BLUEMING 🦋 CHAPTER-16 BY UNKNOWN BELLE

BLUEMING 🦋

BY UNKNOWN BELLE

CHAPTER - 16

Ka message dawn chu ka en a,"Fakpuia nen khan in inngaizawng em?" tih tlawng mai hi a lo thawn. Min rawn zawt teh daih chu mak ka ti hran lo. A ţhiannu avangin a lo ngaihven ve tihnaah ka ngai.

"Aw. Ti nge?" ka ti let a, min rawn chhan dan tur ka ngaichâng reng a, a offline daih mai.

Biakfela hnen aţangin a rawn thleng leh, a message hmasa zawk pawh ka chhang miah lo kha a nia, biak leh pawh ka inthlahrung zawk.

"Eng nge i an?" a rawn ti a, UBzi nen an inhre bawka ka chanchin a lo hrilh ve a nih ka ring.

"Ka dam tawh lutuk." tih ka thawn rual chuan, "Naktuk i kal peih tawh ang em?" a rawn ti leh a, ka peih ka la rin loh thuin ka chhang ve tawp. Rei tak biak zui ka duh loh avangin a zawhna chin chauh ka chhang.

UBzi'n min rawn chhan tak lawk lohah chuan Fakpuia nen inbe leh zawkin phone ka dah a, ka mut chhuak em em lo mah se ka type ţha thei lo bawk nen a hahthlak ve deuh hlek. Khawih rih loh mai kha a fuh zawkin ka ring.

Zan dang zawng aiin ka mu hma, ţhianten rawn len an tum viau nain Fakpuia'n engtin nge a hrilh hlawm ka hre lo, "lo dam thuai thuai rawh" an rawn ti tliar tliar a, rawn leng se chu a nawm dawn tho rualin an rawn kal lo pawh chu pawi ka ti hran lo. 

Zingah pawh ka thawh ve leh Nuin vawiin pawh chawl rih turin min hrilh a, ka pawm ve mai. Kar thar lam law law aţanga kal ka tum ta mai.

Ka ke phei chu a dam tawh tluk a ni. Ka kut hi ka la hmang na ngam chuang lo nain a tir ang em emin a na tawh lo bawk a, a zia chho viau.

Fakpuia hna kal tur a rawn lut kawi a, a thawmhnaw inbel a piang mai hi a inhmeh em em bik zel a, vawiin pawh a rawn chhelo leh pek.

"Zanin in inzir leh dawn em?" a tih chuan ka bu nghat a.

"I kut a na sia?" a tih chuan min dip tham loh thuin ka chhang thuai.

"Ka rawn haw hunah ka rawn chho ve ang." a tih chuan ka lo hnial deuh a, "I tan a chauhthlak mai mai ang."ka tih chuan,"Ven deuh i ngai." a lo ti nghut a, ka insiam chhiat khum vak ringawt.

"Lo chhuak kher duh suh." a tih avangin kawngka bul thleng ka thlah a. A chhuah hmain ban a rawn vai zauh chu ka lo chhawn thuai.

Nileng chuan ka hman leh khawp mai. Tih theih em em ka nei si lo. Zanlam mawlh mai chu ka nghakhlel. Min ven chhuanlam a nih pawhin a lo kal ve duh phawt chuan ka lawm tawk. 

Chawhnu lamah chuan Ka Number save loh aţangin thlalak ka dawng hlawl mai. 

Ka download a ka en chuan Fakpuia leh hmeichhe pakhat kal dun lai hi a ni a, hmeichhia chu UHruaii an tih kha a nih duh hmel ka ti khawp.

Vawiin lam a mi a ni tih Fakpuia kawr hâk aţangin ka hre thei. Engmah dang a sawi lo bawk nen ka lo like sak ringawt. Kawnga an kal dun ringawt chu ka lo hmuhmawh viau na chhan tur ka hre lo. Chubakah an thla lo la tu hi a tel ve tih a hriat a, han ngaihkawih vak tur ka hre lo.

A pawng a taka bialnu thikthu chhe deuh nih pawh ka duh lo bawk. Amah ka rin em avang te pawh a ni pakhat ang chu.

Zanah pawh chuan a rawn lang ve ta ngei. Ka zirpui te ho nen pawh inhre ţha sa vek an ni bawk a hrehawm a ti lo chuan ka hria. Mahse keimah ber hi ka zâm tlat. Theihtawp chhuaha ţha taka tih theih zawk awm tak hi ka zâm zawk tlat a, kan zir uluk tlâng bawk nen kan rim tluk tluk khawp mai.

