BLUEMING 🦋 CHAPTER-15 BY UNKNOWN BELLE

BLUEMING 🦋

BY UNKNOWN BELLE

CHAPTER - 15

An in kal pelin kan in ka pan nghal a. Ka kal bai deuh chu Nuin a chhan min lo zawt vat, chhuah thuai ka ngaih avangin ka tluk thu leh ka a nat vak loh thuin ka chhang ringawt.

Inthlak mai lovin phone ka ban leh phawt a, "Inkhawm banah ka lo kal ang." tih ka thawn kha "Awle." tih zawng hian min reply a, min chhan dan chu dik lo leh ngaihkawih tur awm lem lo mah se ka hlim phah chuang miah lo. Eng emaw dang ka beisei ruk vang a ni ber ang chu.

Zuitei message a lo awm leh a, inkhawm ban ve leh a phei ve tura min tihna leh kan ţhian dangte pawh an awm thu a lo sawi a, a tir aţangin ka awm ve lo lak lawh tawh bawk si chu ka phei hreh khawp mai, in hruai tir ngawt chi a ni si lo.

Ka thawmhnaw chu ka thlak a, ka puan chu room chhung ênga ka en chiang chu a lo paw khawp hi a lo nia, Nu tan kha chuan a ngaihthat thlak loh ve viau ang chu.

Ka khup leh kiu chu a pilh a , ka kiu pilh chu a thip ka ti viau mai. Ka ke pawh chu na lutuk ni si lovin ka rap ţha ngam miah lo, mahse chu'ng zawng ai chuan ka banrek veilam ber chu a na ka ti. Ka dawm vang vang a, engtin nge a awm ka hrethiam lo. 

Phei ve loh mai chu ka rilruk a, mahse ka lo sawi lawk ve vek tawh bawk si. Chubakah ka lan ve kher kha a lo phût ve thei tho, rei ka awm lo mai ang ti rilruin ka insiam ve ta hram.

Mahse ka kut mawlh chu ka chet ţha thei lo, ka phone tak ngial pawh ka keng ngam lo. A na tawh reuh lutuk. Chuvangin kal vata let leh vat chu ka rilruk ta ber.

Fakpuia chu biak lawk ka'n tum ûk a, ţhian ho a awm an ni dawn tih ka hriat avangin biak loh chu a fuh zawkin ka ring.

Nu hnenah chuan ka kalna tur hrilhin ka chhuak a, in aţanga ka chhuah chuan ka thaw huai. A chhan pawh ka kaldan aţanga ka ke na a hriat chuan zawhna a ngah dawn sia, ka rei mai mai dawnin ka hria.

Na lutuk ti a sawi tur ni chiah si loin a nuam lo ang reng, ka bilh na vang a ni tih ka hriat tho avangin ngaihthat lohna ka nei chuang lo.

An kawt aţang chuan inlam chu muangchangin ka pan chhat chhat a, pawn aţang chuan an thawm engmah a hriat theih loh.

Kawngka inhawng sa in parda zar chu ka keu a, ţhutkhawmna area lamah chuan thawm an lo nei hak. Ka lut ta tho a, choka lam pana ka kal chu Zuitei rawn chhuak nen kan intawk hlawl.

"Rin ai i rei daih a." a lo ti a, hla kan zir leh zawk thu ka hrilh ve thuai.

"Lo kal rawh va phei ila." a tih chuan choka lama lo awm ve ka duh zawk thu ka hrilh a, eiin tur buaipui dang an awm tho avangin a lo pawm ve mai.

"Amah ka rawn tir ang." tiin a kal sawn a, ka thil khai ve ting tang chu dahna tur ka zawng ruai. An in hi a te chhe lo bawk a an awmna lam thawm chu hre ţha viau mah ila anni chuan min rawn hmu thei kher lo.

Chokaah chuan ka thil khai nen ka lut phei a, UDongi leh Bektei an lo awm. Min lo be sawm thuai a. 

UDongi'n, "I lo thleng tawh bawk a pudding i siam thei." a lo ti var a, ka kut a nuam lo bawk nen ka siam theih pawh ka ring chiah lo.

"Thildang inpeih hlawm tawh em ni?" Ka tih chuan Bektei'n, "Peih thawkhat chu a ni mai, mahse an la ei peih lo a." a ti a, ka bu nghat.

Ka ke a nuam chiah lo bawk nen ţhutna ka hmuh ve leh ka ţhu thla thuai a, UDongi'n pudding siamna tur a chhawp malh malh bawk. Ka thil siam tui a ti ţhin bawk a, min phur viau pawh ka dem hran lo.

Chutia ka ţhut lai chuan Fakpuia a rawn lang a, min hmu chu a hlim phah vak pawhin ka lo hre lo, ka ngaihbel zawk nge ni.

"Hei i ta tur." tiin ka thil khai chu ka pe thuai a, "Ka lawm e." ti supin min en zawk a, UDongi te lam hawiin an buai leh buai loh a zawt a, UDongi nen an inbiak dan aţang chuan aman tul lo a ti chung an lawm sak lui tih a hriat theihin ka hria.

