BLUEMING 🦋 CHAPTER-9 BY UNKNOWN BELLE

BLUEMING 🦋

BY UNKNOWN BELLE

CHAPTER - 9

Hmeichhe lamin thlalak ho an rawt chuan mipa ho pawh kan ding ve leh ţhap. Midang lo kal remchang chu biain kan ţhian ho chu thlâ min lak sak ang lawp lawp a. Thli a tam bawk nen a nuam ve viau.

Kan inzui kual ve ţham ţham a, phul dai nuam zetah chuan ka ţhu thla a, ka piah deuhah an ţhu ve hlawm bawk.

 An titi mawlh mawlh na pawh chu ngaithla ve lem lovin ka ţhu awn duai a, ka tunlai nun hman chhoh dan ruak riau pawh hi a chhan ka hria,mahse pawi ka tih lohna in min chenchilh nasat zawk miau avangin ka nung ve mawp mawp. 

Ka ţawngtai tlem em em a, ka ţawngtai ngai tawh lo tluk a tih theih ang. Ka nun phung pangngai vek si a ruak hiau mai awm hi hnawhkhah chakna pawh ka nei chuang lo. Hnawhkhah ka duh lo zawk pawh a ni mahna..... 

"Kha in rawh." tih ri ka hriat rualin can pakhat hi an rawn theh a, ka lo man chat. Kheuh hawngin ka in zui a, kawchhung a dai raih raih thei mai.

Ţana bialnu rai thu chu sawiin an titi hlut a, inneihna chung chang an sawi kai thuai. Hminga chuan mopa ţhian a hauh nghal bur mai bawk a, kan hlim ve dar dar viau.

Buangi'n, "Ruatdiki te chu a la naupang nain a fel ve reuh a lawm, an in chhunga che ber a ni ve a, an ui viau a nih pawhin a awm lo hran lo." a ti a, a thu tak ta viau mai. Rindiki chhungte rilru kan hre tlang vek bawk a, zep vak tur awm hek lo le.

Azela'n,"Hmeichhia te hi chu inchhung chetah han rintlak em em mai se a dang hi chu dik chho vek zel mai." inti hrechiang fahranin a lo ti ve, midang ho lah chuan taima phunchiar chung changah an luh san leh ta daih.

Ka pa tih dan takan, "Hmeichhia te hi chu han ang ve bawrh bawrh mah se, ngawi reng hian lo ngaithla ila, an lungawi ve leh mai zel" a tih hi ka hre reng ţhin, hmeichhia te pawh inang vek lo mah se an inang thawl hawk tawh hnu pawh a la lungawi zo chuang lo ho hi chu an rilru puthmang dik loh vang a ti mai zel bawk a.

Ţana'n thutak zawkin, "An khawsak a harsa ve deuh bawk nen inneihna a awm a nih pawhin hautak deuh ang kha a duh lova, apa in checkup naah sum an khawhral ve reng bawk nen amah ber hi a inthlahrung khawp mai a. Mahse karleh lamah palai an kal ang a, an sawi rem ve theih mai chu kan beisei chu a nia. A chhungte lam hian a tha an chhawr ţangkai ang reng sia a rilru a buai ve khawp mai." a ti dap dap a.

Ruatdiki chanchin hi ka hre ve vak lova, vawikhat chu ka hmu ve tawh, nikum lamah khan a ni nghe nghe. School naupang a la ni bawk. Kumin ah chuan college a kal ve tawh mai thei, kum khat chu an inzui tling ve awrh chauhin ka ring. Ţana'n puitling taka nupuia a nei duh chu ka lo chhuang ru ve viau. Ka ţhiante dang ho pawh hian tawng ve se chu a tih ang tho hian an tih ka ring, mi pangngai, chhungkaw pawimawh zia hrethiam ţhah an ni hlawm a, hmeichhia awmnem zawk te dawm thiam em em an ni hlawm tih ka hre bawk.

Rei awm tawh lovin Sialsuk lama kal an rawt a, kan Bike hunna lamah chuan kan inzui sap sap. 

Bike ah chuan lawnin helmet ka khum nghal a, ka tih nun hmain ka phurh tur ber a lo la thleng ve leh lo. Hmeichhe ho chu an zung leh lawk dawn an tih avangin kan lo nghak ţhap. 

An rawn thlen ve leh kan chhuak zui nghal a, Malsawmpari lawn tur a hreh tawh hmel lutuk chu ka hmu ru reng a, ka nuih a za ang reng. Ka pi kha phur ta ila chutiang vel chu a nih ka ring.

