BLUEMING 🦋 CHAPTER-17 BY UNKNOWN BELLE

BLUEMING 🦋

BY UNKNOWN BELLE

CHAPTER - 17

Min en reng mah se engmah a sawi zui loh avangin ka ngaihven duh lova, ka kut ka sil lai chuan,"I va zai thiam ve." a rawn ti a, min en uluk hle tih ka mit sirin ka hmu thei. Engmah ti lovin a ding bawk nen ngaih te pawh a ti ţha lo dawn dawn mai.

"Ka lawm e." ka ti ve mai a, amah pawh ka en ta chuang lo. 

Min rawn din hnaih hret tih ka hriat rual chuan ka en ve ta nge nge, a nui lo a thinrim hmel a pu lo bawk, lawm hmel pawh a pu chuang lo. Midang rawn lut ho an chhuak deuh vek tawh bawk nen ngaih a ti ţha lo reuh.

"Fakpuia hian a duh tak tak che i ring em?" zawi deuh sep a a tih chuan ka en reng ringawt. Fakpuia bialnu hlui ni mah se mimal taka inhuatna an nei chuang lo bawk a, kei pawhin huat chhan tur ka nei lo bawk. Pangngai taka inbe thei kan nih lai kara chutiang thu a sawi chhuak chu mak ka ti ve deuh.

"Ring e." ka tih chuan a nui lui hak a, a ngeiawm thiam khawpin ka lo hria. A kut a sil zui a, min en lem lo chuan, "Ilo inrin lawk theih nan, nuthlawi zunah a lo uai san daih thei che a nia. A nih loh pawhin ţhian mipa nei duh miah suh." a ti a, chhan enah pawh ka en lo.

"Fakpuia te ang chelh nghet tur chuan i zei ve viau chu a ngai ang. A nih loh chuan a tal chhuah san ve daih mai ang che." a ti leh a, ngeiawm takin a ţawng hran lo, dawngsawng tu nih pawh a nuam chuang lo.

"A bialnu hlui ka nihna angin thurawn tlem ka pe ve che a nih chu." tiin a nui hak a, min chhuahsan zui ta a. Ka thaw huai thei mai.

Ngeiawm han tih hluai tur chu a ni chuang lo nain kei ai nau a nihnaah a huaisen ka ti khawp.

Darthlalangah in en leh te tein thawk ka la vak a, midang an rawn luh leh rual chuan ka chhuak ta thuai.

Ka ţhutna ngaiah bawk ka ţhu leh a, ka ţhut fel rualin ka kut a lo chelh leh vat. Kan hun hman chhung zawng chu ka kut a chelh ngat ngat, a chang leh a malis thul. Kan hun hman pawh boruak a zângkaiin ţhalai rual vek kan ni bawk a, kulmuk lutuk a hmang kan ni lo bawk nen a hlimawm khawp mai.

Kan ban meuh chuan dar 11 a pel der tawh. Kan zai nasa bawk a ka chau hnâp maiin ka hria.

**

Kan damtlang a hun a kal ve zel a, krismass pawh a hnai leh uar tawh. Boruak a nuam chho tawh bawk a ka awmnain zir ţhin se chu ka lung a leng thei ngawtin ka ring.

Ka lunglen chhan hi han sawi fak tur ka hre lem lo, ka ngaih ţhin ni a ka hriat chu tun ang boruak a kan khaw awmdan vel a ni ber hian ka hria. Tun hmaa tun ang boruak kan hman chhoh dan mithla a la cham ho te hi an ngaihawm ka ti ţhin. 

Chawhnu her tawhah kan kawt a rawn dai chho a, ţhian ho innghakkhawmin ni daihlim chinah kan infiam a, tlai tak thlengin kan infiam ta ţhin a. Lungkham nei lovin kan hmuh phak chinah khan kan lungawiin kan hlim thei em em a, khatiang hun kha tun ang boruakah hian mitthlaah a lo lang ţhin a, a mihringa te ni lovin khatiang a kha ka ngaih ber chu anni in ka hria.

Inrinni a ni a, nizan lamah ka pain min rawn biain Sawmzoa tlawh turin min rawn chah a, phone kaltlangin inbe fo mah ila ka tlawh khât em avangin ka hnial duh ta bik lo.

Chaw eikhamah ka insu leh te te phawt a, Zuitei sawm ka tum rilru kha a nia,mahse Buangi a hman dawn loh avangin an dawr kha aman nghah a ngai dawn si a, ka sawm duh ta lo.

Keini thawhna pawh hi inrinniah chuan kan khar bik lo, Zorini'n a hawng ziah a, puanthui a te ho erawh kan khawih tur neih a zirin kan kalin kan kal lo mai ţhin.

In aţanga ka chhuah chuan dar 10 a pel der tawh. An hostel awmna chu Busin ka pan leh mai a, hetia Bus a chuan veng veng hi nuam ka ti ţhin. Tumah min hre tu awm lovin, hahdam deuhin, thawm bengchheng dangin min ti buai lo bawk se, chutiang chu ka nuam tih ber pawl a ni.