Kan chawlh chhungin a ţhutna lamah ka phei thuai a, ka la kal bâi deuh chu min khawngaih niin ka hria. "I va thiam ve." a ti zauh a, "Awihawm loh em mai a!" Ka ti ringawt pek a, hmun leh hmuna infak hi chu a der a ni emaw a tak a ni emaw ka dawngsawng thiam lo ve hrim hrim bawk.

"Tui in lawk ila." Ka tih chuan a rawn tho chhuak ve mai a. Biakin compund pelh deuhah chuan midang ho pawhin zial an lo zu ve bawk.

Cooler bula kan din laiin UApuia a rawn kal ve a, "I rawn lang thut kha mak ka ti reng a ni." tiin Fakpuia chu a lo fiam hlut a, ani pawh a nui ve suk suk mai. A rawn kal duh tak tak hi kei pawh mak ka ti ve deuh tho, a hmaa a chanvo an pek ve lah kha a hnar ta bawk si.

"Chawl rei lo ila kan duhtawk thuai dawn nia." tiin a kal sawn zui a, kan pahnih chauhin kan awm leh ta. 

Midang an awm lo ta maw tihah ka kut a rawn vuan a, "I inti zei e..." ti a ka fiamna chu a tlawm duh bik lo, "Hei lo pawh tih dan ka hria." a rawn tih chuan ka nui hak hak a, a uan ve deuh hi chuan a inhmeh lo ka ti ţhin bawk si hian ka nuih a ti za zual ţhin.

Kan ţan leh hnuah rei zir tawh loin kan haw ta a, zan boruak a ni bawk a haw kawngah chuan ka kut a chelh leh tlat, min thlahlel hmel taka a awm hian nuam ka ti ţhin.

Inah pawh rawn lut kawi loin a let leh a, mut hmuna kan inbiak lai chuan thlalak pakhat ka dawng leh. Min lo thawnthu chu amah hriat theihna tur a awm lo bawk nen UHruaii an tih chu a nih ka ring ve hmiah.

A thlalak lo thawn chu Fakpuia lan ve leh na bawk a ni. Engtik a mi nge ka hre ta lo thung. Hmeichhe bag a khaia, a hmeichhia zawk chu a sam tlem a lang ve chauh, ama lâk a ni tih a hriat bawk. 

Hetiang a min rawn thawn zel a nih chuan ka en liam theih loh chin a la thlengin ka ring. Thil tul ber a ni lo bawkin ka hria. Min rawn thawn kher danah Fakpuia bialnu ka ni tih a hria chu a ni phawt ang a, a chet duh dan chu a mawi lo ka lo ti khawp mai.

A hma ang bawkin kutzungpui lem ka thawn leh tawp a, tun ţum chu min rawn chhang ve ta.

"I phu tawk hre teh." tih hi a lo thawn, a teh thlawt chuan.

Chhan loh ka tum zet nain, "Awle." tiin ka chhang hram. Hetiang mai maia buaina neih ka duh lo, mahse Fakpuia vang hian ka tawng zui lo ang tih ka sawi lawk ngam miah lo thung. 

"I thlem zei viau a niang maw..." a rawn ti lehnghal a, ka chhang duh tawh lo. Ţawngkam a hman duh dan chu ka huat zawng tak a ni. Mahse rilru a vei bera neih ka duh lo, ka tun hun hlimna hi a ţawngkam vang mai maia tih chhiat ka duh lo bawk.

Message chu a rawn thawn zel a, mahse ka en duh tawh lo. Block pawh ka tum chuang lo. UHruaii mizia an sawi hmangah tuna mi hi amah a nih ka ringhlel lo, chhanlet tumna pawh ka nei tawh lo bawk.

** 

Ţana te inneih ni chuan kan ţhian ho kan kim ţhap a, kan ti phuisui hneh ve viauin ka hria.

Kohhran hallah inneih programme kan hmang a, mo lawmna erawh in lamah neih a ni thung. 

Rindiki te lam pawh an rawn tel ţha ve hmel viau nain Ţana te lam chhungkaw rual an ni bawk a, an rawn tawiawm ţha khawp mai. 

Inneih zawh thlalak hun chhung chu a rei phian lehnghal a, pheikhawk sáng ka bun ve ting tang bawk nen ka che sek. Ţhutna tur ka melh reng a, a awm ve hoah lah an ţhu khat deuh vek mai bawk si.

"I ke a kham tawh em ni?" Fakpuia'n a tih chuan ka bu nghat a, din reng pawh ka theih loh tawh nak a laiin pheikhawk sáng nen chuan inhremna chikhat a ni ringawt ka tan chuan.

