BLUEMING 🦋
BY UNKNOWN BELLE
CHAPTER - 14
Zan inkhawm turin ka insiam a, Fakpuia pawh ka sawm ve thlap. Ka rin ang ngeiin min hnial.
A pi boral hnu aţanga a inthlahdah zia hi ka hre ve reng,amah chîk ru reng reng a hun hmang tan chuan hriat a har lo. Eng emaw tala puih theih ka chak hle bawk.
Inkhawm ban a in ka thlen chuan Ruatsanga leh Biakfela an lo awm reng mai. An sawi lawk bawk si lo chu ka hamhaih ve deuh.
An ţhian dun chuan nuin a lo kawm a, room lamah inthlak sawk sawkin ka chhuak zui nghal.
"An rawn luhna pawh a la rei lo, thingpui han lum la." Nuin a tih chuan Ruatsanga'n a lo hnial vat, "Lum duh suh,invengah kalna tur kan nei a,kan let leh lam kan rawn leng kawi mai mai a nih hi." a ti a, Biakfela pawhin a lo tuihnih ve zat.
"Thingpui in chhung a rei hleinem ka va lum lawk ang." tiin chokaah ka luh san thuai. Ruatsanga hian zan lamah anu a chhuahsan zen zen ngai lo, a pawimawh viau a nih ka ring.
Thingpui ka lum tan chiah tihah kawngka an rawn kik a, nuin lut turin a chhawn thuai. Ka thinpui lum chiah ka ngaihsak avangin tu nge tih lam pawh ka en lo.
"Khawnge Sawmpari?" ti thum dût ri chuan min ti vir zawk. Ka va dah phei chuan VanLalfakzuala chu a lo ding rûn mai. 'Zanin chu ka lo kal lo ang' ti khan min hrilh ve ngei sia, pawimawh a awm em maw ni le.
Nuin,"Saw thingpui a lum saw, va inlum kep tir ve mai tawh." a ti mai a, a rawn hawi phei chuan min hmu ta thuai, thaw huai hmel a pu a ka hriat ni.
Ka lam a rawn pan lai chuan, "Pawimawh a awm em ni?" Ka ti a, a chhan pawh midang awm ve laia a fala min biak kher a duh hmel niin ka hria.
"Awm hran lo." ti vutin chair a pawt chhuak a, a ţhu zui nghal. Ka lo en reng tih a hriat chuan,"Min lum kep rawh." a ti zui sup a. Bu nghatin tui ka leih belh ve mai bawk. Ţhu ve ta lo chuan ka thingpui lum bulah ka ding a.
"I rawn kal dawn lo emaw tia." Ka tih chuan a tarmit vuah la thlain a mit a nuai nawk nawk a, tarmit a vuah hian a lang upa sawt. Mahse a inhmeh riau ang lawi a.
"Assessment ka la buaipui zo lo." a tih chuan, "I rawn kal kher duh a nih chu." ka ti thuai, a hna thilah phei chuan lo tih buai ka duh lo.
A mit nuai zo a khabe dawm a rawn hawi chhoin chiang zet hian min en a, "An Bike ka hmu a ka rawn phei." a tih tak supah chuan awih lo fe hian ka en reng.
"Inkhawm inbang tawh bawk sia." a ti leh dût a, eng hi nge maw a ngaihtuah ni.
"Thingpui hi in thuai la i hna va thawk zo vat rawh. Anni pawh an rawn peng kawi ringawt a lawm." ka ti a, thingpui ka ngaihven san zui ta daih. A ţhutna ngaiah a la ţhu reng a, lehlamah ka ţhiante ve tho an ţhu bawk nen heta a rawn phei kher chu a ţul ka ti lo viau bawk.
Thingpui sem chuan choka aţangin ka chhuahsan a, Zuitei pawh a room lamah hna a thawh avangin ka pe ve nghal bawk. Tray ken lai nen let lehin ka thingpui tur ka la zui a.
"Phei ve ang." Ka tih chuan a thingpui chawiin mim zui be mai bawk a. Single sofa ah chuan ka ţhu a, nu ţhutna bulah a ţhu thla ve bawk.
Biakfela pawh mi puitling chin a ni bawk a, nu nen pawh an titi thei viau. Ruatsanga erawh a ţhu ngawi ve reng. Anu chanchin te ka zawh takah chuan a ţhat tawh thu leh rawn len a chak thu te chu a sawi luam a, Nuin,"A dam ţhat ve leh lo len pui thuai tawh, hmuh ve pawh a chakawm a lawm." a ti ve hlut a. An chanchin ka hrilh ve ber anni bawk a hmel hmu lo pawhin a hre ţha viau ta ve ang.
Thingpui an in zawh hnu lawkah an haw ta a, ka thlah dawna min en rûn tu chu ka hmu lo der ringawt. An Bike dahna thleng ka thlah a, Biakfela chuan, "A va che rang ve, in inhnaih em ni?" a ti a, Fakpuia a sawina a ni tih ka hriat avangin an in awmna chu ka hrilh ve mai.
In mangtha zuiin ka luh san a, Fakpuia rawn lang kher chu a ţul viau lo nain tikhan Biakfela'n a hriat chian phah ang a a lawmawm letling phian ka ti ta zawk.
