BLUEMING 🦋 CHAPTER-19 BY UNKNOWN BELLE

BLUEMING 🦋

BY UNKNOWN BELLE

CHAPTER 19

VanLalfakzuala pov:

Ka phone a Elii number ka save pakhat chu a en reng a, a en chhan ka hriat loh avangin ka thlek ve reng ringawt.

Elii number ka ti tak nain a hmang khat niin ka hria, pakhat zawkah hlir khan kan inbe ve ţhin. Tunah chuan a pahnih hnihin an ţangkai tawh lo ve ve.

"Ti nge i en reng a?" Ka ti sup, harh chhuak thut ni awm takin a phone a hmet thim zuk a, ka phone pawh tap close zung zungin min pe nghal bawk.

"Mipa hriat chi loh." a rawn ti khauh, ve khanglang reuh hian.

"Ka bialnu hlui a nih avangin i thik tihna?" Ka tih chuan a lo ner nawk. 

Thikthu chhe tak chu a ni lo vein ka hria, chuvanga sawi lui zawk pawh ka ni. A laka ka thunun theih baka ka thikthu a chhiat viau lai hian ani lamah hi chuan engmah awmzia a nei lo niin ka hre ţhin.

Mahse tunah chuan Hruaii ringawt pawh a thik ve zia ka hre tawh, a inthup thei hi ka ti khawp mai. Hmeichhe ri phawr phawr leh rilru siam fel zung zung a nih loh avang te hian amah belhchian a ngai zual.

A rilru puthmang ka hrechiang ve thawkhat chung pawhin a ţhianpa a tih te pahnih bula ka hmuh tawh hi chuan keimahah hlauhthawnna a intham tlat thin.

Elii number a hmeh chhuah chhan a sawi duh tlat si lohah chuan ka nawr lui duh ta lo, ka tan a ţangkai lo a nih chu ka ring.

In chhunga a luh thleng chuan ka thlir reng a, zanin thil thleng chu kei pawhin ka rin loh dan daiha a kal avang chuan ka zâng hûih thei.

Ka lo rindan chuan kha pa avanga kan inhnial hrep ka lo ring a nia, a chhan pawh keimah ber hi hetiang hian ka awm ngai tlat lo.

Hmeichhe dang ang kha chu ni se kan kar thu ka ti tawp fel vek duh ang. Min runluih niawm fahranin boruak ţha lo kan neih laiin a pawt chat chat duh a nia..... Ka dawhthei lo viau emaw ka tih laiin a lakah chuan ka lo inphal zau em em thung si. Zuata pawhin mak min tih thu a sawi hial a nih kha!

Kei pawh ka inhrethiam tawh bik lo, a laka ka thinrim ber lai pawhin ka thlahlel tho. Amah avangin Hruaii pawh ka zui nasat phah reng, a thik ve tura tihel ka duh vang a ni ber ang chu. Huh! Hetiang rilru te hi khawi aţanga rawn piang chhuak nge maw a nih le!

Zanin khan a awm ve rinna pakhat mah ka nei lo, kei erawh rilru tih thawven beiseia min sawmna pawm ve chauh ka ni. Amah ka hmuh hma zawng kha chuan thu tawp siam rum rum mai duhna thinlung ka pu kha a ni a, mahse ka hmuh leh rual khan ka rilru lo ruahman ve te ho chu vawm bo ang diak an ni.

Zanin khan amah chan hlen ka hlauhna in min tuam a, mipa dang nen ka hmuh dun leh phei kha chuan keimahah thikna ringawt ni lo thil dang intham ve a aw, chu chuan amah chan hlen tur anga inngaihna min neih tir a, hlauhthawnna leh mahni inringtawk lohna min pe bawk.

A tan chuan mipa ţha ber ka ni kher lo ang, Ruatsanga khan 'nang aia ţha a phu' min tih khum a nih kha! Kha mi ţuma kut ka thlak lo kha lawm rawh se!

A sawi angin ka lo Phu lo viau a nih pawhin, tun aia ţha hian amah phu tawk turin ka insiam rem zel mai a niang chu! 

A ţhianpa a rin em em hian a laka a rilru puthmang a hrethiam der mai si lo. A ţhian tlemte te zinga a mi a nih avangin an inthianthatna kara lo inrawlh ka duh lo, chu tih rual chuan hnaih chin tawk a hre lo ang tih ka hlau ţhin thung, chuvang tak chuan hmu tam lo se ka duh bawk.

Malsawmpari khan min hrilh loin an in a pan tih ka hriat zan kha chuan ka lungawi lohna te dahtha a amah biak ka tumna zawng zawng pawh an bo vek. Ka thin a rim em em bawk! Khatiang zawnga min nawr kha ka ngaithei lo hle bawk! Ka lak aţangin a reh hmak zui a! Ti chung chuan kei hian chân ka la hlau fan! Hetiang hian hmeichhe lakah ka khawsa ang tih rin ngaihna pawh ka nei ngai teh hrep love!

