BLUEMING 🦋 CHAPTER-11 BY UNKNOWN BELLE

BLUEMING 🦋

BY UNKNOWN BELLE

CHAPTER 11

Min en dan chu min entlang vek a tum emaw tih mai tur a ni, ka zam chhe lo chauh.

"Eng atan nge i tih? Ti nge min zawh chhan? Min ngaihsak ve deuh tihna em ni?" ti a zawh mawlh mawlh mai chu ka chak, mahse chutiang a ti lo chuan,"Ka ţhianpa a nih kha." Pangngai takin ka ti a, a bu nghut ringawt chu ka duh khawp lo hle.

"Eng a tan nge i tih a?" Ka ti thei hram, he hun hi pumpelh a tan chuan a uiawm ka ti.

"Eng ni lo e, zan dangah pawh ka hmu tawh che u a lawm." a tih chuan ka hnual rawih rawih, ka hmelah a lan loh hram ka beisei.

"A nih chu...." Ka ti a, inbiak pawh chu ka phur tawh lo.

"Muttui le." tiin ka kal san zui a. Ka bialpa a nih leh nih loh a hriat duh chhan pawh zana ka chhuahpui lai a lo hmuh vang lek!

Han thinrim viau dawn ila thinrim chhan tur ka nei si lo, mahse ka lung hi a awi thlawt lo.

In ka thlen ve leh rilru lak pen nan tih tur ka dap ruai a. Puan ka ţhui dawn tih hrilhin room ah ka inkhung daih. VanLalfakzuala vanga rilru nuam lo deuha awm ai te chuan ti hian thil dang tih daih ila ka hlawk zawk ang.

Nu leh Zuitei kawr tur chu ka cut ve ve a, a khattawkin ka thaw leh halh ţhin. Tih theih hi ka va nei tlem tak, tih theih pawh a ni lo, tih ngam zawk mawle!

Zuitei rawn lut pawh ka ngaihsak vak lo. Ka thil tih lai ka tih zawm mawlh mawlh.

"I hmel chu! Phone i la en lo tih ka hre mai." a rawn ti lut a, khumah chuan a let nghal tawp.

Ka thil tih lai chawl chuang lo chuan ,"Ti nge?" Ka ti ringawt a, ani hi chu a thawveng hmel thei reng zel a, a chang chuan ka awt thei khawp mai.

"Fakpuia status kha...." a tih chuan ka beng a verh zar! 

"Eng nge?" Ka ti leh a, a nui pawt pawt duh chauh, ka ngei reuh lutuk.

"En ve mai rawh. Ka mu dawn. Nang chu i mutthilh theih pawh ka ring lo muttui lutuk lo mai." ti par parin a chhuak zui nghal daih. A duhnaah hi chuan a va han nghal thiam ţhin tak.

Ka thil khawih lai kalsanin ka phone ka ban a, WhatsApp ah ka lut nghal. Fakpuia chuan status a nei ve ngei, ka number a save ve hnua a status ka vawikhat hmuhna.

En loh ka tum viau nain ka insum thei thlawt lo, 10 minutes ago a lo inti kuau mai bawk.

Tun min hmu lo mah se tîn deuh hian ka en a. Ka hmuh chian chuan tuma tih nuih pawh ka ngai lo, ka khi nghal ver ver, ka ât hmel ngawt ang.

A Bandana ka pek khan Mîlo a tuam a, chu mi thlalak chu a caption ah question mark a dah ngei.....ka inngaihbel lo thei lo! 

Tumah inngaihbel thei tur an awm lo ang, kei tih loh. Min hman chhan chiang mai! Zuata sawi kha a ni tak tak em maw ni le....

Zuitei kha chuan bandana chauh hi a hria ang, kei chuan Mîlo lan ve chhan tur hi ka hre kiau, min hman chhan lo pawh ti se ka inngaihbel tho tho ang! Mîlo a neih dan kei baka hrechiang an awm bik lo. Ka va hlim si em!

Ka hlim bawk a ka puan zai lai pawh chu ka dah fel leh daih. Khumah ka lawn kai nghal tharh.

Lalzuimawii hi chuan min hrechiang thawkhat a ni, ka muhil thei reng reng lo! A status chu ka screenshot a, ka gallery ah pawh hidden file ah ngat ka dahtha, a thla ka lak ruk sak ho pawh a awm nual tawh.

Thlalak ho chu a vawi eng emaw zah nan ka en nawn leh a, ka lak ruk sak hmasak ber ah hi chuan ani pawh a la lang naupang reuh, college a kallai ve tho a a nia, heta ka riah tum a a kawng kal lai ka lak ruk sak a ni nghe nghe. A lo rei ve tawh reuh hle mai.

Amah ka hriata ka duh rukna a rei tawh lutuk tih hria se chu a intithei zawk ngawt ang chu! Ngaihzawng dang ka ngaihsak lo ve hrim hrim bawk nen star nghet bur ka nei ve tawp kha a nia.