In chhung ka luh hnuah choka lamah pheiin no ho ka sil a, Zuitei no va la lehin Fakpuia pawhin choka lamah min zui phei ve leh tawh. Nu mit mei a veng vak lo tih a hriat mai. Ani lahin min ngaihsak hmel a pu der lo lehnghal. TV ah YouTube channel hrang hrang a en kual a, a bik takin Mizo nu hnamdang pasal nei te video a en nasa zual, tunlai nu ho hian an intihhmuh ve hrim hrim zawk nge ni, ka nu pawh khan a en nasat thu a sawi.
"Va let tawh rawh tih tur ila ngah kha." No sil paha ka tih chuan ka bulah a lo ding ve leh rûn a. Min vil te pawh a ang zawk.
"Ka bialnu i ni tih thu hi i chalah hian hreng la a ţha ang." Thu tak zeta kuangkuah hluna a tih chuan ka nui chhuak hak, a va inhmeh lo ber tak!
"Min duh ve thu pawh i la sawi lo." a ti ţha leh, a nui ve duh miah lo lehnghal. A lungawi lo tak tak chuang lo tih chu ka hria.
"Sawi ngai loin i hre tho a lawm." Ka tih san a, no rem felin chair ah chuan ka ţhu thla leh, ka bulah chiah a rawn ţhu a, "I sawi duh ang ang te sawi thuai la let tawh rawh, naktuk Sunday a ni si." Ka ti a. A ni lah tak a, a awmdan en hian eng emaw sawi duh nei sawi mai thei si lo a ang.
"Min duh thu i ka ngeia i sawi ka hre duh." a rawn ti mauh mai! Amah chu ka en ţhin, a thu tak bawk si, a naupang chhia riauin ka hre bawk. Eng emaw min ngen te pawh ni awm a ni.
Nuin kan thusawi a hre phak em enin ka va thlek a, a thil en lai chu a en ring ang reng si, min rawn ngaihven vak lovin ka hria.
"Ti nge hetia i awm a?" Ka ti ta thlawt, "Naupan chhiat thlak lutuk." Ka ti zui a, a lo rum nghut.
"Ka naupan chhiat leh chhiat loh te chu i hria a lawm." kiai suka tiin ka malah a kut a rawn nghat a, min ti phu nasa lutuk! A kut chu lak sawn tumin ka dawm vat, a hmer tel a, a za ka ti.
"I â lutuk min thlah teh!" Zawi vin zet chuan ka ti hlak. A tha a thlah dul ve hram a, ka thaw deuh huai. Mahse ka malchunga a kut awm rûn mai chuan mim dip tham tho. Ka thawk lak a ti buai.
"Min duh thu min hrilh la ka haw ang."a tih tlat chuan hahthlak ti fe hian ka thaw hap a.
Vawiin tlaiah khan kan sawi Chiang viau tawhin ka hre sia,ka duh thu chu ka hrilh miah lo, mahse ka cheziain ka hnar loh zia ka lan tir tho a, thu a sawi chhuah kher te chu a zahthlak awm em mai.
Ka ngawih tak tlatah chuan, "I sawi loh chuan..." tiin a ngawi zui daih a, "Eng nge ka sawi loh chuan..."
"Ka fawp hrep ang che." A tih chuan insum hman loin ka nui chhuak hak. Zanin hi he pa hi midang daih a ang. Nge ni a he a mize pakhat hi ka hre ve ngai lo zawk! A ţawngkam hmanin min ti hlim phian zel lawi a.
"Ti nge ka sawi kher a ngaih?" Ka tih chuan,"Ka hriat duh avangin." a lo ti leh nghut tawh.
Amah pawh en lem lo chuan,"A zahthlak mai mai." ka ti hlak a. A ţhutna aţangin a tho ta vut, "Ka va haw phei ang e." Pangngai zeta a rawn tih chuan min ti hamhaih khawp a, ka en hau ringawt.
Choka aţanga chhuakin Nu hnenah chuan a haw tur thu hrilhin a mangtha a, min ngaihven tawh miah lo a chhuah a tum chu Nuin ngaihdan dik lo a neih ka duh loh avangin ka zui ta thuai.
Pawnah pawh chuan min ngaihsak lem lo chuan a kal nul nul a, a awmdan chu nuam ka ti tawh miah lo.
Zan danga ka thlahna thleng tho chu thlah leh tumin a hnungah ka zui ve leh tawp. Vawiin aţang chauha inngaizawng ve si, kan boruak chu a dangdai khawp mai.
Ka thlahna ţhin a thlen hma chuan rawn hawi miah loin,"Va lut tawh rawh." a ti a, a ţawngkamah lungawi lohna a neih leh neih loh ka hre thei bawk si lo. Ka let san ang nge san lo ang tih ka hrethiam lo hle.
Let san lo chuan ka zui ve ta zel a, ka awm ve tih hre lo ang maia kal tlang a tum chu a hmaah ka va ding tawp. Hetiang a min awm khum chuan ka muhil thei pawhin ka ring lo, ka rin thu zeldinin ka mengrei leh vek dawn.
"Thinrim lo la." Ka'n ti ringawt a, "Ka thinrim hleinem." a ti mai a, a ţawngkam leh hmel ka ngaihtuah ngial pawhin lungawi lo a angin ka hre si lo.
"Ka duh ve che tih te chu ka awmdanah i hrethiam vek tho a, sawi chhuah kher kha ka zak ve a lawm, hmaichhanah lehnghal...." a tir lamah chuan ka ţan hmunah ka chiang viau nain min en uluk lutuka a tawp lam chu a zuih ţha lutuk.