Ka mut hmunah chuan message va thawnin ka va be hmasa leh bawk. Inhmuh thiam loh nikhuaa inbiak loha tlak hi a ţul ka tih loh zawng tak ni mah se ka ti ve miau mai bawk si. Malsawmpari ah hi chuan ka danglam tlat a ni.

"Ka bialnu thar." ti a ka va fiamna chu, "I mut dawnah Ţawngtai theihnghilh lo la a nih mai chu!" ti hian min rawn chhang let a, ka nui suk.

A naupan chhiat thlak viau lai hian hetiang a min nawr hi chuan min hmu lem lo pawh ni se ka ti ve mai zel. A chhan ka hre lo, mahse keimahah hian a duhzawng anga awm duhna a awm a, chu chuan min kai hruai tlat ţhin.

Zanin khan an chhuah hnu khan chhuah ve nghal mai ka tum ut ut a nih kha. Mahse ka induhtawkna dah lianin ka insum hram hram. Rei erawh ka rial thei chuang lo.

An in lam panin ka haw zui nghal kha a ni a, eng pawh huama biak tumin an inah pawh ka lut nghe nghe. In a la thleng lo tih ka hriat khan ka thin sat dan chu pui tak a ni! Ka hnaihah awm se chu khapa kha kut ka thlak duh chiang viau ang!

An rawn let pawh khan an kawtah ka awm reng, kan kawt lamah car ka dah phei tawh avangin ka awm ve leh ve loh an hre lo. Ka awmna lai a thim deuh bawk nen min kal pelh lai pawhin kei chuan chiang takin ka hmu thei.

Car aţanga a chhuah lawk loh khan va inlana ka phih chhuah bawrh mai kha ka chak, ka chet chhuah thut loh nan ka inthunun nasa viau bawk a nih kha! Ka duh loh dana ka chet ka hlauh avangin ka inlan loh phah ringawt a nih kha! 

Khapa lakah khan min phatsan tak tak ta se tih ka ngaihtuahna avangin ka thinrimna te kha hlauhthawnna in a thlak a, ka inthunun theih bakin amah chân ka hlauhna in ka khat bawk.

Phone kaltlang a ka biakna pawh engah mah a ngaih loh takah khan tih ngaihna dang hre lovin Zuitei ka pun tawp mai kha a nia! Ani pawh kha a ţhawng viauin ka ring. Hmeichhe chung changah ka ţhiante tumah tih buai ka nei ngai tlat lo. Ka ţhiante chauh loah pawh, mahni a chinfel mai theih thilah ka ngaih ţhin vang a ni ber. Malsawmpari zet zawngin ka rin phakbakin min thunun hneh thung si.

Hruaii hnen aţangin zanin a thlalak ka dawng nual. En lem lo chuan kutzungpui lem ka thawn ringawt. Ngaihzawng ka neih a hria, min beisei a bansan chuang lo, Malsawmpari nen kan boruak dik loh avanga a laka ka khawsak dan a danglam ka hriat loh laiin a huangtau sawt ang reng. Zah a hre vak lo ve hrim hrim bawk

Zingah chuan ka ruala a kal tur thu ka sawi chuan min lo hnial leh. Khang hun chhung zawnga ka khawsak dan kha ka ngaihtuah hian ka tih ngai pawha ka rin loh tak tak vek an ni, eng lai pawhin ka mood a off a tih theih ang, midang ka ngeihven lem lo, Hruaii erawhin engah mah min ngai lo thung.

Zuitei ruala kal a tum thu a rawn sawi chuan ka lo hrethiam lo hle, a hnaiha awm ka chak ang hian min thlahlel ve lo niah ka ngai hman hial.

Min hnial tlat mai chu ka hrethiam lo lek lek, mahse chhun chawlha inhmuh puia ka sawmna chu a lo pawm ve hram. Ka kal hmain an inah ka lut kawi leh tho ang.

Exam neih hun a hnai tawh avangin a tlangpuiin syllabus an zir zo tawh hlawm bawk nen kan reh ţhin ang reng. Revision rawn nei tur te an rawn lang leh zauh ţhin tih loh chu hunawl ka ngah chho viau. Admit card leh eng ilo te chu Vtea kuta awm a nih avangin ka en pui ngai lo thung.

Chhunchawlhah chuan ka chhuak chho hma khawp mai, Hruaii rawn lan hmaa chhuah ka duh vang a ni pakhat. A laka rilru ka pek loh zia a hre chung pawhin min ngaihsak a ban san lo, mak ve tak chu a ni.

An lo buai map map a, customer dang an lo awm ve bawk nen ka lut chu min hmu lawk lo. An awmna lama ka va phei chuan a thawhpui tarmit vuah zawk chuan min hmu thuai a, Malsawmpari a hrilh zui nghal.

