BLUEMING 🦋
BY UNKNOWN BELLE
CHAPTER - 7
A ţhiante ho pawh chuan min rawn hmuin an thawm a reh diak a, an awm ka ti nuam lo pha ve tlat.
Chhuah ma toi chu ka tum bik hauh lo. Elii chuan min rawn pan ta vat a, a ţhianpa tia a sawi chuan hnehtu chan chang inti fe hian min tham lo hmel zetin min lo en ve reng bawk. Ka awmdan an ti danglam pha lo tih hriat tir nan thaw hulhin ka inthlahdul a, anni avanga ka mualpho chhan tur ka hre lo bawk.
"I lo kal dawn ta lo emaw ka ti a sin." a ti sap a, midang chuan min ngaihven tawh hlawm lo bawk. Mahse pakhat erawh chuan kan lak aţangin a mit a la sawn hauh lo tih ka hre thung.
"Kha birthday present." tiin ka thil ken chu ka pe a, ngawi rengin a la ve mai bawk. Ka awmdan chuan a ţhawng deuh niin ka hria.
Ni e, a awm ve tho mai. Ka chapona vang te pawh a ni mahna, ka chhungrila tlawm intihna te chu ka thunun hram hram a ni ber a, khawngaihthlak ang taka lan lah ka tum hek lo. Mahni induhtawkna nei lian ve tak ka nih avangin inti ngeng zetin an awm ti nuam lo tawk lekin ka awm ta reng.
Chutia thinrim lo a ka awm ve reng chuan Elii awm a ti nuam lo tih ka hria, pawi tihna pakhat mah ka nei lo. Ka bulah chuan a ţhu ve chawt a, min kal hlat san ngam lo zawk nge ni.
Thil thleng chung chang kha kamkhat mah ka chhak chhuak lova, thildang sawi pui ka tum hek lo. Handam hmel zetin ka ţhu lui ve ngar a, midang chuan ka awm ve chu engah mah ngai lovin a ţhen an lam a, a ţhen an nui bawk bawk a. Ka rin ai awm an ţhahnem daih bawk.
"Pawnah inbia ila." a ti deuh sek sek a, ka hre lo der hmiah. Ka chhungrilah hian thinurna inmung tup tup chu lan chhuah tir chak zek zek mah ila ka insum thei.
"In tur min lak ve la." Ka ti a, tho thuaiin a va la a, min lo en reng tupa nen chuan kan inmelh no lo dun viau bawk. Ka rin loh lutuk thil a nihna vang te pawh a ni mahna chet han lak mai dan tur ka hre lo, mahse hetia rilru fim pu luia ka awm thei hi ka lawm tak zet.
"Hmun dangah chuan inbe lawk ila, kan let leh thuai ang a." a ti leh a, nichin thil thleng kha sawi fiah a duh tih ka hria. Mahse keimah lamah hian a sawifiahna ngaihthlak sak chakna pakhat mah a awm lo. Mahni induhtawk ve tak ka nihna zawnah phei chuan kan inkarah khi a siam fel der tawh zawk.
"Eng ti turin maw?" Ka ti ve nghut a, a in tur ken chu ka tem hlek bawk. Tui lo lem lo.
"Khawngaihin...." a ti sap a, keimah vanga awm nuam lova a awm te chu pawi ka ti lo khawp mai, ka sual viau pawh a ni mahna khawngaihna ka nei lo hrim hrim.
"Haw turin min duh tihna em ni?" ka ti a, ngeiawm fahranin ka nui lui kher bawk. A hmel chu tap mai duh hmel a pu tawh,lainatna ka nei chuang lo.
"Chutiang a ni lo, khawngaihin ka insawifiah thei." A ti leh a, kan ţawng a ring lo bawk a midang chuan kan thusawi an hre pha kher lovang.
"Tikhan a fiah viauin ka hre mai a sin." Ka ti lui ve ngat. Ka chapo ve thawkhat bawk, kha thil ka hmuh aţang khan kan inkar, kan inngaihzawn vena boruak te kha chu keimahah chuan nawhreh nghal vek ang mai a ni.
"Hetiang hian awm lo teh.....thian vek kan nia tuman an la thutak miah lo a nia." a tih chuan ka lo nui suk, min en ngawt ngawt ringawt.
A kawngah chelh ka pawt hnai thut a, a phu nasa viau bawk. Min bawh titihin a ţhu a, min hlau deuh nge ni a kimki chawih chawih mai.
"Kha kha in infiamna a ni tak tak maw." Ka ti sup a, a nghawng zawnah kun hniamin ka nul thuak thuak bawk, a hawi kual zak zak te chu nuam ka ti zawkin ka hria! Huh! Ka va sual ve le!!