Rizai chuan ka inkhuh hlûn a, mit chhing reng chungin ka lo nui leh ver ver ţhin! A chang leh a status kha ka lo reply lo a ni tiin ka ngaihtuah, mahse reply dawn pawh ni ila sawi tur ka hre dawn chuang der si lo. 

Zuitei tih dan takah ngaih ţha deuhin awm phawt mai teh ang.

Zingah chuan ka phone riin min tiharh a, nizan ka mutthilh theih lawk loh avangin ka mut rei phah vek. Min lo call tu chu Ka pa a lo ni, ka biak khat zia ka hre chhuak uar uar mai.

"Hello." Phak deuh taka ka tih chuan "I la tho nange, tho thuai rawh." A rawn ti nghal, ka mut rei hi a hlau thei a nia.

"Tho dawn chiah." tiin ka tho chhuak a, phone pawh speaker a dahin ka mutna ka tifel zui mawlh mawlh.

"Min va rawn phone duh lo thei ve,Duati pawhin a ngai tawh che a nia." A ti a, anni chuan Duati an nei tawh a, min ngaih viau pawhin duat tur an nei ţha tawh em mai an ngaihtuah awm lutuk tawh lo.

Kan unau hi pathum niin min chhangtu hian nupui a nei tawh, tunah in hrang chang lovin kan khawsa tlâng a, an fanu Duati hi kum hnih a tling ve ţep tawh. Ka chhang chiah Sawmzoa hi chuan lehkha a la zir a,tunah hian college a kal tan ve tawh. Hostel ah kan dah bawk.

"Duati kha ka ngai tawh khawp mai, nangni indam tlang em?"

"Dam ve ţawk ţawk e, i nu'n Duati pawnah a pua a, hei I USangmawiin ei rawng a bawl mek a nih hi." a ti a, "I nau nen in inbe hnai em?" A tih chuan tun hnaia kan inbiak khat thu ka hrilh a, tlawh ve zeuh zeuh turin min chah nghal luam. Ka u leh USangmawii hi kan khaw school ah an thawk ve ve a, ka nu licence hmangin damdawi dawr kan nei ve a, ka nu kutah a awm deuh ber. Ka pa erawh kan huan zau lo te hi a enkawl a, thlai leh anhnah kan ei khawp hi chu a thar ve reng ţhin bawk.

Choka lamah pheiin Nu eirawng bawl puih ve pah chuan phone ka la hmang pah reng a, kan inbe khat ţhin bawk a kan inbiak chhunah hi chuan kan bei rei ve ţhin khawp mai. Kan inbe kual hman deuh vek ţhin a tih theih ang chu.

Chaw ei kan peih hnua choka lama Zuitei rawn lut chuan ,"Thawh i hai chhan ka hria a nia aw." a rawn ti kher a, a va tul lo thei tak.

"A ho e a." ka tih san chuan min lo nuih sûng mai. Min chhaih zui lo hlauh. Nu awm ve reng laia khatiang lama inchhaih kha chu nuam ka ti lo.

Thleng seng felin ka insiam ve nghal a. Zuitei hi Buangi nen inthurualin Cosmetic dawr an hawng ve a, an dawr pawh a lian vak lo. Sum ah an buai lo a, an dawr pawh midang hip thei tur zawngin an buaipui thiam viau bawk. Online hi an la hmang ve lovin ka hria, online shopping an hman tel chuan an buai ve thei viauin ka ring, tunah pawh hian an pahnihin an la buaipui thei ve zel chu a nia, nakinah chuan hnathawk tur an ngaihven thuai ka ring.

Ka inpeih hnu chuan Zuitei Bike in kan chhuak a, a scooty kha kawl leh tawh mah ila a khalh chhuak ngai tawh lo. Tih ral tawp a la ui ve bawk si nen ti hian kan hung tawp a, keimah hian ka khalh ve leh zauh thin. Khalh loh a a awm reng chuan an dah khawbaw tho tho dawn si a, chuvangin a la tih ral leh tho chu ka ring.

Ka hnathawhna hmun ka thlen chuan a thleng hma pawlah ka ţang leh tawh. Zuitei pawh a hnathawhna lamah a kal zui nghal, keini ai an ban tlai ţhin avangin hawlamah hi chuan kan inthurual thei lo.

Kan hnathawhna dawr neitunu ber hi a lo kal khat thei hle a, kei lo puanthui hi pahnih an awm ve bawk. A design te hi a rawn dah a, a tih dan tur a sawi hi chuan a duh tawk mai zel a, a phun chiar loin a fel ve bawk nen hnathawk ho pawh kan inkawmngeih phah a tih loh theih loh.

Thawmhnaw leh paunthan hrim hrim hi pakhatin a buaipui tawp a, midang ho hi chu kan lo inthui ve mawlh mawlh zel.

Vawiin chu ka tho fuh ve bawk a ni, ka bula awm te pawhin an hre rang khawp mai. Zuali phei chuan, "I kaah pawh zen che ila min seh duh lo ang." tiin a nui hak hak a, ka nui ve tawp . Ka awm ang hian awm ve se an hlim loh bik ka ring lo hrim hrim.

