BLUEMING 🦋
BY UNKNOWN BELLE
CHAPTER - 5
"I lo thlenna a rei tawh em?" Min hmuh rual a ka pi'n a tih chuan a khumah chuan ka ţhu thla te te a, a kut ria ţhai mai chu ka vawn sak bawk.
"Ka rawn thleng chiah, ka tiharh che em ni?" Ka ti a, ka pi hi hei aia duat theih hi ka chak a, mahse ka tih sak theih chhun a tlem si.
"Nichin deuhah khan ka harh tawh a lawm." A ti a, thaw a la leh te te a, "I bialnu i rîm a ni maw?" A tih chuan ka nui hawk a, a hre thei ţhin ang reng si, ka awmna chin hi chu ka nu te kaltlang pawh hian a zawt vat ţhin reng a ni.
"Rim ve zeuh a ngai ţhin a lawm." Ka ti a, ka la nui reng bawk.
"Sawn te kha ilo thlak ve ringawt ang e,ka lawm dawn miah lo a nia." Ka tih fiamthu na chu ka lo nui ringawt a, rawn sawi zawm lehin, "I u ten kawppui fel deuh an nei a, chhungkua pawh kan lang rualin kan hlim mai a, hmeichhe ţha lo i tawn fuh hlauh chuan chhungkaw min ţhen hrang thei tu an nih hre rengin i fimkhur hle tur a ni." A ti dap dap a.
"Nangman min thlan sak ang chu." Ka tih chuan, "Lerh suh aw." A lo ti a, kan nui dun hak hak, ani chu a hah deuh mai zel avangin thu han sawi tir vak chi a ni lo, ka hna chungchang te chu ka sawi pui a. Ka bialnu rawn hruai tura min tih chuan ,"A zak ang." Ka lo ti ve tlat a, ka fiamthu tih a hrethiam tho ang.
Lehkhabu ka chhiar sak lai chuan a lo muhil a, a puan sin ka siamthat sak hnu lawkah ka pa a rawn lût ve bawk.
Ka pa a awm takah chuan ka chhuahsan zui a, UTea leh URinpuia te nen chuan in kawtah kan inkawm a, tlangval ber ka ni bawk a min fiam zuk zuk reng mai.
"Pu Rohminga fanu kha ka hria a ni aw?" UTea'n a tih chuan ka lo nui mai a, engtin nge a hriat tih ka zawh chuan ,"Ka zirlai a ni ţhin a lawm, bazar ah khan ka hmu che u a, mahse ral aţang chauh khan a ni sia ka rawn be duh ta lo che u a." A ti a, URinpuia chuan tu nge kan sawi hre ve hek lo le, a lo ţhu ngawi ve reng ringawt.
"A hmelţha reuh si a ven reng a ngai lo maw." a ti fiamthu a, "Hmelţha deuh chu ngaihzawn an buai thlak." URinpuia'n a lo tih ve chuan, "UNgaihi hi ţha i ti vak na nge." Ka lo ti a, a nui mai a, chutah, "Kan hmel dik tak ai hian kan nungchang hian kan hmel a pholang zawk a, mipa lam chu lo dahtha ta ila, a bikin hmeichhe tan hi chuan an nungchang hi uluk a ngai. Tunlaiah hmelţha tak tak mahse an nun zahawm lem si lo hi kan tam tawh a, chu'ng lai karah chuan kawppui thlan fuh a ngai khawp mai. Mahni rem hriatna ai hi chuan Pathian hnenah hlan tawp mai ila, annin rem a lo ruat diam mai zel. I UNgaihi nen pawh hian thlathum vel bak kan inngaizawng hman hleinem, a lo rem chho nghal diam mai a ni." A ti dap dap a, UNgaihi nen an inngaizawng lai ka hre mang lo reng a ni. A bialnu ni a ka hriat ţhin nen erawh kum 5 vel an inzui ve hman.
"Elii chu school ah pawh a lar ţhin a lawm, zirtirtute zingah pawh a tla na an ti ţhin." UTea'n a lo ti ve leh. Chutiang thleng chuan ka hre ngai lo, mahse ka awih lo chuang lo. A tun hma nun lam ka ngaihven ngai lo bawk a, tu nge a lo kawp tawh tih lam kha ka ngaihven ber a ni lo, tun hunah hian rilru nen cheng ila ka duh tawk.
Zan lamah chuan ka pa nen kan inkhawm a, chaw ei laiin chhungkaw aiawhin Fakpuia nen kan han inkhawm ang e a ti si a, hnial chi pawh a ni lo. Bektei lah chuan min lo nuih tet tet ringawt a.