"Aw ni e."tiin a bu nghat a, a kawng ka chelhna kut ka ti che tur chu a lo dawm vat, chet ka thawh lui ta bik lo. "David-a te chu ka ţhian dik tak a lawm." a ti leh sap a, a thusawi ka engah mah a thawk pha lo, ţhian nihna chauh an inkarah a awm lo tih chu mi a nileng lo tan hriatthiam loh tur a awm lo, eng ang miah nge maw min ngaih ni!
"Ţhian chauh in ni tak tak maw?" tih pahin a nghawng chu ka hmuiin ka nul leh thuak a, 'aw' tih nan a bu leh nghat,a insang mar viau bawk. Min en reng tu an awm tih ka hriat miau avangin pawisak neih loh hmel zet chuan ka khawsa lui ta zel a, a nuam riauin ka hria.
"Min va en duh si ve." David-a a tih pa lam pawh hawi lem lo a ka tih chuan amah zawk chu a hawi kual a, chu mi chhung chuan a bengkawmah ka lo fawp zauh bawk. Ka awmdan chu a ţhiante zingah lehnghal a lawm lo viau ang,mahse min hlauh rih miau avangin a tal lui ngam lo, khawngaihna ka nei miah lo bawk.
"Min en ve mai mai a nih saw." A ti sap a, a kawng ka chelhna kut ka sawn chho tur chu a ţang nasa ngang mai, a awmbawr chu khawih ka tum tak tak hauh lo, mahse David-a lakah chuan a chunga thu a neih zia lan tir ka duh mai chauh a ni. Mi fel tak ka ni ngai lova, khawilama mi ţha ber ang maia awm lah ka tum hek lo. Hetiang a ka hnaih tawpna pawh a ni mahna.
"Tun bak min hmu dun tawh awm si lova min lo en ve mai mai teh se." Ka tih chuan a taksa che awk khawp a inherin min en a, ka in tur ken chu tlak papin ka kut chuan a hmai tlang chu ka zut zai zai a, "Ka tan chuan in changkang mah mah ni." Ka ti sup, ka ţawngrik dan chu a ngeiawm thawkhat ta ve ang.
Chutah a mit a chiang taka en chungin, "I zalen e,hlim takin i nun hmang rawh." tiin ka ding chhuak a, "In hun hman ka rawn ti buai a pawi ka ti khawp mai, min hrethiam teh u. Hun nuam tak hman chhunzawm rawh u." Ka ţawng hre pha chin te tana sawiin ka kal chhuak zui vut.
Vung zeta chhuakin ka bike hunna lam ka pan a, bike chahbi phawrh a bike a ka lawn tur chu tu emaw hian min kuai her thutin ka khabe ah tak min rawn hnek ta sawk a! Ka inring lo bawk nen ka pai ve nawk! Ka khabe dawma ka din chhuah chuan David-a ka hmaah a lo ding reng tawh.
"Kha aia i tha pek i tih nat deuh a la ngai a nih kha." Ngeiawm fe a tiin ka khabe ka tuai a, hetiang nikhua hian ka inthunun thei ţhin viau reng a ni.
"Hmela leh!!!" Seh chilh nak a tiin min rawn hnek leh a tum chu ka lo inbum a, boruak a vai fua! Chu mi rual chuan hmeichhe te ţhat ri ka hre bawk. Piah lam deuhah chuan Elii a hmui hupin a lo ding reng.
"Kut ka thlak let ve kher che i duh a nih loh chuan let rawh." Ka ti hmuk a, ka insum nasat dan chu pui tak a ni.
"Vawikhat mah i hmel rawn lan tawh suh." A ti ve chhar chhar a, a rum ve viau bawk. Ka hlauh loh em avang chuan ka nui huk.
"Kan la hria ang chu." Ka tih san a, a lo run ngang mai.
"Hmela mai mai chu!" Ti supin chet a rawn thawh leh a, ka awm mai mai ta bik lo. Min hnek ţhelh leh a, a insiam rem hma chuan a khabe ah tak ka hnek se siah. Thapui thawh ka ni bawk a kha chu a na ve fe ang.
Leiah a tlu hnawk a, a rawn tho rang leh kher mai. "I chak dawn lo lutuk!" tia min rawn pan leh a tum chu Elii a rawn inrawlh ta vat, mahse engah mah angai lo tih hriat fe in min rawn hnaih chilh leh nghal a, ngam leh ngam na na na chu kan indim lo viau bawk.
