BLUEMING 🦋 CHAPTER-18 BY UNKNOWN BELLE

BLUEMING 🦋

BY UNKNOWN BELLE

CHAPTER 18

Amahni lam en rei duh loin ka hawi sawn thuai a, tunah tak hi chuan bo daih theih ka chak ber!

"Dar engzat velah nge kan haw dawn?" Biakfela chu ka zawt a, a chhan pawh rilru lak penna tur ka mamawh.

"I duh hun hun, mahse tunah lo." a tih chuan ka tih luih ni miah loin ka nui hak. Ani pawh a nui ve tho, ka thu thu ti siin tunah a theih bawk si loh chu ka nuih a ti za viau mai.

"Engtik aţangin nge ka thu thu a nih dawn?" La nui reng chung chuan ka zawt a, "I nin hunah a ni mai." A tih chuan ka ner nawng a, tunah hian haw ka duh tawh tak zet tih a hrethiam lo a nih hi.

Chhan leh tuma kaan zuau lai chuan ka piah lam aţangin Biakfela chu an rawn bia a, ka hawi phei ve thuai, ka inchhir nghal bawk. Thildang zawng aiin Fakpuia kut awmna chuan ka mit a la ber, UHruaii kawngah a chelh sak a, an indin hnaih hle bawk. Tuman inngaizawng an nih an rinhlelh ka ring lo ang. Rei en duh loin ka hawi sawn thuai a.

"In inti hrang bik lutuk." lo au tunu tho chuan nui ar arin a lo ti leh a, a bulah mipa pakhat leh UHruaii leh Fakpuia an ding ve bawk. Fakpuia'n mit la sawn lek lova min en reng avang chuan ka awmdan a dik thei lo. Inthiam lohna deuh mai hi ka nei tlat a;mahse, ani pawh hmeichhe dang a kalpui ve tho tiin ka inhnem hram hram.

"Intih hran pawh a awm hleinem." Biakfela'n a ti mai a, a biak danah chuan a va pawh chak vak bik lo a nih ka ring.

"I nula pawh kha kan hre ve duh a lawm." a rawn tih leh kher chuan ka ţek chhawkin ka hria, ava ţawngtam mai mai tak! 

An lam pawh hawi tawh lovin ka hawi sawn daih tawh, ka bek za mer mer ah hian min thlir reng tu chu ka hai lo chiang a sin.

"A ţul dan a zirin le." Biakfela'n a tih leh chuan 'be tawh lo teh.' Lo tih mai ka duh tawh. Fakpuia a awm ve reng bawk nen nuam ka ti miah lo.

"Nuam deuh khan aw." a rawn tih leh chuan Biakfela pawh a bu nghut a, ka lo thaw huai thei.

Biakfela'n,"Hruaii bula mi saw i bialpa kha a ni lo em ni?" zawi deuh taka a rawn tih chuan ka thaw hak a, a en liam ve thei mai lo em ni le.....

"Ni e." Ka ti ve mai a, ka thil ken chu ka lem hlek hlek bawk. Ac awm mah se boruak chu a hrehawm tham tlat, pakhatin min la sawn miah loin min thlir reng tih ka hria a,chu mi avang chuan pangngaiin ka awm thei meuh lo.

"In inthen tawh nge?" ti a min zawh leh chuan, "Sawi tawh lo teh." Ka ti ta thlawt, nuam lo ka tih zia a hre ve chauh a ni mahna a duhtawk ve ta hram.

"Rei lo te kan awm anga kan let dawn nia." a tih takah chuan ka bu nghat a, ka lo thaw huai thei.

Hmun dangah min kal san ta miah lo chu ka lawm khawp mai, midangin an rawn pan mai a, an titi na karah ka lo ding ve reng ringawt a. Ţhenkhat chuan a bialnu biakin min biain ka hria, zo lo deuhin ka ţhen ve sak sak ringawt.

"Lam ve ila?" Biakfela'n a tih chuan ka lu ka lo thing vat, ka duh loh zia hmuh chuan a nui suk a, "Ka lam thiam i ring em?" ka tih chuan, "Ring vak lo." a ti ve mai a, a ngaihdan tlang taka a sawi chuan ka nuih a ti za viau a, ani pawh a nui ve tho.

"Ka lo thiam viau thei a sin." ka tih let chuan min nuih ringawt a, ka thiam loh zia ka hre chiang bawk a keimah zawk hi ka nuih a zain ka hria.

"I nui nasa lutuk." a rawn tih chuan ka kawngah a rawn chelh thut a, ka nui tawp chiang khawp mai.

Ka beng bulah rawn kun hniamin, "Pakhat mit saw Keimahni ah a fu reng tih ka hria a nia." a tih chuan ka sa nghal up up mai. Pangngai takin ka awm ve thei tawhah ka lo inngai a, mahse a ni miah lo. 