A hla vak lo bawk a ka tlan chak pui tawh lo. Min vuan tung tawh lo bawk. Side glass aţang chuan ka en leh zeuh ţhin a, puan khum mah se nisa hnuaiah a meng ţha thei bik lo ni hmiang a meng zim sûn a. Nidangah makeup a hman leh hman loh ka hre ngai lo nain vawiin chu a inchei ve riaua ka hriat. A hmui pawh a hmawih tai ve tak a, a inhmeh phian.

Sialsuk tlang kan thleng chuan khualzin dang pawh hmun tur an awm nual. Luh man te pe felin AZela Leh Hminga te bungraw phur an nih avangin an inkhalh lut a, a dang zawng chu kein kan chho thung.

AZela te inchhawp na kan thlen chuan thlan a sa ve bat thei. Ka kawrchung hak phelhin ka darah ka bât a, a hnuaia ka tshirt var hak pawh ka pawt ka pawt mai, ni a sa tho nain chhumin a hliah ve zel a, thlir a tam bawk nen a nuam viau tho mai.

Hmeichhe hoin ei tur an buaipui a, portable gas stove hmang chuan ei an siam an, an nui leh hak hak ţhin bawk. Kan in tur ken ve ho chu mipa lamin kan lo dawm ve thung a, hetiang a hun thawl hek hawk hi kan nei zen zen lo hlawm bawk a a nuam viau mai. U Dongi awm lo chu ka phone pawh a rim lo deuh.

An ei siam kan ei hma chuan kan kal darh leh rih. Mahni kal duhna lam lamah kan kal darh sang a, thla an la leh mawlh mawlh. Hminga hi thlalak a thiam viau a, vawiinah ringawt pawh a camera a rim leh hle tawh. 

Kekawr ipte zenin ka dinna aţang chuan thli thaw chu ka dawng heuh heuh a, kan awmna a sang deuh bawk nen a nuam ka ti ve hle.

Ka awmna aţanga kalsawnin ka kal kual a, Malsawmpari leia lo ţhu ka va hmu, a phone enin a nui ang vur vur a. Thawm dim takin ka pan hnaia, ka thawm hriaa a rawn hawi chhuak tihah a phone chu ka pan sak thut, a ţe ţhawt chu ka lo nuih pui. Rawn ding chhuakin a phone chu mih chuh nghal a, kei ai a hniam miau avangin a ban pha thei lo.

"I hlimpui vur vur bawk a en ve a chakawm a lawm." nui miah lo a tiin a phone chu keng sangin ka hmet eng a, en sak tak tak pawh ka tum chuang lo. Mahse vawiin a mood a fuh loh hmel em a tih buai ve hrim hrim ka chak riau.

"En suh....." a ti tung a, ka hmuh a hlau lutuk chuan min ti en chak sauh.

Min lo ban buai ve zel avangin ka en mai thei bik lo. A hnu deuhah chuan ka bek tawn tawn a dawmin min kuai dawr a, a hlauhthawng hmel chu ka hmu chiang ngang mai. Ka inring lo bawk nen ka chesawn lawk lo.

"Eh suh, ka phal lo, ka phone a nih kha. I ta pawh a ni lo." A mah en tura ka beka dawm reng chung chuan a ti zui mawlh mawlh a, kei chuan a ţawng zawng a hmui che vel ringawt chu ka lo en, nidangah hetiangin a hnawih sen ngai tlat lova, ka mit a la lo thei lo. A hmui a tilang nalh viau bawk si.

Ka inrin loh lai chuan min vawnna thlahin a phone chu a ban thut a, min en lehin, "Nang pawh i phone ka khawih bik lo, an inkhawih sak tawp tawp ngai lo." ti zui hmarh hmarhin a kal ta daih. A kalna lam chu enin ka tukhum thak lo pui ka hiat ringawt. Keia pawh chu eng vanga a phone lo lak sak ve ringawt nge maw ka nih reng reng ni, khatiang khan midang pawh hmu ila ka ti awm der si lo.

A kalna lamah chuan muangchangin ka kal ve a, ka phone lo rik chuan ka en vut, Elii hming a lo lang kulh. Phone call chu sawi loh text message pawhin kan inbe ngai tawh lo a nia, tun anga a rawn call a nih chuan a pawimawh viau a nih ringin ka la ve mai.

"Hello." ka tih rual insut ri hraih thawm ka hre nghal. Elii chuan tap aw tuau hian, "Min lo hruai teh...." a ti a, a aw chu ka hre thei chang chang a ni.

"Ka hman lo." ka ti ringawt a, ka hman lo reng bawk, bialpa a neih reng laia ani ka buaipui chhan tur lah ka hre lo.