"Midang an awm lo chung pawhin maw?" a ti sup a, chutia a sawi takah chuan ka inthiam lo zo leh vek.
Hawi kual zak zakin ka pan hnai thut a, "Ka duh che, tuma hnena ka sawi ka inring ngai lo. Chuan nangma hnenah chauh ka sawi bawk ang, ka duh tak zet che." ti zung zungin a inrin hmain a biangah ka chuk zauh a, ka tawlh hla nghal vat. Ka hawi kual leh a, tumah an lo kal lo hlauh! Ka thinphu lah chu a la rang em em zui.
Amah ka en chuan hnuailam en hian a nui suk a, ka chetdan khan a nuih a ti za a nih pawhin ka dem hran lo, kei erawh ka zak tawh lutuk ringawt!
"Nui lo teh, a nuam ka ti lo a nia." ka ti ta nge nge a, a rawn hawi chhuah chuan nuam lo ka tih zia ka hmelah a hrethiam a ni mahna, a nui tawh lo. Mahse ka awm a nawm phah chuang lo. Ka chetdan kha min nuihzat ni a ka ngaihna a awm tlat a, ka zak ru ngawih ngawih tawh.
Ka zak tulh tulh a, ka sa vek tawhin ka hria. A hmai chu tawk zauhin,"Hmai ka phih miah lo ang." a tih chuan ka nuih pawh a za lo. Khuk ral daih ka chak.
"I tan sawi a harsa tih ka hria a lawm." a tih chuan ka thin a rim nghal tun mai. A hre reng ang, khatiang thu kha ka tan sawi chhuah mai mai a harsa, ka sawi ngam pawh a ka rin ngai loh a ni bawk. Chu ti chung chuan min phut lui tlat bawk si a nih kha.
"Ka tan i sawi chhuak a, min ti lawm hle mai." a tih leh chuan ka ner nawk tawh. A chet dan vel chu a inti eng emaw riaua ka hriat chu a!
"I ţhianpa te pahnih kha hnaih tam lo la ka duh." a tih chuan ,"Ti nge? Min ring na nge?" Ka rilru a lo awm hmasa ber chu ka zawt nghal.
Mipa dang rilru ka va thunun sak thei lo a, Biakfela pawhin min lo ngaizawng pawh ni se ka ngaihzawng ve loh miau te chuan kan inkar a tibuai phain ka hre lo, min ring zo lo a nih te ka ring deuh.
"Bul kan ţan chauh nain, i ţhiante pahnih kha hmuh tam lo la ka duh." thu tak zet hian a ti leh a. "Min va ring awm lo ve." Ka tih chuan, "Ka ring che, anmahni zawk kha ka ring zo lo." a ti nghet churh a. Ka lo hrethiam lo hle, an pahnih a a hmer tel zel chu a tullo ka ti viau bawk.
Ruatsanga nen chuan ţhian kan nih miau avangin a ngaih ang rilru a put loh tur zia chu hrilh ka duh, mahse ka chhan leh hmain ,"Va let tawh rawh, rei an lo ti tawh ang che." a tih takah chuan chhang ta loin ka bu nghat a, in mangthain ka lut zui ta nghal. Engtikah emaw chuan Ruatsanga chungchang chu ka la hrilh leh tho ang, Biakfela kha chu ka sawi buai peih lo law law.
Ka luh leh hnuah Nu hnenah ka mut zui tur thu hrilhin room ah ka lut a, vawiin thil thleng ho zet chu! Ka hriatrengna aţang hian an bo mai maiin ka ring lo.
**
Hun a liam ve zel a, Zuitei'n Tana te inneihna a hak tur puanthan kan dawr a mi en turin min chah a, an duh zawng ka hrethiam chiah bawk si lo chu dawr chhungah video call in kan inbe reng a, puanthan ka en kual dan dan a, hmeichhe lamin puanthan chikhat hmang veka ţhui hak kher an tih avangin pakhat duh an induh pui lo zel mai bawk si, a chang leh an invîn a, a chang leh kan nui ang bawk bawk a.
UDongi leh Kimtei pawh rawn haw an tum ruh khawp mai. Kan vai a video call ah phei chuan a bengchheng lutuk a thusawi ber a hriat hleih theih loh. Buangi chuan naktuk dawr khar hnu lama rawn en mai a rawt ta a, kan pawm tlang ta hram. Zuitei leh Buangin an thlan ang ang kha kan hmang mai dawn a ni.
Tukin chu midang ai ka thleng tlai a, Zuitei rual a ka kal loh vang a ni pakhat. Fakpuia rualin ka kal a, chu pawh aman kal tura min tih deuh tlat avangin. Ka thlen ve leh ţhiante nen kan inbe nghal bawk nen ka hnathawhpui tur te hian zawhna an ngah tih ka hre reng. Mahse phone ka hman nghal avangin min be buai duh rih lo mai mai a ni.
Phone ka dah fel chiah tih a ka ţhutna tur lam ka pan chuan min lo en ţhap hlawm a, ka nuih an ti za ru viau.
"I ngaihzawng a ni tih sawi miah suh." Sangsangi'n a tih nghat chuan tlêmin ka tîm ve deuh. Kha ti chen an star thu an sawi tawh a, engmah ka sawi ve ngai bawk si lo nen a ţhawng hlawm viau dawn tih ka hre sa si a, an hriat huna ka sawifiah dan tur pawh ka ngaihtuah lawk diam tawh.