Sangsangi'n,"Nizan lamah an inbe ril deuh a niang." a ti a. Zawi zui pui vak ka tum lo, nakina ka zah leh na tur ka thlen palh ang.

Kan tih tur theuh ah buaiin kan che sap sap a, customer an awm deuh zut ţhin bawk nen teh tak tak hun lai kan nei lo. Kan awmna hi kawngpui án mai a ni bawk nen pan a awlsam a, kan lûn phah viau bawk.

Chhunchawlh kan neih chuan nidang ang thoin pawnah bawlhlawh paihin ka chhuak a, Fakpuia te thawhna lam chu ka hawi thla leh, mahse ka hmu lo.

Hmuh ve zeuh chang ka neih ţhin avangin bawlhlawh paihin ka chhuah phah ziah, a chang leh hmeichhe dang nen ka hmu bawk. Hmeichhe bula awm hi nuam a ti ve hrim hrim a nih te ka ring rum rum ţhin, mahse a lerh viauin ka hre bawk si lo.

Tlai lamah hi chuan kan bang tlai vak ngai lo, kan duh phei chuan inlama khawih turin kan hawn thei bawk. 

Ka thawhpuite hi veng danga awm an nih avangin kan kal tlang thei meuh lo. Bus-a haw ţhin ka nih avangin bus stand lam ka pan a, kawngpui thlanglam bawk chu ka hawithla leh phawt. A ngai ang bawkin ka hmu lo. Ka hmuh loh hi a tam zawk ni mah se ka hawi leh nge nge ţhin. Hawi tawh loh ka tum pawhin ka mit hian khawiah pawh hian a zawng ru ni mai hian ka hria.

Ţhalai inkhawm zan a nih avangin inkhawm turin ka insiam a. Zuitei ka sawm chuan a lo peih ve mial. A chang hi chuan sawm enah ka dah lo ve ţhin a, mahse a chang hi chuan ka sawm loh avanga inkhawm lo mai ni te hian ka ngai ţhin, a tum lawk vak loh a ka sawm pawh hian a chang hi chuan a insiam ve leh nulh zel.

In aţanga kan chhuan chuan ,"A la hma tho, Fakpuia sawm ve ang." A tih chuan ka hnial nghal.

"Ani te chu a haw a la hun lo a ni lo'm ni?" ka lo ti ve a, lo awm pawh ni se ka hnial tho ang.

"Vawiin te chu a haw hma a lawm, online exam kan nei a ti, ka be tawh a lawm." a ti leh mai a. Vawiin tlai ka haw kha chuan an la inhawng ngei a, a haw la rin lohna ka nei tho.

"Kal kher lo mai ang kan rei mai mai." Ka tih chuan,"Ui a ho lutuk, a hma pawhin ka inkhawm ve te chuan ka sawm ve ţhin tho a lawm. Chutiangin rilru dang a put phah teuh loh mai." a tih tlat avangin a rawtna chu ka pawm leh ta nge nge.

Ka awm ve hma pawh a inkawm ho reng tawh an nia, a sawi chu a dik ve reng. Keimah zawk hi ka dik loh vang a ni ber.

In chhung kan luh rual chuan Fakpuia a au nghal a, a nu chuan, "Lo ţhu r'u ka va ko ang e. A hman ve chang hi chuan lo sawm zel rawh u." ti mawlh mawlhin a kalsawn zui a, Bektei lo awm ve chu a be leh thuai, ka lo ţhu ngawi kar ringawt.

Bektei chu lehkha zir a duh avangin a inkhawm dawn lo thung. Apa pawh lo awm ve in min be ve luam a, kan khaw chanchin min zawh chuan ka chhang ţeuh, ka sawi nuam tih zawng a ni ve a.

Rei loah Fakpuia pawh a rawn lang ve ta, T shirt dum leh kekawr bul bawk a ha leh, ka hmu fai sur reng zel mai hian ka hria.

"Eng nge in lo tih dawn." a rawn ti a, a ţhu thla zui nghal bawk. "Inkhawm turin an rawn sawm che a nih kha, ţhu khawmuang lo khan va insiam ve tawh." Anu'n a lo ti zung zung, apa chuan engmah a lo sawi ve lo.

"I hman khat ropui si va insiam ve rawh." Zuitei'n a tih chuan a ner sak. Zuitei hi a inkhawm khat ve tho tih chu a hre tho ang, chutianga a tur ve ngei chuan ka nuih a ti za.

"A tlai zel a nia va insiam thuai rawh." Zuitei bawkin a ti leh, a ţhu nghet hmel cherh churh bawk sia, kal daih tawh mai te chu ka duh.

"Kan nghah lai che hian va insiam vat zawk rawh, hun a ral zel." Ka lo tih ve chuan min en chiang ngang mai, mahse ka mit ka la sawn duh bik lo.

