BLUEMING 🦋 CHAPTER-8 BY UNKNOWN BELLE

BLUEMING 🦋

BY UNKNOWN BELLE

CHAPTER 8

Biakin kawngka chu hawngin ka lut zui a, tlar hmasa ber a laiah chuan ka ţhu ta reng. Ka pi damna kan dil lawm lawm a, khati khawp khan ka ţawngtai nasa bawk. Ka nunah hian ka duh zawng leh thil dang pawh hetiang khawp a dil ngawrh ka la nei ngai lo, chu ti chung pawh a ka dil chhun min tih hlawhtlin sak duh lo chu Pathian lakah hian ka vui tak zet.

Che sawn lovin ka ţhu reng a, ţawngtai tura kal pawh ka ni chiahin ka hre lo. Chhuahchhal tura kal ka ni zawk mahin ka hria. Ka ţawngtai lova,ka maimitchhing lo bawk a, hmalam en chuan ka ţhu reng.

Chutiang chuan rei tawk tak mai ka ţhu a, ka piahah lo ţhu ve an awm tih ka hria, tu nge a nih hre tur pawhin ka hawi sawn lo. Ka melh ngai ka melh ngar a, ka pi hi awm ve tawh lo tur ang pawhin ka suangtuah ngam lo. 

Isua khan dam lo tam tak tidamin Mitthi te pawh a kai tho, ka hria a ka ring bawk. A thiltihtheihna leh a ropui zia ka ring, ka thinlung takin. Amah a rinna ka nghah zia hi a hriat ka ring a, chuvangin ka pi pawhin khawvel mite hriata natna tihdam theih tawh loh vei mah se, aman a tidam thei tih ka hria a, a hnenah ka dil bawk. Mahse tunthlengin a chhanna ka la hmu lo chu a nih hi!

Ka piaha ţhu chu a ţawngtai tih hriat takin a phun sep sep a, ka va en chuan Malsawmpari a lo ni. A ţawngtai chu ka thlir reng a, ka pi tan damna min dil sak em ka hre lo, mahse min dilpui turin ka duh ngawih ngawih, a tidam thei tih hi ka thinlung hian a hre chiang em a tin ni.

Ka hmalam ka en leh a, Kraws intar chu ka melh vung vung. Ka ţawngtai thei chuang lo, ka pi kha tiang khan awmin midangin beiseina nei tawh lo mah se a tidam thei tih ka hriat miau avangin a hun ka nghak tawp a tih theih ang.

A ţawngtai zo a niang chu thawm a reh leh ta tlawk tlawk. 

A hnu deuhah chuan, "Ka rawn kal hma lawk khan a boral." a ti ta sap a, ka awmdan a danglam phah lo.

"A bulah awm ve thei la an duh che a." a ti leh a, chutia a sawi takah chuan thinurna ka chhungril a inmung chu ka hre thei a. Pathian lakah chuan lawmna tur reng ka hre lo, engvangin nge min tih dam sak mai loh tih chu ka hrethiam thei hlawl lo.

"I pi chu a dam tawh a, hei leh chen inkhawsa ho tawh a. Pathianin a hnena chawl ve tawh turin a duh a ni mahna." a ti a, a thusawi chuan min hnem loh bakah ka pi boralna chu pawm thiam ka duh lo. 

A hnuah chuan a ngawi leh ta reng a, in lama let chu ka phur lo kher mai. 

Rei vak lo ţhu lehin in lam ka pan a Malsawmpari lam pawh ka ngaihven lo, a rawn haw ve nghal em pawh ka hre lo.

In ka thlen chuan ţhalai an lo phe suau suau a, mumang ni daih se ka ti hle. In chhungah lutin ka pi room lamah ka lut a, a thuamhnawn an lo hak tir tawh a. Oxygen bur te pawh an lo dah fel vek tawh. A room bang an ţhiat mek a, a tu amah chu ka hmu chiang lo, ka bul vela thil te chu hriat chian ka nei mang lo a tih theih ang. Ka mang duk ni mai hian ka hria.

.

.

Ka pi kan thlah liam a, hun te chu a kal muang riau hian ka hria. URinpuia te chhungkua chu karkhat vel an cham a, ka pi boral cham tukah an haw tihna a nih chu. U Lyni te chhungkua nen kan rual ţhin viau a, a khawhar thlak hman meuh loh.

Kan hun hman liam tak zawng zawngah te khan nun phung pangngai takin awm ve mah ila ka dilna chhanna ka hmuh loh avang khan ka ţawngtai leh ta ngai lo. Hetiang a awm reng hi ka duh dan a ni bik lo nain tun hunah chuan lawmna tur ka hmu hre thlawt lo a ni.