"Haw tawh mai ang." Ka tih chuan a pawm ve ta hram. 

Kan chhuah dawn chuan a bul hnaia awm ho a hrilh a, ţhenkhat min lo fiam tawk lah bo lo. Za lo deuhin ka nuih ka nuih ve hlawm ringawt.

Car a lak chhung chuan ka lo nghak a, ka rilruah thil dang a rawn inlar zut zut.

UHruaii nen khan an inngaihzawn ka ring chuang lo, Biakfela nen pawh kan kal dun avang hian kan inngaizawng tihna a ni lo ang bawkin. 

UHruaii hnen aţangin an thlalak dawng fo mah ila inzawmna a siam pui ka ring chuang lo. Chu tih rualin min ning tak tak tawh a nih rinna ka nei lian tawh hle thung. 

Biakfela rawn thlen hnuah ka ţhutna tur min hawn sak leh a, a rawn ţhut luh ve rual chuan, "La len khawthawn i chak em?" a tih chuan haw thuai ka duh thuin ka chhang thuai.

"I hmel en chuan haw nghal chi pawh i ni lo?" a ti sup, pawnlam hawiin thli ka dawng hauh hauh. Ka ngaihtuahna hi a khat vek ni mai hian ka hria, paih thawl theih chu ka chak. Ka tum ni miah loin eng pawh ti dawn ila rilru kilkhat a luah tel zel si a, a hrehawm tak zet.

A tlanna lam chu ka kal ngai lohna a nih avangin ngawi rengin ka chuang ve tawp, ka ţawng chak hlawl lo.

Veng ţhenkhat lan chian theihna laiah chuan a ding a, a chhuk zui nghal bawk.

"Rei lo te chawl ila,kan haw tlang dawn nia." tiin ka thutna lam a rawn hawnga, ngawi rengin ka chhuk ve mai.

Footpath ah chuan chhoin railing chu ka vuan a, heta kan awm hian awmzia a nei thui vak pawhin ka hre lo.

"Insawi thawl i duh em?" Ka bula rawn ding paha a tih chuan, "Aih." Ka lo ti thuai, ka chhan dan teh tlawng chu nge ni a lo nuih pui hawk a, kei pawhin ka chhang rang lutuk chu ka nuih a za ve tho.

"Hruaii te kha chu...." a ti a, a ngawi zui leh daih. Tunah tak chuan a sawi tum chu ka hre chak zek zek.

"Ti nge? Sawi zo law law la ka mawle." ka lo ti hluai a, ka nel ve tawh bawka ka nih ang angin ka lang ve ngam tawh ve hrim hrim.

"Thik duh suh." a tih chuan, "Ve ringawt a che!" Ka ti hlak a, ka bialpa zawk ang hrim a.

"I thik tih ka hrethiam ve vek a lawm." A ti leh mai a, "A ho em mai." ka ti ta vel ringawt. 

UHruaii chung chang min sawi pui chuan ka tum loh pui ka sawi chhuak palh ang tih ka hlau, kei ai a hrechiang zawk dawn si a, ka lo rel khum hrep palh ang,thil ţul ber a ni lo bawk, inven deuh ka ngai.

"Ni e, a ho em mai, vei berah nei duh suh." a ti ve hluai a, a ho ka ti tak tak ve bawk si lo hi a ni buaithlak lai chu.

"Engtin nge in inhriat a?" Ka tih chuan school kal ho reng ţhin an nih thu a sawi a, UBzi te ho nen khan an lo kal tlang vek ţhin a lo ni. 

"A nih chuan in inkawmngeih dawn khawp chu." Ka ti ve niah niah.

"Ka hmuh tirh che khan tu emaw min hriat chhuah tir a." a tih lai chuan "Tu chu?" ka lo ti thuai.

"Ka bialnu hlui....."a tih sup chuan ka hmui ka ti sawi zauh ringawt. "An ngah chu hmelţha tihna." Ka lo ti fiamthu zauh a, ani pawh a nui ve leh tho.

"I hmelţha a lawm." a tih chuan lawmawm viau mah se nuam ka ti leh chiah si lo.

"A ho e a." Ka ti leh ringawt, chin ţhanah ka nei lak lawh a, sawi mai tur ka hriat lohah hian ho tih hi ka hrat lak lawh tlat.

"Ho tih hi i ngah sia!" Nui chunga a tih chuan VanLalfakzuala ka hre chhuak hmanhmawh, min ti nguai nghulh thei mai.

"Haw tawh ang, a tlai tawh." Ka tih takah chuan a pawm ve leh mai a. A tir lama ka hriat dan a fuh loh vang nge ni tlangval fel tak a niin ka hria. Ngaihzawng ka nei tih a hria a, tun hnuah hian inngaihzawnna lam a la sawi leh miah lo. Ka tan chuan thawven thlak khawp mai.

