HMINGTHANSANGI🌱

Hmingthansangi 

:

:

Ka mi nghah mekin min zawng tih hriat taka a hawi kual chu ka thlir reng a, ka ban ka vai zauh chu a hmu tih hriat takin ka lam panin a rawn kal a. Min hmu chu a lawm nge lawm lo tih a hmel aṭang chuan a hriat theih hauh loh lehnghal. Hmeichhia, mahni inringtawk ve tak a ni tih a hawiher aṭang pawhin hai rual a ni lo. Ka hmaa ṭhutna âwla a rawn ṭhut rual chuan ka nuih suk a,phur loh hmel fahranin a ṭhen sak ringawt. 

Kum sarih liamtaah khan chuan School uniform nen ka hmu ṭhin a, College kal lai ka ni a, Hmingthansangi erawh hi chu pawl 12 zirlai niin, an School bus an channa bul lawka ṭhian hoa awm ṭhin kan nih avângin kan inhmu zing hle a, ka hming erawh a hre zui ve kher ang em ka hre lo. Keini chuan tleirawl hmelṭha leh chhelo chu kan hre viau thung. Khang lai hunah khan hetiang hian inhmuh kan ngai ang tih ka ring pha hauh lo, a hma khan hmelṭha tih a hlawh ṭhin viau a, kei chauh ni lo hmelṭha titu a ngah tih chu ka hrechiang ve hle. Tunah chuan a hma zawng aiin a hmelṭha zual zawk emaw tih mai tur a ni.

"Traffic jam-ah ka tang rei deuh a, ka rawn tlai phah a nih hi." Tiin thupha chu a chawi ve ngei. A hmelṭha tak chu ka lo thlir reng a. "Inbiak i duh chhan chu eng nge?" Ka sana melh zawka ka tih chuan a ner ru sak chu ka hmu hman, min ngaina lem lo tih a thup buai lo lutuk chuan ka nuih a ti za zawk. Ṭawng tumin a âng zuau hman a, ban vaia khapin in tur ka chah hmasa leh phawt a, hawihawm takin min ngaichang leh rih. 

Boruak tih ziaawm nan ka'n nuih ve ngial a a ngai pawimawh lem lo a ni ang hmun dang a hawi daih, keiin amah ngawt chu ka en thung. "Enteh, hun ka ngah lo a nia. I u, ni lo, in monu chu hmaichhanah ka be duh viau nain hun a neih loh thu a sawi miau mai sia." A ti a, kan in tur an rawn chhawp chhung chuan a ngawi leh rih. A sawi duh ang a sawi zawh hma chu inrawlh ka tum lo. Kan pahnih chauh kan nih leh veleh kan in tur ve ve chu kan lem khalh a, a sawi duh a sawi zawm leh nghal. "I unaupa nen kan inngaihzawn i ring ve em?" A rawn ti khauh, ka dar ka kân ûk ringawt chu a duhkhawp lo hmel hle. "Hei min en la...." A tih lak lawh laiin,"Ka en che." Ka lo ti hmanhmawh a, ning hmel zetin a thaw leh hak. A dawhtheihna a pan hmel viau reuh a.

"Sawi zawh hma hma a!" A tih hlak chuan a ṭawng zawi viau nain ka hrechiang hle. " Sawi zawm la." Ka tih chuan a hrawk a thian hmasa te te a,"Pawmlai nei lo pawh ka hmuh zawh ve tehreng nen, mi pâ kawp anga min chhuah hi chu ka lawm lo ve hle a ni tih hi lo hre rawh u. Ka lawm lo a ni tawp. Min duhtu zawng zawng te hi kan ngaihzawng an ni kher lo tih te hi hre ta che u!" A ti a. Ngawi rengin ka en reng tih a hriat rual chuan,"In monu a nia ka sawi chhan." Tiin a insawifiah leh. "Ka hria a lawm." Ka ti ve mai a. Thukhuh a nei lem lo tih chu ka hmuh hmasak khan ka hre tawh a, a tawngkam hman duh dan pawh mak ka ti tawh lem lo.

"I hriat chuan a ṭhat chu! I u te nupa leh keima inkar mah ni se ka hnuhluh che avângin min hrethiam dawn nia. Mahse thu hretu ka mamawh sia, i u ka bia a nih chuan annuin ngaihdan dik lo a neih ka hlau ve tho va. Mi chhungkaw tibuaitute hi ka huat zawng tak an ni ve tho a nia." A tih laiin,"Kei pawh." Ka lo ti vat. "A ṭhat chu." Tiin a meng kual ralh a, a hmaa in tur awm chu a lem leh khalh. Biangsum a nei tih a hmu nghal bawk.

Ka u nen an thawhna department a inang a,ka u hian a ngaizawng tih chu kei pawhin ka vawikhat hmuh dun aṭangin ka hrethiam. Ka ULawmi(Mo) rilru na taka siamtu a nih avângin ka haw ve hle ringawt a nih kha! Mahse hmaichhana ka hmuh dun hnu khan chuan Hmingthansangi hian a ngaizawng ve lo tih ka hrethiam nghal. ULawmi hnenah erawh ka hmuh dan chiang takin ka la hrilh leh lo. Ka rin loh lutuk a Hmingthansangi'n inhmuh a rawt avangin a rilru puthmang chiang taka ka hriat hnuah ka be leh chauh ang tiin thutlukna ka siam a ni.

 Ka ute nupa hi an inneih aṭangin kum nga chu a vei ve tawh a, fa an la neih loh avangin ULawmi rilru a hah ru ṭhin tih kan hrethiam vek. Chuvangin kan chhungkaw ho chuan kan duat hlawm viau bawk. 

Ka u nena an buaina hi nikum aṭanga inṭham daih tawh a ni a, kan hna avanga kan zin kual ṭhin avangin an boruak ka hre ve chiah lova, kuminah ka hre chauh bawk. ULawmi ka lainat avangin ka u pawh a vawikhat nan kut ka thlak hial! Ani erawhin min khawih let ve lo, a tihsual a pawm niah ka ngai a, a hmeichhe ngaihzawn pawh chu ka haw hle bawk. ULawmi pawh thlakhat vel chu anmahni in lamah a let a, kan inhruai leh hnuah an boruak a ṭha chho viaua kan hriat laiin ka u chu a ringhlel leh a, ka u chuan engmah chiang taka sawi a tum ngai loh avângin an thawhna hmunah ka kal chilh hmiah a, kha tah khan kan chhungkaw buaina chu Hmingthansangi a ni tih ka hre chauh, mak ka ti viau bawk. Ani erawhin min hre ve chiah lo niin ka hria.

Kan ngawih dun vang vang hnuah,"In monu chu chiang deuhin lo hrilh rawh. Hmeichhia ve tho ka nia a rilru tur ka hrethiam vek lo a nih pawhin ka hrethiam pha thuak a nia. Dik tak chuan i u hian min ngaizawng tih te chu ka hre ve tho va." A ti a. Dawhkana no chu a tuai a tuai bawk. "A tirah khan nupui nei tawh a ni tih ka hre miah lo." A rawn ti chhuak hlawl. A ngaizawng ve hman nia ngaiin ka thinrim ṭun hman a nih chu! Ka buaina tur a ni lo tih ka inhrilh mawlh mawlh.

"Mahse ka hre har lo. Ka thawh tirh lai kha a nia, chhelo ka ti ve tho zep loh chuan." Chiang zetin ka en reng tih a hmuh rual chuan,"A hma khan a nia ka tih. Ka sawi awmzia chu, engkim tlang taka sawi vek law law ka duh vang zawk a nia. Mihring chu kan nungchang hi kan hmel lanna a ni an tih ṭhin hi maw, min ngaizawng tih te kha chu ka hrethiam ve vek a;mahse,nupui a nei reng tih ka hriat hnu kha chuan khu tah a tla vawn vawn tawh. Duhthlang theiin kan zalen a, mi pa emaw mi nu chu eng anga kan mit la pawh ni se kan duhna tih lan chu thil ṭha ber a ni lo tih kan hriat chuan kan duhthlanna hmangin kan inthunun thei mai, i u ka sawi chhanna kher pawh ni lovin, mihring nun a nih chu aw ka sawi." A ti a. A thusawi chu a dik viauin ka hre bawk.