Inkhawm hi chu ka peih lo em em pawh niin ka hre lo, mahse inkhawm loh ka chak zawk ţhin.
Bimbina'n min zui a chak bawk a, hma lutuk loah in aţangin kan chhuak ve a. Ka pa erawh dar rik hmain a kal tawh thung.
"Apate computer ah khan games dah belh a ngai a nih kha." a tih chuan ka nuih a za viau a, mahse nui miah lo chuan, "Ti nge a ngaih ang?" Ka ti thuai a.
"A tlem em a lawm." A lo ti then mai. Vawiin tlai lamah pawh amahin a khel a, sap ţawng a inziak a chhiar thiam ţhin si lo. Min auin computer hmaah min dinpui a, "A sawi hi eng nge awmzia?" tih ringawt zawt pawhin min au sek mai a, a nuihzatthlak ţhin a nia.
Kan hnunglam aţanga thawm ka hriat rual chuan hmeichhe aw in, "In va'n tlai ve tho ve." a lo ti a, Malsawmpari chu kan bul a lo thleng der tawh. Binbina chuan a hmelhriat loh a hmuh vangin ka kutah min chelh vat bawk.
"Nia, hma lo." Ka ti ve mai a.
"In chhungte elaw?" a ti a, Binbina a sawina a nih avang chuan ka u fa a nih thu ka hrilh a, Binbina lah chuan, "I sam i khuih lo a mi?" a lo ti khauh.
Ka nuih a za viau a, mahse ka insum hram , a chhan dan tur ka hre chak ve hrim hrim bawk. A sam hi a ti pheng viau pawh a niin ka hre ta lo, a pianpui sam kir ve hian a tilang hnawk niin ka hria.
"Nia....a mam thei lo a." a ti ve mai a, a sam chu a chul thuak thuak bawk.
"I van fel ve a, tu nge i hming?" A ti leh a, pakhat lahin, "Binbina." A ti var a, "Kum nga ka ni tep tawh." a ti zui a, a ţawngduh reuh ţhin lutuk hi ka lawm ţhin, a u te pahnih erawh an zakzum viau thung.
A ţawng fiah vak lo bawk nen Malsawmpari pawh chuan a nuih hak hak a, a hmaiah a piai sak zauh bawk. Biakin kawt kan thlen hnu chuan Malsawmpari chu a lut zui a, keini chu a te zawkin tui in a rawt avangin kan kawi leh rih.
Tlar hnunglamah chuan ka ţhutpui a, ka bag a mi Bible la chhuakin a hnunga map chu a en reng a, zawhna min zawt leh su su ţhin bawk.
Kohhran ho ţawngtai inkhawm zan a nih angin ţawngtai rualna kan nei a, ka ţawngtai lai a Binbina ţhawngtai thu lo chham ve chuan min ti ţawngtai rei hman lo hrim hrim.
A khattawkin 'Aw Lalpa' a ti ve leh hluai ţhin a, kan hma lama ţhu te pawhin an hriat ka ring. 'Binbina ápi hi lo dam tir rawh.' a tih chu chiang takin ka hre leh a, ţawngtai dang thawm a reh deuh takah chuan a 'Amen' mai bawk.
Biakin ah an hruai ţhang tih hriat takin a ninhlei lova, chhuah a ngen lo bawk. Thusawi tawp lamah erawh anu hlauh ang ngeiin a muthlu a, kan inpawm haw a ngaih hmel.
Inkhawm banah chuan Azela leh Zuata ten min zui haw a, Binbina chu ban dawnah rawn harh tho mah se a zawi em avangin ka pawm haw ta tho.
In leng dang an awm nual avangin ka room lamah kan lut zui a, Binbina pawh anu'n a rawn la thuai bawk.
Bektei'n thingpui min lo pe a, Zuata'n a lo fak zeuh chuan a lai chhe leh viau. Bektei chhuah hnnuin AZela lah chuan, "Bektei hi chuan a chhun lo ve ngawt mai." a'n ti thla rawk a, "Engah chuan maw?" ka ti thuai.
"A lerh lo bik em a lawm, midang ho hetiang a inzahzum viau pawh ka hre si lo." A ti a, midang pawh lerh han intih bik chu a dik ber lo mai thei, mahse Bektei ang em em a zakzum kan ni lo chuan ka hria. ULyni, hmeichhia ve tho a ni a, ani erawn mahni lu zo vehvawh a ni thung.
"A ţha daih zawk, chhungte tan a thlamuan thlak zawk." ka lo tih san a, Zuata'n,"A lerh mah hlauh nak laia." a tih chuan kan nui leh ta vek. Ani hian a la nghak chhuak khawpin ka ring.