Karhnih vel ka hna aţanga ka chawlh hnuah ka kal ve leh a, ka hman loh chhungin ka ai kal tur an awm hlauh a, mahse karkhat chauh a hman avang khan kal ve leh thuai ka duh a. U Joela te chuan phalna min pe zau viau a, mahse keimah berin kal ka duh tawh si a, inah mahni rilru kawm reng ai chuan a thawven thlak deuh ang chu.

Hun leh ni te chu ka hmang liam mawp mawp ni mai hian ka hria, ngaihhlut tur bik ka neih ka hre lo, lawm viauna tur ka hre bawk lova, lungngaih ngawih ngawih na tur lah ka nei hek lo. Midang te hun hman mek ang tho pek ka nih ve miau avangin hun hian min pawt kal ve mai mai ni hian ka hria.

Hnathawhna hmun ka thleng chiah tihah Hruaii a rawn lang ve leh hlawl, tunlai chho chu kan inhmu khât viauin ka hria, amah hi a rawn kal loh chuan kan inhmu lo chu a ni zui mai zel a.

Vtea a rawn la thleng lova, zirlai tumah an la rawn kal lo bawk nen a reh ţha viau bawk.

"Tunlai hi ka vang i ti em?" a rawn ti nghal tawng a, U Joela nen kan awm a, ka bul hnaihah rawn ţhuin U Joela chuan a computer siam lai a siam mawlh mawlh a, min rawn ngaihven vak loin ka hria.

"Tih vak pawh ka hre nang." Ka lo ti mai a, phone a min rawn biak zauh tih loh chu kan inbe zen zen lo bawk. 

"Hm! Zep duh suh ka hrethiam vek." A ti ham ham mai. 

"Tak takin tunlai chu ka pasal hlui hi a rawn inlar zing lutuk a, kan buai deuh rap zel lehnghal." a ti a, a ţawng ring lova a thutak hmel viau bawk.

Midang lakah a ni ve em chu ka hre lo, ka zawh ngai hauh lo hian an chhungkaw chanchin hi ka hre hnem ta khawp mai. A pasal nen hian an kum a inthlau viau a, zu a duh hle a ti bawk, an inthen chhan ber pawh a zu heh lutuk vang a ti khan ka hria. Ka hriat chak zawng ni lem lo mah se beng ka neih ve miau avangin ka hre ve zel tho chu a nia.

A sawi danah chuan a pasal chu neih leh a tum tawh lo bur a ni awm a, a pasal thung chuan a la hel reng tho a ni awm e.

"Naktuk chu min chhuahpui la." A ti a, ka hnial a hma hma chuan, "Joel! Naktuk chu Fakpuia hi ka hawh lawk dawn, i rem ti em?" A ti nghal zung zung, ţul lo ka ti viau bawk. Ka hnathawhna hmunah a duh duh a rawn ti ngam mai te hi hmeichhe tam tak tih ngam loh tur leh thil kalhmang tur a ni lo hrim hrim.

U Joela chuan, "Aman a duh leh duh loh a ni mai lawm." a lo ti sam êt a, anni hi chuan min dem fiam fo ţhin a, hetia a rawn ngampa viau ţhin pawh hi engah mah an ngai lo.

"Chu, a phal sa. Bakah tunlai te chu zirlai naupang te test neih lai a nia inlûn lutuk chuang lo." A ti nghal par par. Engtin nge maw a lo hriat theih ni. Kan zirlai a tam zawk hi college kal lai an ni hlawm a, kan dawr aţang hian college a hla vak lo bawk. An exam hun lai te, an test neih hun lai tih ang rengah hi chuan kan thawl ve viau zel.

"Ka hman lo." Ka ti nghut a, ka ţawng bul hmuk ţhin te hi engah mah a ngai lo. 

"Eng nge? Tih tur dang i nei em ni? I hna lamah chawlh pek sa ang i ni sia." A ti leh phawr phawr. Ka bul chetah ţhuin a phone a tuai deuh reng a. A mizia hi ka lawm vak lo tih lohah chuan a incheina leh amah hrim hrim hi chu hmuh a nuam ţhin viau. 

  

"Thildang buaipui tur ka nei." Ka ti a, kei aia u a ni bawk a, min zah lutuk lo bawk chu a awm lo hran loin ka hria.

"Naktuk tlâiah tê a ni mai. Ka lo kal leh hunah kan sawi Chiang ang a, please........" a ti no hluak a. A awmdan chuan Tlangval ţhenkhat chu a thlem sam viauin ka ring. Ka tel ve lo thung.