"Ka sawi duh ka sawi zo bawk a ka kal mai dawn a sin." Tih leh a bag ban a rual nghal a. "Min hre lo tak tak em?" Ka tih chuan a che lai tawp chutin chiang takin min en ve nghal, "Ka hmuh hnu chu i ang ve tho." A ti ta a. Min la hrechiang vat ang tih chu ka rilruah a awm nghal. "Kan la inhmu leh dawn nia." Tiin ka thawh san a, bill pein ka chhuak nghal. Ka thaw a veng huaiin ka hria. 

Ka motor dahna lam ka pan hnu chuan Hmingthansangi lo chhuak chu ka en reng a, a hma ang bawkin a hawi kual leh. Min hmuh rual chuan amah zawkin ban rawn vaiin ka lam panin a rawn kal nghal. Car bulah dingin eng tak sawi duh ang maw ti rilruin ka en reng a, ka bul a rawn thlen rual chuan,"Zami bialpa hlui em ni i nih?" A ti a. Tu Zami bialpa mah ka la ni ngai lo. "Ni lo e." Ka tih chuan za lo tih hriat zetin a nui hak,"A van mak." Ti hluaiin kal tur chuan min ti a, engmah zawt zui lovin ka inkhalh chhuak ve nghal. 

Kan chhungkua hi member panga kan ni a, puitling ṭhah kan nih avângin thawm bengchheng hriat tur a awm khat hle. Zanriah kan kil ṭhap laiin Hmingthansangi nen kan inhmu tih chu ka sawi a, ka u lawm lo hmel chu ka hai der hmiah. Hmeichhe pangngai tak a nih thu sawia ka fak lai chuan ka nu chuan a pawm ve hmel chiah lo, ULawmi erawh a ngawi reng. "Mihring kan ni a, mi pangngai tan chuan duh zawng te chu nei thei vek kan ni. Kan rilru puthmang pawh keimahni bawkin kan thunun thei bawk. Kawppui nei tawh kan nih avângin kan mitin thil dang a melhna a ṭhulh phah lova, mahse kan rilru puthmang zawng zawng hi lan chhuah tir a ṭul ber ṭhin lo. Kan inthunun thei tur a ni. Thil ṭha a chhuah dawn leh dawn loh chu a tirah keimahni ṭheuhin kan hria a, chuvângin kan rilru puthmang lan chhuah tir a ṭulna leh ṭul lohna te chu kan duhthlanna a ni." Tiin, Hmingthansangi sawi dan zul zui chuan ka sawi a, vawiin lama a sawi dan a ni tih ka sawi lang hram bawk, a chhan pawh amah an hmuh dan hi thlak sak ka duh tlat. An ngawi ṭhap hlawm a, a hnuah ka pa chuan ka u chu a zilh ve leh bawk. ULawmi tana hriat nuam lo tur engmah a sawi chuang lo. Hun dang ang bawkin ka u chu a ngawi leh reng a, an nupa boruak avanga chhungkaw boruak dang ve vek chu ULawmi a inthlahrung thei hle.

Ka pa hnungzuiin kan chhungkaw sumdawnna lamah ka hun ka hmang nasa a, tunah chuan ka pa aiawhtu tak tak ka nih tawh avângin leh ka pa aimaha ka duh tui avangin bungraw latu ber ka ni a, hnathawk kan neih ve nual tawh avângin ka buai dan pawh a zia chho viau tawh.

"Rosangzual!" Tia min ko riah chuan ka hawi buai hle. Kawng cross an awm avangin ka ding a, ka piah lama hmeichhe pahnih lo ding te chu ka hmu ve zat. "Lalrinawm!" Ka ti let ve nghal. A bula ding chu tu dang ni lovin Hmingthansangi a ni. Lalrinawmi nen eng inzawmna nge an neih ka ring thiam mai lo, ani pawhin a bula mi nen kan inhria chu mak a tih ve hmelin ka hria. Kan inhmuh aṭang khan thla khat chu a vei leh der tawh. Nula na na na chu tiin WhatsApp kaltlangin ka be ve zeuh zeuh, induh thiam tak a ni ringawt. 

Lalrinawmi nen hian Master kan zir ho a, ṭhianpa Bza nen pawh an inzui ve reng tawh. An chanchin ka ngaihven lo bawk a kan kal darh hnuah ka hre zui lem lo. "I hmel pawh a chal ve ruih tawh mai." Tiin Lalrinawmi chu a nuih a za hmel hle. Ka nuih liam ve mai a. Kan tih tur te kan sawi ve ve hnuah kawngkan ho an kal fel tawh avângin ka tlan chhuak a, kan inbiak chhung khan Hmingthansangi kha a ngawi reng a, min ngaihtuah zui ve tho in ka ring, ka rin thu mai mai ni lo se ka ti ru hle.

Inkhawm zan a nih avângin ka nu leh pate an inkhawm a, kei ka haw tlai deuh avangin ka inkhawm hman lo. ULawmi nen chauh kan awm a, ka u erawh an thawhpui chhungte boral an awm avangin a chhuak thung. ULawmin min hrilh rualin Hmingthansangi a kal ve ang em tih ka rilruah a lo lang nghal. 

Ka len chhuah peih loh avângin ka inbual zawh rualin ka pindanah ka tawm chawt a, Lalrinawmi contact dan tur ka dap nghal. Hmingthansangi kha ka belchiang dawn a nih chuan Lalrinawmi hi a pawimawh dawn tlat a tin ni. Kum hnih tal tawp ngaihzawng nei lo tawh ni mah ila a kalhmang chu ka hre ve a lawm. Bza ka be hmasa ber a, ka rin rilruk ang ngeiin Lalrinawmi nen chuan an lo inṭhen daih tawh, ani hi Champhai lama awm a nih avângin kan inhmuin kan inbe khat viau a, a nu hoa khawsa an nihnaah chhungkaw pa ber chan chang a nih avângin kan ṭhian ho rau rauah a puitling bik hle. Lalrinawmi nen chuan inṭhen tawh mah se a number chu a lo la nei ngei, min rawn thawn nghal a, kan inbiak khat avangin sawi tur kan ngah ve viau lehnghal.

Lalrinawmi number ka save chiah tihah ULawmi a lo lut a, ka u nen an inneih hnuah a thawhna School aṭangin a bang a, in chhung enkawl tur liau liauin a ban san a ni. Ka nu pawhin a fanu ang tak takin a en ve niin ka hre bawk. Khuma mu ka nih avângin ka ṭhu ṭha ve vat, sawi tur pawimawh tak a nei a nih ka ring. "Hmanni deuh khan Hmingthani khan min lo bia a." A ti a. He nu hming ka hriat rual hian keimahah hian danglam a awm ṭhin, ka hriatna lamah ka mit leh beng ka chhi rang ṭhin lutuk tih hi a hrechiang ber tu ka ni bawk. "Eng nge a lo sawi a." Ka ti a. Ka u hi a mizia a danglam chhoh em avangin chhungkaw boruakin ngai a awh hlei thei lova, ULawmi ngei pawh a taksa a tla dawk a ni tih a hriat.