"Nia che zung zung ta che." Zuitei'n a rawn tih ve leh chuan ţhen sukin a mit a la sawn ve ta hram, ka lo zam ve hman em em ringawt, zahthlak zawk hian.

"Ka rei lo ang." tiin a tho zui ta thurh. Zuitei'n min lo khawk zauhna pawh ka hre lo der tawp. Ka lawm ru ve em em ringawt mai a ni.

Kan nghah chhung te chu a rei lo riauin ka hria. 

A rawn chhuak leh rang ka lo ti khawp mai.

"Kal ang u."a tih paha min en te chuan ka lo hlim ve em em a, ka rilru hi hria se chu tenawm min ti reuh ngawt a nia ka rin ni.

Kan hnungah a rawn chhuak ve a, kamis dum banbul a ha a, kekawr gray tak zet leh savun ipte dum ah te leh a sana bun zawng zawng te nen chuan a chhelo hi ka ti ve thlawt. A rim a la pâ em em zui.

Zuitei chu a laiah kalin a be pah zel a, a sir lamah chuan ngawi rengin ka kal ve a, an thilsawi chu ka ngaithla uluk ve em em tawp. Ama chung changah hi chuan mit leh beng ka chhi kar reng mai ţhin.

Biakin kan thlen takah chuan kan kal hrang a, a kal dawn a, "Banah min lo nghak r'u." tih paha min en kher na chuan min ti lai ţhelh a ni. Ka bu nghat a, a kalsawn zui. Zuitei lah chuan a kal hlat ve leh intihrethiam fahranin a hrawk a thian kharh a, ţhen khum vakin ka sik ringawt.

Ka kawchhung za cheng avang chuan zun te ka rawt leh rih. Midang lo awm ve te hriat loh tur chuan ,"Ka chet ve hi chuan hma kan sawn duak zel." a rawn ti zauh a, lei ka chhuah khum ringawt. Min chhaih laih phet hi a tum ţhin a, ka lai awlsam ţhin si ka ning tlat.

"Eng nga ti nge min en kher le?" tih ringawt te chu rilruah a awm leh, engkim mai hi inngaihbel a awl vel vek tawh. Ka beisei ka tihsan lutuk ka hlau bawk si, keimaha rilru a pek ve ka ring ngam tak tak thei der lo lehnghal.

Inkhawm chhung zawng te chuan ka rilru chuan thildang daih a ngaihtuah reng mai. Branch secretary in kan hma lawka group meet hmanna turah musician te hming a sawi chuan, bass guitarist ah a hming an dah ve a, chu mi vang chu a ni ngei ang inkhawm bana nghak tura min tih kha ni.

Inkhawm chu kan bang ta, midang pawh be kawi lem lo chuan kil khatah kan ding dun a, Zuitei lah chuan min chhaih laih phet a tum a,he mihring nu chimawm thin lutuk hi engtia tih chi nge maw a nih le.....

"Tunah chuan a melh ve tawh che a hma kan sawn tawh khawp mai." 

"A hma kha chuan a en chhunah che pawh a nin hmel theih theih nen."

"Nangmah hian phone hmangin i va be ngawt ngawt te hi a ni lo maw." a ti zung zung a, amah zawk chu a nuih a zat hmel, sawi ve vak ngaihna pawh ka hre lo, ka nui ka nui ve ringawt.

"I star hlawhtling dawn tan tawh niin a lang." A tih chuan ka ţhen vak ringawt. Engmah thu chiang awm hek lo le.

Gate hnaih deuh hleka kan din lai chuan a tam zawk chu an kal liam tawh, Zuata pawh a rawn lang ve.

"Hma kan sawn chho khawp e." A rawn ti sup a, midangin an lo hre pha ang tih ka lo hlau ngang mai.

"In â sia aw." Ka'n ti ringawt a, ka zak ru chem chem.

"In mi nghah ka nih hmel si loh a ka haw phawt ang e." a ti a, Zuitei lah chuan,"Kei pawh ka lo kal ve nghal mai teh ang." a ti fiamthu a, kei lahin a kal tak tak ka'n hlau khawp a.

"Hey! In â em mai!" Ka ti hlak a, a kawrah ka vuan bet tlat bawk, fiamthu pawha sawi ka duh lo. Chu ai chuan haw ve daih ka duh zawk. Mahni chauh te chuan ka hmachhawn ngam tawh teuh loh mai.

Ka awmdan avang chuan an nui hawk hawk a, an va han ngeiawm thiam dun tak aw....

"Ka kal dawn, hun hman nuam u." Zuata chuan a ti leh kher a, ka melh rum vak ringawt.

A kal liam hnuah pawh chuan kan la nghak ta reng, rin ai a rei phian lehnghal. 

Midang an haw rem deuh vek tawh tihah a rawn lang ve hram. Zuitei lah chuan rei a tih thu a lo sawi khum nghal a, thupha te chu a chawi ve mai bawk a.