Ka chhan lawk loh avang chuan," Naktuk ka lo kal leh hunah kan sawi ţha dawn nia. Vawiin pawh class kal tur pawhin ka rawn kal lo, ka hman thlawt lo." a ti a, "Ka kal phawt ang e, naktuk chu aw." tiin a chhuak zui nghal. A kal pah chuan mawngbawr khal zet chu a chhuan hmel viau bawk. Tum loh pawh hian mit a la ve tlat mai si a, huh! Mipa zawng zawng an ni ve deuh vek ang chu!

A kal liam hnuah U Joela chuan,"A sawmna chu pawm ve mai la aw..." tiin a nui ruh ruh a, ka peih loh chu thuhran, ka chawl rei tawh si a hmun danga pen loh hram ka duh tawh.

"A nasa em mai." Ka ti ringawt a, ka uang tih a hrethiam bawk a nuih a za viau bawk. 

"A chhelo tîuh tèuh a lawm, vawikhat chauh len chhuah pui te chu a pawi hleinem." a ti leh a, ani hi chu nula mi ve deuh mai hi a nia, a ruala ngaihzawng pahnih neih kawp te kha a pawina a hre lo. Mipa ţhenkhat rilru a ni ţhin bawk. 

Mit hi chuan mawi leh nalh hi a hriat miau avangin a thil awh zawngah chuan awn duai duai a awl viau a, chutiang chiah chuan kan kawppui te hi duhthusam ang diak an nih vek theih loh avangin midang laka han pen san zeuh pawh a awl viau ta ve ang. Mahse mahni inthunun thei tan chuan kan kawppui te laka rinawm taka awm mai kha mi pangngai zia a ni.

"Nge a thlem thluk che i hlau zawk." Nui ruh ruh a a tih chuan ka khi ve suk a, ani ang taksa nalh tak nei tan chuan mipa thlem thluk chu a har dawn lo lutuk.

"A pasal hlui a hlauhawm awm em mai." Ka ti fiamthu ve a, a nuih a za viau bawk.

"I chanchin min rawn zawt nasa thei teh mai a nia, nang chu ni ila ka bawhzui na a rei tawh ang." a tih leh chuan ka chhang zui tawh lo, ka nui ringawt a. Keimah min ngaihven ve tlat mai te hi a mak reng reng, kei lo ngaizawngtu a ngah dawn nen hian.

Dan ngaite bawkin zan lamah kan haw tlai leh hle a, in ka thlen chuan inleng ho pawh an lo ţin tawh a. Zuata pawh a lo awm leh daih tawh. Ti hian min riahpui ve char char mai a, sawi chhuak lo mah se min ngaihtuah ve tih ka hria, ngaihtuah ngai ka nih hre lem lo mah ila hetia ka tana an awm reng tih hriat hi chuan thla a ti muang ve hrim hrim.

Ka room ah ka inthlak laiin a rawn lut ve a, ka khuma Mîlo chu a bawmah a dah a, amah zawk a mu ta thuk.

"Thla thar lam chu leng chhuak ila, kan ţhiante nen." A ti a, ţhian ho anga hun hman dawn chuan remruat lawk a ngai ţhin viau reng a ni.

"Pawi hleinem." Ka ti mai a. Keimah avanga rawt an nih pawh ka ring.

"Elii nen chuan in inbe ta miah lo maw?" a ti a, teh daih ţhin hian. Ka single chair ah chuan ka ţhu thla te te a.

"Kan inthen tawh a biak a ţulna a awm tawh hleinem." Ka ti a. Ka pi boral hlimchhawnah khan a rawn lang ve. Mimal taka inhuat ka duh loh avangin min biakna te pawh ka chhang pangngai viau. Ka rilru a let tawh zia a hrechiang bawk a, ani pawhin min biak dan tawk a thiam viau. Mahni induhtawk ve tak a ni ve thova, tlawm zawk a tan a ka rilru hneh leh kha a tum lehin ka ring lo hrim hrim.

"In induh viau emaw tia." a ti a, min bia pawh a ang lo.

"Viau lo a nih dawn hi." tiin ka nui suk a, ka luhlul ve thawkhat tih hrechiang tu a ni bawk a, ani pawh a nui ta ringawt.

"Chu ti chu midang ngaihven leh a ngai a nih chu." A ti a, a nui hawk hawk a. Kei chuan midang ngaihven tumna ka nei rih lo. Ka bialnu lo ni tawh te pawh keimahin a ka sawm an ni ngai hlawm lo, Elii ang tho khan an ni hlawm. Chutiang vang te chu a ni mahna, thlan tur zawnga mit ka len ngai miah loh ni.