A tum ai hmain min hmu nge ni a lo meng zau awk mai. A ţhutna atanga tho thuaiin min rawn pan a, "In va chawl hma awm ve." tiin ţhutna tur min kawhhmuh nghal bawk.

A ţhiante chuan an thil tih laiah ni loin keini lamah an rilru an pe tih ka hriat chuan ka nuih a za viau.

An chawlh a la hun ve loh deuh avangin ka nghak leh rih. Ka nghah lai chuan Hruaii call a rawn lut ve chiah bawk. A rawn thleng chho leh tawh a ni ngei ang.

Han chhan loh ngawt kha ţha bera ka hriat loh avangin ka ţhutna aţangin ka tho vut a, pawnah dingin ka chhang zui nghal.

"Khawiah nge i kal daih a? I helmet a awm bawk si." A rawn ti lar lar a, "Ka bialnu ka'n chhuahpui ve lawk ang e." Ka tih chuan awih lo hmel zetin a nui hak.

"Ka lo ring ve vek che a."a tih chuan midang lo sawm mai tura chahin ka hmet tawp zui nghal daih. 

Ka mood fuh lo leh nelawm loh lai ber pawha min tawn lui ngam tu kha a ni ve hrim a, a awm viau e.

A hman ve ta maw tiha kan chhuah dawn chuan Biakfela a rawn lut ve chiah. Malsawmpari chu ka melh ngur a, he pa hi a lo khawi ngampa viau a nih chuan ka lawm lo hle ang.

Hnathawk ve nula pakhatin ,"Sawmpari kan thlim dawn a ni maw..." a rawn tih takah chuan ka mit la sawnin Biakfela chu ka en ngur a, Malsawmpari ka chelhna chu ka ti nghet sauh, alo ţang ve tum hrang mai lehnghal!

"Ka lo intiam tawh angin inei tui viau ang." Ţhut rem paha Biakfela'n a tih chuan an lo phul hlut a, an phur hmel hlawm viau bawk.

"Vawiin chu min hrethiam mai rawh u. I sawi lawk bawk si lova." Thupha a chawi deuh ringawt te chu tul lo ka ti khawp mai.

"Hun dangah a ni leh mai lawm." A lo ti mai a, ngawi rengin ka chelhna ka ti nghet sauh.

A hrethiam ni hmiang,"Kan rei lo ang, tui deuh khan lo ei rawh u." tiin min chhuah pui ta hram.

Ka hmaah chuan a kal nghal hnak hnak a, "Kha pa kha i khawi ngampa viau a ni lo maw." Ka ti hmuk, ka inhrethiam lo, ka thik em em ringawt. A bula a awm pawh ka phal lo.

"UHruaii ang em chuan ngampa love." Ţawngkam pangngai takin a ti mai a, thik angin lang duh lo mah se a thik ve thawkhat tih chu ka hrethiam, min ti hlim zawk hlauh lehnghal a.

****

December kan chuangkai chho a, exam kan zo fel tawh bawk nen ka hman tawh ţhin khawp a. In lamah ka awm deuh chawt tawh bawk. In a awm pawh hi a khawhar thlak riau hian ka hre ţhin, ka pi hmun ruak zau lutuk hian in awm pawh a ti nuam lo zo. 

Christmas boruak nen phei chuan Tlangval a pumpa lunglenga zai mai mai ka hrat chho viau. In chungah Mîlo nen guitar keng chhoin tlailam boruakah chuan mahniin ka zai ka zai mai ţhin. A hrehawm ka ti hran lo bawk.

Kei hunawl ka neih chhoh hlauh laiin Malsawmpari erawh a buai tulh tulh a, Christmas kawr tur mamawh hun lai a ni bawk a, inah leh dawrah nen a buai ve mep mep ţhin hle. A inkhawm hman ngai meuh lo, chu mi avang chuan ani'n inkhawm turin min tur sek mai ţhin a, hunawl ka neih a hre ve ran bawk nen ka hnial duh ngai lo. Inkhawm zan a nih chuan an ina ka leng tur pawh 'inkhawm banah i rawn kal dawn nia' a ti deuh kher ţhin a. A ho ti viau mah ila ka zawm ţha ţhin khawp mai.

Ka chhungten kan chung chang an hre vek tawh bawk a kan inngaihzawn dan chu a hahdamthlak ţhin khawp mai. Hmun fala hun hman dun a hlau ţhin hle, mahse ka nawr luih chinah min hnial ngai bik lo. Min ring tawk a, a duh lo chung a taksa khawih tumna ka nei lo bawk, min rintawk ang bawkin a tana mipa rintlak ka nih zia a hriatthiam theih nan a zai ngai takin hun ka hman pui ţhin.

Inrinni zan inkhawm ban ve leh ka inthlak nghal a, inah pawh rei awm lovin ka chhuak zui lehnghal. Zan tin deuh thaw a leng phei ziah ka nih avangin ka pa'n fimkhur turin min chah ziah. Ka zawm ţha viau chuan ka hria.