"Lo phei ve rawh u." tiin a chhuak zui a, ka beisei anga min dawngsawng lo chu ka lungawi lo dawn dawn mai ka ti. Ka beisei sang viau zawk nge mawni. Midang ngaihah chuan engkim a lang pangngai vek, mahse keimahah hian a pangngai miah lo tih ka hre thung si.

Ka tlukna vanga ka taksa nawm loh vang te chu a nih ka'n ring ringawt a, ka rilru hi ka ti no riau a ka hria chu ka duh lo. UDongi'n pudding siam pui a min sawm chuan ka tho chhuak ve leh tho a, buaipui ngai emaw midang aia che tawi bik nih ka duh loh avangin ka inthup ve hram hram.

A hma pawhin a buaithlak pawlah ka lo ţang fo tawh, ka duh vang renga thleng a ni bik lo nain ka tih sual palh emaw ka fimkhur loh vang a ni leh nge nge ţhin. Chuvangin rilru ti no vak thei ni pawhin ka inhre lo, ka tawrh tur ve reng a ni tho a, mahni hian tuar mai ila, midang ka tibuai lo zawk ang ka ring.

Ka kut veilam chu ka hmang ţha ngam lo tih chu a hre ta thuai tho a, "a nuam lo ve deuh mai mai a nih hi." ka tih ve tlat avangin ngaihtha deuhin a thil tih lai a tih zawm a, ka che ţha thei miau lo a, ka pui thei mang chuang lo.

"Siam chhung a rei dawn chuang lo, va phei ve daih rawh. I kut a nawm loh phei chuan." Bektei'n a tih chuan UDongi pawhin phei ve mai turin min ti a, mahse phei ve chu ka chak hlawl lo.

"Kan phei rual dawn nia." tiin an bulah chuan ka ţhu ve ta reng a, ka kut chu ka lek ţha thei tawh der lo. A na deuh ut ut tawh bawk nen haw daih mai chu ka duh.

Zuitei a rawn luh rual chuan an zai ho tur thu leh phei ve turin min rawn ko a, Bektei leh UDongi pawhin an tih fel deuh vek tawh avangin phei an lo tum ve tho. Ka nawm hlawl loh avangin ka lo hnial ta ngawt.

UDongi leh Bektei an phei ta maw tihah Zuitei chu biain ka tluk thu chu ka hrilh ta tawp."A va zia lo ve, i insawh na em? Ka hmuh tirh che khan na nei i ang ka ti reng a!" a lo ti nghal a, ka nui ringawt. Ka hmelah a hriat theih pawh ka ring tak tak lo e a.

Ka insawhna lai vel ka hrilh chuan a lo ngai serious leh khawp mai. "Damdawiin kan kal mai dawn em ni?" a ti thuai ta reng a, ka hnial vat.

"Damdawiin kal ngai khawp a ni lo. A zia ve leh mai ka ring. Mut phawt ka mamawh a niang." Ka ti a, an zinga tel ve chu chak tho mah ila ka taksa hian a zuam tawh lo a ni ber.

"Lo kal rawh ka haw pui ang che. Fakpuia kan hrilh dawn nia." a tih chuan ka hnial leh, Fakpuia hrilh kher chu a ţul ka ti lo. A hun hman ka tih chhiat sak mai mai ang.

"Keimah pawhin ka haw thei, ka ke phei chu ka kal pui thei tho. Ka banrek hi a nuam lo deuh a ni mai. Ti hian ka va haw mai ang. Midangin an lo zawh che leh a nuam lo deuh ti mai rawh, ka tluk dan vel sawi chu a zahthlak mai mai, ka che fel lo ţhin ang reng si." Ka ti zui mawlh mawlh a. 

"Haw pui i ngai lo tak tak maw?" A tih chuan ka ngaih loh thu leh ngaitha deuha hun hmang turin ka chah hram. Kum khatah piancham vawikhat chauh kan nei a, Fakpuia pawh a ţhianten an lawm sak a nih chuan hlim deuha hun hmang turin ka duh. Nichina a awmdan aţang phei kha chuan ka awm ve leh ve lohin awmzia a nei vak hmel pawhin ka hre lo.

Kawngka bul thleng chu min thlah ta tho, ka ngen nasat em avangin Fakpuia pawh hrilh a tum loin ka hria. Ka nawm vak loh thu a sawi chuan an awih mai ang, ka nawm loh chhan erawh tumah a hrilh loh hram ka beisei.

Muangchangin ka kal chhat chhat a, stepa ka lum kher kher chu ka thim a rim tûnin ka hria. Ka beisei anga thil a kal loh vang te pawhin a ni tel tho, a bul berah chuan Fakpuia awmdan kha a ni. Ka hrethiam chiah lo nain ka awm nawm loh nan chuan a tawk viau a ni. 

In ka thlen ve leh Nu hnenah chuan ka kut leh ke na chu ka hrilh ţha leh a, "I ban hi a ulh deuh a ni lo maw?" a tih chuan a hma aiin a na sawtin ka hria.

Ka awmna hmun khan a zir lo em a, a na viau chung pawha tihlan vak rem hek lo, ka khua te a ti sik er er thei dawnin ka hria.

"Vurin kan dep ang a, kan tuam lum dawn nia. A zia ve leh mai ang." a tih takah chuan ka thaw huai thei.