Inkhawm kan ban hnu deuh lawkah U Lyni te an haw a, U Rinpuia a awm tho bawk a thlah pawh ka thlah ta lo.
Zuata leh AZela te nen In chung lamah chhoin zial kan zu a, ka guitar, ka lak chhuah khat em em chu perhin kan zai ho a, a nuam phian mai. Lung te pawh a leng dawn rum rum mai.
Kum 12 ka nih lai vel atang khan music instrument hi ka khawih nasa chho viau a, kan ţhian ho pawh khan kan inzir ve nasa ţhin. Kan han rawlthar chhuak chho kha chu kohhranah pawh kan ţangkai ve tawh vet vet viau.
Tunah chuan a hma ang em emin atchilh tawh lo mah ila chanvo min pek erawh kan la tihlawhtling chho ve leh zel chu a nia. Kan hmeichhia te pawh hi anmahni tawkah an zai thiam ve viau, mipa lamin music kan tum a,anni an zai a, nuam kan ti tlang ve ţhin viau. Mahse zirna leh eizawnna avang bawkin kan awm hran a ţul ţhin a, tun hnu hian han zai ho pawh kan nei khat tawh viau.
Dar 11 rik dawnah an haw a, URinpuia a awm tho bawka zanin chu ka room lamah ka riak leh rih.
Hmeichhe ho an mu diak tawh a, ka pa leh URinpuia lo titi mawlh mawlh ka hmuh chuan ka va ţhu ve a. Ka pa chuan ka pi chu a chuap a cancer a nih an rin thu a sawi chu ka hre hman a, eng emaw rit deuhin min delh dawt ni mai hian ka hria. Chuap cancer vei turin mei a zu ngai si lo, a ei leh inah a fimkhur viau bawk, nikum lam aţang khan thawhah neih zeuh zeuh a ching a. Mahse a in enkawl ţha ka tih tawh kha, chauh pui tham khawpin a nei ngai lo bawk.
Ka pa thusawi chu ka awih lo viau a, mahse ka pa thung chuan,"Natna te hi mihring te dan theih a ni lova, kan hriselna kan ngai pawimawh viau a nih pawhin kan taksa ah natna awm thei lo bik a awm phah chuang lo a. Kan chunga thleng tur hi chu eng ti kawng pawhin a thleng tho tho mai ţhin si a, chuvangin eng dinhmunah pawh lawmthu sawi thei kan nih tul reng a ni." A ti dap dap a, ka la pawm ve thei chuang lo.
Natna eng emaw a neih chu ring tho mah ila cancer chu ka la ring phal lo a ni. A result a chhuah hma chu ka pawm duh lo. Kan doctor rawn ber hi ka nu hmelhriat a ni a, a lo ringhlel ringawt pawh chuan ka awm a ti nuam lo.
Ka pa bawk chuan, "Mahse kan ţawngtai anga, Chunglamin rem a tih chuan eng natna pawh lo nei se a tidam thei vek a lawm." a ti a, kei pawh chu miah chuan ka rinna zawng zawng ka nghat ti ila a sual lovang.
URinpuia chuan rei an cham theih dawn loh thu te a sawi a, a hna bakah naupang zirna chawlh tir reng a rem loh vang a ni ber.
*****
Vawiin hi ka pi test result lak ni a ni a, URinpuia a awm avangin kei chu ka hnathawhna lamah ka kal a, ka pa leh URinpuia chu result lam turin an kal thung.
URinpuia te naktuk lamah a hnahthawhna lamah let leh an tum si a, khua anti har lawk khawp mai.
Chhun chawlh lai chuan ka pa ka bia a, an rin ang ngeiin a chuap a lo cancer bawk! A stage pawh a lo sang viau tawh a ni awm a, mak ka tih em avangin ka chhang mumal pawhin ka inhre lo. Hetiang natna hi tumah tuar tura ka duh a ni lo, k pi tawrh a tan ngat phei chuan ka duh lo hul hual.
Ka pa chuan ka pi an hrilh rih lo tih min hrilh a, a chhungte kan pawimawh viau tur thu a sawi lai chuan ka lo inhum ruh ngat ngat. Chunglam rorel dan chu ka pawm lo hlawm tawp ti ila a sual lovang.
Kan hna bân hnuah pawh haw lawk lovin kawng reh deuh lai veng ţhenkhat lan chiannaah ka ding reng. Rilru buai nuaih anga ka awmna karah ka ruak hûih a, ngaihtuah tur ber pawh ka hre lo. Ka ngaihtuahna hi a ruak vek ni maiin ka hria.