An ina ka luh chuan Nu Mapuii'n min lo chhawn thuai a, an ina ka lan tam chinah hi chuan min fiam zuk zuk a hrat hle a, za lo zetin ka nui ka nui ve zel mai.

A room lamah lut mai lovin Nu Mapuii chu ka ţhutpui rih a, Zuitei pawh kan piah lamah a lo inchhawp ve leh rum tawh. Ka len chhan a ni lo bawka min ngaihven viau ngai lo ve hrim hrim.

A room a ka luh chuan a lo inchhawp hnawk ve leh khawp mai. A duh danin kawngka pawh ka hawng leh thlap, room chhunga kan pahnih chauha kan awm chuan kawngka khar a duh lo tlat ţhin, a tirah chuan ka hrethiam lo dawn dawn a, tunah chuan ka hrethiam tawh khawp mai. A mipa zawk ka ni bawk a inven nasat ngai ka ni, room kawngka hawn leh hawn loh kar a zau viau ţhin bawk nen a tan bakah ka tan tak pawh a ţha zawkin ka hria.

"Lo ţhu rawh." Min hmuh rual chuan a lo ti thuai a, rei pawh min en lem lo. A thil ţhui lai chu ngunthluk fe hian a en a, a uluk ţhin khawp mai. Ka tih ve theih tawk a hriatah min phut viau ţhin mai bawk a, a bula lo ţhu vel mai mai ka ni ţhin bawka ka hnial lo ţhin khawp mai. Thingpui tui tak ka hlawh ţhin bawk a, ho viau anga lang siin ka hlim pui ve em em tho.

Ka ţhut fel rual chuan nizan lama kan thu khel ngai bawk chu ka sawi chhuak leh.

"Haw lo mai la...." pangchang deuh tak chuan ka ti a, kei tak pawh ka nuih a za viau. Mahse amah tawn luih ve hi a nuam ţhin hrim hrim.

Min en lem lo chuan, "Kan sawi fel vek tawh." A lo ti hmak, a hmuh lohna lamah chuan ka lo nui suk.

Hetah hna thawh tur a ngahin a bua em em a, tichung chuan Christmas leh kum thar an khaw lama hman a tum chu a ni a, keimah ber hian a haw tur chu ka huphurh.

"Min ngai ve dawn miah lo niin ka hria." Ka tih hmuk chuan awlsam fe hian, "Ngai dawn e." Ka lo ti liam mai a, a thil tihah rilru a pe bawka a rawn hawi chhuak hman meuh lo.

"Innei tawh mai ang." Ka tih chuan ka rin ang chiahin a thil tih lai dahin min melh rawm a, a lawmawm ka lo ti ţhin.

"I zak lo em mai a!" A ti hlak ringawt a, a rilru a lo lang hmasa berin min chhang tawp tih ka hria, ka nuih a za ru viau nain nuih ka tum lo.

"Eng nge ka zah ngawt ang!" Ka ti hmuk a, muk zetin melh reng bawk, hahthlak min tih hmel fein min en a, ka nuih a za ru viau tawh.

"Pangngai rawh!" Ti hlakin a thil tih lai a tih zawm leh a, inneih chung changa ka fiam a piang hian a lai ru viau ţhin tih ka hria. A lai hma em em bawk, keiin chhaih nuam ka lo tih phah hlauh thung a.

Nui miah lo hian, "Ka pangngai tih i hrechiang ber ang chu." Ka ti liam puat a, "Fakzual ngawi mai mai teh!" a rawn ti hmak tawh. Ka nui ri a hriat chuan thaw hakin a rawn leh hawi a, hetiang a a lungawi lo hmel hi hmuh nuam ka ti riau, min lungawi loh khum ngam hrim hrim pawh hi ka tan chuan a lawmawm, keimahah lo midangah a lungawina zawn a tum ngai dawn lo tih ka chiang viau bawk.

"Ka nupui i nih hunah chuan...." ka tih lai chuan min lo pawt chat leh vat, ka nui ru suk.

"UHruaii kha nei la ti nia." A lo ti zauh. Lawm lo zetin ka rum nghut. A pasal hlui nen an inbe rem leh deuh tawh nge ni a rawn reh chho leh viau tawh mai.

"A hriat miah loh." Ka lo tih chuan a ngawi hmak.

"Nang lo chu ka nei dawn chuang lo a, rei tak innghah kher kha ţul ka ti vak lo. I lo lerh kual palh ang." Ka tih chuan a kut veilamin ka malahna rawn beng ri thlawp, ka lo nui hawk.

"Min nghah rei viau a ngai ang." A ti hlak a, "Nuthlawi lawm deuh ka nei peih lo." a tih leh chuan a awmah ka ţham sak zauh, a lo te that! 