Kan inngaihzawn thu leh vengkhat kan nih thu te chu pangngai takin ka hrilh hlawm a, inzep thei min ti lutuk chu an chek tlak tlak.
Zuali'n,"Ti nge engmah i sawi ve ngai loh?" A ti khauh, "Min zawt si lo a lawm." ka ti ve mai a.
Zorini thung chuan, "In inhmeh tawp." a lo ti daih a, ka nui ve sak. Chutiang thu hriat chu a nuam ka ti khawp mai.
Sangsangi'n, "Malsawmpar! Ka ngei tho tho che! Ti nge a hma daih te khan i sawi loh!" A ti hlak hlak a, a lungawi lohna chu ka hriatthiam pui avangin insawi khalh tumna pawh ka nei lo.
"Min inhmelhriat tir ve thei." A tih tak hlakah chuan kan nui leh ta vek.
Kan pahnih chung chang ngawt chu min zawt seuh seuh reng a, a ţhen phei chu chhan ngaihna ka hre lo.
Kan inzuina a rei tawh em tih min zawh chuan a la rei loh thuin ka chhang ringawt. Karthum a tling awrh a nia,han sawi vak tur awm hek lo.
"Engtin nge i thlem thluk theih zawk?" Sangsangi'n a tih chuan Zuali'n a lo khap vat. Sangsangi hi chu ri phawng phawng chi a nih ve hrim hrim avangin engah mah ka ngai lem lo.
"Sawmpari leh i hmel enkawp la i hre mai ang." Zorini'n a tih chuan Zuali nen kan lo nui dun hak hak, Sangsangi erawh a phun hlak hlak, a thinrim tak tak lo tih kan hre tho a kan en liam thei viau.
Zorini bawkin, "UHruaii nen an inngaizawng lo tih ka hriat phah a a lawmawm daih zawk." a tih chuan Sangsangi'n,"Ni chiah, UHruaii ai chuan nangmah ka la duhpui zawk tho." a ti ve vat a, UHruaii an tih hi ka hmu leh ngai tawh lo a, a chung chang phei chu ka ngaihven ngai ta miah lo.
Amah hi ka rinhlelh enah pawh ka en lem lo, kan inkawp na a la rei lo viau a, boruak dangin min chim lo bawk nen a hahdam thlak phian.
Kan inhmu zen zen bik lo, tukina a ruala kal tura min tih kher chhan pawh kan inhmuh khat vang a ni deuh ber. Zanlamah a haw hma vak ţhin lo nen rawn len nan chuan a tlai ve deuh tawh ţhin a, ka inkhawm loh zanah hman remchan laiin KTP group night a mi tur inbuatsaihin ka chhuak ve leh bawk si, mahse mut hma hi chuan phone call in min rawn be ve ziah zel. A ngaih ţhat nan a niang chu ka ti mai a, WhatsApp ah kan inbe ţhin tho, mahse type neuh neuh a peih vak lo a niang min lo call leh nge nge ţhin.
Amah ka star ruk hunlai nen kan boruak a dang tawh bawk a, ka duh duh ka sawi khum a, ka nileng hun hman dan te, amah ka zawt ve bawk a, min rawn call tu zawk ni ţhin mah se ka thusawi ho deuh deuh pawh a ngaithla reng zel. Chutiang te te chuan min ti hlim ve em em a, mipa dang chung changah chuan a ham strict em em mai thung a, a bik takin Biakfela leh Ruatsanga hi a sawi chhuak ve ziah. Ruatsanga chu ka ţhian a nih zia leh ani pawhin thian ang baka min en loh zia hrilhfiah ka tum ngial pawhin kei ni loin Ruatsanga zawk a ring lo tlat mai a, han nawr luih vak ngaihna a awm bawk si lo.
An in a ka kal leh dawnah amah hrilh hre ngei ngei turin min chah bawk a,"Ka tello chuan i kal tawh lo ang." a ti bur, ka hmin zan lo nain a thu hnial chu ka duh bik lo.
Kan inngaihzawn hnuah hian vawikhat chu min lo sawm leh tawh, kha mi tum kha chuan leng ve hrim hrim tura min rawn chah an ni ber, mahse group meet kan hman zawh hma chu hun awl ka neih ka rin loh thuin ka chhang a,an lo awih ve mai. Dawt a ni lo nain thudik pumhlum a ni bik chuang lo, a chhan pawh band a tel tur te hi hman kim loh chang te kan nei ţhin a,karkhatah tum hnih vel chauh kan zir hman ţhin.
Thawhlehni zan a ni a, Nu Kohhran hmeichhe inkhawm na lamah a chhuak a, zanriah eikham hnu lawkah Zuitei pawh an bungraw chah buaipui turin Buangi te inlam a pan nghal a, a rei loh tur thu chu sawi mah se a lo let har tawh ka ti hle. Mahni chauha in ruak ruiha awm chu a nuam chiah lo.
Kawngka kik ri ka hriat chuan ka room aţangin ka chhuak thuai a, kawngka kik ri ka hriat theih nan room kawngka hawngin thawmhnaw ţhui tur ho ka buaipui kha a nia.
Zuitei a nih tawh ka rin laiin Zuata a rawn lang hlawl.