Kan inkawtah car ti dingin chhuk nghal mai ka tum chu a zawhna min zawh avangin ka ţhu leh rih.

"Ti nge chu chu min zawh?" Ka ti haw a, ka lam rawn hawiin, "Chance ka nei ve mai thei tih thuah." tiin a nui suk a, ka nuih a za ve vak lo.

"Chu chuan Ruatsanga nen inzawmna a nei em ni?" Ka ti leh nghat a. 'Ruatsanga hi ţhian ang chauhin i en tiraw?' min ti a nih kha, chutiang zawhna chu engtin nge a ngaihtuah chhuah theih zawk ni.

"Ka sawi lo angah ngai rawh." 

Leh lawi si chuan.

"I sawi vek tawh kha a!" Ka ti leh hram a, a nui leh hawk, nuih tur hi a va'n hre thei bik e aw....

"Kan lo inhre tlai hret hi chu a pawi mang e." La nui reng chunga a tih chuan,"Hei kan inhre tho a lawm." Ka lo ti vat. 

A ţhutna lam hawngin a chhuak vut a, kei pawh kawngka ka hawng ve zat, aman min lo dawm sakin ka chhuak a,"Ka lo lut tawh lo mai ang." a tih chuan bu nghatin ka mangtha ta thuai.

Lut hmasa tura min tih tlat avangin ka lut hmasa ta nge nge a. In chhung ka luh chuan Zuitei amah chauhin a lo la meng, min nghak zawk a ni mai thei.

"A nuam iti em?" a tih chuan hah hmel zeta thaw hakin a bulah zawi zetin ka ţhu thla a, ka zawi vek tak tak.

"UHruaii nen khan an lo kal ve a." Ka ti ngui lâp.

"Ti nge insawi fel theih loh chhan ber hi? A tu zawk nge dika dik lo zawk pawh ka hrethiam lo che u."a lo ti ve a. 

"Biak ka tum a piang hian UHruaii nen an thlalak hi ka dawng zel, a mak lutuk. Ka hmuh a piangin ka rilru ka thlak leh ziah phah. Ani pawh a reh hmak danah min ning a niang." Ka melh ngai melh vung vungin ka phun sap sap. 

"Tu hnen aţangin nge i dawn? Hruaii maw?" a tih chuan ka sawi loh tur ka sawi chhuak tih ka hre chiah. Mahse sawi chhuak vek law law ila ka tan pawh a thawven thlak sawtin ka ring.

UHruaii hnen aţanga ka thlalak dawn ţhin ho chu ka hmuh vek a, hmuh hrehawm khawp ni hlawm lo mah se ka tan chuan a hrehawm vek. Ka bialpa a ni a, a lakah thikthu nei tur pawhin dikna ka nei bawk, ka thik ţhin hle bawk, chu'ng ah chuan amah biak lohah ka tlak zel a ni ber.

A message rawn thawn thin ho pawh a chhiar vekin ka hria, a bulah chuan ka ţhu reng a, uluk em emin ka phone a bih reng bawk.

A hnu deuhah chuan a rawn chek tlak tlak a,"Hei hi Fakpuia'n a hre lo tiraw?" tih paha phone min pek chuan ka bu nghat, hria pawh ni se eng atan mah a tih ka ring lo.

"A number kha lo la teh." a tih chuan "Biak i tum em ni?" Ka lo ti vat, a chhan pawh a biak ka duh lo, keimaha ka chinfel theih ka rin avanga lo inrawlh lo tura duh ka ni bawk.

"Hruaii nen chuan in inhmu tawh em?" A tih chuan UBzi a rawn zui ţhin thu leh hmaichhana kan la inbiak miah loh thu te chu ka hrilh.

Ka rilru put hmang dik tak pawh ka hrilh vek bawk. Fakpuia laka ka rilru put hmang a tir aţanga hre tu a ni a, a bula ka inbun ruah vek takah chuan ka thawl huaiin ka hria.

"Fakpuia nen chuan ţha deuhin inbia ula sawifel harsa a ni miah lo ang mawle." a ti a, kei chuan bul ţantu nih ka duh lo, amah ka chân hlen ang em ka hre lo, mahse tun dinhmunah hi chuan ka rilru ka sawh nghet ve hram hram. Amah ka duhna avanga tlawm taka dawr tu nih ka tum lo bur, amah ang bawkin mahni indawkna ka hmang ţangkai ve a ni mai.

"Hruaii hnen aţanga i dawn a nih i ring em?" a tih chuan a zawhna chu a atthlak viauin ka hria.

"Ama thla lak vek chu a ni sia lawm." Ka tih chuan a ngawi vang vang a, "Nichinah khan Fakpuia a rawn kal a." a tih chuan ka chhungril hi a che zawkin ka hria.

"Chuan..." Engah mah ka ngai lo tih a hriat theih nan ka awmdan ka ti danglam duh lo.