Vur chuan min deh sak a, a hlim chhawnah ka buaipui lo bawk nen a na zualin ka hria. Min tuam sak hnuah nachhawkna ka ei a, ka mu zui ta daih.

Ka ke pawh ka rah lekna vangin a na deuh a, a ruh a khawih pawi a rin loh thu a sawi a a thusawi chu ka ring ve leh hmiah. Min tuam sak tel a, ka ngaih a ţha huai thei.

Ka mut lum takah chuan a na chu a zia viau a, a hma ang em em chuan a tur na tawh lo, mahse awm nuam lo tawk lek chuan a na tho.

Ka muhil thei lawk lo nen phone ka ban a, ka rin lawk loh lutuk a thil a kal avang chuan ka thaw leh hak ţhin. 

Phone banin WhatsApp ah ka lut ta vel mai mai a, Kimtei status ka en chuan an hlim hmel hlawm viau a, an zai lai a ni bawk nen a nawm hmel khawp mai. Ka tel lo pawhin an hun hman a nuam dawn tho tih hre mah ila ka hmuh takah chuan ka rilru a hnîm ve rûih thei.

VanLalfakzuala lah chuan min ngaihsak miah lo tih hriat fe hian guitar a perh a, hun nuam tak hmang tur chuan ka duh, mahse ka awm ve lohna a nih avang nge ka hlimpui thei thlawt lo. Chubakah eng emaw awm tlata hriatna ka nei bawk nen ngaihthat loh na ka nei ru tlat mai bawk. 

Mahse nakinah hun thawl neiin kan la inhmuh leh theih mai ka ring a, chuvangin phone kaltlang a va zawh chiam mai chu ka ngam rih lo.

Online lo mah se ka be ta tho a, ka haw hma daih avang chuan thupha ka va chawi ve ngei. Ka rilru kawih ve hrim hrim vang pawh a lo ni thei a, inbiak loha lo tlâk ve rikngawt chu a dik loin ka hria.

Nachhawknain min chhawk ta bawk a, ka muhil ta thuai. 

Ka phone riin min tiharh leh a, ka banna theihnghilh a ka chet chuan a na zawk mai! Ka harh kawk maiin ka hria!

Phone ka en chuan Fakpuia hming a lo lang a, dar 1 a lo ri der tawh. Tun anga min lo bia a nih chuan a pawimawh viau a nih ringin ka chhang nghal thuai.

"Hello?" ka tih chuan min chhang leh lawk si lo, ka hrawk hnawk chu ka thian leh te te a.

"Hello? Ka ţawng i hre thei lo em ni?" Ka ti leh.

"I va mutui tawh awm ve." a rawn ti a, chutiang sawi tur ringawt a min lo bia chu a ho ka ti khawp mai. Ka kut leh ke na theihnghilh ţhakin ka mutui tawh kha a nia.

"A tlai tawh a lawm. I la mu ve na nge?" Pangngai takin ka ti a, a aw ka chhuak kha a zuai riau mai khan ka hria. Ka ngaihbel mai mai pawh a ni mai thei.

"Ka muhil thei lo." a rawn ti sup. A thaw leh hawk a, eng emaw vei rûn nei a ang.

"I piancham an lawm sak che chu nuam i ti em?" tiin ka zawt a, nuam taka hun hmang tur chuan ka duh tho nain ka tel ve lohna a nih miau avangin nuam a tih thu hriat chu a phurawm fahran lo.

"I haw daih a a nuam lo." A ti ve ngei, ka ţhen sak. Ka rilru tak chuan ka awm ve leh ve loh hre hmel pawh i pu lo tih let mai chu ka duh.

"Nuam i tih sawt zawk ka ring a sin." ka ti fiamthu a, a lo rum nghut mai. 

"Inhmu ang." a ti a, zan rei a nih chu thuhran, ka kut leh ke avang hian chhuah chu ka peih lo.

"Zan a rei tawh.....bakah.." ka ţawng lai chu min lo pawt chat a.

"Pawnah ka lo nghak ang che. Rei lo te tal." tiin a hmet tawp zui daih. Ka hnial leh chu a hlau awm hle mai.

A piancham pualin kan pahnih chauha inkawm na hun kan nei loh hrim hrim avangin rei lo te tal inhmuh chu ka pawi ti bik lo. Ka piancham a ni ve nghal tih pawh a hre tawp nang.

Ke bai salh salh chuan ka chhuak a, ka ke bik chu a zia tawh lutuk, kan tuam lum ve hrim hrim avang leh duh ang thâl a ka rah ngam loh avangin a lang na hmel mai mai niin ka hria. Mahse ka kut ber chu dim a ngai reuh lutuk. Ka ti che vak ngam lo. Han awrh êm chu ka duh bik si lo, dahthlak tawp hian a tur deuh tlat bawk nen ka ban ka tawm reng ringawt.

Dîmtêin kawngka ka hawng a, hetiang a chhuah rûk hi duh lo viau mah ila 'tun chauh' tih rilru pûin ka chhuak ta hram. 

Kan kawtah chuan min hnungchhawnin a lo ding reng tawh. Ka pan phei zel a, an in a ka kala a thawmhnaw hak kha chu a lo thlak tawh. 

