BLUEMING 🦋 CHAPTER-12 BY UNKNOWN BELLE

BLUEMING 🦋

BY UNKNOWN BELLE

CHAPTER - 12.

Pawnah a awm thu a sawi chuan a awm tak tak ngei awm si a,engtia min tih nge a tum ang le.... Min hau leh hrep dawn a nih te chu ka ring rum rum. Ka ţawngkam chu a haw ve ngat ngat hle a nih dawn hi.

Ngaihdam dil tawp mai dawn em maw ni tih te chu ka ngaihtuah thleng, mahse ka rilru ka sawh ngheh ve a ngai tiin ka inhnem. A duh duha a ţawngkhum tur ka ni bik lo, huaisen taka ka awm a ngai a ni.

A message chu ka en vung vung a, chutah, "Lut leh daih rawh." tih ka va thawn hram, tunah chuan a der pawhin ka nui thei tawh lo, ka hlau ve deuh tak tak tawh.

Ka message chu a lo châng reng a niang chu a seen nghal a, min chhan dan tur ngaihtuahin thaw dêp dêpin ka lo awm.

"Kan hria ang chu." a rawn ti a, eng a sawi tumna nge ni ang le.... Ka rilru a tibuai ve em em ringawt.

A offline nghal a, engtin nge ka chhan ang tih chu ka ngaihtuah zui ta reng. Tlem a pangngai deuh hlekin ka va be mai dawn em maw ni tih te ka ngaihtuah. Mi te hian an star deuh te an inhnial pui hian an ti thinrim tak tak ve daih ngai ang em le....

"Ka ti tawh miah lo ang." tih chu ka type a, mahse dik thei ngangin ka hre lo, ka clear leh vek.

Chhan dan tur ka hre hlawl lo.

Chutia ka inngaihtuah lai chuan ka room kawngka a rawn ri ta mai. Ka phu nasa lutuk chu ka phone ka thlauh dawt. A chhan pawh tun angah ka room kawngka an kik ngai tlat lo.

"Sawmte i muhil tawh em?" Nuin a rawn ti a, tun angah ka la mutthilh mai chu a rin ka ring si lo. 

"Muhil lo e." ka ti a, kawngka ka hawng zui nghal. "Saw Fakpuia a lo kal a, ka mu duh tawh sia va kawm tawh." a ti a, a kalsawn zui nghal. 

Ka thinphu chu rang ţha tawh tak a ni, nichin a ka thil tih zawng zawng kha ka inchhir fel vek tawh. Ka va han hmachhawn hreh tak em!

Room a luh a inkalh hnan daih mai te chu ka duh. Nuin ţhutkhawmna pindan a a biak mawlh mawlh na pawh ka hria. Fakpuia chu a hmelhriat ţha a ni bawk a a ring viau a niang chu mut san mai a tum thu a hrilh a. An bedroom a a luh takah chuan a reh tlawk tlawk. Ka room kawngka bulah ka ding reng ringawt. 

A awmna lam ka hmu pha lo hlauh a, engtin nge min tih a tum ang le tih ringawt ka ngaihtuah. Ngaihdam va dil nghal mawlh mawlh mai chu ka duh, ka thiam loh bik viau na hre lem lo mah ila kan boruak chu a nuam ka ti hlawl lo.

"Ka lo phei dawn nge?" a tih thum dût chuan ka kut chu ka insik vak ringawt.

Hreh deuh chuan ka phei ta hram, single sofa ah chuan a lo ţhu a, a khup chungah a kiu a tawn tawnin a nghat a, ka phei lai chu min lo thlir reng tih ka hria, mahse ka en duh lo.

A inleng zawk ni awm ka ni. A epah chiah chuan ka ţhu a, in neitu zawk ka ni bawk a ka hrawk ha'n thian kharh a, "Eng nge i lo tih dawn?" ka ti chhuak thei hram. Min lo en uluk lutuk chu ka thinphu a rang vek thei.

T shirt hring duk leh kekawr bul a inbel a, a sana bun hian a tilang pâ zualin ka hre ţhin. Mipa e ti lo hian a vun a nung sar reuh a, a taksa lah a inphut mawi tawk bawk si. Hmeichhe tam tak duh zawng a ni pawh a dem awm loh khawp mai. Ani ang tan chuan mahni induhtawk viau pawh thil awm lo a ni hran lo.

"Phone ah ka rawn sawi tawh." a ti hmuk a, kei ka ţhu ngil auh a, ani erawh hahdam hmel zetin a van a phar duai. Misual indawp te pawh kan ang.

Ka ngawi reng a, sawi tur ka hre hlawl lo, Mîlo chanchin zawh mai te chu ka rilruk a, mahse a hun lo viauin ka hre bawk si.

