BLUEMING 🦋
BY UNKNOWN BELLE
CHAPTER - 13
"Engtin nge i thusawi ka rin theih ang?" ringhlel ru zet chuan ka zawt a, amah ka lo hriat ve tawh dan nen tuna ka laka a awmdan hi hriatthiam a har em a ni. Hetiang rilru hi engtik aţanga a put nge tih ka hre chak hle bawk,ka zawt ngam dawn der mai si lo.
"Ka laka i inhawn mil zelin i hrethiam thei ang."a ti a, min chhan dan a thiam ka ti rilru khawp mai,a duhnaah chuan a zei dawn khawp hi maw.
"Chu ti ringawt te chu a!"
Ka tih khum ringawt, ka duhkhawp lo ţhin.
"A lan danah chuan min hnar pumhlum bik lo.....a dik em?" a ti a, a kekawr ipte a zen kher chuan a ti confi hmel zo vek.
"Chutiang te han sawi." ka ti sap, a hriat tura sawi pawh ka ni chiah lo, hetiang thu hrim hrim hi sawi nuam ka ti lo,min phuar ni mai hian ka hria a, awmdan tur ka thiam lo vek
Ka chhanna avang chuan a lo nui ri hak,ka nuih a za ve der lo lehnghal.
"Ka rilru put hmang i hre tawh bawk a, chhanna min pek theih hun ka nghakhlel hle mai." a tih chuan ka ner vak ringawt, a chhanna duh ang a hmu sa reng a, ka lan chhuah tir duh loh vang mai mai a ni tih hre ta se engtin tak awm ang maw.
A inringtawk êm avang chuan a chhanna duh ang pek loh a hlauhawm zawk.
Hman zana min rawn chhan danin, "Kan la hria ang chu." Ka ti ve nghat, a sawi kha a la hre ve a ni mahna a lo ţhen sak mai.
"Nghah rei i ngaih loh beisei ang." a tih chuan, "Muttui le, zanin a min puih avang pawhin ka lawm nawn awn awn e." tiin ka kalsan zui a, "Muttui." a rawn ti ve dut mai, a hmuh theih loh lamah chuan ka ţhen vak vak ringawt.
A tlai deuh tawh bawk a ka chhungte pawh an mu tawh. Ka mut hmuna phone ka en chuan Fakpuia hnen aţanga message lo awm chuan ka mit a la ber, ka en thuai a, dar zat ka en chuan kan chhuah hma daih a mi tawh a niin ka hria.
"Inleng i nei leh em?" tih a lo thawn a, "Ti nge i online loh?" "I buai em ni?" "Kha mi te kha an rawn kal leh em?" tih te an ni, a message ka chhan loh vang a nih chiah hi min lo call ni, a ho ka ti dawn viau a, ka ti tak tak phal tawp si lo.
Tuna han chhan leh ting tang kha a ţul ber tawh lo bawk a ka chhang ta lo. Ani pawh a last seen a hla tawh, a haw hnuin a online leh tawh lo tih a lang reng,ka va be ting tang duh tawh bik lo.
Zingah chuan Nuin zawhna a nei ta ngei, "Fakpuia nen hian in inkawp em ni?" a ti a, a thil tih lai a ti zui mawlh mawlh a, min en kher lo chu ka lawm ru hle.
"Inkawp lo e." ka ti a, "Ngaihzawng te chu neih thiang lo a ni hleinem, mahse hmeichhe tan hi chuan fimkhur a ngai nasa zual a, an chhungte thlenga ngaihven hmasak tel hi a pawimawh ţhin. Eng pawh thleng thei a ni a, kan dam chhunga kan kawppui tura kan duh an nih phei chuan an chhungte pawh kan hmangaih pui theih a pawimawh a, chu'ng zawng zawng chu a tir te aţanga ngaihtuah fel hi a ngai ţhin. Ngaihzawng te chu kan pasal tur tihna a kher lo tih hi kan sawi fo a, a dik reng a, mahse kan pasal tur atan pawha kan duh loh tur te hi chu ngaizawng buai lo mai ila. Kan pasal tur atana kan duh em em te nen pawh inthen a ngaih chang te a awm bawk a, chutiang avang chuan a tir aţang hian rilru fim tak put hi a ţul ţhin." a ti a.
Sawi zawm lehin, "Fakpuia te ang te chu kan hriat chian ve a nia, lo inkawp pawh ni ula ka dodal lo ang che u, hetah i awm a, ka fanu hrin ang chiah i nihnaah a ţha ber ber ka duh sak che, ngaihzawng chung changah ngat phei chuan fimkhur hle la ka duh." a ti a, a thil sawi ho chu uluk takin ka ngaithla a, ka nu leh pate piaha he ti taka min duhsaka min hmangaih tu ka nei hi ka vannei ka ti tak zet.
Ka hnathawhna hmunah chuan ţhiante titi na karah ka awm ve leh kar a, sawi tur an hre thei hi ka ti ţhin khawp mai. Kan khawlama ka ţhiante min hre chhuak ţhin. Kan bengchheng ţhin lutuk a midang awm tamna kara awm chi pawh kan ni ţhin lo.
An mipa duh zawng te hi an sawi bawrh bawrh mai zel a, ka sawi ve ngam ngai lo. Tu pawi sawina mah ni lem lo mah se ka tîm tlat zel.
Chhunchawlh neih hma deuh chuan dawr neitunu UBzi a rawn kal a, a ţhiante a rawn hruai ve bawk nen keini lam chu thawm kan nei vak lo. A ţhiante chu pathum an niin ka hria, an nu lian hlawm viau nain an hmel ka en lo a, ka thil buaipui lai ka buaipui zawm mawlh mawlh.
An ţhian ho titi chu tum em em loh pawhin kan lo ngaithla ve reng a, ngaihsak angin awm lo mah ila an ţawngring ang reng si, hriat loh der sen theih pawh a ni lo.