"Mama hian dam lohna a nei em min rawn zawt a." A tih chuan mak ka ti ve deuh. "A mize danglam ta lutuk hi inhre ve vek tho ang a, a harsa ka ti ṭhin." Thawhapa a tih chuan ka lainat ru hle, mi ṭawng duh tak tia sawi tur a ni lova, a rilru hahna pawh a sawi chhuak zen zenin ka ring lo, ka bulah a insawithawl duh a nih chuan a tan ka inhawng viau bawk. Ka u chung chang a nih ṭhin avang hian hrehawm ka ti ru ve ṭhin hle.

Hun rei tak an inzui hnua innei an ni a, an inhmangaih viauin kan hre bawk. Ka u in ngaihzawng a nei tih chhungkuain kan hriat hnuah phei chuan kan boruak a rit em em reng zel a, Hmingthansangi nen an inngaizawng lo tih kan hriat hnuah pawh ka u mize danglam reng tlat mai hi kan hrethiam hlawm lo a ni. "Hmingthani chu mi ṭha tak niin ka hria. A hma khan chuan ka hriat dan a fuh lo bawk nen min biak a tum pawhin ka be ṭha duh ngai lova, Mama nen an inkawp lo tak zet tih kan hriat hnuah pawh Mama mize danglam tlat mai hi ka hrethiam lo, a tan ka inhawn viau pawhin a inla hrang tlat a. Hmingthani chuan office ah pawh midang pawh harsa khawpin a inla hrang a ti a, ka rilru a hah tak zet." A ti leh hap a.

Thu ngai sawi nawn reng hi ka tih ngai loh avângin ka u pawh vawikhat ka biak bak a mimal chung chang ka sawi pui leh tawh lo. Nupui nei tawh niin patling rilru pu tur a ni tawh a, tih tur leh tih loh tur chu a thliar thiam turah ka ngai. Mahse tun ṭum chu ka inrawlh leh a ngaih hmel tlat. "Mama chu ka lo be ve dawn nia." Ka ti a. Hnemna tur thu thui tak chhah chhuah tur ka hre lo, mahse ka tih tak zet zia a hriain ka ring. Rei awm tawh lovin a chhuak a, ka phone bawk ka ban leh.

Lalrinawmi chu ka call nghal, a chhang har phian. Hello pawh a tih hmain,"I va chhang har ve." Ka'n ti nghal ringawt a. Ka aw ah min lo hre ve nghal mai. Thil dang kan sawi kai hmain Hmingthansangi nen an inhriat dan ka zawt a, min chhang mai lovin min chhaih leh nasa hle ringawt. "Sawi mai mai teh." Ka tih hluk takah chuan thinchhia min tih thu sawiin ka zawhna chu a chhang ve hram. "Kan ṭhenawm lawkah an awm a lawm, kan kum a inthlau deuh nain a u te nen hian kan inkawm ho vek a. Engtin nge in inhriat zawk? Hmingthani kha chuan a hriat hmel loh che bawk sia." A ti a. Hmingthansangi chuan min ngaihven viau lo tih chu ka hre leh phawt.

"Min hre lo der a nih kha." Ka tih chuan,"A awihawm loh tih dawnin awihawmna chin a awm ve tho sia." A ti niah niah. "Tak takin Hmingthani hi chu a mimal thil a sawi chhuak khat ve a, a khirh ve zek a nia. I beih ve fe a ngai ang." Thil intihrethiam tak chuan a nui rah rah. "Bialpa a nei em?" Thudang sawi lo chuan ka ti leh,"Nei lo ang." A rawn ti a.

"I va chiang lo ve." Ka ti ve nghal.

"Nei lo ang hlir chuan a awm a, mahse kan awih ngai lo a." 

"Ti nge in awih loh?"

"Ngaihtuah ve ta che, be tu a nei reng dawn chiang sa. A duh duh thlang thei a ni tih te chu i hrethiam ve tho ang chu." 

"Aw a tawk tawh ka dah." Tih leh hmeh tawp ka rual nghal. Be tu a nei reng dawn a tih zingah chuan ka tel ve thei tlatin ka hria, keimah ang bawk khan midang a chhan ṭhat peih bik loh beisei phawt teh ang.

Awlsam taka a rilru hneh a theih loh tih ka hriat chian takah chuan ka phur zual sawt! Biak ka tum chu ka ṭhulh leh rih. Ka u te nen an kalna a inan ngei ka ring,ka la nghak thei.

Ka u lo haw hun ka nghak ta zawk a. Ka nu te mut hnu lawkah a rawn thleng ve mai. Inbiak ka duh thu ka sawi hnuah ka room ka pan a, min rawn zui ve mai bawk. Sofa-ah chuan a ṭhu rem sauh sauh a, an buaina ka hriat hma kha chuan ka lakah a inthup ve ṭhin. Mahse ka hriat hnuah erawh inthup buai a tum bik lo, ka zilh vena pawh huatah a la lem lo bawk. "In nupa inkar hi ka inrawlhna tur chu a ni miah lo, mahse inrawlh lo thei lo hian ka awmin ka hria. Eng nge i awmzia hi ni ber? ULawmi rilru i tihhahna zawng zawng te hi i hmu lo em ni? I buaina tak hi eng nge ni a? Hmingthani nen lah khatiang kha inni a, mi pangngai a ni hlauh a kan mualpho tam lo zawk a. A hma kha chuan amah zawkin a zar sek che a nih ringin i thiam loh pumhlumah ka ngai bik lo, mahse hei a thiam lo zawk chu i lâng nalh mai sia." Ka ti duah. A ngawi leh reng a nih chuan ka en liam tawh lo ang tiin rilru ka siam fel bawk.

"Lawmi hi i hrechiang em?" A rawn ti khauh. "Chiang ve e, kei ai pawhin i hrechiang ang chu. I hriatchian vanga nei i ni lawm ni?" Ka ti duah. Min be tak nain a melh ngai a melh vung vung thung a. "Kan inzui aṭanga kum nga hnuah kan innei a. A nunhluiah ka buai ngai lo, ka ring tawka, ani pawhin min ring bawk." A ti a, a thil sawi dan chu a hmanhmawh loh hmel hle. "A bialpa hmasa nen khan an tleirawl chhuah tirh aṭanga inngaizawng an ni tih chu ka hria, mahse nau an ti tla tih thleng chu ka la hre ngai lo." A ti a. Chu thu chuan min deng ve dawt ti ila a dik ve ber ang. ULawmi ka ngaihtuah a, ka awih chiah lo.

"Midang hnen aṭanga hriat hi engtiang a na nge a nih i hria em? Chu pawh a bialpa hlui hnen aṭangin. Ka na a sin." A ti chuai raih a. Dawt a sawi ka ring ta lo, a awm chu a dawm reng bawk. "ULawmi i sawipui tawh em?" Ka tih chuan a la sawipui loh thu sawiin,"Nunhlui avanga buai ka duh ngai lo. Mahse he thil ber kher hi chuan min den dan a dang em a, Lawmi hi ka hua a, hmuh chakna pawh ka nei lo. Sawi chhuah a, insawi thawla a thusawi ngaihthlâksak ka duh a, mahse ka thei thlawt lo. Hlat ka tum laiin Hmingthani a lo lang a, ka hmeichhe duhzawng Lawmi te mizia ang a nei miah lo, mahse amah khan min hîp tlat a, min ngaina lo tih pawh a thup ngai eih lo, mahse ka hnaih chak sauh ṭhin. Min tih dan i hre duh em?" Min zawh lai chuan ka lam rawn hawiin a nui a.

"'I nupui tan rinawm ringawt rawh. Pathian hmaa i dinpui tawh a nih kha.' min ti, ka hmaichhanah lehnghal." Tiin a sawi lai ngaihtuah let ni awm tak chuan a nui leh a, "I duh tiraw?" A rawn ti let hlauh, a mithmul a kân ûk a. Zep a ṭulna ka hriat loh avângin,"Aw." Tiin ka chhang hmiah. "A awlsam vak lovang. Mahse nula thlan sak dawn che ila ani saw ka thlan sak ang che." A ti leh a, ka nui ve suk ringawt.