"Fakzual!!" a ti zawi vin hlak a, a ho e, ka thu ve em mai.

"Eng nge." Tih pah chuan ka ţham lui leh ngat. Ka kut chu rawn beng dawtin pawn sawn a tum a, kan inthut hnaih bawka ka kut ka la sawn duh lo.

"Min thlah loh chuan zandangah ilo len ka phal tawh lo ang." A ti rum ve ul a, ka nuih a za tawh khawp mai.

"A ho e....ka lo kal awm tho e..." ka tih chuan hahthlak min tih hmel fe hian a thaw hak a, min chhan leh a tum lai takin a phone a lo ri, ka ban khalh vut.

"I nu." tiin ka pe leh thuai a, an khuaah a haw khat bawk a a chhungte lam pawhin a haw tur chu an nghakhlel ve khawp mai. Tun hnai chho phei chu an rawn be zing a, an ngai ve dawn tih ka hriat avangin a haw tur pawh chelh tumna em em ka nei lo.

Mahse amah hi ka fiam chak ve ţhin hrim hrim a, ka chelh der pawh hian ka hriatthiam theih nan uluk takin min hrilhfiah ve ţhin. 

A u fanu a tih hi an rawn biak tir ţhin a, kum khat vel awrh chauh a ni a tiin ka hria, a rawn riat nawi vel mai mai ţhin a, chu ringawt pawh chu a hlimpuiin a chhawn chhaih peih a, a takah hmu ngat se chu a duat dawn hle hian ka hria.

An inbiak chhung zawng chuan ka lo ngaithla ve reng a, phone chu speaker a dahin a thil khawih lai a chhunzawm pah mawlh mawlh bawk.

An inbiak tawp lama a nuin, "Mawizuala pawh ilo haw tur kan hrilh a, a phur khawp mai." a tih chuan min rawn en zawk a, ka melh let ngur bawk. 

Rei inbe tawh loin an titawp a, Tu nge Mawizuala chu a sawi hun ka nghak nghal run bawk.

Ngawi rengin a thil tih lai a tih zawm a, min ngaihsak angin a awm duh miah lo. Ka run tawk a lo tling khawp mai.

"Malsawmpar!" Ka ti nghut a, min en lem lo chuan, "VanLalfakzual!" A lo ti ve hmuk.

"Tu nge Mawizuala." Ka duh ai ka ţawng bul.

"Kan khaw tlangval fel deuh." Tih zawngin min chhang.

"Chuan." 

"A lo leng ţhin."

"Eng ti turin?"

"Min rîm turin."

"Haw leh lo mai rawh." Ka ti nghut, a lo nui hak chu ka lawm lo viau bawk. Ka hmuh phak lohah tlangval dangin an rim tur chu ka lo huphurh ngawih ngawih.

"Ka bialpain haw a rem ti leh lo a...tiin ka han hrilh leh mai dawn em ni?" A ţawng pah chuan a la nui reng.

"Ka ru daih mai dawn che a lawm." Ka tih hmuk chuan rum zet hian min rawn melh a, "Khatiang fiamthu nuihzatthlak loh lutuk kha sawi tei vet suh." a ti hmarh hmarh a, a thu tak hmel nen chuan ka nuih a za viau.

"Kan inruk chuan kan inneih nghal a ngai ang a, in khatah kan awm tawh ang a. Naute hmelţha deuh deuh kan nei bawk ang a." Ka tih chuan lai zetin lei a chhuah zeuh rinhaw.

Ka bialnu lo ni tawh te ah khan vawikhatmah nupui pasal chung chang ka ngaihtuah thleng ngai lo. Tunah erawh ani hi ka nei lo a nih chuan tuman an neih ka rem ti lo ang.

"Mawizuala chu maw...." A ti fan duai a, ka beng ka lo chhi kar tawh.

"Kan khaw tlangval senior deuh tawh hi a nia, ka tleirawl chhuah aţanga ka inleng a ni tawh. Mi pangngai rilru phak lohna a neih avang hian ţhenkhat hi chuan an bawl deuh ţhin a, a ţha ka ti vak lo ţhin. Hna thawkin a inchawm thei ve vek bawk a, kan ina a lo len tawh chuan mi pangngai kawm ang vekin ka kawm ţhin. Tunah pawh a jacket tur leisak ka tum nghe nghe, min bazar pui hunah kan lei dawn nia." a ti siam siam a, a titi aţang chuan nula naran ka ngaizawng lo tih ka hriat belh phah bawk.

*

An khua a a haw hma ni chuan kan bazar dun a, bazar puiah phei chuan kan lut lo hrim hrim. Mipui an ţhahnem ţhin si a, kan inti na palh ang tih te a hlauhawm.

A nau erawh an exam zawh hnu lawkah a haw tawh thung a, mumal tak pawhin kan la inhmu lo. A haw tur a thlah ni a ka kalpui kha a ni maia kan inhmuh chu, ka rinai an inkawmngeih hmel daih lehnghal.