UBzi chu kan awmna area ah rawn pheiin order a hmuh ho a sawi a, a design ho nen a duh dan te a sawi zawhin a ţhiante nen an chhuak zui nghal a, a thawven thlak huaia ka hriat chu a!
An chhuah fel vek hnuah chuan Sangsangi'n zawi deuh tak hian, "Ui U Hruaii chhiat loh zia kha! Ka star ruk deuh nen an inngaizawngin ka hria, ka hmu dun zeuh zeuh mai." a ti a, an hmel ka en hlawm loh avang leh heta ka thawh aţanga an rawn kal vawikhatna a ni bawk nen ka hre ve hlawm lo.
Zuali'n,"U Hruaii te chu tu mipa mahin an hnar phal ka ring lo, fa a nei tawh tih a hriat loh reng reng." a ti ve bawk a, tu nge ka hriat ve loh avangin ka lo ngaithla ve leh reng.
"UBzi ţhiante ho hi chu an chhelo ve hrim hrim, mahse UHruaii ber kher hi chu ka duhpa nen ka hmu fu zauh zauh a, ka ngei reuh tlat." Sangsangi'n a ti leh hmarh hmarh a, kan lo nuih ringawt.
"Dik tak chuan ani anga zei leh zak thei lo ni ve ila chu bialpa ka ngah tawh ngawt ang." A ti zui a, a hriat chian hmel khawp mai. A duh deuh nen kher a hmu dun ţhin bawk nen a ngei ru viau chu a awm ve tho, kei pawh Fakpuia nen hian hmu dun fo ta ila ka thik ve tho ang.
"I star pa ve kha a khirh hmel em mai, nui ve thei hmel pawh a pu lo." Zuali'n a lo tih fiamthu chuan ka lo nuih pui hak hak, he ta ka thawh ve hma aţanga thawk dun tawh an ni bawk a, an inhriat pui hneh hmel khawp mai.
"Sawi lo mai teh, ka star te ah chuan a ber a nia, UHruaii a chhelo bawk si, UHruaii tan chuan ka ui a lawm. Nuthlawi lo deuh pawh a hmu zo dawn lutuk. Kei lah he ti ve mai hi ka ni si." a ti a, kan lo nuih pui nasa mai. A ţawngdan hi ka sawi thiam dan chuan a sawi sawk sawk zel ni ber hian ka hria, a lungawi loh na a sawi ve tawh hrim hrim hi chuan fiamthuin a tawp leh nge nge ţhin.
Zuali'n,"Sawmpar, a star deuh chu i hre ve duh em?" A tih chuan ka hriat duh thuin ka chhang thuai a.
Sangsangi'n, "A hre chuang lo ang hrilh ve lo mai teh." a lo ti hmak, thinrim a sawi a ni lo bawk a kan nuih kan nuih mai.
Zuali bawk chuan, "Ho e hrilh ve reng reng ang, i hmuh chak avanga i chhuanlam ţhing deuh deuh pawh kha hrilh nghe nghe teh ang." tiin a nui bawk bawk a, Sangsangi pawh a lo nui nasa mai.
"Kan thlanglam deuh kawngkual dawn a, kawngpui ep lam a lang thei chin chiah a computer dawr awm khu i hria em? Computer zirna awm nghal khu?" a tih takah chuan ka che zawkin ka hria.
"Aw hria e." Pangngai tak chuan ka ti ve mai a, a sawi tum chu hre duh si huphurh bawk siin ka thaw dêp dêpin ka hria.
"Khu ta an instructor khu..... A hmunah i kal loh chuan i hre ve kher lo mai thei, i hawi nasa lo hmel thei si." tiin a nui mai a, za lo zetin ka nui ve ringawt.
Anni aiin ka hrechiang fe zawk ang chu mawle! Mahse tunge UHruaii?? Nichina an sawi ho kha VanLalfakzuala a lo ni reng sia! Tunah chuan ka nuih pui mai thei tawh pawhin ka ring lo. UHruaii a tih nen khan an inngaihzawn a rin thu a sawi a, an awmdun a hmu zing viau em maw ni le....
Ngaihzawng a nei lo kha chuan ka hria a, nge ni, amah ka duh luatah hian a thusawi te hi ka ringhlel phal ngai lo hian ka lo ring vek zel zawk pawh a ni thei tho. Zuitei zawh chian leh ngei a ngai dawn a nih hi, ka va'n ning tak em! Hmeichhe dang nen a sawi zawm theih a nih ka duh lo, ka phal lo a ni zawk mah.
Ka hriat belh duh ve leh chuan thudang an sawi daih lehnghal a, ka zawt leh ngam chuang bawk si lo. VanLalfakzuala hian min fiam kual mai mai a nih chuan ka thinrim viau ang.
Chutia hmeichhe dang nen a sawi zawm a nih chu a thla ringawt pawh ka ngei, chhunchawlhah pawh ka chhuak peih lo. Ka awmdan chu a ho ka tia, a ho ka ti tak tak bawk si lo.
Nileng chuan a hnathawhna lam pawh ka hawi thla eih lo, haw dawnah pawh bus stand panin ka chho nghal daih. Ka awmdan chu lehlam zawng tak chuan a nuihzatthlak viau pawh ka ring. Hetia mahni a lo thik rilruk ve em em zel hi ka chan tawk a ni mai bawk si, a hma ang kha chu ni se ka inhnem ve leh mai ang a, tunah chuan kan inkar boruak a danglam tawh miau a, a hma zawng aiin ka thik zualin ka hria.
In a ka haw thleng pawh chuan rilruah thil dang a awm thei lo. Zinglamah khan morning wish min thawn ve ngei, ka lo hmu har bawk nen ka seen tawp. A thawh ve leh a rawn thawn a ni ve awm si a, kei ai a tho tlai daih zawk. Ka eirawng bawl lai vel a niang a rawn thawn kha chu.