A mamawh tur leh ei tur ka ken ho nen ka inkhai bawr ve khawp mai. An hostel kawt ka thlen dawnin ka call a, gate pawnah a rawn chhuak thuai a, hmuh loh karin a lo tlangval ve tawh khawp mai.

Hostel Gate chhunga ka luh ve a rem loh avangin amahin a inkeng lut a, rei loah a rawn chhuak leh thuai.

Kan inhmu khat bawka sawi tur kan ngah ve ngang mai. Mipa leh hmeichhia ni mah ila kan inkawmngeih ang reng a, ka u aiin ka nel zawk bawk.

Chhun thil ei turin ka chhuah pui a, a remchang bawka chawhnu lamah pawh kan leng kual leh rih. A lo chhuak khat be tho bawk nen nuam a ti ve thoin ka hria.

Hostel pana footpath kan kal laiin Car pakhat hi kan zawnah a rawn ding a, driver seat aţangin Biakfela a rawn dak chhuak vut.

"Teh daih che chuan." ka lo ti hluai a, Sawmzoa nen chuan min enin, "Eng nge intih a? He lamah daih ka hmuh che?" a rawn ti a. Sawmzoa chu ka nau a nih thu leh hostel a a awm thu te chu ka hrilh luam.

"Kan venglama i lo lang daih chu mak ka ti reng a ni." a tih chuan an veng a ni tih ka hre ve chiah.

"Lo lût ula ka lo thlah ang che u." a ti a, ka hnial vat.

"A lawmawm viau nain a hnai tawh lutuk a ngai lo mai." Ka ti a, "A nih leh i haw dawn hnai em?" a tih chuan ka haw ţep thuin ka chhang a, "Ka lo thlah ang che, ka hman a lawm." a ti leh hram. Han hnial tung chu a nuam chiah lo.

"Sawmzoa hi thlah phawt ka duh sia, tibuai duh lo mai rawh." Ka tih pawh chuan, "khi lai dawrah khian bungraw dah tur ka nei a, ka buaipui chhungin i rawn let hman ang." A ti ve tlat bawk nen ka hnial ta lo.

Sawmzoa nen a an hostel kan pan lai chuan, "A ngaizawng che a ni maw?" a ti a. Ruatsanga ţhianpa a nih thu chauh ka hrilh.

"A fel hmel khawp kha." a tih chuan bialpa ka neih thu ka hrilh a, a awih lo lutuk chu ka nuih a za zawk.

"Ka nu te lo hrilh reng reng suh ang che." Ka tih takah chuan a awih ve deuh chauhin ka hria.

"Zu heh deuh te kha i lo ngaizawng ang e." uangthuang taka a tih chuan a hnungah ka beng awk a. Unaua hmeichhe awmchhun ka ni bawk a, ka nu hian zu in mi ka Ngaihzawn hi a hlau thei khawp a, ka zawm ţha viau chuang ka hria.

Hotel a a luh hnuah ka let leh a, Biakfela inthlah tir chu ka hreh riau mai lehnghal. A sual hran lova, ţhian pangngai takah pawh kan inchhuah thei reng, mahse Fakpuia'n a thik zia ka hria a, lo hnaih ţalh tum chu nuam ka ti lo.

Min hmuhna bul lawkah a lo in park a, min hmuh rual chuan a rawn chhuak vut bawk. Ka ţhutna tur a hawn pah chuan, "Sawi lo la chu i nau a ni tih ka hre thei miah lo ang." a ti a,za lo zetin ka nui ve sak ringawt.

Rawn lut zuiin a tlan chhuak nghal a, "Bialpa i neih takah hian i induh riauin ka hria." fiamthu ti tak deuha a tih chuan ka lo nui ve leh ringawt a, a hrethiam a nih chuan pawi ka ti lo zawk.

"Ruatsanga'n a sawi khan mak ka ti deuh a, mahse ani chu a inthlahrung thei em a." a ti leh a, a thusawi chu awmzia ka lo hre lo khawp.

"Ruatsanga i sawi takah chuan tun hnai chho hi kan inbe khât, an chanchin i hre ngai em?" Ka tih chuan a len zeuh ţhin thu a sawi a. Titi pangngaiin kan inkawm chho ve leh mai a, Ruatsanga chanchin kan sawi a ni deuh ber. Ani ai ka hriatna a rei tawh zawk bawk a sawi tur ka ngah ve khawp mai.

"A tir kha chuan in inngaizawng emaw ka tia." a tih chuan "Ţhian kan ni ti na na na a!" Ka ti hlak a, a lo nui ve hawk mai.

"Ka hre tho a, mahse....." a ti hluai a, a sawi zawm ta lo.

"Ruatsanga hi nula lo zawn pui rawh, anu pawhin a vei pui a nia." ka ti a, ka nui tho nain ka ti tak tak.