Ka bawhbeh reng lai chuan Elii'n ka kut rawn vuanin tap pur maiin duh tawk turin min ngen a, hmeichhe awmnem zawk hmaa tharum ka thawh chu a zia lo ka ti viau bawk.
Ka ţhutchilhna ata tho chhuak vutin helmet ka thlauh tawh chu ka chhar leh a, ka bike hunna a kil deuh a ni hlauh a min hmu tu an awm lo bawkin ka hria.
Elii chuan a kai tho tih ka mit sir chuan a hmu a, ka ngaihven zui lo. Helmet khum vutin vung zetin ka inkhalh chhuak a, khatia ka hnek let ve avang khan hahdam huaiin ka inhre lehnghal! A hma daiha lo hnek tawh tur hi a nia.
Ka khabe lah chu a na ve reuh zèk lehnghal a, heti chunga in a haw chu ka phur lo kher mai. In lam pawh pan lovin ka tlan kual ta reng a, mahni chauha awm ka mamawh hle bawk.
Veng pakhatah tlan lutin footpath bulah chuan bike ka hung a, ka helmet ka phelh chuan ka ner sak, ka kam sir pilh deuh lai chu ka khawih a, ka chhungten zawhna an va ngah dawn tak. Pumpelh dan tur ka hre der mai si lo.
Thli chuan ka hmai a chhem heuh heuh a, ngaihtuahna a tawi tup a ni ber. Elii lakah hian thiam lohna tam tak ka nei, kapi dam lohna avanga ka ngaihsak nep zia pawh ka hria, chu ti chunga ka laka a dawhtheihna ten min ti lawm ve viau kha a nia, ka lo rin ang a ni der si lo.
Ka phone a rik chuan min lo call tu ka en thuai q, Zuata a ni lo. Dar zat ka en leh a, a hma tawh lo viau bawk.
Ka nu ten min ngaihtuah tawh thu a rawn sawi chuan chhuanlam min lo siam sak mai tura tiin ka dah ta daih. Ani kha chuan engtin pawn awm ila min hriatthiamna a ngah tih ka hria a, chuvangin ka rin ngam ber zinga a mi a ni reng a ni.
Rawlthar kan nih chhoh ve aţang khan han insual phat te chu ka nei ve ţhin, ka bul ţan hmasak an ni ngai lo. Ka hostel awm ve lai phei kha chuan insual zing ve tak ka ni. Kan senior ten a an duh duha an tih kual mai mai theih nih ka tum ngai lo, senior an nihna lan chhuah tir hun te chu a awm n meuh mai, mahse a zawng a zaa hnuai chhiah taka min ţawngkhum bawl bawl mai ţhin kha ka pai dai mai thei ve ngai lo. Ka duh loh chinah min nawr luih theih miau loh avangin ka insual phah fo.
Zanin chu a dân a dang khawp mai. Hmeichhia vangin ka'n insual chu a nia. Ka hmui tlem a pilh sek chu tuaiin ka nui suk a, a thlen tawh loh beisei ang.
Elii nen a kan inkar pawh tikhan a tawp zui vek chu a ni mai a,rin dan nei lawk lem lo mah ila ka rin loh deuh thil a ni tih chu ka hrethiam. A tlawm thlak ka ti viau bawk, ka chapona avangin engah mah ka ngaih loh zia lan tir ka duh a, mahse inthup harsa ka ti viau thung. Ka khawchhungah hian thik inmung tup tup awm ang mai hian hrik thlakna tur mamawhin ka kut hi a za zek zek mai bawk!!!
Phur lo fahran chuan ka inkhalh haw a, ka chhungte an mut vek tawh hram ka beisei. Zing lamah min zawt dawn tho mah se zaninah hi chuan engmah ka hmachhawn leh peih tawh rih lo.
Kan in kawt thlen hma deuhah chuan bike ka ti thi a, Bike chungah chuangin helmet khum rengin ka ţhu leh vang vang. Ka pi'n hetiang a min hmu a nih chuan zawhna a ngah nasa dawn si, chhuanlam tur phuahchawp tur pawh ka hre lo.
"Fakpui!" Rawn ti lauh ri ka hriat chuan ka hawi chhuak vut, Malsawmpari chu an in kawtah a lo ding reng tawh. Ka sana bun lai ka bih vut a, dar 11 a pel daih tawh bawk.
Keimah ka ni tih a hrechiang chauh a ni mahna, min rawn pan a, mahni chauha awm duh avang a haw tlang duh loh lai laiin a rawn lang leh nulh mai bawk si. In lam ka pan san mai dawn maw ni tih ka ngaihtuah lai chuan ka bul a rawn thleng hman. Ka thaw hawk ringawt.