Ei rawng ka bawl zawhin Zuitei a lo thleng ve leh a, a inbual kan nghah chhungin phone ka khawih zuai. UBzi status chu ka en chak zo vek lehnghal, nidangah ka en ngai lo tluk a ni. Tunah chuan a ţhiannu kha hriat ve ka duh avangin a rawn upload hmasak a piang ka en nghal zel.
A pathumnaah chuan an ţhian ho thlalak chu a rawn hmang ta ngei, mahse buaithlak ta chu tu ber hi nhe UHruaii ka hre chuang si lo chu a ni. An hmel en reng reng pawhin nu te chhe tak an ni lo tih a hriat hlawm a, an hmelchhe lo tlang vek bawk si.
Fakpuia hi hmeichhe dang nen ka hmuh pawhin a hmeichhe hmel leh pian ka lo chik vak ngai si lova, tunah chuan ka chik chho tawh viau ang.
Anmahni avanga mahni insit chu ka duh bik chuang miah lo, ka pian leh hmel, ka nihna leh chhungte vang ringawt ni lo, amah ka duhna anga min duh let ve ka phût a, chuvangin keimahah hian ka thil neih te ni lovin a tan ka danglamna hria se ka duh. Mi te neih ang leh nih ang ka nei ve lo a nih pawhin keimah hi nih reng ka duh, keimah ka nihna hi eng nen mah ka thleng phal lo bawk.
Chaw eikhamah pawh Zuitei zawh ka tum chu ka rilruin a hre reng a, mahse ka zawt ang nge zawt lo ang tih inkarah rilru a inkhâp reng mai. Ka duh loh deuh thil ka hriat belh ang tih ka hlau bawk si, hriat chian ve ka duh tho bawk si.
Zanin atan chuan zawh rih loh phawt mai chu ka rilruk ta a, a leh pek a awm a nih chuan ka zawt tawh tak tak ang. Tunah chuan ka ngaihzawng pawh a ni lova, ka hriat tur chin chu ka la hre chho ve zel mahna.
UApuia chuan WhatsApp group ah min lo add ta ngei, naktuk zan lama kohhran hall a zir an lo rel a. Thla thar lamah daih ni mah se zan tin kan chhuak hman vek hlawm si lova, kan hun neih chhun chhun a inbuatsaih chhoh ve zel chu an duh tläng a lo ni. Eng pawh ti dawn ila, inbuatsaihna a ţhat phawt hi chuan thlir tute mit pawh kan tlung nge nge ţhin.
Ka room ah inkhungin puan ka ţhui leh a, rilru kilkhatah UHruaii an tih mawlh mai chu a awm. Zep rual lohin ka thik em em bawk. Nuthlawi a nih phei chuan kan boruak ngam chin a insan hleih vai vai dawn lutuk.
Elii nen an nih lai pawh khan Zuitei ka zawt nasa ţhin, kha tih hunah kha chuan hetiang rilru ka laka a put ve rin ngaihna awm hek lo, ka duh ve em em a, a chanchin ka ngaihven deuh reng mai ţhin.
Elii nen kha chuan an inhmeh ka ti khawp mai, mahse an inthen tawh tih ka hriat kha chuan ka lo thaw huai, sual thiam viau mah ila ka lawm ru miau mai bawk si.
Ka laka rilru a pek ve ka rin ngai loh miau avangin nupui nei dawn ta se tih te ka ngaihtuah thleng ţhin. Nei ngat se chu a hmaah ka inlan duh tawh lo ang, hmeichhe dang nen a an innei tur ka ngaihtuah ringawt pawhin ka awmdan tur ka ngaihtuah lawk nasa ţhin,ka tan beisei awmin awm ngai hek lo le.
Dar 8:30 a rik hma velin Nuin min rawn ko a, thingpui an in leh duh tawh pawh a ni mai thei. Ka ngainat vak loh avang hian ka siam phur lo thei viau a, mahse tui an ti mauh mai bawk sia, a ruk tak chuan ka hlim thei khawp mai.
Ka beisei loh zetin Fakpuia a lo awm hlawl! Ţhutkhawmna lamah chuan Nu leh Zuitei te nen an lo awm ho. Nu khan a sawi miah lo, nge ni a khawl ri vang khan ka lo hre lo zawk le?
Zuitei chu a la inchhawp hnawk reng. Ka va chhuah chuan an pathumin min lo en ţhap mai. Amah ka hmuh a piang hian chhunglamah che dat hi a awm ţhin, ka thunun theih miah lo thil a ni bawk.
"Fakpuia pawh a rawn lût chauh tho nain thingpui lo lum a, ka in chak riau." Nuin a tih chuan ka bu nghat a, choka lamah ka phei nghal daih. Ka awm chu ka dawm vang vang a, ti nge ti hian a awm zel le?
Zuitei nen an inkawm zui thawm ka hriat avangin keimah avanga rawn kal a nih chu ka ring love tawp. Ka beisei ruk ang a ni lo thung. Ka awm ve aţangin a la rawn leng ngai lo, ti ila amah chauh ang hian.
An ţhian ho ang chuan an rawn leng lut fo, chuvanga lo inngaihbel hmanhmawh pawh chu ka ni, ka rilru ka lo siam ve zung zung ţhin hi chu mahni bawkin ka tuar leh lel zel mai zawng a nih hi.
Thingpui ka lum chhung zawng chu chokaah ka awm a, ka va phei hreh lutuk tih hi an hrethiam ve awm der si lo.
A hnathawhna aţanga a lo haw na a la rei pawh ka ring lo, dar 8 velah a haw chauh ţhin ni khan ka hria, ka hriat sual loh chuan. Phone ah lah engmah a rawn sawi tawh bawk si lo, awm dan min ti thiam lo khawp mai.
T shirt var sar leh kekawr bul a ha tih ka hmu hman hram kha a nia, a sam a la hnawng chhap bawk. Ka va phei lai kha min lo en reng tih ka hriat avangin rei pawh ka en let ngam lo. A hma zawng kha chuan kei kha chu awm ve lo angah min ngai ţhin miau a, ka duh tawkin ka thlir thei ţhin.