"Nichin a mi zawk kha a mi i bialpa chu." a ti sup a, a ţawng ring ang tih ka lo hlau lutuk. Zuitei te room aţang chuan rawn hre pha dawn lo pawh ni se heti laia sawi chu nuam ka ti lo.

"Pawnah sawi ila." Ka'n ti ringawt a, a lo nui suk duh chauh, ava han ngeiawm thiam tak! Nu emaw Zuitei kha rawn tho thutin kan thusawi an lo hriat ka hlau.

"I duh lo emaw tia." a ti sup, a hmel erawh a thu tak tawh nasa mai.

"Hetiang lam i sawi dawn tih ka hre lo a lawm." ka ti ve mai a, ka ti tak tak bawk.

"Eng nge i lo beisei?" a ti nghut. A va dil chhut mai mai tak.

"Min hauh i duh a nih ka ring.... In chhungah te chuan min hau vak ngam dawn hleinem." ka ti ţha ve mai a, a lo nui ka hmuh chuan ka ner nawk. A ngaihdanah chuan a nuihzatthlak viau ta ve ang.

"Hauh i phu tih chu i hre ve a." a tih chu ka lo haw ru leh khawp, inti puitling fahrana min ţawngkhum hi ka ngaithei lo viau, kei aiin kum khat bakin a upa lo. A rualpui te ai a pawl sang ţhin tih pawh ka ka hria,mahse chu mi avang chuan min naupang chei viau turin thuneihna a nei lo hrim hrim.

Ka chhan tak lohah chuan, "I bialpa a ni em?" a ti leh a, eng a tan nge maw hriat a duh ve em em ni.

"Nih chu a tum a lawm." ka ti ve ta nghat, Zuitei'n nawr deuh a ngai a ti bawk a, risk lak ngam a ngai a nih hi.

"I nih tir dawn em?" a ti a, a khup pakhat chungah a ke a dah kanga a ti che zeuh zeuh bawk. A phar duai mai bawk nen a intithu hmel ngawih ngawih.

"Chu te chu ka thu thu a ni mai lawm." Zam lo hmel tak chuan a mitah ka en ve kar. Chubakah a tira ka zam ang em em khan ka awm tawh lo, ka beisei ang a nih tak loh vang a niang, ka pangngai tan tawh viau.

"Ni mai e." a ti sup. A ţhut dan siam remin a khup pahnih chungah a kiu a nghat leh a, rawn ţhu chhuak deuhin a khabe a hmul tlem to chu a tuai hauh hauh. A chezia chu ka lo chik ngang mai.

"A nih leh kei?" a tih chuan ka meng phâwk viauin ka ring. Ka thil hriatna te hi an chawl dukin ka hria. 

*

*

Zing ka thawh chuan ka rin ang ngeiin thawh ka hai. Mutthilh theihna chi ni hek lo.

Nizan thul thleng ngaihtuah chuan ka nui leh nghal vur vur. Ka inphih fai zawha darthlalang hmaa ka in en te chu ka lai ringawt thei nia! Zahthlak hian!

Chaw kan ei lai chuan Nuin, "Nizan kha ka muhil zui daih a, Fakpuia kha a haw har em?" a ti a, Zuitei ka melh zauh, ani erawh a lo hawi duh lo.

"A haw har vak lo,a phone call ka lo hmu lo a." Ka ti a, lalzuimawii chuan min en dawn tih ka hriat sa avangin ka hawi chhuak duh bik lo.

Tette aţanga Zuitei te nen inkawm ţhin an nih avanga a fapa ang maia a en ve leh a rin ngam a a nih thu te chu a sawi luam a, nulat tlangvalna kawngah chuan min ringhlel lo niin ka hria. 

Chaw ei thleng kan sil zawh hnua ka insiam tur chu Zuitei'n ka room ah min luh pui nghal a, min zawh duh an ngah hmel mai mai khawp a.

"Le sawi rawh le! Nizan kha chuan ka be buai duh lo mai....mai che a nih kha, ka meng rei lutuk."a ti zui a, mengrei pawh ni se kan thusawi a rawn hre pha dawn lo hrim hrim tih ka hria a, a zia viau e.

Nizan khan a zawhna min zawh ka chhan lawk loh avang khan min zawt nawn leh ngat ,"I bialpa nih duh ve ta ila min nih tir duh ang em?" a ti a nih kha! A hun lai khan ka sa vekin ka hria! A hnen aţangin khatiang thu kha ka dawn ka beisei ngam lo ţhin kha a nia, a thleng ve tlat bawk si.