Ka thawm hria a a rawn hawi phei chuan ka lo nuih var a, min pan vutin ka kut leh kê tuam lâk mai a hmuh chuan a hmel danglam zawk chu ka hmu thiam. Ka ke phei chu na lutuk a ni lo bawk nen na hmel deuha a hmu chu a zia lo khawp mai.

"Engtin nge i inhliam a?" a ti vut, ka kut a rawn dawm zui a, pawi ti hmel deuhin a en vung vung. Min ngaihsakna ka dawn hian ka hlim em em zel mai bawk a.

"Hla kan en zo kha ka rawn hmanhmawh lutuk a, step ah ka tlu." ka nui lui kher bawk, che fello min ti leh viauin ka ring, min hauh leh mai ka rin avanga nuih tlawn ringawt pawh ka ni pakhat.

"A na em?" a tih tak supah chuan a nat tawh loh thuin ka chhang thuai a, inthiam lo hmel taka a awm chu hmuh nuam ka ti lo.

Ka ban tih nat hlau zet chuan min kuah ta hle hle a, hetiang a min kuah hi a nuam ka ti. Ka famkim riau hian ka hre ţhin.

"Ka ngaihsak tawk loh che avangin ka tihpalh." a ti sup a, ka ban lehlamin chuan ka kuah ve tho a, a hnungah chuan ka beng dat dat.

"A pawi lo, a dam leh vat dawn tho a lawm." ka ti ve a, chutah inla hrangin, "I ţhianpa nen khan ka hmu che u." a ti a, Ruatsanga nen khan min lo hmu tihna maw?

"Ka thilpek tur che kha ka lei a, kan inhmu fuh a lawm." Ka ti thuai a, a kut lekin ka hmai chu a kutzungpui a tuai hauh hauh, zanin chu a cool riau, tih sak theih ka nei mang bawk si lo.

"Ka ring che a lawm." a ti leh mai a, min en vang vang reng a, "Mahse ka thik hle thung." a ti sup. Thik suh intih ngawt chi ni hek lo, thik a ngaih loh zia hi a hrethiam lo mai mai niin ka hria.

"An ina i kal dawn chuan min hrilh hre hmasa ţhin ang che ka tih kha hre reng rawh." a ti a, ka bu nghat nghat. 

"Ka ţhianpa ve liau liau..." ka ti hman chauh, ka hmui a rawn khar chilh hmiah. Ka inring lo lutuk chu min nuih suk a, a nakah ka ţham vak ringawt.

A duhthawh viau a, mahse pawna awm kan ni bawk nen ka a awmah ka nam dat a, a duhtawk ve mai bawk. Rei lo te ni mah se ka lungphu a rang leh hman khawp mai, a hre thei hialin ka ring.

"I ţhianpa a ni, ka ring che. Mahse amah kha ka ring zo ve lo, ka thu awih la...." ka zawm loh hlau hmel zeta a tih chuan ka bu ta nghat. A ngaihthatna a nih te chuan a thu ka zawm zel mai a niang chu.

"Thil hrilh tur che ka nei a sin." tiin ka nui var var a, a kutin ka kawng a la chelh reng bawk nen kan la indin hnaih viau, midang an rawn lang thut ang tih ka hlau ru reng.

"Eng nge?" thatchhe hmel zeta tiin ka biang a rawn chuk leh zauh a, "Vawiin hi ka piancham a nia." ka ti a, a awmdan ka hmuh duh avangin ka en uluk ngang mai.

A che lai chu tawp chutin dawt ka sawi leh sawi loh hre duh ang hrimin min en uluk khawp mai.

Min vawnna a thlah a, thawk huaina tur a nih laiinka hlauthawng deuh, ka ti lungawi lo niin ka hria.

"Ka sawi ve mai mai a nih kha." Ka'n ti ve leh hnuhnawh a, a chezia chu uluk em emin ka en reng ringawt.

A kekawr ipte zenin vanlam a hawi a, boruak thaw chhuak hawkin min en leh. Ka piancham a ni tak tak lo tih leh daih mai te chu ka duh rum rum.

"Bialpa laktlak loh takah min chhuah ni maiin ka hria." Za lo zetin a nui lui a, a rilru tur chu ka hrethiam lo tak zet.

"Chutiang chuan ngai lo la, ka sawi lo angah ngai daih rawh. Bakah eng eng emaw phût vanga hrilh che pawh ka ni lo, i hriat ka ring lova ka sawi ve mai mai ringawt a nih kha." Ka sawi chhuah chhan chu a hrethiam lo ang tih ka hlau. A inngaih hniam phahna tur a nih phei chuan ka inthiam lo zual ngawt ang.

"Ti nge min ţhawn dan i hriat em em a." a tih chuan ka sawi awm zawk tak i sawi tih chu ka chak viau. Mahse a ţawng pawh a pangngai viau a, lungawi loh phah nan a hmang lo tih chu ka hre phawt.

"Ka chhun tawh che a." Ka tih chuan a nui ve suk mai. "Zing thawh i hai leh palh ang va lut tawh rawh. Naktuk chu chhuak lo la a pawi lo zawk." a ti leh a.