Kan inkarah Zuitei a kal leh a, a hma te kha chu ni se ka titi ve zat zat thei tho ang. Tunah chuan kan boruak a dang deuh tawh a, ka lai hû ni mai hian ka hria.

Zuitei nen an titi na aţang chuan chanvo an pek kha a lo hnar a ni awm a, ka rilru te te chuan ka lo ui ru khawp mai. Kan theihna te kan hman ţangkai ve theihnaah hi chuan phat loh hram hram zel hi ka ngaihdan a ni a, an hman loh miau chuan tih theih awm chuang si lo.

"Ka tel ve hman leh chuang lo ang." a tih chuan Zuitei'n, "I peih lo ve hrim hrim a nih kha." a lo tih san mai a, kei pawh hei hi a nih ka ring zawk.

"Peih lo hlawm tawp bik nang." a ti leh mai a, a ţawng thum dup dup ţhin bik khawp mai.

"Sawmpari pawhin special items a nei dawn a lawm." A tih chuan ka meng phâwk ngang mai! Zuitei ka en a a lo nui vur vur, Fakpuia lah chuan min lo en ve chiah bawk.

"A awihawm loh e a." Ka ti vak ringawt a, a uanna chu ka lawm loh zawng tak a ni.

"Na....ka ţawng thei lutuk hi chu aw...." A ti a, pakhat lahin, "Eng items maw?" A lo ti ve leh, engmah ka hriat loh chu thuhran, items ka neih chhan ngawt tur a awm lo hrim hrim.

"Group night hman turah tel la i hre mai ang." a ti ve leh tlat a, pakhat pawhin a zawt zui ta lo.

An in a a pen dawn chuan Zuitei'n,"Thingpui kan lo in lo mai ang." a ti fiamthu a, ani pawhin a hrethiam a ni mahna a nui ve suk mai.

"Induh chuan lo in rawh u." a ti ve mai. Sawi tlai em mai ka lo ti rilru.

"Zan dangah a ni mai. Muttui." Zuitei bawkin a ti a, "Muttui u." tih paha min rawn en kher chuan ka ţek chhawkin ka hria! A mitmeng rum lam maha min melh tawh hi chuan ka lo zam ve em em ringawt zel.

In lam kan pan lai chuan, "Lo ţawng ve ţhin ta che, ti te kha chuan awm ve lo ang vel i ni." a ti hlak a, ka ner nawng ringawt.

A hma ang khan kan boruak a awm tawh tlat lova, eng emaw hi a awm tlat tawh. A hma kha chuan a rilru put hmang ka hriat chian em avangin keiman pawh ve hram hram kha ka duh ţhin, mahse tunah chuan a rilru put hmang chu ka chiang ngam tawh bik lo. Beisei erawh ka tisang ngam chuang lo.

Mut hmunah chuan kan inbiakna tawite chu ka ennawn reng mai a. Ka be ngam tawh der mai si lo. 

Biakfela hnen aţanga message ka dawn chuan ka hmet sawn ve ta chauh.

"I inkhawm em?" a rawn ti a, ka inkhawm thu leh kan banna a rei tawh thu chu ka hrilh ve mai.

"Lo len kan tum deuh a, mahse i inkhawm kan ring leh sia." A rawn ti a, 'kan' a tih hi Ruatsanga a nih ka ring ringawt a.

Lo leng suh u intih daih chu mawi hek lo, "Zan dangah a ni mai lawm." Ka ti ve mai a, Ruatsanga thil sawi vang te khan ka be tui lo zo vekin ka hria.

"Tehreng mai i phal te chuan." a rawn ti a, Fakpuia ni zawk se chu ka phur viau awm sia ka ti rilru neuh neuh.

"Bialpa lo nei suh aw." a rawn tih leh chuan ka thaw hak, chhan dan tur pawh ka hre lo. Tun aţang hian ka hnawl thu ka hrilh nghal tawp mai dawn em ni te ka ti rum rum.

Hetiang thu min rawn sawi khum nghal ngam turin kan inpawh viauin ka hre si lo, nge keimah zawk hian ka pawh lo ringawt. Nge ni a ka zuamawm ve hrim hrim zawk le. A thu rawn sawi ringawt chu ka lawm lo ve ringawt dawn a, mahse sawi dik loh vak a neih ka hre si lo, Ruatsanga hnen aţangin ka chanchin a hria a ni ngei awm si a. Lalruatsanga pawh chu bialpa a nei lo tih khum ve mai tur hi a nia aw....

A message pawh ka chhiar tawp a, chhan let dan tur ka hriat loh avangin ka offline ta daih. Hmuh leh pawh ka hreh zo vek.

Tukthuan kan ei lai Chuan Nuin, "Hmanni deuh khan Apuia khan Sawmpari hi a solo ngai em a rawn tia." A tih chuan ka thil ei lai ka tawp chut. Zuitei lo nui sukah chuan a hre daih tawh tih ka hre mai.

"Chuan engtin?" Ka ti thuai.

"A zai ve ţhin a mipui hmaa ding chi a ni lo ka lo tih san a." a ti leh mai a, a zahve vel chuan ka thawveng.