Chhan miah loh chu dik theiin ka hre si lo, amah lo duh rilru viau mah ila easy hmel taka lo pawm tawp chu ka duh bik si lo. Awlsam taka min nei thei a nih chuan ka hlutna a hmu thiam lo palh ang, chuvangin rilru fim ka pu lui hram hram.

"I ni duh ang maw?" ka ti a, rinhlelh na hlirin ka khat. 

"Duh lo ni ila ka sawi ring suh." a ti nghut , zam hmel pawh a pu lo. A inringtawk hmel em em ringawt. Chutiang a nih avang chuan chhanna pek mai ka tum lo.

"Nih tir duh lo ta che ila...."

"Min nih tir theih nan ka bei ang."

"Mahse hlawhtling chuang lo ta la?"

"Ka hlawhtling ang."

"I va inringtawk ve." Ka ti a, ka nui lui hak. A hlawhtling sa reng tih inhria se chu a chapo pui duh ngawt a nia ka rin ni.

"I la hre mai ang." a ti a, tunah hriat duh tawh lai a. Engtin tak hma lak tum ang maw.

"Lo inring ang che." ti a mit siai zauhin a tho zui nulh. Inti zei deuh ve.....

A kekawr ipte zen chunga a din chuan min chhuk en run a, "Min thlah ve la." a ti sup. Ka beisei loh leh rin loh lutuk dana kan inbiakna a kal avangin ka ni deuh hûih hian ka hria.

Ka ding chhuak ve mai a, kawng min lo ken chuan kawngka lam ka pan nghal a, min lo zui ve mai bawk. Ka kal pelh pah te chuan kan pumrua intia lo lutuk chu ka te chem chem hian ka hria.

Pawnlama ka chhuah chuan ka ding a, min kal pelin a ding leh chut, "Saw ti lai thleng saw min lo thlah rawh." a ti sup, a kekawr ipte a zen kher bawk nen a ngeng hmel ngawih ngawih.

"A tlai tawh sia, helai thleng hi a ni mai." Ka sawi zawh rual rualin ka hmaah tak a rawn ding nghal , varanda light ka on tawh lo bawk nen min hliah thim khup a ni mai.

Min din hnaih deuh chuan ka thaw ţha ngam lo mai dawn.

"Midang pawh i thlah tho." a ti hmuk a,a rawn kun hniam kher bawk nen hnuailam ka en kar mai.

Chutiang chuan rei a awm lo hlauh, a ding ngil vut a, "Lo kal rawh le." tiin a kal zui ta vut, ka thaw huai huai mai. Ihe lovin ka zui nghal vat.

A hnuah a kal lai chu a ding leh chut, a hnunga kal ka ni bawk a kei pawh ka ding ve chawt. 

"Ti lai thleng hi ni mai, muttui aw." ti a inher a kal nghal ka tum chu ka banah a rawn chelh,ka inher rang lutuk ringawt. A kut lehlama min chelh chungin lehlam a lek a, kawngpui lam chu kawkin, "Sawi lai thleng saw." a ti teh tlat. Eng nge maw a hriat ni.

Ka chhan ve hma chuan min kai phei zui nghal a, kawngpui kan chhuah phei rual chuan min thlah ve mai.

"Midang ai ka ţhatna i hmuh theih nan ka danglamna i hriat a ngai a lawm." a ti sup. Street light hnuaiah chuan ka mitah chiang zetin min en a. Midang ka thlah a hmuh ţhin te aia thui min kalpui ngei a! He pa hi a ti tak tak a nih ka la ring ngam lo cheu. Chubakah a thusawi chu ka sawi awm zawk tak a ni.

"Va let tawh rawh." a tih chuan ,"Muttui." tiin min chhan let na pawh nghak lovin ka lut zui daih. Ka thinphu ran dan em em kha a mak zawk, a chhuak dawn emaw tih tur vel a ni.

Zuitei hnenah a pawi lo tur chin chu ka hrilh ve zawr zawr, ani chuan, "Ka biakin engah mah a ngaih loh hmel teh reng nen, phakar thei lutuk mai." a ti hlak a, an inbiak ve dan pawh min hrilh chuang lo, ka zawt lui lem lo bawk.

A chhuah dawn chuan, "Ti kha chuan ngaihngam deuhin ka awm ve thei tawh ang." a ti kher a! A chhuak zui nghal daih, a ngeiawm thiam ve thawkhat chu a ni.

*

Nileng chuan 'engtin nge hma a lak ang le?' tih ringawt chu rilruah a awm. 

Ka hmu lo nileng leh phawt. Phone ah lah eng message mah a hnutchhiah lo. A chet lak tum dan chu ka hre chak viau a, mahse hetia ka lo rin anga a nih leh ţhin si loh avang hian ka ringhlel leh ţhin.