"In va reh ve khaw'nge midang?" a tih chuan an kalna ka sawi a, ţhu tura hrilhin ka room kawngka ka va khar leh rih. Ka va phei ve chuan,"Ka leng chhuak khat deuha ka rawn kal mai mai a nih hi." a ti a.
Kan ţhian mipa hoah chuan ka nel leh ka ngamtlak ve ber a ni bawk a, keimahni chauha inkawm chu hrehawm ka ti lo.
"Fakpuia nen hian in ţha zel em?" a ti a, ka bu nghat, sawi zui vak dan tur hre hek lo.
"In pahnih inkar hi chu a tir aţanga hretu ka nih ve angin thu tlem hrilh lawk che ka duh a." a tih chuan eng lam ber nge a sawi ang tiin ngaihtuahna a vak kual ruai hman.
"Sawi la, ani te chu i hrechiang ber ang chu." Ka lo ti ve a.
"I hre tho ang a, mahni induhtawkna pe lian ve tak a ni tih chu. I hmu thiam em chu ka hre lo a nun a ruak riau awm hi. Tette aţanga inkawm tawh kan ni chung hian hriatthiam loh lek lek chang ka ngah, midang zawng ai pawhin ka ngaihven bawk. Ngaihzawng te pawh a nei ve ţhin tho a, mahse chu ti chung pawh chuan khawhar hmel taka mahni a tal rek rek a duhna a reh phah ngai chuang lo." a ti a, a thil sawi ho chu uluk takin ka ngaithla a, hriat belh tur tam tak ka neiin ka ring.
"A pi boral hnu phei hi chuan Kohhran a bel tam lo zual, a chhungte hi chuan an nawr na ngam lo, a ni lo lama a tuan an hlau tlat mai a. Mahse kei chuan chu chu ka ring lo, ruihhlo lamah hian a fihlim tawk tih leh a rin ngam zia ka hria, ka ringhlel chhin ngai lo. A hrehawm leh ipik lai ber pawhin ruihhlo a tuan tumna a nei ngai lo, chu'ng ai chuan tuma tih buai theih loh na hmuna awm bo a duh zawk ţhin." a ti dap dap a.
A pi boral lai khan chutiang chuan ka hmu, ka ngaihtuah deuh avangin Biakin lamah khan ka zui ve tawp kha a nia, mahse eng thil ţha lo mah a thlen tir lo.
"A rilru puthmang sawi chhuah hi a harsat tlat ţhin. Inhawng taka biak ka tum pawhin sawi chhuah loh a thlang tho mai ţhin a, heng te hian amahah a hriat miah lohin nghawng a nei a, ama thlirna tlang aţang chauh a thil zeldin a hrat a, a ngaihdan dik ber ni a ngaihna a nei lian ţhin hle bawk. Elii nen an inkar buaina pawh kha chu vang chu a ni pakhat." a ti a, a miziaah rin dan chin tawk lo nei ţhin mah ila hetia a sawi chhuah takah chuan amaha zawhna ka neih ruk ţhin te a fiah uar mai hian ka hria.
"Elii nen a an inkar vel kha ka hre mumal miah lo, an inthen chhan tak pawh. Sawi i hreh loh chuan min hrilh thei em?" tiin fimkhur zetin ka zawt a, mi chanchin hre chak hmel taka lan ka duh lo, mahse Fakpuia tel tawhna hi chu ka ngaihven kar zel zawng a ni.
"Kei tak pawh min hrilh duh lo. Elii kaltlang a ka hriat zawk a nia, tunah an inkarah engmah a awm tawh chuang lo bawk a sawi hreh tur a awm chuang lo." a ti phawt a, sawi zawm lehin ,"Elii ţhianpa David-a hian Elii hi a ngaizawng ve tho a, mahse ani chuan Fakpuia hi a duh zawk miau a, a thlang zawk ta reng a. Mahse Elii chuan David-a chu a ţhian a nihna angin a kawm zui reng tho a, David-a khan ngaihzawng a nei tih hre reng chung pawhin a hel reng zel tho, Elii tan pawh tih ngaihna vak a vang ve ang. Chu miah chuan Fakpuia hian Elii hi a ring lo a ni bik lo, mahse Elii kha chance vawikhat pawh a pe lo." A ti a, a thusawi chhung zawng chuan ka lo ţang ru ţeuh a, ka rit tunin ka hria.
"Elii birthday party na a thil thleng vel ni khan a sawi a, Elii khan a sawi fak duh lo nain Fakpuia rilru let thawk na tur a nih chuan ho mai mai chu a ni lo phawt ang."
"Sawi tawh angin Fakpuia hi chuan a rilru a siam fel tawh chuan a hrehawmna tur pawh ni se a thutlukna a sawh sawn tawh ngai lo. Elii insawifiahna kha a ringhlel tlat bik pawh a ni kher lovang, mahse a induhtawkna vang chauh pawhin a hnar tho ang." a ti a, ka thaw huai thei.
"Chuan Elii chu a beidawng zui ta mai em ni?" Ka ti hram a, hriat chian viau ka duh, a chhan pawh hmanni deuha ka hmuh dun pawhin pangngai takin an inbiaa, an inkarah engmah lo awm lo a nih leh a ţha a ni mai a, thil tul lo lo ka lo thik kual ang tih a hlauhawm.