"A nih muttui." ti a ka kal tur chu ka kut na lo lam a rawn chelh leh rih.

"Ka lo thlah ang che."a tih chuan ka nui hak a, a tawi viau nain ka lo pawm ve mai.

Inkai rial chuan kan kal dun a, ka ke avangin min kalmuan pui hle bawk. Zan rei tawha inkai riala han kal dun chu a nuam riauin ka hre lehnghal.

Ka luh dawn chuan, "Naktuk chu aw, inah awm la ka duh. Mahse tlai lamah chuan ka hauh lawk che." a ti leh a, ka bu ve nghat ringawt.

Vanneihthlak deuhin ka muhil zui ve leh mai a, thawh pawh ka hai lo. Tukdang zawng aiin ka zang huaia ka hriat zawk chu a!

Choka lama ka phei chuan Nuin vawiin chu kallo mai turin min ti a, ka lo pawm viau mai. Ka kut a na miau mai sia, ka va ţangkai dawn lo lutuk.

UBzi hnenah vawiin ka kal theih loh tur thu leh ka theih loh chhan te ka sawi a, min hrethiam ve mai. Ka thawhpuite ho ka hrilh ve leh a, pawi an ti ve hmel khawp a, Sangsangi lah chuan,"I rawn awm mai mai ang a, rawn inthlah tir la." a ti pek a, kan nuih liam vel mai mai a ni.

Zuitei chhuah hmain ka awm loh pawhin Buangi nen chuan dawra lo kal tho turin ka chah a, midang ho ka hrilh vek tawh tho a, an insawi kaw chawp thei maiin ka ring.

In ka awm chu ka hman kher mai. Tih tur han dap dawnin ka kut lehlam chauh ka hmang thei bawk si. A khattawkin Fakpuia nen kan inbe zeuh zeuh, ani chuan a hman chang changin min chhang a, kei erawh ka hman bawk si, ka kut lehlam chauhin ka type kauh kauh a, type chhung a rei duh ţhin ngat ngat khawp mai. 

Tlaiah chuan chaw ei chhuak tura inring turin leh car a ken dawn thu a rawn sawi lawk thlap a, hun a neih loh ve dawn tehreng nen ka tan hun a insiam thei tur chu ka lo lawm khawp mai.

Eng thawmhnaw nge ka hak ang tih ringawt pawh ka ngaihtuah rei khawp mai. Ka ke ka tuam ve lâk bawk nen han inchei viau dan tur pawh hriat a har. Ka ke tuamna phelh ka sawi lahin Nuin nihnih vel tal tuam rawh min ti bawk si.

Ka inbual pawh ka rei ngat ngat, mahni chauha awm e ti lo chuan a khattawkin 'a na..' ka ti deuh sek a, ka dim ve viau chung pawh hian thildang tawh palh ka lo nei leh ţhin.

Ka inthlak hmain phone ka ban leh a, kan dawra thawk ho, UBzi tel lohna group ah chuan Sangsangi'n, "UHruaii a rawn kal a sin." tiin min lo mention a, ka inbual rei bawk nen a message lo thawnna pawh a rei ve leh tawh.

"Eng nge a lo tih a?" ka tih chuan UBzi a rawn zui ve thu a sawi a, Fakpuia chung chang an sawi a hriat ho min lo hrilh ve thlap. Ka hre chak viau lo nain ka lo um e liam ve leh vek tho.

"A sawi dan kha chu a bialpa niawm a ni, in chanchin la hre lo phei ila chu an inngaizawng tak takah ka ngai ang." a rawn tih chuan ka mit a la ta ber. Dilchhut taka zawh chu ka duh bik bawk si lo. Ka hre ve chak tho bawk si.

"Ka lo spy sak zel ang che." Te chu a la ti deuh deuh. Ka nuih pui leh nge nge zel.

A thusawi ho chu dawt a nih ring chuang lo mah ila rilru a vei bera neih ka duh lo. UHruaii an sawi hmangah a mizia tur ang ka hrethiam deuh ruak tho a, Fakpuia pawh ka ring tawk bawk. Engmah thu chiang hre lova lo inrinhlelh ngawt chu a ţul ka ti lo ve hrim hrim bawk.

Dar 4 a rik chuan ka inpeih thlap tawh. Ka chiffon kawrfual purple duk deuh mai ka ha a, ka ha chhuak khat bawk a inhmeh ka inti ve viau. Ka chawnpuar a khuh thleng a, a bân tlawn a ni hlauh bawk a ka kut tuam pawh a hliah pha. A nghawng zau ve deuh mah se hnunglam phei chu ka samin a hliah deuh vek thei a, hmalam pawh ngaimawh tur khawp a zau a ni lo bawk. Tunlaiah uar viau mah se ka ha chhuak zen zen ngam ngai lo, vawiin na na na chu tiin ka ha ve hmiah, inhmeh ka inti ve viau bawk.

Pheikhawk ah lah ka duh ang ka bun thei lo leh, ka sandals zinga ka bun khat ber bawk bun leh ka ngai, a suihna a awm bik vang a ni pakhat. Suih vel hi a buaithlak ka tih avangin ka bun ţha peih ngai lo, mahse tunah erawh ke tuam chungin ka bun nghet theia a ţangkai phian mai.