Zanah chuan ka inkhawm leh a, Zuitei leh Buangi an awm loh chuan midang ka bel chuang lo,mahniin ka kal ve tawp mai ţhin.

Ka inkhawm bang chu UApuia hian min ko ding a, kan Group ah hian asst. secretary a niin ka hria.

"Lehkha chu kan la rawn siam dawn tho nain, group meet a kan group item band ah khan zai turin kan beisei che a." a ti a, ka rilru chuan a pha nghal char char.

"Midang ruat mai tur an awm lo em ni? Ka thiam viau lo a sin." ka ti a, ka hreh hle tih ka hmelah a hriatthiam ka ring.

"Kan ruat khan a rawn pha leh sia. Chubakah ngai leh ngai inzai tir reng ai chuan, i tih theih kan ring tawp mai a sin." a ti leh a.

"Tih theih loh chhan tur chu a awm lo... Mahse ka thiam viau lo tak tak." ka ti leh hram,an beisei an lo tih san vak ka hlau.

"I rawn tih hlawhtlin theih hrim hrim kha a ţha a ni mai. Kan thiam leh theihna te Pathian tan kan hman ţangkai ve theihna hun a ni ţhin a, kan thiam viau leh a ţha a, mahse thiam vak lo leh insit ru tak chung pawh hian Pathian ropui nan chauh a ti kan nih hre reng ila, thildang inhneh tir lo ila. Kan mualphona ni a kan ngaihah pawh a lo lan ropui theih phah leh ţhin a nia." a ti a, a sawi dik viauin ka hria.

Rilru hmin zân lo chuan aw ka pawh ve ta ngawt. "Nakinah WhatsApp group ah ka la rawn add ang che. Zir hun te kan inhrilhhriat theih nan." tiin min kal san a. Hetia han ngaihtuah chhin ringawt pawh hian ka huphurh a nia, a takah phei chuan engtin tak hmachhawn ang maw.

In ka thlen hnuah room ah inkhungin thawmhnaw ţhui tur ka kawl ho chu ka khawih mawlh mawlh a,a khattawkin nizan lam thil chu ka ngaihtuah leh ţhin. Mahni chauh chuan ka nui leh vur vur ţhin a, ka hlim ve chiang em a ni. 

Ka rilru hneh turin engtin tak chet la ang maw, hnehtu a ni sa reng tih a hre der mai si lo. 

Hmeichhia te mit a lak ve zia a hria ang a, an laka a tlak nat ţhin zia pawh a hriat ka ring. Chutiang avang chuan ka laka rilru a pek tak tak chu rin harsa ka ti ru reng tho. Min fiam mai mai ang tih ka hlau, amah ka lo duh sa bawk nen, a tan chuan thlem ka awl dawn lutuk, chuvangin rilru fim tak ka hman thiam a ngai dawnin ka hria.

Ngaihzawng ka neih ngam loh ţhin chhan pawh a ni ţhin, ka duhin ka hmangaih lutuk ang a, insum zo lovin Pathian duh loh zawnga khawsak ka hlau ţhin. Chutiang laka ka inven theih dan ţha ber chu mipa hnaih tam loh a ni berin ka hre ve a. Ka tleirawl hun chhung zawnga fimkhur taka ka nun ka hman chhoh ve rah hi ka seng ngei ka ring a, amaherawh chu Fakpuia ka duhna hian ka mit a ti del zo ang tih ka hlau, rilru leh ngaihtuahna fim tak ka hman thiam a pawimawh zual dawn si a, ani tana infiam na mai pawh ka lo ni thei, mahse chutiang a nih chu ka ring phal tak tak si lo.

Na takin min siam ang em ka hre lo, mahse ka duh em em mai si a, risk ka lak ngam a ngai dawn bawk.

Khawl nen ka rik rek rek lai chuan ka phone a ri a, Ruatsanga hnen aţangin a lo ni. Ani hi chuan min lo call tawh hi chuan sawi tur pawimawh a nei tihna a ni nge nge zel a, ka chhang thuai.

Ka chhan rual chuan, "Khawngaihin i lo kal thei ang em?". a rawn ti nghal tawl. A ngen ngawl bawk nen a chhan ka zawt thuai a.

"Ka nu hi.. tlai lamah khan kawtkaiah hian a tlusual a, a ke hi a hmang ţha ngam lo. A dam leh mai ang a ti tlat bawk si. A nat dan tak ka hrethiam bawk si lo, damdawiin kal pui mai ka duh a, ka thusawi chu min hnial zel tih i hriat kha." a ti hulh. A rilru hah ve dan tur ka hria a ka lainat reuh.