"Tak takin midang ngaihven vak duh suh." 

"Ringawt a!" Ka ti hluk, eng a sawi tumna tak ni ang maw.

"Engmah ka sawi lo angah ngai rawh." A ti leh daih a, a va ho ţhin e aw.....

"Ţana'n nupui a nei dawn a sin." a tih chuan a uang emaw ka ti a, a thutak tak viauah chuan ka nuih tum pawh ka ţhulh leh.

"Eng tikah nge a neih dawn?" 

"Ka hre chiah lo, palai a tirh dawn thu chiah kha a sawi a. Rindiki kha a rai a ni awm e." a ti a, Rindiki nen an inngaizawng tih ka hriatna a la rei lo viau khan ka hre sia.

"Chu an innei thuai mai dawn a ni maw." Ka ti ve a, Rindiki chu a la nau riau khan ka hria, mahse a rai miau chuan inneih mai kha an tih theih chhun a ni awm si a.

"Ţana kha a confi lo viauin ka hria." A tih Chuan a chhan ka lo zawt vat.

"Rindiki chhungte khan an rem ti chiah lo deuh ni khan a sawi a, a thuphunga sawi la awm lo mah se Rindiki hnen aţanga a hriat tho a niang." a ti a, sawi zawm lehin, "Nau a ken miau avangin Ţana chuan a nei hreh lo a, a chhungte pawh han lungawi lo viau mah se tih theih an nei chuang si lova, inneihna chu buatsaih mai pawh an rilruk tawh a, mahse Rindiki te lam nen an thu a inhmu thei dawn em a chiang leh si lova." a ti leh a.

Ka rilru a lo awm chu sawiin, "A neih hreh loh ber a hnu...." Ka ti hmuk a, a mipa lam ber an rem te chuan an lawm viau zawk turah ka ngai mai kha a nia.

"Chu tak chu a nia, Rindiki chhungte lam hi an mi pangngai lo riau te hian a hriat. A! Ka'n sawi duah tawh nain, an buaina ber pawh kan hriatpui si lova, hetia lo ngaih dik loh nghal mai pawh hi a dik ber lo. Bakah palai an la kal dawn a, thu lawmawm lam pawh an lo hawn thei a. Rilru lo seng ve vak lo teh ang." a tih chuan ka bu nghut a, Ţana'n nupui a nei mai tur ka ngaihtuah chuan a inhmeh lo riau hian ka hre tlat pek a.

*

Hruaii'n a lo sawi lawk tawh angin tlailamah chuan a rawn lang leh ta ngei. Chhuahpui tumna ka nei chuang lo bawk.

Ka awmna lamah rawn chhoin ka bulah chair a pawt hnai a, midang pali vel awm mah se engah mah a ngai lo tih hriat zetin min thut hnaih viau bawk, a rimtui hman rim pawh hnarin a hre rang ngang mai.

"I hman hma chu ti hian ka nghak mai ang che." a ti a, ka ning ru viau mai.

"Joela pawhin a phal tho a, kan rei lo ang a." a ti leh sá sá a. A hnu lawkah U Joela chu rawn lutin, "Khawi ka lo ţhu ang e, zan lamah i rawn let leh mai dawn a lawm." a rawn ti a. Ţhut luih tlat chi ni tawh hek lo. Phur lo zet chuan ka tho ta nge nge.

Ka helmet leh Bike chahbi lain ka chhuak a, Vtea lah chuan min lo chhaih ang zuk zuk a, an nghal ve ţhin khawp mai.

Bike a rawn lawn pah chuan kan kalna tur a sawi zung zung a, min si chetin a rawn ţhu a, Bike a chuang ţhang tih hriat zet hian a ţhu zei viau mai bawk.

A dawr sawi chu tlereuh dawr a ni a, ka zawh buai pawh ngai lovin anu leh pate inneih cham lawmpuina thilpek a lei dawn thu a sawi nghal vek bawk.

Dawr nghaktunu'n ţhutna min kawhhmuh ah chuan ka ţhu a, ani chuan a en kual thung. A nalh tih zawng te chu min rawn hmuh ve a, ka mitah chuan a nalh dan chu a inang vek mai hian ka hria. 

Ka bula ţhu a a thlan tur ber a en kual lai chuan dawr chhungah midang an rawn lut ve a, dawrnghaktunu'n a lo láwm vat bawk. 

Rawn lut mek te chuan min rawn hmu ve chiah bawk. Malsawmpari chuan mak ti hmel zetin min en a, a kalpui pa chuan min hre lo bawk a min rawn ngaihven lo.