"Lawmi chu khapa nen khan an la inbia a sin." A ti nguai leh ruih a. A thinlung a na ve hle tih chu ka hre thei. "Hmingthani chungchangah ka thiam loh ka pawm. Ngaihdam ka dil tawh a, tih sual nawn ka tum lo. Mahse zan reiah ka hriat hlau taka phone hmang tura a thawh hi ka hre fo, a tirah chuan ka zawt ve a, a ṭhiannu a tih avângin ka ngaimawh zui lo. Mahse ka hre ta fo a, kha pa khan min rawn biak pawh leh takah chuan zan reia a biak ṭhin kha a ni tih ka hre ve chauh. Ka tih sual rah ka seng nge ka vanduai ve hrim hrim tih pawh hi ka hrethiam lo, kan nupa inkar siam ṭhat leh chakna ka nei lova, bul ṭan dan tur pawh ka hre lo." A ti a. A harsatna te ka hnena a sawi ve leh thei ta chu ka thaw a vengin ka lo lawm ru hle.

"ULawmi hian a hmangaih hle che tih i hria tiraw?" Ka tih chuan,"Chu tah pawh chuan ka inringtawk zo tawh lo." A ti hul hak a. "A hmangaih che a lawm, ni lo se a rawn let leh hauh lovang. A bialpa hlui nen pawh chuan eng vanga inbia nge an nih i hre lo a." Ka tih laiin,"Thil dang rin tur a awm chuang em ni?" A ti hluk a, a thik thawkhat tih chu a hriat phawt. "Awm ve e, i thlir dan kha thlak chhin la. An lo inbe ck viau nge ni a, thil dang vang zawk tih tal hriat i tum ang chu. Mahni ina nuam taka awm thei reng a nih laia nangmah avang liau liaua keini mihrang min hrawn tura rawn lut hi, chance pek a phuin i hre ve lo maw?" Ka tih takah chuan a ngawi ta vung vung a.

"Nupa inkar boruak chu kei ai i hrechiang daih zawk ang a, mahse buaina tam tak hi chu inbiakpawhna ṭha a awm ṭhin loh vang a ni tih hi chu ka hre ve a. Chuvângin nangni pawh pumkhat innih anga inpumkhatte rilru puthmang ang pu turin inbuatsaih thar leh thei ula ka duh. ULawmi chu hun ṭha pe leh a, a hnulam chu ama awmdanin a la rawn hril mai. Tun hun hi a pawimawh ber." Ka ti ve leh duah. Ani pawh a bu ve nghut a. 

"Ka va phei ve tawh ang e. Muttui." Tiin a tho chhuak a, ka thusawi te kha zawm tak tak turin ka duh. An awmna tual zawla awm ve loh chuan sawi chhuah ringawt chu a har lo ṭhin viau a, mahse anni pahnih erawh inngeih taka awm leh turin ka duh tak zet, ka thusawi khan awmzia a nei turah ngai phawt ang.

"Hmingthani chuan ka nau i ni tih a hre sia, a harsat zual ka ring." Kawngka a khar hma chuan a ti leh hram a, ka nuih a za viau lo bawk. Chu ti taka an sawi harsa chuan chona min pe zawk hlauh lehnghal.

Biak nghal tut tut mai chu ka chak a, ka belchiang chak et et a ni ber. Mahse thil ṭha ber a nih loh avângin ka insum leh rih. A hma ang bawkin message chu ka thawn leh,"I buai em?" Ka ti ve thlap. A online reng a,a hmu duh lo lui tih ka hrethiam mai. "Hmingthansang!" Tih ka thawn pawh a en liam leh phawt. Ka number a save lo nge dp a nei lo zawk ni. A offline hmak zui a! Luhlul ve ngat ngat tak a ni. Mahse awlsam taka neih theih te aiin kan beih deuh hnua kan neih te hi chu an hlut dan a dang tih hrechiangtute zinga mi ka nih avângin ka hmanhmawh lo. Midangin min chet khalh erawh ka hlau ru ve tho.

Bialnu pali ka nei ve tawh. Ka neih hmasak ber kha chuan kan la naupang bawk a, kan inṭhen khan ka la na ve ngaih ngaih hle. A hnuhnung ber erawh nupui neih ngaihtuah thlen vek hnua ka neih a ni bawk a, ka rilru ka pe hneh ve leh hle, mahse min ṭhen hmasa ve tlat a. Ka tlawmngaih em avangin eng vanga min ṭhen nge a nih zawt buai lovin ka aw ve hmiah kha a nia, hmeichhe dang vangin kan buai neuh neuh a, min ring thei ngang lo nia ka hriat vang a ni pakhat. Tunah Hmingthansangi a lo lang ve leh a, eng tak ang ang maw.

Minute Nga vel ka nghah hnuah pawha a la online loh fo avangin call ka tum ut ut tawh. Mahse ka inbengdai hram hram a. Biak tum zui lovin zanin a tan chuan ka duhtawk rih.

Zingah chuan tukṭhuan ei laiin tuk dang ang bawkin kan ngawi leh ṭhap. Mahse thil danglam a awm ta thung. ULawmi chu a ṭap nasa hle tih hriat takin a mit a bui lâk a, tukṭhuan ei chhunga eng thu leh hla mah an neih loh avangin an pahnihin an chingfel thei ni turah ka ngai hmiah, ka thaw a veng ru huai bawk.

Kan hnaah kan buai chho bawk nen hun awl ka nei lo chho viau a, mahse zan tin Hmingthansangi message thawn ka ṭhulh phah chuang lo, phone call a buaipui turin hun ka nei chiah lo a ni ber. Min block em lova a lawmawm lamah ka ngai. Ka duh phawt chuan hun chu ka insiam thei, mahse a hun rih lo niin ka hria. Chutiang a ka tih aṭang chuan chawlhkar hnih a liam ta der. Hna lamah ka tlawngawl leh ta deuh bawk a bung thar kai a ṭul tih ka hre reng bawk. 

Ka ṭhianpa ve ber Mala a rawn haw ve ta bawk a. Khua a har lo deuh ang chu. A lo haw tukah kan ṭhianpa Zovala restaurant hawn thar lam panin kan kal a, a thar chiah tawh lo, kum khat chu a tling dawn tawh ang. Mahni ṭuanna muala ṭul ṭheuh kan nih angin inhmuhkhawm a khat viau a, Zovala te awmna veng a hla deuh bawk nen kal mai kan harsat tlang hle.

Zovala kan biak lawksa avangin min lo hmuak thlap a, customer nei nual mah se min lo hauh sak diam tawh. Mala hi Mamit lamah middle School Principal in a awm a, a rawn haw zen zen loh avângin a rawn haw chhunah chuan inah kan awm hman ngai meuh lo. Zovala pawh chuan hnathawk a neih vek avangin kan bulah ṭhut hmun a rem ve a, sawi tur an ngah dun lutuk chu an thusawi ngaithlain ka ṭhu ngawi leh reng ringawt, chu chu an tan thil thar a ni lem lo. 

Chu tih lai chuan Hmingthansangi rawn lut ve hlawl chu ka hmu a, ka taksa pêng te hian ka mitin a hmuh chu tu nge a nih tih an inhrilh nghal vek ni mai hian ka hria , tute nge a lo luh pui tih pawh ngaihsak lovin amah ngawt chu ka lo en a. Zovala'n Lalrinawmi a au tih ka hriat takah chuan midang ka en ve chauh. An ṭhian ho chu panga an ni a, Zovala'n Lalrinawmi a koh avangin midang pawh an rawn hawi hlawm, Hmingthansangi nen chuan kan inmelh chiang hle bawk. Min hmu chu a hmelah danglamna a awm eih lo. Keini ṭhian ho hi kan zirna hmun a inang deuh vek a, Lalrinawmi hi kan hmeichhe kawm ṭhin tlemte te zing a mi a ni.