"A va zia lo ţhin, ka lo be dawn em ni?" Ka ti a, mahse ti hian phone hmangin be mah ila ka thusawi a zawm duh tak tak ngai bik lo. Min hnialna tur a zawng ve tlat zel. Ruatsanga hian a duatin a ngaihsak zia ka hriat pui a, chutiang bawkin anu hian a fapa tan phur rit nih a duh lo zia ka hriat pui bawk a, an nufa hi chu kei ai hrechiang an tam bik kher lovang. Hetiang a nih vang hi a nia Ruatsanga pawhin anu hmu tura min duh ţhin.

"I lo kal mai thei zawk ang em le? Hei tunah pawnah ka awm. Ka lut chak rih lo. Ka thusawi a piang min hnial zel si." a rawn ti leh a, ka khawngaih reuh mang e.

"Min rawn hruai dawn nge?" ka tih lai chuan phone call dang a rawn thleng, VanLalfakzuala hming a rawn lang kuau mai. Tun angah ti nge min lo call ve ngawt le?

Ruatsanga chu a pawimawh rih zawk avangin ka chhang ta lo.

"Ka rawn kal dawn nia." tiin phone a dah zui a.

Fakpuia hnen aţang bawkin call a rawn kal leh. A pawimawh viau a nih ringin ka la ta thuai.

Hello pawh ka tih hma chuan, "Tu nge i biak a?" a rawn ti nghal ringawt. A mak thawt thawt mang e aw....

"Ka ţhianpa, ti nge pawimawh a awm em ni?" ka ti thuai a, chhuak mai thei turin ka insiam pah bawk. 

"Tu ber kha?" a rawn ti nghut, hetiang a min bia hi lawm ru viau tur ka ni, mahse ka lawm miah lo, lerh viau turah min ngai ni a hriatna ka nei tlat a nih chu mawle! Keimah zawk hi ka dik lo nge ni.

"I hre chuang lo ang, ka buai deuh a i sawi duh sawi la ka dah dawn a nia." ka ti zung zung, hun dang te chu ni se a dah ui tur zawk ka ni ngei awm si a. Tunah chuan hun ka nei vak lo, Nu te hnenah ka kalna tur sawi fel ka la ngai bawk si.

"Eng nge i tih dawn?" a rawn ti leh, a va dil chhut em em ve mawle!!

"Ka ţhianpa te in ah ka kal dawn! Eng nge min lo phone chhan ber chu!? Sawi thuai ta che mawle." ka ti nghat, dilchhut leh lutuk mai.

"Eng ti turin?" a rawn tih leh chuan thaw vakin phone chu ka melh hrep.

"A pawimawh." Ka ti ringawt a, a lakah hian induh thiam ve deuh ka ngai, ka rilru a hriatthiam zung zung loh nan te pawh. Min bel chiang deuh se chu amah ka ngaihven ruk zia hi a hrethuai thei mai ang.

"Ka lo hruai ang che." a rawn ti a, leh ringawt chuan.

"A ngai lo ka ţhianpa a lo kal mek...." ka tih lai chuan min lo pawt chatin, "Let tir leh mai rawh ka hruai ang che, ka lo phei dawn." tiin a dah zui daih. Phone chu ka en vung vung ringawt. 

A khawsa zia chuan min ţhawng viau mah se ka thinrim miah lo, lawm na riau ka nei tlat. A nuam reuh e....

Room aţanga ka chhuah hmain Ruatsanga ka call a, rei a ring hmain a rawn chhang thuai. Min hruaitu tur ka neih dawn avangin let leh mai turin ka ti ta ngawt, a lo thleng thui tawh viauin ka ring.

"A pawi loh chu, kan kawtah ka lo nghak ang che u." a tih chuan kan inbiakna kan ti tawp a. In kawtah a ti kher chu ka nuih a ti za reuh, anu laka a lungawi loh hi chuan a pumpelh ve dan ber a ni ţhin in ka hria.

Kan inbiak zawh chuan room aţangin ka chhuak a, ţhutkhawmna pindan lamah ka phei nghal. Zuitei chu a lo inchhawp hnawk nuai a, an dawr bungraw receipt vel a buaipui niin ka hria.

Nu hnenah chuan Ruatsanga te chung chang chu ka hrilh a, fimkhur tura min chah lai chuan kawngka a rawn ri zui. Tu nge a nih ka hrechiang mai.

"Va hawn sak tawh.I ţhianpa chu a niang." Nuin a tih chuan ka tho zui tharh, Ruatsanga'n min rawn hruai leh turah an ngai a, a ni der mai si lo.