Thingpui chu ka sem diat diat a, hawi chhuak lem lo mah ila min en reng ni hian ka hre ţhin a, ka hawi chhuak ngam lo.
Å¢hut ve ka tum loh avangin thingpui pawh ka inlum kep lo.
"Ka laklawh deuha ka luh san leh mai dawn che u." ti a kal mai ka tum chu Nuin, "Aw....hei Fakpuia a rawn leng ve a, nang ber i luh daih ten." a ti ta mai. Min nuih ang heu lehnghal a, Nu vanga ka la zah ber tum a niang, Lalzuimawii hian a lo chhun a nih hi.
"Ni chiah mai, a haw ve leh a rawn phit phei ve a." Zuitei'n a lo ti ve zat, Fakpuia nui ri pawh ka hre thei, amah ka en ngam tawh teuh lo.
"Ka khawih lai saw ka va zo law law lawk ang. Ka rei lo ang." tiin ka kal ta tho, ka lo sawi ve tawh lak lawh, ţhu ve ngawt ila awm dan tur ka thiam dawn chuang lo, ţang ru deuhin ka ţhu leh reng awm si.
"Rei lo la."Nuin a rawn tih hram chuan ka rei loh tur thu chuan ka chhang ve ngei. Mut tlang daih a nia ka duh ni.
Room ah chuan ka inkhung renrawn a, ka thil tih laiah pawh chuan rilru ka pe thei thlawt lo. Va chhuah leh ngei ka ngai dawn si, ka awmdan a lai lak lawh vek.
Keimah vanga rawn kal a nih te chuan rawn sawi lawk ve tur a nia, ka zak ru chem chem mai. Biakfela te ang kha a ni ve tlat lova, ka zak deuh bawk si, ka lawm ru riau mai bawk si.
Minute sawm panga vel chu ka inkhung hram. Ka thil ţhui pawh rilru ka pek loh miau avangin ka inthiat leh thin, a va han sawt lo mai mai tak.
Huphurh ru fe chuan ka va chhuak ve leh ta hram. Ka lan takah chuan Nuin ,"Ka mut san ang che u." tiin a tho ta daih a,ani chu a meng rei vak ngai lo hrim hrim a, a tilui a nih ka ring lo.
"Ka zo ţep, lo hmanhmawh s'u" Lalzuimawii'n a tih chuan ka sen vekin ka ring, min tih zah dan a hre lutuk hi ka thin a tirim zawk.
Mahse a awm ve chu a ţha phian, sawi tur vak hre ve hek lo, an thil sawina karah chuan ka ţhu ngawi ve reng ringawt.
"Band ah chuan i tel dawn ta em?" Zuitei'n a tih chuan ka tel dawn tih leh naktuk zan aţanga zir an tih thu chu ka sawi ve a, Fakpuia hnenah, "I pha fel ta nge?" a tih chuan a lo bu nghut. Zuitei kaltlang zela inbia ang vel kan ni.
Ani pawhin Zuitei awm lai chuan min be duh bik miah lo, pawi ka ti lo zawk, Lalzuimawii a nghal thiam thei si, a haw hunah min chhaih nan a hmang leh palh ang.
Zuitei pawh a awm rei lo, a inkhung fel sawk sawk a,a kal dawnah,"Rei deuh leng suh ang che." a ti hram. Kei pawh ka nui ve tawp, a ţhianpa a ni bawk a, a ngam sak sak khawp mai.
Pakhat lahin, "Ka riah chilh nghal loh." a ti hluk a, Zuitei zawk chu nuih za ah a ţang a. "Ka warning vek tawh che kha." tiin an room lamah a lut ta a, thawm a reh zui duk mai. Engtin nge a warning ang le?
"Engtikah nge min chhan i tum?" a rawn tih takah chuan ka en ve hram. A zawhna chhang ta lo chuan, "Ti nge i rawn kal thut a?" ka ti a.
"Min chhang phawt rawh."a ti nghut. A meng rum ţhin ang reng si, kan inhma tawn lo hlauh chu lawmna tham a ni.
"Ka hre nang....." Ka ti vel mai mai, dik tak chuan U Hruaii an tih nen a an inhnaih dan hriat chian phawt ka duh. Thil ni lo lo a ka inbarh luh ka hlau.
"Hre thuai rawh, chu ti lo zawngin ka nawr thiam khawp ang che." tiin a kiai suk a, a inringtawk ţhin lutuk hi ka ngei lek lek. Amah ti amah tu a ni ve leh tlat mai bawk si.
"Ti nge i rawn kal thut?" Ka ti leh a, "Thut ah pawh ka lo ngai hleinem." a tih chuan ka ner nawk.
"Tak takin i sawi lawk si lova, i rawn lang thut a." ka ti ţha ve leh a, ka thil sawi ve laia min en uluk ţhin lutuk hian min ti zâm ru riau zel.
"Sawi lawk ngai pawh ka lo ti hleinem." a ti leh mai a, min chhang tawi thei bawk si.
Kan ngawi dun vang vang a, chutah, "Inleng dang ilo neih leh neih loh ka rawn thli thlai pah a nih hi." a ti hlawl a, a thu tak hmel zawng zawng nen chuan ka nuih a ti za ang reng.
"Thil nghah hi ka theih loh zawng tak a nia." awmze nei zeta a tih chuan,"Min nghak lo thei reng a lawm." ka ti ve nghat. Ka duh viau pawh a ni mai thei, mahse mahni induhtawk ve na ka neih te hi ka hman ţangkai a ngai.
"Ka thu thu." a ti ta hmuk. A lungawi lo hmel viau nain ka hlau tawh bik lo.
"Ka thu thu." a sawi ang chiah chuan ka sawi khum ve a, a ruk tak chuan ka nuih a za, a hnaiha ka awm a ka zam ruk ţhin zia ngaihtuah chuan tunah chuan zia tawh tak ka ni. A reh ta vek tihna a ni lo, tunah chuan ka fiam ve ngam tawh a, a awmdan tam zawk hi chu ka beisei loh zet zet a nih ţhin avangin ka nuih a za ru ţhin viau.