Ka hmaiah makeup tlem ka hmang ve a, lipstick hi ka ngainat avangin a ngah pawh ka ngah ber a tih theih ang. Mahse tlema a sen lam deuh ka hnawih hian ka hmui a tilang lian riau hian ka hre ţhin a, mawi ka ti viau nain ka inhnawih tak ngam ngai lo. Makeup hi ka lawm ve a, ka hmang zen zen lo nain ka hman chhunah chuan ka bei uluk ve ţhin viau.

Room a ka awm chu Nuin min rawn ko a, Fakpuia a lo thleng tawh a nih ka ring.

Ka sling bag hrui sîn tê mai, ka phone leh purse chauh lenna chu ka ban a, ka ken ka rah nat ngam loh miau avangin muangchangin ka chhuak zui a. Nu leh Zuitei ka hrilh vek tawh bawk a, zanriah ka ei chhuak khat bawka an lo remti khawp mai.

A ţhutna lam ka pan laia min lo thlir reng tih ka hriat chuan ka lâi ru viau mai, a chhan pawh sawtiang saw'n keimah chauh min en ţhin se ka duh a, a tan ka hlut hmel ngawih ngawih ţhin.

A bul hnai ka thlen hmain a rawn ding chhuak vut a, Nu hnenah kan kal mai tur thu leh kan haw tlai loh tur thu a hrilh a. Chhungte hriatpuina thlapa inngaihzawn chu a hahdamthlak ka ti.

Kan khuaah khan ka ţhiante ngaihzawng neih avangin an chhungte hnenah dawt ka sawi phah fo, a ţha lo tih pui viau mah ila ţhiante chu ţhiante nge nge, an mualpho leh hauh an tawrh ka hlauh pui ve ţhin tho si a, anmahni ai hian an chhungte hi ka hlau zawk ţhin ni ber khan ka hria.

Car a dahna thleng chu muangchangin min kai phei a, engmah sawi lo mah se a mitmeng chu ka hrethiamin ka hria. Ka hlim tawk viau bawk.

A rimtui hman chuan ka hnar a verh zar mai. Amah nen a inremin a rim chu a pâ ka ti khawp a, mite hian an bialpa te hi chhelo an ti ve ngawih ngawih ngai ang em le...... Ka mitah hi chuan ani tluk hi an awm tawh ngai kher lo ang.

Ka t shirt pek kha a ha a, ka rin ang chiahin a inhmeh lutuk. Min ti hlim veng veng mai, a vun rawng nen a inmil bawk si, hmeichhe dang mit a la viau mai pawh hi an demawm loh reng reng.

Ka ţhutna tur lamah min kai pheiin kawngka a hawng a, ka ţhu lût tur chu ka biang a rawn piai zauhin, "I nalh lutuk." a ti sup a, ka lo nui var var.

Kawngka a khar chiah tihah, "Nang pawh!" tiin ka kutzungpui ka hmuh vah a, a nui ve suk mai. 

A rawn ţhut luh ve thleng chuan ka en reng a, a rawn ţhut luh chuan a lâi ve deuhin ka hria, a hnar a tuai zauh a, a nui leh suk. 

Car a tih nun hma chuan, "Min en reng chuan kan chhuak thei lo mai ang." a ti a, a nui ve tho tih ma hriat avangin ka nui hak a, a lâi ve deuh tih ka hrechiang ta khawp mai.

"Khawiah nge min hruai dawn?" Ka ti khaw mawi ve a, "Fianrialah." tih zawngin min chhang, a ve reuh hian a! Fianrialah hun thawl tak neiin kan awmdun ngai lo, ka lawm zawk bawk.

A hnenah pawh tlang takin ka sawi a, ka thusawi chu min zah sak vein ka hria. Min nawr lui ngai lo bawk. Chu'ng avang chuan ka ring tawk a, ka tana ţha lo tur a duh bik lo tih ka hriat avangin ka duh zual sauh.

"Setana duh zawng." Ka tih zauh chuan a nui hawk a, ka ner khum vak ringawt.

"Zanriah ei nan a la hma deuh bawk a kan leng phawt dawn nia." a ti ve mai a, ka leng chhuak khat bawka ka phur ru hle mai. 

Hla play-in ka sak pui pah zel a, ani pawhin min lo zawm ve zeuh zeuh. Hetiang hun hi kan nei ngai lo bawk a ka ngaihlu khawp mai, ka pianchamah lehnghal. Ka piancham hi ka lawm ngai ta meuh lo. Kan khuaa ka ţhiane chuan hre ve bawk mah se kan inhmu khawm thei tak tak lova, nidang aia ka hman danglamna hi a tam lo ţhin khawp mai. 

Vawiin zet chu ka duhthusamin thil a thleng a ni ber e.

Rei ang reng tak kan tlan hnuah kan ding ve ta hram, Car a tih din chuan a chhuk nghal a, ka awmna lamah rawn pheiin kawngka min hawn sak zui nghal. Kan tlan chhung khan Vengchhung vek ni khan ka hre si a, kan awmna laiah chuan in hmuh tur a awm lo.

Kar hmalamah min kai pheia, "Inring rawh." a tih rualin ka kawngah chelhin min chawi kâng lâwp a, car hmaah chuan ka ţhu fel der mai.