"I lo la haw loh thu ka sawi khan a chhuak lehnghal." a tih chuan ka thaw hak. 

"A rei tawh em?" Ka tih leh chuan ka thlen hma lawkah a nih thu a sawi mai a, keimahah hian dik lo deuh a awm.

Min hmuh a duh a nih chuan ti nge zaninah kher? Biakfela nen kan nih vang chauha rawn kal a nih ka la ring fan. Kan inkar hi sawifel a duh ve tak tak lo niah ka ngai bawk.

Amah dem vek thei ka ni bik lo tih ka hria, biak ka tum bik lova, ka thiam loh a ni ve tho. Mahse mipa ka chhuahpui chhen ve ngai lo tal a, ani erawh ni tin deuh thaw a chhuahpui a nia! Chu ta karah a chhuahpuinu in ţawngkam chhe deuh deuhin min rawn ţawng khum bawk a, tlawm zawka tan chu a harsa ve deuh chu a ni.

"Ka va mu phawt ang e. Naktuk thawh ka hai palh ang." tiin ka tho chhuak a, "Biakfela kha chance i pe ringawt lo ang chu tiraw?" A tih fiamthu chu ka kuttum ka hmuh ringawt. Fakpuia laka rilru ka pek zia hretu a ni a, ani hi chuan min ringhlel ve dawn lo tih ka hria.

Ka inbual leh phawt a, mut hmuna phone ka khawih laiin rin lawk ang chiahin UHruaii hnen aţangin an thlalak ka dawng leh tawh.

UHruaii kawr hak chu a sexy mah mah tih tur ang vel a niin ka hria, a awmbawr a lang vek lo chauh. A fual a ni tak nain a kak chho thui em em mai bawk, tichung hian a kawngah a kuah vel a nia, ka thin a rim thar leh hluah hluah.

Fakpuia chuan a thil ken a in lai a ni a, amah si chet deuh thawin UHruaii chu a ding bawk, a ţhiante lo lak sak a nih ka ring.

"Zanin chu kan thlim leh phawt mai che." tih tê mai hi a lo thawn a. Chutia a rawn tih takah chuan Zuite thil sawi ka ngaihtuah chhuak thut. Min rawn thawn ţhin tu hi UHruaii a nih ka ringhlel ngai miah lo kha a nia, tun ţum chu ka ringhlel ve ta tlat. 

An awmna hmunah hian ka awm ve tho kha a ni a, chu mi chu min rawn thawntu hian a hre lo a ang riau ka ti.

Chhan let ka tum laiin Fakpuia message a rawn thleng hlawl mai. Eng nge a rawn sawi pawh ka en hmain ka thinphu a rang nghal dawt ringawt.

UHruaii chu ka chhang hmasa ta tho, "Eng nge intih a?" ka ti ve kher a, ka type pah te chuan ka kut a khur hialin ka hria, ka hlauhthawn vel vang chu a ni lo chiang.

Ka thinrim chu thuhran, he ti fakaua min hnuaichhiah tu hi UHruaii a lo ni miah lo thei tih ka ngaihtuah chhuak, amah a lo ni ta a nih chuan ka ngawih bo pui tawh lo thung ang.

"Nangni ang kal ve phak loh na." a rawn tih chuan ka thawl hawk a ka hriat!! A awmzia chu UHruaii a ni lo tihna! 

"Ka awm ve tih i theihnghilh a ni maw..." tih thawnin kan chat aţangin ka out daih. Ka message chu a hmu a, min reply ta lo thung.

UHruaii a nih si loh chuan tu nge ni ta ang le? UHruaii hian Fakpuia nena an awm dun apiang deuh thawin a pholang ţhin a nih chu ka ringhlel lo, chu tiang chu min rawn thawn chhawng leh niin ka hria.

Fakpuia message chu ka en a, "Pawnah ka awm." tih zawng hi, ka chhang duh lo.

A message ka hmuh rualin a call a rawn lut zui a, eng nge ka hriat pawh ka hre lo, rang zetin ka hmet tawp nghal daih.

Zanin kan hun hman dan zawng zawng nen chuan ka hmachhawn chak lo hi a ni a ni tawp.

Ka room kawngka a rawn ri zui a, Zuitei min au thawmin a zui nghal bawk.

Phur lo zetin ka tho chhuak a, kawngka ka va hawn chuan, "A call i chhang duh lo em ni?" a rawn ti nghal tawng mai. "Ti nge?" Ka tih chuan,"Pawnah lo chhuah tir teh a ti. Va chhuak mai rawh. Sawi fel thuai teh u." a ti hlak hlak a.

"A be peih lo che ti mai la....." Ka ngen ti tih a ni ber, khawngaih thla la thei ang ber turin ka ngen tawp. Ka hmu chak hlawl lo, Biakfela nen kan nih vang ringawt pawh khan a thinrim dawn sa, kei thinrim ve tho bawk nen kan indawr ţha thei chuang lo ang.