"I nu leh pate eng nge i pek ve dawn?" A zawhna avang chuan ka pi ka hrechhuak zawk mai.

"Ka hre lo." Ka ti mai a, "Kan lei tel nghal dawn nia. Thil pek hi chu a man lam aiin kan inpek duhna thinlung avang hian a lawmawm tawh sa hrim hrim." a ti siam siam a. 

Kut inkai rialin kan kal kual a, thawmhnaw a en kual lai te chuan 'ka nupui ni se' tih ringawt ka rilruah a awm. Ka inchhir dawn lo tih ka hrechiang si a, chuvangin rei tak innghah a ngaih loh hram ka beisei.

A sam sei hniang chu pawr deuh hlek hian a zial tawm a, a inhmeh ka lo ti hle. A tlangpuiin a sam hi a thlah deuh reng ţhin, a ţawn ve chang erawhin a nghawng var nalh tak hian ka mit a la chat zel.

A chhungte thil hawn tur a lei zawh meuh chuan kan bawr ve hle tawh. Naute thil tur kan en te chuan kan pahnih fa ni se tih daihin ka rilru a lo luah. Ka ngaihtuahna avang chuan nui sukin ka lu ka thing a. Chutia ka lo nui chu a mitmeng hmangin zawhna min zawt nghal.

A bengbulah kun hniamin, "Kan fa ta tur ni zawk se." ka sawi zawh rual chuan a kiuin min nghawk zauh. Ka nuih a za ru viau. Ka thusawi chu hre lo ang hmakin dawr nghaktu hnenah chuan a lei duh chu a thlan fel thu hrilhin a pack zui tir nghal.

Ka nu leh pate ta turin kawrlum phiar inang kan lei sak a, Bektei tan puan ka lei sak bawk. Ka pek ang angah an lawm thiam leh hlawm hle dawn tih ka hria, ka pi la awm ve se chu min fak leh luam duh ngei bawk ang.

Ka pahnih a kan awm hi chuan nikhat lek hi chu a rei lo mah mah a ni.

*

An khaw lama a haw meuh chuan ka rin phak bakin ka lung a leng! Ka khua a har ruih thei tak tak. 

Zuata lo leng hian min fiam nan tak hian a hmang a, Zuitei lah bang lo.

Kum hlui thlah zanah chuan rei tak kan inbia a, an khua a a haw chinah pawh ka ngaih ang bawkin min ngai ve tho tih ka hria, a chhungte bulah hun rei tak hun a hmang tawh lo a, chhungkua hlim leh damtlang taka an inhmu khawm leh thei chu ka lawmpui hle bawk.

Zan lai inkhawm an neih dawn avangin kan inbiakna kan duh tawk a, ka ţhiante ka zawm ve meuh chuan min lo chhaih sap sap. Ka rilru te te chuan 'min hrethiam pha ve lovang' tiin ka chhang hlawm, ka ngaihtuahna avang chuan ka nui suk a, UDongi'n min lo hmu fuh leh pek.

Kan ţhian ho a zaiin kan ţhu bial ţhap a, min rawn enin, "Tenawm viau suh aw Lalfakte!" A rawn tih chuan midangin "Ti nge?" An lo ti sap sap. Ka lo nuih liam mai a.

Ţana chuan, "Fakpuia fa ten ka fate an ngam dawn lo tlat." A tih chuan an nui dar dar a, Malsawmpari awm se chu a zak leh ngawtin ka ring.

Ţana pawh tlangval a ni tawh lo bawk, a mawhphurhna a hlen khawpin ka hria. Zanin pawh rawn kal tum lo kha a ni a, nichin deuh mai khan a lo thleng bawk. Rei awm a tum lo tih a sawi chuan an lo fiam sap sap.

Christmas leh kum thar ka hman tawhah chuan khawhar taka ka hman awm chhun a ni hial ang. Ka pi tel lova ka hman kum hmasa ber a lo ni zel bawk nen, ka kim lo ngawih ngawih.

**

Kum a thar chho a,mahni hna lamah theuh kan bur leh chawt tawh. 

Malsawmpari pawh nimin piah lawk khan a rawn chhuk a, an chelh rei ka lo ti hman khawp mai.

U Joela lo thlen hmain Vtea nen document khawih fel ngai ho kan buaipui dun a, admission kan hawng leh tan tawh bawk a a buai chho ve leh bep bep mai thei a ni.

"UHruaii kha an inhruai leh a sin." A tih chuan ka nui ringawt a, a reh ka lo ti rilru reng a ni.

"Rin ai i bawhzui lo thei ang reng." Tiin a nui hawk a, kei pawh ka nui ve tho, kha ti khawp khan min zar buai ve nasa kha a nia. Mahse ka thinlungah hian hmeichhe pakhat laka rinawm turin ka intiam tawh a, ka hlen ţha viau bawk.