"Ti nge hetah i din reng a?" A ti a, a mitmengah chuan zawhna a ngah tih a hriat viau bawk. Amah pawh en duh lo chuan hmalam ka melh ngur a, ka helmet khum chuan ka mit chauh a tilang hlauh a a tihzia hle mai.
"Thil thleng a awm em ni?" a ti leh a,ka chhang chuang lo, ka ţawng chak lo bawk.
"I rui a mi a?" A rawn tih chuan thawk ka la hawk a, nelawm lem loh tak chuan ka melh ta kur bawk. Ka ţhiante nen a kan inruk ve bak kha a them pawh ka in leh tawh ngai lo. Fello viau mah ila Keimahah inthiam lohna a awm tlat ţhin .
Mak tih hmel deuhin uluk zetin min lo en ve ngar a, a hawi sawn duh bik hauh lo. Kut a kuangkuah ve hlûn a, a awmdan chu nu strict deuh te pawh a ang lek lek mai.
"Va lut rawh." ti nghutin Bike ka ti nung a, ka ti nung hluai nain kan in hnaih a tlan luh chu ka hreh viau, ka tlan chhuak ta lawk lo. Ani lah chu a lo ding ve ngar mai bawk si.
A din tak rengah chuan ning zetin bike chu ka ti thi leh duk a, thawm a reh zui tlawk tlawk.
"Engtin nge i awm a?" a tih leh chuan ka ning deuh tawh chuan rum fahranin ka melh a, ngaihtuah chian chuan a naupan chhiat thlak ang reng.
"Va lut rawh." Ka ti leh nghut.
"Lut lo ta ila."
"Min ti buai lo teh, ka ning viau a nia." Ka ti ta thlawt. Ani lah chuan awlsam zet hian, "Kan inang chiah a nih chu, kei pawh ka mood a dik vak hleinem." a ti a. A duh chen chen lo dik vel mai mai teh se!
A hnu deuhah chuan, "Puih theihna che ka nei em?" a ti sap a, inngaihtuah buai eih loin ,"Nei lo." Ka ti hmuk. A awmdanah ka dawhthei viau lo tih a hre reng awm si a, engvanga kal sawn mai duh lo nge maw a nih le.......
"I bialnu nen in inhau em ni?" a rawn tih chuan ka nui suk ringawt. Engvanga nui nge ka nih pawh ka hre lo e a.
"I buaina tur a awm lo." Ka ti hmiah, "Nia....." a ti leh ang lawi a.
"Thingpui ilo in duh em?" a ti a, ka chhang lo.
"I chhungten an ngaihtuah tawh ngawt ang che." a ti leh a. "I pi vang em ni hetiang a i awm?" a tih leh chuan ka dawhtheihna in a tlin leh tawh lo, amahah hian ka dawhtheihna a pan riau ţhin bawk reng a ni.
"Ngawi tawh teh." Ka ti hulh, a ngawi zui hmak bawk.
Ka phone a rawn ri a, Zuata bawk, "Zuitei te inah ka awm." Ka ti ve hmiah, in kawtah ka awm ka tih chuan a rawn chhuak duh palh ang.
"Ti nge dawt i sawi a?" Ka bula miin a rawn ti leh, zawhna a va han ngah mai mai tak!
Amah chu enin thaw ka la leh te te a, "Zawhna ngah viau suh." Ka ti ta thlawt, a lo nui ka hmuh chuan ka lungawi lo viau bawk. Nuihzatthlak pakhat mah ka sawi lo.
"Dawt sawi rual pawh i ni tawh lo." tiin a la nui reng, "Dawt sawi rual bik an awm lo." Ka ti hram a, a nuih a za ang tulh tulh a, ka chhang ve zel chu tul ka ti lo khawp mai, ka chhang zo vek tawh mai bawk si.
Ka helmet ka lak thlak takah chuan a nui hmel a reh hmak. Ka hmai a hmuha a hmel awmdan chuan ka nuih a tiza ang reng. Ka lo nui chhuak nge ni, "I sual hmel zia kha." a ti hlak a, "Engtin nge i nuih mai mai theih zawk!" Te chu a ti leh ang lawi a, ka mitko leh ka kam sir pilh ve hlek tih loh chu hliam dang ka nei lo. David-a kha chu a na ve viau chuan ka ring. Chu mi ka ngaihtuah chuan ka nui leh suk a, kut ka thlak na viau pawh kha ka inchhir lo telh telh lehnghal, a phu tawk chiah.
"Ka hre ta!" A rawn tih hluai chuan ka ngaihtuahna aţangin ka harh chiah, mit tizim sûn hian min lo thlek a.