"Khatiang kha ching tawh suh." a ti hluk, ka hlau tawh lo nasa, fiam zel chu ka chak zual sauh.
"Midang nghah ka lo nei ve reng thei a sin." Ka tih chuan chiang zet hian min en a, dawt ka sawi leh sawi loh hriat a tum zawk nge mawni. Ka rilru te te chuan, 'nangmah i ni' ti a sawi zui mai chu ka chak.
"Nei suh." A ti nghut, a mit a la la sawn lo. Zuitei khan a bialnu ni tawh te chuan chet an la hmasa ţhin a tih tak kha maw. Hnawl ni a inngaih hrehawm zia pawh a hrethiam ve tawp nang.
"A neih loh theih ngawt hleinem. I lo lan hma a mi daih tawh a ni thei a, chuvangin i duh duhin ka rilru i thunun ngawt thei lo, mipa dang...." Ka ţawng lak lawh laia a din vut avang chuan ka ţawng tawp chawt.
Min rawn pan vutin ka ţhutna bân tawn tawnah a rawn invawn khalh a, min melh chhuk rûn mai. Tunah tak chuan a hmel awmdan hi ka hlau ve deuh. Midang ni phei se chu ka hlau tawh ngawt ang. Mahse amah a nih miau avangin tlanchhiat lam rilru ah a lang lo.
Hnai chet chawta min enin ,"Mipa dang chung chang ka hriatah sawi suh. Ka awm loh naah....ni lo, i ngaihtuahna aţanga paih chhuak vek tur i ni." a ti rum ul a, min warning na chu a va rum deuh ve.
Ka melh let kar a, ka sawi chhan bera kha amah a ni tih a inhre der mai si lo. Keimah lam aţang phei chuan mahni leh mahni inthik ang a ni.
Ka ngaihtuahna avang chuan ka nui chhuak palh a niang, "I la nui thei a." a ti chhur chhur a, ka hmui ka chîp rang lutuk ringawt! A va zia lo tak. Ka lu thing mat matin, "Awm ţha tawh la." Ka ti sep. Ka chhungte rawn lang thut thei reng an ni bawk nen hetiang a awm chu nuam ka ti miah lo.
"Min nawr lui miah suh,i ti sual ang."a ti leh nghut. A hma ai chuan a ţawng pawh hriat a nuam deuh. Sofa ah chuan tîm zetin ka ţhu a, ani lah chunglam aţangin min melh rûn bawk nen ka thinphu ri chu a hre thei ang tih ka hlau.
Ka malchunga ka kut pahnih chu ka insik neuh neuh. "Kan inhmuh leh ve leh i chhanna dawn ka lo beisei ang. Ka duh ang chhanna i neih ngei pawh ka beisei." ti lehin a ding chhuak a, ka thaw ru huai mai.
A awmdan hi ka sawi thiam dan chuan a ta sa ah min ngai niin ka hria. A induhtawk ve hle mai tih chu ka rilru ah a lian ber, mahse kei pawhin ka duh ru viau chu a ni si.
"Ka haw dawn min lo thlah rawh." a tih chuan rang zetin ka ding chhuak a, "I va phur ve." a la ti zui. Ka ner nawk ringawt. A sawi tur hriat thlak nge hriat loh thlak zawk ni.
Pawna kan chhuah hnu chuan, "Ti hian rawn kal ziah ila a ţha ang." te chu a la ti zui a.
Ka ţawng ve loh avang chuan, "Ngawi reng suh." a ti leh ringawt a, ava inti thu mai mai e aw.
"I inti thu a nih mai chu!" Ka ti hmak a, a nui ri hawk mai. A nuih chhan ber hre lo mah ila ka nuih a za ve chuang lo, a inti thu ţhin lutuk hi ka lawm lo ve ţhin hrim hrim.
"Ka bialnu i nih hunah phei chuan tun ai hian ka inti thu ang." la nui reng chunga a tih chuan ka ner vak ringawt.
"Chutiang a ho." Ka ti hram, a nuih a za zual sauh lehnghal. Chhan loh atan chuan a tlawm thlak ka ti ve ting tang ţhin bawk si, ka rilru a lo lang hmasa ber te hi chu an laktlak ţhin loh ngawt mai, min nuih vel mai mai a nia.
A hma zana ka thlahnaah bawk ka thlah leh, an kawt thleng ka va thlah law law dawn em maw ni.
"Muttui." ti a ka kal tur chu, "Kan inhmuh leh hmasak berah ka tih kha aw." a lo ti a, chhang loin ka let san daih. Ka zam ruk ţhin zia hi hria se chu min khawngaih ngawt zawk lo maw le.
Mut hmunah chuan mahni ka insik leh vak ţhin a,min duh ve tak tak ni a ka hriat avangin ka za cheng a ni ber!
Tukthuan ei laiin Zuitei'n Tana nupui neih tur chung chang a sawi a, nizan lam engmah an sawi zui lo chu ka lawm ru hle. Zuitei hian a hrilhfiah vek tawh a nih ka ring.
Zuitei sawi hmangah chuan thla thar ni 16 ah an innei dawn a nih hmel. Chutia an sawi fel thei chu ka lawmpui khawp mai. Ţhian kan nih ve naah an chanchin ka hre ve vek a, Ruatdiki te chhungkaw chung chang ka hre tel bawk a, an pahnih a an inneih an rem tih sak chu ka thinlung takin ka lawm pui.
Zirtawp ni a ni bawk a kar dang ang bawkin ka phur leh hle. Kartluana han buai ve hi chuan kartawp chawlh a nghahhlelhawm zual ka ti ţhin, kartawp chawlh ti hlu tu a niin ka hre bawk.