Khawi khawi emaw laiah hian hmuh tur a awm ve ziah ni mai hian ka hria. Min zui ru emaw tih mai tur hian a lo lang ve leh nulh zel a. Ka pi boral sarhu lai pawh khan inbe lem lo mah ila ka awmna a piangah hian a lo lang ve thei ziah. Kan inah chuan mahni chauh a awm theih ţhin loh avangin kawt velah tei harh zauh zauh ţhin a, chutiangah chuan Malsawmpari hi hmuh tur a lo awm ve hman ziah.

A kalpuipa awmna lamah chuan a zui ve nghal a,bialpa a nei ve ngei em maw ni.

 Hruaii chuan ţhi pathum sin te te a lek kang a, "Khawi hi nge nalh i tih ber?" a ti leh a, a inang deuh vek maiin ka hria.

"A nalh vek mai kha." Ka ti mai a, dawr nghaktu nula pakhat chuan an quality te chu a rawn sawi zat zat a, ka hrethiam ve teh nuai lo.

A thlan ber chu a pack tir a, a man a inpek fel lai chuan kan piah a Malsawmpari te pahnih lo ţhu ve chu ka va en a, an thlang uluk dun hmel ngang mai. 

Hruaii nen dawr aţanga kan chhuah chuan thil ei a rawt leh a, ka sana ka bih vut. Let leh tawh mai chu ka rilruk bawk. Khawlaia awm kan ni bawk nen ngen tak te a min ngen avang chuan kan inhruai leh ta nge nge.

"Joela'n chawlh a pek tawh che kha, thlamuang deuhin awm rawh." a ti ham ham, in phur chhuak lehin a dawr sawiah bawk ka luh pui leh. "Ka treat ang che i duh duh ei rawh." a tih chuan ka nui mai a, mahse min pek sak ai chuan ei loh ka thlang.

Kan thil chah te kan ei laiin a phone a ri a, a chhan lawk tur thu sawiin a kal sawn vat. Ei zawh vat a let thuai duh lai a. Rin ai an inbe rei zek mai lehnghal.

Mahni a ka ţhut lai chuan Elii a rawn lang hlawl. Ka hawi chhuak lo bawk nen ka bul a rawn thlen lai ka hre lo. 

"I dam em?" a ti sap, amah chauhin a kal nge ni a ţhiante awm ang hmel ka hmu lo.

"Dam a lawm nang zawk?" Ka ti let a, min hmu chu a hlim hmel vur lo a, lawm lo hmel a pu lo bawk. Min hmuh tawh phawt chuan min be hmasa thei zel a, a ţha hrim hrim e.

"Dam a ni mai, eng nge intih a?" a ti a, mi ka bazar pui thu chu ka hrilh ve mai. Ani pawhin a ţhiante a nghah thu sawiin dawhkan killam a pan a, ka ngaihven zui lo.

Hruaii a rawn luh leh chuan ka ei tur chah ka ei zo diam tawh. Thupha a chawi luam a, a hnathawhna lam a buaina chhete an neih thu a sawi bawk. A thil ei chu ka nghak ta reng a, a thilsawi ka chhan ve zel chuan a muan phah dawn bawk nen min biakna pawh ka chhang mang lo.

Bill pe a kan chhuak tur chu Elii ţhutna ka va hawi hram a, a ţhian a nghah kha tudang ni lovin David-a bawk. An inkarah engmah a awm loh zia sawi mah se ka rin ngamin a khawsa miau lova, an lo inzui ta zel a nih pawhin a mak love.

Mahse ka bialnu hlui a ni ve miau a, inthenna thu lah keima sawi chhuah. Tlawm ka hreh avanga ţhen ka ni ber a, inchhir ka tum lo bawk. Mahse hetia mipa dang nen a han hmuh chuan eng emaw danglam a awm lo thei lo.

Kan ei man chu Hruaii'n pek a tum viau nain keiman ka pe lui a, a tirah lawm lo der viau mah se a nui leh har lo.

An in kawt thleng ka thlah a, lût turin min sawm nasa khawp mai, mahse lut kawi tawh lovin dawrlam ka pan ta zawk a. Elii te pahnih lah chu rilruah an riak zui reng mai lehnghal a, thildang ngaihtuah tum pawhin a leng der lo.

Dawr ka thlen chuan min lo fiam hlut a, ka nuih liam pui vel mai mai. Vtea chuan uang thuang zet hian , "Fanu chhawm sa phei chu a zei viau ang." a ti a, U Joela lah chuan a lo lawm ngang mai, "Experience nei tawh chin te chuan an kherh thlu thuai mai zel a sin." tiin a lo nui hawk hawk, an va hahthlak ţhin e aw.... 