*

Zan khat chu Elii'n min rawn be leh hlawl. Thu ho mai mai tak ngial pawh ka sawi pui ngai lo, min huat phah mah se pawi ka ti lova, ka hnaih a ţul na ka hre lo bawk.

"I bialnu kha lo zilh ve deuh teh." tih a rawn thawn ka hmuh chuan chhan let tumna pawh ka nei lo. 

Ka chhan let tak lohah chuan a dang a rawn thawn leh a, "Thingtlang lam tih takah a ţawngkam pawh a mawi lem lo khawp mai." a rawn ti leh a, engtin chuan nge maw an lo inchhan chu ni. Amah zawk hi a ţawngkam chu a duh tui lo ka ti khawp.

Malsawmpari ka zawh theih tho avangin a hnen aţanga hriat ka duh zawk. Ka ngaihzawng hlui a nihna zawnah pawh hetiang ka sawi pui hi a dikin ka hre lo.

A zan la la a va sawi pui chu tul bera ka hriat loh avangin naktuk a sawiah ka dah ta ngawt. Chubakah Phone kaltlang hi chuan eng emaw kim lo hi a awm ţhin. Hmaichhanah hian pawimawh a awm chuan sawi zel theih hi ka duh ţhin.

Zingah chuan hma deuh hlekah ka va sawm ta reng a, ka inlan hma avang chuan ani pawh a lo hmanhmawh leh hle tawh. Nghah nih hi a thiam lo ţhin, a chet buai phah chung zel. Hmanhmawh lo turin han nawr eng ang mah ila a sawt mawh ţhin khawp a, nghaktu zawkah a tan ţhin avangin nghah a nih ve hi chuan a hmanhmawh chung mai zel.

Kan hnathawhna veng kan thlen hma chuan thingpui dawrah ka luh pui a, a hrethiam lo hmel viau nain zawhna min zawt lo. 

Elii meuhin min rawn bia a nih chuan thil ho mai mai a nih ka ring lova, chuvangin hun thawl deuh hlek a sawipui ţhain ka hria.

Kan ţhut fel rual chuan a hawi kual thuak a, customer dang pahnih vel an awm ve tih loh chu kan thawl viau mai.

"Ka la puar teh mai a nia aw kei chu." A ti zawi sap a, ka lo nuih suk.

In tur chu kan order ta tho a.

"Thil sawi pui che ka duh a." Ka tih chuan, "Pawimawh hmel ve...." A lo ti hman hmawh, tukin chu kan tho fu viau a nih hmel.

"Hei hi..." tiin Elii min rawn biak na tawi te chu ka hmuh a, uluk zet hian a chhiar a, "Sawi duh te i nei em?" tiin ka zawt zui nghal bawk.

Phone chu min pe let lehin, "Hmeichhe buaina mai mai a lawm." A ti sam mai a, a in tur chu a in hlek bawk. Nawr luih chu ka duh bik lo nain Elii hetiang a a rawn ţawng a nih chuan ho mai mai a nih chu ka ring si lo.

"Ho mai mai chu a ni lo tiraw?" Ka tih chuan a lu thing nakin, "A ho lutuk." a ti deuh tlat a.

"Elii hetiang a a rawn ţawng chuan a ho lo tawp ang." Ka ti a, ka ţawng bul viau bawk. Zep tlat lo se ka duh vang a ni pakhat.

Elii chung chang ka sawi vang chu nge ni a ner nawk a, "Tu zawk nge i tan sawi phawt la." a tih chuan a thinrim lem lo tih ka hria, sawi mai pawh chu a harsa viau em maw ni.

"Nangmah!" Ka ti nghut a, a lo nui hak, min bawl a tum ve khanglang lehnghal.

A bag hai rak rakin a phone a phawrh a, hmet leh neuh neuhin min rawn pe ve leh.

Elii hnen aţanga a message dawn ho zawng zawng chu ka chhiar a, Hruaii nena kan thlalak zawng zawng pawh a lo thawn ţhin tih ka hriat chuan ka thin a sa but thei! A ţawngkam hman a duh tui lovin a ngainep thawkhat tih a hriat ţhin hle bawk. Tun hnai mai ni loin nikum lam daih a mi te an nih hlawm avangin a zep thei zawk ka ti khawp mai.

"Ti nge engmah i sawi ngai loh." Ka ti hmuk a, keimah avanga hetiang ţawngkam chhe tak tak a lo dawng ţhin chu ka inthiam lo hle bawk.

"Hmeichhe buaina mai mai a lawm." A ti leh mai a, min chhan dan chu ka lo duh khawp lo hle.

"Chuan?"

"Kha ti zawng kha a ni mai,niminah kan inhmu a, ka zilh ve deuh a nih kha, naute an nihna zawnah nunphung a hre lo riau." a tih chuan ka lo hahdam huai thei.