"Nia....ani hi chu....amahin a inhai kaw thei lo tlat." tiin a nui ve tho a. 

Traffic jam a kan tan lai chuan , "Saw mi te chu ka hmelhriat an va ang ve." a ti nuah nuah a, a hawina lam ka en ve chuan ka chhungrilah hian che zawk a awmin ka hria.

"Hruaiin a ang hle mai." a ti leh a, a ngaihven zui lem hlei lova. Hruaii a tih chu a nih ngei pawh ka ring. Bike khalhtu saw a hmel hmu lo pawhin tu nge a nih ka hre thei.

Vawiin lamah a hna thilah tih tur a neih thu kha a sawi ve si a, hmeichhia nen na phur ve leh mai mai tho bawk si. A buai dawn avangin ka sawm duh lo kha a nia, dawt min hrilh nia ka ngaihna chuan min ti tê rawih rawihin ka hria.

Bike a chuang an nih bakah kan hmalama awm an ni bawk nen kan hmuh phak lohah an tlan thuai a, rilruah erawh an cham reng thung.

Kan in kawtah car a ti ding a, ka chhuk nghal thuai. Ani pawh rawn chhuk vein inlam panin kan inzui a, rawn luh a tum loh thu a sawi avangin ka sawm lui duh lo.

Car kan la kal hlat san lo ang tihah Bike ring zetin a rawn ding ri tuar a, VanLalfakzuala bak a nih ka rin loh avangin ka hawi peih lo. Biakfela erawh a lehhawi a, engmah sawi zui lovin kan kal ngai chuan kan kal leh.

Kan hnunga rawn pen thawm chu ka hre reng, mahse ka runluih ve chak hrim hrim avangin Biakfela ka kal hnaih sauh. Hmeichhe len pui chhuanlamin dawt min hrilh nia ngaihna ka nei tlat a, a hrehawm tak zet. Min phatsan tih lam chu rilruah a lang pha chuang lo, mahse ka thik em vang a ni ber ang chu, runluih chakna in ka khat tlat.

Min rawn din hnaih rual chuan ka kawngah kuahin alamah min pawt hnai dawt a, ka lo inring lo bawk nen ka pai nak thei.

"I ti na ang a sin." Biakfela'n a lo tih chuan a rum nghut a, a thawk lak danah chuan a lungawi lo thawkhat tih ka hre thei.

"Ka bialnu hi ka lo be ve thung ang chu." a ti kher chu ka run tawk a tling em em. Mipa puitling an ni tawh a, Biakfela pawh mi â a ni bik lo, chutiang a a ţawng khum kher chu ţullo ka ti khawp.

"Biakfel thingpui chu rawn in hram la, i rawn thleng hla si." ka tih chuan ka kawng a hmer salh a, ka ip zawk thei.

"Nidangah kan ti zawk dawn nia. Ka kal phawt ang e." tiin min let san a, a inkhalh liam thleng chu ka thlir reng a,a lan theih loh ve leh inherin kawngka lam ka pan vat. Min thlah tawh a, a awm ve tih hre lo ang hmakin ka awm bawk.

Kawngka ka hawng tur chu ka kutah chelhin min lo dang a, ngawi rengin ka thing nawk.

"Sawifiah teh!" a ti hmuk a, ngaihsam fe hian, "Eng ber maw?" ka ti liam puat a. Kawngka hawngin ka lut lui tho, ani pawh a rawn lut ve nghal.

Vanneihthlak ka ti dawn nge vanduaithlak ka ti zawk dawn ni, inah chuan midang an la awm lo zui.

Room a lutin ka bag ka dah fel a, min rawn zui lut ve tih ka hriat chuan thinrim ru zeta thaw hawkin chhuah lehnghal ka tum a, min lo chelh leh tlat tawh.

"Eng nge!?" Ka ti hlar a, ka pawr tawh viau bawk.

"I nau hostel awm i tlawh emaw tia." a ti chhur chhur a, chhan pawh ka chhang peih lo.

"Malsawmpar!" A tih hrawk chuan vin deuha biak ka duh a, mahse ka thin a rim tun avangin ka ţawng vin thei lo.

"Haw phawt teh." Ka ti ta tawp. 

"Khapa i chhuahpui duh vang khan dawt min hrilh tih sawi miah suh." a ti nghut. Ka sa phat thei, ka sawi awm zawk tak a sawi a ni.

"Nang pawh i phurh chhiat loh khawp kha." ka ti hmak. A hawi buai nak te chu ka thin a tirim zual. UHruaii min rawn biak dan zozai ka ngaihtuah phei chuan an lo inphur chu ka thin a rim hluah hluah a ni ber.

"Ti nge kha pa kha i hnaih luih tlat a. Min kawp chu a ni lo tiraw?" a rawn tih leh chuan ka melh ngawt ringawt. Engtin nge khatiang te a ngaihtuah theih zawk.