Bike bulah chuan ka ţhu reng a, meizial pawh ka zu ral hnem hman viau bawk. Darkar khat vel chutia ka awm hnu chuan ka phone a rawn ri a, ka pa hnen aţangin a lo ni.
"Bawiha i va rawn thleng har ve, kan ngaihtuah che a nia. Buaina i tawk em ni?" A rawn ti zui mawlh mawlh a, ka bana ka sana bun dar zat chu ka en vut bawk. Zandanga ka thlen hun a pel daih tawh reng a ni.
"Ka lo haw mek, ka chawl kawi lawk a." tiin ţha tak chuan ka chhang a, ka nu nen min lo la nghak tih sawiin kan inbiakna kan duh tawk a, in a haw chu ka phur lo kher mai.
Elii message pawh hmu mah ila ka chhang rih lo,zing lama kan inbiak bak ka la be leh lo,ka be chak rih lo a ni zawk mah. Mahni chauha awm ka duh ber.
In ka thlen chuan ka nu leh pate chuan min lo chhawn vat a, an hmela min ngaihtuah zia ka hmuh chuan chin hrilh miah lova ka haw tlai chu ka inthiam lo khawp mai.
Ka pa'n ,"Zanin chu i u a la awm bawk a, nang chu i room lamah awm hahdam rawh." min ti a, ka helmet ka dah pah chuan ka bu nghut a, ka ţawng zui chak lem lo bawk.
"I pi bulah chuan pangngai taka awm i tum dawn nia." Ka nu'n a lo ti ve bawk a, bu nghutin ka room lam ka pan zui a, ka tha thona zawng zawng hian min kian san vek niin ka hria.
Mut hmunah pawh chuan ngaihtuah tur ber hre loin ka mu meng kar a, Mîlo lah chu a mutui tawh nasa mai. Alam hawia inlet thukin ka chul a, amah anga engmah lungkham neih lova mutthilh hle hle theih chu ka chak tak zet.
Ka mu tlem bawka zingah pawh ka harh hma khawp mai. Ka muhil mang lo ti ila a dik zawk ang.
Midang an la thawh dawn loh avangin phone chu ka ban vut a, dar 5 a pel awrh chauh a ni.
Elii message ho chu ka en a, engmah chin ka hrilh lo bawk nen ka inthiam lo rilru khawp mai. Ka po natna leh kan hriat dan te chu online lo mah se ka hrilh ve ta vek, a hriat ve chu a pawina awmin ka hre lo.
Ka biak loh chhan ka sawi fel hnu chuan status ho ka en thla diat diat a, ka en tam tak zingah chuan Malsawmpari status a awm ve a, Lalduhsaki'n Ralmuanna tlang tih a sak changhnihna hi a ni a. A status hi ka en sak ngai lo nge a nei khat ve hrim hrim zawk ni. A status tawi te mai chu ka ngaithla nawn tlut tlut a, min hneh viau pawh a ni hran lo, mahse ka sawi fiah thiam si loh min mawlh tlat tu a awm tih erawh ka hre thung.
Ka mut nin takah chuan ka tho chhuak a, ka thawmah Mîlo chu lo harh vein min zui chhuak ve nghal a. Tun anga hmaah ka thawh ngai loh avangin pawn boruak hip turin ka chhuak a, boruak dai leh reh ruih mai hnuaia awm chu a nuamin a hahdam thlak tak zet a ni.
"I van tho hma ve." Kawngpui lam aţanga thawm ka hriat chuan ka phu chhuak ţep. Tun angah tuman min biak ka beisei lo. Zinglam exer la ţhenkhat hmuh tur an awm tawh thung.
Malsawmpari chu enin,"Nang pawh." Ka ti ringawt a, ka bul a rawn thleng chawpchilh nghal.
"Ka mu thei lova, ka duh ai ka tho hma." a ti a. Ani chuan a mut theih loh thu a sawi mai a, sawi chhuah ve kher hi ka harsat tlat ţhin. Midang te tana ho deuh anga lang hi ka tan chuan a sak ţalh ţhin reng a ni. Ka rilru put hmang ka lan chhuah tir zen zen lo ang bawkin a zawng zawng ka sawi chhuak ngai lo bawk.
"Kawnah han chhuak ila? Thingpui han in ila?" a ti a, ka rilru te te chuan nangmah khan han kal mai rawh tiin ka chhang, mahse amah bawk rawn ţawng lehin, "Mîlo hi i hruai dawn chuan ka'n pawm teh ang." tiin a kal zui daih a. Ka zui lawk lo. Heta awm mai mai hi ka chak zawk. Ka pi avangin rilru a thawveng tak tak thei chuang lo a, intih thawven luih pawh ka peih lo law law.