"Eng chu maw?" Ka ti hmuk, ka hliam neih chhun chu a en uluk nasa mai.
"I haw ngam loh chhan mawle." a ti a, a nui zui kar kar. Min nuihzat chu ka lawm lo viau.
"Insual naa tel ve duh hmel i put loh nen." Chek hlak a a tih lai chuan kan insual lai ka ngaihtuah let a, tunah chuan ka thinurna te kha an lo reh diak tawh. Ka ngaihtuah ngut ngutna ata kha engtik laiin nge an reh ka hre lo.
"Thingpui chu ka lo in ang." tiin Bike aţang chuan ka chhuk a, ka haw hreh ta rau rau bawka a thingpui lum in kawi pawh chu ka pawi ti lo, a tui lo hran lo bawk a. Bakah an inah ka kal tiin Zuata ka hrilh tawh bawk nen kal ve hrim hrim chu a sual lo zawk ang. Rilru tih thawven nan a ţhat phian hi a!
"Haw zawk rawh, ka lum peih tawh lo." a tih chuan ka rum nghut, bike aţangin ka chhuk fel vek tawh,kan inkara bike awm reng chung chuan ka en ngur a, eng tak chu a hria ni maw.
"Mîlo chungchang kha ka sawi chhuah i hlau lo em ni?" Ka ti ve ta kher, ava naupang chhiat thlak tak! Mahse rilruah a lang miau mai bawk si, amah kar nan chuan a ţha viauin ka hria.
Tum pak hian min melh ngar a, "Ka tih luih a ni chuang lo." a ti ve tlat. A lawm lo hmel chuan ka nuih a ti za tlat pek a!
"Mahse i su tho a lawm."
"Ka tih luih a ni chuang lo ka tih chu......" a ti vak a, ka nui chhuak ţep a ni.
"Sawi chhuak mah la ka hlau tawh lo, a dam vek tawh tho." a tih chuan ka haw reuh ang reng.
"Lut ang, thingpui in zawhah ka haw ang." tiin ka kal vut a, min lo zui ve mai tih ka hriat chuan ka nui suk. A lungawi chiah lo hmel ka hmuh hian ka nuih zu han za tlat a mawle! A atthlak zawk.
Chokaah chuan chair ka hmuh hmasak berah ka ţhu a, midang an mu tawh a nih hmel.
Ngawi rengin thingpui a lum a, ka kamsir pilh chu ka leiin ka tawk zauh, a thip ve phian lehnghal.
"I insual chhan chu ka hre lo nain sim daih rawh." a ti a, min en lo chuan a thingpui siam chu a chhunzawm mawlh mawlh. Ka chhang peih lo, a bula sawiin sawtna pakhat mah a nei dawn lo bawk.
Thingpui min pek chu banin ka in nghal a, "A la sa a nia." a tih rual chuan ka in hman, ka rin ai a lo sa si chu ka dah hla thuai a, ka lei a káng hman!
"Sawi vat ta che!" Ka ti hluk a, ka thiam loh a ni ve tho tih hre mah ila ka lungawi phah lo.
"A so hlim tih i hre ve reng a lawm." a ti mai a, "I lei a káng lo maw?" a ti a, "Kâng lo." Ka ti hmuk.
"Ti nge i thin chhiat em em a." a ti a, min bia pawh a ang lo chutiang min sawi khum ngam danah chuan min hlau vak tawh bik lo tih ka hre mai.
Ka thin a chhiat vak pawh ka hre lo, a thil tihah lawmna tur a tlem ţhin ve em a ni.
"Bawlhlawh dah chhuah theihnghilh lo ila chu khawi emaw laiah i lo tlan liam reng lo ang tih pawh a hriat loh." a ti a, ka ner sak ringawt. Khawi emaw lai velah ka tlan kual leh duh tak tak mai thei tih ka chiang em a ni.
"Zanin a thil thleng te kha chu hun liam tawh a mi a nia, tuna i huphurh pawh hi hun lo la awm tur a mi a ni bawk a. Tih theih i nei lo ve ve, chuvangin tun hunah hian i rilru leh taksa kha cheng tawp rawh." a ti fiah fak reuh a, a thu tak ve phian lehnghal.
"In thuai la haw phei rawh, i chhungten an ngaihtuah tawh ang che." a ti leh reuh a, ka beisei loh deuh deuh hi a rawn sawi chhuak a, ka beisei bera pawh ka hre chuang lo.
Thingpui ka in zawh veleh ţhu khawmuang lovin ka haw zui ta a, Malsawmpari lakah khan eng ka hmuh chu hre lem lo mah ila keimaha min kam tlattu awm kha a reh daih tih erawh ka hre thei. A mak ve khawp mai.