"Engmah ka sawi peih lo." 

"I tan hian ka pawimawh ve tak tak lo niin ka hria?" a tih leh phei chuan awm ngaihna pawh ka hre lo. Engtin nge chutiang rilru chu a neih theih zawk? Ka rilru tur a ngaihtuah ve miah lo.

"Khatiang khan min sawi hauh suh!" ka ti a, ka aw chu a nem zo leh vek tawh.

"A nih chuan sawifiah ta che. Hetiang a rilru buai deuha min siam ringawt lo hian." a ti hluai a, a chhan pawh ka chhang peih lo.

Nu lo haw thawm avang chuan room aţangin ka chhuak vat a, in chhung a rawn lut hman lo hlauh chu ka thaw huai mai. Eng thil sual mah ti lo mah ila room ah mipa ka awmpui tih a hriat hrim hrim kha ka duh lo.

Ani pawhin min haw phei san ta nge nge, nu a awm chuan kan inbe thei dawn chuang lova, tun atan chuan inbiak loh a ţha zawk a ni mahna.

Ani pawh a lungawi lo ve thawkhat bawk a, kei lungawi lo bawk, tun dinhmunah chuan kan sawi fel thei hmel chuang lo.

Zanah pawh ka inkhawm ta tho a, kan boruakin a zir loh vang nge ni ka zawi vek ni maiin ka hria. Inkhawm tur pawhin ka sawm lo, a inkhawm lo reng bawk.

Zan dangah chuan an ina ka sawm a nih chuan a inkhawm ngei ngei a tih theih ang, a peih ngang loha phone a min rawn hrilh a nih hi chuan ka sawm lui bik lo.

Phone ah pawh min la rawn be leh lo, min be chak rih ngang lo a ni mahna. Biakfela leh Ruatsanga a thik avang hian buai ve zeuh chang te chu nei ţhin mah ila a zaidawh zawnga thu la tu ka nih zel avangin kan intihtauh khum rei tak tak ngai lo.

Tun ţum chu kei pawh ka lungawi lo ve tho bawk nen bul ţan tu nih ka phur hlawl lo.

Zan ka mut hmuna phone ka en chuan UHruaii hnen aţangin message ka dawng leh a. UHruaii lo midang an nih nachhan tur a awm loh avangin a number save lo mah ila UHruaii tiin ka chhinchhiah tawp.

Zan dangah chuan ka chhiar ngai lo tluk a tih theih ang, ti hian a thil rawn thawn ho zawng ka dah khawl a, a hlawmin ka en sak tawp a, engmah chiang taka en sak ka duh lo. Ka rilru tih hnual a tum tih leh Fakpuia nen a kan inkar a bitum tih a hriat reng avangin engah mah ka ngai duh lo char char ţhin.

Mahse zanin na na na chu Fakpuia nen kan boruakin a zir lo ka ti dawn nge, a message lo thawn tawh ho chu uluk zetin ka chhiar a. Fakpuia pawh a la reh hmak mai. 

"Min tibuaitu kan mamawh vak lo a nia." tih hi a rawn thawn hnuhnun ber a ni, a thlalak rawn thawn chu ka download a, vawiin a ka hmuh ang chiah khan an inthuam avangin vawiin ami a nih ka ringhlel lo.

An awmna chu khawi hmun nge ka hre lo, Fakpuia phone hmang lai bulah a ţhu ve a, ama selfie a ni nghe nghe. 

Ka thik lo ka tih chuan dawt ka sawi chiang hle ang. Ti chung hian Biakfela nen kan kal dun mai mai pawh a thik em em a nia, eng rilru nge ma w a put ni.

Ani pawh insawifiah ngai ve tho a nih lai kara keimah chauh min burbun bik te chuan ka rilru a ti na tlat. 

Zanin ber kher pawh chu Ruatsanga'n min rawn be leh. Leng turin min sawm chuang lo nain keimah zawk ka va insawi lut ti ila a dik ber ang.

Ka rilru a kal dik lo lak lawh, kha ti zat UHruaii nen an thlalak dawnga min deuhna thu pawh amah vang chauha ka en liam laia min lungawi loh khum ve tlat te chu ka thin a tirim. Biakfela nen kan inphur ringawt pawh a la vung em em a nia, tun ţum chu ka ţhin a rim ve tak zet. Runluih ve zel ka chak ti ila a dik ber ang chu.

Ruatsanga chuan min lo hruai tur thu a sawi ve mai a, VanLalfakzuala chu hrilh pawh ka tum lo. Min be chak lova, ka be bik lo.

Ruatsanga chuan min rawn hruai ve leh a, ka chhungte hnena ka kalna tur ka hrilh chuan naktuk Sunday a nih avangin haw har lo turin min chah a, ka rei loh tur thu sawiin kan inphur chhuak ta nghal. Kan chhuah chuan 8:30 a pel tawh.