"Phelh daih la?" a ti a, ka hnial thung. Thla kan lak ve dawnah ka te bik dawn lutuk a ka duh lo, UDongi tih loh chu kei ai an lian deuh vek,bakah pheikhawk sáng an bun ve vek tho va, ka tê dawn bik lutuk a ka phelh duh bik lo hrim hrim.

"Ka tê bik dawn em mai ka phelh duh lo." Ka tih chuan, "I hmelţha ber tho a lawm." a lo ti zauh a, hmui ka tih sawih khum vak ringawt. Kan bula awm te hian min ngaihsak lo mai mai a, a thusawi an hre pha hrim hrim.

Kallam aţang tawhin kan inzui chawt a, ţhian dang te nen awm hona karah pawh min si lek lekin a awm reng a, ka hlat san a hlau lutuk chu ka nuih a ti za reuh. Hetiang a min thlakhlelhna a tilang hreh lo hi ka lawm em em bawk.

"Monu chu a chhiat loh reuh saw, a dul a la lian lo bawk a nau a pai tih a hriat loh reng reng." Ka ti sep sep a, kan dinna a kil deuh bawk a ka kawng a rawn vawnna pawh ka ngaimawh duh bik lo.

"Mo i nih ve hunah chuan nang chu i la rai lo ngei ang a." ti a a rawn uan chuan ka kawng a chelhna kut chu ka sik hlak. "Pangngai rawh!" ka ti zawi hlak a, a lo nui duh lek chauh.

"Eng emaw kha kan ti lawk ve dawn si lo a lawm." a rawn tih leh sup chuan ka hawi kual ruai tawh. Midangin an lo hria ang tih te a hlau lo zawk nge maw ni.

Min ti zak chem chem tih te hi a hre lo nge a hre lo der zawk ni.

"I rui a mi!?" Ka ti hlak a, a lo nui hawk mai. Mipui zingah lehnghal khatiang thu te a chhah chhuah ngam zawk ni. 

"I test duh em?" Mengzim sûnin ka kawng a hmer salh a, min ti hlauthawng hman. 

"Ţawngtai nasat i ngai tlat." Ka tih khum chuan a nui leh hawk, ka thusawi hi te te keiin nuihzatthlak a ka ngaih loh te hian a ti nui ve thei zel a, a ţha lamah ngai zel phawt ang.

Kan ţhian hoin thla kan lakpui zawh ve leh inlam panin kan haw dun a, amah zawk chuan , "I pheikhawk chu phelh rawh." a rawn ti a, ka bun thlak luih theih mai ka ring kha a nia, chutia a tih takah chuan ka phelh ve mai bawk a.

Ka pheikhawk phelh chu a ban vut a, ka bag a khai sa tawh bawk nen, "Ka lo keng ang." Ka tihna pawh hre lo ang hmakin a awm.

"Kal ang le." tiin a kal zui mai a, pheikhawk ka bun tak lohah chuan ka puan a fual bawkin ka chawi nalh a, amah chu ka zui ve det det.

Midang ho Mo lawmna lamah an tlang nghal dawn avangin keini chauh kan let let a, lirthei keng nghal an nih hlawm vang a ni pakhat. Keini pahnih leh Zuitei te erawh Biakin kan hnaih avangin ke in kan kal thung a. Zuitei chu midang ruala a kal nghal dawn avangin a rawn let ve lo.

Ka pheikhawk bun ka thlak a, ani pawh a rawn lang har lo. Car a rawn keng hlauh chu ka lo lawm rilru khawp mai. Bike chuan pawh ngaia neih hleih theih loh laia puan bih chunga chuan chu ka lo hreh rilru khawp a.

Midang ho pawh an inthlak dawn lo bawk nen haw mah ila kan inthlak bik lo, ani chuan a kawrchung leh a tie awrh a lo phelh tawh thung.

An in kan thlen chuan in chhunglam an lo ţhu khat deuh vek tawh. Kan ţhiante awmna lama kal ve tur tho kan nih avangin a lut zui ta tho a, a hnungah a kalna lam lamah chuan ka zui ve zel.

An in a zim lo bawk a chhunglamah pawh kan leng hnem khawp mai.

Kan pahnih a ţhutna tur an lo dahah chuan kan ţhu a, ka thaw huai thei mai. Mi min en ţhup theihna karah lo tei sek kha nuam lo ka ti lutuk.

Mo hruaina hun an hman lai chuan keinj ţhian ho kan zai a, music instrument ho an chhawp sa vek bawk nen Fakpuia pawhin keyboard a chang a, ka mit sirin ka en leh zauh zauh ţhin. A inhmeh ka lo ti ru ve leh em em ringawt.