"Um.... Elii sawi dan kha chuan mimal taka inhuatna kan nei hran lo a tia, a dik pawh ka ring. Fakpuia enin amah bumtuah ngai mah se mihring mihrinna a hmelma en duh tur chi a ni lo. A duh viau chung pawha a thlah hmak thei a nih chuan mahni inringtawkna a nei lian thawkhat tih a hriat mai a. Elii pawhin a rilru sakhat lutuk a hneh thei dawn lo a a hriat khan David-a a kawp zui nghal a, a chhan pawh a thik a rin vang a nih thu te kha a sawi a, thudik a nih leh nih loh phei chu ka va hre pha chuang lo a." a ti leh a.
"Tunah Elii hian a la duh i ring em?" Ka ti leh hram a, ka zawhna chu a ho viau nain Elii chana indah chuan a fair loh na riau a awm vein ka hria.
Kum êm pawh a vei hmain kei nen inzawmna min siam pui leh a, a ngaihtuahna aţanga a paih chhuah nghal vek chu ring chiah lo mah ila hmeichhe dangin a rilru luah lo se ka duh.
"Ka hre lo, duh ve tho mai thei. A beisei ngam tawh lo pawh a ni thei." a tih chuan ka bu nghat a.
"Elii sawi chu thudik a nih chuan ti nge an inkar i rem sak mai loh? Elii tan chuan a fair lo i ti ve lo em ni?" Ka ti a, ka rilru tak tak a ni bawk. A ţhianpa a nih angin a thutlukna siam dik loh avanga hrehawm taka hun hman tir ai chuan a Inrawlh mai kha a pawina ka hre ve lo.
Ka zawhna vang chu nge ni a nui ringawt a, a khawi lai kha nge nuihzatthlak ber pawh ka hre ve lo.
"I lo lan dawn vang te pawh a ni mahna." a tih chuan ka ner nawk ringawt. "A ngaihven che tih ka hriat aţang khan a tan a ţha ber tur i niin ka hria, ka ring sual lo tih tun hnaia a awmdanah ka hre bawk." a ti a, tun hnaia a awmdan danglam vak ka hre ve lova, a sawi awmzia ka hre chuang lo.
"Tak takin hma hunah eng nge lo thleng dawn a hriat loh a, buaina neuh neuh pawh inla tawk ve mai thei bawk, hmeichhe ţhenkhat lakah chân dawn angin inhre mah la amah i rinna tichhe lo la ka duh. Ama hrehawmna tur pawh ni se a thlah lui hmak thei a nih chuan i rinawm chhung chu a tawrh ngai pawh ni se a chelh thung che." a ti a. A sawi tum a ril viauin ka hria, ka rilruah ka chhinchhiah nghal thlap a, ka la ţangkai pui mai thei a sin.
Rei ţhu tawh lovin kalna tur a la neih thu sawiin a chhuak ta a, kan titi tui luatah thingpui lo sawi hmuh na chang pawh ka lo hre lo. A chhuah dawn a ruaiah ka'n sawi leh hnuhnawh a, "A leh pekah a ni mai tiin kan inthlah ta ngawt kha a nia. A zia lo reuh tak tak a ni.
Rei loah Nu inkhawm bang a rawn haw a, Zuitei erawh min rawn biain an la rei deuh tur a rawn sawi thung.
Room lamah ka inkhung ve leh chawt. Ka phone lo ring tluk tluk chu ka ban thuai a, ka chhan rual chuan, "I va chhang har ve min ti hlauthawng dawn a lawm." a rawn ti hluk a. Phone call chhan har vang ringawt a lo hlauhthawn viau mai chu a ho ka ti ang reng, a rilru ka hriatthiam pui loh vang a ni ber ang chu.
Room lama ka dah avanga ka hriat lawk loh thu ka sawi chuan,"Pawnah ka awm." a rawn ti a.
"Lo lut la, Nu pawh a inkhawm bang a lo haw chiah." Ka ti a, mahse min hnialin, "In ka la thleng lo, ka hmu chak che a." a tih chuan lai zetin ka ţhen vak ringawt.
"Lo chhuak lawk la, a rei lo ang." a tih takah chuan ka chhuak ve mai a, Nu hnenah ka kalna tur ka hrilh chuan ,"Lo lut ve mai se aw..." a lo ti ve a, "A hnathawhna aţanga a rawn haw lam a nia, a pawimawh viau a niang ka rei lo ang." tiin ka chhuak zui a. A zawng zawng chuan hre ve lem lo mah se kan pahnih inkar hre chiangtu te zinga mi a ni bawk a, min ringtawk ve viauin ka hre bawk.
Bike ah a la ţhu reng a, a helmet a lo pelh tawh. Ka pan hnai zel a, ngunthluk zetin min lo thlir leh tawh, ka lai deuh hûih zel. Ka nui var var a, ani pawh a kiai ve suk mai. A helmet chungah a leather kutkawr a dah tih ka hmu nghal zat.
"Haw phei thuai la i lo leng leh zawk ang a." A bul ka thlen ruala ka rih chuan ka kut veilam a ban vut a, la kangin a fawp zauh. Hei hi tunlaia a chin thar ka ti dawn nge, rei tak kan inkawm hman ngai bik lo nen kan inhmuh chhunah hetiang a chet hi a hrat. A nuam ka ti phian mai bawk a.