Zuali te chuan Fakpuia chung chang an sawi leh ang em tiin beng ka chhi kar a,ka hre duh tih an hria emaw ni tih mai tur a ni an sawi leh tawh lo reng reng.
Dawr pangngai nghak tu ber Zorini hi kan awmna area ah a rawn phei deuh reng ţhin a, kan kum a inrual tlang bawk a kan inkawm thei hlawm viau.
Chhunchawlhah pawh a ngaite bawkin thlanglam ka hawi thla leh, ka rin loh lutukin Lalfakzuala ka hmu! Chu pawh a la rawn hawi chho zui a!
A hla deuh nain T shirt dum a hak chu a inhmeh leh hle tih ka hmu thei. Ka tum loh lutuk a ka hmuh avang chuan ka en reng a, min rawn hmu ve em ka hre lo, a chhan pawh ka hmuh tirhin a rawn hawi chho sa tlat a, midang daih pawh a lo en thei.
A kekawr ipte zena rawn hawi chho reng chu hmu mah ila ka luh san ta tho, tih theih vak awm hek lo. A morning wish lah ka like tawp a,han wish let ve mai kha chu ka tîm tlat. Tlema zah loh theih ve deuh hlek ka ngai a ni, ti ringawt chuan ka ti ho zo vek palh ang.
Ka luh hnu lawka Sangsangi rawn chhuak chu rang zetin a rawn tlan lut leh, ka lo hrethiam ru kar mai sia.
"Ka hmu ka hmu! Zual! A rawn hawi chho lehnghal!" a ti chung chung a, Zuali leh Zorini an ţhutna aţanga an tho nghal chu, "Chhuak ve rih suh u! A hrethiam palh ang! A zahthlak! Ui mahse a nuam reuh e....min rawn hmuh ve ka ring tlat." a ti chung a! Zuali te lah chuan chhuak chiah si loin an bih thla a, chutah, "A lut dawn chiah." an tih chuan Sangsangi a tlan phei leh, an va nuihzatthlak hlawm tak.
Hman aţanga ka duh tawh kha a ni ve tho a, anni chu dem ngawt thei ka ni lo. Ka bialpa ni se, ka bialpa a ni tih hria se engtin nge an awm ang le tih ngaihtuah mai mai chuan ka nui var var reng a, ka thil ngaihtuah an hre thei lo chu a va han lawmawm tak em.
Chutia an hmuh fuh takah chuan an sawi zui leh ta chiam a, ka rin rilruk ang ngeiin UHruaii an tih chu an sawi chhuak leh chiah.
Zorinin,"UHruaii chu a chhelo viau nain a duh ve ka ring lo, ani te chuan nula hnahkhat a hmu zo dawn e...." a tih chuan ka pawm pui khawp mai. Ka rilru te te chuan 'ka rilru ang pu mi' ah ka dah hmak.
Zuali'n,"UHruaii te chu a zei dawn e....zah vak a hre dawn si lo. A chhelo ve tawk tih a inhre dawn bawk si." a ti ve a, ka lo ner ru nawk.
Customer an rawn lan takah chuan an sawi zui ta lo. Zingah khan a ruala kal turin min rawn ti ve ngei, ka lo hnial nghal. Kan hnathawhna a inhnaih viau nain a rual chuan ka kal ngam rih lo. Vawiin a ka thawhpuite awmdan aţang hian ka lo hnial chu ka inchhir lo hle bawk, zawhna an ngah dawn hian ka hre lutuk.
Zanah chuan kan group Band inbuatsaihna ah chuan ka kal ve ta ngei. Ka lo huphurh ang aiin a zia phian, an fel hlawm bawk si. Hla an la thlang fel lo a lo ni, keimah min ngaichangin ka sa chhin hlawm phawt ang a, ka aw nen a inmil an tih ber an thlang chawp zawk dawn a lo nia. Music an tum nghal zel bawk nen a nuam ka ti ta phian.
A tan tirh zan a ni bawk a hla kan thlan fel hnu lawkah kan ţin a, a in hnai ber ka ni bawk a thingpui inah te ka'n sawm khawmawi ve a, zan danga inah min hnar ta hlawm.
In ka thlen chuan phone ka ban nghal a, Fakpuia message pawh a lo awm ve rân mai. Phone ah hian kan inbe zing lem lo, phone ka khawih tam lutuk loh ang tho hian a khawih tam lutuk lo ve tho in ka hria.
"Ţha deuhin i ti dawn nia." A lo ti ve ngei, zanin a kan practice tur kha a lo la hre ve a niang. A rawn thawn lai hi chuan a hnathawhna aţanga a haw ka la ring lo.
Ka chhang ang em aw...ka tih lai chuan a rawn online a, "I haw tawh em ni?" a rawn ti, "Aw" tih tawp ka thawn a, hetia min ngaihven ve hian nuam ka ti em em chu a ni sia, hmeichhe dang lo inrawlh lo hram rawh se.
Biakfela message chu ka reply leh, Ruatsanga khan a hrilh tawh a nih ka ring, a thusawi a dang thei riau, min ngaizawng tih ka hriat avangin ka be zen zen lo, a message pawh ka rial rei thei viau.
Zan tir lamah khan lo len a tum thu a sawi a, ka chhuahna tur ţha deuhin ka hrilh ve mai kha a nia. Phone ka keng lo bawk a min rawn chhan lehna pawh ka hre hman lo.
"Karleh lamah Ruatsanga nen kan ka rawn leng ang." a lo ti a, chhan pawh ka phur viau lo. Ruatsanga hi chuan a hnial leh dawn sa tih chu ka hria, mahse amah ber hi a rawn kal leh duh mai thei.
"Bialpa lo nei suh ka tih kha ka tlai hret a ni maw.". A rawn tihna kha ka chhang let lo kha a nia, mipa puitling ni a, a thil han sawiah huat viau tur a awm lo, a pangngai hlawm viau. Mahse min be lo law law se ka lawm zawk ang tih tur vel a ni.