"Va chhuak zawk rawh. Ti zawng hian ngaihtuah la, nangmah ni lo la chu kei min pun ring suh. Hmeichhe dang vangin hetiang hian a chet duh ka ring lo ang bawkin nang pawhin i ring lo ang. Va chhuak la, va sawi fel rawh u." tiin kawngka lamah min nawr phei dat dat a. Ka phur loh dan chu rapthlak tak a ni.

"Lo thinrim viau ta se...." Ka ti hram a, "Nangmah i thinrim lo ve thung ang a ni mai lawm." A ti sam mai a, a sawi anga awlsam hi ni se ka ti......

Kawngka hawngin min nawr chhuak ti tih,"Inbe fel phawt teh u." tiin chhunglam aţangin a khar zui daih.

Kawngka bulah chuan ka phone hûmin ka ding reng a, varanda light kan on lo bawk nen ka hmuh theih chin a zau lo. Street light in a chhun phak chin ka hmuhah pawh tumah hmuh tur an awm lo bawk.

Tîm zet hian ka pen chhuak a, ka hawi kual hrek hrek bawk. Varanda aţanga ka pen sawn takah chuan kawmchar lam deuha min hnungchhawn zawnga a ding chu ka hmu ta, ka ding chut, ka va pawh hreh lutuk chu intih bo daih theih ka chak tak zet.

Ka thawmah chuan a lo hawi ve ta hram. Street light lo chu êng dang a awm lo,kan awmna lai a eng ţha lo bawk nen a hmel pawh chiang takin ka hmu thei lo. A hmel dur khup mai chu ka hmu thiam ruakin ka hria.

Chuan zanin a a inthuamna kha a la thlak miah lo bawk! 

Min ko chhuaktu zawk a ni bawk a ţawng hmasa a tan ka tum teuh loh mai.

A rawn pen hnai a, rei loah ka hmaah tak a rawn ding nghal rûn mai. A kekawr ipte a zen a, a awmzawn chu ka melh ngar bawk.

A ţawng tak mai lohah chuan hrawk ka thian kharh a, "Ti nge i rawn kal?" Ka ti zawi sap, ka hawi chhuak chuang lo. Mahni chauha ka awm laia ka chhuahchhal pawp pawp ang kha chuan a takah ka ţawng chhuak thei dawn lo tih ka hre nghal.

A taksa che zawk ka hmuh rual chuan ka chhing sawk, ka rin loh lutukin ghet zetin min kuah,phawk zetin ka meng a, ka beisei loh dan lutuk a a chet avang chuan chet pawh ka che ngam lo.

Ka nghawngah chuan hmaiphumin a thaw chhuak leh ham ham a, ka za vek thei. Kan taksa a insik hi chuan ngaiah ka nei thei lo, ka ding khawng lah ringawt.

Chutiang a rei tawk fang a awm hnu chuan ka ngaihtha lo deuhin a kawrah ka pawt a, a che eih lo.

"I ţha em?" ka tih chuan,"Aih,ka ţha lo." A ti tham ţuak a,min kuahna chu a thlah dul deuh a, a thaw leh hawk, a awmdan avang chuan ka rit ve churh theiin ka hria.

"Awm ţha la." Ka ti sap, min kuah nghet leh sauhin,"Min kuah let ve phawt rawh." a ti sup a, a awmdan hian min ţhawng a ni tawp.

Ka kuah let ve lawk loh avang chuan min thlah riai riai a,mahse ka kawngah a la chelh tho. Ka darah chuan a chal nghatin a ding kun ngul a, ka phone ka hum ngawt ngawt ringawt.

"Phatsan ka ni em?" A rawn ti hulh a, a ţawng pawh a zawi hle, inhnaih taka kan awm avang chauhin ka hre thei.

"Ka zawhna tur zawk a ni in ka hria." Ka ti sap a, a inla hrang nghal vut.

Ka bek tawn tawnah rawn dawmin hnai zetah min en a, ka en let ţha ngam lo. Tuna kan boruak tak hi chu a ritin a hahthlak lutuk a, pumpelh theih ni se chu sum tam tak ka thâp duh ang.

"Min en teh."a ti chang fal a, a ţawngka chhuak ngaihtuahin min tawhna chu a dim em em thung. 

Ka en ve ta nge nge a, a mitmeng chu ka en ngar a, hlauhthawnna ni awm tak ka hmu, ka hmu sual mai thei bawk. 

"Ka phatsan duh chein i ring em?" a ti chang rût a, a mit chhingin ka chalah a chal a rawn nghat ri bap a, a chiai ni berin ka hria.

"I ţha em?" ka ti leh ringawt a, a awmdan chu min ti hlauthawng deuh tawh.