Ka hmaah rawn dingin ka bul ve veah a rawn innem khalh a, ka lo nuih var var. Kawngpui bul lawk a ni a, thlanglam erawh khâm a niin ka hria. Thli a thaw nuam delh delh bawk si, motor rawn tlan bengchheng a awm mang bawk si lova a nuam ka va'n ti tak.

"A nuam i ti em?"A tih chuan ka bu nghat a, "Engtin nge helai hmun te i hriat zawk a." ka tih chuan a hmaa a kal tawh thuin min chhang mai a, ka kutna lam chu ban leh vutin, "A la na em?" a ti leh, ka lu ka lo thing ringawt.

Thli thawin ka sam a chhem lên ho chu a tuai mam thuak a, ka bengah min zeh sakin ka hmui ringawt chu a en leh vung vung, ka zâm rû leh tawh viau bawk.

Thudang daih lo vawrhna hun a nih loh avangin ngawi rengin ka en kar a, a hmui liak huh zauhin ka mitah tak min en leh, "Ka fawp dawn che!" tih supin ka hmui a rawn si nghal. Midang mitmei ven tur an awm lo bawk a ka hnial duh bik lo.

Ka kawngah chelhin min pawt hnai dawrh a, ka kut na lo lamin ka invawn khalh vat. Min fawp reng chung chuan ka kawnga a kut chu a chet a, kan thawklak a mumal tawh lo bawk nen rilru tifim hram hramin ka awmah ka nem khalh ta thuai. Min thlah ve mai a, thawk kan la halh halh mai.

Mihring pangngai niin tisa inhip tawnna nei ve ve kan ni a, a dang tu zawka tan ziah chu nuam ka ti bik lo. Mahse thil pawi zawk a thlen ka hlauh avangin ka inring rân mai ţhin. Mipa a ni a, a duh chuan min thlem luiin a thuhnuaiah min dah thei reng, mahse chutiang chuan a ti ngai lo.

Min thlek vung vung a, "I hmelţha lutuk." ti supin ka hmuiah a rawn fawp leh zauh a, lâi zetin ka nui ve ringawt. Min chhaih laih hi nuam a ti ţhin tkat mai bawk si.

"Rei lo tê." tiin min pawm vut a, ka kutna lo lamin ka vuan bet nghal vat, eng nge a tih tum zawh buai pawh ka tum lo, amahah ka rinna ka nghat tawp.

Car hnunglam kawngka chu a hawng a, min pawm chung chuan muangchangin a ţhu lut a, a kawngkhar a khar fel rual chuan hlauhthawnna ka nei deuh.

"Min en teh." zaidam zeta tiin ka khabeah a rawn vuan a, amah chu ka en ta nge nge.

"Min ring tiraw?" a tih chuan ka bu nghat, "Min ring reng rawh." tiin ka hmuiah bawk a rawn fawp leh a, ka chhang let mai lo.

Chhanblet a phut zia hre thei tura min nawr thiam em avangin ka chhang let ve ta nge nge a, a phur sawt zia pawh a duhthawh danah ka hre thei.

A kut pawh a awm mai mai leh tawh lo. Ka awmbawr a rawn tawh chuan ka kut na lo lamin a kut ka dawm thuai a, ka hlauthawng tlat. Mitkhapkar lekin thil tam tak a thleng hman thei ţhin si a, rilru fim put a harsa ţhin bawk si.

A kut chu a chet ta tho,ka vawnna pawh ka thlah duh bik lo. A hmui la hrangin ka nghawngah chuan a fawp zauh a, zâ ka tih avangin ka nui hak thei, ani pawh a nui ve tih ka nghawng lum hawk danah ka hre thei.

A hnuah chuan ril zeta min fawp lehin a inla hrang ta hram. Car seat ah chuan a lu nghatin a thaw hawk a. Tisa chakna nei lo bik a ni lova, keimah avanga a taksa danglam pawh ka hai bik lo, min nawr lui ngai bik lo nain line khamtu zawka ka ţan ziah avangin hetiang hun hi neih fo loh ka duh. 

Ka lo en reng tih ka hriat chuan a kiai suk a, "I rilru tihfim tum lutuk kha." tiin a nui hawk a, kei pawh ka nui ve tho. A kut pahnih suih zawmin a tukhumah a nghat a, hahdam hmel zetin min thlir reng.

"Hetiang hun hi neih zen zen loh a him." ka tih chuan, "Neih ve zeuh chu a ţha." a lo ti vat a, ka ner khum vak ringawt.

A malchunga ka ţhut reng lai chuan a kekawr ipte a zen a, ţhi a rawn phawrh chhuak hlawl mai.

"I inhmeh dawn tih ka hre sa." a tih chuan ka nui ve sak. Tlereuh lam hi ka inbel tam lo, hei phei chu a man a to hmel bawk nen ka tîm riau.

"I awrh duh em?" a tih chuan ,"Duh lutuk." ka ti thuai a, a hnen aţanga ka dawn a nih chuan lawm takin ka pawm mai a niang chu.

Min awrh tir hnuah ka nghawng a mi chu a tuai hauh hauh a, a simple bawk si lei dawn ta ila ka duh zawng tur tak a ni.