"David-a'n kut min thlak a." a ti sap a, ka sa bat thei! Hmeichhe kutthlak ching mipa hi chu mipa ni ve tlakah ka ngai lo. Elii chauh loah pawh, hmeichhe dang hrim hrimah pawh, an phu ngawih ngawih a nih ngawt loh chuan ka en liam theih thil a ni ngai lo bawk.

"Eng nge thleng a?" Ka ti ve ta nge nge, a mangan laia min lo bia a ni ve awm si a, a thusawi ngaihthlak te chu a pawina awm in ka hre lo.

"Min ring lo a, nangmah nen ka kawp turah a ngai tlat a." a ti sap a, a insut leh hraih ţhin bawk. Sawi tur min ti hre lo kher mai, a nihna takah chuan keimah zawk hi thinrim tur ka niin ka hria.

"A va nep ve." Ka ti hmuk a. Dik tak chuan min rawn biak a ţulna ka hre lo. Min rawn be ngam te chu ka thinrim pui zawk dawnin ka hria. Mipa rilru ţha leh fel tak ka ni bik lo, a ngaihzawng hlui ka ni a, chu pawh mipa dang vanga inthen kan ni. Kan inthen chhan ber nen a an inkar min la rawn hrilh chu awm ang lo ka ti khawp .

"Ka awmna aţang hian min lo hruai thei ang em?" a ti thawp sat a, ka hman loh thu leh midang be mai tur chuan ka chah ta ngawt.

David-a biak sak tura min rawn ngenna te chuan amah ka huat phah sauhin ka hria! A thisen san thlak deuh a ni.

"Ka hre lo le." tia ka chhan chuan, "A pawi chuang lo, a la inchhir ve leh tho ang." a ti leh mai a. Kan inbiakna kan ti tawp zui nghal bawk.

Ka bialnu hlui mah ni se pangngai taka inthenna kan siam avangin biak chhiat ka tum ngai lo. Tun ţum chu hmeichhia niin mipa kut tuar mah se a ti mah mahin ka hria,ka lainat lo tihna ni lovin.

Midang awmna ka pawh takah chuan pher phahin an lo ţhu leh dal tawh. Elii vangin ka chhung lamah hian thinrim inmung awm ang mai hian ka awm. 

Min hmuh rualin Zuitei chuan,"I va rei ve kan ril a tam tawh a nia." a lo ti hlak, ka sana bun lai ka bih vut a, dar 2 a lo hnai tawh reng mai. 

Kan thil ei chhung zawng te chuan Elii thusawi mawlh mai chu ka ngaihtuah a, nidangah pawha lo ţhu ngawi ve mai chi ka nih tho avangin ka ţhiante chuan ka awmdan an hrethiam lem lo.

An pahnih inkar a ni tawh a, inrawlh ka tum lo. Mahse kut a thlak mai thei kha tullo ka tih bakah hmeichhe dimna nei lo mihring niah ka ngaih avangin zilh hlak ka chak hle thung.

Kan eina te an tih fel hnuah zanin Kohhran inkhawm zan a nih avangin haw mai chu an rawt a, rei awm tawh lovin tlang aţang chuan kan chhuk dial. Hminga leh AZela te bungrua phurin an chhuk tawh a, min lo nghak dawn a ni.

Hmeichhe ho hnungah Zuat leh Ţana te nen kan kal a, an ti tina karah chuan thil dang daih ngaihtuahin ka kal ve zel a. Kan hmaa kal te chu tê teng tungin an tlan thla a, an nui ring viau bawk. An tlan paha Malsawmpari'n Buangi a kuah chuan an lum zui ta mai!

Zuitei lo ţe ţhawt in a um zui nghal a, keini pawh kan tlan thla thuai. Thui an lum hman lo hlauh zawk a.

An bul kan thlen rual chuan ka insum hman lo, Malsawmpari chu enin, "Fimkhur ve ţhin ta che! I fimkhur loh vangin midangin an nat phah thei tih te ngaihtuah ve rawh!" ka ti hrawk a, midang chuan min lo khap vat. 

Kawng dawmin ka thaw hawk a, nichin aţang tawha ka chhungrila intham tawh a ni bawk nen ka insum buai peih lo. Midang laka ka lawm lohna Malsawmpari ah ka hrithla a ni ber.

"Hun dang zawng zawngah pawh buai pawlah i ţang ziah, nangmah i inngaihtuah loh pawhin midang ngaihtuah nachang te hre ve rawh!" Ka ti hmuk a, Zuata chuan min lo khapin "Na em em an nih loh hi, tihpalh thil a nih kha." a lo ti dam dap a, boruak hip lut kawkin ka thaw chhuak leh te te.