"I en nasa lutuk." Tia Mala'n min kheuh zeuh chuan Hmingthansangi te chu kan bulah an ding tawh a, Zovala chuan dawhkan zawm belh tirin kan bulah a ṭhut tir ve dawn a lo ni. Hmingthansangi tih loh chu an ṭawng duh hlawm viau a, Mala leh Zovala te pawhin Lalrinawmi chauh hre sa mah se nula na na na chu an be nel har lo. An ei tur chah a rawn thlen ve rual chuan,"Hmingthani pawh ei tur a hmu bawka a ṭawng ve leh peih tawh ang chu." Tiin a ṭhiante chuan an fiam a, a der ni miah lova a nui chu a inhmeh ka tiin nui reng se ka ti rilru khawp a.

Ka hmaa ṭhu Lalrinawmi'n ka ke a rawn chhir zeuh chuan ka mit hmul ka kân ûk a, Hmingthansangi ka en dan a hmuh hmaih lo tih ka hre mai, ka nuih suk ringawt. Mala pawhin hmeichhe hmelṭha chu hai hek lo, Hmingthansangi chu a be chat a, kei ang lo takin nui sângin a chhang thei zel, ka thik lo ka tih chuan dawt ka sawi chiang hle tihna a ni mai. Biak ve chu duh viau mah ila sawi mai tur ka hre tlat lo. Mahse he nu hi ka chhuah lovang tih ka rilruah ka tuh nghet sauh sauh thung.

Restaurant aṭang chuan kan chhuak rual diak a, Zovala chuan ṭawngkam a thiam bawka ka ngaihtuah lo. An inbiak buai chhûngin Hmingthansangi lamah ka peng ve nghal a. A bula ka ding chu hria ang pawhin a awm lo. "Zaninah eng nge i tih dawn?" Ka tih chuan min en ve hram. "Ka mu ang." A ti liam puat a, ka ner sak. Midangin kan thusawi an hre pha kher lovang, vanneihthlak takin a lo ding fal hlauh a. 

"Ka lo leng dawn a sin." 

"A ngai chuang hleinem."

"Keiin ngai ka ti a lawm."

"Ṭhulh rawh." Teh tawp a. Huatah pawh ka la lo, ka nuih a za zawk mah.

"Ka message i reply lo leh a nih chuan ka rawn kal ang." Ka vo ti tih ringawt. A'n ngai ho hmel em em mai khawp a,"A ho e..." A ti leh mai a. Kan rilru a la thuhmun lo nasa hle tih ka hriat chuan nuih a za lam a ni e.

"Ka uang lo a nia. Tun aṭang chuan...." Ka tih laiin,"Bialpa ka nei. Kawplai nei an be buai ngai lo." A lo ti hmanhmawh. A thusawi chu ka awih lo nasa mai, a sawi lai kha a hnaih lai tih dinhmun chiah chiah a ni. "I nei lo tih ka hria. Lo nei ta pawh ni la nula i nih loh phah hleinem." Ka ti ve leh, ka thu tak hle a ni tih a hriatthiam ka beisei. Min chhan leh hmain a ṭhiante lam a pan a, an zinga pakhat car ni awm takah chuan an lut diak a, Hmingthansangi chu ka en zui reng bawk. Ani erawhin min ngaihvenna pakhat mah a nei lo tih a hriat reng.

"Rosangzual, Duhsakna ka hlan a che." Nui var var a Lalrinawmi'n a rawn tih chuan Hmingthansangi ner sak chu ka hmu hman, a awmzia a hre ve tih ka hriat chuan ka nuih let ve thei ta chauh. An liam hnuah ka ṭhiante pahnih chuan zawhna an ngah leh hle, kan inbe fal kha an lo hmuh hmaih lo nasa viau a ni awm e. A pawi lo tur chin chauh ka hrilh thung.

Zanah chuan a ngai ang bawkin ka message chu a ngaihven leh pek lo. Mahse beidawn ka tum lo. Lalrinawmi hnen aṭanga an in awmna bawr ka hriat tawh avângin Mala sawmin ka chhuah pui ve hmiah. Mala hnenah chuan a khirh zia ka hriattir ve lem lo. Lalrinawmi te ṭhenawm lawk an nih angin Lalrinawmi chu kan be pawp hmasa a, an inkawta kan din hnuah Hmingthansangite in chu min kawhhmuh nghal. Lalrinawmi lah chuan min fiam deuh reng mai bawk. Eng nge thleng dawn hre lo mah ila kan inkar ngaihtuah chuan ka hmabak a la ko ang reng si a, Mala chu Lalrinawmi te ina lo awm rih mai tura tih ka duh rum rum.

Lalrinawmi chuan,"Hmingthani hi chu ngaihzawng chungchanga fimkhur deuh, nula senior nih pawh hreh lo zawk ang chi a nia, a la upa viau lo na chungin a rilru puthmang erawh a puitling ka tih ngam zinga mi a ni. Nelawm hmel deuhin a lang a, mahse belh chian deuhin a ṭawngkam a khauh leh ṭhin viau thung a. Chu aia chiang a hretu chu kan tam lo nain a rilru ṭhat zia leh a nun nem zia hi kan hai lo a nia. Chu mi lai thlenga i hre pawh a nih loh chuan a chung changah ngaihdan siam ringawt suh. A rilru i hneh thei a nih chuan mipa vannei tak te zinga mi i ni ngei ang tih ka ring tlat." A ti a. A sawi hnem bawka ka ngaithla uluk hle. Sawi buai tur hre lovin ka bu nghat ringawt.

Lalrinawmi luh hnuah chuan eng pawh huamin Hmingthansangite kawngka chu ka han kik karh karh a. Chhunglam aṭangin min rawn chhawn vat. Mala pawhin Lalrinawmi thusawi aṭangin a hrethiam vek dawn tih ka hria a, kan boruak dik tak hre chunga min luh pui tur a ni bawk a ka thaw a veng ru huai. Chhunglama Lalrinawmite ṭhian zinga tel ve chuan kawngka a lo hawng a, Hmingthansangi u a tih kha a ni tih ka hre mai, an inang lo ka ti viau bawk. Ani pawhin a hmaa min hmuh tawh avângin ṭha takin min lo chhawn a, rei tak hnua nula ina ka luh lehna chauh a ni bawk nen eng emaw a awm ve tlat. 

Hmingthansangi u chu Hruaitei a ni a, a nu te chu min inhmelhriat tirin apa chu a len thu nen lam a sawi a, ṭhutna tur min kawhhmuh hnuah Hmingthani ko turin a kal sawn zui nghal. Nu ber pawh chu a hawihhawm hle a, Mala lah khabe sep thiam ngang a ni bawk nen kan boruak a zangkhai viau. 

Hmingthansangi a lo lan chuan minute nga a liam hman tih ka lo chhinchhiah kar a. A hmel lan dan aṭangin engmah ka hrethiam lo. Inleng pangngai ang takin ṭha takin min lo chhawn reuh a,ka beisei loh lam daih a ni. An naupang ber mipa chu lehkha zir a nih angin a room-ah a inkhung daih a. Hruaitein min ṭhutpui ve bawk a kan len chhung chuan hrehawm tihna hman a awm lo. A vawikhat nan Hmingthansangi thingpui lum ka in phawt chu a nia. Kan vawikhat lênna a ni bawka rei ṭhu lovin haw ka rawt thuai, anu chuan ṭawngkam ṭhain min chelh ve bawk a, Hmingthansangi ber chu a ngawi tlat. Min thlah tur chuan a rawn ding ve leh at lawi a, anu chuan zan danga leng leh turin min thlah ve bawk.