Zan lamah erawh ka tel ve peih ta lo thung. Fakpuia leh Zuitei an va lang phei leh a, va kal leh chu ka rilruin a duh viau nain ka taksa hian a peih tawh thlawt lo. Chubakah Nu hi amah chauha kalsan chu a nuam lo ve bawk. Inneihnaah khan a rawn kal ve ngei a, mahse mo lawmna lamah a rawn tel lo thung. Kei pawhin mahni chauha in a awm chu a khawhar thlak ka tih ve tho avangin amah chauha awm tir chu ka khawngaih ve hrim hrim.

Vawiin a kan thlalak ho ka en kual mai mai a, Kimtei thil sawi ngaihtuah chhuakin na nui leh sak ţhin. Fakpuia nen a kan inkawp daih chu mak a tih thu leh a tira a awih loh zia a sawi a, 'mahse ka hmuh dun takah che u chuan in lo inhmeh khawp mai' a tih khan min ti hlim ve em em ringawt.

Thlalak ka en kual dan dan hnuan status tur pakhat ka thlang chhuak a, kan ţhian hoin thla kan lakpuina a ni. Ţana te nupa pawh an inhmeh viau mai. Fakpuia lah khan an inneihna kha min fiam nan tak a hmang reng a,min chhaih laih a hrat lutuk hi engtia tih chi nge maw ni.

Nu TV enna bulah chuan phone Khawihin ka ţhu ve reng a. Ka number save loh aţanga ka message dawn ho chu 50 a tling dawn tawh. Ke en ngai miah lo chung pawhin a peih ngat ngat khawp mai.

He tia min rawn biak hnuah hian UHruaii an tih chu ka hmu ve tawh, mahse dawra rawn lut mai an nih ţhin avang hian keini lam chu min rawn ngaihven vak lo hlauh zawk a. Amah pawhin min hria tih chu ka hre tho, mahse min hre ngai lo ang maiin a awm thung.

Message a rawn thawn ho chu ka chhiar thuak thuak a, ţawngkam a thlahdah bawk nen thinrim lamah pawh a kal lo. Nuih pawh a za chuang lo. Heti taka min hnuaichhiah mai chu chhan let ve zek a chakawm lek lek mai, mahse a reh ve mai ka rin avangin ka chhang duh ta lo. 

A number pawh ka save lova, thlalak a lo thawn ho pawh ka download tawh ngai lo. UHruaii bak a ni dawn lo bawk a ka en liam ve thei zel, a chhan pawh Fakpuia hian a lakah rilru a pe dawn lo tih ka rinna hian min hnêm ni berin ka hria.

Kan ţhut ngawih reng laiin kawngka kik ri ka hria a, ka va hawn sak thuai. Biakfela a lo ni reng mai.

"Mak i va ti awm ve." tiin a rawn lut zui a, ka beisei lo viau nain midang han beisei tur pawh ka nei chuang lo. 

"Ti hran lo e..lo ţhu rawh." Nu ţhutna lamah chuan kan inzui phei a, nu pawhin a lo be sawm vat.

A sawi hmangah chuan kan ina rawn len tum hrim hrim chu a nih loh hmel. 

"I awm pawh ka ring chiah lova,mahse ka lut ve hrim hrim duh sia i lo awm hlauh a." a ti a, UBzi hnen aţangin a nih loh chuan vawiin ka chawlh chhan a hriat ka ring lo. Ţana te in lama phei ve turah min ngai a ni ngei ang.

"Chhun lamah ka nileng tawh bawk sia, ka peih tawh rih ngang lo." Ka ti ve a, ka kut hliam te chu eng nge a an tawh tih te chu min zawt a, "tunah chuan a dam tawh lutuk,hna pawh ka thawh pui leh thei tawh." Ka ti a. Phone a min rawn zawh hi chuan a chhanna chin chiah hi ka hrilh zel a, ka chhan dan aţang hi chuan amahah rilru pek ka tum loh zia chu a hriatthiam ka ring, mahse min biak a ţhulh chuang lo. Ngaihmawh thamin min be ngai chuang lo,min ngaizawng tih hre lo phei ila chu ţhian ţha tak biakin ka be reng thei ang tih tur vel a ni.

Thingpui te kan in ho a, nu nen a titi pui tur a hre zel chu a tihzia ka lo ti khawp mai, keimah nen kan inbiak reng a ngaih loh phah a, phone lo en daih a nuam si lo,an bulah ka lo ţhu ngawi ve reng. 

Rin ai a leng rei ta phian a, a haw hmain Zuitei te an rawn haw hman.