Malsawmpari chu ka en a, kut hma suiha dingin hnuailam a lo melh ngar a, hliam a nei loin ka hria. Buangi erawh a kiu leh a khup pilh chu an hruk fai sak a, pangngai takin an awm mai a, keimah ber hi a nih hi pangngai lo.

Ţana'n,"Sawmpar hliam i nei ve em?" a ti chuan a lu a thing mai a, ka thinrim but pawh a reh tawh bawk a chutia Malsawmpari hnuailam en a ding ngawi kar mai chu hmuh nuam ka ti hauh lo. 

"Kan tlai lutuk loh nan kan kal mai dawn em ni?" Zuata'n a tih takah chuan Buangi chu a kal pui a, Ţana'n Malsawmpari leh Zuitei a kalpui takah chuan an hnungah muangchangin ka kal ve a, tunah chuan ka inchhir der tawh mai.

Ka awmdan dik lo sa nen an intihnat palh ka hlauh vang a ni ber a, khatiang a lo thinrim khum chiam mai kha chu midang tan pawh a mak viau ta ve ang. An intina vak lo tih ka hriat takah chuan ka thaw huai.

Haw tura inbuatsaihin Bike ka tinung a, midang inpeih ve hma chuan Zuata chuan min rawn pana, a sawi tum ka hre lawkin ka hria.

"Eng nga ti nge khatiang a i khawsak khum chiam a?" A ti sup a, Elii chung chang chu sawi a ţul ka tih loh avangin, "An intih nat palh ka hlau deuh mawle." Ka ti ţha ve mai a.

"Nakinah Sawmpari hnenah ngaihdam dil ang che." Ka dar beng thuk a a tih chuan ka rum nghut.

"Ho mai mai."ka tih san a, kei tak pawh chuan ka inthiam loh fel vek tawh avangin ho chu ka ti vak lo.

"A ho lo a nia, a rilru pawh ilo ti na viau thei, i hriat angin midang ang a ni lo a, hriatthiamna tam tak i neih a ngai ve a nia." A ti a, sawi zawm lehin, "A lakah hian i dawhtheihna pan riau ţhin hi ka hrethiam ve a nia, a awm nawm lohna turin siam tawh suh." ti lehin a Bike hunna lamah a kal zui a, ka thaw hawk ringawt. Keimahah eng nge dik lo ţhin pawh ka hrethiam tawh bik lo e! 

Malsawmpari pawh a rawn kal ve leh mai bawk a. Midang chu ni se titauin an rawn chuang duh tawh pawh ka ring lo. He tia a rawn kal ve leh mai takah chuan ka thaw ru huai thung.

Bike a a lawn tur chu a kekawr chhana a khup zawna thisen kai chu ka hmu a, ani a rawn ţhu fel tawh mai bawk si, midang an tlan chhuak zui nghal bawk nen a hnung berah muangchangin ka tlan pui a, ka inthiam loh ve miau avangin tih lungawi loh ka hlau ve deuh pawh a ni mahna.

Thui fe kan tlan hnu chuan kawngsir rem laiah chuan ka tiding a, ka chhuk thuai. Midang ho hmuh tur an awm tawh lo bawk.

Chutia ka chhuk vut chu hrethiam lo fe hian min lo en a, zawhna min zawt lo thung. Min be peih vak lo pawh a ni mai thei.

Ka helmet chu dahin ka bandana scarf ka la chhuak a, mipa dang hi an ni ve em chu ka hre lo. Bandana scarf hi ka ngaina ang reng a, ka chhuah dawn hi chuan ka ak chhuak tel ngei ngei thin.

Chhuk ve tuma a chet hrut chuan, "Lo che suh." ti supin a kekawr chu ka thleh sak a, a che chu tawpin a lo dawh ve mai bawk.

A khup zawna thi kai chu a tam hran lo, a kekawr rawng nen a inmil lo bawk a a lang chiang viau thung. A khup ka en chuan a lo pilh phung a, khatiang a tlu si ah chuan hliam a neih loh bik kha ka ring lo reng a ni.

A thikhar chu ka hruk fai sak a, ka tuam zui nghal.

"A na em?" Ka tuam laia ka tih chuan , "Um." tih zawngin min chhang. 

Ka tuam zawh chuan a kekawr ka siam ţhat sak a, ding chhuakin a hmaah chuan ka ding leh rih.

"Ka tih palh." Ka ti sup. A melh ngai melh rengin a bu nghat, ka lo duh khawp lo hle.

"Ka tipalh ka tih chu." tlema aw ki sang deuha ka tih chuan, "Um...." a ti leh ringawt a. A awmdan chu ka hrethiam lo, ka lakah a lungawi zan lo tih chu ka hre ve, mahse biak a piangin ţha takin min chhang ve zel bawk si.