"Lo kal rawh? Keiman ka lei sak dawn che a lawm lo kal rawh." A kut lema min lo hui zauh zauh paha a tih takah chuan tih tur dang ka nei lo bawk a muangchang chuan ka zui ve a, tun ang huna ka hmu hlawl hi a mak ka la ti reng.
Ka titi pui chak lem loh avangin a kalna hnuah chuan muangchangin ka kal ve zel a, a mut theih loh thu sawi siah chuan a harhvang zawk hi ka lo ti khawp mai a.
Chutah ding datin a rawn leh hawia,"ka lo nghak ang che." tiin a ding a, ka zui ta kher kher chu ka inchhir tawh viau bawk. Mahni khan lo awm hle hle ila a nuam ka ti zawk daih awm si a.
"In kawta awm reng ai chuan a nuam hrim hrim." a ti var a, a bul ka thlen dawn hnaiah chuan inherin Mîlo pawm chung chuan kal a rual a, pen thum awrh a pen hman ang tihah chuan a hma lawka pot chu a chhir tlu nghal a, amah pawh a ding chut.
Pot a lei chu a baw nuaih a, min rawn enin hlauhthawn hmel deuh hian, "Ka tih luih a ni lo." a'n ti nghal ringawt a. He nu hi chu aw..... A awmna a piangah hian che sual ve ziah ringawt mai. A phawsawlj vang ni berin ka hria.
"Lo pawm lawk." tiin Mîlo chu min pe a, pot chu a lian lo nain lei chu a baw nual a, pot a dah fel chiah tihah chuan a neitunu ni awm tak hi a rawn lang hlawl a, kei pawhin a thawm ka hre lawk lo.
"Aw haw....a lo tlu leh tawh elaw." a rawn tih hluai chuan Malsawmpari chu phu zukin a ding nghal at, ka nuih a ti za viau nain a hlauhthawn hmel em avangin ka nui duh lo.
"Aw ...hei,ih....kawng ka lo en lo a, ka chhir tlu palh." a ti sap a, a neitunu lah chuan awlsam zet hian, "A pawi lo inthiam lo duh reng reng suh, midang pawhin an rawn chhir palh ve fo a lawm, a dahna tur dang hi ka hre mai si lova, a buaithlak tak tak, ka khawi ve duh bawk si. Nang ni pawh inkalna turah kal rawh u, ka rawn ti fai ang." a ti duah a, nu thau lam deuh hi a ni a, a ţawngkam chu a fel faiin Malsawmpari tan pawh thawk huaina tham a ni.
A neitunu chu a phiah faina tur laa a kal takah chuan ka kal ve nghal mai a, Malsawmpari erawh a la ding, eng tak chu hria ni maw.
A neitunu a rawn let leh chuan ,"Aw inkal daih tawh ang chu tia, hei ka phiat fai mai dawn a lawm." a ti a, Malsawmpari chuan a hmun phiah len ruhna chu lo chuhin ,"Khawi ka lo ti ang." ti a a nawr luih ve tlat avangin a neitunu pawhin a hnial ta bik lo. Kal tura ti lawm lawm chung pawha han phiah sak kher chu a over thlak hi ka lo ti khawp a.
A phiah fai hnu chuan ka bulah rawn kalin Mîlo chu a la a, "Kal vat ang, ni a rawn lang ţep tawh." a ti a, amah zawk chu a hmanhmawh zawkah a tang leh ang lawi a.
A hmanhmawh kal hlawk hlawk chu a hnungah ka zui ve zel a, a sam kir lang hnawk niai chu a thlah tawp a. Bimbina'n i khuih lo a mi a tih kha min ti hrechhuak.
A sawina hmun kan thlen chuan mi pali vel hi an lo ţhu ve a, zingkar boruak a hetiang hmuna chawlh chu a nawm hmel viau bawk. Kan chawlhna chun chhuna motor tlan hun pangngai chu ni se kawngpui a dip ang tihna tur velah a ni a, nutling pakhat hian chhang a lo kang mek bawk a, a bulah nula pakhat a lo ţhu ve bawk.
Ţhutna awlah chuan ţhuin kan ei tur chu a chah a, engmah inring lawk lo ka ni bawk nen pawisa chengkhat mah ka ak chhuak lo, a zia lo tak tak. A thil order sa han cancel tir leh ngawt chu ni theiin ka hre si lo, engmah ei lo a awm pawh ka pawi ti ll viau a sin le.