Tîm ru deuh chuan ka hawng a, Fakpuia nen kan inmelh rán mai. A incheina chu ka tum lawk lem lohin ka en kual leh hman vek. A helmet a keng a, Hoodie dum plain leh jockey a ha tawp a, chapal a bun leh mai bawk. A Hoodie lukhum a'n khum ngei a! A chhelo hi ka va han ti ţhin tak!

"Min en zawh chuan kan kal mai dawn em ni." nui suka a tih chuan ka mit ka khap fak fak, ka zak ru chem chem.

"Lo lut phawt rawh." Pangngai takin ka ti thei hram, tlem a tlemah ka mualpho mai dawn a lawm le..... Ka mit hian ngaiah a nei tawh chu a ni ber. Amah zawk hian hun dangah a hre ngai lo mai mai zawk a ni.

A rawn luh rual chuan Nu hnenah Fakpuia'n min hruai tur thu ka hrilh a, Zuitei rawn hawi chhuak rang lutuk chu ka hmu lo der tawp. Min ti zak palh ang.

Kan lo din dunna lam  chu nui vur vur hian a rawn hawi a, ka lâi ringawt dawnin ka hria.

"E a tih zia hlauh chu, Ruatsanga kha chu a let leh lam a ngaihtuah awm riau ţhin. Fakpuia a remchan hlauh chuan ngaihtuah pawh in nep deuh ang." Nuin a tih chuan thaw huaiin kal kan tum a, lalzuimawii lah chuan,"Fimkhur hle.....rawh u. In kal kawngah a nia ka tih." a rawn tih chuan ka bula mi nui ri ka hria, lei ka va chhuah khum vat ringawt. 

Ti kha chuan Nuin zawhna a nei leh ngei dawn e, lalzuimawii'n engtin tak lo sawi ang maw.

Bike a ka chuan ve hnuin kan kalna tur veng min zawt a, ka chhan rual chuan, "A va hla ve." a ti sup, helmet a khum zui bawk nen ka be zawm duh lo.

A khalh chhuah hma chuan "Nghet deuhin min vuan rawh." tiin a tlan chhuak zui a, ka phu dáwrh thei. A taksa che datah chuan a nui tih ka hria, ka va haw reuh mai mai tak.

A khalh muang vak lo bawk nen ka hlau rilru si a, a kawngah ka vuan ve ta nge nge. Eng nge maw ni le hman aţanga ka chak tawh a lawm tiin ka inhnem ringawt.

A hnungah chuan ka bei hle hle, ka meng ngam der lo. Chutia ka awm chu min nuih niin ka hria, a taksa ngheng ka ni miau a, ka hre thei.

A tlan muang lo bawk a an veng chhung kan lut har lo, Ruatsanga te veng kan thlen chuan a tlanmuang ta deuh bawk a, kei pawh hawi chhuakin an awmna lai vel chu ka hrilh pah ve zel.

Peng hnuhnung bera kan tlan thlak chuan Ruatsanga lo ding kan hmu ta, ka hrilh thuai a, a bulah chuan a ding ve mai bawk.

"Kan rei i ti em? Hei ka ţhianpa Fakpuia, ani hi Ruatsanga." tiin ka inhmelhriat tir ve ngei, Ruatsanga hi chuan min rinhlelh ka ring tlat, hetiang a mipa dang inphurh tir mai duh chi ka ni lo tih a hre ve tlat. 

An han inchibai ve ang lawp lawp a.

"Zu lut r'u." a tih chuan step ah chuan ka chhuk zui a, Fakpuia paw'n min zui ve mai. A la ţawng leh lo reng reng, ngawi rengin min zui ve zel chu a nuam riau hian ka hre pek.

An kawngka lo in kalh lo ah chuan ka lut a, NuZobiaki chu ţhutthlengah a lo mu, a ke velam chu puain a lo tuam lâk mai. 

Min hmuh rual chuan min lo nuih var a, "I lo lan kha ka ring reng a! Bawiha tak hi chu aw! Ava tibuai zing tak che em." a ti zui barh barh. Ţhutthlengsei pakhat chiah a awm a, amah a mut avangin keini an chaw ei dawhkan bula chair ah kan ţhu thung.

"A thu i awih lo a a rilru i ti buai ţhin a lawm. Naupang pawh inni lo a, inthu rem sak ziah inngai mai." ka ti ve hluai a, huat awmin ka sawi lo, ani pawh a lo nui leh mai.

"A....ho te te a damdawiin kal zawng sum a hek mai mai a lawm. Hetiang te phei chu a dam leh hma lutuk." a ti zui hlak hlak, an nufa hian an rilru puthmang ka hriatthiam tluk zetin ka lainat dun.