In chhung ka lut thawmah Zuata chu room aţangin a rawn chhuak a, ka hmel a hmuh chuan zawhna min zawn lovin min en reng ringawt.
"Ka room lamah ka han in bual phawt ang e." Ka tih chuan a bu nghut a, ka kalsan zui nghal.
Ka in bual chhungin zanin a thil thleng te chu ka ngaihtuah a, rin loh lutuk thil a nihnaah mumang a ang lek lek mai. In bumna hi ka thil huat zawng tak a ni, Elii hian ka laka a rilru put hmang ka lo hrechiang lo hle a ni mahna, nge a beisei ang ka pha lo zawk!!
Ka theih chin bak a phut a nih chuan ka tan tih theih dang awm hek lo le, chhungrilah erawh a tlawm thlak ka tiin ka chapona a kai harh chiang hle thung. Ti khan fel fai deuhin kan tawp chu a ni mai a, a ţha vek zel mai.
Ka in bual zo chu ka pi room ka pan a, Zuata pawh khum bulah a lo ţhu reng tawh. Ka tan hi chuan URinpuia nen an danglamna chu ka pianpui ka ni ve lo hi a ni mai, kawng engkimah min dawm hneh ţhin viau a ni.
"A mutthilhna a rei tawh em?" Ka ti a, a mutthilh na a rei tawh thu leh nichin lawka a khuh avanga a harh leh thu chu min hrilh a.
"Zanin chu eng thil maw thleng a?" tiin min zawt ta a, ka chhang phur lo viau mai.
"Kan inthen." Ka ti a, a bak sawi zui ka chak lo. A hrethiam a niang chu min zawt zui ta bik lo. Hetiang te teah te hian an bula awm nuam ka tih phah ţhin rêng a ni.
Ngawi rengin kan mu a, mutthilh chu ka tum buai lo law law. Zuata pawh a muhil bik loin ka hria.
Ka phone banin message awm ho ka en a, Elii min lo biak tumna a tam ngang mai. Ka phone ka silent hlauh chu a tihzia ang reng.
A missed call awm dul mah se call back chhan tur ka neih ka hre lo. A message ho erawh ka chhiar vek tho, a lo online a, a message ka hmu tih a hria a ni mahna a rawn call leh zat. Ka chhang chuang lo. A message chu ka chhang ta zawk a.
Rawn insawifiah nasa viau mah se ka rilru sawhsawn ka tum tawh chuang lo.
"In hmu ila?" tih a rawn thawn a, ka pi ka riahpui thu ka sawi ve mai. Biak duh loh a tlâk ka tum lo, chu chuan beiseina inpek leh ka tum tihna a ni chuang lo.
"David-a kha a rui deuh a, hrethiam hram rawh. Ka bum ngai lo che, khatiang kha hun dangah a thleng ngai lo." A rawn ti leh a, David-a chu a tan riau a hriatna te ka'n nei ve leh a, kan inkar siam ţhat duh tawh lo mah ila amah ka duhna a reh nghal vek thei miau si lova, thikna chen ka la nei tho.
"Ka ngaidam a lawm." tih ka thawn hnu chuan a reh deuh vang vang. Ka thinlung tak chuan ka ngaidam thei chuang lo, a rilru dam nan ka sawi liam ve mai zawk a ni.
"Kan inkar tih tawp phah nan hmang lo ang. Nangmah chauh a lawm ka duh. Midang ka duh hleinem. Naktukah inhmu ila." A rawn ti a,aw ka pawh ve mai bawk. Phone chu ka dah zui ta daih.
Kan inkar sawi fel nan chuan inhmuh chu pawi ka ti bik lo. Chiang taka ka riru a hriat theih nan pawh a ngai ve bawk. Ka inchhir lehna tur pawh ni se ka inkar siam ţhat leh ka duh tawh lohna rilru hi sawhsawn ka tum chuang lo ang.
Zan chu ka tlaivar chiang kher mai. Ka pi pawh a mu thei viauin ka hre bawk. Zuata a rawn harh lai pawh chuan ka pi bulah ka la ţhu reng a, ka kain sawi chhuak lo mah ila ka rilruin ka be mawlh mawlh a ni ber. A châng leh ka ţawngtai bawk a, ka tân engmah ka dil lo,ka pî dam lehna a nih phawt chuan ka chan ai zawng zawng pawh hlan ka phal bawk. Kohhran hoin min ţawngtaipui bawk a, a dam leh mai rinna ka nei lian hle.
"I mu miah lo elaw?" Zuata'n phak chualin a rawn ti a, Ka mutthilh theih loh thu ka hrilh a, ani pawh a mu ţha vakin ka ring lo.