Ka rilru a hlim phah chuang lo nain ina awm reng chu thil ni lo lo ngaihtuah a awl si, hetia chhuah thawven hrim hrim hi ka mamawh.

An in kan thlen chuan NuZobiaki pawh a lo lawm ve khawp mai. Ka kal khat zia te chu min lo hrilh luam a, ka kal khat tawh tak tak reng bawk. Ruatsanga hi a inthlahrung niin ka hria, a hma ang khan min rawn be mai ngai tawh tlat lo. Zanin pawh hi keimah zawk ka insawi lut a ni ber.

Rei ka leng chuang lo, rilruah thil dang a leng meuh si lo nen awm reng pawh a nuam lo. Naktuk Sunday a lo ni kher bawk nen chhuanlam a hmangin ka inthlah tir ta thuai.

Thui pawh kan la tlan hmain Bike chu a tiding a, "Tih tur i nei em ni?" tiin ka chhuk ve mai a, ani pawh a rawn chhuk ve nghal.

A ding ţha te te a,"Eng emaw sawi duh te i nei em?" a tih chuan amah chu ka en kar a, min lo chîk viau em maw ni le.

"Nei hran lo e, i nu hi ţha deuhin enkawl rawh." Ka ti ţha ve mai a, thutak zeta min enin, "In boruak a ţha chiah lo tiraw?" a tih leh zel chuan ka ţang ru ţeuh mai.

"Ţhat loh pawh a awm lo."ka ti tawi tak ringawt.

"Le...sawi rawh le." a ti dam thluam a, ka sawi hreh tho tho. 

"Ka haw zawk ang, kan tlai mai mai." ka tih chuan a, "Insawi thawl i mamawh a nih kha." A lo ti leh mai a. Ti nge maw hriat ve ţalh a duh ni!

"A ţangkai lo." Ka ti hmuk, ka duh ai ka ţawng bul bawk. 

"Sawi la." a la ti ţalh a, hahthlak ti zetin ka thaw hak.

Khawiah mah a sawi chhuak dawn chuang lova sawi hreh chhan tur ka nei chuang lo ti rilru chuan ka sawi chhuak ta hram. Mahse ka thusawiah erawh ka fimkhur khawp mai. Fakpuia chu a puhmawh rikngawt bik loh nan ka thiam lohna pawh ka sawi tel ve tho bawk.

Ka sawi tur awm chin ni a ka hriat ka sawi zawh hnu chuan ka thaw hawk a, "Kha zawng kha." tiin awmze nei lovin ka phar hliai ringawt. Ka ţawng chhung zawngin uluk em emin a lo ngaithla a, engtin tak min ngai ang maw.

"I duh tak zet a ni tiraw?" a rawn ti teh daih a, hei lo deuh sawi tur a hre lo em maw ni.

"Aw." inringtawk takin ka chhang a, ka duh tak zet miau a, phat buai ka tum lo.

"Mi vannei tak a ni." a tih sup chuan ka ner nang a. 

"Kei pawh ka ni ve tho a lawm." Ka ti hlak a, lehlam zawng tak chuan ka thusawi chu a nuihzatthlak ngawt ang. Ka rilruin ka dem thu a sawi mawlh mawlh a, midang lakah chuan ka ţan rilru leh em em tho si.

"I hmangaih em?" a tih chuan ngaihtuah chiang hlei loin ka nui lui hak a, hetiang inzawh te chu a!

"Min chhang phawt teh." Thu tak zetin a ti leh a, ka rilru a vak kual thui khawp mai.

Ka duh zia chu kei ngei pawhin phat buai ka tum lo, ka phal lo zawk. Mahse hmangaih tih takah hi chuan ka chiang ngam rih tlat lo. Inngaihzawnna boruakah hian engtin nge an hmangaih leh hmangaih loh an hriat theih pawh ka hre lo a nia, a lo piang chho ve mai turah ka ngai ve tawp ţhin kha a nia, tunah tak phei chuan Fakpuia nena kan inkar hi hmangaihna thu hla lamah ka la ngaihtuah ngai lo hrim hrim.

"Ka hre lo." Ka ti hap a, ka hmangaih lo tih tawp kha ka thei chuang miah lo.

"Nang a nei che hi a vannei tak zet." A tih chuan ner nawkin,"Min phu lo i ti deuh elaw." Ka ti fiamthu a, ani erawh chuan nui miah lo hian, "Mi ţha tak i ni a lawm." a ti sam mai a, chutiang thu chu dawnsawn nuam ka ti miah lo.

"Haw phawt teh ang, a tlai zel." Ka tih takah chuan ani paw'n Bike a tinung ve leh ta a.

Eng em min sawipui chiam lo mah se ka rilru kalbing lutuk pawh a reh huaiin ka hria. Ka chhuak ta chu ka inchhir lo tawh khawp mai.

Kan kawtah chuan a din rualin ka chhuk thuai a, ka lu rawn tuai zauhin, "Hlim deuhin awm rawh, i phu ber." tiin a nui suk a, kei pawh ka nui ve seih mai. Min duhsakna thu hriat tluka thu dawnsawn nuam hi a tam lo reng a sin.