"A zai ngai lo i lo ti lo a nih chu aw...." Ka ti vawng vawng. Kan khuaah te chuan ka solo ve mai zel, mahse tun thlengin zam chung chungin ka la ding chhuak ţhin. Hetiang khawpuiah te chuan ka ngam dawn lo nasa lutuk.

"Le le le an ruat hrim hrim ang che." Zuitei'n a lo tih chuan ka insiam chhiat khum nghek ringawt. Ka khur chhe zo vek thei daih ang chu.

"Midang ruat hram rawh se." Ka ti hram. Ka ti tak tak bawk. Min ruat a nih ngat chuan ka pha ngam chuang lo ang, mahse min ruat lo se ka lawm zawk ang.

Ka hnathawhna lama ka awm lai te chuan Nu thil sawi mawlh chu ka ngaihtuah chhuak leh ţhin. Nizan lamah khan programme ah min puang tel lo ngei mai a, mahse Zuitei thil sawi duh dan vel avang khan ka thla a muang thei der lo

Chhunchawlha pawna ka chhuah chuan ka zawn ruk ziah chu ka hmu ta! Mahse hmeichhia a lo dinpui tih ka hmuh rualin ka down vek thei. A bula awm a piang te a ngaihzawng an ni tihna ni lovin ka tum em em pawh ni lo hian thikna rilru ka pu tlat ţhin hi hrehawm ka ti.

Min hmuh hlau deuh si chuan ka hawi thla reng a, motor vei vek karah chuan ka en ţawk ţawk, kan inhnaih vak lo bawk nen a hmeichhe hmel phei chu ka hmu thei lo. Ani chuan kawrbantlawn var a ha tih ka hmu thei, a sana a bih leh zawk ţhin te chu chhelo hi ka ti ve em em a. Hmeichhe dang pawhin chhelo an ti ve tho, ka indem hran lo.

A hawi kual paha a rawn hawi chho dawn ni a ka hriat rual chuan ka lut zuk a, ka ţhiante chuan ka che rang lutuk chu mak min lo tih hmel ngang mai.

"Rukru te pawh i ang dawn a lawm le." tiin min nuih hlawm a, za lo zetin ka nui ve sak ringawt. Min hmuh ka hlauh avanga tlanchhia chu ka ni deuh ber a lawm le....

Fakpuia vang chuan tunlai hmeichhe ho te chu ka dem rilru em em a, keimah pawh hi tunlai hmeichhe zinga mi tho ka ni bawk si. Kan in huaisen hleih ţhin em mai pawh a.

Zanah chuan Biakfela te chu an rawn leng ta ngei, mahse Ruatsanga a rawn hruai miah lo a ţhianpa a sawi chu Papuia a ni a, a ţawng duh em em mai leh ta nghal.

Ka chhungte hnenah ka hrilh lawk lo bawk nen inleng ka nei thut chu mak an ti ve deuhin ka hria. Kei pawhin ka theihnghilh leh hman hrim hrim bawk nen inhrilh na hman a awm tawh lo ve bawk.

Nu chuan min ţhutpui ve reng a, ka lawm rilru hle bawk. A ţhianpa Papuia lah chuan fiamthu a duh hmel khawp a, min ti nui leh dar dar ţhin.

An titi kar lakah chuan lo inrawlhin,"Ruatsanga nen in inbe hnai em?" ka ti a, kan inbiak chhunah pawh hian sawi tur a hre lo ţhin em a, zawhna ka zawh lahin a chhanna chin chiahin min chhang ţhin bawk nen inbiak tam a har khawp mai.

"Vawiinah pawh kan inhmu, zanin pawh rawn kal ve tum a nia, mahse i hriat angin a hnaah hian a buai ve bawk si a, hun a nei thlawt lo." A tih chuan Nuin Ruatsanga nu chanchin te chu a lo zawt ve a, Ruatsanga a hriat ve avangin an chanchin hi chu a ngaihven ve reng ţhin.

Nu bawk chuan, "Sawmte nakinah chaw eiah la sawm la a ţha ang, inthian te nufa chu hmuh ve pawh an chakawm a lawm." a ti a, Ruatsanga chuan a hreh leh viau mai thei a ni. Ruatsanga te nufa chauh a rawn sawi chu nuam lo ka ti ţep,mahse Biakfela te chu an hnenah pawh ka la sawi ngai lova, an la hre vak dawn lo bawk nen tlem chuan ka inthiam chawp deuh.

An vawikhat rawn lenna a ni bawk a rei an leng lo hlauh. In kawt thleng ka thlah a, a ţhianpa a kal hlat deuh takah chuan min din hnaihin, "Nizan a ka rawn sawi kha ka ti tak tak a nia." a ti sup a.

Awm dan tur ka thiam lo hle. Nula leh tlangval kan nia, hetiang a inlêm deuh te chu thil thleng thei lo a ni lo tih pawh ka hre ve. Mahse nuam ka ti hlawl lo, mawihnai taka hnawl dan tur mawlh chu ka ngaihtuah.