"Ka va chhuak lawk ang e." tiin min chhuah san a, midang an la tho lo nge ni thawm dang hriat tur a la awm lo.
Ka pi a rawn chet deuh takah chuan a harh a nih ringin ka be thuai a, a lo men takah chuan ka thaw huai thei. "I hmai kha ti nge?" a rawn ti a, a aw chu a ri chang chang ti ila a dik ber ang.
"Ka ţhiante insual ka ţhelhna lamah an kut ka tuar ve palh a nih hi." Ka ti a, dawt chiang lutuk a ka sawi vang te pawh a niang chu a mitah ka en ngam lo.
"I va thiam awm lo bik ve, indan dan tur zir a ngai a nih kha." a tih fiamthu takah chuan ka thaw huai thei mai.
Ka nu a rawn lut a, min en lova rawn lut a nih avangin zawhna min zawt lo hlauh. Ka pi chu a rawn be nghal mawlh mawlh a, parda te zar thain tih fel ngai a ti fel leh zung zung. A chhuak tur chuan min hmu ta nge nge.
Ka pi hnena ka sawi ang bawk chu ka sawi a, "Khatiang vang kha a lawm Zuata te ho chiah kawm tur a ka duh em em che ni!" a ti hlak hlak a, ka hostel awm laiin an buai ţhin zak zak bawk a, ţhian fel vak lo ka kawm a hlau thei vet vet khawp mai.
Chawhnu lamah ka chhungte hnenah ka chhuah lawk tur thu hrilhin Bike ka la chhuak a, Elii te in lam ka pan ta thuai. A chhungte an awm avangin an in a inbiak a duh lo a ni awm e.
An kawtah min lo nghak reng tawh a, ka din rual chuan a rawn lawn kai thuai a, kalna tur hmun pawh sawi lo chuan kan inphur chhuak a.
Kan veng ţhenawm lawk a mi, a hma pawha kan kal dun ve fo tawhnaah chuan ka hruai leh. Helai hi inbiak nan chuan a rem ber mai, midang min chim buai thei an awm lo bawk.
Kan ţhutna ţhinah chuan kan ţhu dun leh a, inhmuh rawttu zawk a ni bawk a a sawi hmasak hun ka nghak a, minute 2 dawn mai ngawi reng a kan ţhut hnuah a hrawk a thian ta kharh.
"Nizan a ka lo sawi ang khan David-a kha a rui a, harhfim se chu khatiang khan a che bik miah lo ang." A ti a, ka rilruah erawh chuan ani pawhin a dang hauh lo tih ka hmu ve vek a,eng ang pawhin insawifiah mah se ka palzam theih loh tur thil a ni tih ka vawng reng thung.
"Ka hrethiam a lawm, ka lo ngaidam dawn nia. A ruih sual leh loh nan doctor pan turin lo hrilh bawk la." Ka ti a, ngeiawm taka sawi ka tum erawh ka ţhulh leh, a ţul ber loin ka hria.
"Chuan kan inkar a buai phah lo tiraw? Nizan a i sawi kha chu i thinrim vang mai mai tiraw?" a ti a, Aw ti a ka chhanna beisei zetin min en reng a, a hmelţha taka min chân hlauh ve na ni awm tak ka hmuh chu a tak a nih leh nih loh pawh ka thliar thiam nek love.
"A tir aţangin ka hrilh uluk viau che a, ka beisei che anga i awm loh miau avangin kan inkar siam ţhat leh a ţulin ka hre lo. I duh duh danin min ngai thei ang." Ka ti a, a thusawi te kha dik theihna mual mual tr chu a awm mah na, mahse ka chapo vena te avang hian kan inkar siam ţhat leh ka tum lo hi a ni tawp.
"Chance vawikhat mah min pe dawn lo maw?" A ti sap a, a mittui tling piau mai chuan a ti lainat awm zual kher mai.
"Vawi tam tak pek ilo ni tawh zawk mak mai thei a sin, keiin emaw nang pawhin i hriat loh laiin." Ka ti a, ka sawi chu a hriatthiam ka ring bawk. Nizan chauh lo pawh kha khatiang thil kha a lo thleng tawh reng thei a, ka hriat loh vang chauh a insawifiah ngai lo a ni ve thei ka tihna a ni.
"Chutiangin ngai suh, min puh chhe mah mah." A ti a, "Khawi hmunah pawh ka zui si lo che a, thil ni thei ka sawina mai a nih kha, ngai thu tak duh suh." Ka ti sup.