"Ka ti buai mai mai ang che, kartawpah law law." a ti a, ka kut chelh rengin a tuai hauh hauh a. In lamah thawmhnaw ţhui tur ka nei ţhin tih a hriat ve tho avangin min tih buai a hreh a, a lo len loh phah fo. Mahse a sawi angin kartawpah chuan ngei ngei a ni thung.
Thil hrechhuak thut niawm takin a jacket ipte chu a zen rak rak a, keychain a rawn phawrh hlawl mai. A naute lem inkhai lah chu a te chhe loin a thau tut mai bawk si a, rawng var leh senno chauh inpawlh a ni bawk a a lawmawm reuh lutuk.
"I ta tur." tiin ka kutah chuan a hmeh bel a, thilpek min pek vawikhatna a ni bawk a, ka roh dawn lutuk tih ka hre nghal.
"A van cute ve.... Ka rin loh lam daih." tiin ka en kual a, hetiang min pek nachang a hria chu mak ka ti deuh. Thilpek inpek hi ka duh dan a ni chiah lo a, ni bik thil a nih te chuan thuhran a nia, mahse hei chu thil lian tham a ni chuang lo bawk a lawm takin ka lak sak.
"Ka hmuh hian ka hrechhuak tlat che a." Tiin a nui a, kei pawh ka nui ve tho. A chhan pawh naute lem chuan keimah ang chiahin sam kir chiat a nei a, ka sam rawng nen a inang viau bawk.
"Ka lawm e..." tiin hawi kual thuakin a biangah ka chuk zauh a, rang zetin ka inla hrang lehnghal.
"Kan zei sawt viau e." A'n ti ngei a! Ka lâi awlsam lutuk tih a hre laklawh a, ho te te a min chhaih laih a hrat chho khawp mai.
"Hun thawl hek hawk neih a chakawm hle mai." Mitmeng ti zim sun a min enin a biang a tawk ngei a, a inti zei hi ka lo ti khawp a.
"Chutiang a ho, haw tawh rawh. Ka lut dawn." tiin ban vai zauhin ka kalsan nghal daih. Nu khan rei min lo palh ang.
Ka chhan dan avang chuan a nui hawk a, "Ka lo bia ang che." a ti nawn leh. Hetiang hian kan boruak hi awm reng se ka ti, ka duhthusam a ni.
*
Thla thar kan chuangkai chho a, Ţana te inneih hun pawh a hnai ve zel, ni 16 pawh karleh mai a ni tawh. U Dongi leh Kimtei pawh an rawn haw tawh a. Kan inah kan inkawm khawm a, kan thawm a ţha thei viau mai.
Fakpuia nen a kan chanchin pawh an hre ve vek a, an ngaihdan ka hre lem lo nain mi pangngai tak an ni hlawm a, thu hriat nuam lo an sawi lo. AZela hian min chhaih a hrat em em a, a bak hi chuan a hma a kan inkawm khawm ang reng khan boruak dang siam lovin min kawm ve leh mai.
*
Naktuk Fakpuia piancham a nih avangin muthilh mai chu ka tum lo, kan inbiak tawpna a rei tawh nain ka mut hmunah chuan ka harh reng a.
Eng emaw tal pek ve ka duh avangin naktuk pawh chhunchawlha bazar ve tum ka ni. Mahse pek mai tur ka hre lo hle thung. Mamawh ang zawng phei chuan mamawh a neih pawh ka ring lo zawk.
A piancham hi ka hriatna a rei tawh a, Zuitei kaltlang a hria ka ni. Kha tih hunlai kha chuan kei chu min la hre ve lo thung. Piancham te hi ka chhinchhiah theih ve zawng tak mai hi a nia, ka hriat tawh chu ka theihnghilh zen zen lo. Zuitei erawh a piancham ngawr ngawr a hria a, kei chu sawi loh anu leh pate piancham tak ngial pawh a hre reng thei meuh lo.
Sana ka en sek a, dar 12 a rik ve leh ka va call ta pawp. Ka inngaihtuah ţha leh a nih chuan ka tum ka ţhulh leh mai dawn tak ngial a, chuvangin rilru a lo lan ve leh a chet lak pawp mai hi ka inhmeh ber tawh.
Rei a ring hmain min rawn chhang a, a aw aţang chuan a muhil ka tiharh niin ka hria.
"I piancham ka lawmpui che, muhil leh rawh, mutui le." ti zung zungin ka dah leh daih. Ka lungphu rang hman zia chu! Ka chet dan chuan a ţhawng leh viau mai thei a ni.
A rawn call let leh ta ngei, a mutui lai ka tiharh awm sia ka inthiam lo leh deuh. "Ti nge i dah nghal daih a." a rawn ti a, a hma ai chuan a aw pawh hriat a nuam ta deuh.
"I mut a chhuak dawn sia, i muthilh duh ka ring a." Ka ti ve mai a, kei erawh ka harh ţha khawp mai.
A nui ri suk a, a mut chhuak deuh nen chuan a sexy riau hian ka hre pek! Ka ngaihtuahna mai mai chu le!
"Nang i mut a chhuak tawh em?" a ti a, ka harh tulh tulh thu a ka chhan chuan ,"Ka lo men pui ang che." a rawn ti a, a thusawi ho te avang a ka hlim zia hi hria se engtin tak min ngai ang maw.