Lalrinawmi te kawta bike kan hun daih avangin Mala chu a phei nghal a, hrilh chawp rual kan ni tawh lo ve bawk a ni. Hmingthansangi chuan kawngka pel lova min mangṭhain luh leh mai a tum a, ka chelh rang hle. A ṭang ve phat bawk. "Vawiinah ka sawi chian viau kha." Ka ti sup. Nawr luih viau ka tum loh rualin min namnul mai mai chu ka duh lo. Min duh turin ka nawr lui thei lo, mahse ka hun ṭha neih hi bawhpelh ka tum lo thung.

"Min thlah phawt teh." A ti hlak a, kawngka khar phawt tura ka tih ve tlat avangin a khar phui rualin ka thlah ve nghal. "Eng angah nge min ngaih a?" A tih lai chuan ka melh ngur a, min ngaina vak lo tih a lan danah a hriat viau bawk. In chhunga a mizia nen chuan a dang leh daih tawh. "Nula hmelṭha tak angin." Ka ti a, a mitah tak ka la en reng. "Chutiang lamin ka sawi lo. Min zuam hlek suh aw. I ti sual viau ang." A tih lai chuan ka lo nuih a, a lawm lo hmel viau bawk.

"Ka uang lo a nia." 

"Kei pawh ka uang hleinem."

" A ṭha a nih chu!" A ti hmuk tawh mai. "A ṭha hleinem. Min en dan hi a ṭha lo a nia. Ka en ang che hian min en ve rawh." Ka tih chuan,"I lerh a nih mai chu." A lo ti hmanhmawh. A awlsam dawn lo tih hresa ka ni bawk a ka hnual phah lem lo. 

"Ka lerh loh chuan ka bialnu i ni thei dawn lo a sin." Ka tih lai chuan min ei lo hmel mai mai khawp a. A nuih a ti za zawk. A mizia hi Lalrinawmi sawi ang deuh khan belhchian tham tak a ni. A puitling viau a, a naupang chhia ru viau bawk si. A lawmawm tih hian a fun kim ber ang. A lua tuai zauhin lut tawh turin ka ti a, zankhatna a tan chuan a tawk viau a ni. Hawi let lovin Mala awmna lam ka pan ve nghal, thui pawh ka kal hmain kawngka khar ri ka hria a, ka nuih a za viau. Ka nui phei vur vur chu Mala'n eng nge thleng min lo zawt nghal a,"Tlang lawn tur ang vel ka ni." Ka tih chuan a nuih a za ve hle. "A phurawm dawn khawp a lawm." A lo ti ve a.

Ka room a ka luh rualin Hmingthansangi ka call nghal, message chuan min chhan leh pawh ka ring lo. Phone call meuha ka biak takah chuan min chhang ve leh mial a. Ka thlen chiah thu ka sawi ve thlap. "Um a ṭhat chu." A ti liam mai a. Phone a dah daih lo chu ka lawm hle. "I ngaihawm nghal der mai." Tia ka uan takah chuan,"Va tenawm reuh e." Phone a dah hla tih hriat takin hrilhfiah a har deuh...a hmet tawp nghal daih zui. A ṭawngkam chu huatah pawh ka la lo, ka nuih a ti zain ka làwm em em zawk.

Hna lamah ka buai chho leh viau a. Mala pawh a hnathawhna lamah a let leh tawh. Hmingthansangi te ina lenna hun ka nei leh ta miah lova, thla khat dawn chu a vei ve leh der. Ka message min chhang let ve tawh a,min zawt lo mah se ka tih tur te ka sawi ve ziah a,"E" a tih loh leh,"A nih chu." Tih hlirin min chhang a, lehlam zawng tak chuan a nuizatthlâk ang reng. A hma anga ka message te en loa dah tawp a chin tawh loh avângin hmasawnna ropui takah ka ngai.

Bungraw laa ka zin haw zanah a thil tur ka hawn nen ka chhuak nghal a. Ka chhungte chuan zawhna an ngah viau dawn tih ka hre sa. Ka zin haw zanah chuan ka room ka chhuahsan peih tawh ngai lo kha a nia. Ka ute nupa pawh an boruak a ziaawm sawt hle a, Ka u chuan engmah min sawipui leh tawh lo nain ULawmi chuan lawmthu min hrilh a, lawmthu sawi chu a ṭul ka ti ve lem lo.

Hmingthansangi ngeiin kawngka lo hawngin, min hmu chu mak a tih ve hmel deuh. Kan inhmuh hnuhnun ber aṭangin hun a vei ve leh nual tawh. Ka biak loh aṭangin karhnih dawn a vei tawh bawk. Ka biak tak loh aṭang khan min ngaihtuahna chin a neih ve ka'n ring ringawt a. 

"Ka lo lut." Ka tih rual chuan a tawlh sawn nghal hrut. "Ka lo beisei lo lutuk che a." A ti ve ngei. Thutkhawmna pindan lam panin kan inzui a, zanin chu midang hmuh tur an awm lo. Ka hawi kual deuh chu min hmu ni hmiang,"UHruaitei chu a ṭhiannu Birthday party na lamah a kal a. Ka nau chu lehkha a zir. Ka nu a nuam sam lo deuha ka pa nen an mu hma a." A ti fel at a. 

"Hei i ta tur." Tiin a malchungah chuan bawm lian vak lo ka khai chu ka nghat a. Mak ti hmel zeta min lo en chuan a hmelṭha zual sawtin ka hria. "Tak tak maw?" Tih pahin a hawng a, a duh zawng a ni lo ang tih ka hlau rilru hle. Bracelet bawm chu phawrhin nalh a ti ve hle tih ka hmuh chuan ka thawveng ru huai. "Ka lawm e. Lawmthu sawi chiam dan hi ka thiam lova. Ka lawm lutuk." A ti a. A mitmengah chuan a lawm tak zet tih ka hmuh thiam ve avangin nuam ka ti. "A nih chuan thingpui tal chu ka hlawh phak ang chu maw." Ka tih chuan chokalam a pan ve nghal. Thingpui chhuan a nghah chhungin a lo phei leh a. "Hawng la ka lo bun tir ang che." Ka tih chuan a hawng ve vat. Ka rin ang chiahin a inhmeh hle.

"Hmeichhe duh zawng chu i hre hle mai." A ti kher a. Ka huattawk a tling hle. "Ka vawikhat leina a nih kha." Ka ti hmuk a. A lo nui var var ka hmuh chuan chal ti chuar tupin ka en reng. "I lei fu tawp." A tih leh rual chuan pawm beh nawk mai chu ka chak, mahse a hun ber si lo. Ka lawm vak lo tih a hriat chuan a nuih a za zual sauh a,"Thingpui chhuan a so." Ka ti hmuk ringawt. La nui reng chungin a phei ve nghal tho a. Thingpui chhuan so hlim a rawn chhawp chu ama ta tur banin a in nghal mai a. A sat avangin ka inngam mai lo. "Tui ka pawlha i pawlh ve duh em?" A ti heu mai. "Thingpui in ve a tui pawlh te chu a pâ lo em mai." Ka tih chuan a nuih a za leh hle. Keiin a nui hmel chu duhtawkin ka lo thlir thung a. "I nuihzatthlâk reuh e." Te chu a la ti deuh deuh. Kei ai a naupang tih a theihnghilh nge maw ni.

A thingpui tur a in leh lai chuan,"Bialpa eng zat nge i neih tawh?" Ka ti a, a thil in lai hâkin a khuh zui bawrh bawrh. A hnungah na lo têin ka chum dat dat a, "I ngah tawh viau a ni maw?" Ka tih chuan a lawm lo hmel chu nuih lo turin ka insum hram hram. "Nei ve nual tawh." Ka rin loh deuha a tih avângin ka nuih za a reh hmak. 

"Eng zat?" 

"I dilchhut e."

"A pawimawh a lawm."