A tlan liam thleng chu ka thlir a. In lam ka pan lai chuan Fakpuia lo dinna ţhin lam ka hawi chho thut, mahse vanneihthlak ka ti dawn nge ni a awm lo hlauh.

Ka chhuah tirhin lungawi loin ka thinrim khum vanga amah pawh hrilh loa kal ka ni nachungin in ka thlen meuh chuan inthiam lohna riau ka nei leh der tawh mai. A va hahthlak ţhin tak!

Ka chhungte an mut tawh avangin room lamah ka inkhung zui a, ka phone ka ken chhuah tak loh chu phur lo zetin ka ban a. UHruaii message kha a lo awm leh ngei awm sia, nidanga en liam mai thei kha vawiin chu ka rilru a khawih danglam pha ta tlat, chuvangin en tawh loh hram ka duh.

Ka rin ang chiahin Fakpuia hnen aţangin eng message mah ka dawng lo. Ka dawn ka ring lo sa viau nain a awm lo tih ka hriat chian takah chuan ka hnual ruih thei mai.

Zuitei message lo awm chu ka hawng a, a lo thawnna a lo rei tawh, a missed call hmu mah ila message a hnutchhiah tho avangin call let ka tum lo.

"I chhuah tur Fakpuia i hrilh lo em ni?" tih zawng hi a lo thawn. Ka lungphu hi a rang dawtin ka hria. A lo kal tihna em maw ni le? Mahse a message pakhat mah hmuh tur a awm bawk si lo. Ruatsanga te ina ka kal a hriat chuan a lungawi lo zual ngei dawn sa, ka phone ka keng bawk si lova a lo kal tih min hrilh turin Zuitei pawhin min rawn call a nih ka ring ta.

Phone kaltlang ringawt ni lo hmaichhanah ngei sawisel duh ţhin a ni tih ka hria, a rawn kal a nih pawh ka ringhlel lo.

Tunah tak chuan ka thinrim ve na te chu an te rawih rawih tawh. Mahse rilru tih khauh hram hram ka duh. Keimah lam chauha midang venthawn ngai a nih bik na chhan tur ka hre lo, amah avanga ţawngkam mawihnai lo tak tak ka dawn zozai te hi va hrilh vek mai ka duh. Ani tan chuan hmeichhe buaina a ni leh daih emaw kha a ni awm si a. Tlai lam ang em em chuanin thinrim tawh lo mah ila ka la hmin zân chuang lo.

UHruaii message lo awm chu ka chhiar leh ta nge nge, an pahnih hian ka ringhlel pawh a ni hran lo. UHruaii hian a ngaizawng hle tih chu ka hrethiam ve tho, mahse Fakpuia ber a rintlak a, ka ring em em bawk. Chutiang chuan ti nge min ngaih ve mai theih loh le....

Zingah pawh a message a awm lo, hetiang hian kan la awm ngai lo bawk nen khawhar na riau ka nei a, mahse biak tumna ka nei chuang lo.

Ngaihsak miah lo anga lan tum mah ila min rawn biak mai ka rinna chuan phone bawk min en tir leh ţhin bawk si. A last seen pawh nizan lam char char a la ni.

Zuitei chuan min sawi pui ta reng a, nizana a lo kal thu leh ka kalna tur ka hrilh loh avang te chuan min dem hmel viau mai.

Kei pawhin zep nei miah loin nimin lam thil thleng chu ka hrilh ve vek a, UHruaii'n min rawn biak ţhin dan ka hrilh tel lo thung.

Ka rin ang chiahin tan zawk a nei lo ve ve, inbe ţha thuai turin min duh tak zet tih ka hria, mahse bul ţan tu zawk nih chu ka hreh hle thung.

Chawhma inkhawm bana ţhalai ţawngtai inkhawm naah ka hmu hlawl mai. Zuata te nen an lo ding ho a, min ngaihsak ang pawhin a awm lo. Nidangah zawng a tel ngai si lo vawiin a a rawn tel chu hun dang chu ni se ka lawm ngawt ang, mahse hetia a rawn lan ve avang hian kan awmdanah Zuata'n ţullo puiin kan boruak an hriatthiam phah dawn hrim hrim. Kan ţhian dangte an tel ve lo hlauh chu a lawmawm letling phian mai.

Ţawngtai inkhawmah pawh rilru bet lo deuhin ka awm phah, a zia lo tak tak. 

Kan ban hnuah thingpui in turin ka kal nghal daih. Amah aimahin Zuata khan min rawn pawh a tum dawn tih ka hre sa. Chuvangin pumpelh hram hram ka duh.

Thingpui inzawhin chawhnu inkhawm turin Biakin ah ka lut zui nghal daih bawk a. Ani pawhin min be chak vakin ka ring lo, inhmu rih lo ila a ţhat ber ka ring.