Thingpui no hnih leh paratha kan tharlam zet a rawn la a, zingkarah chuan a lang tui hmel zualin ka hria.
"In rawh, aman ka pe vek tawh." a ti mai a, ka chhungte tih loh tumahin ka thil ei man min la pek sak ngai lo, hmeichhia ngat phei chuan. Ka duh loh vang a ni ber, a tlawm thlak bakah thil nih dan tur a niin ka hre lo.
Duh thlan tur dang awm hek lo le, a thil rawn ken chu ka in ve ta poh a, a rimtui zek lehnghal.
"I pi kha eng nge a an tak?" a ti a, hetiang a pangngai taka min titi pui ngam ka ring ngai lo kha a nia, ka ring sual der mai. Min hlau deuh ţhin leh min nel vak loh zia ka hre chiang a, kei pawhin ka ngaina bik lo kha a nia.
Ka pi a rawn sawi chhuah takah chuan ka ngaihtuah ngut ngut te kha tun hun rei lo tr chhung khan min tibuai miah lo tih ka hre chiah. A va mak ngai ve le.
"A zia chu a ni mai." Ka ti a, a hnena sawi chiam khan awmzia a nei lo.
"Pathian remruat dan hi chu a mak ţhin teh e."a rawn ti hliai reuh a, amah nena inhmeh lo deuh deuh hi a chhak chhuak a, nge ka tehna lo dik loh vang zawk?
"Ti hian kan duh dan kan thlen a, kan rinna a kan chian viau pawh hian a rorel danah hi chuan lungawi famkim hi a har ţhin ngawt mai." a ti leh a, a mimal nun nen a sawi zawm ni a ka hriat avangin ka lo ngaithla reng ringawt.
"Mahse khawvel nun ringawt hi ka thlakhlelh ber tur a ni si lova tiraw?" a ti leh a, ani leh ni lo angin a ngaihtuah ril ve hmel khawp mai.
Haw kawngah chuan pen kawina tur ka nei tiin Elii te in lam ka pan san a, Mîlo lah chu ka hruai haw mai ang a tih deuh tlat vangin ka pawm haw tir ta mai.
Elii te in kawt ka thlen chuan an lo la reh ţhiap a, an awmna lam hi zing ni chhuak hmu lo an ni bawk nen a la lang hma viau bawk.
An nula a tho hma ţhin tih ka hriat avangin door bell chu ka hmet tho a, ka rin ang chiahin a rawn hawng vat reng bawk. An nula hi mizo dik tak a ni lo a, nula tihah a upa deuh tawh, senior lam rawng kai a ni tawh mah.
In chhung ka luh chuan a pi leh pu te an zin thu leh Elii chu ala mut thu min hrilh a, Elii u lah zingkarah a hna thilah a chhuak a ti bawk a, Elii nen chauh an awm tihna.
Nidangah pawh min hmuh tawh tho avangin pawimawh a awm a nih ringin Elii chu kai tho mai turin min ti a, ka hnial hran lo. Ani erawh Eirawng bawl turin choka lamah a lut ta thung.
A room kawngka a kalh lo a, a hma pawh a ka lo luh tawhna ţhin tho a nih avangin ka ngampa ve viau. A mutna lam ka pan chu a lo la mutui ngang mai, a room chhung chu a la thim deuh mup a, mut pawh a nuam viauin ka ring .
Thawh a hun tawh tho bawk a tih harh pawh a inthlahrunawm lohin ka hria.
A blanket chhunah chuan ka khuap rûn a, aharh eih lo. A hmel chu ka en vang vang a, a hmelţha thlawt a ni. Keimah chauh ni lo ngaizawngtu pawh a ngah viauin ka ring.
A hmuiah ka fawp zauh a, a harh eih lo. A mu nghet lutuk chu nuih sutin ka sawi dat dat a, a mit rawn mengin min hmuh rual chuan a chhing leh sawk a, a rawn men leh rual chuan a hmuiah ka lo fawp zui a, min chhang let har lo bawk.
Inhmu zen zen hman lo kan ni bawk a kan duh thawh viau, ani pawhin min chhang let ţha ngang mai. A puan sin chu pawt sawnin chunglam aţangin ka delh a, bra a ha lo tih ka hre zawm zat. A bawp pahnih a min lo kherh bet vein min fawp leh a, a uar ve viau. A awmbawr ka tawh sak chuan sexy zetin a thaw hak a, room chhungah kan pahnih chauhin kan awm bawk a thawm a dim lo viau bawk.