"Naktuk hna a kal i ngai dawn si, muhil zawk rawh. Kei pawh ka muhil lehnghal thei mai ang." Ka tih tlat chuan min nawr lui bik lovin kan inbiakna kan ti tawp a. Ka muhil leh mai thei chuang lo. A piancham tuk chiah hi ka piancham ve tho a nia,a hriat ka ring lo, hrilh tumna em em pawh ka nei lo, ka tisual lo turah ngai ang.
Zingah pawh thawh ka hai ta reng a, a rual pawhin ka kal ta lo. Min nghah a tum tlat nain Zuitei punin Zuitei ruala ka kal mai tur thu ka hrilh ta ngawt a, thawh ka hai chian em avangin min hrethiam ve thoin ka hria. Ka thawh hai chhan amah bawkin a hrechiang tho.
Chhun chawlh chu remchangah lain ka bazar a, dawr aţangin ka la chhuak hla lo tihah Ruatsanga ka hmu hlawl mai, tunlai chho kan inbiak khat zia ka hre thar uar uar. Ka bialpa neih tak avanga ka ţhian ka thlauhthla ta daih anga inngaihna ka neih chu ka duh lo viau bawk.
A pu a nawmsam loh avanga a office peih loh avangin ani pawh a lo chawl ve a lo nia. Helamah eng nge a rawn tih ka zawh chuan, "Ka hman remchang bawk a ka nu thawmhnaw tur ka en kawi lawk ang chu ka tia." a ti a, kei pawh thil lei tur ka nei ve tho tiin kan inzui ta a, a remchang phian.
Anu thawmhnaw tur chu ka thlan pui a, ka awm chu a lawm ve ngawt ang ka ring. Awm lo ila chu a zuar tute sawi ang ang a lak tawp duh hmel. Mipa thawmhnaw zawrhna lamah ka hruai ve ta thung a. Ka thil lei a hmuh chuan zawhna min zawt lem lo mah se a hriatthiam ve tho ka ring.
Necktie dumpawl duk nalh ka tih deuh mai leh T shirt nghawng nei ka lei sak a. T shirt nghawng nei hi mipa hian zan inkhawm na a hak mai hi an uar riau a, ani pawhin a inhmeh ka ring.
Chhun thil ka ei tawh tho nain kal san daih chu a mawiin ka hre si lova, ka ei pui leh te te a, chu mi hnuah kan kal hrang ta chauh. A nu chu min lo biak turin ka chah ta luam a, a sawi duh tak tak ang emaw.
Dawra ka let leh chuan ka ţhiante pawh an lo buai ve leh map map tawh a, ka thil lei ho chu min zawt chik lo hlauh.
Tlaia ka haw hnuin ka thil lei ber ka theihnghilh zui a, bus a chhuak tawh tihah din tir lehin ka tlan let leh nal nal. Haihawt luatah ka hah phah zek lehnghal.
Ziah riah kan ei hma deuha ka biak na chu inkhawm ka chhuah dawn thleng chuan a la seen lo a, a buai deuh pawh a ni mai thei. Zan mut hmunah te a nih ngawt loh chuan message kan in reply zung zung lem lo. Mahni hnaah kan buai ve ţhin tho bawk nen heti lamah chuan kan inhrethiam viauin ka hria.
Ka inkhawm kal tur chu Zuitei'n, "Vawiin Fakpuia piancham em ni?" A ti heu mai, a nih thu ka hrilh ve mai a, "I inkhawm banah chuan a lo haw ve tawh ang a, lawm turin va leng ila, midang pawh kan hrilh dawn nia." A ti zung zung a, ka pawm pui ve mai. Ka thil lei sak pe tur a amah hmuh chu ka tum ve hrim hrim tho.
Inkhawm banah kan inhmu dawn tho tiin phone pawh ka keng lo, Biakin ah hi chuan a ţangkai nep ve em a ni. Emergency thil te chu awm bawk mah se ka silent leh daih emaw ni kha a ni ang a, nih loh leh ka phawrh ngam dawn chuang lo a, ken loh law law mai hi ka duh ţhin.
Zanin ber kher chu Band a tel tur ho kan lo inkhawm kim ţhap mai a, kan incharge ber UApuia chuan ka inkhawm bang Biakin aţanga ka chhuak chu min lo chang a, rei lo te tal zir an lo rawt a lo ni.
A solo tur berin phat bik ngawt a mawi si lo, rilru a helh dang nei rûnin ka han zir ve ta poh a. Karkhatah vawihnih te kan zir ho thei ţawk a ni ţhin si a, tun anga lo phat kha a nuam bik lo ve bawk.
Midang ho tih tur nei ve tho an lo nih avangin kan zir rei lo hlauh, sana kal muang ka tih ber tum a niang.
Kan zir zo ţawngtaina kan hman zawhin midang pawh nghak lovin stepah chuan ka tlan thla hlawk hlawk a tih theih ang. Mahse ka ke veilam ka chhehsual avangin stepah chuan ka lum ta mai! Vanneihthlak lutukin thui erawh ka lum lo hlauh.
Min hmutu an awm lo hlauh chu tihzia ka ti hle. Mahse ka ban rek veilam leh ka ke ka bilh lam ber chu a na reuh zek. Ka kiu emaw khûp bawr pawh a thip ţha viau mai.
Ka rilruah thil dang a khat hneh bawk a ka kut leh ke na pawh ngaihven lovin ka inbeng fai sawk sawk a,ka puan bih pawh chawi sangin inlam pan chuan ka kal bai salh salh.
End of chapter 14
🤫
Comments
Post a Comment