"Ruatsanga'n a peih chuan le." tih ka thawn a, a online ve tho avangin a hmu nghal thuai.
Kan chat aţanga ka out chuan VanLalfakzuala hming hnuaia, "Tu nge i biak?" tih lo awm chu hmuin ka ner sak.
"Ka duh duh." ka tih chuan min lo chang ni hmiang, a seen nghal a.
Hawrawppui a, "MALSAWMPAR" a rawn tih chu a ri ka hre thei hialin ka hria, ka nuih a za viau bawk.
"Min ngai viau suh." Ka va tih chuan, "Ngai e." a rawn ti leh mai a, ka thawn hmaa ka lo inngaihtuah nawn lo chu ka inchhir nghal bawk! Keimah bawk chu ka zak leh. Delete leh a mawi si lo.
"Ka hria e." tih ka thawn ta ngawt, min chhan let dan tur thaw dep dep hian ka ngaichang.
"Vawiin kha chu ka ngaidam ang che." a rawn tih chuan ka hrethiam lo hle, question mark ka thawn ringawt.
"Kan inhmuh leh hmasak berah ka tih kha." a tih takah chuan ka hre chhuak chiah. Chhunah khan min hmu ve tihna. Zinga a ruala kal tura min sawm te kha ka chhanna hriat a duh tawh vang a nih dawn chiah hi.
"Ka nghak rei tawh che." a rawn ti leh a. Chhan mai dan tur ka hre lo.
Chhang loin ka offline ta daih. Biakfela message pawh ka en tawh lo.
Inrinni a ni bawk a Zuitei nen in kan tifel a, kan han insu tak tak chu in kan su fai hi a ni ringawt, suk theih zawng zawng chu kan su vek a tih theih ang. Mahse mahni a ti kan ni lo bawk a a hahthlak dan pawh a zia deuh. Nu erawh keini in kan awm ve ni a ni bawka tiin vengdang a a ţhiante tlawhin min len san thung.
Dar 1 a rik chuan kan tizo fel thawkhat tawh. Chhun thil ei an sawi chuan dawra ei chhuah ka rawt a, ka siam chu ka ei chak rih hlawl lo a ni.
Kan venga dawr hnai berah chuan kan kal a, Zuitei'n a sawi ve ziah an dawr chhaka zirtirtupa kha kan hmu hlawl mai. Kan eitur kan order laiin a ni nghe nghe.
Kan bulah a rawn ţhu thla ve a, a hmel en chuan keini ai u a ni tih chu a hriat theih.
Zuitei bulah ţhuin kan venga a rawn kal chhan a zawt a, an school thil pawimawh ah kan venga a thawhpui te in a rawn kal a tum a lo ni. A kalna tur an in tak a hriat loh thu a sawi chuan Lalzuimawii a lo che rang nasa.
"I hmanhmawh loh chuan min lo nghak la, ka lo kalpui ang che, Pi Manuni te chu ka hre lutuk a lawm." a ti var a, "Hmanhmawh lo e, ka lo nghak ang che u. Min kalpui theih chuan a lawmawm ngawt ang." a lo ti ve a. A hming pawh Chda, mahse ka rilruah erawh Seia tih ringawt a awm nghet tawh.
Kan thil order an rawn chhawp hnu chuan Zuitei'n a ei zung zung a, Chda chuan chhun thil ka ei tawh a tih avangin engmah a ei ve lo.
Ka kal ve kher a ngai lo tih ka hriat chian em avangin muangchangin ka ei. Zuitei chuan a ei zo vat ta reng a. An chhuah hnuah pawh muangchangin ka la ei.
Thil hi ka ei zung zung thei lo ve hrim hrim. Inrinni a nih vang nge a lûn lutuk lo a, a hmun a thengthaw nuam bawk si awm rei pawh ka pawi ti lo, mahni pawhin hrehawm ka ti lo bawk.
Thlanglam hawi a ka awm veuh veuh hnua ka hawi chhuah chuan VanLalfakzuala rawn lut tur ka hmu a, amah chauhin a ni lo, Elii nen khan.
Hmeichhe dang satliah ni lo, a bialnu hlui nen ka hmu dun leh chu keimahah hian che zawk a awm. Ka kun ngal a, min rawn hmu ve ang tih ka hlau. Ka thil ei lai chu ka ei mawlh mawlh.
Ka hmaa chair chu an pawt ri rak a, amah bak a nih ka rin loh avangin ka hawi chhuak duh lo. A rawn ţhu thla a, ka en duh chuang lo.
"Hetah hian em ni i thut dawn?" rawn titu pawh chu Elii a ni tih ka hria, ngaihsak duh lo in ka thil ei lai chu muangchangin ka ei lui char char. Ka hmu dun peih lo.
"Aw, amah hi ka bialnu tur chu a nia." a ti a nih chu! Ka thil ei lai ka hâk nghal bawrh bawrh. A ţhutna aţanga tho vutin ka hnungah na lo te tein a chum dat dat a, tissue chu banin min pe a, ka la ve mai.
Tui a thlit chu min pe bawk a, ka inzui khawlh khawlh.
"I zia deuh em?" a tih chuan ka bu nghat, ka bula chair awlah a ţhu zui zat. Chutia min buaipui lai chuan kan bulah Elii kha a la ding ve reng. Kal sawn thuai se ka ti rilru hle bawk.
"Uzuitei cousin kha i ni tiraw?" a tih takah chuan ka hawi chhuak ve ta hram, "Aw ni e." Ka ti a, ka aw a la chhuak ţha thei lo.
"Ka order an peih tawh a ka kalsan ang che u." Polite taka tiin min kian san ta, a chanve vel chuan thaw a veng e.
A kal hla ta maw tihah chuan, "Eng vangin nge khatiang a i tih kher a!?" Ka ti hlak a, ka lung a awi lo thawkhat tih chu a hrethiam ve ang.
"Sawi dik loh ka nei hleinem." a lo ti mai a, a thawven hmel em em mai lehnghal.