"I pa Kohhran Upa tih ka hrilh chuan a ngaisang teh mai a nia aw...." ti lehin a nui hawk hawk a, "Ka râp e a." Ka tih fiamthuna chuan an nuih a ti za ngang mai. Nula chungchang sawi hian an titi na karah ka awm ve reng zel a, rilru inti pa ve tawk tak ka ni bawk a ka thusawi turah pawh ka inthunun thei ţhin viauin ka hria, hmeichhe dang chung chang ka sawi mang ngai loh avangin Hruaii chanchin min sawi pui nasa ţhin bawk, chhelo hi an lo ti thei em em mai bawk a!

Zan dang aiin ka haw tlai viau a, chhan dang vak pawh a ni lo. U Joela leh Vtea an titi a kal laklawh a, an titi na karah ka ţhu ve reng kha a nia. In ka thlen meuh chuan dar 10 a hnai thuak tawh.

Zan dang ang bawkin ka haw thawmah ka nu an room aţangin a rawn chhuak leh a, hetia min hmuh kher hian a ngaih a ti ţha ţhin ni hmiang, an muhil vek tawh ni a ka ngaiha thawm ka dim viau pawh hian a rawn tho chhuak leh nalh zel.

"I va tlai ve." a ti phak chhap a, a ham nghal bai bai.

Ka haw tlai chhan chu ka hrilh a, min lo call a tum thu a sawi chuan ka phone dawrah ka theihnghilh tih ka hre leh chiah! A va pawi e aw.....

"In la naupan nen haihawt innei ve khanglang a." ti nuah nuahin an room ah min luh san a, phone hmanna tur pawimawh em em ka neih ka hre lo bawk a naktukah a ni tawh mai ka ti ta ngawt.

Zuata nen ka room ah kan awm a, kan ţhian ho lenna tur a an ruahmanna siam te chu min hrilh zui mawlh mawlh. 

"Zuitei Bike kha hmanniah an su a, a la thar bawk nen servicing a la chhe sia a keng thei hmel dawn lo. Dongi a awm lo bawk a keiin Zuitei ka phur ang a Sawmpari i phur mai dawn nia." a ti zung zung a, tun thla ral nan kar khat ţha a la awm a, an rel lawk hma ka lo ti rilru khawp mai.

"A ţha a lawm." Ka ti thung a.

"Hruaii nen khan in inkawm nasa viau em?" 

Teh daih ţhin hian, a phone a hmet mual mual a, kan thil sawi lai a inpersan ţhin khawp mai.

"Nasa lem nang.... ti nge a?" 

"A lo thlem thlu der ang che tih ka hlau mawle." a ti fiamthu a, U Joela te pawh tih tawh nak a laiin.

"Thlu lo turah ngai ang." Mahni inringtawk zet a ka tih chuan chuan min nuih mai a, ka dai sual a hlau ve viau pawh a ni mahna.

Phone khawih tur awm si lo chu Mîlo ka chûl ka chûl a a hnu deuhah chuan computer ka khawih a, thlalak ţhenkhat folder tharah ka dah lût a, a hranpa hian ka khawih khât ve bawk nen thlalak pawh ka dah luh ang angin a tam ngang mai.

Ţana te leileta kan kal ni kha kan ţhian ho thlalak a hlawm deuh awm hnuhnung ber a ni a. Thlalak chu ka en kual dan dan a, U Dongi lâk deuh vek a nih avangin ka vawikhat hmuhna an ni hlawm.

Malsawmpari chiang zeta a lanna chuan min ti nui chhuak ţep! A thil ei lai a ni a, a biang tawn tawnah a hmuam pawng viau a, inhmu se a duh lo ve ngawtin ka ring.

"Ava hmuhnawm awm vur vur ve aw....." Zuata'n a rawn tih takah chuan a dang ka hmet sawn vut, a ţul ka ti lo leh hnuhnawh viau bawk, thil tih ruk inman chhuak ang hrim a!

Thlalak ho ka khawih danglam lohna a rei tawh thu te chu ka sawi ta vel mai mai. Midang thlalak pawh ka en dan dan a, Malsawmpari lo lan a piang mai chuan ka nuih a za, pangngai taka a lanna a awm ve mang lo hrim hrim.

Kha mi ni ah te khan ka ning ru viau a nih kha, tunah pawh ka kawmngeih tak viau pawh ka hre chuang lo. A zan rei chhuak tur ka hmu ţhin tih hria se engtin tak ngai ang maw, nula lehnghal, thil nih phung pangngai lo lutukin a khawsa a, ka va thunun theih ni lo mah se ka mit a ti kham viau lawi si.