"Eng nge um tihna chu?" ka tih chuan a thaw hliai a, ka duhnaah te chuan ka chimawm thiam ve a lawm.

"Engmah." a ti ta hmak reuh a, a hmel tûm ta bár mai chuan ka nuih a ti za ang reng. A ţawng chak lo chung pawhin min chhang ve zel chu a ni sia, a zia hrim hrim.

"Eng nge engmah chu?" Chimawm zeta ka tih chuan min en ve ta hram. A puan lukhum khum chuan a hmai tê chauh a tilang a, a hmel tûm deuh pak mai chu piai vak a chakawm reuh.

Lungawi lo hmel deuha min en in, "Haw tawh ang." a ti nghat. Chhaih buai chu nuam ka ti tulh tulh maiin ka hria. 

"Min ngaidam tawh tihna?" ka tih chuan a hmui a ti sawi zauh a, ka lo en uluk ngang mai. Nichin aţang tawha ka mit la tu a ni ve teh tlat.

Min chhan a tum loh avang chuan, "Min ngaidam tihna?" ka ti a, "I naupang chhia em mai khalh mai mai teh." A ti ta thlawt, ka nuih a za ru viau thung.

"Eng nge ka naupan chhiatna?" ka ti nghut, ka ţawng bul vut vang chuan ka lawm lo hmel hle a, ka chhungrilah erawh keimah leh keimah pawh chu ka innuih zat, hetiang a midang ka fiam ngai pawh ka hre lo e a.

Kut kuangkuahin a ngawi ta hmak a, hmalam a melh ngar bawk.

Ţawng hmasa zawka ka ţan duh loh avang chuan a beidawng ta a niang chu, a rawn thaw hak a, "A tlai tawh haw ang." Pangngai taka tiin hmalam a en ngar a.

"Ka Bike a nia ka thu thu." Ka tih chu a run hmel ngang mai. "A ţha e!" Ti hmakin a chhuk ta mai. Ka rin loh dan lutuk a a chet avang chuan hmalam pana a kal chu ka en reng ringawt. Ka nui hawk a, tun ţum chu ka nuihzat vang em em pawh a ni lo, a luhlul reuh lutuk vang zawk a ni ber.

A kal chak phian lehnghal a, a kal rei peih tak tak ka rin loh avangin ka thlir zui reng. Motor tlan a van lai tak a ni hlauh chu a tihzia ka ti khawp mai.

Kawng kawia a liam thleng chu ka en zui a, avahahthlak reuh tak!

Bike chu tinung vutin ka um zui a, ke a kal a ni miau a ka pawh har lo, a zawn ka thlen pawh chuan hre lo ang hmakin a kal zel a. Hetiang a kan inkal tir reng a nih a Zuata ten an hre leh a nih si chuan min zilh leh duh mai ang.

"Lo chuang rawh." Ka tihna chu hre lo ang hmakin a awm. A kal ngaiin a kal ngat ngat a, ka ţawngkam hman kha a haw ngang a niang chu.

A kalna chin zelah chuan muangchangin ka zui ve zel a, tih ngaihna dang hre hek lo.

"Ka tihpalh a nih kha." Ka tih pawh chu engah mah a ngai lo.

Zin vei vak Motor a rawn tlan tak zauh zauh ah chuan a zahthlak duh khawp mai, ani lah chu hre lo ang hmakin a kal lui zel bawk si. Min hmutute nui thawm pawh ka hre reng. Hawi chhuah ngamna chi pawh a ni lo.

"Luhlul hun a ni lo Malsawmpar! Rawn chuang vat rawh." Ka ti ta hluk, ka dawhtheih chin a pel leh tawh viau bawk.

Hre lo ang hmak chuan a kal zel a, a hmalam deuhah tlan khalin Bike aţangin ka chhuk a, min rawn kal pel tur chu ka vuan ding ta tawp.

"Hetiang a infiamna hun pawh a ni lo." Ka ti hmuk a, ka ţawng chu hria ang pawhin a awm duh lo reng reng, a melh ngai a melh ngar a, ka huat tawk a tling viau bawk.

"Va chuang rawh." Awka nem zawka ka tihna pawh chuan a ti danglam lo.

"Hey! Lo hawi teh." tiin a dar tawn tawnah ka vuan a, kan inhmachhawn ta ran, ka tih ang ang chuan a awm leh ang lawi a.

"I lung ka tih awi loh chuan ka tihpalh." Ka ti ta sup, a thaw hliai a, chutah, "Ti nge i sual em em a." a ti ngui lâp a, a hmel ka en phei chuan ka inthiam lo nghal rawih rawih thei. A lakah hian ka lo tih lutuk ţhinna chu tunah tak hian ka inchhir riau lehnghal. 