"Zan danga lo len leh i rem ti em?" a tih chuan a rem thuin ka chhang ve mai a. Chet over viau na a nei hran lo, mahse ka inveng ru tun thung a, a bula awm nuam ka ti lo. Chubakah keini ai kum upa zawk a nihnaah a zei hmel riau, ţhian ang tak tak a kawm pawh harsa ka ti bik tlat.

"Zanin ka lo leng tih hi Ruatsanga ka hrilh miah lo, a lawm loh phah loh turah ngai ang." a tih chuan,"Lawm loh chhan tur a awm nang." Ka ti ve mai a. 

Amah aţanga min hria a ni awm si a, a hriat loha a lo kal chu nuam lo a ti ve deuh a nih te chu ka ring ve tawp.

"A veng ţha hmel riau chein ka hria." a ti a, a ţhianpa lah chu kan hlat deuh tak kawngpuiah a awm a, keini chu a bike hunna bulah kan la awm, kal mai a la tum hmel lo ang reng.

"Ven ţhat bik pawh a awm lo ang, midang ţhian kawm vak a nei si lova lo ngaihven viau rawh." Ka ti ve a. Ka rilru tak takin ka sawi bawk.

"Nang berin i tih te chuan." tih pah chuan a nui suk a, ka nui ve ringawt. Ka rilru te te chuan haw thuai thuai se ka ti ru hle. Ka rilru hria se chu a rawn kal duh tawh pawh ka ring lo.

"Va lut tawh rawh kan kal ang e. I chhungten rei an lo ti ang che."a ti a, bike ah chuan a lawn zui a, kal hmasa phawt tura ka tih ve tlat avangin a kal hmasa ta hram. Ka thaw huai thei.

Min en reng tu awm ang a ka hriat avang chuan ka hawi kual a, ka hre dik chiah!

Hmanni tlaia ka hmuhnaah bawk khan a lo ding leh kur tawh. Mahse tun ţum chu a kal nghal daih miah lo. Kut kuangkuahin a rawn hawi thla run a, ka hmelhriat loh chu ni se ka hlau ang tih tur vel a ni.

Ka tih ngaihna hre lo chuan ban ka han vai ringawt a, a che ve eih lo. Tîm zet hian ka ban ka la thla leh riai riai, ti nge a sual thiam theih em em le.

Min en reng tih hre tho mah ila kan inbe phak chuang lo bawk a tiin ka luh san ta daih, a hmel kha chiang takin hmu thei lo mah ila a nui dawn lo tih ka hrechiang.

In chhung ka luh hnuah Nu chuan min zawt chiang ve leh ngei, ţhiante tia sawi hi ka nei mang lo bawk a report hi chu kan inpe kimchang ţhin viau.

Ruatsanga aţanga inhria kan nih thu leh kan inngaihzawn loh thu chu ka sawi tlang hmiah. Zuitei pawh a room aţangin phone hum chungin a rawn chhuak ve chiah bawk 

"A ngaizawng che a nih dawn chu." Nuin a tih chuan, "Ka duh ve chuang lo." ka tih khalh vat. Ka chhang rang lutuk chu min lo nuih a, "Ka duh lo tak tak." Ka tih chuan Zuitei'n min lo nuih char char tih ka hmu zui a, ka huat tawk a tling viau bawk.

"Ani te chu hual ţha tawk a nei....." a tih lai chu lo pawt chatin, "Lalzuimawi ngawi mai mai teh, i duhpa a sei sei nen." Ka tih chuan lei min chhuah khum vak ringawt.

An dawr chhaka school a mi, an zirtirtu pakhat hi duh deuh a nei ve a, ani chuan a ţhian kawm hmiah hmiah thei. A thlalak chiah ka la hmu, a sang bawk nen Seia tih hlir hian ka sawi fiam ţhin.

Zuitei'n a mitmenga min signal zauh chu ka hrethiam lo hle a, hahthlak min tih hmel zeta min enin, "Room ah inkawm lawk ang." tiin a tho ta nulh. Nu lah chuan , "Ka hre ve duh tho a lawm." a lo ti fiamthu a, Zuitei erawh ka room lam panin a kal der tawh.

Room ka luh ve chuan khumah a lo let leh zawn tawh.

"Inleng i nei tih ka hrilh a." a ti a, ka hrethiam lo ţep. Mahse rei inngaihtuah nan hun ka hmang lo.

"I ti tak tak lo tiraw?" Ringhlel hmel zet chuan ka zawt a, ti tak tak lo se ka ti hle. 

"Tak tak ang chu...... Midang in an hel ve tho che tih te a hriat a ngai a lawm." a ti mai a, a ngaihsam mai bawk sia.

"Chutiang te i va sawi a engah mah a lo ngai awm der si lo." Ka ti a, ka rilru tak chuan engah mah a ngaih lo chu ka ring phal lo.