"Kei paw'n ka zawh loh che hi."

"Kei chu pali ka nei tawh. I sawi ve hun." Ka tih chuan ka ṭawngkam naupangchhia zet chu ka hrechhuak nghal. 

"I va'n ngah tawh em em." Mak ti hmel deuhin a la ti zui a.

"Eng zat nge nang?" Tia ka zawh leh pawh chuan a sawi duh tlat lo. Thingpui ka inzo ve chiah bawk nen ka tho hluai a, haw ka tum thu ka sawi chuan a hrilh hai ve hmel deuh. Mahse engmah a sawi lo, a der talin min chelh se chu ka la ṭhu lui ve ang. Mahse ka taksa hian chawlh hahdam a mamawh ber, ka sawi lang duh lo thung. Kawngkalam pana ka kal chu ngawi rengin min zui ve a. Ding khawmuang miah loin ka chhuak tlang a,"Sangzual!" Kawngka bul aṭanga a rawn tih chuan ka leh hawi vat. Ka hminga min koh vawikhatna a nih angin keimahah eng emaw danglam a awm tih chu phat rual a ni lo. Chu tia ka haw thut tur chu a inthiam lo ve deuh niin ka hria, a hmelah chuan nuam a ti chiah lo tih a hriat theih tlat. "Muttui." Tih zawng sawiin a lut a, kawngka a khar nghal. Eng emaw zawng taka min ngaihtuah zui ka ring hmiah.

In ka thlen ve leh message in ka thlen tawh thu ka hrilh. Ka biak hun chang ang hrimin min chhang let rang ve viau a, mahse ka be zui lo. Eng eng emaw chu a ngaihtuah thleng ve turah ngai ang.

Kan sumdawnna hi hmun khatah chauh a nih loh avângin buai hunlai chuan ka buai thei hle a; mahse,hrehawm ka ti lem lo. Hmingthansangi nen pawh WhatsApp kaltlangin kan inbe ve reng a, an ina lenna hun ka neih pawhin ka leng leh tawh rih lo. Message mai mai mah ni se min chhang ve zel te chu hmasawnna ropui tak a ni. Ninawm tur khawpin ka be ngai lova, ka bia a nih loh chuan min biak hmasak a tum bik ṭhak lo.

Chutiang chuan karhnih dawn chu ka be lo a, min biak a tum loh avângin kan inbe lo rei leh hle tawh. Thla tawp dawnah hi chuan accounting lam ka enpui ve vek avangin ka inkhalh kual ve leh zak zak zel a, ka buaipui tawp ber nia ka haw tur chu Hruaitei leh Hmingthansangi te nen kan inhmu hlawl. Hruaitei zawk chuan min lo hmuin min be zui luam a, Hmingthansangi erawhin kan ṭawng a lo ngaithla satliah ve mai niin ka hria. Zana ka len tur thu sawiin kan inkalsan a, scooty an ken avangin thlah an ngai lo, ngai pawh ni se ka thlah hreh loh tehlul nen. 

Zanah chuan ka leng ta ngei. Pa ber hoa awm ṭhap an nih avângin boruak chu a dang deuh. Tv kan en ṭhap a, mâkpa interview hmachhawn ang tak takah ka inchan. Dar 9 pelh hretah haw ka tum a, Hmingthansangi tih loh chuan min chelh der vek. Ani erawh ka luh tirh aṭangin a ṭawng mang lo. 

Pawn thleng chu min thlah ve leh thlap lawi a. 'Muttui' tia ka thlah hnua ka kal tur chu a ṭum hnih nan min au ding leh. Ka kal hla hman lo nain step aṭangin a rawn chhuk hniam deuh a,"Ti nge i lo len?" Leh khauh mai a. A hmel a thu tak em avangin ka nui duh lo. "Ka rawn rim che." Ka ti ṭha ve mai. "Ila beidawng lo maw?" A ti a, mak a ti hmel tak takin ka hria. 'Ka beidawng dawn lo lutuk.' tia chhan ka duh a, mahse tun dinhmunah chuan chhanna ṭha ber a ni rih lo. Chiang taka enin,"Beidawng turin min duh em?" Ka ti a, ani pawhin min en uluk hle. "Min chhang la." A ngawih reng avanga ka tih leh chuan,"Duh lo." A ti sep. A ṭawng ring lo nain ka bengah chuan a ring hle. Ka lungphu tidanglam tur khawpin a fiah ṭha tawk viau bawk.

A lu a tuai sakin, "A nih chuan ka beidawng lo vang." Ka ti a. Min la en uluk viau bawk. "I beidawng daih emaw ka tia." A ti leh a. Mahni inringtawk ṭhin tak kha a ang lo. A rilru ka hrethiam ta uar mai. Hnara hlit phawi ang huai a ni. A biang ka khuap lai chuan a tal sawn lova, min ngaichâng a ni zawk mah. A chalah ka fawp a,"Ka lo bia ang che. Va lut tawh la." Ka tih chuan Khawvelah a mawi ber ang tih tur khawpa mawiin a nui sêih a, ka thlah rual chuan "Ka bialpa i ni duh em?" A rawn ti hlawl. "Ka sawi awmzia chu, ka duh che." A tih leh phei chuan ka lungphu hi a zuang chhuak mai dawnin ka hria. A thusawi chu ka beisei loh lutuk a ni tih a hrethiam tih hriat takin a insawifiah lehnghal a,"Ka sawi chhan chu ngaihzawng neih dawn chuan neih mai mai ka duh lova. Min fiam mai mai loh a min beidawn san dawn lo a nih chuan ka bialpa i ni duh ang em ka tihna a nia. Bialpa ka nei ngai lova...." A tih lai chuan lo pawt chatin,"Aw ka ni duh a lawm. I hre tho ang a,kei pawhin ka duh che. Ka bialnu ni turin ka duh lutuk che." A zam luatah a insawi buai zo vek dawna ka hriat avangin ka inrawlh vat. Kei pawh eng ka ang lo ka zâm lutuk ringawt. Hetiang em em hian hmeichhe hmaah a zâm theih a ni tih pawh ka lo hre ngai lo.

"Ka bialnu i nih dawn chuan kiss ka phu ve lo maw?" Ka tih chuan a ner sak. "A ho e a." A zah zela a thu rawn sawi chuan ka nuih a ti za hle. Zanin a tan chuan a zahna tur belhchhah loh phawt a ṭhain ka hria. "Lut tawh rawh le. Muttui aw ka bialnu." Ka tih chuan a laih viau ka rin laiin chiang zetin min en a."Muttui." tiin in chhungah a lut nghal. A che zia leh ṭawngkam hman te lawmawm lutuk chu ngaihtuah letin mahni chauh chuan ka nui ka nui ringawt. Mahni inringtawk ve tak a ni bawk a,a duhnaah chuan a rilru a kalkhat ve hmiah zel tih chu a hriat nghal viah mai.

In ka thlen ruala ka message dawn hmasak ber chu,"Ka thin a phu nasa lutuk a." Tih a ni. Ka nuih a va han ti za mai mai tak! Thu khuh a nei lem lo tih chu ka hre tawh a, hetiang tak hian a lawmawm ang tih ka ring ngai lo. Min la tih hlim zel ka beisei.

Kan kum a naupang zawk zawk tawh lo bawka kan chhungte ve ve pawhin an hre har lo. Ka be tam telh telh a, Lalrinawmi thusawite kha a dik zia ka hre fiah tulh tulh niin ka hria.

Ka nu leh pa te piancham lawm turin kan inbuatsaih a, an piancham a inan avang hian kum tin deuh thaw hian ho lam taka hun hman liam a ni ngai lo. Hmingthansangi pawh hruai ve ngei ka tum. A hmaa ka u te nen boruak dang deuh an neih avang khan a huphurh zual hle tih ka hria a, mahse ka thlah leh mai mai loh tur a nih angin ka chhungte nen boruak ṭha tak nei se ka duh. 