"Sawmpari hi chu a hmelţha reuh a lawm." a lo tih leh chuan screen ah Malsawmpari a lo la lang reng tih ka hre chiah! A zia lo ţhin mang e aw.....

"A lian lo em mai a." Ka'n ti thla ve rawk a. Chhan dan tur dang ka hriat loh vang a ni ber. Nula tê chhe zawk zawk chu a ni lo, mahse ka nula lo ni tawh te ngaihtuah chuan a lian lo viau thung.

A nui mai a, chutah,"Lian deuh se la chu i iai vak lo a ni maw..." a ti leh a, ka chhang duh tawh lo. Zan lama a chhuah ţhin thu kha hrilh ve kher a ţulna ka hre lo.

*

Ka hnathawhna hmun ka thlen veleh ka phone ka zawng hmasa ber. Ka dawhkanah a lo awm a, a battery pawh a low viau bawk.

Midang an rawn la thleng ve lo bawk a tiin charge hma chuan ka en thuak thuak a, Elii min biakna chuan ka mit a la leh ta ber.

"U Hruaii ber kher?" tih hi a lo thawn a, chhan ka tum ûk a, han chhan mai dan tur ka hre lo.

Kan inngaihzawn lai pawh khan min hmu dun tawh a nih kha, kan inkawp turah a ngai ni hmiang ka ti mai a, insawifiah ka ngaihna tur a awm lo bawk nen ka chhang duh ta lo.

Zuitei hnen aţanga ka message dawn ka en leh a, nizan lama Zuata sawi tho, Malsawmpari phur mai tura min tihna leh a bike chian loh thu bawk. Malsawmpari nen kan inhnaih viau lo tih an hriat avanga ka phurh tura ti pawh an ni mai thei.

Vawiin lamah Hruaii a rawn lan loh avangin tlai lamah ka thawhpui ten min fiam zuk zuk reng a. Mipa inkawm tih takah an fiamthu lah hi a sang ţhin si.

"Infawh a zei viau lo maw." a tih loh leh, "I bialnu te aiin i vei hrim hrim ang." an ti thul. Hetiang hian ka farnute hi an sawi ţhin ka ring lo.

Hmeichhia te hi mipa te titi tling ber pawl niin kan sawi nuam tih ber ber ni mah se kan sawi duh dan an inang lo hlawm khawp mai a. Mipa ten kan sawi hat tawh chin hi chu hmeichhe lam awmdan a zir a ni mai a, hmeichhia chu zahawm taka a nun chuan kan uan khum ngam bik miah lo.

Hmeichhe tan hi chuan zahawm taka an awm mai hian mipa pawhin kan zah mai a, kan infiam bawrh bawrh a nih pawhin eng emaw riau hi a awm ţhin, keimahah phei chuan line pelh loh tur chin a intuk ni mai hian ka hre ţhin.

Hmeichhe zuamawm hmel deuh hlek te ah hi chuan mipa a tu a mai pawh hi an huaisar ţhin riau. Nungchang bakah thuamhnaw inbel duh dan hi kan intehna lian tak a ni. Miin taksa lang tam thei tak ha se, zahawm khep a inchei ţhin nen chuan kan ngaihdan a dang fur mai ţhin. An thawmhnawin an rilru a thunun chuang lova, mahse eng anga mahni invawng, lu zo ve vawh, mi fing , mi thiam, nula fel leh chhuanvawr pawh ni mah se, taksa lan tam hiang huang theihna kawr an hak ngamna rilru hrim hrim pawh khan a tilang zahawm loh ve hian ka hre ţhin.

Chu chu keima ngaihdan ve mai a nia, midang ngaihdan chu a ni ve kher lo pawh a ni mahna, ka ngaihdan kha midang pawm tir ve kher ka tum hran lo, ka sawi chhuak ngai lo bawk. Ka farnuten anmahni tawka an zahawmna an hum thiam chuan a ţha maiah ka ngai.

*

*

Kan dam phawt hi chuan hun hi a kal ve zung zung mai a. Inrinni a nih chuan ka ţhiante lo rel lawk tawh ang ngeiin len chhuah kan tum a, ka chhungte pawhin an lo rem ti viau mai,ka pi awm loh hnu aţang hian inah ka inkhung chawt a tih theih ang.

Kimtei leh U Dongi an tel thei dawn lo a, mipa lam erawh kan kim thei thung.

Zuitei te in kawtah kan innghak khawm a, Ţana'n Buangi a phur a, Azela leh Hminga an awl avangin kan bungraw ken ho an phur thung.