**

Kan inbiak loh na pawh karkhat a liam der tawh. Ni tin zan tina ka hmuh leh biak a reh ta tlawk tlawk mai chu a hrehawm tak zet. Tunah tak phei chuan a lakah ka inthiam lo der tawh zawk. Bul ţan tu zawka tan ka hreh ve ting tang tawh bawk si. Ani pawh a reh hian a reh hmak a tih theih ang.

Inhmu loin inbe lem lo mah ila UHruaii hnen aţangin an thlalak ka dawng awl lo, ka hmuh apiangin a laka ka rilru nem tawh pawh a let leh phah ţhin ti ila a sual lovang.

Ka awm leh awm lohah a buai ve vak lo a ni ngei ang. An thil ei chhuahna deuh hlir ka dawng ţhin. Zep rual lohin ka thik thei em em bawk. Tih ngaihna vak ka hre bawk si lo a hrehawm tak zet.

UHruaii nen an inzui nasa tih chu ka thawhpuite ho pawhin an lo hre ve. Min zawt dawt ngam bik lo niin ka hria.

UBzi rual hian a rawn lut ve leh zauh ţhin a, chutiang hunah chuan an titi na karah an sawi lan zauh chang ka hre ţhin. A ruala ka kal ngai tak loh avang hian ka ţhiante chuan min ringhlel deuh niin ka hria, chu ti ni loah chuan UHruaii titi hmang chauh chuan ngaihdan an siam dawn lo tih ka hria, kan inngaihzawn hma aţang tawha an hriat ţhin a ni a, a mizia ve hrim hrim hi ngaiah an nei niin ka hria.

Phone kaltlang a a ţawngkam hman duh dan ţhin ngaihtuah chuan a takah min be ngai lem lo, Fakpuia bialnu ka ni tih a hre ve tho,mahse hmaichhanah engtin mah min ti ngai lo ringawt pawh a ţha vek mai e.

Hun a liam zel a, kan inbiak lohna ni a rei tulh tulh a, ka lung a lengin a ngaihawm ka ti ţhin hle. Mahse kan inbiak lohna a rei tawh bawk nen ka tan tak pawh be hmasa tu nih a inthlahrunawm tawh zawk. 

Kan inthen loh na chu kan sawi chian loh vang chauh niin ka hria. A hrehawm ka tiin ka thaw a tipik ţhin. Ni tin deuh thaw UHruaii nen an thlalak ka dawng ţhin si a, thik viau mah ila tih lan ngaihna pawh ka hre lo. 

A inkhawm ngai lo a, pawnlamah ka hmu ngai hek lo. Zuitei leh Zuata te bawkin kan inkar fello chu an hria a, puitling a chhiar theih vek kan ni tawh bawka anni chuan min nawr lui duh lo. 

Zuata kha chuan,"A mizia i hria a, hmeichhia zawk i nih angin tlawm zawka tan hreh lutuk suh. Hetiang a a awm avang hian i laka a rilru puthmang a danglam phahin ka ring lo, chuvangin nangmah inringtawk la, a laka i danglamna kha vawng tlatin chet la hmasa tu zawk nih hreh suh. A tan hian hmeichhe dang an awm lo tih chu kei ang thoin i hrechiang ang." tiin min hrilh a.

A thusawi chuan min fuih phur viau nain a thlalak ka dawm ţhin nen hi chuan ka phur ve na te an kiam nghal rawih rawih zel. Chuvangin hun ţha rawn inher chhuah hun ka nghak tawp ti ila a dik ang. 

*

Dawr aţanga ka haw hma deuhin Biakfela a rawn lang a, ţhian ang chauhin min kawm tho niin ka hre bawk a ka inveng tun duh tawh bik lo. 

UBzi nen an inhre bawk a ka thawhpuite pawhin an nel ve tawh viauin ka hria.

"In va buai awm ve a." a rawn ti lut a, Zorini,"Chhunah te lo kal ta che, min treat hman lo tawk chiah hian i lo lut ve ziah mai." a lo ti hlak a, kan lo nui dar dar.

Sangsangi pawhin,"Min treat hreh vang a lawm tun angah zel a rawn kal." a lo ti ve bawk a, an inngam tlang tawh khawp mai.

"A lehpekah chuan thil tui tawk ei turin in lo inring tawh dawn nia." Biakfela'n a tih chuan a tih duh tak tak an rin loh thuin an lo chhuah chhal hlak tho.

"Inbang thei ţep tawh em?" a tih chuan kan hman ţep thuin ka chhang ve mai a.

Zuali'n, "Dawr i khar pui dawn a ni maw?" tiin a lo fiam a. Zorini hian dawr a khar ziah ţhin a, a nghak rei ţhin bawk. Chuvangin tlai tak thleng a awm ve theih nan a lo chhaih a ni ber.