"Ka ţha lo, ka ţha lo tak zet. Ka chhungrilah hian ka thi mek niin ka hria." tiin a phun sup sup a, a thusawi chu ka ringhlel lo.

"Kha pa nen khan......" tiin sawi zawm duh lovin a ner nawk a, a inla hrang hlek bawk. A kutzungpui chuan ka hmai a tuai hauh hauh reng a, a awmdan mumal lo deuh chu ngawi rengin ka lo en ringawt.

"Min phatsan lo tiraw?" a ti dam thlup a, nichin lawkah thinrim tih hriat em emin chang fein a ţawng chhuak a, tunah lem midang daih ang maiin a tawng dam leh thlup ang lawi a.

"Aw." inringtawk tak chuan ka chhang a, min rinhlelh hmel zetin ngunthluk zetin min en reng. 'Nang ang ka ni lo!' tih let zek mai chu ka duh, mahse thildang ka sawi thei rih lo, ka lungawi lohna hi ka mittui hmangin ka hrithla zel si a, chak lo ang taka min ngaih ka duh lo.

"Anni kha i hnaih lui zel a."nui lui lawkin min vawnna a thlah a, a hmai tuai pawkin a kawng a dawm leh rih.

"Ka thusawi i ngai pawimawh lo bawk." a ti hmuk a, a landan leh a ţawng dan zawng zawngah chuan nelawmna pakhat mah a nei lo.

"Zanin ah inrawn inzui leh a." Sawi thiang lo sawi ni awm takin a ner nawk a, ţawng ve chak viau mah ila ka insum hram hram, thinrim leh thinrim kan indawr a nih chuan kan inbe fel leh dawn chuang lo tih a hriat reng.

"In ah in haw tlang lo a." tiin ngeiawm fe hian a nui suk a, ka phone ken lai chu ka hum nghet mah mah tawh. Ka inseh ruh ţeuh ringawt.

"Inrawn thlen hnuah pawh car aţangin i chhuak mai lo bawk a." Ner nawkin a ti leh a, min lo zui ru tihna em ni le?

"In haw hnu lawk khan ka haw ve a lawm.....chuan sawtah sawn ka lo nghak reng che." a ti leh hmuk a, a nelawm hlawl loh bawk nen tah khum vak mai chu ka duh. Midang daih a ang.

"Ti chung chuan engtin nge ka rin theih ang che!" Ti hrawkin ka ban bulah min vuan chawt a, min vuan nghet lutuk chu a na ka ti kher mai.

"Rin che ka duh." ti supin min thlah leh thut a, ka phai khut thei hial.

Min hnungchhawn vutin a tukhumah a kut a suih bet a, van lam a hawi vang vang, a rui lo tih ka chiang bawk si, a awmdan chuan min tihah tak zet.

Rawn inher leh vutin min kuah leh thut a, ka Phu zawk thei hial. 

"Hetiang hian awm tawh lo ang." tiin a phun leh sup a, a eng ber hi nge rin tur pawh ka hrethiam lo.

Inlahrang leh vutin ka kut chu a la a, a awm zawnah dahin ka kut chu a hmer bo vek thei hial. 

"He ti lai hi a ruak tlat,ka hnawhkhat thiam lo. Nangmah chauhin i thei." min en ngawih ngawih chunga a tih chuan ka thaw hak a, sawi ve ber tur pawh ka hre lo.

"Mipa dang nen ka hmuh che u phei chuan helai hi ka thunun theih bakin a che ţhin. I duh loh dana chet ka thawh ka hlauh avangin hnaih lo turin ka hrilh ţhin che." a tih chuan ka kut chu ka pawt a, a lo hmer nghet sauh.

"Ka ţhiante an ni tih ka hrilh che." Ka ti ve hmak a, ani pawhin ţhian hmeichhia a nei a, min hrethiam thei ve tlat lo hi a mak ka ti.

"Mipa i ni lova, an rilru i hre lo a nih kha." a tih chuan ning fe hian ka thaw hak a, Biakfela chuan min ngaizawng tih ka hre ngei, mahse ngaihzawng ka nei tih a hria a, min beisei tawh ngai lo. Kan inhmuh ve pawhin midang a biak ang thoin min bia a, engmah danglam a awm ngai lo. Chu ti chung pawh a a ringhlel tlat mai hi ka hriatthiam phak bak a ni.

"A ţha a nih chu!" Ka ti hlak a, chutiang a a thik zel dawn chuan tih theih ka nei bik lo.

"A ţha ringawt lo.", A ti ve leh hmuk. Kan va hahthlak tak!

"Nang ni ţhian ho tih loh Biakfela leh Ruatsanga bak ţhian ti a sawi tur helaiah ka nei lo, i hre ve reng a....." Ka sawi zawm leh tur chu a hmui hmangin min tawp tir hmiah. Ka tal phat a, mahse ka bek tawn tawnah dawnin na zetin min fawp a, ka kut pahnihin a awmah ka nem ve ţang ţang, awmzia a nei lo hle.