"I inhmeh hle mai." tiin a thlek vawng vawng.

"Ka lawm e." Ka ti a, sawi zawm lehin, "Hmeichhe duh zawng chu i hre hneh tawh hle mai." tiin ka fiam zauh a, a lo nui ţha duh der lo.

A kut chet vutin ka awm a rawn ţham thut a, ka beng sawn rang lutuk. "Pangngai teh!" Ka ti hlak a, a lo nui ringawt thung.

"Ka phelh sak che a nih loh chuan phelh suh ang che." A ti nghet charh a, "I phelh pawh ka phal chuang lo ang." Ka tih chuan nghal min tih hmel fe hian min en a, ka lo nuih hak hak.

Chutiang chuan rei fe kan awm dun a, a awmah chuan ka bei hle hle a ni ber. Ka thla a muang a, a lak aţanga ka dawn ang hi tu mipa hnen aţang mahin ka dawn ka ring lo, keimah lam pawh ka inhawngin ka ring lo bawk. Keimahah hian 'bik' nihna a hauhna a rei tawh, chu mi chu tumahin an thlak thei tawh kher lo ang.

Zanriah kan ei na lamah pawh min ti hlim. Min chhaih laih a kher a tum ţhin tih loh chu a nuamin ka hlim em em vek. Ka duhthusam angin thil a thleng vek ni maiin ka hria, ngaihzawng ka neih ve hunah chuan ti a ka suangtuah ve ţhin ang a amah hian a kim tlat a, chu chu ka chhungril lamah hian a fiah riau ţhin.

Dar 7 rik hma hretin in kan thleng a, ka chhuk dawnah ka malchungah paper bag lian lutuk lo hi a rawn nghat a, khawi atangin nge a rawn phawrh pawh ka hre lo. "Birthday present a nih kha" a ti mai a, ka en hau ringawt.

Thil min tih sak hnem tawh êm avangin ka la hreh tawh viau bawk. "A ngai kher tawh em maw ni le...." Inthlahrung deuh takin ka ti a, ka lawm lo emaw a ti ang tih ka hlau, a lakah hian ka lawm lutuk a, keimah avanga a inseng ţeuh tur chu ka inthlahrung ve pakhat bawk.

Ka kut a rawn chelhin, "Hei aia ţha zawk leh hlimawm zawka hma hun kan hman dun theih nan ka kiangah awm reng rawh." a ti a, tih tak zeta sawi a ni tih ka hre thei.

"I duhthusam ang mipa ka ni thei kher lo ang, mahse i hnaiha ka awm theihna a nih chuan engmah ka pawisa lo." a ti leh a, a thil sawi chuan ka ngaih a ti ţha lo lek lek zawk.

"Engkim avang hian ka lawm e." ka ti ve a, ka lawm tak tak zia pawh ka hmelah a chhiar theih ka ring.

Ani pawh rei lo te lo lut kawi zawkin a chhuak lehnghal a, a rawn leng nawn leh tawh lo nain WhatsApp ah erawh kan inbe zui reng tho.

Zuitei lah ka piancham a ni tih ka hrilh miah loh avangin a lo vui ve khawp a, "Hun thawl inneih loh i hlauh vang a ni chiang." a tih chu ka nuih pui nasa.

Mahse ka chhuah hlanin ka ta tur liau liau bag mawi zet mai a lo lei tho. Lawmthu sawi chiam ka thiam lo nain ka hmelah a hrethiam thoin ka ring.

Ka inbual zawh vek hnuah a paper bag min pek chu ka hawng ve chauh. Thi nalh zet mai min pek bakah tlailamah hun nuam tak min hman pui a, thil dang ka beisei tawh hauh lo. Mahse hetiang a min pek nachang a hriat takah chuan min ti hlim em em thung si.

Puan bih chi nalh zet mai ka phawrh chu ka thlek vang vang a, a nalh ka ti lutuk ringawt. A pui viau tih dawnin a simple viau bawk si, engtin nge hetiang min pek nachang a hriat zawk le..... Kuttah ngat lehnghal, a tlawm lo viauin ka ring. Lipstick pakhat a dah tel bawk a, thil ho tê pawh ni se ka hlimpui dawn teh reng nen, a thilpek min pek te hi ka duhin ka lawm em em vek, chu'ng zawng ai chuan min pek duhna thinlung a nei hrim hrim khan ka lawmna a ti zual zawk.

WhatsApp kaltlangin lawmthu ka va hrilh zui leh hram a, love sen ka va thawn tuar bawk. 

"I duh zawng an ni em?" A rawn tih te chuan ka nui var var reng mai. "Hmeichhe duhzawng pawh i hre khawp mai." tiin love sen ka va thawn leh ţeuh a, a lawm lo leh viau mai thei a ni.

"Malsawmpar!" a rawn ti phawt a , ka lo nui hak hak tawh.

"Khatiang kha sim rawh." a rawn tih leh chuan ka awm hmunah ka nui vak vak ringawt.

Ka mut hmuna ka online laiin UBzi'n min rawn be ve hlawl mai. A hranin kan inbe ngai si lo a a message chu ka en ta thuai.

End of chapter 15

🤙