Midang an chhuak tawh tihah Malsawmpari'n puan ka ken theihnghilh a tih avangin kan chhuak tlai ber a, a rawn chhuah meuh chuan midang an tlan liam hman vek tawh.

Rei pawh ka tlan hmain ka hnung a rawn beng dawt dawt, "Eng nge?" ti a ka leh hawi chuan, "Tlêmin tlanmuang deuh la, ka thaw ţha thei lo." a lo ti hliai. Avabuaithlak e aw, kan chhuah har avangin midang ûmin ka hmanhmawh ve nen, traffic jam a tan chhung nen kan thleng tlai bik lutuk ang tih a hlauhawm.

Chhang ta lo chuan ka tlan chhuak leh nghal a, a hma ang chuan ka tlanchak ta lo. Khawpui chhung pelh hunah chuan ka khalh chak leh thoin ka ring. Muangchang a khalh delh delh te zawng kum upa lam chan em mai. A nuam tawk te pawh a awm ve a lawm.

Khawpui chhung pelhah chuan min lo nghak hlawm a, keini min hmuh ve leh an tlan chhuak lehnghal a, an khalh muang hlawm vak bik lo. Mahse ngaihmawh tur khawp a chakin an vung lo thung.

Ka speed ka san ve chu hnunglam a miin ka kawrhnung a rawn ţham tung a,a pawt bet nasa mai si. Ka tan a hrehawm em vangin ka ding leh ta nge nge.

Ka din rual chuan min thlah ve mai a, thaw hawkin ka kawr chu ka pawt mar leh te te. Ka hmeichhe phurh tawhah phurh a la hahthlak ber.

Min be chak vak bik lo nge ni a la ţawng leh lo hrim hrim. Keia pawh chuan han biak lum lam vak dan ka hre chuang lo, ka jacket hak chu a jipper ka phelh a, ti hi chuan min vuan pawh ni se ka tan chet a nuam deuh ang.

Ka tlan chhuah dawna darthlalang aţanga ka en chuan a puan khum a lo siam ţha ve mawlh mawlh. Ka nghak leh rih. A inpeih ve leh ka tlan chhuak zui a, ka khalh muang tawh lo hle bawk. Kan tlai lutuk chuan kan ţhiante ngaih a lo ţha lo palh ang.

Ka kawrah chuan a rawn hmer leh chawt a, bike a chuan zin hmel nen rin ai a dawih daih lehnghal. Zan reia an phur chhuak ka hmu fo a, nge ni a keimah ka nih avangin a thla a muang lo zawk pawh ka hrethiam teh nuai lo.

Kan tlan chhung zawng chu nuam a ti vakin ka ring lo, kei pawhin phurh nuam ka ti bik lo.

Hmuifang leh Sialsuk tlang vela lên tum kan ni a, ei leh in tur pawh kan induhthawh bawk a kan hnianghnar leh viau ang chu.

Midum khâm chho kan tlan lai te chuan ka speed a muang fahran lo bawka ka hnungah a hmai a phum, ka nuih a ti za viau nain ka nui chhuak duh lo. He ti taka dawih tur si te chu midang phurh tir daih tur hi a nia.

Kan ţhiante awmna kan thlen a ka din rual rual chuan rang zetin a chhuk a, a pai nghal khut khut chu a banah ka chelh hman hram. 

Midang hoin an lo buaipui nghal takah chuan a kut ka thlah ta chauh, rei loah a pangngai ve mai bawk a. An ngaihtuah hlawm viau nain ka tlan chak pui lutuk vang tih ka hriat avangin ka nuih a za zawk mah. 

Bike kan hun fel hnuah kan kal kual a, sialsuk lama thil ei an tih avangin kan bungrua ho pawh kan keng nghal lo. Thla an la nasa chuai chuai khawp mai. Khualzin dang an awm ve nuk bawk a, khaw hrang hrang sumo ho an rawn ding a, kawngpui bul maia an thil lo zawrh pûtna bulah chuan an tei kual sap sap. 

Chu lam hawi chuan ka ding reng a, Zuata ka bulah rawn kalin min rawn kuah thuk.

"In rawn kal kawngah in insual em lo maw." a tih chuan ka hrethiam lo ţep, mahse Malsawmpari nen min sawina a ni tih ka hre thuai.

"A dawih lutuk haw lamah chuan nangman phur mai teh." ka ti nghut a,ka ti tak tak bawk, mi nuam lo ti chung chung phurh luih chu a phurawm hran lo.

A lo nui mai a, "Chutiang tur a ni nang." a ti ringawt a, "Kan inphur hlum thei mai ang." Ka tih chuan a lo nui hawk hawk.

End of chapter 8

✨