Min fawhna chu thlahin a phun hluk a, "An hming kha ka hre peih lo a nia." a ti hmuk. A thu lo ve chiang.

"Ka ká a nia ka thu thu. Ka duh duh ka sawi ang. I duh leh ngaithla lo mai rawh." Ka tih pang pang chuan a lo nui ka hmuh avangin ka hmui ka chip hmak. Rum zetin ka melh tawh. Ka ţawng ve chhuna a lo nui mai mai chuan ka thin a tirim tak zet, ka thaw a tirang vek thei.

Ka ngawih tak hmakah chuan ka kawngah chelhin min pawt hnai dawt a, tal pawh ka tal peih lo. A huat let tur ber ni a ka hriat chu a awm lo anga ngaih a ni leh mai.

"Sawi zawm la." a tih nghut chuan ka sawi zawm lo chiang a sin. Ani chu a pangngai tawh tih a thawk lak dan aţang pawhin ka hre thei. Nichin kha chuan a thawk lak a zing bawk si nen min tihah tel vek thei a lawm.

"I duh duh sawi rawh. Ka lo ngaithla ve thung ang." Dam thlup a a tih pawh chuan thinrim ru ţeuhin ka la thaw sak sak thei. 

"I sawi loh chuan ka fawp leh rih dawn che." a tih chuan ka tal phat, a lo nui hawk te chuan ka thin a tirim hluah hluah tawh. Ka thinrim ve na hian alakah awmzia a nei ve miah lo a nih hi.

"Haw rawh!" ka ti hlak a, ka aw pawh a ri ţha thei lo, tah chhuak tunin ka awm bawk nen a hrehawm tak zet.

"Hey! I tap em ni?" Ka hmel en a tum pawh chuan ka kun tlat, a hnaihah pawh ding duh lovin ka tawlh hla hrut bawk.

"Ka tihpalh." a tih pawh chuan ka engah mah a thawk lo. 

Ka inrin hma chuan min rawn kuah thut a, ka theih tawpin tal mah ila min chelhna a thlah eih lo. Ka tal chhuak thei bawk si lo chu ka ţap chhuak hawk a, ka ngaihdanin pawimawhna a nei ve miah lo anga min inngaih tir avang te chuan ka rilru a na zual a, ka ang chhuak bawrh bawrh thei si lo, duh lo eng ang mah ila min kuah beh tlat avangin a awmah chuan ka lu nghatin ka mittui a tla zung zung a, hetiang a awm hi duh bik lo mah ila duh ka thlang thei chuang bawk si lo.

"Sh..... Tap tawh suh le." Aw dam thlup a a rawn tih chuan ka la insut hlat hlat a, min kuahna tha pawh a thlahdul deuh tawh.

"Ka tihpalh, inthenna lam thu ni lo i duh duh i sawi thei ang. Ka tibuai lo ang che." tia phun supin ka chhipah a hmui a nghat vang vang a, ka tum lawk ni miah loin ka lo thaw huai thei.

"Inthen ang." Ka tih rual chuan, "MALSAWMPAR!" ti hrawkin a phun hluk a, ka nuih a za tawh nain ka nui duh lo. Min la kuah bet reng a, tunah chuan hun eng emaw chen chhunga kan inhlat ai zawng zawng ni mai awmin ka hahdam pui hluah hluah tawh.

"Fiamthu pawn sawi tawh suh." a ti nghut a, min kuah hle hlein ka hnung a chul hauh hauh.

"UHruaii nen pawn ni tin in inzui ve tho a ni lo'm ni?" ka ti hlak a. Ka lo inngaihtuah lawkna a ka vîn ang aiin a takah chuan ka ţawng nem leh viau lawi a, kan boruak a zia chhoh tawh vang a ni ber ang chu. A chhemalh lui tlattu a tan ka duh bik lo.

"Kha nu kha chu..."tiin a ngawi zui leh daih a, anakah ka sik hlak. A lo nui che dawt a.

"I hmuh ang zawng kha a ni mai, a bak a awm lo." a tih chu ka ring nghal thlap.

"A chhiat loh khawp kha, min hrechang tawh meuh lo chu a nih kha." Lungawi lo ru deuh chuan ka sawi a, kei pawhin kuah let vein a awmah chuan ka bei hle hle. Ka mittui avangin a huh deuh lehnghal.

"Chhelo viau mah se ka mitah chuan i chhelo lawr lak." a tih chuan a hnungah ka sik leh vak a, "Ka hlawh a va chhe ve." a tih leh chuan ka beng dawt.

"Ka sawi dik a lawm, nang chu pawnlam bakah chhunglam thlenga belhchian dawl i nih avangin nangmaha ka hmuh ang hi mipa dangin an hmuh ve ka duh lo a, chuvang chuan ka thikthu pawh a chhiat phah ţhin." a tih chuan ka lo nui ru ver ver tawh. A thusawi chuan min ti hlim em a lawm.