Vawiin chu kan boruak a dang riau a, a....ka hrethiam tawh bik lo, keimah zawk hi ka dik lo tih chu ka hria. Zep rual lohin ka hmu hmelţha riau lehnghal! 

"Ka tihpalh." Ka ti leh tawp, a bak sawi tur ka hre lo.

"Min ning tih ka hrethiam ve vek." a ti reuh a, a hma kha chuan ka ngaithei lo viau ţhin reng a ni. Mahse tunah tak hi chuan khatiang rilru kha ka pu miah lo thung.

"Ka tihpalh." Ka ti leh tawp a, a rilru ka lo ti hrehawm viau ţhin tih a hnen aţang ngeia ka hriat vang te pawh a ni mahna, ka inthiam loh ngawih ngawih ni mai hian ka hria.

"I tihpalh lo, ka hrethiam ve vek." A ti leh a, a awmzawn a melh ngar a, a ţawng ve pawhin a rawn hawi chhuak lo hrim hrim.

"Eng chu maw i hriatthiam a?" 

"Engmah." 

"Sawi ţha rawh, i sawi lohin engtin nge ka hriat ang a?" 

"Sawi vak tur a awm hleinem."

"A ţha e, i rilru tihnatna ka lo neih tawh zawng zawngah khan ka tihpalh a ni e." Ka ti ta tawp, a luhlul ve hle tih ka hre tawh bawk a, haw a hun tawh viau bawk nen kan inthlem rei tlat.

"I tihpalh tak tak maw?" A ti a, ringhlel hmel zet hian chiang zetin min en kal mai a. Kei ang lo takin ka zam ve ţep lehnghal. Vawiin chu henu laka ka awmdan hi a dik thei meuh lo.

"Um" tiin ka bu nghut a, "Haw tawh ang a tlai zel." tia bike lama ka kai phei tur chu, "A nih leh." tiin a ding leh tlat. Ka ning leh tawh mai dawnin ka hria.

"Eng nge?" Ka ti a, a dam thei ang bera biak ka tum bawk. Chu ti lo zawngin motor dangah kan inhaw san duh tak ngial dawn.

"I tihpalh tak tak tih engtin nge ka hriat theih ang?" a tih chuan ka thaw hawk, a va ho mai mai tak!

"Ka hre tawh bik nang...... Kei chuan ngaihdam ka dil tawh che a, min ngaihdam duh leh duh loh a ni mai lawm." Ka ti ta thlawt.

"A nih ngaihdam chu i duh em?" a tih leh chuan ka ning hle tawh.

"Aw" ka ti liam puat. "Zanin i inkhawm chuan ka ngaidam ang che." a rawn ti a, ka chhan dan tur hre duh ang hrimin min en chiang nasa mai.

Chhan mai dan tur ka hre lo, Sunday school hi ka inkhawm ţawk a ni mai a. Ka pi boral naah khan dem ka nei tlat a, ka lungawi lohna lan tirna a ni ber bawk ang chu. Tun hma zawng pawha inkhawm taima em em ni ngai lo bawk ta chu ka pi boralna chung chang a ka rilru put hmang tur ka chhungten an hre bawk a, min nawr na ngam lo.

Engtin nge maw ka inkhawm khat tih te a lo hriat ni.

"Min ngaidam lo mai teh." ka ti ta ngawt. A beisei ang chhanna ka pe lo tih a hmelah ka hre thei.

"Awle." a ti leh mai a, a duh ang chhanna ka pe thei lo chu a rilru a na ve deuh a ni mahna.

"Haw tawh ang, kan accident emaw an lo ti leh palh ang." Ka tih chuan min zui ve ta hram a. Kawng tluan chuan kan inbe tawh lo.

Khawpui chhung luh dawnah kan ţhianten min lo nghak a, Zuitei chuan min lo en uluk ngang mai. A unaunu hi ka hauh leh hrep a hlau te pawh a ni mahna.

'Eng nge' tih nan mit ko ka san zauh a, a lu thing mat matin min ei lo hmel zetin a meng kual ralh. Ka hrethiam lo hle tih a hre lo a ni.

An inkawtah ka thlah a, Zuata'n Zuitei a thlah ve bawk. Zuata pawh inkhawm ban lama a lo kal tur thu sawiin a haw zui a. Kan in lamah ka tlang ve nghal bawk.

Zanriah ei hma ka room a ka inkhung laiin Bektei a rawn lut a, hetia a hrana room a min biak a duh hi chuan ama tawkah thil pawimawh deuh sawi tur a nei ve tih ka hrethiam ve mai ţhin.