"Dam hi a pawimawh ber a lawm. Sum te chu kan dam anga a awm leh mai dawn a. Ruatsanga hian a hmangaih lutuk vang zawk che a ni tih hi pawm thiam tum tawp mai teh. Heta lo kal hi hrehawm ka ti hran lo, mahse ka lo kal chhan ţhenkhat hi chu Ruatsanga rilru i hriatthiam sak duh ţhin loh vang a ni a, a neih chhun tak meuh meuh i ni bawk nen nang lo chu hetiang a enkawl tur nu a nei leh tawh dawn lo, mipa ţha tak a ni a, ani anga nu te enkawl thiam leh hmangaih thiam, a nachang hria pawh hi an tam lo ang. Chuvangin a thu hi i zawm hram hram a ngai, i fapa hi nangmah vanga rilru nuam lo taka a awm i duh lo tih chu ka hrethiam tho, mahse a thu i awih phawt chuan a hlim dawn tih chiang takin ka hria." ka ti ve mawlh mawlh a, ka sawi tum hi hrethiam se ka ti hle bawk.

"Pawnah a awmna a rei tawh sia han ko la." a ti a, a fapa a nia, an inhrechiang nufa dun khawp mai.

"Ka han koh chuan Damdawiin kal i duh ang em?" ka ti ve tlat, a lo nui hak hak a, "I va ho mai mai tak." a ti zui hlak.

"Han ko la i thingpui lum kan in tlang ve phawt ang chu, i ţhianpa ho hi khawilam mi nge?" a ti zui a, kan ţhenawm hnai a mi a nih thu leh heta min hruai tura ka ngen thu chu dawt tlem phuahchawpin ka sawi tawp. Thil ni lo lo min zawt duh palh ang. NuZobiaki pawh hi ri phawng phawng chi a ni ve bawk nen, a hun leh hmun thliar thiam viau ka ngai.

"Thingpui tur kha chhuang la han ko tawh." A tih takah chuan a rilru ka thlak sak tawh tih hriain thawveng ru zetin ka tho nalh, ka bula mi min en rang lutuk chu ka nuih a za zawk.

"I lo kal ve duh em?" Nuihza insum zeta ka tih chuan, "Duh lo." a ti hmuk, a va inhmeh hmek hmuk tak, ka nuih a za ru viau thung.

Thingpui tur chu chhuang sawk sawkin ka chhuak chho a, Ruatsanga chuan phone a lo hmet mial mial. Ka thawmah chuan a rawn hawi chhuak a.

"Lo chhuk rawh, zanin la la a hruai nghal i duh em ni?" ka ti a, "Duh e, tunah pawh kan tlai tawh viau a, naktuk ai chuan a la ţhat zawk ka ring." a ti a, chhuk tumin ka awmna lam a rawn pan takah chuan kei pawh step ah chuan ka chhuk thla zui.

"I bialpa chu em ni?" a tih chuan ka ding chawt, ka leh hawi chuan ka hnungah ding mah se a awmna step a sang zawk bawk nen ka dak vah a ni ber.

"Ni teuh loh." Ka ti vak ringawt, ka zak tlat a lawm, ka ţhian mah ni se hetiang lam ka sawipui ngam a ni chuang lo.

"Biakfela tan chance a va chhe dawn ve." tiin a nui suk a, "A ni lo ka tih chu...." ka ti leh vak ringawt, in chhunga awm ten kan ţawng an hriat ka hlau bawk si ka hawi tawn zak zak.

"A nih i duh tiraw?" a ti a, ka che ka tawp chut, Duh lo han tih mai chu ka harsat tlat.

Ka chhan mai loh avang chuan, "Biakfela chu lo hrilhfiah tur a nih chu." tiin a kal ta daih. Thaw ka la vak ringawt. 

Ka luh ve chuan an lo reh ţhap mai. "Thingpui kan in anga kan insiam dawn nia." Ka ti lut a, thingpui buaipui chuan ka che rak rak.

NuZobiaki chu a chetsual dan te ka zawt pah a,mipa te pahnih an ngawi reng bawk nen kei tal ka ţawng a ngai.

Thingpui kan in zawh chuan NuZobiaki ka insiam pui a, Ruatsanga'n taxi a kal ti mah se Anu'n Bike chuan a inhuam tho avangin a tilui duh bik lo.

Ruatsanga'n a paw chho a, keiin kawngka ka kalh sak thung. Ka hruaipa lah chu ngawi rengin a awm ve a, a te chhe vak lo bawk nen min dîp rûn thei.