Chhungkaw rual tak tia sawi tur ni lem lo mah ila ka pa unau te ho hi sawi duah tham an awm ve avangin chaw ei tur pawh kan ṭhahnem hmel hle. ULawmi'n a cousin Nupuii a sawm ve a, a ṭangkai viau rualin ka duh aiin min hnaih mah mah ṭhin. Thawkkhat lai khan ka be uluk ve deuh hlek a, ULawmi leh Mama inneih hma daih tawh khan. Mahse a mizia ka hriat leh hnuhnawh avangin ka bansan vang vang kha a nia. Mumal taka ka ngaihzawng tia sawi tur khawp a nih loh avângin ka bialnu hlui te zinga chhiar tel chiah pawh ka ngai lo.

Hmingthani hruai tumin Bike la chhuak turin pawnah ka awm a, a phone call ka dawn ve chiah avangin ka chhang nghal. "Lo hruai che ka tum chiah a." Ka tih chuan,"I buai dawn sia keimahin ka lo kal thei tho a lawm. In kawtah min lo nghak la. Ka lo thleng har lo ang." A ti a. A lo kal tawh miau chuan tiin ka 'Aw' ve mai. Hmeichhe tam takin an bialpate an phûtnaah hian ani chuan mahnia a tih theih chhung chu tih a tum ṭhin. A tih theih reng pawh tih sak ka duh ṭhin avangin thil ṭhenkhatah hi chuan ka nawr luih a ngai zawk ṭhin bawk. A chang chuan ngaihtuah ngai deuh ni ve se tih chang ka nei rum rum;Mahse, a mizia zawng zawng te hi a inhmeh ka tiin ka duh phah viau thung. Ka thikthu a chhe viau a. Ka lungawi loh pui ve deuhah te pawh hian ama thiam loh a ni lo tlangpui bawk.

Tih tur dang midang kuta ka dah vek tawh avangin Hmingthani nghah pah chuan naupang ho ka infiam pui a. Minute 15 a liam hnu chuan kan inkawtah bike rawn dingin, a hnung aṭang chuan Hmingthansangi a chhuk thla nalh. A thlah tupa chu tu nge a nih ka hriat chian em avangin ka lawm lem lo khawp mai. Hmingthansangi chuan a bula mi chu lawmthu hrilh ni awm takin a bia a, ka pa a pek tur present bawm khai chungin min rawn pan ve nghal. Min nuih angin ka nuih let ve chak hlawl lo. Kan awmna hmunin a zir lo em a, khapa inthlah tir a duh avanga ka hruai pawh duh lo a nih te ka ring rum rum.

"Ka ril a ṭam lutuk a dawrah ka chawl kawi a. Bta khan min lo hmu sia a ngai lo ka ti chungin min nghak lui tlat sia ka chuang ve mai mai a nih kha." A ti a. Amah ring tura min duh zia ka hmu thiam a, mahse chu chuan ka lungawi lohna a nawh reh phah lo. Ka nu leh pate bulah ka hruai a, rin aiin an inbe thei phian. Present te chu inhlanin chokalamah ka phei pui a, an hming ka sawi te chu a chibai kual ve zel bawk. Ka room lama awm ka rawt chuan a duh lo nghal pang, eng thil ṭha lo mah tih pui tum lem lo mah ila a duh loh chuan ka nawr lui lovang. 

Hunserh hman zawh hnuin Mamate nupain nau an pai thu an puang a, kan hlim tlang khawp mai. Ka nu phei chu a mittui a tla hial. Hmingthansangi nen erawh kan boruak a ṭha zan lo, kha pa Bta teh hrep kha tu nge a nih ka hrechiang em a. Hmingthani hi a tleirawl lai aṭangin a nghak tawh tih ka hre ve, Hmingthansangi ka hmuh phawt loh hi chuan ka rilru ka kawmna lamah a rilru a hneh mai ang tih hlauhna ka nei leh ṭhin. Midang zawng zawng lakah chuan inngeih hmel takin awm mah ila, ka lungawi loh ruk miau avangin kan pahnih chuan kan boruak chu kan hrechiang dun viau thung. A inthlahrun phah tih thlengin ka hria. Midang nen an inkawm thei viau tih ka chian hnuah kan makpa te pui turin choka lamah ka kal ve a, Hmingthani hmelṭha an tih thu min hrilh ve sap sap hlawm, hriat hrehawm tak a ni lem lo bawk. 

Naupang te nen chuan kan ni del dul bawk nen chaw ei hrim hrim pawh kan ṭhahnem ang reng. Ka kal sawn kara Hmingthani leh Nupuii inkawm chawt chu ka ngaimawh ru hle a, pawh hran ngawt lah thil tih chi a ni ber lo. Mahse Hmingthansangi chu mi fing pangngai tak a ni a, engmah danglam angin a awm lo. Haw tura kan inthlah meuh chuan zan dar 10 a ri hnai tawh. 

Ngawi rengin car ah kan chuang dun a, kan ṭawng chak lo tih chu a hriat nghal pang. Min en leh zeuh zeuh ṭhin tih ka hriat chuan sawi duh a neih chuan sawi turin ka ti a. "Nupuii khan in chan chin min hrilh a." A ti a. "Sawi tur a awm pawh ka lo hre lo." Ka tih san ringawt. Ani pawh a ngawi zui leh daih bawk. An veng chhung kan luh hnuah a hrawk thian leh phawtin,"Thinrim tawh lo la." A ti a. Kha pa ber kher kha chu en liam harsa ka tih em avangin ka ngawi reng. "Nuam ka ti lo a nia. Ka tihsual ka pawm ka tihpalh. Ka hmelhriat loh angin ka en tawh ang." Tiin min tih lungawi a tum a, hmelhriat loh angin a en thei kher dawn lo tih chu kan hrechiang ve ve, midang chungchanga kan buai a kan sawi chhuah ṭhin a nih avângin kan lungawi ve leh mai zel a. Rilru nuam lo deuha awm tir reng ka duh bik loh avangin ka inthunun ve hram hram bawk.

"Kan thleng." Tiin an inkawt hlat deuh hlekah ka din pui a, chhuk tumna a nei chuang lo. "Kei pawh thinrimna tur ka nei ve tho." A ti a, chal chuar tapin ka en reng ringawt. "Bialnu pali i nei tawh i ti a. Nupuii nen chuan panga." tiin kuangkuah thanin a ṭhu a,"Nupuii te kha chu bialnuah pawh ka chhiar lo." Ka tih chuan,"I lerh reuh mang e aw...." Pawi ti hmel takin a lo ti vang vang. A duhna chinah hi chuan duhthusamin a nghal thiam. A kutah ka chelh sak a, chiang zeta kan inen lai chuan,"Innei tawh mai ang." A rawn ti! Eng tia dawn sawn tur nge pawh ka hre lo! "Chu te chu ka sawi hun nghak ta che!" Ka ti hluk. Ka thinrim tak tak lo tih a hrechiang a, a nuih a za hle. A nui hmel chu enin ka nuih let ve a. "Ka thau tulh tulh a ka biangsum pawh a bo tial tial hi. Chuvangin inneih vat a ngai." A tih leh chuan insum zo lovin ka nui chhuak a. Min sawi chhuah khalh tak nain ka inpeih ru viau tawh. "Hmingthansangi hi Rosangzuala nupui ni turin a inpeih tawh tak zet em?" Thu tak zawka ka tih chuan, nghet takin ka kut a chelh let a, "Tak zet." Tiin, hlim tih hriat takin a bu nghat. 

An ina thlah ngai lova in pakhat pana kan haw dun hun a thleng ve dawn tawh niin a lang. Chu mi hun chu ka nghakhlel tawh hle bawk.

***The End***