Ka Inrawlh a ngaih chuan ka inrawlh hre miah lo kha a nia, mahse amah berin a la thu tak lo viau bawk nen sawi pui vak chu ka tum lo.

"A tirah chuan UHruaii turah ka ngai a, i phone ka en khan Elii a ni tih ka hre ve chauh." A ti leh a, tun hnaia mi a ni hlawm lo bawk a, ani pawhin a ngai thutak viau duh tawh lo a nih hmel.

"Elii chu ka lo biak ve ngai i ti em?" Ka tih chuan a lu lo thing vatin, "Hmeichhe buaina ka tih chu...." a lo ti thuai.

"Chubakah mimal takin ka haw lo, a tirah kha chuan ka haw lutuk tho. Mahse ka dinhmun a thik vang a ni tih ka hria a, nang lahin i ngaihsak tawh bawk si lo. Hmeichhia te hi chu kan duhnaah hi chuan kan ngam huai ve tih ka hmu hnem ve tawh a lawm. Mimal taka huatna ka nei lo,lungngai duh suh." A ti zui barh barh a.

"Mahse nang chu i danglam a lawm." Ka tih chuan a nui sak a, "Hre thei pa!" Uangthuang taka a rawn tih chuan kei pawh ka nui ve suk.

"Tak takin kan dinhmun a zir hi a ni mai a, i rin ai ka lo nasa viau thei a nia." a ti leh hnuhnawh a, mahse chu chu ka awih lo.

Ka hriat duh ber ka hre ta bawk rilru engthawl zetin dawr kan chhuahsan a, ka thinlungah hian ka hmeichhe thlan hi ka thlan sual loh zia a fiah tulh tulh bawk.

*

Zan lamah chuan ka haw tlai viau nain ka lut kawi ta tho a, ka luh hnu rei loah a room aţangin a rawn chhuak thuai.

Tunlai kan buai chho leh tawh bawk nen a hranpain kan inkawm hman zen zen lo.

Thingpui pawh in lo in rei lo te tak tak ka ţhu a, ka haw tur chu min rawn thlah leh thlap.

Midang vei vak hmuh tur an vang tawh bawk a min hnaih turin ka hui zauh a, a rawn kal hnai ve mai. A banah pawtin ka kuah ta hle hle a, hetiang a awm hi ka thlakhlelh ber te zing a mi a ni.

"Ka nupui ni tawh la." Ka tih sup chuan ka nakah a ţham zauh a, ka nuk che dat.

Inla hrang hlekin a hmel en thei turin a bekah ka dawm a, min en chung chuan a nui seih a, a hmaiah makeup hmuh tur a awm lo,a hmelţhat thu hi hrilh mawlh mawlh mai ka duh.

Amah ka hmuh a pianga keimah a lo lang hmasa ber ţhin chu ka sawi chhuak a, ka thawl huai thei.

"Malsawmpar ka hmangaih tak zet che." Ka ti supin, a biangah chuan chul hauh hauh a, ka thusawi chuan a tihlim tih hriat takin a mitmeng danglam chu ka hmu thiam bawk.

"Kei pawhin ka hmangaih che." Lai zeta nuiin a ti sap a, insum buai lovin a hmuiah chuan ka fawp zui zat.

Ka inlak hran rual chuan a thaw hak a, a hrawk thian kharhin, "Min hriat hma daih aţang khan ka star daih tawh che." Nui var vara a tih chuan awih chiah lo chuan ka melh reng.

Ka hriat tirh aţanga a laka ka chet dan zawng zawng ngaihtuah phei chuan ka tan chuan rin harsa tak a ni. A cheziaah chhete mahin rinhlelh tur a awm si lo.

"I awih chiah lo a ni maw...." A ti thluk duai a, "Tlemin." ka ti thuai.

"Nia awih a har ang, Zuitei hi min hriatpui tu a nia, mahse zawh kher a ngai lo, ka sawi a a tawk. Ka tan a zahthlak." A ti zung zung a, ka mitah pawh a en ţhat ngam loh avang chuan ka nuih suk. A hmuiah bawk chuan ka fawp leh zauh a, a ţawng paha a hmui che vel hi a hmuhnawm riau hian ka hre ţhin.

"Ok! Ka zawt lo ang, ka ring ang che." Ka tih chuan, "Mahse min chhaih reng reng suh ang che." tiin a lo intawng khalh leh vat a, tih laih ka hrat bawk a a lo inveng lawk chu ka nuih a za viau mai.

"Ka nupui ni tawh mai teh." 

"Makpa chhungkhung i nih duh te chuan." A tih chuan a kawng ka hmer salh a, ani zâ ti chu tal nawkin, "Vanlalfakzual!" A ti hlak a, ka lo nuih ringawt.

Kan inthlah dawn chuan ka hmangaih thu chu ka hrilh leh, a chhan letna chu ka hre kham theiin ka ring lo bawk.

End of chapter 19

💗