Damdawiin lama zui ve chu ţul an ti viau lo nain a hmun thleng chu kan zui ve tho. Kan lu pui ta lo thung, kan buaipui ve vak chuan an nufa inthlahrunna tur ka siam sak leh mai dawn si a, an duhna zah sak mai kha ţha in ka hria. Chanchin inhrilh leh tur chuan kan kalsan ta a.

Min phurtu lah chu ka sawi ang a piangin a awm ve zel a a ruk tak chuan NuZobiaki ke na chu ka tan hlimna a ni ringawt, ka sual thiam viau nain ka hlim ru phian mai bawk si a ni.

Haw kawngah chuan a khalh muang ta hle mai, a vawt sung sung tawh mai. "Min ngheng leh rawh." a tih chuan ka tîm ta tlat, chubakah kallam kha chu a khalh chak em a, ka hlauh vang a ni pakhat, tunah chuan han kuah awr awr ngam na chi pawh a ni lo, keimah chauha ka awm hunah ka zak leh mai mai dawn.

A sawi anga ka tih tak lohah chuan engmah a sawi zui ta bik lo.

Hetia ka zan chhuah ţhin chhan min hmuh pui takah chuan ka thaw a veng sawt thei. Zan dangah pawh min hmuh ţhin thu a sawi tawh a, ngaihdan dik lo deuh a lo nei ru reng tawh thei, tunah chuan ka insawifiah ngai miah loin a hre ta bawk a thawk huai na tham a ni.

Kan duh deuh ten khawlo deuh anga min ngaih te chu tu nge duh bik ang le.

Kan in kawtah chuan a tiding a, ka chhuk nghal tharh,"Ka lawm lutuk ringawt, muttui le." ti a kal mai ka tum chu ani pawh chhuk vutin a helmet a phelh a, Bike ngheng chuan dingzui bawk.

"La kal lo teh." a ti sup,  Bike a a kut tawn tawn nghatin min thlek uluk viau bawk. Chutia min en takah chuan Kan chhuah dawn khan tlem talin ka lo inchei lo a ni te ka ti leh hnuhnawh.

"Lo kal hnai deuh la." a tih chuan thuawih deuhin ka pen hma ve mai, inhnaih takah ding lo mah ila kan inhma tawn ran tawh.

"Zanin min hruaina chu ka rin loh lam daih." a ti sup. Zan boruak dai dak nen chuan a lang cool ka ti rilru khawp mai.

"Chu min lo ring ţha vak na nge?" ka ti ngat a, ka ner lui vak bawk. Ka rin sa kha a ni hrim hrim.

"Chutiang deuh chu." Tiin a nui suk a, a zep buai lo a, a ţha viau e.

"I bialpa ni turin eng nge ka tih ngai?" a tih chuan ka khawng awt thei! Ti nge min ţhawn dawt dan hi a hriat theih em em le?

Han chhan loh tawp chu dik theiin ka hre si lo, chhan dan tur ka hre bawk si lo. A van hrehawm duh tak e aw.....

"Chu te chu!" Ka'n ti hluai a, sawi zawm tur ka hre der lo.

Ka awmdan a hmuh chuan a nui suk a, ka thinphu a rang leh dawt dawt tawh. Chhun eng chu ni se ka biang sen a lang chiang ngawt ang.

"Ka kuah chak lutuk che tih i hria em?" a ti sup a, min en dan chu kan duh ngawih ngawih te kan en dan ni berin ka hria, ka hriat hi dik se ka ti.

Awm dan tur hre hek lo, ka ding ngawi reng ringawt, ka zâm ruk zia ngaihtuah chuan tlan chhiat daih tawh na tham a ni, mahse ka tlan chhiat san phal der mai si lo.

"Malsawmpari hi ka duh tak zet tawh." a ti leh sup. Min en dan chu ka dawngsawng thiam lo.Ka kut pahnih chuan ka kekawr ka ţham nghek! Ka lai chhe vekin ka hria!

Awm ngaihna ka hre lo, chutia ka ding ngawi reng chu, "Va lut tawh rawh, an lo ngaihtuah tawh ang che." a ti a, "Muttui le." tiin in lam panin muangchangin ka pen chhat chhat.

Ani chu a awm ngaiin a la awm reng tih leh min thlir reng tih ka hria. Ka pen lai chu ding chutin thaw ka la vak a, thih leh thih tih rilru puin muangchangin ka inher leh.

A lam pan chuan ka let leh ngat a, chutia ka let leh chu mak a ti deuh nge ni a lo ding ngil thuai, ahma ah tak ka va ding ta tharh. A hmelah chuan ka chet dan chu a beisei lawk lo hle tih ka hre thei.

End of chapter 12

🧡