Fakpuia nen an rawn inzui lut hlawl mai. Biakfela lo leng chu a lawm viau lo tih ka hre thei, mahse tih ngaihna vak ka hre bik lo, kei min kawm chuang bawk si lova, lo ngaihmawh viau tur ka hre lo.

Zuitei inthlak turin room ah a lut zui a, nuin Fakpuia pawh an hun hman dan te a zawt ve a, a be hlauh chu a tih zia ka ti khawp mai, a hmel aţang saw chuan biak a huphurhawm hmel lutuk.

 Vanneihthlak ka ti dawn nge ni Biakfela chu a ţhutna aţangin a tho ta hlauh a, haw a tum thu a sawi chuan a der pawhin ka chelh lo, Fakpuia lah kan awmna lamah a rawn ţhu phei duh bawk si lo, Biakfela hi haw thuai thuai se ka ti rilru tawh reng a ni.

Kawngka thleng chu ka thlah a, "Zanin chu ka lo kal fuh hle mai." a tih chuan ka nui ve tawp. Nu nen a inbiak dan aţang pawhin kei min hmuh tum ngawr ngawr a nih loh zia ka hre ve thova, lo nin ve viau pawh kha a mawi vak lo.

Kawngka ka khar hnuah Fakpuia ţhutna lamah chuan ka phei a, a phone a lo khawih mual mual mai.

Zuitei chu room aţanga rawn dâkin, "Ka inbual nghal dawn a ka mut san mai dawn che u." a rawn ti a, nu pawhin mut mai a duh thu a lo sawi ve. Pakhat lah a la ţhu ngawi kar mai bawk si.

Min ngaihsak angin awm lo mah se a bul lawkah a hnaih lutuk lohah chuan ka ţhu ve ta tho. Nuin a rawn biak erawh pangngai takin a chhang leh bawk a, a phone chu a bih ngur a, eng nge a en pawh ka hmuh pui thei chuang lo.

"Thingpui i duh em?" Ka tih chuan a lu a thing mai a, "Ka va haw phei ang e." tiin a ding hluai a, nuin,”La leng rih la." a lo ti thuai. Ka ţhut hmunah a che zia chu ka lo thlir reng ringawt.

"Ka mut a chhuak riau kei pawh." tiin kawngka lam a pan a, nu pawhin mut mai a duh thu a lo sawi ve bawk.

Fakpuia thlah ka tum chu nuin, "I mut hmain inchunga ka thil pho khi min han seng sak hmasa la aw, nang mawng zâng deuhah." a lo tih chuan ka seng tur thuin ka chhang thuai a, ani pawh a ţhutna atanga tho chhuakin a mu ve nghal dawn niin ka hria.

Fakpuia thlah tur chuan ka chhuak ta tho a, a bike hunna bul a lo thleng der tawh. Chutia min hel a tum chu ka lawm lo ru hle bawk.

A awmna lam ka pan ta tho a, ka thlen ve hmain bike ti nungin an in lam a pan ta daih. Ka awmnaah chuan ka ding reng ringawt. A awmdanin min ţhawng lutuk a, tih tur ber ka hre lo. 

Biakfela leh Ruatsanga hnaih lo tura min tihna zawng zawng pawh ka zawm ţha em em a, zanin a a lo leng a hmuh avanga khatianga min khawsak khum kha ka thin a rim ve lek lek mai. Engmah pawh sawi chian hma lehnghalin a haw zui daih bawk si.

Tih ngaihna hre lo zet chuan in lamah ka let leh tawp a, Zuitei hnenah an rawn haw hmain mood fuh lohna a nei em tih te chu zawh mai ka duh rum rum.

Nu sawi angin in chunga a thil pho ka lak sak a, kawngka kalh felin ka mu ve ta chauh.

Phone banin va biak ka tum a, mahse ka rilru ka thlak leh. Ka sawi tur uluk deuha ngaihtuah hmasak ka ngai niin ka hria. A message hnuhnung ber chu ka en leh tê tê a, phone ka khawih tak loh avang khan ka hmu leh miah lo kha a nia. Ka reply har vang ringawtin a lungawi lo sa a nih chu ka ring chiah si lo.

"Kan lo haw ţep." tih a rawn sawi na chu ka chhang ta lo phawt. Rilru fim taka hman phawt ka ngai, ka rilru a awm ang ang a ka va rik phawr phawr chuan kan inbe pangngai thei lo palh ang.

A inbual zawh hun awm vel chu ka nghak leh phawt a, engmah tih sual nei lo mah ila eng emaw min dáwp ang mai hian ka zâm ru riau tho.