"U Elii nen khan in inthen tawh tak tak maw?" a ti a, khumah let tawpin Mîlo a chul hliau hliau bawk. Mîlo hian min hmuh khât nen min ngaina phian a, ka awm tawh chuan min zui chawt mai ţhin,ka chhungten min fiam nan tak an hmang lehnghal.

"Tak tak e." ka ti a, ka phone banin Hminga'n thlalak a rawn dah ho chu computer ah ka dah lut pah bawk.

"Ka ring reng a." a ti thluk duai a, "A hma kha chuan min be ţha thei lutuk, tunah chuan college ah chuan min hmelhriat loh leh daih tawh." a ti a. A hmeichhe thu hla em avangin ka sawi pui duh lo.

Thlalak ho chu ka en pah thuak thuak a, ka mit la deuh pakhat a awm, chu mi thlalak chu en in ka nui suk. 

"Elii kha chu mipa ţhian a nei thei lutuk, in inngaihzawn rei ka ring lo reng a ni." Bektei'n a tih chuan, "I rinna a chak a nih chu." Ka ti mai a, thlalak mawlh chu ka en uluk, nalh ka ti riau pek a!

Malsawmpari nen a phone kan inchuh lai kha a ni a, a lu chung daiha phone ka en lai leh a lo ban ve lai. A nalh reuh bawk nen ka en vung vung ringawt. 

Kei hi ka dik lo tlat, Malsawmpari laka ka rilru put hmang hi ka hrethiam lo, engvanga hetia awm thut nge maw ka nih le .... Mahse ka mit hi ka thunun thei der si lo.

"Nangmah zawk hi i lerh chiang." Bektei aw ka hriat chuan ka harh chhuak zawk. Khumah lo ţhuin ka thil en lo a lo thlek ve reng.

"Ka lerh leh lerh loh te chu i hria a lawm." Ka ti mai a, thlalak hrang hrang chu bet lo zetin ka en kual ta vel mai mai.

"Na....kei ai chuan i lerh tho tho." A ti vak ringawt a, thlalak chung chang a rawn sawi lo chu ka lawm kher mai. Ani hi chu a lerh lo leh lutuk hi a ţha lo zawk, Zuata tan tak pawh a buaithlak.

"Ka va insiam teh ang. Nang pawh inkhawm ve rawh." tiin a chhuak zuia, inkhawm kal hma an duh ţhin avang hian an insiam lawk ţhin reng a ni. Inkhawm a sawi takah chuan Malsawmpari thusawi min ti hrechhuak.

Chaw ei a piang deuh thawin ka pa'n min zilh ţhin a, ţawngkam na tak leh min nawr viauna thu a chhakchhuak ngai lo. Ka ngaithla liam vel mai mai a tih theih ang. 

Mîlo nen hian kan inzui chawt a ni mai a, ka nu leh pate an rawngbawlna kawngah theih tawp an chhuah a, mahse an fapa ber hi min enkawl ţha tawk ni a ngaih chang an nei tih ka hria, an ţawngkam hrethiam lo rual ni bik lo ta chuan ka hrethiam ve vek tho, mahse awmzia em em a nei hran lo.

Kohhran belh chakna ka nei lova ţawngtai tak ngial pawh. Midang ţawngtai a ka 'amen' ve bak hi chu ka duhthu renga ţawngtai pawh ka nei khat ta viau. Keimaha ruak tlat awm hi hrehawm ah ka ngai lova, hnawhkhah tumna ka nei ngai lo bawk.

Chaw eikham a Computer hmaa ka ţhut veuh veuh lai chuan ka ngaihtuahna a vir zawk. Inkhawm dar ri chuan ka ngaihtuahna a thlak thut a tih theih ang.

Ka rilru ka thlak hmain rang zetin ka insiam sawk sawk a. Ka inkhawm ipte ak a room aţanga ka chhuak chu ka chhungten min hmuh chuan an hmelah an lawm tih ka hre thei. Mahse an lawmna ang huin ka inkhawm tum ve chhan hi a ho viau si.

An kal rual chuan ka kal ve ta tho a BiakIn kan thlen chuan Kohhran upa pali vel an lo awm tawh, khuangpu leh pianist an ni leh mai,chu mite tih loh chu Chokidar a ni leh mai.

Lut ve ta mai lo chuan ka tawi khawmuang leh rih. Ka inkhawm ve chhan chu ho ti viau mah ila phurna riau ka nei tlat lawi a. Keimaha dik lo deuh awm chu ka hrethiam lo hle, hmeichhia vangin hetiangin la awm ngai hek lo le, hunin a la hril ve chek ang chu.