"I â em mai a." Ka ti hap. Ka ti tak tak, khatiang a midang bula insawi te chu ka tan a zahthlak lutuk.
"Ei zo la chhuak teh ang."a tih chuan ka tho nalh a, counter ah kan table number sawiin ka chhuak zui nghal, Zuitei'n min pek kep vek tawh.
In lam panin ka kal hlawk hlawk a, min rawn zui ve zel tih ka hriat chuan ka lungawi lo zual. Khatiang a min sawi kha ka lung a awi thlawt lo, ka zuamawm viau zawk nge maw ni.
In chhung ka luh rual chuan a rawn lut ve nghal a, "Kawtah Zuitei ka hmu a, i awmna min hrilh a ka rawn kal ve nghal." tih pahin sofaah a ţhu thla a, ţhut ve tumna pawh ka nei lo, a piah deuhah chuan ka ding reng.
"Elii ka chhan dan avanga i lungawi lo a nih chuan ka tih palh." a ti sup, a rawn ding chhuak nghal a, ka hmelah ka lawm lo viau tih a hre ve chauh a ni mahna.
"Ka bialnu i la ni chiah bawk si lova." a tih te hlei hlei chuan ka thin a tirim tlat a nih chu! Keimah zawk hi ka rilru a kawi viau a nih ka ring.
Sawi ve tur ka hre hlawl lo. Chutia ka ngawi reng chu ka hmaah tak a rawn ding a, hawi pawh ka hawi chhuak lo.
"I lungawi lo viau em ni?" a ti a, a inthiam lo ve deuh tawh pawh a ni mai thei.
"I tan hian ka zuam awm viau em ni?" ka ti ta nge nge, amah pawh ka en chuang lo. Ka lo zuamawm viau a nih pawhin a thiam loh a ni chuang lo ang, keimah hian ka duh em a, chu mi inveng zo lo chuan a laka ka awmdan a ti danglam viau ang a, atan ka sih hnip hmel viau pawh a ni mahna.
Ka ngaihtuahna avang chuan ka rilru a no ta tlat, ka thinrim ve na khan ka hnuk a ti no zo a, ka tah a ti chhuak tun mai. Hmeichhe zuamawm taka min ngai bik tur chu ka duh lo tak zet.
"Chutiang chuan ngai suh." a ti sup, kei ka lo ngawi reng.
"Zuamawm viau ta la tunah hian ka nghak hauh lo ang che. Ka zep lo hmeichhe dang pawh ka ngaihzawng an lo ni tawh, mahse ka bul ţan an ni ngai lova, chuvangin ka laka i danglamna hi ka lan chhuah tir thiam lo pawh a ni mahna. Mahse ka duhna che hi ring rawh, i laka ka chet dan atthlak tak tak te hi mipa dang laka chan che ka hlauh vang a ni tih hria la ka duh bawk." A ti a.
"Min en teh." tiin ka bek tawn tawnah a rawn vuan a, amah en thei turin ka hawi chhuak ve ta hram. Dawt a sawi lo tih ka hmu thiamin ka hria.
"Min ring em?" A ti nghet churh a, a mitmengah chuan amah ring tura min duh zia a lan tir ni mai hian ka hria.
"Aw" ka ti chhuak thei hram. Ka hnaih taka a awm hi chuan ka zam em em reng zel.
Ka chhanna avang chuan a kiai suk a,lai zetin ka hmui ka pet ringawt, ka hmui ringawt a thlir reng tih ka hriat chuan ka lungphu a rang sauh, ka ngaihtuahna ang hi a thlen tir dawnin ka hria.
Ka zam lutuk chu a hre thei hialin ka ring, chutia a en reng lai chuan, "Va let tawh rawh." tiin a awmah ka nam a, ka kawngah chelhin amah si chetin min pawt hnai hmiah.
"A nem nghehna a ngai." Nui suka tiin a kut lehlamin ka biang a dawm a, ka hmui a rawn si nghal zat. Ka ţek chhawk ni mai hian ka hria.
Tumah ka la fawp ngai miau lo, ka lo dawh ve tawp. Mahse hrehawm ka ti lo tih erawh ka chiang ngang mai.
Inlahrang hlekin ka kawngah a hmer salh a, ka chalah a chal rawn nghatin a thaw hulh a, "Min chhang ve rawh." a ti sup,a awm zawna ka kut ka nghah miau avangin a lungphu rang ve dawt dawt chu ka hre thei.
"Ka thiam lo." Ka ti halh a, kan inhnaih bawk si awm ngaihna ka hre lo.
"A pawi lo, i hmui lo ti che ve rawh." ti supin min fawp lehnghal a, a sawi anga ka tih chuan a phur sawt ni mai hian ka hria.
Min fawp reng chung chuan hnunglamah min nawr dat dat a, bang ka sik takah chuan duhthawh zetin min fawp a, ka kawng a chelh lohna lam chuan ka nghawng a tuai hauh hauh bawk.
A inla hrang ta hram a, "Kha chu ka zawng chhang khawp ang." a tih chuan a kawngah ka ţham vak a, a lo nui hawk.
Zuitei rawn let hma chu a awm ve ta reng a, ka lâi hûihin ka hria. Ani erawh a danglam vakin ka hre lo.
In chunga puan pho ka seng pawhin a rawn kal ve zel a,min pui ve mai bawk.
Lalzuimawii rawn lut chuan, "Ka lo let hma inti awm." a rawn ti lut phawr phawr a, a va han ngeiawm thei tak.
A haw phei hma chuan, "Ka thutluknaah hian ka chiang a, ka vawn tawh ka thlah mai mai ngai lo. Ka thutiamah ka ding reng dawn a, ka thutiam min sawhsawn tir theitu chu nangmah bawk i ni. Nangmah a rinna ka nghah ang hian min ring turin ka beisei bawk che." tiin min thlah a, ka ngaihtuahna a ti thui viau mai.
End of chapter 13
❤️
Comments
Post a Comment