A hman hun awm a ka rinah chuan ka va call ta pawp. A ring lai chuan thinphu dêp dêpin ka awm, ka lo reject daih emaw a lak duh loh ka hlau.

A la tawh dawn lo emaw tih hnuah a rawn chhang ta hram. A lak rual chuan, "I mu tawh em?" Ka ti nghal tlawng, a call a chhang chu thaw tlemin a veng sawt.

"Mu lo e." a ti mai a, a ţawngkam chhuakah lungawi lohna nei awmin a hriat miah loh.

"Ti nge i haw daih a?" Ka ti a, chutiang a zawh tlawng mai chu ka tîm riau lehnghal.

"A tlai tawh a lawm." a ti leh mai a, engtin nge bul ka ţan leh takah tihah ka rilru a buai.

"Tlai tawh pawh ni se...." Ka ti hluai a, ka lungawi lohna chu ka aw ah a hre theiin ka ring.

"Naktukah kan sawi dawn nia." a ti hulh a, Mahse kei chuan zanin a sawi fel law law ka duh, a khawi lai tak nge dik lo ngai hriat thuai ka duh.

"Aih tunah sawi ang." Ka ti ve tlat a, a thaw hawk ri pawh ka hre thei, 'min ning em maw ni le' tih lam daih rilruin a ngaihtuah hman.

"Ka chau viau a sin." a ti zuai raih mai. Vawiin a hun hman dan ka hre ve vek a, ka khawngaih ve deuh tho.

"A nih leh, naktukah chuan min be ţha duh tawh la." ka ti hram a, ka laka a awmdan avang chuan ka inthlahrung zo vek, mihran daih bia ang mai ka ni.

"Um...." a ti ringawt a, min be chak vak lo tih ka hriat takah chuan keimahah hian na zawk lai a awm. Awmdan ka thiam lo lutuk chu a hrehawm tak zet.

"Muttui phawt le." ka tih pawh chu ka aw a dik lo zo vekin ka hria, keimahah ka beisei ruk ang a thlen loh avangin phurna pakhatmah ka nei lo.

"Muttui." a rawn tih chuan ka hmet tawp zui a, khumah chuan ka la ţhu vang vang. 

Kan inbiak huna thil thlen dan tur vel chu helh berah ka nei leh ta tlat, kan thu a inhmu lo mai ang tih ka hlau bawk si. 

Zingah pawh tuk dang ang bawkin morning wish ka dawng leh thlap a, sawi lem lo mah ila a ruala kal turin ka inring ve leh tawp.

Zuitei kal hnu lawkah a rawn lang ve leh mai bawk a, ka hman tawh tho nain inbiak fel phawt ka duh angin ka chelh ve rih.

Nu dawr kala a chhuah hlan a ni hlauh bawka remchangah lain sawi fel hman ka tum hle bawk.

"Nizan kha eng nge i awmzia? Awmdan tur min ti hre lo a lawm." Ka ti hap a, ţhut pawh kan ţhu lo, ka hmaah a ding rûn a, kekawr ipte zenin min en ngar mai bawk.

"Nizan kha chu theihnghilh daih rawh." a ti sam mai a, a hmelah pawh a ngaihtuah tawh lo tih a hriat theih. Kei erawhin sawi fel loha liam tir ka tum lo bur, ka mut theih loh phah tih pawh a hre tawp lovang.

"Aih ka theihnghilh lo ang, sawifiah phawt rawh." a mitah tak enin ka nawr lui ve zel tho.

"Khapa lo len dawn avanga min zui ve lo i ni chuang lo a ni lo em ni?" a ti sup, ka bu nghat a.

"A nih chuan a fel a ni mai a lawm." a ti hluk a, ka lo duhkhawp lo hle.

"Nizan khan min ring lova, tunah chuan min ring tawh i tihna maw?" Ka ti ve nghat, ka lawm miah lo bawk. Amah avanga ka rilru buai hman zia a hre miah lo a nih hi.

"Um.... chutiang deuh chu." a ti leh mai a. Ka lungawi lo lutuk chu tihlan dan tur pawh ka hre lo.

"Chu ti chu a ţha a nih chu. Kal tawh ang." tiin ka chhuak zui a, ngawi rengin min zui ve mai bawk.

Nizan a min khawsak khum dan ka ngaihtuah let phei chuan ka lungawi lo tak zet ti ila a dik ber ang.

Ngawi rengin kan inphur chhuak a, kawng tluan chuan kan inbe lo hrim hrim. Nidangah chuan keimah zawk ka ţawng deuh reng ţhin, mahse vawiin chu ka ţawng chak hlawl lo.