"UHruaii thil i ei pui ziah tho a lawm." Ka tih chuan inlak hran a tum a, ka lo kuah ber tlat. A nui hawk a, "Kha chu thikna rim a nam tlatin ka hria." A tih chuan ka ner nawk, thik anga lan chu ka duh bik miah lo.

"Ka thik lo bawk." Ka la ti ve fan, ataksa che datah chuan a nui leh tih ka hria, ka ţhen vak ringawt.

"Um, i thik lo ni rawh se." A ti dam thluam a, "Zanin a thil thleng kha han sawi chiang teh." a tih chuan zep ţhen nei hauh loin min sawm dan leh haw kawnga thil thleng zawng chu ka hrilh ve vek a, ka thawl huaia ka hriat chu a!

"Anih nang ve? Thlawi lawm." Ka tih chu a lawm vak lo ni ngei tur a ni a phun hluk a, ka nui tih a hriat rual chuan a kut chet vutin ka awm a rawn ţham thut mai. Ka phu nasa lutuk chu min lo nuih let ve leh thung a, lungawi lo deuhin a awm ka seh sak ringawt.

Min nawr hla dawr a, "Khatiang kha ching hlek suh." a tih chuan hmui phunin a ţawng dan ka lo zir khum a, a rum nghut chu ka hmui ka tih sawih khum vak ringawt.

"Nuthlawi i lawm tho tho." Ka tih leh chuan nghal min tih hmel fe hian min en a, a nui ve suk tawh mai.

"Ka nula hi a chhelo ka ti tawk viau a sin." Chimawm zeta min enin a ti kher a,tlawm duh bik loin, "A ni dawn reng a sin." Ka tih hmak chuan a lo nui hawk. Kei pawh ka nui ve tho.

Kan boruak zang ta hawk chu eng emaw min delhtu rit deuh lak bo ang huai a ni.

"Lo hnai teh." a tih chuan ka pan hnai ve mai a, ka kut lo pawtin min kuah leh thlawp, kei pawhin ka kuah let ve a, "Ka ngai lutuk che." a ti thuk ruih a, ka hlimna tawk a tling em em bawk.

"Min ngai ve em?" A tih chuan, "Tlemin." tih chauhin ka chhang a, ka naka piai zawk avang chuan ka tal awk thei. A za lutuk ringawt!

"Nghal lo teh." a ti hluk a, "Min theihnghilh daih tawh emaw ka ti hman a." Ka tih chuan inla hrang hlekin ril ruih hian min thlek vang vang a.

"Chutiang chu ngaihtuah pawh ngaihtuah tawh suh." a ti sup. Ka lo nuih seih a.

"I awih em chu ka hre lo, hmeichhe bulah hetiang thu hi ka sawi ang tih ka ring ngai lo." tiin a kiai suk a, a sawi tur chu ka lo nghak rân.

"I tello chuan ka nun a ruak lutuk." a ti a, vanlam hawiin a phun hluk a, 'lalpa leh!' a tih sup chu ka hre thei, a hrawk bawk chiang zeta lo lang chu ka lo melh kar. Hei hian mipa a nih zia a tilang chiang a, a inhmeh ka ti hle bawk.

 A awmdan siam remin min en ve vung vung a, "Hmangaihna hi ka hrethiam chiah lo, mahse i laka ka rilru puthmang hi sawifiah dawn ila..... Hmangaihna a nih loh chuan a teuh viau ang." tiin a phun sup a, ka thu hriat chuan min ţhawng lutuk a, awmdan tur pawh ka hre lo.

Kum khat mai pawh ni lo, kum nga dawn lai mai ka lo duh ruk tawh hnen aţangin chutiang thu chu ka dawng ang tih ka ring pha ngai lo, tuna ka hlimna hi eng nen mah ka thleng phal lo bawk ang.

Amah chu ka en reng a, a lai ve deuhin ka hria. A nui suka, "Ka fawp thei tawh che." a tih chuan ka lo hnial lo chiang a sin.

Kan inbiak fel leh theih pawh ka ring lo kha a nia, ka rin loh dan lutuk a thil a kal chu ka lawm hle bawk.

Lut tawh tura min tih hnuah thil hrechhuak thutin a phone ka dil a, min pe ve mai bawk. 

A lock chu hawngin ka phone ka hmet eng leh a, UHruaii tia hming ka save number chu a phone ah ka chhu kauh kauh. Ka bulah ngawi rengin a lo ding a, zawhna min zawt lo chu ka lawm hle mai.

A lo neih tak mialin tih rilru pu a ka zawn risk ve hrim hrim kha a nia, hming lo lang ka hmuh chuan ka tawp chut.

End of chapter 18

❤️