Min nghah reng takah chuan a rualin ka haw ta nge nge a, ka ţhiante chuan eng emaw ngaihdan tawk chu an neih ka ring. Min zawt dawt ngam lo mai mai niin ka hria.

Kan in kan thlen hnua lut tura ka sawm chuan a lo pawm ve mai a. Inthlak lovin thingpui ka lum leh phawt a, Nu pawh an room lamah a awm bawk nen choka lamah kan inkawm a.

"Naktuk zan i awl em?" thingpui inpah a min zawh chuan ka inngaihtuah vung vung a, eng nge a sawi tum lam zawk a ni ka ngaihtuah chu ni. Ka duh te chuan ka hman thei reng miau a.

"Ka hre lo....ti nge?" 

"Min chhuahpui la?" a tih chuan ka en reng ringawt a, rawn insawifiah leh vatin, "Chhuahpui tihah khan ka partner ah ţang la ka tihna mai a nia, hunawl i neih tho chuan?" min ngaichang tak chuan min zawt leh a.

"Engah chuan?" ti a ka zawh chuan an ţhiante party huaihawtah kalpui tur a neih dawn loh avangin min sawm a lo ni. Kal chakna pakhat mah ka nei lo bawk.

Tunlai ka mood nen phei chuan mizinga awm chu ka thil chak loh ber te zing a mi a ni.

"Midang sawm mai rawh." Ka tih tawl chuan a nui huk a, "Nangmah chauh sawm tur ka hre si a nih hi." la nui reng chungin a ti a, ka lo thaw hap.

"Min hrethiam mai teh....." Ka tih pawh chuan , "Min puihna anga ngaiin min hrethiam zawk teh."a rawn ti ve leh a, ka chhan hma chuan, "Min hnial lo hram la, midangin kalpui an nei leh vek dawn sia, mahni chauha kal bik nih a nuam lo ţhin."a ti a,hun dangah pawh amahin a kal tawh ţhin a nih chu ka ring.

A thiam dan hrang hranga min sawm takah chuan ka pawm ve ta hram. Hrehawm lutuk a nih loh chu beisei phawt ang. A sawmna ka pawm hnua a a hmel veng hawk mai chu ka hmuh hmaih lo, kei pawh ka lo thawveng ve hawk thei zawk hial.

*

Biakfela min sawmna angin chhuahpui tur chuan ka insiam a, Zuitei chuan fimkhur turin min chah hram bawk. Fakpuia nen a kan boruak ţhat vak loh lai a ni si a, min ngaihtuah viau pawh chu a awm lo hran lo.

Inthuam dan tur ka hre lo hle a, 'inchei vak a ngai lo' ti mah se inchei lo deuha kal chu a chiin ka hre si lo. Zuitei'n,"Anni ang party ah te chuan i theih tawpin inchei la an dress code i mil ve chauh zawk ang." min tih avangin ho lam lutuk a kal chu ka duh bik lo.

Ka satin kawrfual sen duk kak mai ka ha a, ka ţhui a ni bawk a nalh ka in ti ve viau. Ka pian a tilang chiang deuh tih loh chu confi pui lohna tham a awm lo chuan ka hria.

Ka khup khuh ni mah se veilamah tlemin a kak chho ve a, thui a ni lem lo thung. A ban bul niin a awm a chip hran lo, mahse ka thi awrh a tilang chiang a, hmuh hrehawm khawp a zau a ni bik lo bawk a nalh ka inti ve viau mai. 

Ka hmai chu ka chei nasa duh lo, ka hmui erawh Fakpuia lipstick min pek kha ka hnawih a, ka kawr rawng nen a inmil phian mai bawk. Ka sam pawh khawih danglam lem loin ka thlah leh tawp a, sam ngil zân ni ve se ka tih rual hian ka pianpui a nihnaah a hlu ve riauin ka hre bawk si, chuvangin ka ti danglam phal lo leh nge nge ţhin.

Biakfela lo thlen chuan ka inpeih ap tawh a, kan chhuak zui nghal bawk.

"Tlangval vannei ka ni ringawt." A tih fiamthu chuan ka ner khum vak a, a lo nui hawk mai. Fakpuia zawk ni se ka lo ti hmanhmawh pek.

A hmun kan thlen chuan midang pawh an lo awm ve nual tawh, kan hnai vaia awm te chu min inhmelhriat tir ve bawk a, boruak zangkhai zet chu kei pawhin nuam ka ti ve viauin ka hria.

Heta kal chin ho chu khawsa thei tak tak vek an ni tih a hriat. Pawn boruak chhim thei turin tukverh lam hnaihah ka ding a, ka intur min lak kepin Biakfela pawh a rawn kal thuai. Ka rin ai a nuam dawn phianin ka hria.

Mahse kawngka a rawn lut mek te avang chuan ka rilru a inlet thawk! Ka intur ken lai chu ka hmer ngawt ngawt. Ka chhungrila eng emaw intham awm chuan ka taksa zawng zawng hi a tichau vek thei.

End of chapter 17

☠️