Kan dawr kawta a din pawhin ngawi rengin ka chhuk a, amah zawk chuan, "Nilen nuam le." a ti a, ka bu nghat ringawt. Tlan chhuak lawk loin min en vung vung a, ka lungawi zân bik lo tih chu a hrethiam tho ang.

"Kal tawh rawh." tiin ka luh san ta daih. Ka ţhiante lah chuan an lo en uluk hlawm ngang mai. Nidang ang chu ni se ka nuih an ti za leh viauin ka ring, vawiin chu ka nuih a za thlawt lo.

Vawiin chu UBzi a rawn lang hma ve khawp mai, ni tin a rawn lang ngai chuang lo nain rawn lan loh tawp ni hi chu a tlem zawk a tih theih ang. UHruaii avangin min biak chhiat phah chuang lo, biak chhiat tihah a ţhiannu a nih angin kei min huat pui ve kher lo ka tihna a nih chu. A awmdan a ngai reng a, a tir aţanga a fel ka tih kha tunah pawh ka la ti reng.

Chhunchawlh kan neih hmain UBzi a chhuak leh a, customer an rawn lang ve zut bawk nen mahni buai buaiin kan buai tlang leh.

Chhunchawlh kan neih dawn chuan Fakpuia a rawn lang hlawl mai. Kei tak chu bathroom ka hman laiin ka ni nghe nghe.

Ka hmuh tum loh lutuk a ka hmu chu ka en reng ringawt a. Zorini'n, "Chawlh lai te chauh i chhuah kan phal a nia." a lo ti fiamthu a, "Ti maw?" Ka'n ti ringawt a, tun angah kan inhmuh ngai loh bakah a la rawn kal ngai lo hrim hrim bawk nen mak ka ti ve deuh bawk.

Zuali pawhin, "Kal vat vat rawh u, chawlh a zo mai dawn." a lo ti ve bawk a.

Sangsangi erawh a lo ngawi kar, a star zia a sawi uar ţhin bawka a hmu hnai ang reng bawk nen sawi ve tur a hre lo chu a demawm loh khawp mai.

"Kan rei lo ang." tiin min rawn kai zui a, ka kut lak sawn tumin ka ţang phat, midang awmnaah leh nghal a ţul ka ti vak lo. Mahse min thlah duh chuang lo, min vuan nghet tulh tulh zawk.

Dawr aţanga kan kal hlat deuh hnu chuan ka ding dat a, a ding ve chut.

"Ti nge i rawn lan thut a?" Ka ti hliai a. Zep loh chuan tun dinhmunah hi chuan ka be chak vak miah lo.

"Thil tui deuh ka lei ang che." a tih pawh chuan ka hlim phah eih lo.

"Ka let leh zawk mai ang." Ka tih chuan ka kut a chelh nghet sauh mai.

"Kan rei dawn lo." Tiin min kai lehnghal dawr dawr, ngawi rengin ka zui ve zel a, min Kai miau a zui loh theih pawh a ni lo.

Thui vak lo min kalpui hnuah building pakhat chunglamah min chhoh pui a, step min zawh kual pui leh hnuah kan lut ta hram. In chungah a awm nain kan zu lût thla ni maiin ka hria. A hmun a nuamin a veng hle a, kawngpui lun deuh bul lawk ni mah se thawm bengchheng hriat tur a awm mang lo.

Ţhutna awla kan ţhut hnuah ei tur kan order a, min en reng tih ka hria,hre lo derin phone ka bih lui tlat.

"A nuam i ti em?" a tih chuan, "Um." Ka ti ringawt a. Zep loh chuan a nuam thlawt, kan boruakin zir phei se chu ka nui reng duh hial mai thei.

Ka phone khawih lai chu a rawn phih lâwp a, a ak nghal daih. "Rawn la teh." Ka ti hlak a, midang mitmei ven chu ngai lo se ka chhuak daih duh ang.

"Aih." A ti hmuk a, a laka lawm lo sa ka ni bawk nen ka thin a ti rim lutuk.

Ka ngawi ta kar a, ţawng chakna ka nei lo hrim hrim.

"Nizan kha chu...." a ti a, sawi zawm lovin a thaw leh hawk phawt a.

"Ka tih palh." a tih leh pawh chuan engah mah ka ngai duh lo, a thusawi chu hria ang pawhin ka awm duh lo.

Ka ngawih reng avang chuan tih ngaihna dang a hre lo nge ni, "Ka ti tawh lo ang." a rawn ti hulh. Engtin mah ka chhang duh chuang lo.

"Mipa dang lakah ka chan ang che tih ka hlau ţhin." a ti sup a, amah pawh en lem lo chuan, "Ka hria e." ka ti hmak a, a lo nui tih ka hriat chuan ka chhang ta ta chu ka inchhir.