Min leh thalin ka chungah a rawn bawk a, a kawr hak pan te chu a hlip nghal bawk. Min rawn fawp zui lehin a kawng a tih chet chuan inveng hman loin ka rum hawk a, ka awm dan chu min nuihin a uar sauh bawk. A taksa nalhin a mam si a, kawr ha lova ka chunga a awm phei chuan thlemtu dik tak a ni.
Ka insum zo dawn ngang lova ka hriat avangin ka leh thal thawk a, ka rilru tih fim ka tum hram hram a ni. Ka pi tih dan takah thil tih loh loh kan ti hman tep a ni.
Ka hmeichhe lo kawp tawhte lakah pawh ka insum thei viau ţhin a nih kha, tunah pawh ka theih loh nachhan tur ka hre lo.
Ka pangngai tan takah chuan a chunga awmin kan inen reng a, "Ka mumang i ni emaw ka ti hman a." tiin a ţhen sak a, nui sukin a hmuiah ka chuk chauh a, ka thawh san ta daih. Kawr a ha bawk si lo ka tan chuan inthiar fihlim vat mai chu a ţha zawk.
Phone kaltlangin hrilh tawh tho mah ila ka reh vang vang chhan chu ka hrilh ve leh ta tho a, ani pawhin lo kan ve a duh thu te a sawi a, a zirlai a theih tawp chhuah turin ka fuih ve bawk. Bektei ang chiahin an zirlai avangin kohhran leh khawtlangah duh ang thalin an chhawr hman loh a, an hun pekna a ni tawh ta sa sa, theih tawp chhuah a zir mai chu an tih tur a ni.
An in aţanga ka haw chuan ni a lo inher sang tawh khawp mai. Muangchang tawh lovin in ka pan a, ka chhungte pawh an lo tho vek tawh.
Ka nu'n min hmuh rual chuan, "Ila mu reng emaw tia." a ti hluai a, midang pawhin ka la mu turah an lo ngai vek a nih hmel. Exer la a ka chhuah thu ka sawi hnuin ka pi room lam ka pan a, ani chu a lo la muhil. A natna ka hriat takah chuan ka hmu cher ta riau mai a, ka hmuh dan a dang lo thei lo. Ka lainat viau bawk.
Hei leh chen kan lo inhrawn tawh a, a natna chu ka huain chunglam rorel dan hi a rawng ka ti tak zet. Anun a tluangin mi ngainat a hlawh em em a, midang tan ui a nei ngai lo, khawvel mi te hi ka pi ang ni vek se chu khawvel nuam tak a ni ang ka ti ţhin.
A natna avanga a taksa tla dâk mai chu ka thlir reng a, a cancer stage sang tawh si a kan hre har lutuk te chuan ka rilru a ti na a, a ţha thei ang ber enkawlna dawng turin ka duh bawk. Tun dinhmunah erawh a taksa a fit loh em avangin damdawiin pan pui ngam a ni lova, in lama inenkawl mai hi atan pawh a hahdam thlak rih bawk a, hei ai tam tihsak theih neih ka chak tak zet.
URinpuia te chu chaw eikham lama muangmara chhuah tum an nih avangin ka chhuak hmasa ta zawk a. An ngaihawm leh dawn hle mai, a bikin Binbina a ngaihawm zual dawn hian ka hria, a titi ve zet zet ngaihthlak tur a awm khan chhungkua a ti hlim hneh ve viau a ni.
Kan hnathawhna lamah chuan nidang ang bawkin mahni ţulna hmun theuhah kan bur leh ngar ngar a, mawng leh kawng a kham duh ţhin viau bawk.
Chhun chawlh kan neih zawh hnu lawkah Hruaii pawh a rawn lang ve leh a, a inchei nalh leh zar zar viau. Nalhin chhelo viau mah se ka mitmei hmuh tumna ka nei lo, bialnu nei lai ni kher lo pawh ni ila ka duh kherin ka ring lo .
"Nang chu i induh thei e." a ti sap a, a ţawng zawi lutuk lo bawk nen midang ngaichangin ka hawi kual thuak a, amah chauh zirlai a lo awm. Tunlai chu college zirlai ho test neih hun lai an a nih avangin chhunlamah kan thawl ţhin viau reng a ni.
A mi biakna pawh ngaihsak lo chuan ka thil tih lai ka tizawm mawlh mawlh a, amah bawk chuan ,"Bialnu i duh naupang si." a rawn ti leh a. Chhan tinah pawh ka tin lo.
"Ka cousin nen an inngaizawng tawh." a ti leh a, min be reng mah se a hmaa computer ringawt chu a en a, vawiin a awm dan chu mak ka ti ang reng khawp mai. Nidang aia a thusawi a dan vang pawh a ni mahna.