A ngawih tâk rengah chuan thu tawp ka siam ta a, "Ti hian kan inkar chi tawp rawh se. Kei chuan nizan khan ka sawi fel vek tawh niin ka hria a, mimala inhuatna inhnutchhiah ka duh loh avang chauhin tunah pawh i rawtna pawmah inbiak duh ka ni bawk. Nizan thil thleng pawh kha sawi lan leh a ţulin ka hre lo. Keimah aţangin i zalen tawh a, chelh nawn leh che ka tum tawh lo bawk. Hlim taka awm turin ka duh sak che." Ka ti a, a lo ngawi reng.
"Eng tin nge i rilru ka thlak theih ang." a ti thawp sat, "Tum buai duh suh." ka ti a, tum buai lo se a hun a khawhral lo a ni mai.
"Midang i nei zawk em ni?" a tih chuan ze lo zetin ka nui hul hak, eng angah nge maw min ngaih ni.
"Kan inkar hi hmeichhe dang vangin a buai ngai lovang tih ka tiam tawh che, ka hlen bawk." Ka ti nghut a.
"A nih min ring miah lo tihna a ni maw?" a ti leh a, ka rin luat avanga buaina nei ngai lo zawk kan ni tih a hre miah lo em maw ni.
"Ka ring ţhin che a lawm. Mahse tunah chuan kan inkarah engmah a awm tawh lova, in rinawm sak tawn vel a ţul tawh lo tihna a nih chu." ka ti hmuk a, ka ţawngkhum na lutuk ang tih hlauin ka ţawngkam ka uluk viau chuan ka hria.
Ţha takin inbe thei mah ila kan inkar erawhin awmzia a nei tawh dawn lo tih a hrethiam ve tawh a ni mahna, haw a rawt ta thuai a.
Chutia kan inkar a tawp hlen dawn tih kan sawi lai pawh chuan ka lawm phah lo a, ka hlim phah chuang lo bawk.
An in kawt zawnah ka ding a, a tawp nan tak tak kan inkar a inlaichinna awm ve chu ka mangtha ta a. Ka inchhir ka ring lo a ni lo a, inchhir ka tum lo tih erawh ka chiang hle thung.
In ka thlen chuan an lo reh ţhiap mai a, helmet pawh dah lo chuan ka pi room lamah ka lut vat, ţawngtai rualna an nei tih ka hmuh chuan ka lo thaw ve huai a, inleng an tam lo bawka room lamah an lut ve vek a nih hmel.
Ka room ah ka lut a, khumah chuan che chang lovin chunglam melhin ka mu reng a. Nizan lamah ka muhil miah lo bawk nen rei loah ka muhil zui daih chu niin.
Bektei'n min sawi dat dat avang chuan ka harh a, room chhung pawh light a lo in on tawh.
"U rawn chhuak phei ve rawh, a pi a ţha vak lo." a tih chuan thawh phan pawh awm lovin ka chhuak zui vut a. In leng an lo ţhahnem ngang mai. Sansa ka en a, dar 9 a lo pel daih tawh. Ka va han mu rej em em ve le.
Ka pi room a ka va dah chuan midang an awm nual avangin ka lut zui lo,a saisir zawngin a mu a,a kawr an lo phelh sak a, kawrfual pan te chauh a inbel tih ka hmu bawk.
Ka ţhiante ka hmuh chuan ka pawh vat a, Zuata chuan, "Nizan i mu si lova kan tiharh duh lo che a nih kha. Vawiin chhunlam aţang khan a sahal a, tisawn a inlet tawn sek reng mai a ni." A lo ti a, chawhnu lam a ka chhuak ka haw ve leh ka muhil zui mai bawk nen chanchin engmah ka lo hre lo chu a zia lo tak tak a ni.
In leng dang ho chu an titi mawlh mawlh hlawm a, bathlar lama ka pa ka hmuh chuan ka pan vut, phone a hman avangin ka nghak leh rih. URinpuia a bia niin ka hria. A thusawi erawh chuan ka kal tawh tur chu min din tir chawt.
"Vawiin chawhnu lam aţang khan a sahal reng a, zanin pawh kan meng tluan kher ang emaw." a ti chuai raih a, ka dinna ngaiah chuan ka ding reng. Tih ber tur ka hre lo.
"Naktuk lama lo haw turin inbuatsaih ula...." a tih lai chuan hre zawm duh loin ka kal sawn a, rng nge tih tur ber pawh hre lovin in aţang chuan ka chhuak ta tawp. Tuman min lo be buai lo te chu ka lawm hle bawk.
Ka rilru a lo lang hmasa ber hmun chu ka pan chawt. Ka hmanhmawh hle bawk.
End of chapter 7
🍂
Comments
Post a Comment