"Nia I hria ang." A ti phawt a, "Nizana Ţana te in a kal i hnial chhan kha kha pa lo lan dawn vang kha a nih ka ring a." a ti leh a, ka rin dan vel a ni.

Kan thil order an rawn dah avangin a ngawi leh rih a. Midang an awm hla ta maw tihah, "Khatiang a chet khum che kha ka tum lo." a tih chuan ka lo ner nawk. Amah avangin rilru buai deuhin ka lo awm ve a, ka haw reuh lutuk.

"Mahse min rin ngam ang bawk hian ka rin che a tul tih ka hria a, i rinawm tih ka hre bawk a." a ti leh a, ka thil chah chu ka ei pah mial mial. A rilru ka hrethiam ruak tawh bawka thawkhat chu a veng tawh hrim hrim.

"Nizan kha chu ka thiam lo hul hual tih ka pawm. Titau tawh lo la Sawmbawih." a tih rual chuan ka soup hawp lai hakin ka khuh nghal bawrh bawrh.

"I ţha em?" a tih chu chhan pawh ka chhang thei lo. Ka khuh zawh chuan rum zetin ka melh a, tih sual nei lo ang hmakin min lo en reng mai.

Hun dangah zawng Sawmi min ti lawl lawl a, khatiang a min tlawn a duh avanga Sawmbawih a tih khan min ti phu zawk ti ila a dik ber ang. A duhna ah hi chuan a zak thei lo ve ngawt mai.

"I men rum khan ilang sexy sawt mai." thu tak zeta a tih chuan ka thaw hawk a, a ţawngkam hman duh dan te lah hi a!

"Ei thaui rawh, let vat ka ngai." Ka tih chuan, "Yes Boss." Ti vutin a ei zui nghal a, hetiang hian a nghal thiam tih hi hria an tam ka ring lo reng reng.

A mizia leh rilru puthmang tur ngaihtuahin nizana a awmdan chu ka dem ta lo. Zuata sawi danah pawh ama ngaihdan zeldina dik ber ni a ngaih chang a nei ţhin a ti a, mahse ti chung chuan ka laka rinna a la nghat thei zel chu ka lawm tak zet.

Dawr kan chhuahsan chuan kan boruak a pangngai leh vek tawh a, ka hnathawhna thleng min thlah leh thlap. Rawn lut tawh lovin a let leh nghal thung a, a ngaihdam dilna a ni tih ka hriatthiam ve tho avangin ka hlim veng veng mai.

**

Kar loah KTP group night kan thleng ta der. Ka rin aiin inkhawm kan ţhahnem phian lehnghal. Mahni lo maha zâm nak a laiin ka ţhiante ho an la rawn lang kim vek zui a, a mikhual ber ka ni bawk a min rawn tawiawm ţha hlawm khawp mai.

Kan band kan zai zawh hma zawng chu rilruah thildang a leng lo, ka rilruin ka ţawngtai mawlh mawlh reng a, ka zâm lutuk chu programme tan tirh aţangin ka kut a vawt ngiak reng a, ka bulah Fakpuia a ţhu a, ani pawhin ka zâm zia chu a hre thei vek ang.

Ka kut vawt hit thler chu a rawn hûm a, ani chu a kut a lum ţha bik khawp mai. Fakpuia leh Kei leh Hminga te group khatah kan awm a, group liah kan inthen avangin programme an duan lawk pawh a hlimawm tham viau mai.Zâm lo tur chuan min hnem ve hlawm thliar tliar mah se awmzia a nei thui lo tlang khawp mai.

Kan band kan perform chhung zawng chuan rilru leh tih tak zetin ka zai a. Kan khuaah te pawh ka lo zai ve fo tawh, zakin zâm ţhin viau mah ila ka han din chhuah meuh hi chuan a hla thuah ka cheng hneh tawh ţhin a, ka duh ang takin ka sak chhuah theih phah ţhin bawk.

Kan perform zawh ve leh ka ţhutna lama let nghal lovin bathroom lam ka pan nghal a,kal kawnga min lo chibai tawk awm te chu lawm awm viau mah se ka zun a chhuak tawh lutuk a ka be kawi rei hman hlawm lo.

Ka zai hma aţang tawha zun chhuak ka ni bawk a ka zun zawh chuan ka thawveng huai thei.

Darthlalang a ka inen lai chuan midang pawh an ve sap sap a, ka bul chiaha rawn ding chu darthlalang aţangin ka en a, Elii'n min lo melh ngar mai.

End of chapter 16

💥