"Engmah a hriat tak tak loh. Saw pa saw chu kan nawr deuh loh chuan rilru bulbal a pu duh tawp nang. A induhtawkna hi a pe lian ve a. A hmeichhe lo nih pui te lah hian an duh huam hmel hlawm ţhin bawk sia, chet an lak khalh vek zel a lawm. Chuvangin nang chu a phu lo ka ti chungin hma ka'n lak pui ve hram ang e. Nawr ve deuh a ngai hrim hrim." a ti hmarh hmarh a. Kei erawh ka lo ţang ru viau. A beisei san ang hian ka beisei sang ve ngam der lo.

"Ka hrechiang ve thawkhat a lawm min ring tawp rawh." A ti leh tawp a, a chhuak zui ta daih.

Ruatsanga nen min hmu tawh bawk a, tunah Biakfela nen, khawlo deuhah te min lo ngai ang em le? Mahse ani pawh hmeichhia nen ka hmu dun ve tho a, an inngaihzawn ka ring nghal bik chuang lo. 

Mu tur a ka inpeih fel hnuah khumah ka lawn a, ka ţawngtai zawhah phone ka ban leh. Tlai aţang khan phone ka la en leh lo hrim hrim.

Notification a Fakpuia hming lo lang kuau mai chuan min ti phu zawk theiin ka hria! 

WhatsApp ah lut zuiin a message ka en nghal a, "Mi mit ti kham tur zawngin awm suh." tih zawng hi a lo sawi. Ka thaw hawk a, a hnen aţanga thudang vak ka dawn beisei lo mah ila hei hi chu ka beisei loh hlawm tawp a ni tih ka hrechiang.

Ka en reng ringawt a, chhan dan tur pawh ka hre lo. A ngaihdan chuan mipa chi hrang hrang kawp lawr theiah min ngai a nih te ka ring rum rum.

Ka en reng lai chuan a rawn online a, a message hi dar 8:46 a mi a ni tawh. Tunah dar 9:30 a ri hnai tawh a, ka lo hmu har lutuk chu pawi ti viau dawn pawh ni ila hmuh hma pawhin chhan dan tur ka hriat dawn chuan loh avangin engmah phurna pawh ka nei lo.

A message ka en reng lai chuan , typing tih a hming hnuaiah ka hmu thut a, a message lo view nghal ka duh loh avangin kan chat aţangin ka out vat.

"Min chhang rawh." tih a rawn thawn a, chutia thu pe deuha a rawn ti chu ka ngaithei leh miah lo. Ka bialpa a nih miau loh avangin thunei hmel deuha min ţawngkhum hi chuan min hnuaichhiah riauin ka hria a, ka ngaithei viau lo. 

Hmanni kan leng haw lam pawh kha, khatia thinrim kha ka tum lawk a ni bik lo. Mahse a ţawngkam ţhenkhat hi chu ka haw riau zel, ka thinrim ve lah hian ka nem tulh tulh zel a, tah vak hi ka chak ţhin. Chhan let ve nek kha duh rilru mah ila ka sawi thei ţhin lo,ka hnuk a no tlat zel a, chu chu keimaha ka duh loh lai ber pawl a ni bawk.

"Ka thu thu." Tih ka va thawn chu a seen rang khawp mai, a haw ve viau mai thei a ni. Pawi ka ti lo, a sual thiam thei em a, phone kal tlang te chuan ka hlau bik lo.

Min chhan let hun chu ka nghak a, mahse min chhan a tum tawh lo a niang.

Status te ka en kual lai chuan a message a lo thleng leh. "Min cho chhuak miah suh." Tih a rawn thawn a, ka hrethiam pha lo nasa mai.

Rang zet hian, "A ho a nih chu." tih hi ka va thawn a, mut hmunah chuan ka nui ru vur vur. Hmaichhanah chuan ni se ka tih ngam dawn loh nasat nen. Hmuh leh pawh ka hreh ngawt ang.

"A ho lo a nia..... Ka en liam tawh lo ang che." a rawn tih te chuan min hauh chak a insum rei tawh a nih te chu ka ring.

Mahse a thusawi ka la lâp laklawh tlat, "A ho tho tho." ka va ti leh hram. Ka ti laklawh tawh tlawm bik nih ka duh lo.

Ka message a seen rual chuan ka lo nui vur vur, a thinrim dawn hian ka hria. Chubakah ani te chu a inkhawm khat si, a lengchhuak ngai lova, kei pawh ka chhuak ngai lo. Kan hnathawhna inhnaih mah se kan inkal pawh ngai lova, kan inhmu ngai bawk lo. Kan inhmuh leh meuh chuan ka thusawi te hi a hre leh tawh tawp nang, kei lahin ka hre lo der ve leh daih mai ang a, Mîlo chung chang ang deuh khan.

Ka thil ngaihtuah avang chuan ka nui char char, mahse a message ka hmuh rual chuan ka nui tawp Chiang lutuk.

"Pawnah ka awm rawn chhuak rawh." A rawn ti a nih chu! 

End of chapter 11

💕