"A naupang viau nain a tilawm thiam khawp ang che." a ti leh sap a, "Eng nge maw i hriat le?" Ka ti ta thlawt, ka mimal nun a lo buaipui ve chiam nachhan tur a awmin ka hre lo.
"I bialnu kha ka hre ţhin ka ti mai a nia, ngaih dik loh vak tur pawh a awm lo." a ti leh mai a.
Midang an rawn luh takah chuan kan sawi zui tawh lo.
Tlai lam, khua a la thim lo deuh tihah chuan ka pa'n min rawn call a, ka chhang thuai a, a thu rawn sawi avang chuan ka lungphu a dik lo hmanin ka hria.
Ka pi chu room a amah chauha a awm laiin ll tei chhuah ve a tum a, a taksa chak tawk lo nen a tlu sual ta a, thisen pek a ngai tih a rawn sawi a, ka rilru buaina ber pawh thisen chu ka pa'n a pe thei lo chu a ni.
Ka pi leh ka pa leh URinpuia te hi an blood group an inang a, tunah lah URinpuia chu khawdangah a awm leh daih tawh bawk si. U Joela leh Vtea chu an blood group ka zawt a, Vtea nen an lo inang hlauh, mahse thla hmasa lawka a lo pek tawh avangin a pe thei chuang lo.
Ka pa'n damdawiin lama kal ve phawt tura min tih avangin chaw pawh ei ta lo chuan ka kal nghal a, rilruin thil hrang hrang a dap kim hman viau bawk.
Ka pi amah chauha an awm tir chu ka nu te pawh ka dem lek lek ta mai!
Damdawiin ka thlen rual chuan ka pa'n min lo pan thuai a, ka pi awmna lamah min hruaiin thil thlen dan kimchangin min hrilh zung zung bawk.
"Doctor chuan a tlukna lamah thisen a hloh nual avangin a rang lama ngaihven turin min ti a, blood bank lam kan biakin a blood group ang hi a lo zawh lai tak a si a, anni pawhin an ngaihven tho a,kei lah ka bp a normal loh bakah ka taksa fit tawk lo an ti si a, i ţhiante i be kual mai dawn em ni?" a ti a.
Midang ka be dawn tih sawiin ka kal hrang deuh a, ka pawh pawh ka nu'n a rawn biak avangin chanchin a hrilh ve leh zung zung. Ka ţhiante blood group ka hre vek a, ka pi nen a inmil chu Kimtei chiah, mahse ani chu Delhi lamah a awm daih bawk si.
Vengchhung group a post ka tum lai tak chuan min lo au tu an awm avangin ka hawi chhuak a, Malsawmpari a rawn lang ve leh nawlh mai. Be ta lo chuan Group a ka thu post tur ka type mawlh mawlh a.
"Eng nge i tih a?" a tih chuan ngaihtuah chiang mang lo chuan ka pi thisen petu tur kan zawng ka ti liam puat a, Vengchhung WhatsApp group a kan post a nih chuan tlawm ngai pakhat tal chu kan hmuh leh vat ka ring bawk.
"I pi blood group eng nge?" a tih leh chuan , "O+" tiin ka chhang thuai a, Group post tur ka type laklawh bawk nen ka ngaihven hman lo. Midang tih phawklek te a hlauhawm avangin ţawngkam pawh ka uluk viau bawk.
"Kan blood group a inang a nih chu." a tih chuan ka hawi chhuak zawk, min lo en ve kar bawk.
"O+ i ni maw?" Ka ti leh ngat a, aw tih nan a lo bu nghat.
A pek duh leh duh loh pawh zawt buai lovin, "Lo kal rawh." tiin abanah ka kai a, nurse ka hmuh hmasak ber bulah chuan hruaiin thisen pe tu tur kan hmu tawh tih ka sawi tlang tawp a, ani chuan hb leh bp te check a la ngaih avangin Malsawmpari chu amah zui turin a ti a, a zui ve mai bawk. Kei erawh ka pa awmna lamah kalin thisen pe thei tu tur kan hmuh tawh thu ka hrilh a, ani pawh a lo thaw ve huaiin ka hria.
Rei loah Malsawmpari chu nurse nen a rawn inzuiin thisen chu a pek theih tur thu an rawn sawi a, Malsawmpari laka ka lawmna chu pui tak a ni ringawt. Eng ti tura helai daih daiha lo awm ve nge a nih lam pawh ka zawt hman lo.
End of chapter 5
🌺
Comments
Post a Comment