Ţhalai len tlar hnunglam a sirah ka ţhu a, inkhawm an lo kal belh ve zel bawk. Chu tih rual chuan ka mi nghah ruk ber chu a rawn lang ve thei lo. Ka rilru fim hnua ka thil tih ho ka tih em avang chuan keimah leh keimah chu ka inhau ru mawlh mawlh. 

Ţan hma minutes 5 la awm tihah chuan ka mi nghah ruk a lo thleng ve chiah. Hnungzawng chauhin hmu mah ila ka hai lo chiang khawp mai.

A sam kir kawi deuh siau chu a thlah leh tawp a, kawr senno hain puan dum plain a sin leh tawp. A hmel hmu lo mah ila a inhmeh riau a ka hriat. Heti lam zawng rilru ka pu tlat mai hi ka inhrethiam tawh bik lo.

Thusawi ngaihthlak chhung zawng te chuan thil dang daih ka rilruah a awm. Tunah te chuan midang buaipui ka nei lova, Malsawmpari pawh ka va ngaizawng ta tihna a ni lo, a hma aiin ka mit a la ve deuh a ni mai. Tlangval ka ni a, ngaihzawng ka nei lo bawk, ka tan thil mawi lo pawh a ni hleinem tiin ka inhnem ta ngawt.

Inkhawm ban chuan tlar hma ho an chhuah pawh nghak lovin ka chhuak zui vut. Zuata ka hmuh chuan ka pan vat a, "I va ti ţha ve." a tih chuan, "Nia." Ka lo ti ve ringawt, ka hul ve zia hrechiang tu a ni bawk a a nuih ka ti za pawh chu a awm lo hran lo.

Tlangval dang te nen ding tlangin an titi na karah chuan ka mit len ru karin ka ding ve reng. Nula lo chhuak ho chu ka en zel a, rei vak loah ka mi hmuh duh ngei ka hmu ta. 

Kan awmna a hla lutuk lo bawk a ka hmu chiang thawkhat, a hmelah makeup hmuh tur mang a awm lo, ti chung chuan ka mit a la ta tlat mai te chu ka inhrethiam lo ang reng.

A hawi kualna lama min hmuh chuan mak a ti tih ka hre thei. A hnu deuhah chuan min nuih sak a, ka en reng thung.

A kutzungpui tipir vahin a kal sawn a, ka lo nui suk. Midangin an hmuh ve hman pawh ka ring lo.

Zuata'n haw a rawt takah chuan kan inzui haw a, kar thar lamah chuan an in lama riah a tum tawh thu a sawi zui mawlh mawlh.

In kan thlen chuan midang an lo thleng vek tawh. Biakin kan hlat lo bawka inleng hi chu kan nei ve reng ţhin.

Ka room-ah kan inzui lut a, a thuamhnaw a awm sa avangin kan inthlak zui nghal bawk.

Ka inthlak ve lai chuan, "Zanin kha ka hmu ru che u a nia." A ti a, ka hrethiam lo deuh. Ka tshirt inthawlh vutin ka wardrobe chu ka khar dawp.

"Tu nen chuan maw?" Ka ti a, ka hrethiam lo der ve tlat. Malsawmpari chungchang a sawi chak tih lah a hriat reng.

"Kei tal hi chu min hrilh ve ţhin teh." a lo ti hluk a, thinrim a sawi a ni lo bawk a ka nuih san mai.

"Sawi tur pawh a awm hleinem." Ka ti mai a, a Khawi lai ber kha nge han sawichhuah chi pawh ka hrethiam lo.

"Sawmpari i hmuhdan dik tak hi?" a ti a, a zawhna chuan min ti hamhaih ang reng. Engvanga chutiang zawhna nei chu nge maw a nih reng reng ni. Anni tan chuan ka hmelma en viau te pawh a ni mahna.

"Hmuhdan vak pawh ka neih ka hre lo." Ka ti ta ngawt. Vawiin aţang kha chuan midang ka en ang ngawtin ka en lo tih chu ka hre tawh. Ka ţhian hmeichhe dang te hi eng ang pawin awm se ka mitah chuan ka ţhian, ka unaunu ang maia ka ngaihna hi a reh thei dawn tlat lo. Malsawmpari ah chuan chutiang chu a ni ve lo tih chu ka hria, ka hmeichhe ngainat chi a ni ngai lo, chu mi avang chuan ka ngaihven ngai lo bawk. Mahse tunah hian  ka rilru put hmang hi a danglam tih ka hria. 

Inti hrethiam hmel fahran chuan , "I hriatthiam vat a ngai a nih chu." tiin a nui suk a, a sawi tum ka hrethiam in ka hria. 

Malsawmpari POV :

End of chapter 9

💗