh tih vel kha chu ka duh zawng a ni lo, a chhan ka hriat ve si loh phei chuan thil ţha lo lam rilruah a lo lang hman a."

"Chuvangin ka thusawi ngaithla phawt ţhin la ka duh, keimah lamah chuan ka fimkhur ve viau a, chutiang a awm ve tur chuan ka beisei bawk che." Ka ti duah a, a lo bu ve nghat nghat. 

In ka thlen leh chuan an lo ri laih laih a, Bektei'n naupang ho a awm pui a, hmeichhe dang hoin eirawng an lo bawl bawk.

Ka pa ho a URinpuia leh UTea te titi pawh chu pawh buai lovin ka pi room ah ka lut a, a lo reh ţhiap. A muhil a lo harh ve leh chiah bawk.

End of chapter 4

✨